Numeros 15:1-41
15 Nagsiling pa si Jehova kay Moises:
2 “Silinga ang mga Israelinhon, ‘Kon mag-abot kamo sa ulihi sa duta nga ginahatag ko sa inyo nga istaran ninyo+
3 kag maghalad kamo kay Jehova sing dulot nga sinunog sa kalayo halin sa mga baka ukon sa mga karnero, sing isa ka dulot nga sinunog+ ukon isa ka halad sa pagtuman sing pinasahi nga panaad ukon sing kinabubut-on nga dulot+ ukon sing dulot sa tion sang inyo mga kapiestahan,+ nga ang kahumot sini makapahamuot* kay Jehova,+
4 ang isa nga nagadala sang iya dulot dapat man maghalad kay Jehova sing dulot nga uyas nga pino nga harina,+ ikanapulo nga bahin sang isa ka efa,* nga ginsamuan sing un-kuarto sang isa ka hin* nga lana.
5 Maghalad ka man sing alak nga un-kuarto sang isa ka hin, bilang dulot nga ilimnon upod sa dulot nga sinunog+ ukon sa ginahalad nga isa ka kordero nga lalaki.
6 Ukon upod sa isa ka karnero nga lalaki, maghalad ka bilang dulot nga uyas sing duha ka ikanapulo nga bahin sang isa ka efa nga pino nga harina, nga ginsamuan sing un-tersia sang isa ka hin nga lana.
7 Bilang dulot nga ilimnon, maghalad ka sing alak nga un-tersia sang isa ka hin nga ang kahumot sini makapahamuot* kay Jehova.
8 “‘Apang kon maghalad ka sing baka nga lalaki bilang dulot nga sinunog+ ukon halad sa pagtuman sing pinasahi nga panaad+ ukon mga halad sa pag-ambitanay para kay Jehova,+
9 maghalad ka man upod sa baka nga lalaki sing dulot nga uyas+ nga ang kadamuon tatlo ka ikanapulo nga bahin sang isa ka efa nga pino nga harina, nga ginsamuan sing katunga sang isa ka hin nga lana.
10 Maghalad ka man sing katunga sang isa ka hin nga alak bilang dulot nga ilimnon,+ isa ka dulot nga sinunog sa kalayo nga ang kahumot sini makapahamuot* kay Jehova.
11 Amo ini ang dapat himuon sa tagsa ka baka nga lalaki ukon sa tagsa ka karnero nga lalaki ukon sa tagsa ka kordero nga lalaki ukon kanding.
12 Kon ano ang kadamuon sang inyo ihalad, amo sina ang himuon ninyo sa kada isa.
13 Amo sini ang himuon sang tagsa ka tumandok nga Israelinhon kon nagahalad sia sing dulot nga sinunog sa kalayo, nga ang kahumot sini makapahamuot* kay Jehova.
14 “‘Kon ang isa ka dumuluong nga nagaistar upod sa inyo ukon ang kaupod ninyo sa madamo na ninyo nga kaliwatan maghalad man sing dulot nga sinunog sa kalayo nga ang kahumot sini makapahamuot* kay Jehova, pareho man sa ginahimo ninyo ang himuon niya.+
15 Pareho lang ang pagsulundan para sa inyo katilingban kag sa dumuluong nga nagaistar upod sa inyo. Mangin pagsulundan ini tubtob san-o sa tanan ninyo nga kaliwatan. Dapat nga kamo kag ang dumuluong nga pumuluyo pareho lang sa atubangan ni Jehova.+
16 Dapat nga pareho lang ang kasuguan kag pagsulundan para sa inyo kag para sa dumuluong nga nagaistar upod sa inyo.’”
17 Nagsiling pa si Jehova kay Moises:
18 “Silinga ang mga Israelinhon, ‘Pag-abot ninyo sa duta nga dalhan ko sa inyo
19 kag kaunon ninyo ang bisan ano nga patubas* sang duta,+ dapat kamo maghatag sing amot para kay Jehova.
20 Maghatag kamo sing korte-pulseras nga mga tinapay halin sa inyo una+ nga bahol nga harina. Ihatag ninyo ini pareho sang paghatag ninyo sing amot halin sa linasan.
21 Dapat ninyo ihatag ang iban sang inyo una nga bahol nga harina bilang amot para kay Jehova sa tanan ninyo nga kaliwatan.
22 “‘Kon makasala kamo kag wala ninyo matuman ining tanan nga sugo nga ginsiling ni Jehova kay Moises,
23 ang tanan nga ginsugo ni Jehova sa inyo paagi kay Moises sugod sang adlaw nga ginsugo ini ni Jehova tubtob sa inyo mga kaliwatan,
24 kag kon indi hungod nga nakasala kamo kag wala ini mahibaluan sang katilingban, dapat maghalad ang bug-os nga katilingban sing isa ka torite nga baka bilang dulot nga sinunog nga ang kahumot sini makapahamuot* kay Jehova, upod ang dulot nga uyas kag ang dulot nga ilimnon suno sa kinaandan nga pamaagi,+ kag sing isa ka tinday nga kanding bilang dulot tungod sa sala.+
25 Ang saserdote maghimo sing pagtumbas para sa sala sang bug-os nga katilingban sang mga Israelinhon, kag patawaron sila,+ bangod wala ini ginhungod, kag nagdala sila sang ila dulot nga sinunog sa kalayo para kay Jehova kag sang ila dulot tungod sa sala sa atubangan ni Jehova para sa ila sala.
26 Patawaron ang bug-os nga katilingban sang mga Israelinhon kag ang dumuluong nga nagaistar upod sa ila, bangod indi hungod nga nakasala ang tanan nga katawhan.
27 “‘Kon ang bisan sin-o nga tawo* makasala sing indi hungod, maghalad sia sing kanding nga babayi nga isa ka tuig ang edad bilang dulot tungod sa sala.+
28 Ang saserdote maghimo sing pagtumbas para sa sala sang tawo* nga nakahimo sing indi hungod nga sala sa atubangan ni Jehova, agod mahimo ang pagtumbas para sa sini nga sala, kag patawaron sia.+
29 Tuhoy sa indi hungod nga sala, dapat pareho lang ang kasuguan para sa tumandok nga Israelinhon kag para sa dumuluong nga nagaistar upod sa ila.+
30 “‘Apang ang tawo* nga hungod nga nagahimo sing sala,+ tumandok man sia ukon dumuluong nga pumuluyo, nagapasipala kay Jehova, kag dapat sia patyon.*
31 Bangod gintamay niya ang pulong ni Jehova kag ginlapas niya ang iya sugo, ina nga tawo* dapat patyon.+ Manabat sia tungod sa iya sala.’”+
32 Samtang didto sa kamingawan ang mga Israelinhon, may nakita sila nga tawo nga nagapangahoy sa Adlaw nga Inugpahuway.+
33 Gindala sia sang mga nakakita sa iya nga nagapangahoy kay Moises kag kay Aaron kag sa bug-os nga katilingban.
34 Ginbilanggo nila sia+ bangod wala pa mahibaluan kon ano ang himuon sa iya.
35 Kag nagsiling si Jehova kay Moises: “Dapat patyon ang tawo,+ kag dapat batuhon sia sang bug-os nga katilingban sa gua sang kampo.”+
36 Gani gindala sia sang bug-os nga katilingban sa gua sang kampo kag ginbato sia tubtob mapatay, suno sa ginsugo ni Jehova kay Moises.
37 Nagsiling pa si Jehova kay Moises:
38 “Silinga ang mga Israelinhon nga dapat nila himuan sing gawaygaway ang sidsid sang ila bayo sa bug-os nila nga kaliwatan, kag butangan nila sing asul nga lubid ang ibabaw sang gawaygaway.+
39 ‘Dapat ninyo butangan ini sing gawaygaway agod makita ninyo ini kag madumduman ninyo ang tanan nga sugo ni Jehova kag tumanon ninyo ini.+ Indi ninyo pagsundon ang inyo tagipusuon kag ang inyo mga mata, nga nagadul-ong sa inyo sa espirituwal nga pagpakighilawas.+
40 Makabulig ini sa inyo sa pagdumdom agod tumanon ninyo ang tanan ko nga sugo kag mangin balaan kamo sa inyo Dios.+
41 Ako si Jehova nga inyo Dios, nga nagpagua sa inyo sa duta sang Egipto agod pamatud-an ko nga ako ang Dios ninyo.+ Ako si Jehova nga inyo Dios.’”+
Footnote
^ Ukon “makapauloulo; makapalugpay.” Sa literal, “makapakalma.”
^ Ang ikanapulo nga bahin sang isa ka efa katumbas sang 2.2 ka litro. Tan-awa ang Apendise B14.
^ Ang isa ka hin katumbas sang 3.67 ka litro. Tan-awa ang Apendise B14.
^ Ukon “makapauloulo; makapalugpay.” Sa literal, “makapakalma.”
^ Ukon “makapauloulo; makapalugpay.” Sa literal, “makapakalma.”
^ Ukon “makapauloulo; makapalugpay.” Sa literal, “makapakalma.”
^ Ukon “makapauloulo; makapalugpay.” Sa literal, “makapakalma.”
^ Sa literal, “tinapay.”
^ Ukon “makapauloulo; makapalugpay.” Sa literal, “makapakalma.”
^ Ukon “kalag.”
^ Ukon “kalag.”
^ Ukon “kalag.”
^ Sa literal, “utdon.”
^ Ukon “kalag.”
