Panalambiton 5:1-22
5 O Jehova, dumduma ang natabo sa amon.
Tan-awa ang amon kahuy-anan.+
2 Ang amon palanublion kag ang amon balay ginhatag sa mga dumuluong.+
3 Nangin mga ilo kami nga wala sing amay; ang amon mga iloy daw mga balo nga babayi.+
4 Dapat namon baklon ang tubig nga amon ginainom+ kag ang kahoy nga amon ginagatong.
5 Daw madakpan na kami sang mga kaaway nga nagalagas sa amon;Kapoy na kami, apang wala kami ginapapahuway.+
6 Nagsalig kami sa Egipto+ kag sa Asiria+ agod lang may makaon.
7 Wala na ang amon mga katigulangan nga nakasala, apang kami ang nagaantos sang ila mga sala.
8 Mga alagad na karon ang nagagahom sa amon; wala sing makaluwas sa amon sa ila kamot.
9 Ginabutang namon sa katalagman ang amon kabuhi* agod lamang makakaon,+ bangod sang mga tawo nga may espada sa kamingawan.
10 Ginhilanat kami sa sobra nga kagutom, ang amon lawas daw hurnuhan kainit.+
11 Ginpakahuy-an* nila ang mga asawa sa Sion, ang mga birhen sa mga siudad sang Juda.+
12 Ginbitay nila sa kamot ang amon mga prinsipe,+ kag wala nila pagtahura ang amon mga gulang.+
13 Ang mga pamatan-on nga lalaki ginpaobra nila sa galingan, kag ang mga kabataan nga lalaki nagkaladusmo sa pagpas-an sing mabug-at nga inuggatong.
14 Wala na sing mga gulang sa gawang sang siudad;+ wala na sing mga pamatan-on nga lalaki nga nagatokar sing musika.+
15 Nadula na ang amon kalipay; ang amon sinaot ginbuslan sang paglalaw.+
16 Ang korona sa amon ulo nahulog. Makaluluoy kami kay nakasala kami!
17 Bangod sini nagmasakit ang amon tagipusuon,+Kag bangod sini nagdulom ang amon panulok,+
18 Kay mamingaw na ang Bukid Sion;+ ginalagawan na lang ini sang mga talunon nga ido.
19 Apang, O Jehova, magapungko ka sa imo trono
Sa wala sing katubtuban, sa tanan nga kaliwatan.+
20 Ngaa ginkalimtan mo kami sing dayon kag ginbayaan sa malawig nga tion?+
21 O Jehova, pabalika kami sa imo kag magabalik kami.+
Ibalik ang amon maayo nga kahimtangan sang una.+
22 Apang, ginsikway mo na gid kami.
Akig ka gid gihapon sa amon.+