Bug-os Kalibutan nga Report

◼ EUROPA

Kadamuon sang pungsod: 46

Populasyon: 728,162,887

Kadamuon sang manugbantala: 1,476,554

Kadamuon sang pagtuon sa Biblia: 697,044

Ang banas padulong sa kamatuoran mahimo nga malawig. Sang 1951, si Steponas isa anay ka politikal nga bilanggo sa isa ka kampo sa Kazakhstan. Nagtrabaho sia didto kaupod ni Edvardas, isa ka makugi nga pamatan-on nga Saksi nga taga-Lithuania nga ginbilanggo bangod sang pag-imprinta sing Lalantawan nga magasin. Ginpaambit ni Edvardas ang iya pasad-sa-Biblia nga paglaum, kag nakumbinse si Steponas nga nakita niya ang kamatuoran. Sang 1955, si Steponas ginbuhian. Sa pagpaalam, ginsilingan sia ni Edvardas: “Ayhan magakitaay kita liwat sa pila ka adlaw.” Bisan pa nga si Steponas wala nabawtismuhan, nagdumdom ang Soviet State Security Committee nga isa sia sa mga Saksi ni Jehova. Ginsalakay sing kibot sang  mga pulis ang iya apartment kag ginkompiskar ang mga papeles nga may listahan sang mga direksion sang mga utod. Subong resulta, nautod ang iya komunikasyon sa katawhan sang Dios.

Naglipas ang 47 ka tuig. Sini nga tion, si Steponas nagapuyo sa isa ka magamay nga baryo sa naaminhan nga Lithuania diin wala sing mga Saksi. Nian sang tigpamulak sang 2002, nakakuha sia sing pila ka literatura kag ginpadala niya ang kupon sa sanga talatapan sang mga Saksi ni Jehova sa Lithuania nga nagapangabay sing libro nga Ang Sekreto Sang Kalipay sa Pamilya. Nagpaathag sia: “Ginpadala ko ang kupon, sa paglaum nga may komunikasyon liwat ako sa mga utod.” Isa ka espesyal payunir nga mag-asawa ang naglakbay agod masugilanon sia kag magtuon sing Biblia upod sa iya. Paglipas sang kubos sa isa ka tuig, si Steponas ginbawtismuhan sa edad nga 80.

Nakita pa bala niya si Edvardas, nga nagsiling anay halos tunga na sa isa ka siglo ang nagligad: “Ayhan magakitaay kita liwat sa pila ka adlaw”? Huo! Isa ka adlaw sa tapos sia nabawtismuhan, ining duha ka lalaki, nga karon espirituwal na nga mag-utod, mainit nga naghaksanay kag nagkasadya.

Sa Britanya, si Tim kag si Sam, lunsay 11 anyos kag di-bawtismado nga mga manugbantala, nag-alagad sa latagon upod sa iloy ni Tim. Ang duha ka bata nagakinahanglan sing bag-ong mga bag para sa ila Biblia kag literatura, apang wala sila sing kuarta. Antes mag-alagad sa latagon sadto nga adlaw, ginpangamuyo sang mga iloy sang duha ka lamharon nga manugbantala ini nga problema. Sa katapusan nga balay nga ginduaw nila sina nga aga, ginsugilanon ni Tim ang tagbalay kag ginbasahan sia sing isa ka bersikulo sa Biblia. Ginsapar sia sang babayi kag ginpamangkot kon ano ang iya relihion. Sang nagsabat si Tim nga isa sia sa mga Saksi ni Jehova, gin-akigan sia sang babayi kag ginsingganan ang iya iloy nga indi niya mahangpan kon ngaa ginapabay-an sang mga Saksi nga mapatay ang ila mga anak sa baylo nga patughungan sila sing dugo.

Nagpanugda ang iloy ni Tim nga pamangkuton sang babayi ang mga bata kon ano ang ila balatyagon tuhoy sa sini, gani ginpamangkot niya ang mga bata. Ginpaathag ni Tim nga pilion gid niya  ang alternatibo nga pagbulong sa baylo nga lapason ang iya nahanas-sa-Biblia nga konsiensia. Nian nagsaligbat si Sam nga ang iya mismo magulang nga babayi nagbaton sing alternatibo nga pagbulong kag madasig nga nag-ayo sangsa iban nga mga pasyente nga nagpatughong sing dugo.

Liwat nga ginhambal sang tagbalay ang iloy ni Tim. Sini nga tion nagsiling sia nga indi sia pabor nga ang mga bata ginapaupod sa pagpamalaybalay. Ang duha ka bata nagsabat nga nalipay sila sa pagbantala, kag nagsiling pa gid nga mas gusto nila ini sangsa mag-istambay sa kalye kaangay sang iban nga mga kaedad nila. Nagdayaw sa ila sabat, ginpahulat sang tagbalay ang mga bata sa makadali samtang nagsulod sia sa iya balay. Daw ano gid ang ila kakibot sang nagbalik ang babayi kag ginhatagan ang kada isa sa ila sing isa ka matahom, bag-ong panit nga bag, nga bagay gid para sa ministeryo! Nagabaligya gali sia sing panit nga mga bag. Karon nga nagbag-o ang iya panimuot, ang mga bata naghimo sing kahimusan sa pagduaw liwat. Sang malakat na sila, ang 94-anyos nga iloy sang tagbalay, nga madugay na nga nagapamati, naggua sa ganhaan kag nagpangabay sa iloy ni Tim nga duawon man sia sa iya balay.

Nakita sang duha ka utod nga babayi samtang nagaalagad sa latagon ang masunod nga mensahe sa isa ka paradahan sang bus sa Portugal: “Isa ako ka estudyante sang sikolohiya nga nagahanda sing tesis sa tema tuhoy sa disparatis. Kon mabuligan ninyo ako, palihug E-mail sa masunod nga direksion . . .” Sadto nga hapon ang mga utod nga babayi nagatanyag sing artikulo sa Ang Lalantawan nga natig-uluhan “Ginakontrol Bala Sang Disparatis ang Imo Kabuhi?” Gani namat-od sila nga mag-E-mail kag itanyag ang magasin.

Pagligad sang isa ka semana ang babayi nga nagpaanunsio sang mensahe nagbalos sa ila: “Salamat sa inyo atension. Ginakasubo ko nga wala ako gilayon makabalos. Luyag ko makabaton sing magasin nga ginsambit ninyo. Sining karon lang, kada magpalapit ang mga Saksi, pirme ako nagadali padulong sa trabaho ukon nagahingagaw sa pagsakay sa bus amo nga wala ko pa sila masugilanon. Nahangpan ko nga nagatanyag kamo sing mga pagtuon sa Biblia, kag nalipay ako sa pagbaton sini.”

 Ang mga utod nga babayi nagsiling: “Sa amon una nga pagduaw, madamo sia sing pamangkot. Ginhatagan namon sia sing Ihibalo nga libro kag naghimo sing kahimusan sa pagtuon sing Biblia upod sa iya. Pirme sia nakahanda sa iya pagtuon kag nagatambong na sia karon sa tanan nga mga miting sang kongregasyon.”

Samtang nagapanaksi sa dalan, ginpalapitan ni Tatjana si Lina, nga isa ka manugbantala sa isa ka siudad sa nabagatnan nga bahin sang Alemanya. “Natandaan mo pa bala ako?” pamangkot ni Tatjana. Nagsabat si Lina nga indi niya sia matandaan. “Indi gid man ina makatilingala,” padayon ni Tatjana. “Isa ka bes lang kita nagkit-anay, kag lima ka tuig na yadto ang nagligad.” Nagpadayon sia: “Sang tigpamulak sang 1998, ginpalapitan mo ako sa dalan kag gintanyagan ako sing brosyur nga Ano ang Ginapatuman Sang Dios sa Aton? Indi maayo ang ginpakita ko sa imo, apang bangod sang imo kaayo kag pagkamainabyanon, gindala ko pauli ang brosyur kag ginbasa ini. Natandog gid ako sa mga kaundan sini.” Sang ulihi, isa ka mag-asawa nga wala makakilala kay Lina ang nagduaw sa puluy-an ni Tatjana. Bangod sang nabasa ni Tatjana sa brosyur, nagpasugot sia nga magtuon sa Biblia. Sang nakita niya liwat si Lina, sang 2003, isa na sia ka bawtismado nga Saksi. Sa katunayan, auxiliary payunir sila nga duha ni Lina sina nga bulan!

Ang isa ka utod nga babayi sa Pskov, Rusya, nakabaton gikan sa sanga talatapan sing direksion sang isa ka lalaki nga nagapuyo sa nabaw-ing nga lugar. Madugay niya nalab-ot ini nga lugar. Sang nakalab-ot gid man sia sang ulihi, nahibaluan niya nga wala sing hinalung-ong ang lalaki nga nagpangabay gali sia sing isa ka pagtuon sa Biblia. Sa isa ka tiangge nagbakal sia sing isa ka magasin nga may bookmark nga isa ka gingunting nga kupon gikan sa isa sa mga tract naton. Nagsiling ang lalaki nga pagdumdom niya may premyo nga ginatanyag, gani ginpadala niya ang kupon kay basi magdaug sia. Ang utod nga babayi nagsabat: “Nagdaug ka sing isa ka walay bayad nga pagtuon sa Biblia!” Ang lalaki kag ang iya asawa nagpakita sing interes, kag nasugdan ang pagtuon sa Biblia. Ang pagtuon ginahiwat sing duha ka beses sa isa ka bulan, kay nagapuyo ang pamilya malayo sa balay sang utod.

 ◼ OCEANIA

Kadamuon sang pungsod: 30

Populasyon: 34,355,946

Kadamuon sang manugbantala: 93,718

Kadamuon sang pagtuon sa Biblia: 47,270

Gingamit sang 14-anyos nga si Alyce, nga taga-Australia, ang mga topiko gikan sa aton mga magasin sa paghanda sing mga asaynment sa eskwelahan. Isa ka semana nagsulat sia sing salaysay tuhoy sa pamangkot, “Diin Nagapadulong Ining Kalibutan?” Ginpaathag sini ang kahulugan sang aton tion suno sa tagna sang Biblia. Ginpamangkot sia sang iya maestra kon ano ang iya relihion. Nagpaathag si Alyce nga nagatuon sia sing Biblia upod sa mga Saksi ni Jehova, kag ginhatagan niya ang iya maestra sang aton pila ka magasin agod mabasa niya.

Bisan pa interesado sa sini ang maestra ni Alyce, ginpalas-ay sia sang isa pa ka maestro nga indi makigsugilanon sa mga Saksi ni  Jehova. Apang, sa tapos makita ang maayo nga paggawi ni Alyce sa sulod sang pila ka bulan, namat-od ang iya maestra sa pagpangusisa sing dugang pa. Sa kahangawa nga basi madalahig si Alyce sa isa ka makatalagam nga relihioso nga kulto, nagkadto sia sa lokal nga librarya kag naghulam sing libro nga Jehovah’s Witnesses​​—Proclaimers of God’s Kingdom. Ginbasa niya ang bug-os nga tomo sa isa ka talipuspusan sang semana! Bangod kumbinsido sia nga nakita niya ang kamatuoran, ginteleponohan niya ang iloy ni Alyce sa pagpangabay sing dugang pa nga literatura kag nagsugod sa pagtuon sa Biblia upod sa mga Saksi. Sa sulod sang isa ka bulan, nagtambong sia sa tanan nga miting kag nabuyok niya ang iya bana kag ang iya iloy sa pagtambong sa mga miting kon Domingo. Nagtuon man sila sa Biblia kag nagahimo sing maayo nga pag-uswag. Sa sulod sang tatlo ka bulan, ang iya maestra nangin di-bawtismado nga manugbantala kag naghatag sang iya nahauna nga bahin subong estudyante sa Teokratikong Eskwelahan Para sa Ministeryo. Pagligad sang pila ka bulan, si Alyce, kag ang iya maestra, nga si Linda, ginbawtismuhan sing dungan.

Handurawa nga nagapuyo ka sa isa ka pulo diin nagaisahanon ka lang nga sumilimba ni Jehova! Sa Marshall Islands, amo sina ang kahimtangan sang isa ka utod nga babayi nga ang iya bana nag-obra sa Mejatto atoll. Gin-agda sia sang mga kaingod nga magsimba sa Protestante, apang nangindi sia. Sa baylo, nagkonsentrar sia sa pagtudlo sa iya mga anak nga ginagamit Ang Akon Libro Sang mga Sugilanon sa Biblia. Ginpaambit man niya ang iya pagtuluuhan sa iya mga kaingod, nga ginakugos ang iya kinagot samtang nagapamalaybalay. Sang ulihi, ang iban nagpakita sing interes, kag ining utod nga babayi sa nabaw-ing nga lugar nagadumala na karon sing pila ka pagtuon sa Biblia nga ginagamit ang Ginapatuman nga brosyur. Kada bulan ginapadala niya ang iya report sa pag-alagad sa latagon sa iya anay kongregasyon. Upod ang iya mga anak, nagabiyahe sia sing malawig sakay sa barko sa pagtambong sa Memoryal kag sa mga asambleya nga ginahiwat sa pulo sang Ebeye. Ang mga katapo sang kongregasyon sa Ebeye nagasulat sa iya agod palig-unon sia, ginasugiran sia sing mga eksperiensia sa pag-alagad sa latagon kag sing mga butang nga natun-an nila sa mga miting sang kongregasyon. Napalig-on  man sila sa matutom nga halimbawa sining utod nga babayi sa nabaw-ing nga lugar.

Madamong nabaw-ing nga mga baryo sa Papua New Guinea ang wala sing koryente. Ang mga tawo didto nagagamit sing generator ukon baterya para sa ila de-koryente nga mga kasangkapan. Agod buligan ang iya mga kasimaryo nga mahangpan sing dugang pa ang Biblia, luyag sang bag-ong nabawtismuhan nga utod nga babayi nga ipasalida ang pila ka video nga ginhimo sang mga Saksi ni Jehova. Sa tapos makasupot sing kuarta paagi sa pagbaligya sang iya mga patubas, ginsugilanon niya ang isa ka negosyante nga babayi sa ila lugar nga may telebisyon, VCR, kag generator agod arkilahan ining tatlo ka kasangkapan. Ginpaathag sang aton utod nga babayi nga luyag niya agdahon ang bug-os nga baryo sa pagtan-aw sing pila ka pasad-sa-Biblia nga mga video nga sa pagbanta niya makabulig sa ila sa espirituwal. Gilayon nga ginpanubuan sang negosyante nga babayi ang arkila, nga nagasiling nga luyag man niya matan-aw ang mga video. Halos ang tanan sa baryo nagkari. Sa tapos makatan-aw, madamo ang nagkomento nga wala sila makahibalo nga ang hilikuton sang mga Saksi ni Jehova ginahimo gali sa tuman kadamo nga mga lugar. Nagdayaw man sila sa bug-os kalibutan nga paghiliutod, butang nga wala nila makita sa ila mismo relihion. Ang utod nga babayi nakabaton sing madamong imbitasyon nga duawon ang mga tawo nga wala anay nagapakigsugilanon sa mga Saksi apang karon luyag nila mahibaluan ang dugang pa tuhoy sa aton mga pagtuluuhan.

Sa Savaii, ang pinakadaku nga pulo sang Samoa, ang pila ka lider sang komunidad nagdumili sa mga Saksi ni Jehova sa pagbantala sa ila mga baryo. Ang isa ka utod nga babayi nga nagapuyo sa isa sini nga mga baryo nanindugan sa kamatuoran sang ginhimo niya ang kahimusan sa serbisyo sa lubong sang iya anak nga lalaki. Sanglit hiwaton ini sa iya balay, ang mga kauturan halin sa duha ka kongregasyon sa pulo nagbulig sa pagtinlo sa balay kag ugsaran kag sa paghanda sing generator. Nakita sang mga tawo sa baryo ining mahigugmaon nga bulig. Ang pag-organisar kag paghimo sang mga utod sing serbisyo sa lubong tuhay gid sa kinabatasan sang Samoa.

Duha ka adlaw pagkatapos sang lubong, ang konseho sang baryo nagpatawag sing miting kag ginhambalan ang natabo. Ang tanan  nga mga katapo sini nagdayaw gid sa kon paano ginbuligan sang mga Saksi ang pamilya, antes kag pagkatapos sang lubong. Ang mga pangulo sang baryo natandog gid sa kon paano ginhimo ang lubong amo nga nag-ugyon ang tanan nga islan ang mga kinabatasan sa lubong sing Faa-Molimau a Ieova (Ang Paagi Sang mga Saksi ni Jehova). Paglipas sang duha ka adlaw, ang tuigan nga Memoryal sang kamatayon ni Cristo ginhiwat sa isa ka magamay nga Kingdom Hall mga pila ka kilometro ang kalayuon. Ginsakay sang tatlo ka pick-up nga mga trak ang mga pamilya halin sa sini nga baryo agod magtambong. Karon ang aton mga kauturan makapanaksi na sing hilway sa sining baryo, ang isa sa pinakadaku sa pulo. Ang duha ka espesyal payunir nagadumala didto sing anom ka pagtuon sa Biblia. Ang isa ka Pagtinuon Sang Kongregasyon sa Libro ginatambungan indi lamang sang mga interesado sa baryo kundi sang isa man ka pangulo sang baryo.

Sa Fiji isa ka pamatan-on nga lalaki ang nagpungko sa idalom sang isa ka kahoy nga ginapamensar ang iya kabuhi kag palaabuton. Gin-agda niya ang isa nga naglabay nga magpungko sa tupad niya. Ang naglabay natabuan nga isa ka utod nga lalaki, kag gingamit niya ang kahigayunan sa pagpanaksi. Bisan nabatian na sang pamatan-on ang saad sang Biblia tuhoy sa isa ka paraiso nga duta, napukaw liwat ang iya interes bangod sang pagpakigsugilanon sa utod. Namat-od sia nga magbalik sa pulo diin nagapuyo ang iya iloy kag nagsugod sa pagtuon sa Biblia. Pag-abot niya didto, ginpierde sang iya mga paryente nga nagapamatok sa iya bag-o nga pagtuluuhan ang iya uma nga bag-o lang niya gintamnan. Nian gintabog sia sang mga pangulo sang baryo, nga nagasiling nga ang ila lamang relihion ang ila ginatugutan. Masunod nagkadto sia sa baryo sang iya amay sa pihak nga magamay nga pulo. Didto naghimo sia sing baruto nga human sa daan nga sin, kag kada semana nagabugsay sia sing pila ka kilometro sa mabalod nga dagat sa pagpakig-upod sa mga Saksi. Padayon sia nga ginpamatukan sang iya pamilya, kag napilitan sia sa pagkabuhi kaangay sang isa ka ermitanyo sa nabaw-ing nga bahin sang pulo. Sang ulihi, nagsaylo sia sa mayor nga pulo, malapit sa isa ka daku nga kongregasyon. Padayon sia nga nag-uswag sa espirituwal subong di-bawtismado nga manugbantala.

 ◼ MGA KADUTAAN SA AMERIKA

Kadamuon sang pungsod: 56

Populasyon: 857,137,983

Kadamuon sang manugbantala: 3,095,083

Kadamuon sang pagtuon sa Biblia: 2,898,369

Isa ka Domingo sang aga sang Septiembre 2002, ginduaw liwat sang isa ka utod nga babayi sa Estados Unidos ang tag-iya sang isa ka balaligyaan. Bangod may ginaatender pa sia nga mga kostumer sadto nga tion, ang utod naglibotlibot anay sa balaligyaan. Nakita sang utod ang isa ka babayi nga nagsulod sa pagbakal sing mala, ang Hindu nga katumbas sang rosarito sang mga Katoliko. Ang mala isa ka kulintas nga may duag-kaki nga mga bead nga ginagamit sa pagsulit sa mga pangadi sa madamong Hindu nga mga dios. Daw nakita na sang babayi nga si Shwe ang mala nga naluyagan niya sang nagpalapit sa iya ang aton utod kag nagsiling: “Mahimo bala ako makapamangkot, Ina bala nga mala human sa sandalwood?”

 “Huo! Madugay na ako nagapangamuyo sa dios nga makakita ako sing maayo nga mala, kag nakita ko ini karon nga adlaw. Simhuti bala!”

“Aba, tuman kahumot! Sin-o nga dios ang pangamuyuan mo paagi sini?”

“Kon kaisa si Ganesa ukon si Siva ukon si Durga. Pangamuyuan ko sila paagi sa sini nga mala.”

“Ti, nahibaluan mo na bala kon sin-o ang pinakagamhanan nga dios?”

“Naligban ako tuhoy sina. Ambot kon sin-o ang pinakagamhanan nga dios.”

“Naligban man ako anay sang isa pa ako ka Hindu kag nagasimba sa sining mga dios. Apang kilala ko na karon kon sin-o ang labing gamhanan nga Dios. Ipakita ko sa imo. [Ginbasa niya ang Salmo 83:18.] Si Jehova nga Dios amo ang Labing Gamhanan sa bug-os nga duta. Mas gamhanan sia sangsa kanday Siva, Ganesa, kag Durga. Mahimo ko ikaw tudluan tuhoy sa labing gamhanan nga Dios nga walay bayad.”

“Tudluan mo ako tuhoy sa matuod nga Dios? Ang tanan ko nga pangamuyo nasabat karon nga adlaw!”

“Paano?”

“Adlaw-adlaw ako nga nagapangamuyo nga makakita ako sing maayo nga mala agod nga paagi sa sini masapwan ko ang matuod nga Dios. Nangamuyo man ako nga makakita ako sing isa ka matuod nga abyan nga makabulig sa akon bangod wala ako sing abyan. Ano ang imo ngalan?”

“Ako si Mala, kag huo, mahimo ako nga mangin ang abyan nga magatuytoy sa imo paagi sa Biblia.”

“Daw indi ako makapati nga hatagan ako sang Dios sing buhi nga Mala!”

Ang duha ka babayi naghimo sing kahimusan sa pagtuon sa Ginapatuman nga brosyur. Si Shwe regular nga nagatambong sa mga miting kag tulumuron niya nga mabawtismuhan.

 Sa Honduras isa ka misyonera nga nagapanikasog sa pagtuon sing Espanyol ang nagsulod sa isa ka tinukod sang mga negosyo kag nagpahamtang sing magasin sa receptionist. Nian nagtunog ang telepono, kag nagdumdom ang misyonera nga ginpapungko sia sang receptionist, gani nagpungko sia. Wala sia makaintiende. Ang matuod, ginapahalin na sia sang receptionist. Sini man nga tion, isa ka babayi sa kaiping nga opisina ang madugay na nga nagapangamuyo nga buligan sia nga bugrason ang isa ka imoral nga relasyon sa isa ka may asawa nga lalaki kag matun-an ang kalahamut-an nga paagi sa pagsimba sa Dios. Sang nabatian niya ang tingog sang aton utod nga babayi sa duog balatunan, nagpati sia nga ginsabat ang iya pangamuyo. Apang, sang nabatian niya nga ginapahalin sang receptionist ang utod nga babayi, nahangawa sia nga basi maglakat ang misyonera nga indi sia masugilanon. Apang, ang misyonera nagsiling sang ulihi: “Bangod wala ko maintiendihan ang receptionist, didto pa ako sang ang babayi nagdalidali sa pagpalapit agod makigsugilanon sa akon. Kumbinsido kami nga duha nga pagtuytoy ini ni Jehova.” Mga tinuig antes, ang babayi nakabasa sang mga publikasyon sang mga Saksi ni Jehova, kag namat-od sia karon nga hatagan sing bug-os nga igtalupangod ang espirituwal nga mga butang. Ginbugras na niya ang iya relasyon sa lalaki nga may asawa kag nagatuon sia karon sing Biblia kag regular nga nagatambong sa mga miting.

Isa ka espesyal payunir nga utod nga babayi sa El Salvador ang gin-asayn sa kongregasyon nga diutay lamang ang nagapamati sa kamatuoran sa teritoryo. Nangamuyo sia kay Jehova nga buligan sia nga makakita sing mga interesado. Isa ka Domingo nasugilanon niya tuhoy sa Biblia ang isa ka lamharon nga lalaki. Ginbaton niya ang Ihibalo nga libro kag nagpasugot nga duawon liwat. Masunson nga nagduaw liwat ang utod, apang pirme wala ang lalaki. Nasugilanon sang utod ang iya asawa, apang indi sia interesado sa Biblia. Sa ikalima nga pagduaw, ginpasulod sia sa balay sang asawa, bisan pa nga nagsiling sia, “sa sulod lang sang napulo ka minuto.” Ginpangabay sia sang utod kon madali niya makita ang Ihibalo nga libro. Nakita niya ang libro,  kag ginpaathag sing malip-ot sang utod ang pila ka punto gikan sa libro kag ginpasundayag ang kahimusan sa pagtuon sa Biblia. Pagligad sang tatlo ka bulan nga pagtuon, ang babayi nagsugod sa pagtambong sa mga miting kag nagpakita sing mga tanda sang pag-uswag. Kag kamusta naman ang iya bana? Sa paglipas sang tion, nagbuylog sia sa pagtuon. Nian nagtambong sia sa mga miting upod sa iya pamilya. Ginahikutar karon sining mag-asawa ang ila pagpakasal. Ang pagkamapinadayunon upod ang pagpangamuyo may yara maayong mga resulta.

Si Margarita, nga taga-Mexico, nagsugid sang iya kadalag-an sa di-pormal nga pagpanaksi: “Sa isa ka klase sa panahi, nasugilanon ko tuhoy sa Biblia ang isa sa akon mga kabutho. Nagsiling sia nga ang iya impresyon sa mga Saksi ni Jehova nga pamilya amo nga malipayon sila, kay pirme sila nagayuhum kag daw masinadyahon gid. Ginsingganan ko sia nga husto ang iya impresyon kag ang mga nagasalig kay Jehova kag nagasunod sa mga prinsipio sang Biblia may matuod nga kalipay.” Nasugdan ni Margarita ang pagtuon sa Biblia upod sa iya kabutho, nga nagatambong na karon sing regular sa mga miting kag nagauswag sa iya ihibalo sa kamatuoran.

Sa Dominican Republic, si Ana nagbilin sing Ginapatuman nga brosyur sa isa ka tawo nga daw nabalaka gid. Ang iya asawa yara sa ospital agod operahan bangod sang kanser. Nagsiling sia nga ang iya asawa mahuyugon sa pagbasa, gani dalhon niya ang brosyur sa ospital. Sang ulihi nakilala ni Ana ang iya asawa, nga nagsiling: “Mahimo na kita makasugod sa pagtuon. Handa na ako.” Ginpaathag niya sang ulihi nga samtang yara sia sa ospital, nakitluoy sia sa Dios nga ubayan sia padulong sa matuod nga relihion. Sadto mismo nga tion, gindalhan sia sang iya bana sing Ginapatuman nga brosyur. Ginbasa niya ini, nakita nga amo ini ang sabat sang Dios sa iya pangamuyo, kag gilayon nga naghandum nga mangin isa sa mga Saksi ni Jehova. Bisan pa nga kinahanglan sia maglakat sing isa ka oras sa pagtambong sa mga miting sa Kingdom Hall, madasig sia nga nag-uswag kag naaprobahan  sang ulihi subong isa ka manugbantala. “Matuman ko na karon ang akon panumpa sa Dios,” siling niya. Sa kubos sa anom ka bulan, nabawtismuhan sia sa distrito nga kombension, kag padayon sia karon nga nagaalagad kay Jehova sing malipayon.

Si Martin, isa ka 13-anyos nga manugbantala nga taga-Paraguay, nanamian sa pagpanaksi sing di-pormal. Isa ka adlaw samtang nagapauli sia halin sa eskwelahan kag nagapanaksi sa isa nga naglabay, nakita niya ang isa ka diutay nga pinutos sa dalan. Ginpudyot ini ni Martin kag nakita niya nga may unod ini nga kuarta. Bangod wala sia sing nakita nga nagapangita sini, ginsulod niya ini sa iya bulsa. Samtang nagalakat sia, nahunahuna niya: ‘Mabayaran ko na ang akon tatlo ka bulan nga utang sa tuition kag mabuligan ko pa ang akon mga ginikanan sa ila mga gastos.’ Sini man nga tion, nga wala marealisar ini, nagliko sia sa dalan nga indi niya kinaandan nga ginaagihan. Nakita niya didto ang isa ka tawo nga bal-anon gid nga may ginapangita. Nabatian niya ang tawo nga nagsiling nga nadulaan sia sing 115,000 ka guarani ($18.25, U.S.) kag amo na lang yadto ang iya kuarta para sa sina nga bulan. Gilayon nga nadumduman ni Martin ang ginsiling sang isa sa mga gulang nga nagrepaso sang mga pamangkot sa bawtismo sa iya. Ang gulang nagsiling: “Magaatubang ka sing madamong mga pagtilaw, kag ilabi na gid karon nga magapabawtismo ka.”

Kinahanglan gid ni Martin ang kuarta. Sina nga adlaw wala gani sia sing makaon sa eskwelahan, kag wala man sia sing inugbayad sa tuition. Apang, sigurado gid sia nga husto ang iya himuon, ginpamangkot ni Martin ang tawo kon pila ang iya nadula. Eksakto gid ini sa nakita ni Martin. Gindaho ni Martin ang kuarta upod ang isa ka tract kag nagsiling nga isa sia sa mga Saksi ni Jehova. Sa daku nga kalipay, sulitsulit nga nagpasalamat ang tawo kay Martin kag ginhakos sia. Ginhatag sang tawo ang iya direksion kay Martin agod maduaw niya. Si Martin nabawtismuhan upod sa iya mga ginikanan sa sirkito nga asambleya sining karon lang.

 ◼ ASIA KAG NATUNG-AN NGA SIDLANGAN

Kadamuon sang pungsod: 47

Populasyon: 3,931,574,927

Kadamuon sang manugbantala: 568,370

Kadamuon sang pagtuon sa Biblia: 417,308

Bangod sang problema sa kapagros, limitado lang ang pagpamalaybalay ni Kumiko, isa ka payunir nga utod nga babayi nga nagapuyo malapit sa Tokyo, Japan. Gani, mas madamo nga tion ang ginahinguyang niya sa pagpanaksi paagi sa sulat. Ginahatag sa iya sang iya mga kakongregasyon ang direksion sang mga tawo nga indi nila masugilanon bangod wala sila pirme sa balay. Nagahimo sia sing mga sulat, kag ginadul-ong ini sang mga manugbantala sang kongregasyon. Sa sulod sang kapin sa isa ka tuig, wala sia makabaton sing balos. Apang, maukod gihapon sia nga nagsulat. Sang ulihi, sa tapos sang mga 1,500 ka sulat, nakabaton sia sing isa ka postcard nga nagasiling: “Salamat sa imo sulat. Interesado  gid ako sa ginsiling mo. Mahimo mo ako maduaw sa masunod nga mga adlaw, kag hulaton ko nga kontakon mo ako.” Ginduaw niya ini nga tawo nga may luha sang kalipay, kag gilayon nga nasugdan ang isa ka pagtuon sa Biblia. Nagsiling sia: “Sang primero, nagpangalag-ag ako tuhoy sa paghimo sing sulat, apang sa karon nagasalig gid ako nga kon pangitaon naton ang mga tulad-karnero sing mapailubon, pat-od gid nga pakamaayuhon ni Jehova ang aton mga panikasog.”

Isa ka aga samtang nagapamalaybalay sa India, ang isa ka utod nga babayi nagpanuktok sa isa ka ganhaan. Ginbuksan ini sang isa ka masinulub-on nga babayi. May duha ka magagmay nga bata nga nagalumpagi sa salog kag yara sa atubangan nila ang wala unod nga mga pinggan. Ginsugid sang aton utod ang makalulugpay nga mensahe sang Ginharian sang Dios kag ang mga pagpakamaayo sini, kag ang babayi namati sing maayo. Sini man nga tion, ang gutom nga mga bata sulitsulit nga nagaingos sing pagkaon sa ila iloy. Wala niya sila paghatagi. Nagsiling ang utod nga magahulat sia tubtob makakaon ang mga bata. Nian ang babayi naghibi, nga nagasiling nga ang pagkaon may hilo. Ipakaon na kuntani niya ini sa ila sang may nagpanuktok sa ganhaan. Bangod sang mga problema sa pamilya, pati na ang isa ka palahubog nga bana, namat-od sia nga patyon ang kaugalingon kag ang iya duha ka bata nga babayi. Pagkabati sini, ginhaboy sang utod ang pagkaon, nagdalidali sa pagkadto sa malapit nga tiendahan, kag nagbakal sing pagkaon para sa mga bata. Ginluto nila ang pagkaon kag ginhatag ini sa mga bata. Ang mensahe sang Ginharian naglugpay gid sa sining babayi. Ginbaton niya ang isa ka pagtuon sa Biblia kag sa karon isa na sia ka bawtismado nga Saksi. Ang iya duha ka bata nagaupod sa iya sa mga miting. Sining karon lang, ang iya bana nagtambong man sa mga miting kag nagahimo sing maayo nga pag-uswag.

SARS! Ini nga tinaga naghatag sing kahadlok sa madamo sa Taiwan. May kahangawa nga nagtan-aw sing balita ang mga residente kon paano naapektuhan sini nga balatian ang Hong Kong. Nian naapektuhan man sini ang Taiwan! Ang pila ka ospital  kinahanglan ikuarentinas kay basi maglapnag ang impeksion, kag madamo nga tawo ang nahadlok nga basi sila ang masunod nga mangin biktima. Bisan antes pa ipatuman sang gobierno, ginbuligan sang sanga talatapan ang mga kongregasyon nga makatigayon sing mga termometro agod makuhaan sang mga utod sing temperatura ang tanan nga nagatambong sa mga miting.

Nian ginsugo sang gobierno nga likawan sang tanan nga narehistro nga mga relihion ang pagbantala sa pila ka kabalayan. Ang isa ka pinasahi nga programa sa Miting sa Serbisyo nagbulig sa mga utod nga mahangpan kon paano nila mapasibu ang ila hilikuton agod malikawan ang mga problema. Ginhimo sang isa ka espesyal payunir ang panugda nga duawon liwat bisan ang mga tawo nga nagpakita sing diutay lang nga interes. Subong resulta, nadugangan ang iya mga pagtuon sa Biblia. Ang pila sining bag-ong mga pagtuon nagahimo na karon sing maayo nga pag-uswag. Nagsiling sia: “Ang negatibo nga kahimtangan nagresulta sa pagtigayon ko sing mas mabungahon nga ministeryo.”

Samtang nagaalagad sa latagon sa Cyprus, nasugilanon sang utod nga babayi ang isa ka babayi nga nagsiling nga masako sia. Paagi sa bukas nga bintana sa kusina, ang utod naghambal sing malip-ot, ginbasa ang Salmo 72:12-14, kag naghimo sing kahimusan sa pagbalik sa mas kombeniente nga oras. Sang nagbalik sia, nakibot ang utod sang nagsiling ang babayi nga malangkagon nga ginaangan-angan niya ang iya pagbalik. Ngaa? Nalugpayan gid ang babayi sa kasulatan​​—ginpamensar niya ini sa bug-os nga adlaw. Ang utod nagtanyag sing pagtuon sa Biblia sa puluy-an, kag gilayon ini nga ginbaton sang babayi. Sa karon nagapasalamat gid ang babayi sa natun-an niya gikan sa Pulong sang Dios.

Si Polo, nga taga-Cambodia, nagtuon upod sa isa ka misyonero kag naghimo sing maayo nga pag-uswag. Nagatambong sia sa tanan nga lima ka miting sang kongregasyon sa Phnom Penh. Nian ginsaylo sia sang iya amo sa Battambang, isa ka siudad malapit sa dulunan sang Thailand. Wala didto sing kongregasyon,  gani ginhatag ni Polo ang numero sang iya cell phone sa nagatuon sing Biblia sa iya, kag padayon sila nga nagtuon paagi sa cell phone sa sulod sang 30 minutos kada Mierkoles kag Biernes. Luyag man ni Polo magkomento sa Pagtinuon sa Ang Lalantawan. Bangod malayo ang kongregasyon, ginasulat niya ang iya tatlo ukon apat ka sabat para sa pagtinuon sa masunod nga semana kag ginahatag ini sa iya manugtatap sang Pagtinuon Sang Kongregasyon sa Libro agod basahon sa miting para sa sina nga semana. Napalig-on ang mga manugbantala sang kongregasyon bangod sang iya kakugi. Nagatinguha man sia sa pagpanaksi sa tanan nga masugilanon niya. Samtang sakay sa bus sa pagkadto kag sa pagpauli halin sa Phnom Pehn, nagapanaksi sia sa madamo nga tawo kag ginapalig-on sila sa pagtambong sa mga miting. Ang iya masunod nga tulumuron amo ang mangin isa ka di-bawtismado nga manugbantala.

Sa Mongolia nasugilanon sang duha ka utod nga babayi ang isa ka lalaki nga mga 30 anyos. Ginpangabay niya sila sa paghulat, nagsulod sa iya balay, kag ginkuha ang duha ka libro: Mankind’s Search for God kag Ang Pinakabantog nga Tawo nga Nagkabuhi. Nagsiling sia nga nagtuon sia anay sa Biblia upod sa mga Saksi ni Jehova sa Poland sang nagligad nga 12 ka tuig. Pagbalik niya sa Mongolia sang 1993, gilayon sia nga nagsulat sa pagpangabay nga duawon sia sang mga Saksi. Apang, wala pa sadto sing mga Saksi sa Mongolia, gani wala sia maduaw. Paglipas sang pila ka tion, nagkadto sia sa India agod mag-eskwela sa isa ka unibersidad, diin nagtener sia sing lima ka tuig. Sa sulod sadto nga mga tinuig, halin 1994 tubtob 1998, wala sia sing kontak sa mga Saksi ni Jehova. Nian nagpauli sia sa Mongolia, diin nakontak niya sang ulihi ang mga utod. Ginsugdan liwat ang isa ka pagtuon sa Biblia, kag sang Abril 2003, nagtambong sia sa miting sa nahauna nga tion. Karon malipayon sia nga nagatuon sa Ginapatuman nga brosyur.

Nakibot ang duha ka Saksi nga babayi sang mainit sila nga gin-abiabi kag ginpasulod sang isa ka Budhista nga babayi sa Sri Lanka sa iya balay, nga nagasiling nga sila ang sabat sa iya mga  pangamuyo! Ginpaathag niya nga ang iya lamharon nga anak nga babayi naghikog sining karon lang bangod gindisiplina niya sia. Ginsingganan sia sang Budhista nga pari nga ginpangayuan niya sing lugpay nga ang iya anak matawo liwat karon kag magabalik agod timalusan sia. Hinadlukan sia sa sini. Ginsingganan sia sang isa niya ka abyan nga ang mga Cristiano wala nagapati sa sini nga mga butang. Gani nangamuyo ining babayi nga may masugilanon sia nga matuod nga Cristiano, nagahunahuna nga mahimo ipadala ang isa ka Katoliko. Sa baylo, duha sa mga Saksi ni Jehova ang nagduaw kag naglugpay sa iya paagi sa kamatuoran sang Biblia. Nagatuon na sia karon sa Biblia walay sapayan nga ginapamatukan sang Budhista nga pari.

Sa Kyrgyzstan isa ka lamharon nga babayi ang nagasimba sa Evangelical sa sulod sang madamo nga tinuig. Sa pagbasa niya sing Biblia, nakita niya nga magkatuhay ang nasulat didto kag ang ginatudlo sang iya relihion. Halimbawa, indi niya mahangpan ang panudlo sang simbahan nga si Jesucristo amo ang Amay kag ang Anak. Bangod nakumbinse sia nga ang anak dapat nga may amay, tinagipusuon nga nagpangamuyo sia sa Amay ni Jesucristo, nagpangabay sa Iya nga buligan sia nga masabat ang iya mga pamangkot sa Biblia. Pagkadason nga adlaw ginduaw sia sang duha ka Saksi ni Jehova. Namangkot sila: “Ano sa banta mo? Sin-o ang gintudlo ni Jesucristo sa iya mga disipulo nga dapat pangamuyuan, kag sin-o ang ginlaygay niya sa ila nga pakabalaanon nila?” Natingala sia sang madumduman niya nga ginpangamuyo niya sang nagligad lang nga adlaw sa Amay ni Jesucristo nga sabton ini gid nga mga pamangkot. Sa tapos sang paghambalanay, wala sia magduhaduha nga ginsabat sang Dios ang iya pangamuyo. Ang babayi nagpasugot nga magtuon sing regular sa Biblia kag nagsugod sa pagtambong sa mga miting sang mga Saksi ni Jehova. Sang mahibaluan niya nga si Jehova amo ang Amay ni Jesus, nagsugod sia sa pagpangamuyo kay Jehova nga ginagamit ang Iya personal nga ngalan. Nagauswag na sia karon sa espirituwal kag ginapaambit sa iya mga paryente ang nasapwan niya nga ihibalo.

 ◼ APRIKA

Kadamuon sang pungsod: 56

Populasyon: 755,145,559

Kadamuon sang manugbantala: 950,321

Kadamuon sang pagtuon sa Biblia: 1,666,518

Sa madamo nga mga bus nga nagabiyahe sa mga siudad sa Zambia, ang mga pasahero ginalingaw sing mga video nga masami nga may masingki kag imoral nga tema. Nangabay ang isa ka misyonero nga mag-asawa nga nagalakbay sakay sa bus padulong sa kapital kon mahimo mapasalida ang video nga The Bible​​—Its Power in Your Life. Nagpasugot ang tsuper. “Nakita namon nga ang mga pasahero nagatan-aw sing maukod kag nagapamati sing maayo,” hinumdom ni Ruth. “Pagkatapos sini, ginsugilanon namon sila, nga nagatanyag sing mga tract kag mga magasin. Maayo ang ila reaksion.” Ginpangabay sang mag-asawa sa tsuper kon mahimo niya liwat mapasalida ang video, sa paghunahuna nga himuon niya ini dugaydugay.  Gilayon niya ini nga gin-rewind kag ginpasalida liwat. Si Richard nagsiling: “Gintan-aw sang mga pasahero ang video sa ikaduha nga tion, kag nalipay kami nga ginpangabay namon ang tsuper nga ipasalida ini.”

Ginpakita ni Miranda, isa ka tin-edyer nga estudyante sa Malawi, ang libro nga Ang Sekreto Sang Kalipay sa Pamilya sa isa ka kabutho sa tion sang recess sa eskwelahan. Nabatian sang maestro ang ila ginahambalan kag ginpatawag niya si Miranda sa iya opisina. Ginpamangkot niya si Miranda kon ngaa ginsingganan niya ang iya abyan nga dapat sia magpamana. Nagsabat si Miranda nga wala niya ginsingganan ang iya abyan nga mamana sia. Sa baylo, ginahambalan nila kon paano ang libro makabulig sa mga pamilya nga makasapo sing matuod nga kalipay. Bangod sa kaakig, ginsinggitan sang maestro si Miranda: “Bata ka pa agod maglaygay tuhoy sa pag-asawahay!”

Hinadlukan kag nagapalangurog, naggua si Miranda sa opisina sang maestro. Pagligad sang duha ka adlaw ginpatawag liwat sang maestro si Miranda sa iya opisina. Ginsaysay ni Miranda ang masunod nga natabo: “Ginsingganan ako sang akon maestro nga ginakasubo niya nga nangakig sia, kag nagsiling sia nga pirme sila nagaaway sang iya asawa kag nagbulagay sila. Ginpangabay niya ang isa ka kopya sang libro nga ginpakita ko sa akon kabutho. Nalipay ako sa paghatag sa iya sing isa ka kopya. Pagligad sang duha ka semana ginsingganan niya ako nga nakabulig gid sing daku ang libro kag ginpaambit niya ini sa iya asawa. Sang ulihi, nag-uliay sila sang iya asawa.”

Sa Bagatnan nga Aprika isa ka tigulang nga lalaki nga si Eric ang nagtuon sing Biblia upod sa mga Saksi ni Jehova sa sulod sang madamong tinuig, apang ang iya espirituwal nga pag-uswag gin-upangan sang iya bisyo nga pagpanabako. Sang nabawtismuhan ang iya asawa, namat-od sia nga mangin tulumuron man niya ini. Naghimo sia sing pila ka dalagku-sing-letra nga mga kopya sang teksto sa Kasulatan nga makita sa 2 Corinto 7:​1, nga nagasiling: “Sanglit aton ining mga saad, mga hinigugma, tinluan ta ang aton kaugalingon sang tanan nga kadagtaan sang lawas kag espiritu, kag himpiton ta  ang pagkabalaan sa kahadlok sa Dios.” Ginbutang ni Eric ang mga teksto sa kitaon dayon nga mga bahin sang iya puluy-an. Kada daw gusto niya magsindi sing sigarilyo, ginabasa niya ang teksto kag nagapangamuyo kay Jehova nga buligan sia sa pag-untat sa pagpanigarilyo. Subong resulta, wala sia nagpanigarilyo sa sulod sang kapin sa napulo ka bulan. Si Eric di-bawtismado nga manugbantala na karon kag nagaplano nga magpabawtismo sa masunod nga distrito nga kombension.

Samtang nagahulat sing barko sa mga kapuluan sang Seychelles, nakita sang isa ka misyonera ang isa ka babayi nga nagaisahanon. Bisan kapoy na ang utod bangod sang bug-os nga adlaw nga pagbantala, ginpalapitan niya ang babayi kag gintanyagan sing tract. Ginbaton niya ini, nga nagasiling nga isa sia ka Hindu. Pagligad sang pila ka adlaw, nagkitaay sila liwat, sa dalan, kag ang utod naghimo sing kahimusan para sa isa ka pagtuon sa Biblia. Ang bana sang babayi, nga isa ka doktor, Katoliko anay, apang sang nabasa niya ang Mankind’s Search for God kag ang Ihibalo nga libro, nagpasugot sia nga magbuylog sa pagtuon. Isa ka gab-i, gin-agda sang mag-asawa ang utod kag ang iya bana para sa isa ka espesyal nga inasal. Gintutdan nila nga duha ang ila relihioso nga mga imahen kag ginluto ang pagkaon sa dabok sini! Wala magdugay nagsugod sila sa pagtambong sa mga miting kag sa pagpakigbahin sa pag-alagad sa latagon. Pagkatapos sang ila bawtismo, nag-auxiliary payunir sila. Bangod gamay lang ang pulo, ang utod nga lalaki kilala sa komunidad. “Ang doktor pari na karon,” lahog sang iban. Sa karon, isa na sia ka ministeryal nga alagad, kag ang iya asawa isa ka regular payunir.

Nagtuon si Ishmael sing sign language agod mabuligan niya ang mga bungol sa Zimbabwe sa pagtuon sing kamatuoran. Isa ka adlaw, samtang sakay sa bus, nakita niya ang isa ka bungol nga babayi nga nagapakilimos sa mga pasahero. Ginpanaksihan sia ni Ishmael kag naghimo sing kahimusan nga masugilanon sia liwat. Sang ginpamangkot sia kon ano ang ginatudlo sang iya relihion kon ngaa bungol sia, ang babayi nagsabat: “Nagsiling sila nga pagbuot sang Dios nga nangin bungol ako.” Ginpaathagan sia ni Ishmael nga indi pagbuot sang Dios nga ang mga tawo mangin bungol kundi resulta ini sang napanubli nga sala kag pagkadihimpit. Ginpaathag man niya  nga dulaon sang Dios sa ulihi ang tanan nga mga sablag. Ang babayi nagsabat: “Luyag ko mahibaluan kon ngaa gintudluan ako sang akon relihion sing kabutigan.” Sang nagkitaay sila ni Ishmael sa ikatlo nga tion, nagsiling ang babayi: “Sugod karon isa na ako sa inyo. Indi ko na luyag makabati pa sing mga kabutigan.” Isa ka pagtuon sa Biblia ang gindumalahan sa iya, kag nangin regular sia sa mga miting sang kongregasyon kag handum niya nga makalipikar sa ulihi subong di-bawtismado nga manugbantala.

Sa Ghana bangod sang paghimakas nga mabuhi, madamo nga mga tawo ang halos wala na sing tion sa espirituwal nga mga butang. Nasugilanon sang isa ka regular payunir nga babayi ang isa ka lamharon nga lalaki sa pamalaybalay nga ministeryo kag nangabay nga masugilanon sia sa Biblia sa sulod lamang sang lima ka minuto. Ang lalaki nagsabat: “Pirme ako masako sa adlaw. Pasado alas otso sa gab-i na ako nagapauli agod magtulog.”

Ang utod nga babayi nagpamangkot: “Posible bala nga mahinguyang mo ang diutay nga bahin sang imo oras sa pagtulog sa pagtuon sing Biblia?”

Nagsabat sia: “Kon mag-abot ka pasado alas otso sa gab-i.” Pagkadason nga adlaw, ang utod nga babayi kag ang iya bana nagkadto sa iya balay sing eksakto alas otso sa gab-i. Bag-o lang sia magpauli halin sa obra. Nasugdan ang isa ka pagtuon sa Biblia, kag wala madugay nagsugod sia sa pagtambong sa mga miting. Sang ulihi nangin kalipikado sia subong isa ka di-bawtismado nga manugbantala kag nabawtismuhan. Nagdayaw gid ang iya asawa sa mga pagbag-o niya sa kabuhi amo nga nagpasugot man sia nga magtuon sa Biblia kag nangin kalipikado sang ulihi nga mangin di-bawtismado nga manugbantala. Indi makapati ang mga kaingod kag ang kalabanan nga nakahibalo sang nagligad nga estilo sang pagkabuhi sang lamharon nga lalaki sang nakita nila sia nga nagabantala sa mga pamalay. Madamo ang luyag makahibalo kon ano ang nagpabag-o sa sini nga tawo nga kilala sadto nga palahubog, kawatan, kag nagadroga. Gani, 22 ka tawo sa banwa ang nagpangabay nga magtuon sa Biblia. Napulog-duha sa ila ang nagatambong na sing regular sa mga miting sang kongregasyon kag mahimo nga makalipikar sila sa ulihi subong di-bawtismado nga mga manugbantala.

[Retrato sa pahina 43]

Si Steponas kag si Edvardas, Lithuania

[Retrato sa pahina 47]

Si Alyce kag ang iya maestra, nga si Linda, Australia

[Retrato sa pahina 51]

Si Mala, Estados Unidos

[Retrato sa pahina 56]

Si Kumiko, Japan

[Retrato sa pahina 61]

Si Ruth kag si Richard, Zambia