Josue 17:1-18
17 Dayon nagabutan+ ang duta para sa tribo ni Manases,+ bangod sia ang panganay+ ni Jose. Sanglit si Maquir+ nga panganay ni Manases kag amay ni Gilead isa ka soldado, nabaton niya ang Gilead kag ang Basan.+
2 Nagabutan ang duta para sa iban pa nga mga kaliwat ni Manases suno sa ila mga pamilya, para sa mga anak ni Abi-ezer,+ sa mga anak ni Helek, sa mga anak ni Asriel, sa mga anak ni Siquem, sa mga anak ni Hefer, sa mga anak ni Semida. Amo ini sila ang mga kaliwat ni Manases nga anak ni Jose, ang mga lalaki suno sa ila mga pamilya.+
3 Apang si Zelofehad+ nga anak ni Hefer, nga anak ni Gilead, nga anak ni Maquir, nga anak ni Manases, wala sing mga anak nga lalaki kundi mga babayi lang. Amo ini ang mga ngalan sang iya mga anak nga babayi: si Mala, si Noa, si Hogla, si Milca, kag si Tirza.
4 Gani nagkadto sila kay Eleazar+ nga saserdote kag kay Josue nga anak ni Nun kag sa mga pangulo, kag nagsiling sila: “Si Jehova ang nagsugo kay Moises nga hatagan kami sing palanublion sa tunga sang amon mga paryente nga lalaki.”+ Gani ginhatagan niya sila sing palanublion sa tunga sang mga utod nga lalaki sang ila amay, suno sa sugo ni Jehova.+
5 May napulo pa ka bahin nga ginhatag man kay Manases luwas pa sa duta sang Gilead kag Basan, sa pihak nga bahin* sang Jordan;+
6 kay ang mga babayi sa tribo ni Manases nakabaton sing palanublion upod sa iya mga kaliwat nga lalaki, kag ang duta sang Gilead ginpanag-iyahan sang iban pa nga mga kaliwat ni Manases.
7 Ang dulunan ni Manases nagasugod sa Aser tubtob sa Micmetat,+ nga nagaatubang sa Siquem,+ kag ang dulunan nagapakadto sa bagatnan* sa duta nga ginaistaran sang mga pumuluyo sang En-Tapua.
8 Ang duta sang Tapua+ iya ni Manases, apang ang siudad sang Tapua sa dulunan ni Manases iya sang mga kaliwat ni Efraim.
9 Dayon ang dulunan nagapakadto sa bagatnan sa Nalupyakan* sang Kana. May mga siudad si Efraim sa tunga sang mga siudad ni Manases,+ kag ang dulunan ni Manases yara sa aminhan sang nalupyakan, kag ang punta sini amo ang dagat.+
10 Ang sa bagatnan iya ni Efraim, kag ang sa aminhan iya ni Manases, kag ang dagat amo ang iya dulunan,+ kag sa aminhan nagalambot sila* sa Aser, kag sa Isacar sa sidlangan.
11 Sa mga teritoryo ni Isacar kag ni Aser, amo ini ang mga siudad nga ginhatag kay Manases lakip ang mga pumuluyo kag sakop* nga mga banwa sini: ang Bet-sean, Ibleam,+ Dor,+ En-dor,+ Taanac,+ kag Megiddo. Ginhatag sa iya ang tatlo ka mataas nga lugar.
12 Apang wala masakop sang mga kaliwat ni Manases ini nga mga siudad, bangod nagpabilin sa pag-istar ang mga Canaanhon sa sini nga duta.+
13 Sang gamhanan na ang mga Israelinhon, gin-ulipon nila ang mga Canaanhon sa pagpangabudlay para sa ila,+ apang wala nila sila tanan matabog.+
14 Nagsiling ang mga kaliwat ni Jose kay Josue: “Ngaa isa lang ka parte sang duta ang ginhatag mo sa amon* bilang palanublion namon?+ Madamo kami kay ginapakamaayo kami ni Jehova tubtob subong.”+
15 Nagsabat si Josue sa ila: “Tungod madamo kamo, kadto kamo sa kagulangan sa duta sang mga Pereznon+ kag sang mga Refaim+ kag hawanan ninyo ini para sa inyo kaugalingon, bangod magamay ang kabukiran sang Efraim+ para sa inyo.”
16 Dayon nagsiling ang mga kaliwat ni Jose: “Kulang gihapon sa amon ang kabukiran, kag ang tanan nga Canaanhon nga nagaistar sa nalupyakan,* sa Bet-sean+ kag sa sakop* nga mga banwa sini kag sa Nalupyakan* sang Jezreel,+ may mga kangga sa inaway+ kag ang mga ruweda sini may nagalabaw nga matalom nga mga salsalon.”*
17 Gani nagsiling si Josue sa panimalay ni Jose, kay Efraim kag kay Manases: “Madamo kamo kag gamhanan. Indi lang isa ang inyo parte,+
18 kundi mangin inyo man ang kabukiran.+ Bisan pa kagulangan ini, hawanan ninyo ini, kag mangin dulunan ini sang inyo teritoryo. Kay tabugon ninyo ang mga Canaanhon, bisan pa mabakod sila kag may mga kangga sa inaway nga ang mga ruweda sini may nagalabaw nga matalom nga mga salsalon.”*+
Footnote
^ Sa sidlangan nga bahin.
^ Sa literal, “sa tuo.”
^ Ang katawhan ni Manases ukon ang teritoryo ni Manases.
^ Ukon “sa palibot.”
^ Sa literal, “sa akon.”
^ Sa literal, “mga kangga nga salsalon.”
^ Ukon “Manubo nga Patag.”
^ Ukon “sa palibot.”
^ Ukon “manubo nga patag.”
^ Sa literal, “mga kangga nga salsalon.”
