Job 4:1-21
4 Kag si Elifaz+ nga Temanhon nagsiling:
2 “Maakig ka bala kon may makighambal sa imo?
Kay sin-o ang makaagwanta nga maghipos lang?
3 Matuod, madamo ka sing gintadlong,Kag ginpabaskog mo ang maluya nga mga kamot.
4 Ang imo mga pulong nagapabangon sa nagakasandad,Kag ginapabakod mo ang mga tuhod nga maluya.
5 Apang karon sang natabo ini sa imo, nagapalangluya ka;*Nag-abot ini sa imo, kag nagakasubo ka sing tuman.
6 Ang imo bala pagtahod sa Dios wala nagahatag sa imo sing pagsalig?
Ang imo bala dalanon sang integridad+ wala nagahatag sa imo sing paglaum?
7 Palihug, dumduma ini: Sin-o ang nalaglag nga wala sing sala?
San-o natabo nga ginpapas ang matadlong?
8 Ang akon natalupangdan amo nga ang mga nagaarado* sing kahalitanKag ang mga nagasab-ug sing kagamo magaani sini.
9 Paagi sa ginhawa sang Dios nagakalaglag sila,Kag paagi sa iya tuman nga kaakig nagadangat sila sa ila katapusan.
10 Ang leon nagangurob, kag amo man ang bataon nga leon,Apang bisan ang mga ngipon sang makusog nga mga leon* nagakabingaw.
11 Ang leon nagakapatay bangod wala sing matukob,Kag ang mga totoy sang leon nagaalaplaag.
12 Karon may ginhambal sa akon sing tago,Kag ginhutik ini sa akon dulunggan.
13 Makatulublag ini nga mga butang sa mga palanan-awon sa kagab-ihon,Samtang ang mga tawo nagatulog sing mahamuok,
14 Nagpalangurog gid ako,Kag napuno sing kahadlok ang akon mga tul-an.
15 Kag may espiritu nga naglabay sa akon nawong;Nagpalanindog ang akon balahibo.
16 Nagdulog ini,Apang wala ko makilala ang dagway sini.
May garhom sa atubangan sang akon mga mata;Nagluntad ang kalinong, kag nakabati ako sing tingog:
17 ‘Mas matarong pa bala ang mamalatyon nga tawo sangsa Dios?
Ukon mas matinlo pa bala ang tawo sangsa Isa nga naghimo sa iya?’
18 Wala sia sing pagsalig sa iya mga alagad,Kag ginasumbong niya ang iya mga anghel.*
19 Daw ano pa ang mga nagaistar sa mga balay nga human sa daga,Nga napasad sa yab-ok,+Nga madali dugmukon subong sang sapatsapat nga nagapang-ut-ot!
20 Halin sa aga tubtob sa gab-i ginadugmok sila;Nagakapapas sila sing dayon nga wala sing nakatalupangod.
21 Indi bala nga kaangay sila sang tolda nga gingabot ang banting?
Nagakapatay sila nga wala sing kaalam.
Footnote
^ Sa literal, “ginakapoy ka.”
^ Ukon “nagapahito.”
^ Ukon “sang may bungaybungay nga bataon nga mga leon.”
^ Ukon “mensahero.”
