Levitico 12:1-8
-
Pagpaninlo pagkatapos magbata (1-8)
12 Nagsiling si Jehova kay Moises:
2 “Isiling mo sa mga Israelinhon, ‘Kon magbusong* ang isa ka babayi kag magbata sia sing lalaki, indi sia matinlo sa sulod sang pito ka adlaw, pareho sang mga adlaw nga indi sia matinlo bangod sang iya pamulanon.+
3 Tulion ang bata sa ikawalo nga adlaw.+
4 Sa sulod sang 33 pa ka adlaw, magpadayon sia sa pagpaninlo sang iya kaugalingon tungod sa dugo. Indi sia magtandog sing bisan ano nga balaan, kag indi sia magsulod sa balaan nga duog tubtob matapos niya ang mga adlaw sang iya pagpaninlo.
5 “‘Kon magbata sia sing babayi, indi sia matinlo sa sulod sang 14 ka adlaw, pareho sa tion sang iya pamulanon. Sa sulod sang 66 pa ka adlaw, magpadayon sia sa pagpaninlo sang iya kaugalingon tungod sa dugo.
6 Kon matapos na ang mga adlaw sang iya pagpaninlo tungod sa iya pagbata sing lalaki ukon babayi, dalhon niya sa saserdote sa puertahan sang tolda nga tilipunan* ang tinday nga karnero nga lalaki nga isa ka tuig ang edad bilang dulot nga sinunog+ kag ang isa ka gamay pa nga pating ukon tukmo bilang dulot tungod sa sala.
7 Ihalad ini sang saserdote kay Jehova kag maghimo sia sing pagtumbas para sa iya sala, kag mangin matinlo sia sa iya pagdugo. Amo ini ang kasuguan tuhoy sa babayi nga magbata sing lalaki ukon babayi.
8 Apang kon indi sia makasarang sing isa ka karnero, magdala sia sing duha ka tukmo ukon duha ka gamay pa nga pating,+ ang isa bilang dulot nga sinunog, kag ang isa pa bilang dulot tungod sa sala. Dayon ang saserdote maghimo sing pagtumbas para sa iya sala, kag mangin matinlo na sia.’”
Footnote
^ Ukon “magpanamkon sing binhi.”
