Numeros 25:1-18
25 Sang mag-istar ang Israel sa Sitim,+ nagpakighilawas ang katawhan sa mga anak nga babayi sang Moab.+
2 Gin-agda sang mga babayi ang katawhan sa paghalad sa ila mga dios,+ kag nagkaon ang katawhan sing mga halad kag nagyaub sa ila mga dios.+
3 Gani ang Israel nagbuylog sa pagsimba kay Baal sang Peor,+ kag naakig gid si Jehova sa Israel.
4 Nagsiling si Jehova kay Moises: “Tipuna ang tanan nga lider* sini nga katawhan kag bitaya sila sa atubangan ni Jehova, nga makita sang tanan,* agod mag-untat ang kaakig ni Jehova sa Israel.”
5 Dayon nagsiling si Moises sa mga hukom sang Israel:+ “Patyon sang kada isa sa inyo ang iya mga tawo nga nagbuylog sa pagsimba kay Baal sang Peor.”+
6 Sa amo man nga tion, nag-abot ang isa ka Israelinhon upod ang isa ka Midianhon nga babayi+ kag gindala niya sia sa iya mga utod. Nakita ini ni Moises kag sang bug-os nga katilingban sang mga Israelinhon samtang nagahibi sila sa puertahan sang tolda nga tilipunan.*
7 Sang makita ini ni Finehas+ nga anak ni Eleazar nga anak ni Aaron nga saserdote, nagtindog sia dayon kag naghalin sa tunga sang katilingban kag nagkuha sing bangkaw.
8 Ginsundan niya ang Israelinhon tubtob sa sulod sang tolda kag gintuhog niya sila nga duha, ang Israelinhon kag ang babayi sa iya kinatawo. Dayon nag-untat ang kalalat-an sa mga Israelinhon.+
9 Ang kadamuon sang napatay sa kalalat-an 24,000.+
10 Dayon nagsiling si Jehova kay Moises:
11 “Si Finehas+ nga anak ni Eleazar nga anak ni Aaron nga saserdote nagpauntat sang akon kaakig sa katawhan sang Israel bangod wala sia magtugot nga may kaagaw ako sa tunga nila.+ Gani wala ko ginpapas ang mga Israelinhon bangod ginapatuman ko nga ako lang ang dapat simbahon.+
12 Gani isiling mo, ‘Makigkatipan ako sa iya agod ipakita sa iya ang akon kaayo.
13 Mangin katipan ini sang pagkasaserdote tubtob san-o para sa iya kag sa iya kaliwat,+ bangod wala sia magtugot nga may kaagaw ang iya Dios+ kag naghimo sia sing pagtumbas para sa sala sang katawhan sang Israel.’”
14 Ang Israelinhon nga lalaki nga ginpatay upod sa Midianhon nga babayi amo si Zimri nga anak ni Salu, nga isa ka pangulo sa panimalay sang mga Simeonhon.
15 Kag ang ginpatay nga Midianhon nga babayi amo si Cozbi nga anak ni Zur+ nga lider sang mga tribo sa panimalay sang Midian.+
16 Sang ulihi, nagsiling si Jehova kay Moises:
17 “Salakaya ang mga Midianhon, kag pamatya ninyo sila,+
18 kay ginhalitan nila kamo bangod sang ila malimbungon nga ginhimo sa inyo didto sa Peor+ kag bangod kay Cozbi nga anak nga babayi sang pangulo sang Midian, ang ila utod nga babayi nga ginpatay+ sang adlaw sang kalalat-an nga natabo didto sa Peor.”+
