Josue 8:1-35
8 Dayon nagsiling si Jehova kay Josue: “Indi ka mahadlok.+ Iupod ang tanan nga soldado kag salakayon ninyo ang Ai. Ginatugyan ko sa imo ang hari sang Ai, ang iya katawhan, ang iya siudad, kag ang iya duta.+
2 Himuon mo sa Ai kag sa iya hari ang ginhimo mo sa Jerico kag sa iya hari.+ Apang mahimo ninyo kuhaon ang mga pagkabutang kag ang mga sapat sa sini. Maghanda ka sa pagsalakay sa likod sang siudad.”
3 Gani ginsalakay ni Josue kag sang tanan nga soldado ang Ai. Nagpili si Josue sing 30,000 ka isganan nga soldado kag ginpalakat sila sa gab-i.
4 Ginsugo niya sila: “Salakayon ninyo ang siudad sa likod. Indi lang kamo magpalayo gid sa siudad, kag mangin handa kamo tanan.
5 Ako kag ang tanan nga soldado nga kaupod ko magapalapit sa siudad. Kon maggua sila sa pagsugata sa amon pareho sang ginhimo nila sang una,+ magapalagyo kami sa ila.
6 Kon lagson nila kami, ipalayo namon sila sa siudad, kay magasiling sila, ‘Nagapalagyo sila pareho sang ginhimo nila sang una.’+ Kag magapalagyo kami sa ila.
7 Dayon magasalakay kamo kag sakupon ninyo ang siudad. Itugyan ini sa inyo ni Jehova nga inyo Dios.
8 Kon masakop na ninyo ang siudad, sunugon ninyo ini.+ Himuon ninyo ang suno sa ginsiling ni Jehova. Amo ini ang ginasugo ko sa inyo.”
9 Dayon ginpalakat sila ni Josue, kag nagkadto sila kag nagpuesto sa ulot sang Betel kag Ai, sa katundan sang Ai, samtang si Josue nagpabilin sina nga gab-i upod sa iban pa nga mga soldado.
10 Aga pa nga nagbangon si Josue kag gintipon* niya ang mga soldado. Ginpangunahan niya kag sang mga gulang sang Israel ang mga soldado sa pagtaklad sa Ai.
11 Nagtaklad ang tanan nga soldado+ nga kaupod niya pakadto sa siudad kag nagkampo sila sa aminhan sang Ai. Ang nalupyakan lamang ang sa ulot nila kag sang siudad.
12 Nagpili man sia sing mga 5,000 ka soldado nga magasalakay kag magapuesto+ sa ulot sang Betel+ kag Ai, sa katundan sang siudad.
13 Gani nagkampo ang kalabanan nga mga soldado sa aminhan sang siudad+ kag ang mga soldado nga magasalakay sa likod yara sa katundan sang siudad.+ Sadto nga gab-i, nagkadto si Josue sa tunga sang nalupyakan.*
14 Sang makita ini sang hari sang Ai, sia kag ang mga soldado sang siudad temprano pa nga nagdalidali pagkaaga agod makig-away sa Israel sa isa ka lugar sa atubangan sang desyerto nga kapatagan. Apang wala sia makahibalo nga may magasalakay sa iya sa likod sang siudad.
15 Sang magsalakay ang mga lalaki sang Ai, nagpalagyo si Josue kag ang bug-os nga Israel pakadto sa kamingawan.+
16 Dayon gintipon ang tanan nga lalaki sa siudad agod lagson sila; kag samtang ginalagas nila si Josue nagapalayo sila sa siudad.
17 Wala sing lalaki nga nabilin sa Ai kag sa Betel kay ang tanan naglagas sa Israel. Ginbiyaan nila ang siudad nga wala sing depensa.
18 Nagsiling si Jehova kay Josue: “Ituon sa Ai ang bangkaw sa imo kamot,+ kay itugyan ko ang siudad sa imo.”+ Gani gintuon ni Josue sa siudad ang bangkaw sa iya kamot.
19 Sang gintuon na niya ang iya kamot sa siudad, dalidali nga naghanda ang mga magasalakay kag nagdalagan sila pasulod sa siudad kag ginsakop ini. Dalidali nila nga ginsunog ang siudad.+
20 Sang magbalikid ang mga lalaki sang Ai, nakita nila nga nagatub-ok ang aso halin sa siudad, kag wala sila sing kusog sa pagpalagyo bisan diin. Kag ang mga soldado nga nagapalagyo sa kamingawan nagliso sa mga nagalagas sa ila.
21 Sang makita ni Josue kag sang bug-os nga Israel nga nasakop sang mga nagsalakay ang siudad kag nagatub-ok ang aso halin sa siudad, nagbalik sila kag ginpamatay ang mga lalaki sang Ai.
22 Ang mga nagsakop sang siudad naggua agod sugataon ang mga lalaki sang Ai, amo nga nakibon sila sang mga Israelinhon sa magtimbang nga bahin. Ginpamatay nila sila tubtob wala sing nabilin nga buhi sa ila kag wala man sing nakapalagyo.+
23 Apang gindakop nila nga buhi ang hari sang Ai+ kag gindala nila sia kay Josue.
24 Sang mapatay na sang Israel ang tanan nga pumuluyo sang Ai sa kamingawan diin ginlagas nila sila, kag naubos sila tanan patay paagi sa espada, nagbalik ang bug-os nga Israel sa Ai kag ginpamatay ang nagkalabilin didto paagi sa espada.
25 Sa amo nga adlaw, ang tanan nga napatay nga katawhan sang Ai nagadamo sing 12,000 ka lalaki kag babayi.
26 Padayon nga ginatuon ni Josue sa siudad ang bangkaw+ sa iya kamot tubtob nalaglag ang tanan nga pumuluyo sang Ai.+
27 Apang, ginkuha sang Israel ang mga sapat kag ang mga pagkabutang sa siudad, suno sa ginsugo ni Jehova kay Josue.+
28 Dayon ginsunog ni Josue ang Ai kag nangin permanente ini nga tinumpok nga kagulub-an+ tubtob sini nga adlaw.
29 Ginbutang niya sa usok* ang hari sang Ai tubtob maggab-i, kag sang manugtunod na ang adlaw, ginpakuha ni Josue ang bangkay sa usok.+ Dayon ginhaboy nila ini sa puertahan sang gawang sang siudad kag nagtumpok sila sing madamo nga bato sa ibabaw sini, kag yara pa ini tubtob sini nga adlaw.
30 Dayon naghimo si Josue sing halaran sa Bukid Ebal+ para kay Jehova nga Dios sang Israel,
31 suno sa ginsugo ni Moises nga alagad ni Jehova sa mga Israelinhon kag suno sa nasulat sa libro sang Kasuguan+ ni Moises: “Isa ka halaran nga himo sa mga bato nga wala mabasbasan, nga wala gingamitan sang bisan ano nga gamit nga salsalon.”+ Naghalad sila sa sini sing mga dulot nga sinunog para kay Jehova kag sing mga halad sa pag-ambitanay.*+
32 Dayon ginsulat niya didto sa mga bato ang kopya sang Kasuguan+ nga ginsulat ni Moises sa atubangan sang mga Israelinhon.+
33 Ang bug-os nga Israel, ang ila mga gulang, ang mga manugdumala, kag ang ila mga hukom nagatindog sa magtimbang nga bahin sang Kaban sa atubangan sang mga Levinhon nga saserdote nga nagadala sang kaban sang katipan ni Jehova. Didto man ang dumuluong nga mga pumuluyo kag ang mga tumandok.+ Ang katunga sa ila nagtindog sa atubangan sang Bukid Gerizim, kag ang katunga sa atubangan sang Bukid Ebal+ (subong sang ginsugo anay ni Moises nga alagad ni Jehova),+ agod pakamaayuhon ang katawhan sang Israel.
34 Pagkatapos sini, ginbasa niya sing mabaskog ang bug-os nga Kasuguan,+ ang mga pagpakamaayo+ kag ang mga pagpakamalaut,+ suno sa tanan nga nasulat sa libro sang Kasuguan.
35 Wala sing bisan isa ka pulong nga ginsugo ni Moises ang wala ginbasa sing mabaskog ni Josue sa atubangan sang bug-os nga katilingban sang Israel,+ lakip ang mga babayi, ang mga kabataan, kag ang dumuluong nga mga pumuluyo+ nga nagaistar* upod sa ila.+
Footnote
^ Ukon “ginhanda.”
^ Ukon “manubo nga patag.”
^ Ukon “kahoy.”
^ Ukon “mga dulot para sa paghidait,” mga dulot nga nagapakita nga ang nagadulot may paghidait sa Dios.
^ Sa literal, “nagalakat.”
