Lucas 1:1-80

I-PLAY

Panamyaw kay Teofilo (1-4)
Gintagna ang pagkabun-ag ni Juan nga Manugbawtismo (5-25)
Pagkabun-ag ni Jesus gintagna ni Gabriel (26-38)
Ginduaw ni Maria si Elisabet (39-45)
Gindayaw ni Maria si Jehova (46-56)
Pagbun-ag kag paghingalan kay Juan (57-66)
Tagna ni Zacarias (67-80)

1 Madamo ang nagtinguha sa pagsulat sang tanan nga natabo, nga ginpatihan man naton.+ ² Ginsugid man ini sa aton sang mga tawo nga nakasaksi+ kag nagabantala sang mensahe sang Dios.+ ³ Gani, labing halangdon nga Teofilo,+ gin-usisa ko ini tanan, kag namat-od man ako nga isulat ini sa imo sing pasunod. ⁴ Ginhimo ko ini agod mapat-od mo nga matuod gid ang mga butang nga gintudlo sa imo.+ ⁵ Sang mga adlaw ni Herodes,*+ nga hari sang Judea, may isa ka saserdote sa grupo ni Abias*+ nga ang ngalan si Zacarias kag ang iya asawa amo si Elisabet, halin sa pamilya ni Aaron. ⁶ Ini nga mag-asawa matarong sa atubangan sang Dios; gintuman nila ang tanan nga kasuguan ni Jehova.* ⁷ Apang wala sila sing anak bangod baw-as si Elisabet, kag tigulang na sila. ⁸ Karon, turno na sang iya grupo+ kag sia ang nagaalagad bilang saserdote sa atubangan sang Dios, ⁹ suno sa kinabatasan* sang pagkasaserdote, kag sia na ang magadulot sing incienso+ sang nagsulod sia sa santuaryo ni Jehova.*+ ¹⁰ Kag ang tanan nga katawhan nagapangamuyo sa gua samtang ginadulot ang incienso. ¹¹ Nagpakita sa iya ang anghel ni Jehova,* nga nagatindog sa tuo sang halaran sang incienso. ¹² Nalisang si Zacarias sa iya nakita, kag hinadlukan sia. ¹³ Apang, ang anghel nagsiling sa iya: “Indi ka magkahadlok, Zacarias, kay ang imo pag-ampo ginpamatian sang Dios, kag si Elisabet nga imo asawa magabun-ag sang anak nga lalaki kag hingalanan mo sia nga Juan.+ ¹⁴ Magakalipay kamo kag magakasadya, kag madamo ang magakasadya tungod sa iya pagkabun-ag,+ ¹⁵ kay mangin halangdon sia sa atubangan ni Jehova.*+ Apang indi sia dapat mag-inom sang alak ukon sang bisan ano nga alkoholiko nga ilimnon,+ kag mapuno sia sing balaan nga espiritu antes pa sia mabun-ag,*+ ¹⁶ kag ipanumbalik niya ang madamo nga anak ni Israel kay Jehova* nga ila Dios.+ ¹⁷ Subong man, magauna sia sa iya nga may espiritu kag gahom ni Elias,+ agod ang tagipusuon sang mga amay mangin pareho sa tagipusuon sang mga anak+ kag agod buligan ang mga indi matinumanon sa pagpanghikot sing maalamon kag sa paghimo kon ano ang matarong agod ihanda ang katawhan+ para kay Jehova.”* ¹⁸ Nagsiling si Zacarias sa anghel: “Paano ini matabo, kay kami nga mag-asawa tigulang na?” ¹⁹ Nagsabat ang anghel: “Ako si Gabriel+ kag pirme ako nagatindog sa atubangan sang Dios.+ Ginpadala ako sa pagsugid sa imo sining maayong balita. ²⁰ Apang, bangod wala ka nagpati sa akon ginsiling, indi ka makahambal tubtob sa adlaw nga matuman ang akon ginhambal sa imo. Matuman gid ini sa gintalana nga tion.” ²¹ Sini man nga tion, ang mga tawo nagahulat kay Zacarias, kag natingala sila nga nadugayan sia sa santuaryo. ²² Sang naggua sia, nagasenyas na lang sia sa ila, kay indi sia makahambal. Nahangpan nila nga nakakita sia sing palanan-awon sa santuaryo. Bangod nagpabilin sia nga indi makahambal, nagasenyas na lang sia sa ila. ²³ Pagkatapos sang mga adlaw sang iya turno sa pag-alagad sa santuaryo, nagpauli sia. ²⁴ Pagligad sang pila ka adlaw, si Elisabet nga iya asawa, nagbusong. Wala gid sia maggua sa ila balay sa sulod sang lima ka bulan. Nagsiling sia: ²⁵ “Amo ini ang ginhimo ni Jehova* sa akon karon. Gintalupangod niya ako kag ginkuha ang akon kahuluy-an sa mga tawo.”+ ²⁶ Sang anom ka bulan na ang iya pagbusong, ginpadala sang Dios ang anghel nga si Gabriel+ sa isa ka siudad sang Galilea nga ginatawag Nazaret, ²⁷ sa isa ka birhen+ nga kalaslon kay Jose halin sa panimalay ni David. Ang ngalan sang birhen amo si Maria.+ ²⁸ Nagkadto sa iya si Gabriel, kag nagsiling sa iya: “Maayo nga adlaw, ikaw nga nahamut-an sang Dios. Si Jehova* kaupod mo.” ²⁹ Apang natublag gid sia sa iya ginsiling, kag gintinguhaan nga hangpon kon ano ang kahulugan sini nga panamyaw. ³⁰ Gani nagsiling ang anghel sa iya: “Maria, indi ka magkahadlok kay nahamut-an ka sang Dios. ³¹ Kag magabusong ka kag magabun-ag sing isa ka anak nga lalaki,+ kag hingalanan mo sia nga Jesus.+ ³² Mangin halangdon sia+ kag tawgon nga Anak sang Labing Mataas,+ kag ihatag ni Jehova* nga Dios sa iya ang trono ni David nga iya amay,+ ³³ kag magahari sia sa panimalay ni Jacob sing dayon, kag ang iya Ginharian wala sing katapusan.”+ ³⁴ Apang nagsiling si Maria sa anghel: “Paano ini matabo, kay wala pa gid ako makapakighulid sa isa ka lalaki?”+ ³⁵ Nagsabat ang anghel: “Ang balaan nga espiritu magaabot sa imo,+ kag ang gahom sang Labing Mataas magalikop sa imo. Bangod sina ang bata nga ibun-ag mo tawgon nga balaan,+ Anak sang Dios.+ ³⁶ Ang imo paryente nga si Elisabet anom ka bulan na nga nagabusong sing anak nga lalaki, bisan pa nga tigulang na sia kag nagsiling ang mga tawo nga baw-as sia; ³⁷ bangod wala sing ginsiling ang Dios nga indi niya matuman.”+ ³⁸ Kag si Maria nagsiling: “Ako ulipon ni Jehova!* Kabay nga matuman sa akon ang suno sa imo ginsiling.” Kag nagbiya ang anghel sa iya. ³⁹ Pagkatapos sadto naghimos si Maria kag nagdalidali sa pagkadto sa mabukid nga rehiyon, sa isa ka siudad sang Juda, ⁴⁰ kag nagsulod sia sa balay ni Zacarias kag gintamyaw si Elisabet. ⁴¹ Pagkabati ni Elisabet sang panamyaw ni Maria, ang lapsag nagkibo sa iya taguangkan, kag si Elisabet napuno sing balaan nga espiritu, ⁴² kag nagsiling sia sa mabaskog nga tingog: “Ginpakamaayo ka sa tanan nga babayi, kag ginpakamaayo ang bunga sang imo taguangkan! ⁴³ Kadungganan ko nga duawon ako sang iloy sang akon Ginuo. ⁴⁴ Kay pagkabati ko sang imo panamyaw, ang lapsag sa akon taguangkan nagkibo sa daku nga kalipay. ⁴⁵ Malipayon ka man kay nagpati ka sa ginsiling sa imo, bangod ang tanan nga ginsiling ni Jehova* sa imo matuman.” ⁴⁶ Kag nagsiling si Maria: “Nagadayaw ako kay Jehova,*+ ⁴⁷ kag indi mapunggan sang akon tagipusuon nga magkalipay sing daku sa Dios nga akon Manluluwas,+ ⁴⁸ bangod nakita niya ang kubos nga kahimtangan sang iya ulipon nga babayi.+ Kay sugod karon, ang tanan nga kaliwatan magatawag sa akon nga malipayon+ ⁴⁹ bangod daku gid ang ginhimo sang gamhanan nga Dios para sa akon, kag balaan ang iya ngalan,+ ⁵⁰ kag wala sing katapusan ang iya kaluoy sa mga nagakahadlok sa iya.+ ⁵¹ Naghimo sia sing gamhanan nga mga buhat paagi sa iya butkon; ginpaalaplaag niya ang mga tawo nga may matinaastaason nga tagipusuon.+ ⁵² Ginpukan niya sa trono ang gamhanan nga mga tawo+ kag ginbayaw niya ang mga kubos;+ ⁵³ ginbusog gid niya sang maayo nga mga butang ang mga ginagutom,+ kag ginpalakat nga wala sing dala ang mga manggaranon. ⁵⁴ Ginbuligan niya ang Israel nga iya alagad. Ginhimo niya ini agod ipakita nga ginadumdom niya pirme ang iya saad nga kaluy-an niya+ ⁵⁵ si Abraham kag ang iya kaliwat,*+ subong sang ginsiling niya sa aton mga katigulangan.” ⁵⁶ Nagpabilin si Maria sa iya sing mga tatlo ka bulan kag pagkatapos sini nagpauli sia. ⁵⁷ Nag-abot na ang tion nga inugbata ni Elisabet, kag nagbun-ag sia sing anak nga lalaki. ⁵⁸ Kag ang mga kaingod kag ang iya mga paryente nakabati nga ginpakitaan sia ni Jehova* sing daku nga kaluoy, kag nagkasadya sila upod sa iya.+ ⁵⁹ Sang ikawalo nga adlaw, nagduaw sila sa pagtuli sa bata,+ kag hingalanan kuntani nila sia nga Zacarias pareho sa iya amay. ⁶⁰ Apang ang iya iloy nagsiling: “Indi! Tawgon sia nga Juan.” ⁶¹ Kag nagsiling sila: “Wala gid ikaw sing paryente nga may amo sina nga ngalan.” ⁶² Gani nagsenyas sila sa amay sang bata kon ano ang luyag niya nga itawag sa bata. ⁶³ Kag nangayo sia sang tapitapi nga kahoy kag nagsulat: “Tawgon sia nga Juan.”+ Bangod sini, natingala sila tanan. ⁶⁴ Sa gilayon, nagtikab ang iya baba kag nakahambal sia,+ kag nagdayaw sa Dios. ⁶⁵ Kag hinadlukan ang tanan nila nga kaingod, kag ini nga hitabo nangin topiko sa bug-os nga mabukid nga rehiyon sang Judea. ⁶⁶ Kag ang tanan nga nakabati nagtalupangod sini sa ila tagipusuon, nga nagasiling: “Mangin ano gid ayhan ini nga bata?” Kay ang gahom ni Jehova* yara gid sa iya. ⁶⁷ Kag ang iya amay nga si Zacarias napuno sing balaan nga espiritu, kag nagpanagna: ⁶⁸ “Dayawon si Jehova,* nga Dios sang Israel,+ bangod gintalupangod niya ang iya katawhan kag ginluwas sila.+ ⁶⁹ Kag nagbangon sia sing sungay sang kaluwasan*+ para sa aton sa panimalay ni David nga iya alagad.+ ⁷⁰ Amo sini ang ginsaad niya paagi sa iya balaan nga mga manalagna sang una.+ ⁷¹ Nagsaad sia nga luwason kita sa aton mga kaaway kag sa tanan nga nagadumot sa aton.+ ⁷² Kaluy-an niya kita suno sa ginsaad niya sa aton mga katigulangan kag dumdumon niya ang iya balaan nga katipan.+ ⁷³ Amo ini ang ginsaad niya kay Abraham nga aton katigulangan.+ ⁷⁴ Pagkatapos nga luwason niya kita sa aton mga kaaway, hatagan niya kita sing pribilehiyo sa paghimo sing sagrado nga pag-alagad sa iya nga wala sing kahadlok, ⁷⁵ agod mangin mainunungon kag matarong kita sa bug-os naton nga kabuhi. ⁷⁶ Apang ikaw, anak ko, tawgon ka nga manalagna sang Labing Mataas, kay magauna ka kay Jehova* sa paghanda sang iya mga dalan,+ ⁷⁷ sa paghatag sing ihibalo sa iya katawhan agod maluwas sila paagi sa pagpatawad sa ila mga sala,+ ⁷⁸ bangod sa mapinalanggaon nga kaluoy sang aton Dios. Bangod sini nga kaluoy, makakita kita sang kapawa halin sa kahitaasan nga nagasilak kaangay sang pamanagbanag, ⁷⁹ sa paghatag sing kapawa sa mga nagapungko sa kadulom kag sa landong sang kamatayon.+ Ina nga kapawa magapakita sa aton kon ano ang aton himuon agod matigayon ang paghidait.” ⁸⁰ Kag ang bata nagdaku kag nangin mabakod sa espiritu, kag nagpabilin sia sa kamingawan tubtob nga nag-abot ang tion nga magbantala sia sa katawhan sang Israel.