Isa ka Sulat Halin sa Nagadumala nga Hubon

Mahal nga mga Utod:

“KABAY nga may yara kamo sang di-bagay nga kaayo kag paghidait gikan sa Dios nga aton Amay kag kay Ginuong Jesucristo.” (1 Cor. 1:3, NW) Nalangkag gid kita sa tion nga ang tagsa ka butang nga nagaginhawa magahimaya kay Jehova! (Sal. 150:6) Samtang ginaangan-angan naton ining makalilipay nga adlaw, padayon kita nga nagabantala sing maayong balita sang Ginharian sang Dios kag nagahimo sing mga disipulo.

Ang mga hilikuton ni Jehova sa duta nakonsentrar karon sa pag-ebanghelyo. (Mar. 13:10) Bangod nakahibalo gid kita nga interesado si Jehova sa sining hilikuton, nagapangamuyo kita sa Dios nga buligan niya kita sa paghimo sini, nga nakahibalo nga ang tagsa ka tawo may kahigayunan nga makabenepisyo sa aman nga gawad. (Bug. 14:​6, 7, 14, 15) Matuod, nagaatubang kita sing mga kabudlayan, apang nagapasalamat gid kita nga ‘masukluban sing gahom gikan sa kahitaasan’ agod matuman ini nga ministeryo!​​—Luc. 24:49.

Makalilipay nga repasuhon ang pag-alagad sang nagligad nga tuig kag pamalandungan ang ginhimo ni Jehova paagi sa iya mainunungon nga mga alagad. Bangod ginpabaskog sang balaan nga espiritu, ang katawhan sang Dios nagpakita sing tulad-Cristo nga gugma, nga ginalandas ang dumot sa bug-os nga kalibutan. Ini nga gugma makita sa aton mga kombension. Kutob Hunyo tubtob Disiembre 2003, ang mga delegado halin sa kapin sa isa ka gatos ka pungsod naglakbay padulong sa 32 ka internasyonal nga mga kombension nga ginhiwat sa anom ka kontinente. Ang mga misyonero, mga international servant, kag mga Bethelite nga nagaalagad sa iban nga pungsod gin-interbyu sa distrito kag internasyonal nga mga kombension.

Sa sining mga kombension, nabaton naton ang mga publikasyon nga “See the Good Land” kag Magtuon Gikan sa Daku nga Manunudlo. Dugang pa, gin-anunsio man nga naiskedyul nga sugdan nga gamiton sa katapusan nga bahin sang 2004 nga tuig sang pag-alagad ang isa ka ginrebisar nga tulun-an para sa Pioneer Service School. Ang madugay na nga mga payunir  nga nakaeskwela na sa sini amat-amat nga magabuylog sa mga klase upod sa bag-ong mga payunir.Bangod sang pagsakdag sang Dios kag sang kaalwan sang mga tawo, madamo pa nga mga Kingdom Hall ang napatindog, ilabi na sa imol nga mga pungsod. Bangod sang nagadugang nga pagkinahanglan sing espirituwal nga pagkaon sa bug-os nga kalibutan, ang mga proyekto sa pagpasangkad sa mga sanga ginahimo sa madamong mga pungsod. Ang brosyur nga Agoma ang Kabuhi sa Duta Sing Dayon! matigayon na karon sa 299 ka hambal, nga may kabilugan nga naimprinta nga 139 milyones ka kopya; Ang Ihibalo nga Nagadul-ong sa Kabuhi nga Walay Katapusan may kapin sa 93 milyones ka kopya sa 161 ka hambal; kag kapin sa 200 milyones ka kopya sang brosyur nga Ano ang Ginapatuman Sang Dios sa Aton? ang gin-imprinta sa 267 ka hambal.

Mainit namon nga ginaabiabi ang 258,845 nga nagsimbulo sang ila dedikasyon paagi sa pagpabawtismo sa tubig sang nagligad nga tuig sang pag-alagad! Bisan pa nga bangod sang pagsuportar ninyo sa Ginharian sang Dios, nangin pinasahi nga puntariya kamo sang pagdumot ni Satanas, pinasahi nga nakabaton man kamo sang pagpakamaayo kag espirituwal nga pag-amlig ni Jehova samtang nagadalagan kamo sa palumba nga ginpahamtang sa atubangan ninyo. (Heb. 12:​1, 2; Bug. 12:17) Huo, makasalig kamo nga “ang nagabantay sa [inyo] indi pagtuyhon.”​​—Sal. 121:3.

Suno gid sa tion ang 2004 nga tuigan nga teksto, “Magpadayon kamo sa pagbantay . . . Pamatud-i man ninyo ang inyo kaugalingon nga handa.” (Mat. 24:​42, 44, NW) Ang mga Cristiano ginalaragway sa Pulong sang Dios subong umalagi nga mga pumuluyo sa sining nagatagumatayon nga sistema sang mga butang. (1 Ped. 2:11; 4:7) Gani, dapat kita magpabilin nga nakakonsentrar, ginahuptan nga simple ang aton kabuhi, kag ginausisa sing maayo ang aton tagipusuon. Luyag sang “dakung dragon” nga lamunon kita, himuon kita nga bahin sang iya sistema sang mga butang.​​—Bug. 12:9.

Agod padayon kita nga nagabantay, ang adlaw-adlaw nga pagbasa sing Biblia kinahanglanon. Magabulig ini sa aton nga ‘ang aton Huo mangin Huo’ agod matuman naton ang aton dedikasyon kag ‘mahuptan naton sing malig-on ang pamuno sang aton pagsalig tubtob sa katapusan.’ (Sant. 5:​12; Heb. 3:14) Ang adlaw-adlaw nga pagbasa sing Biblia magabulig sa aton nga madumduman kon daw ano na kalayo nga naglikday ang  kalibutan gikan sa wala nagabag-o nga mga talaksan sang Dios. (Mal. 3:6; 2 Tim. 3:​1, 13) Ang ihibalo sa Biblia magabulig sa aton nga malikawan ang “mga sugilanon nga pinatupato sing malalangon” kag magpabilin nga matutom kay Jehova.​​—2 Ped. 1:​16; 3:11.

Mga ginikanan, samtang ginapadaku ninyo ang inyo mga anak sa disiplina kag nagatadlong nga panghunahuna ni Jehova, ginabuligan bala ninyo sila sa pagpahamtang sing espirituwal nga mga tulumuron kag sa ‘pagpadayon sa pagbantay’? (Efe. 6:4) Ginahanas bala ninyo sila nga tamdon ang ila palaabuton subong sang pagtamod sang pinakamaalam nga tawo nga nabuhi sa duta? Kuntani si Jesus nangin pinakabantog nga panday, imbentor, ukon manugbulong nga nagkabuhi, apang sa baylo sini ginhimud-usan niya ang bug-os tion nga ministeryo. Kabay nga ang iya halimbawa magapahulag sa inyo nga buligan ang inyo mga anak nga unahon sa ila kabuhi ang mga intereses sang Ginharian.

Ang matutom nga ulipon nga klase, nga ginarepresentar sang Nagadumala nga Hubon, tinagipusuon gid nga nagapasalamat sa “dakung kadam-an” bangod ginbuligan nila kami nga matuman ang amon responsabilidad nga ‘ibantala ining maayong balita sang ginharian sa bug-os napuy-an nga duta subong panaksi.’ (Bug. 7:9; Mat. 24:​14, 45, NW) Mga pinalangga, ginapasalig ni Jehova nga ginadumdom niya ang ‘inyo binuhatan kag ang gugma nga ginpakita ninyo tungod sa iya ngalan nga nag-alagad kamo sa mga balaan kag nagaalagad pa.’ (Heb. 6:10) Samtang ginabasa ninyo ang makakulunyag nga mga eksperiensia kag ginatalupangod ang mga resulta sang inyo nahiusa nga mga panikasog sa masunod nga mga pahina, hibalua ninyo nga may importante kamo nga bahin sa paghatag sining bug-os kalibutan nga panaksi.

Kabay nga maisog ninyo nga atubangon ang palaabuton samtang padayon kamo nga ‘nagatan-aw sa balos,’ kag wala nagatugot nga idingot ini sa inyo sang bisan sin-o nga tawo ukon demonyo. (Heb. 11:26; Col. 2:18) Huo, makasalig kamo nga buligan ni Jehova ang tanan nga nagahigugma sa iya nga matigayon ang kabug-usan sang kabuhi.​​—Juan 6:​48-​54.

Makasalig kamo nga nalipay kami sa pag-alagad upod sa inyo sa kadayawan sang himaya ni Jehova.

Ang inyo mga utod,

Nagadumala nga Hubon sang mga Saksi ni Jehova