Jeremias 35:1-19
-
Mga Recabnon, huwaran sa pagtuman (1-19)
35 Sang nagahari sa Juda si Jehoiakim+ nga anak ni Josias, may mensahe si Jehova kay Jeremias, nga nagasiling:
2 “Magkadto ka sa panimalay sang mga Recabnon,+ kag silinga sila nga magkadto sila sa isa sa mga kalan-an* sa balay ni Jehova; dayon paimnon mo sila sing alak.”
3 Gani ginpakadto ko si Jaazanias nga anak ni Jeremias nga anak ni Habazinias, ang iya mga utod, ang tanan niya nga anak, kag ang bug-os nga panimalay sang mga Recabnon,
4 sa balay ni Jehova. Gindala ko sila sa kalan-an sang mga anak ni Hanan nga anak ni Igdalias, nga alagad sang matuod nga Dios, nga yara sa tupad sang kalan-an sang mga prinsipe sa ibabaw sang kalan-an ni Maaseias nga anak ni Sallum nga manugbantay sang puertahan.
5 Dayon nagbutang ako sa atubangan sang mga lalaki sa panimalay sang mga Recabnon sing mga kopa kag mga tagayan nga puno sang alak kag nagsiling ako sa ila: “Mag-inom kamo sing alak.”
6 Apang nagsiling sila: “Indi kami mag-inom sing alak, bangod si Jehonadab*+ nga anak ni Recab, nga amon katigulangan, nagsugo sa amon, ‘Indi gid kamo mag-inom sing alak pati ang inyo mga anak.
7 Kag indi gid kamo magpatindog sing balay, magsab-ug sing binhi, ukon magtanom sa ulubasan ukon magpanag-iya sini. Sa baylo, dapat kamo mag-istar pirme sa mga tolda agod magkabuhi kamo sing malawig sa duta diin nagaistar kamo bilang mga dumuluong.’
8 Gani ginatuman namon ang tanan nga ginsugo sa amon ni Jehonadab nga anak ni Recab nga amon katigulangan, nga indi gid kami mag-inom sing alak—kami, ang amon mga asawa, kag ang amon mga anak.
9 Kag wala kami magpatindog sing mga balay nga istaran, kag wala kami sing mga ulubasan ukon mga uma ukon mga binhi.
10 Padayon kami nga nagaistar sa mga tolda kag ginatuman namon ang tanan nga ginsugo sa amon ni Jehonadab* nga amon katigulangan.
11 Apang sang ginsalakay ni Hari Nabocodonosor* sang Babilonia ini nga duta,+ nagsiling kami, ‘Dali kamo, masulod kita sa Jerusalem agod makapalagyo kita sa mga soldado sang mga Caldeanhon kag sang mga Sirianhon,’ gani nagaistar kami subong sa Jerusalem.”
12 Kag may mensahe si Jehova kay Jeremias, nga nagasiling:
13 “Amo ini ang ginasiling ni Jehova sang mga kasuldadusan, ang Dios sang Israel, ‘Lakat ka, kag isiling mo ini sa katawhan sang Juda kag sa mga pumuluyo sang Jerusalem: “Indi bala nga ginalaygayan kamo pirme nga magtuman sa akon mga pulong?”+ siling ni Jehova.
14 “Ginsugo ni Jehonadab nga anak ni Recab ang iya mga kaliwat nga indi mag-inom sing alak, kag gintuman nila ang iya ginsiling gani wala sila mag-inom sini tubtob sini nga adlaw, kay ginatuman nila ang sugo sang ila katigulangan.+ Apang nagapakighambal ako sa inyo sing sulitsulit,* pero wala kamo magtuman sa akon.+
15 Padayon ko nga ginasugo sa inyo ang tanan ko nga alagad nga manalagna, kag ginasugo sila sing sulitsulit,*+ sa pagsiling sa inyo, ‘Palihug untati na ninyo ang inyo malain nga dalanon,+ kag himua ninyo ang maayo! Indi kamo magsunod kag mag-alagad sa iban nga mga dios. Dayon padayon kamo nga magaistar sa duta nga ginhatag ko sa inyo kag sa inyo mga katigulangan.’+ Apang wala kamo magsapak ukon magpamati sa akon.
16 Ang mga kaliwat ni Jehonadab nga anak ni Recab nagtuman sa ginsugo sa ila sang ila katigulangan,+ apang ini nga katawhan wala magpamati sa akon.”’”
17 “Gani amo ini ang ginasiling ni Jehova, ang Dios sang mga kasuldadusan kag Dios sang Israel: ‘Pahanabuon ko sa Juda kag sa tanan nga pumuluyo sang Jerusalem ang tanan nga kalaglagan nga ginpaandam ko sa ila,+ kay nagpakighambal ako sa ila apang wala sila magpamati, kag nagpanawag ako sa ila apang wala sila magsabat.’”+
18 Kag nagsiling si Jeremias sa panimalay sang mga Recabnon: “Amo ini ang ginasiling ni Jehova sang mga kasuldadusan, ang Dios sang Israel, ‘Bangod gintuman ninyo ang ginsugo ni Jehonadab nga inyo katigulangan, kag padayon nga ginsunod ninyo ang tanan niya nga sugo, kag ginhimo gid ninyo ang tanan nga ginasugo niya sa inyo,
19 amo ini ang ginasiling ni Jehova sang mga kasuldadusan, ang Dios sang Israel: “Indi gid madulaan si Jehonadab* nga anak ni Recab sing kaliwat nga magaalagad sa akon.”’”
Footnote
^ Ukon “hulot.”
^ Sa literal, “Jonadab,” ang ginpalip-ot nga ngalan ni Jehonadab.
^ Sa literal, “Jonadab,” ang ginpalip-ot nga ngalan ni Jehonadab.
^ Sa literal, “Nabocodorosor,” lain pa nga pagtigbato.
^ Sa literal, “aga pa nagabangon kag nagapakighambal.”
^ Sa literal, “aga pa nagabangon kag ginasugo.”
^ Sa literal, “Jonadab,” ang ginpalip-ot nga ngalan ni Jehonadab.
