Nahum 1:1-15
1 Isa ka mensahe batok sa Ninive:+ Ang libro sang palanan-awon ni Nahum* nga taga-Elkos:
2 Ginapatuman ni Jehova nga Dios nga sia lang ang dapat simbahon+ kag nagatimalos sia;Nagatimalos si Jehova kag handa sia sa pagpakita sang iya kaakig.+
Ginabalusan ni Jehova ang iya mga kaaway,Kag ginatigana niya ang iya kaakig para sa iya mga kaaway.
3 Si Jehova indi dali maakig+ kag gamhanan gid,+Apang indi magpugong si Jehova nga silutan sing nagakaigo ang nakasala.+
Ang iya dalan yara sa malaglagon nga hangin kag bagyo,Kag ang mga panganod daw yab-ok sa idalom sang iya mga tiil.+
4 Ginasaway niya ang dagat+ kag ginapamala ini;Ginapamala niya ang tanan nga suba.+
Nagakalaya ang pananom sa Basan kag sa Carmel,+Kag nagakalaya ang mga bulak sa Lebanon.
5 Tungod sa iya, nagauyog ang mga bukid,Kag nagakatunaw ang mga bakulod.+
Tungod sa iya nawong, magakurog ang kalibutan,Kag ang duta kag ang tanan nga nagapuyo sa sini.+
6 Sin-o bala ang makaagwanta sang iya kaalipungot?+
Kag sin-o bala ang makabato sa iya nagadabdab nga kaakig?+
Ang iya kaakig ibuga nga daw kalayo,Kag tungod sa iya madugmok ang mga bato.
7 Si Jehova maayo+ kag isa ka kuta sa adlaw sang kalisdanan.+
Ginadumdom* niya ang mga nagadangop sa iya.+
8 Laglagon niya sing bug-os ang iya* duog paagi sa mabaskog nga baha,Kag lagson sang kadulom ang iya mga kaaway.
9 Ano ang inyo ginaplano batok kay Jehova?
Laglagon niya kamo sing bug-os.
Indi na matabo liwat ang kalisdanan.+
10 Kay nagasambudanay sila nga daw mga tunok,Kag daw hubog sila sa serbesa;*Apang laglagon sila pareho sang pagsunog sa mamala nga dagami.
11 Halin sa imo may isa nga magaplano sing malain batok kay Jehova,Kag magahatag sia sing wala pulos nga laygay.
12 Amo ini ang ginasiling ni Jehova:
“Bisan pa madamo sila kag makusog,Mapukan sila kag malaglag.*
Ginpaantos ko ikaw,* apang indi ko na ikaw pagpaantuson liwat.
13 Balion ko ang imo gota,+Kag bugtuon ko ang imo mga gapos.
14 Tuhoy sa imo,* nagsugo si Jehova,‘Dulaon ang imo kaliwat nga magadala sang imo ngalan.
Gub-on ko ang tinigib nga mga imahen kag ang metal nga mga estatwa* sa balay* sang imo mga dios.
Magahanda ako sing lulubngan para sa imo, bangod wala ikaw sing pulos.’
15 Tan-awa sa mga bukid ang mga tiil sang nagadala sing maayong balita,Ang isa nga nagabantala sing paghidait.+
Sauluga ang imo mga kapiestahan,+ O Juda, tumana ang imo mga panaad,Bangod indi ka na gid pagsalakayon sang wala sing pulos nga tawo.
Kay laglagon ko sia sing bug-os.”
Footnote
^ Buot silingon, “Manuglugpay.”
^ Ukon “Ginaatipan.” Sa literal, “Kilala.”
^ Ang Ninive.
^ Ukon “serbesa halin sa trigo.”
^ Ukon mahimo, “magaagi sia.”
^ Ang Juda.
^ Ang Asirya.
^ Ukon “hinurma nga mga estatwa.”
^ Ukon “templo.”
