Oseas 1:1-11
1 Ang mensahe ni Jehova kay Oseas* nga anak ni Beeri sang mga adlaw sang mga hari sang Juda+ nga si Uzias,+ si Jotam,+ si Ahaz,+ kag si Ezequias,+ kag sang mga adlaw sang hari sang Israel nga si Jeroboam+ nga anak ni Joas.+
2 Sang ginsugdan ni Jehova ang iya mensahe paagi kay Oseas, nagsiling si Jehova kay Oseas: “Lakat ka, magpangasawa ka sing isa ka babayi nga magapakighilawas* kag mag-anak ka sing mga anak sa iya pagpakighilawas,* bangod paagi sa pagpakighilawas* ang duta wala na gid magsunod kay Jehova.”+
3 Gani naglakat sia kag ginpangasawa niya si Gomer nga anak ni Diblaim. Nagbusong sia kag nagbun-ag sing anak nga lalaki.
4 Dayon nagsiling si Jehova sa iya: “Hingalanan mo sia nga Jezreel,* kay sa indi madugay silutan ko ang panimalay ni Jehu+ bangod sang pagpaagay sing dugo sang Jezreel, kag pauntaton ko ang paggahom sang mga hari sa panimalay ni Israel.+
5 Sa sina nga adlaw balion ko ang pana sang Israel sa Nalupyakan* sang Jezreel.”
6 Nagbusong sia liwat kag nagbun-ag sing anak nga babayi. Kag nagsiling Sia kay Oseas: “Hingalanan mo sia nga Lo-ruhama,* kay indi ko na pagkaluy-an+ ang panimalay ni Israel, bangod tabugon ko sila.+
7 Apang kaluy-an ko ang panimalay ni Juda,+ kag luwason ko sila, ako si Jehova nga ila Dios.+ Indi ko sila pagluwason paagi sa pana ukon sa espada ukon sa inaway ukon sa mga kabayo ukon sa mga manugkabayo.”+
8 Sang malutas na si Lo-ruhama, nagbusong si Gomer kag nagbun-ag sing anak nga lalaki.
9 Dayon nagsiling Sia: “Hingalanan mo sia nga Lo-ami,* bangod indi ko kamo katawhan kag indi ninyo ako Dios.
10 “Kag ang kadamuon sang katawhan* sang Israel mangin pareho sang mga balas sa dagat nga indi masukob ukon maisip.+ Kag sa lugar diin ginsiling sa ila, ‘Indi ko kamo katawhan,’+ isiling sa ila, ‘Ang mga anak sang buhi nga Dios.’+
11 Kag ang katawhan sang Juda kag katawhan sang Israel mahiusa sing tingob+ kag magapili sila sing isa lang ka pangulo kag magataklad pagua sa duta, bangod mangin daku ini nga adlaw sang Jezreel.+
Footnote
^ Ginpalip-ot nga ngalan ni Hosaias, nga nagakahulugan “Ginluwas ni Jah; Si Jah Nagluwas.”
^ Ukon “magahimo sing imoralidad; mangin maulag.”
^ Ukon “imoralidad; pagkaulag.”
^ Ukon “imoralidad; pagkaulag.”
^ Buot silingon, “Ang Dios Magasab-ug sing Binhi.”
^ Ukon “Manubo nga Patag.”
^ Buot silingon, “Wala Ginkaluy-an.”
^ Buot silingon, “Indi Akon Katawhan.”
^ Sa literal, “mga anak.”
