Josue 22:1-34
22 Dayon ginpatawag ni Josue ang mga Rubenhon, ang mga Gadhanon, kag ang katunga sang tribo ni Manases
2 kag nagsiling sia sa ila: “Ginhimo ninyo ang tanan nga ginsugo sa inyo ni Moises nga alagad ni Jehova,+ kag gintuman ninyo ang tanan ko nga ginsugo sa inyo.+
3 Wala ninyo ginbayaan ang inyo mga utod tubtob sini nga adlaw;+ kag gintuman ninyo ang sugo ni Jehova nga inyo Dios.+
4 Kag karon ginhatagan ni Jehova nga inyo Dios ang inyo mga utod sing kalinong, subong sang ginsaad niya sa ila.+ Gani magbalik na kamo sa inyo mga tolda sa pihak nga bahin* sang Jordan, sa duta nga ginhatag sa inyo ni Moises nga alagad ni Jehova.+
5 Apang sundon gid ninyo ang sugo kag ang Kasuguan nga ginhatag sa inyo ni Moises nga alagad ni Jehova,+ paagi sa paghigugma kay Jehova nga inyo Dios,+ paagi sa paglakat sa tanan niya nga dalanon,+ paagi sa pagtuman sa iya mga sugo,+ paagi sa pagpabilin nga matutom sa iya,+ kag paagi sa pag-alagad sa iya+ sa bug-os ninyo nga tagipusuon kag sa bug-os ninyo nga kalag.”*+
6 Dayon ginpakamaayo sila ni Josue kag ginpabalik sa ila mga tolda.
7 Ginhatagan ni Moises ang katunga sang tribo ni Manases sing palanublion sa Basan,+ kag ginhatagan ni Josue ang isa pa ka katunga sang tribo upod sa ila mga utod sing palanublion sa katundan nga bahin sang Jordan.+ Ginpakamaayo man sila ni Josue sang ginpabalik niya sila sa ila mga tolda.
8 Nagsiling sia sa ila: “Magbalik kamo sa inyo tolda kag magdala kamo sing madamo nga manggad, madamo nga kasapatan, pilak kag bulawan, saway kag salsalon, kag madamo nga panapton.+ Kuhaa ang inyo parte sa mga inagaw+ sa inyo mga kaaway kag hatagi ninyo ang inyo mga utod.”
9 Pagkatapos sini, ginbayaan sang mga Rubenhon, sang mga Gadhanon, kag sang katunga sang tribo ni Manases ang iban pa nga mga Israelinhon sa Shilo sa duta sang Canaan, kag nagbalik sila sa duta sang Gilead,+ sa duta nga ginhatag sa ila agod istaran nila suno sa sugo ni Jehova paagi kay Moises.+
10 Pag-abot sang mga Rubenhon, mga Gadhanon, kag sang katunga sang tribo ni Manases malapit sa Jordan sa duta sang Canaan, naghimo sila didto sing tuman kadaku nga halaran.
11 Sang ulihi, nabalitaan ini sang iban nga Israelinhon+ kag nagsiling sila: “Naghimo ang mga Rubenhon, ang mga Gadhanon, kag ang katunga sang tribo ni Manases sing halaran sa dulunan sang duta sang Canaan malapit sa Jordan sa katundan nga bahin nga ginapanag-iyahan sang mga Israelinhon.”
12 Sang mabalitaan ini sang mga Israelinhon, nagtipon sa Shilo ang bug-os nga katilingban sang mga Israelinhon+ agod magpakig-away sa ila.
13 Dayon ginpadala sang mga Israelinhon si Finehas+ nga anak ni Eleazar nga saserdote sa mga Rubenhon, sa mga Gadhanon, kag sa katunga sang tribo ni Manases sa duta sang Gilead,
14 kag kaupod niya ang napulo ka pangulo nga nagarepresentar sa kada tribo sang Israel. Tanan sila mga pangulo sang ila panimalay sa mga linibo* sang Israel.+
15 Pag-abot nila sa mga Rubenhon, sa mga Gadhanon, kag sa katunga sang tribo ni Manases sa duta sang Gilead, nagsiling sila sa ila:
16 “Amo ini ang ginsiling sang bug-os nga katilingban ni Jehova: ‘Ano ining ginhimo ninyo nga nangin indi matutom+ kamo sa Dios sang Israel? Nagtalikod kamo sa pagsunod kay Jehova kag nagrebelde kamo kay Jehova kay naghimo kamo sing halaran para sa inyo kaugalingon.+
17 Kulang pa bala sa inyo ang sala nga ginhimo naton sa Peor? Wala pa gani naton matinluan ang aton kaugalingon tubtob sini nga adlaw, bisan pa may kalalat-an nga natabo sa katilingban ni Jehova.+
18 Kag magatalikod pa kamo karon sa pagsunod kay Jehova! Kon magrebelde kamo subong kay Jehova, buas maakig gid sia sa bug-os nga katilingban sang Israel.+
19 Kon ang duta nga inyo ginapanag-iyahan indi matinlo, magtabok kamo sa duta nga ginapanag-iyahan ni Jehova+ diin nahamtang ang tabernakulo ni Jehova,+ kag mag-istar kamo upod sa amon, apang indi kamo magrebelde kay Jehova, kag indi ninyo kami paghimua nga mga rebelde bangod sang paghimo ninyo sing isa ka halaran para sa inyo kaugalingon luwas sa halaran ni Jehova nga aton Dios.+
20 Sang si Acan+ nga anak ni Zera nangin indi matutom may kaangtanan sa butang nga dapat laglagon, indi bala nga naakig ang Dios sa bug-os nga katilingban sang Israel?+ Kag indi lamang sia ang napatay tungod sa iya sala.’”+
21 Ang mga Rubenhon, ang mga Gadhanon, kag ang katunga sang tribo ni Manases nagsabat sa mga pangulo sa mga linibo* sang Israel:+
22 “Ang Dios sang mga dios, nga si Jehova!* Ang Dios sang mga dios, nga si Jehova!+ Nakahibalo sia, kag mahibaluan man ini sang Israel. Kon nagrebelde kami kag nangin indi matutom kay Jehova, indi kami pagluwason sang Dios sa sini nga adlaw.
23 Kon naghimo kami sing halaran para sa amon kaugalingon agod magtalikod sa pagsunod kay Jehova, kag kon para ini sa paghalad sing mga dulot nga sinunog, mga dulot nga uyas, kag mga halad sa pag-ambitanay, si Jehova mismo ang magasilot sa amon.+
24 Ginhimo namon ini bangod nabalaka kami nga basi sa ulihi ang inyo mga anak magasiling sa amon mga anak: ‘Ano ang labot ninyo kay Jehova nga Dios sang Israel?
25 Ginhimo ni Jehova nga dulunan ang Jordan sa ulot namon kag ninyo nga mga Rubenhon kag mga Gadhanon. Wala kamo sing labot sa mga butang may kaangtanan kay Jehova.’ Kag balabagan sang inyo mga anak ang amon mga anak sa pagsimba* kay Jehova.
26 “Gani nagsiling kami, ‘Maghimo kita sing halaran, indi para sa mga dulot nga sinunog ukon mga halad,
27 kundi agod mangin saksi ini sa ulot namon kag ninyo+ kag sa aton mga kaliwatan nga padayunon namon ang pag-alagad kay Jehova paagi sa amon mga dulot nga sinunog, mga halad sa pag-ambitanay, kag iban pa nga mga halad,+ agod ang inyo mga anak indi magsiling sa amon mga anak sa ulihi: “Wala kamo sing labot sa mga butang may kaangtanan kay Jehova.”’
28 Gani nagsiling kami, ‘Kon isiling nila ini sa amon kag sa amon mga kaliwatan sa ulihi, magasiling kami: “Tan-awa ang halaran nga ginhimo sang amon mga katigulangan nga pareho sa halaran ni Jehova, indi para sa mga dulot nga sinunog ukon mga halad, kundi subong isa ka saksi sa ulot namon kag ninyo.”’
29 Indi gid namon mahimo nga magrebelde kay Jehova kag magtalikod sa pagsunod kay Jehova+ paagi sa paghimo sing halaran para sa mga dulot nga sinunog, mga dulot nga uyas, kag mga halad, luwas pa sa halaran ni Jehova nga aton Dios sa atubangan sang iya tabernakulo!”+
30 Nalipay si Finehas nga saserdote, ang mga pangulo sang katilingban, kag ang mga pangulo sa mga linibo* sang Israel nga kaupod niya sang mabatian nila ang ginsiling sang mga kaliwat ni Ruben, ni Gad, kag ni Manases.+
31 Gani si Finehas nga anak ni Eleazar nga saserdote nagsiling sa mga kaliwat ni Ruben, ni Gad, kag ni Manases: “Nahibaluan gid naton subong nga si Jehova yara sa tunga naton, bangod wala kamo magrebelde kay Jehova. Ginluwas ninyo subong ang mga Israelinhon sa silot ni Jehova.”
32 Dayon ginbayaan ni Finehas nga anak ni Eleazar nga saserdote kag sang mga pangulo ang mga Rubenhon kag mga Gadhanon sa duta sang Gilead, kag nagbalik sila sa duta sang Canaan kag ginbalita ini sa iban pa nga mga Israelinhon didto.
33 Nalipay ang mga Israelinhon sa ginbalita sa ila. Dayon gindayaw sang mga Israelinhon ang Dios, kag wala na sila maghambal tuhoy sa pagpakig-away sa mga Rubenhon kag sa mga Gadhanon agod laglagon ang duta nga ila ginaistaran.
34 Gani ginhingalanan sang mga Rubenhon kag sang mga Gadhanon ang halaran,* bangod “isa ini ka saksi para sa aton nga si Jehova amo ang matuod nga Dios.”
Footnote
^ Sa sidlangan nga bahin.
^ Ukon “tribo.”
^ Ukon “tribo.”
^ Ukon “Ang Balaan nga Dios, nga si Jehova.”
^ Sa literal, “pagkahadlok.”
^ Ukon “tribo.”
^ Suno sa paathag, mahimo nga ang halaran ginhingalanan nga Saksi.
