Numeros 23:1-30
23 Dayon nagsiling si Balaam kay Balak: “Maghimo ka sa sini nga lugar sing pito ka halaran,+ kag maghanda ka para sa akon sing pito ka toro nga baka kag pito ka karnero nga lalaki.”
2 Ginhimo dayon ni Balak ang ginsiling ni Balaam. Kag naghalad si Balak kag si Balaam sing isa ka toro nga baka kag isa ka karnero nga lalaki sa tagsa ka halaran.+
3 Dayon nagsiling si Balaam kay Balak: “Diri ka lang anay sa imo dulot nga sinunog, kay malakat ako. Basi makig-angot si Jehova sa akon. Sugiran ko ikaw kon ano ang ihambal niya sa akon.” Gani nagkadto sia sa isa ka mahawan nga bakulod.
4 Dayon nagpakig-angot ang Dios kay Balaam,+ kag nagsiling sia sa Iya: “Naghimo ako sing pito ka halaran nga nagaraya, kag naghalad ako sing isa ka toro nga baka kag isa ka karnero nga lalaki sa tagsa ka halaran.”
5 Gani ginhambal ni Jehova kay Balaam+ kon ano ang iya isiling, kag nagsiling sia: “Magbalik ka kay Balak, kag amo ini ang imo isiling.”
6 Gani nagbalik sia kag nakita niya si Balak kag ang tanan nga pangulo sang Moab nga nagatindog sa tupad sang iya dulot nga sinunog.
7 Dayon ginsiling niya ini nga hulubaton:+
“Halin sa Aram, ginpatawag ako ni Balak nga hari sang Moab,+
Halin sa kabukiran sang sidlangan:
‘Kadto ka diri kag pakamalauta si Jacob para sa akon.
Kadto ka diri kag pakamalauta ang Israel.’+
8 Paano ko pakamalauton ang wala ginapakamalaut sang Dios?
Kag paano ko pakalainon ang wala ginapakalain ni Jehova?+
9 Halin sa ibabaw sang mga igang makita ko sila,Kag halin sa mga bakulod ginatan-aw ko sila.
Sila lang nga katawhan ang nagaistar didto;+Ginakabig nila ang ila kaugalingon nga tuhay sa mga pungsod.+
10 Sin-o ang makaisip sang kadam-an ni Jacob nga pareho kadamo sa yab-ok+Ukon makaisip sang ikap-at nga bahin sang Israel?
Tuguti nga mapatay ako* pareho sa kamatayon sang mga matarong,Kag tuguti nga ang akon katapusan mangin pareho sang ila katapusan.”
11 Dayon nagsiling si Balak kay Balaam: “Ano ang ginhimo mo sa akon? Ginpatawag ko ikaw agod pakamalauton ang akon mga kaaway, apang sa baylo ginapakamaayo mo sila.”+
12 Nagsabat sia: “Indi bala nga kon ano ang ihambal ni Jehova sa akon amo lang ang isiling ko?”+
13 Nagsiling si Balak sa iya: “Palihug, mag-upod ka sa akon sa isa pa ka lugar diin makita mo sila. Apang pila lang sa ila ang makita mo; indi mo sila makita tanan. Halin didto, pakamalauton mo sila para sa akon.”+
14 Gani gindala niya sia sa latagon sang Zofim, sa putukputukan sang Pisga,+ kag naghimo sia sing pito ka halaran kag naghalad sing isa ka toro nga baka kag isa ka karnero nga lalaki sa tagsa ka halaran.+
15 Gani nagsiling si Balaam kay Balak: “Diri ka lang anay sa imo dulot nga sinunog, samtang makig-angot ako sa Iya didto.”
16 Nagpakig-angot si Jehova kay Balaam kag ginhambal Niya sa iya ini nga mensahe:+ “Magbalik ka kay Balak, kag amo ini ang isiling mo.”
17 Gani nagbalik sia kay Balak, kag nakita niya nga nagahulat sia sa tupad sang iya dulot nga sinunog, kag kaupod niya ang mga pangulo sang Moab. Ginpamangkot sia ni Balak: “Ano ang ginhambal ni Jehova?”
18 Dayon ginsiling niya ini nga hulubaton:+
“Magtindog ka Balak, kag magpamati.
Pamatii ako, O anak ni Zipor.
19 Ang Dios indi isa ka tawo nga nagabinutig,+Indi man sia anak sang tawo nga nagabag-o sang iya hunahuna.*+
Kon may ginasiling sia, indi bala niya ini paghimuon?
Kon may ginahambal sia, indi bala niya ini pagtumanon?+
20 Ginsugo ako nga magpakamaayo;Nahatag na Niya ang pagpakamaayo,+ kag indi ko na ini mabaliskad.+
21 Indi sia magtugot nga gamiton ang gahom sang madyik batok kay Jacob,Indi sia magtugot nga may matabo nga malain sa Israel.
Si Jehova nga iya Dios kaupod nila,+Kag ginadayaw sia bilang hari sa tunga nila.
22 Ginpagua sila sang Dios sa Egipto.+
Para sa ila, pareho sia sang mga sungay sang toro nga baka nga talunon.+
23 Kay wala sing malain nga mga panimad-on batok kay Jacob,+Ukon wala sing pagpamakot batok sa Israel.+
Sa sini nga tion masiling ini tuhoy kay Jacob kag kay Israel;
‘Tan-awa ang ginhimo sang Dios!’
24 Isa ini ka katawhan nga magabangon pareho sang leon,Kag pareho sang leon magatindog ini.+
Indi ini magluko tubtob makaon sini ang iya biktima,Kag mainom ang dugo sang mga ginpatay.”
25 Dayon nagsiling si Balak kay Balaam: “Kon indi mo gid man sia mapakamalaut, indi sia pagpakamaayuha.”
26 Nagsabat si Balaam kay Balak: “Indi bala nga nagsiling ako sa imo, ‘Ang tanan nga ginahambal ni Jehova amo ang himuon ko’?”+
27 Nagsiling si Balak kay Balaam: “Dali ka, palihug. Dalhon ko ikaw sa isa pa ka lugar. Basi mangin maayo sa panulok sang matuod nga Dios nga pakamalauton mo sila didto para sa akon.”+
28 Gani gindala ni Balak si Balaam sa putukputukan sang Peor, nga nagatamwa sa Jesimon.*+
29 Dayon nagsiling si Balaam kay Balak: “Maghimo ka sa sini nga lugar sing pito ka halaran, kag maghanda ka sing pito ka toro nga baka kag pito ka karnero nga lalaki para sa akon.”+
30 Gani ginhimo ni Balak ang ginsiling ni Balaam, kag naghalad sia sing isa ka toro nga baka kag isa ka karnero nga lalaki sa tagsa ka halaran.
