Jeremias 20:1-18
20 Ang saserdote nga si Pasur nga anak ni Imer, nga amo ang panguna nga nagadumala sa balay ni Jehova, nagapamati sang magpanagna si Jeremias sini nga mga butang.
2 Dayon ginbunal ni Pasur si Jeremias nga manalagna kag ginbutang sia sa pandog+ sa Ibabaw nga Gawang sang Benjamin, nga yara sa balay ni Jehova.
3 Pagkadason nga adlaw, sang ginkuha ni Pasur si Jeremias sa pandog, nagsiling si Jeremias sa iya:
“Indi na Pasur ang itawag ni Jehova sa imo, kundi Kahadlok sa Palibot.+
4 Kay amo ini ang ginasiling ni Jehova, ‘Pahanabuon ko nga mahadlok ka kag ang tanan mo nga abyan, kag makita mo nga mapatay sila sa espada sang ila mga kaaway.+ Itugyan ko ang bug-os nga Juda sa hari sang Babilonia, kag dalhon sila nga bihag sa Babilonia kag ang iban patyon paagi sa espada.+
5 Ihatag ko sa ila mga kaaway ang tanan nga manggad sini nga siudad, ang tanan nga ginapanag-iyahan nila, ang tanan nga malahalon nga pagkabutang nila, kag ang tanan nga bahandi sang mga hari sang Juda.+ Panguhaon ini sang mga kaaway kag dalhon sa Babilonia.+
6 Kag ikaw Pasur, bihagon ka nila, pati na ang tanan nga nagaistar sa imo balay. Dalhon ka sa Babilonia kag didto ka mapatay. Didto ka man ilubong upod sa tanan mo nga abyan, bangod nagpanagna ka sing kabutigan sa ila.’”+
7 Gindayaan mo ako, O Jehova, gani nadaya ako.
Gingamit mo ang imo kusog sa akon, kag nagdaug ka.+
Nangin kaladlawan ako sa bug-os nga adlaw;Ang tanan nagayaguta sa akon.+
8 Kay kon maghambal ako sang imo pulong, nagasinggit ako kag nagasiling,“Kasingki kag kalaglagan!”
Bangod sang pulong ni Jehova, gin-insultuhan ako kag ginyaguta sa bug-os nga adlaw.+
9 Gani nagsiling ako: “Indi na ako magsambit sa iya,Kag indi na ako maghambal sa iya ngalan.”+
Apang sa akon tagipusuon nangin pareho ini sang kalayo nga nagadabdab sa akon mga tul-an,Kag ginkapoy ako sa pagpugong sini;
Indi ko na ini maagwanta.+
10 Kay madamo ako sing nabatian nga malain nga mga huringhuring;Makahaladlok ang kahimtangan sa palibot.+
“Pakamalauta sia; pakamalauton naton sia!”
Ang tanan nga tawo nga nagapakunokuno nga nagapakighidait sa akon nagabantay sang akon pagkapukan:+
“Basi madayaan sia,Dayon madaug naton sia kag makatimalos kita sa iya.”
11 Apang kaupod ko si Jehova nga pareho sa ginakahadlukan nga hangaway.+
Gani ang mga nagahingabot sa akon masandad kag indi magdaug.+
Mahuy-an gid sila, kay indi sila magmadinalag-on.
Indi gid malimtan ang ila wala katapusan nga kahuy-anan.+
12 O Jehova sang mga kasuldadusan, ginausisa mo ang matarong;Makita mo ang pinakamadalom nga panghunahuna* kag ang tagipusuon.+
Kabay pa nga makita ko ang imo pagtimalos sa ila,+Kay gintugyan ko sa imo ang akon kaso.+
13 Mag-amba kamo kay Jehova! Dayawa ninyo si Jehova!
Kay ginluwas niya ang imol* batok sa mga malauton.
14 Pakamalauton ang adlaw nga natawo ako!
Kabay pa nga indi pagpakamaayuhon ang adlaw nga ginbun-ag ako sang akon iloy!+
15 Pakamalauton ang tawo nga nagsugid sing maayo nga balita sa akon amay:
“Lalaki ang imo anak nga natawo!”
Nga nagpahalipay gid sa iya.
16 Kabay pa nga ina nga tawo mangin pareho sang mga siudad nga ginlaglag ni Jehova nga wala sing kaluoy.
Kabay pa nga makabati sia sing singgit sa kaagahon kag sing tunog sang sinyales sa udtong-adlaw.
17 Ngaa wala na lang niya ako ginpatay sa tiyan,Agod mangin lulubngan ko ang akon iloyKag ginabusong na lang niya ako tubtob san-o?+
18 Ngaa nabun-ag pa akoAgod makita lang ang kagamo kag kalisod,Kag mapatay sa kahuy-anan?+
Footnote
^ Ukon “pinakamadalom nga balatyagon.” Sa literal, “ang mga batobato.”
^ Ukon “kalag sang imol.”
