Josue 14:1-15
14 Amo ini ang ginkuha sang mga Israelinhon bilang palanublion sa duta sang Canaan, nga ginhatag sa ila ni Eleazar nga saserdote kag ni Josue nga anak ni Nun kag sang mga ulo sang mga panimalay* sang mga tribo sang Israel.+
2 Ang palanublion sang siam ka tribo kag tunga ginpaagi sa pagabutgabot,+ suno sa ginsugo ni Jehova paagi kay Moises.+
3 Ginhatag na ni Moises ang palanublion sang duha ka tribo kag tunga sa pihak nga bahin* sang Jordan,+ kag wala niya ginhatagan sing palanublion ang mga Levinhon.+
4 Ang mga kaliwat ni Jose ginkabig nga duha ka tribo,+ ang Manases kag ang Efraim;+ kag wala nila ginhatagan sing parte nga duta ang mga Levinhon, apang ginhatagan sila sing mga siudad+ nga ila istaran kag sing mga halalban para sa ila mga baka kag iban pa nga kasapatan.+
5 Gani ginpartida sang mga Israelinhon ang duta, subong sang ginsugo ni Jehova kay Moises.
6 Dayon nagkadto kay Josue sa Gilgal+ ang mga lalaki sang Juda, kag si Caleb+ nga anak ni Jefone nga Keniznon nagsiling sa iya: “Nahibaluan mo gid ang ginsiling ni Jehova+ kay Moises nga alagad sang matuod nga Dios+ tuhoy sa akon kag tuhoy sa imo didto sa Kades-barnea.+
7 Nagaedad ako sing 40 ka tuig sang ginpadala ako ni Moises nga alagad ni Jehova halin sa Kades-barnea agod magpangespiya sa duta,+ kag pagbalik ko ginsugid ko kon ano gid ang matuod nga nakita ko.*+
8 Bisan pa ginpaluya sang akon mga utod nga kaupod ko ang buot sang katawhan, ginsunod ko si Jehova nga akon Dios sing bug-os tagipusuon.*+
9 Nagpanumpa si Moises sina nga adlaw: ‘Ang duta nga ginlatas mo mangin palanublion tubtob san-o para sa imo kag sa imo mga anak, bangod ginsunod mo si Jehova nga akon Dios sing bug-os tagipusuon.’+
10 Subong sang ginsaad ni Jehova,+ gintugutan niya nga mabuhi pa ako+ sa sulod sining 45 ka tuig sugod sang ginsaad ini ni Jehova kay Moises sang nagpanglakaton ang Israel sa kamingawan;+ kag 85 anyos na ako subong.
11 Ang akon kabakod subong pareho gihapon sang adlaw nga ginpadala ako ni Moises. Pareho gihapon sang una ang akon kusog, para sa pagpakig-away kag para sa iban pa nga mga hilimuon.
12 Gani, ihatag sa akon ining kabukiran nga ginsaad ni Jehova sadto nga adlaw. Bisan pa nabatian mo sadto nga adlaw nga may mga Anakim+ didto kag ang ila mga siudad dalagku kag may mabakod nga depensa,+ pat-od* nga magaupod sa akon si Jehova,+ kag tabugon ko sila, subong sang ginsaad ni Jehova.”+
13 Gani ginpakamaayo ni Josue si Caleb nga anak ni Jefone kag ginhatag sa iya ang Hebron bilang palanublion niya.+
14 Amo kon ngaa ginapanag-iyahan ni Caleb nga anak ni Jefone nga Keniznon ang Hebron bilang iya palanublion tubtob sini nga adlaw, bangod ginsunod niya si Jehova nga Dios sang Israel sing bug-os tagipusuon.+
15 Ang ngalan anay sang Hebron amo ang Kiryat-arba+ (si Arba amo ang pinakabantog nga tawo sa mga Anakim). Kag nangin malinong ini nga duta.+
Footnote
^ Ukon “panimalay sa bahin sang amay.”
^ Sa sidlangan nga bahin.
^ Sa literal, “kon ano ang yara sa akon tagipusuon.”
^ Sa literal, “sing bug-os.”
^ Ukon “mahimo gid.”
