Oseas 11:1-12
11 “Sang bata pa ang Israel, ginhigugma ko sia,+Kag halin sa Egipto gintawag ko ang akon anak.+
2 Kon daw ano ang pagtawag nila* sa ila,Labi pa nga nagpalayo sila.+
Padayon sila sa paghalad sa mga imahen ni Baal+Kag sa paghalad sa tinigib nga mga imahen.+
3 Apang ako ang nagtudlo sa Efraim sa paglakat,+ kag ginakungkong ko sila;+Kag wala nila ginkilala nga gin-ayo ko sila.
4 Gin-ubayan ko sila paagi sa lubid sang mga tawo* kag paagi sa pisi sang gugma;+Kag daw pareho ako sang isa ka tawo nga nagakuha sang gota sa ila liog,*Kag gindalhan ko sing pagkaon ang kada isa sa ila.
5 Indi sila magbalik sa duta sang Egipto, kag Asiria ang mangin hari nila,+Bangod nangindi sila sa pagbalik sa akon.+
6 Hagbason sang espada ang iya mga siudad+Kag gub-on ang iya mga pintal kag halunhunon sila bangod sang ila mga pahito.+
7 Ang akon katawhan may huyog nga mangin indi matutom sa akon.+
Bisan pa ginatawag nila sila nga magbalik sa isa nga mataas,* wala gid sing isa sa ila nga nagatindog.
8 Paano ko mahimo nga talikdan ka, O Efraim?+
Paano ko mahimo nga itugyan ka, O Israel?
Paano ko mahimo sa imo ang ginhimo ko sa Adma?
Paano ko mahimo sa imo ang ginhimo ko sa Zeboiim?+
Nagbag-o ang akon tagipusuon;Kag napahulag* ang akon kaluoy.+
9 Indi ko pag-ipakita ang akon masingkal nga kaakig.
Indi ko na paglaglagon liwat ang Efraim,+Kay Dios ako kag indi tawo,Ang Isa nga Balaan sa tunga mo;Kag indi ako magkadto sa imo nga may daku nga kaakig.
10 Magasunod sila sa paglakat kay Jehova, kag magangurob sia pareho sang leon;+Kon magngurob sia, magaabot nga nagakurog ang mga anak niya halin sa katundan.+
11 Magakurog sila nga pareho sang pispis kon maggua sila sa Egipto,Pareho sang salampati halin sa duta sang Asiria;+Kag paistaron ko sila sa ila balay,” siling ni Jehova.+
12 “Kabutigan lang ang ginahambal sa akon sang Efraim,Kag pagpangdaya lang ang makita ko sa panimalay ni Israel.+
Apang ang Juda nagalakat* gihapon upod sa Dios,Kag matutom sia sa Isa nga Labing Balaan.”+
Footnote
^ Buot silingon, ang mga manalagna kag iban pa nga ginpadala agod tudluan ang Israel.
^ Ukon “lubid sang kaayo,” kaangay sang iya sang ginikanan.
^ Sa literal, “sag-ang.”
^ Buot silingon, sa mataas nga porma sang pagsimba.
^ Sa literal, “nag-init.”
^ Ukon “nagaluyong.”
