Jeremias 24:1-10
-
Maayo kag malain nga mga igos (1-10)
24 Sa tapos madala ni Hari Nabocodonosor* sang Babilonia bilang bihag halin sa Jerusalem pakadto sa Babilonia+ si Jeconias*+ nga anak ni Jehoiakim+ kag hari sang Juda, pati ang mga prinsipe sang Juda, ang sampaton nga mga trabahador, kag ang mga platero,* ginpakita sa akon ni Jehova ang duha ka alat sang mga igos* sa atubangan sang templo ni Jehova.
2 Ang mga igos sa isa ka alat maayo gid, pareho sang una nga mga igos. Apang ang mga igos sa isa pa ka alat kalain gid, tuman kalain amo nga indi makaon.
3 Dayon ginpamangkot ako ni Jehova: “Ano ang nakita mo, Jeremias?” Nagsabat ako: “Mga igos; ang maayo nga mga igos maayo gid, apang ang malain nga mga igos kalain gid, tuman kalain amo nga indi makaon.”+
4 Nagsiling si Jehova sa akon:
5 “Amo ini ang ginasiling ni Jehova nga Dios sang Israel, ‘Pareho sining maayo nga mga igos, pakitaan ko sing kaayo ang mga bihag halin sa Juda nga gintabog ko sa sini nga lugar kag gintapok sa duta sang mga Caldeanhon.
6 Bantayan ko sila kag pakitaan sing kaayo, kag pabalikon ko sila sa sini nga duta.+ Tukuron ko sila kag indi ko sila paggub-on. Itanom ko sila kag indi ko sila paggabuton.+
7 Hatagan ko sila sing tagipusuon nga nakakilala sa akon nga ako si Jehova.+ Mangin katawhan ko sila, kag mangin Dios nila ako,+ kay magabalik sila sa akon sa bug-os nila nga tagipusuon.+
8 “‘Apang tuhoy sa malain nga mga igos nga tuman kalain amo nga indi makaon,+ amo ini ang ginasiling ni Jehova: “Amo man ang himuon ko kay Hari Sedequias+ sang Juda, sa iya mga prinsipe, kag sa mga nabilin sa Jerusalem nga nagaistar sa Juda kag sa mga nagaistar sa Egipto.+
9 Himuon ko sila nga butang nga kahadlukan sang tanan nga ginharian sang duta+ paagi sa kalamidad nga ipadala ko sa ila. Pakahuy-an sila, tamayon, yagutaon, kag pakamalauton+ sa tanan nga lugar diin paalaplaagon ko sila.+
10 Kag ipadala ko batok sa ila ang espada,+ gutom, kag balatian,+ tubtob malaglag sila sa duta nga ginhatag ko sa ila kag sa ila mga katigulangan.”’”
Footnote
^ Sa literal, “Nabocodorosor,” lain pa nga pagtigbato.
^ Ginatawag man nga Jehoiakin kag Conias.
^ Ukon mahimo, “manunukod sang mga pamakod.”
^ Bunga sang kahoy nga higuera.
