Job 5:1-27
5 “Palihug, magpanawag ka! May nagasabat bala sa imo?
Sin-o sa mga balaan ang dangpan mo?
2 Kay ang buangbuang ginapatay sang kaakig,Kag ang makitid sing pamensaron ginapatay sang kahisa.
3 Nakita ko ang buangbuang nga nagbakod,Apang hinali lang nga ginpakamalaut ang iya puluy-an.
4 Ang iya mga anak malayo sa kaluwasan,Kag ginadugmok sila sa gawang sang siudad,+ nga wala sing nagaluwas sa ila.
5 Ang iya ginaani ginakaon sang tawo nga gutom,Bisan ang iya karne sa kaw-it sang manug-ihaw ginakuha sang iban,Kag ang ila palangabuhian daw ginadakop sang siod.
6 Kay ang makahalalit nga butang wala nagahalin sa yab-ok,Kag ang kagamo wala nagatubo sa duta.
7 Kay ang tawo natawo sa kagamo,Subong nga ang alipalok nagalupad paibabaw.
8 Apang, kon ako sa imo, madangop ako sa Dios,Kag itugyan ko sa Dios ang akon kahimtangan,
9 Nagahimo sia sing daku nga mga butang nga indi matungkad,Kag sing makatilingala nga mga butang nga indi maisip.
10 Nagahatag sia sing ulan sa dutaKag sing tubig sa mga uma.
11 Ginabutang niya sa mataas nga duog ang mga kubos,Kag ginabayaw sa mataas nga duog sang kaluwasan ang nasubuan.
12 Ginapaslaw niya ang mga pahito sang mga tuso,Agod indi magmadinalag-on ang binuhatan sang ila mga kamot.
13 Ginadakop niya ang mga maalam sa ila pagkamalalangon,+Agod magumon ang pahito sang mga malimbungon.
14 Ginadulman sila bisan sa adlaw,Kag nagapangapkap sila sa udtong-adlaw subong nga daw gab-i.
15 Ginaluwas niya ang mga tawo halin sa mga espada nga nagagua sa ila baba,Kag ang kubos sa kamot sang gamhanan,
16 Agod may paglaum ang mga kubos,Apang ginatakpan ang bibig sang mga indi matarong.
17 Malipayon ang tawo nga ginasabdong sang Dios;Gani, indi pagsikwaya ang disiplina sang Labing Gamhanan!
18 Kay sia ang ginatunaan sang kasakit, apang ginabugkusan niya ang pilas;Sia ang nagabali, apang sia ang nagaayo paagi sa iya mga kamot.
19 Luwason ka niya sa anom ka kalisdanan,Kag sa pito ka kalisdanan wala sing butang nga makahalalit nga magatandog sa imo.
20 Tubson ka niya sa kamatayon sa tion sang tiggulutom,Kag sa gahom sang espada sa tion sang inaway.
21 Amligan ka niya sa lapdos sang dila,+Kag indi ka mahadlok kon mag-abot ang kagulub-an.
22 Kadlawan mo ang kalaglagan kag ang tiggulutom,Kag indi mo pagkahadlukan ang mabangis nga kasapatan sa duta.
23 Kay ang mga bato sang latagon indi maghalit sa imo,*Kag ang mabangis nga kasapatan sang latagon magapakighidait sa imo.
24 Mahibaluan mo nga malig-on* ang imo tolda,Kag usisaon mo ang imo halalban kag makita mo nga wala ini sing kulang.
25 Magadamo ang imo kaanakan,Kag ang imo kaliwatan mangin madamo kaangay sang mga hilamon sang duta.
26 Mapatay ka nga indi madula ang imo kabaskog,Subong sang linaylay sang uyas nga ginatipon sa nagakaigo nga tion.
27 Amo gid ini ang natukiban namon.
Pamatii kag batuna ini.”
