Salmo 72:1-20
Tuhoy kay Solomon.
72 O Dios ko, tudlui ang hari sang imo mga kasuguan,Kag ang anak sang hari sang imo pagkamatarong.+
2 Kabay nga pangapinan niya ang imo katawhan paagi sa pagkamatarong,Kag ang imo mga kubos paagi sa matarong nga paghukom.+
3 Kabay nga ang kabukiran kag kabakuluranMagadala sing paghidait sa katawhan paagi sa pagkamatarong.
4 Pangapinan* niya ang kubos sa tunga sang katawhan,Luwason niya ang mga anak sang imol,Kag laglagon niya ang nagapangdaya.+
5 Magakahadlok sila sa imo samtang may adlawKag samtang may bulan,Sa tanan nga kaliwatan.+
6 Mangin kaangay sia sang ulan nga nagatupa sa hinagbasan nga hilamon,Kaangay sang bugana nga ulan nga nagatupa sa duta.+
7 Sa tion sang iya paggahom magalambo* ang matarong,+Kag magabugana ang paghidait+ tubtob wala na ang bulan.
8 May mga sakop* sia halin sa isa ka dagat tubtob sa isa paKag halin sa Suba* tubtob sa pinakamalayo nga mga bahin sang duta.+
9 Magayaub sa iya ang mga nagaistar sa desyerto,Kag magadilap sa yab-ok ang iya mga kaaway.+
10 Ang mga hari sang Tarsis kag mga isla magabayad sing buhis.+
Ang mga hari sang Sheba kag Seba magahatag sing mga regalo.+
11 Magaduko sa iya ang tanan nga hari,Kag magaalagad sa iya ang tanan nga pungsod.
12 Kay luwason niya ang imol nga nagapangayo sing bulig,Amo man ang kubos kag ang bisan sin-o nga wala sing nagabulig.
13 Kaluy-an niya ang kubos kag ang imol,Kag luwason niya ang kabuhi* sang mga imol.
14 Luwason niya sila* sa pagpamigos kag sa pagpamintas,Kag ang ila dugo mangin hamili sa iya mga mata.
15 Kabay nga magkabuhi sia sing malawig, kag kabay nga ihatag sa iya ang bulawan sang Sheba.+
Kabay nga mangamuyo sila pirme para sa iya,Kag kabay nga pakamaayuhon sia sa bug-os nga adlaw.
16 Mangin bugana ang mga uyas sa duta;+Sa putukputukan sang kabukiran magahapayhapay ini.
Ang mga bunga sini mangin madamo kaangay sang kakahuyan sang Lebanon.+
Kag magadamo ang mga pumuluyo sang siudad kaangay sang hilamon sang duta.+
17 Kabay nga magpadayon ang ngalan sang hari sa wala sing katubtuban.+
Kag kabay nga maglapnag ang iya ngalan samtang may adlaw,Kabay nga paagi sa iya pakamaayuhon ang katawhan;+Kabay nga ipahayag sia nga malipayon sang tanan nga pungsod.
18 Kabay nga dayawon si Jehova nga Dios, ang Dios sang Israel,+Sia lamang ang nagahimo sing makatilingala nga mga binuhatan.+
19 Kabay nga dayawon ang iya mahimayaon nga ngalan sa wala sing katubtuban,+Kag kabay nga mapuno sang iya himaya ang bug-os nga duta.+
Amen kag Amen.
20 Diri natapos ang mga pangamuyo ni David nga anak ni Jesse.+
Footnote
^ Sa literal, “Hukman.”
^ Sa literal, “magapanalingsing.”
^ Ukon “Magagahom.”
^ Eufrates.
^ Ukon “kalag.”
^ Ukon “Tubson niya ang ila kalag.”
