Talalupangdon nga mga Hitabo Sang Nagligad nga Tuig

SI Jehova nagtagna nga “sa ulihi nga mga adlaw,” ang mga tawo magadugok sa iya malaragwayon nga bukid agod tudluan niya. (Miq. 4:​1, 2) Sang nagligad nga tuig, ining tagna padayon nga natuman samtang madamo pa ang naghulag nahisanto sa tuigan nga teksto sang 2003, “Magpalapit kamo sa Dios, kag magapalapit sia sa inyo.” (Sant. 4:​8, NW) Ang isa ka importante nga bulig agod mapalambo sang madamo ang mas suod nga kaangtanan kay Jehova amo ang mga serye sang “Himayaa ang Dios” nga Distrito kag Internasyonal nga mga Kombension.

“Himayaa ang Dios” nga mga Kombension

“Sanglit ang walay kabuhi nga mga tinuga ni Jehova makahatag sa iya sing kadayawan, daw ano pa gid nga mahimaya naton ang aton Dakung Manunuga bangod makahunahuna kag makahambal  kita!” siling sang isa sa mga humalambal sa nasambit nga mga kombension. Nian ginbalikwat niya ang Bugna 4:​11, nga nagasiling: “Takus ka, Ginuo kag Dios namon, sa pagbaton sang himaya kag dungog kag gahom, kay ikaw ang nagtuga sang tanan nga butang, kag bangod sang imo kabubut-on nangin amo kag gintuga sila.”

Ang “Himayaa ang Dios” nga mga Kombension isa ka pinasahi nga kahigayunan sa pagdayaw kay Jehova, subong resulta sang 32 ka internasyonal nga mga pagtinipon. Ginhiwat ini sa Australia, Bagatnan nga Aprika, Canada, Chile, Denmark, Espanya, Estados Unidos, Ghana, Hawaii, Hungary, Japan, Mexico, Switzerland, kag Ukraine. Ang mga misyonero kag ang iban pa nga nagaalagad sa iban nga mga pungsod nagpauli sa ila tumandok nga mga pungsod, diin gin-interbyu sila tuhoy sa ila hilikuton sa Ginharian sa malayo nga mga teritoryo. Linibo ka delegado halin sa iban nga mga pungsod ang nagtambong man sa sining mga kombension.

Nalipay gid ang internasyonal nga mga delegado sa pagduaw sa mga sanga sa mga pungsod diin ginhiwat ang kombension. Ang sanga sa Estados Unidos may pribilehiyo nga maabiabi ang kapin sa 6,750 ka delegado gikan sa 36 ka pungsod, ginserbehan sila sing halos 15,000 ka panyaga! Isa ka adlaw, pagkatapos sang panyaga, ginkantahan sang isa ka bus nga mga kauturan gikan sa Bagatnan nga Aprika ang pamilya Bethel sing apat-ka-bahin nga harmoniya sa anom ka hambal: Aprikaan, Ingles, Sepedi, Sesotho, Xhosa, kag Zulu. Makatalandog kag katahom gid sang ila pagkanta amo nga madamong nakapamati ang naghibi.

Sa isa pa ka tour group, ang isa ka delegado nga may lapel card nga nagapakita nga nalakbay na niya ang katunga nga bahin sang bug-os nga kalibutan nagsiling: “Isa gid ka tumalagsahon nga eksperiensia nga mangin kaupod ko sa sining bug-os nga tion ang akon mga utod. Indi ko gid ini malipatan. Patilaw pa lang ini sa kon ano ang maeksperiensiahan sa bag-ong sistema.” Isa ka utod nga lalaki gikan sa Britanya nga nagbiya anay sa kamatuoran sa edad nga 17 apang nagbalik sining ulihi nga tinuig ang natandog sang nakita niya ang isa ka dibuho nga nagalaragway sa buhaha nga anak. Sang  ulihi, samtang nagapanyaga upod sa pamilya Bethel sa Brooklyn, nahunahuna niya ang kaluoy ni Jehova, kag nagtulo ang iya mga luha. Isa ka utod nga lalaki gikan sa Espanya ang nagtu-ad nga sa sulod sang 29 ka tuig nga pag-asawahay nila sang iya asawa, wala pa gid sia makita sang iya asawa nga nagahibi. Apang naghibi sia sang gin-abiabi sang isa ka grupo sang malipayon nga mga Saksi ang iya tour group sa international airport sa Houston, Texas.

Mabudlay gid makakita sing nagakaigo nga mga pasilidad nga hiwatan sang dalagku nga mga kombension sa kasarangan nga bayad. Apang, ang maayong reputasyon sang mga Saksi ni Jehova sa sulod sang mga tinuig masami nga isa ka bentaha. Gin-ilustrar ini sa report sang isa ka sanga: “Pagkatapos sang maukod nga pagpangita, isa lamang ka lugar ang nakita namon nga makapaigo sa mga 50,000 ka delegado nga ginapaabot nga magatambong sa kombension. Apang, pagkatapos makontak ang mga opisyales sang istadyum, namahalan ang mga utod sa bayad. Pila ka adlaw pagkatapos namangkot ang mga tiglawas sang sanga, ang amo gihapon nga mga opisyales nakig-angot sa sanga kag nagpangabay para sa dugang nga paghambalanay. Sang ulihi, ang isa sa mga senyor manedyer nagkomento: ‘Sang primero, wala gid kami sing ideya kon ano ang inyo ginapamangkot. Apang sang nahangpan namon kon ano nga sahi ang inyo mga kombension kag ang inyo ikasarang sa pag-organisar sing mga serbisyo, luyag gid namon ini makita. Dayaw kami sa inyo maayo nga pag-organisar, sa inyo detalyado nga pagplano, kag sa inyo paggawi.’ ” Ang resulta amo nga ang istadyum ginpagamit sa mga Saksi ni Jehova para sa ila kombension sa kasarangan nga bayad.

Mga Publikasyon nga Ginpagua sa Kombension

Isa bala ikaw ka maukod nga estudyante sang Pulong sang Dios? Kon amo pat-od gid nga nalipay ka sa pagbaton sa 36-ka-pahina, de-kolor nga brosyur nga “See the Good Land.” Ang mga diagram, mapa, retrato, drowing sa bulig sang kompyuter, kag madamo iban pa nga mga bahin magapauswag sang imo personal nga pagtuon. Gani pat-ura nga maghupot ka sing isa ka kopya sang “See the Good Land” upod sang imo personal nga Biblia kag mga publikasyon  nga pirme mo ginagamit sa pagtuon. Kag dalha pirme ang imo brosyur sa mga miting sang kongregasyon kon ang mga pamulongpulong kag mga paghambalanay may yara kaangtanan sa mga kadutaan sa Biblia.

Sa pamulongpulong nga “Ang Aton mga Kabataan​​—Isa ka Hamili nga Palanublion,” ang humalambal nagpagua sang may matahom sing mga laragway, 256-ka-pahina nga libro nga Magtuon Gikan sa Daku nga Manunudlo. Ang mga ginikanan nga nagaapresyar gid sing tudok sa sining palanublion sa Dios malipay sa pagtuon sa sining matahom nga bag-ong publikasyon upod sa ila mga kabataan. “[Ang] mga kabataan,” siling sang libro, “nagakinahanglan sing panuytoy sa moral, ang mga prinsipio nga masunod nila. Kag kinahanglan nila ini halin sa ila pagkabata. Ang makapasubo nga mga butang mahimo matabo kag matuod gid nga nagakatabo kon ang mga kabataan ulihi na nga makabaton sing bulig.”

Ang libro nga Magtuon Gikan sa Daku nga Manunudlo may yara 230 ka laragway​​—halos doble sing kadamuon sa makita sa Sugilanon sa Biblia nga libro. Ang tagsa ka laragway kag grupo sang mga laragway may kapsion, ang kalabanan sa porma sang isa ka pamangkot. Ang mga sabat makita sa amo man nga pahina. Ini kag ang madamo iban pa nga mga pamangkot sa bug-os nga libro mangin isa ka maayo nga bulig sa pagpukaw sing paghambalanay, sa amo nagatugot nga mapabutyag sang mga kabataan ang ila kaugalingon sing tinagipusuon. Halimbawa, ang kapsion sa pahina 101 mabasa: “Ngaa importante nga indi kita malipat sa pagpasalamat?” Kag mga ginikanan, indi ninyo pagkalimtan nga basahon ang introduksion, “Ang Ginakinahanglan Sang mga Kabataan Gikan sa mga Ginikanan.” Kon iaplikar ninyo ang mga panugda nga ginasambit diri, ang inyo pamilya magaani sing pinakadaku nga benepisyo gikan sa sining matahom nga bulig sa pagtuon.

Ang Video nga Gin-abiabi Sang mga Bungol

Sang tuig 1915 sa Estados Unidos, si John A. Gillespie, nga isa ka peregrino, ukon nagalakbay nga gulang, nag-amba sa sign language sa diutay nga grupo sang mga bungol nga nagtambong sa isa ka kombension sang International Bible Students, subong nga amo  sadto ang pagtawag sa mga Saksi ni Jehova. Karon may yara na kapin sa 1,200 ka kongregasyon kag grupo sang bungol nga mga manugbantala kag mga interesado sa bug-os nga kalibutan. Paano sila ginapakaon sa espirituwal nga paagi?

Sa karon, ang mga bulig sa pagtuon sa Biblia matigayon sa 18 ka sign language, kag nagadamo pa ini. Ang mga nagagamit sing American Sign Language (ASL) nakabaton sing espesyal nga regalo sang Septiembre 2002. Sugod sadto nga bulan, ang tulun-an nga mga artikulo sa Ang Lalantawan matigayon na sa video subong binulan nga edisyon. Ini nga kahimusan nagabulig sa mga bungol sa mga paagi nga mahimo ginapasapayanan lang sang iban.

Binagbinaga lamang: Sarang makutlo sang kalabanan nga indi bungol nga mga Saksi ang madamo nga teksto nga ila madumduman. Makutlo nila ini bangod pirme nila mabatian ukon mabasa ini mismo nga mga tinaga. Apang, ang bungol nga mga manugbantala wala sing subong sini nga mga impormasyon. Ngaa? Bangod ang Biblia indi matigayon sa ASL, kag indi palareho ang pagsinyas sang mga may bahin sa mga miting sa kongregasyon sa mga teksto sa Kasulatan. Apang nagbag-o ini sang matigayon na sa video ang ASL nga mga publikasyon. Kag karon nga matigayon man ang tulun-an nga mga artikulo sa Ang Lalantawan sa video, makita na sang mga bungol ang palareho nga pagsinyas sa mga teksto sa Biblia.

Dugang pa, ang ASL nga mga kongregasyon kag mga grupo indi na kinahanglan nga magtangdo sing mga manugpatpat subong mga manugbasa para sa Pagtinuon sa Ang Lalantawan. Sa indi bungol nga mga kongregasyon, ang gintangdo nga manugbasa mahimo maghinguyang sing isa ka oras ukon kapin pa sa paghanda agod mabasa niya sing maayo ang tulun-an nga mga artikulo sa Ang Lalantawan. Apang sa kongregasyon sang bungol nga mga manugbantala, ang mga gintangduan sa pagsinyas sing isa ka artikulo masunson nagahinguyang sing madamo nga oras sa paghanda. Karon, ining bilidhon nga tion sarang na magamit sa iban pa espirituwal nga mga aktibidades. Ano ang reaksion sang mga kauturan sa sining bag-o nga aman?

 Ang isa ka grupo sang bungol nga mga manugbantala sa estado sang Rhode Island, E.U.A., nagsulat: “Nalipay gid kami sang ginpahibalo nga matigayon na namon Ang Lalantawan sa video. Sa katunayan, naghibi ang pila sa amon mga manugbantala.” Ang isa nga nagadumala sang Pagtinuon sa Ang Lalantawan sa Florida nagsiling nga madamo na karon ang nagabayaw sang ila kamot sa pagkomento amo nga ‘nalipay sia nga may madamo na sia sing kamot nga mapilian!’ Nagsiling pa sia nga “bal-anon man ang pag-uswag sa kalidad sang mga komento.” Ang isa pa ka gulang nagsulat: “Tumalagsahon gid ang mga resulta! Ang paghangop bisan sa mabudlay nga mga ideya talalupangdon gid.” Huo, bangod sang bugana nga pagpakamaayo ni Jehova, madamo pa nga mga bungol ang nagakalipay sa kahigayunan nga makilala kag mahimaya ang Dios.​​—Roma 10:10.

Bulig sa mga Manugbadbad

Ang espirituwal nga pagkaon nga ginaaman sang matutom nga tulugyanan nga klase matigayon na karon sa di-magkubos sa 390 ka hambal. (Luc. 12:42) Busa, ang pagbadbad nagarepresentar sa isa ka daku kag nagauswag gihapon nga bahin sang hilikuton sang organisasyon ni Jehova.

Ang husto nga pagbadbad indi lamang pagtal-us sing isa ka lokal nga hambal nga katumbas para sa tagsa ka tinaga nga makita  sa orihinal nga mga tinaga. Sa baylo, pagpaalinton ini sing husto nga mga panghunahuna. Maathag, kon amo, nga dapat mahangpan sing maayo sang mga manugbadbad ang orihinal nga mga tinaga antes sila magsugod sa pagbadbad. Kon kaisa, mabudlay ini.

Gani, sa panuytoy sang Nagadumala nga Hubon, isa ka grupo sang kalipikado nga mga utod nga lalaki nga gintangdo sa pag-alagad subong mga instruktor ang ginhanas sa programa nga gintawag Course in Improved English Comprehension. Sang matapos ang kurso, nga ginhiwat sa Watchtower Educational Center sa Patterson, New York, ginduaw sang mga utod ang mga translation team sa bug-os nga kalibutan sang 2002 kag 2003 nga mga tuig sang pag-alagad. Naghinguyang sila sing mga tatlo ka bulan sa pagtudlo sang kurso kag sa paghatag sing praktikal nga bulig sa trabaho sa tagsa ka team. Sa bulig sining programa, ang mga manugbadbad mas nasangkapan na karon nga mahangpan ang bug-os nga kahulugan sang Ingles nga mga tinaga.

Ang isa ka translation team nagsiling: “Si Jehova mainayuhon nga nagbulig sa amon nga mangin labi pa nga kalipikado sa paghimo sang amon hilikuton. Nagabatyag kami karon sing daku pa nga kompiansa. Upod ang pagpakamaayo ni Jehova, nagalaum kami  nga makita ang maayong mga resulta.” Ang isa ka translation overseer nagsiling: “Sang una, madamo sa amon ang naghinguyang sing madamo nga oras sa pagbadbad sang mabudlay nga Ingles nga mga ekspresyon kag mga dinalan. Nagpahinay ini sang amon trabaho. Gani nalipay gid kami sang ginhiwat ang Course in Improved English Comprehension. Ginpakita sini sa amon kon paano analisahon ang Ingles nga mga tinaga sa sistematiko nga paagi, kag naghatag ini sa amon sing mabuligon nga mga metodo sa pagbadbad sang mabudlay nga mga tinaga. Subong resulta, indi na kami tanto nga nabalaka kag mas madasig namon nga nahimo ang mas husto nga badbad.”

Ang isa pa ka team nagsulat: “Ini nga kurso mas praktikal sangsa bisan anong kaanggid nga sekular nga edukasyon bangod ginpahisanto ini sa amon espesipiko nga mga kinahanglanon. Nagapati kami nga ini nga kurso makabulig sa mga manugbadbad sa bug-os nga kalibutan, sa amo mas mahapos nga ‘mahangpan’ sang mga tulad-karnero ang kamatuoran.”​​—Mat. 13:23.

Sa karon, mga 1,660 ka manugbadbad nga nagapangabudlay sa kapin sa 150 ka hambal ang nakabenepisyo sa kurso. Dugang pa, ang programa ginpahisanto agod buligan ang mga nagabadbad sa sign language kag ang mga nagabadbad sing Espanyol nga mga tinaga sa tumandok nga mga hambal sang Sentral kag Bagatnan nga Amerika.

Nasangkapan nga Mangin Maayo Pa nga mga Manunudlo

Ginapadaku gid ni Jehova kag sang iya bugtong nga Anak​​—“ang Pulong”—​ang importansia sang komunikasyon. (Juan 1:​1, 14; 3:16; Bug. 19:13) Ginapakita ini man nga pagtamod, ang matutom nga ulipon nga klase padayon nga nagapangabudlay sing lakas agod buligan ang katawhan sang Dios sa pagpauswag sang ila mga ikasarang sa pagbantala kag sa pagpanudlo. Bangod ginahunahuna ini nga tulumuron, ang organisasyon ni Jehova nagbalhag sing libro nga Magbenepisyo sa Pagpanudlo Sang Teokratikong Eskwelahan Para sa Ministeryo. Madamong manugbantala  ang nagpabutyag sang ila apresasyon sa sining tulun-an sugod sang gingamit ini sa Teokratikong Eskwelahan Para sa Ministeryo sang Enero 2003.

“Ini lang ang relihioso nga grupo nga nagaulikid sing daku sa pagbulig sa mga katapo sini, bata man kag tigulang, sa pagpakigkomunikar sing epektibo,” sulat sang isa ka gulang sa Pilipinas. Ang isa ka gulang sa Brazil nagsiling: “Para sa akon, ang Enero 2003 isa ka importante gid nga tion sa maragtas sang pagpanudlo sang mga Saksi ni Jehova.” Ang isa pa ka gulang nagsiling: “Natalupangdan ko nga ang mga pamatan-on sa kongregasyon nagapakita sing daku pa nga interes sa pagpakigbahin sa eskwelahan. Naubos na basa sang iban ang tulun-an kag natapos nila ang tanan nga mga pag-ensayo​​—ang tanan antes pa nabinagbinag ang materyal sa eskwelahan!” Masami ginagamit sang isa ka nagalakbay nga manugtatap ang libro nga Eskwelahan Para sa Ministeryo sa mga pagduaw sa pagbantay. Nagsulat sia: “Ang mga kapitulo subong sang ‘Mag-ukod sa Pagbasa,’ ‘Ang Pagtuon Makapaladya,’ kag ‘Hibalua Kon Paano Ka Dapat Magsabat’ nakabulig sing daku sa paghanda para sa mga miting kag sa ministeryo.”

Ang isa ka utod nga babayi sa Britanya nagsiling nga “ang paglakip sa mga pag-ensayo isa ka ekselente nga bahin sang proseso sa pagtudlo. Kon luyag naton mapalambo ang mga kalantip nga ginatudlo sa eskwelahan, dapat naton ini gamiton sa aton adlaw-adlaw nga kabuhi. Ang mga pag-ensayo nagabulig sa aton sa paghimo sini.” Gikan sa Japan, ang isa ka utod nga lalaki nga may diperensia sa paghambal nagsulat: “Kada may asaynment ako sa pagbasa, nabalaka gid ako nga basi indi maayo ang akon pagbasa sa plataporma. Narealisar ko nga ang akon mismo negatibo nga panghunahuna labi pa nga nagpalala sang kahimtangan. Gani sang mabaton ko ang akon pinakaulihi nga asaynment, ginsulat ko ang mga punto sa libro nga Eskwelahan Para sa Ministeryo sa ubos sang subtitulo nga ‘Kon Paano Maghambal Sing Maathag’ (pahina 87 kag 88) kag sa kahon nga ‘Paglandas sa Pag-ang-ang’ (pahina 95). Matuod, wala ko ginapaabot nga malandas ko gilayon ang akon pag-ang-ang, apang determinado ako nga indi magpangampo!”

 “Sa Burundi,” sulat sang sanga sa Kenya, “ang mga kauturan nagpabutyag sing apresasyon para sa bag-o nga libro, nga matigayon na karon sa Kirundi nga hambal. Sa isa ka pungsod diin madamo ang kulang sing pormal nga edukasyon, mahangpan na karon sing mas maayo sang mga estudyante sang Teokratikong Eskwelahan Para sa Ministeryo ang mga punto nga ginalaygay. Subong resulta, labi sila nga nalangkag sa paghatag sang ila mga bahin.”

Ang libro nagbulig man sa iban nga mapauswag ang ila ikasarang sa pagsulat. Ang isa ka tigulang kag may sablag nga utod nga babayi sa Mexico nagsiling: “Nabasa ko sa pahina 71 tubtob 73 sang libro nga Eskwelahan Para sa Ministeryo ang praktikal nga mga panugda sa paghimo sing sulat. Nagapanaksi ako sa sining paagi bangod sang akon pisikal nga mga kasablagan. Walay sapayan sini, wala ko anay ginasulatan ang akon mga paryente. Apang paagi sa giya nga ginhatag sa bag-ong libro, mapanaksihan ko na sila karon sing maayo pa.” Ang isa ka manugtatap sang distrito sa Bagatnan nga Aprika nagkomento: “Isa gid ini ka tumalagsahon nga libro. Ginabinagbinag sini indi lamang ang teknikal nga pamaagi sa mga kalidad sa paghambal kundi pati man ang espirituwal, ginapakita kon paano ini nga mga kalidad resulta sang Cristianong gugma kag pagkabalaka para sa iban.”

Ang Mihura Sang Legal nga mga Kaso

Sang Hunyo 17, 2002, ang Korte Suprema sang Estados Unidos naghatag sing maragtason nga desisyon sa Watchtower Bible and Tract Society of New York, Inc. v. Village of Stratton. Sa 8 kontra 1 nga desisyon sini, ang pinakamataas nga Korte sang pungsod nagdesisyon nga ang pag-aplikar sa pangpubliko nga ministeryo sang mga Saksi ni Jehova sang mga ordinansa nga nagakinahanglan sang pagkuha sing permiso sa pagkambas ukon pagsolisitar supak sa kasuguan.

Pagkatapos sini nga kadalag-an, ginkontak sang Legal Department sang sanga sa Estados Unidos ang mga munisipalidad sa bug-os nga pungsod. Subong resulta, ang mga problema may kaangtanan sa aton pagbantala nga hilikuton nalubad sa 238 ka munisipalidad nga nagtinguha sang nagligad nga iaplikar sa aton  pangpubliko nga ministeryo ang ordinansa may kaangtanan sa regulasyon para sa pagkambas kag pagsolisitar. Dugang pa, bangod sang desisyon sa Stratton, ang mga manugbantala sang Ginharian sa 216 pa ka munisipalidad indi na kinahanglan nga magparehistro paagi sa pagtelepono sa pulis ukon sa iban pa nga mga opisyales sang banwa antes mag-alagad sa latagon. Kabay nga padayon nga dulaon ni Jehova ang subong sini nga mga balagbag.​​—Isa. 40:4; Mat. 24:14.

Ang mga kauturan padayon nga ginadakop kag ginabilanggo sa Armenia bangod sang ila pasad-sa-konsiensia nga pagpangindi sa pagsoldado. Gin-apelar sang manunumbong sa Yerevan, ang kapital nga siudad, ang desisyon batok sa pila ka utod sa katuyuan nga mapalawig pa ang mga pamatbat nga pagkabilanggo. Nagpasugot ang mga huwes sa iya gin-apelar, kag ginmando ang mas mabug-at nga mga pamatbat.

Sang Pebrero 2003 ang European Court of Human Rights nagdeklarar nga ang aplikasyon sang duha anay ka misyonero sang mga Saksi ni Jehova dapat pamatian sa Korte. Sang ginpahalin sa Bulgaria sang 1995, nagbatyag ang mag-asawa nga ang ila kinamatarong sa kahilwayan sa relihion kag kahilwayan gikan sa diskriminasyon ginlapas. Nagdesisyon ang Korte nga ang reklamo “may basihan.”

Wala lamang madugay sa tapos masaulog sang isa ka kongregasyon ang Panihapon sang Ginuo sa Asmara, Eritrea, ginpalibutan sang mga pulis ang duog tilipunan kag gindakop ang tanan nga 164 ka tumalambong​​—mga lalaki, babayi, kag kabataan. Ginhunong sila kag gin-interogar sa bug-os nga gab-i. Pagkadason nga adlaw ginbuhian sang mga awtoridad ang mga kabataan kag ang kalabanan nga mga utod nga babayi kag mga interesado. Ang iban ginsaylo sa pinakadaku nga bilangguan sa Asmara, diin ang pila ginbilanggo sa sulod sang halos isa ka bulan antes ginbuhian. Wala labot sini nga insidente, napulo ka utod nga lalaki ang yara gihapon sa isa ka kampo nga bilangguan bangod sang ila pasad-sa-konsiensia nga pagpangindi sa pagsoldado. Ang tatlo nabilanggo sa sulod sang siam ka tuig.

 Mapintas gihapon nga ginasalakay ang aton mga utod sa Georgia. Ang distrito nga mga kombension pakusog nga ginkanselar sang lokal nga mga opisyales kag sang armado nga mga pulis nga nagmartsa pasulod sa mga kombension samtang nagasesyon na. Nagsaka sila sa plataporma kag ginpalakat ang tumalambong. Sa isa ka okasyon ginbalabagan nila ang kaiping nga mga dalan agod indi makakadto sa kombension ang mga utod. Ang panguna nga manughingabot sang mga Saksi ni Jehova nagahulat sing bista, apang wala sia gindakop. Ang pagbista sa iya ginpaisol sing mga 19 ka beses. Isa ka bes ang korte ginkontrol sang mga nagasuportar sa iya, sa amo pisikal kag berbal nga ginsalakay ang mga utod. Ginpanas sang Departamento sa Buhis ang tax registration number sang mga Saksi, nga kinahanglan nila sa pag-importar sing mga literatura kag sa mga transaksion.

May maayong balita halin sa Kosovo kag Romania. Sang Mayo 20, 2003, ang 90 ka manugbantala sang Ginharian sa Kosovo legal nga ginkilala kag ang ila karta ginrehistro. Subong man, sang Mayo 22, 2003, ang gobierno sang Romania nagpapanaug sing mando nga opisyal nga nagakilala sang tindog sang mga Saksi ni Jehova subong isa ka relihion. Ang Artikulo 3 sang mando nagasiling: “Ang Cristianong relihion nga ‘Ang Relihioso nga Organisasyon sang mga Saksi ni Jehova’ may tanan nga kinamatarong kag obligasyon nga ginahatag sang kasuguan para sa mga relihion nga ginakilala sang Estado sang Romania.” Ang mando ginpapanaug bilang pagsunod sa desisyon sang Korte Suprema sang Hustisya sang Romania kutob sang tuig 2000.

Sa Rusya ang bista nga nagatinguha nga idumili ang mga Saksi ni Jehova sa Moscow ginsuspende sing walay latid sang Mayo 22, 2003. Wala magtalana sing tion, ang huwes nagmando sing isa pa ka “eksperto” nga pagtuon sa impluwensia sang sikolohiko nga mga butang nga makita sa mga literatura nga ginbalhag sang mga Saksi ni Jehova sa nagligad nga napulo ka tuig. Ang sientipiko nga basihan sini nga mga pagtuon maduhaduhaan. Sini man nga tion, ang European Court of Human Rights nagsugod sa pagproseso sang aplikasyon sang mga utod. Ang aplikasyon nagapamatok sa  hudisyal nga paggamo kag diskriminasyon nga naeksperiensiahan sang mga Saksi sa Moscow sa nagligad nga pito ka tuig.

Ginkuha sang Konseho sang mga Ministro sang naaminhan nga bahin sang Cyprus, paagi sa Decision No. E-1516-​2002 sini sang Agosto 8, 2002, ang pagdumili sa mga Saksi ni Jehova gikan sa pagsulod sa naaminhan nga bahin sang isla. Ang mga payunir gintabog gikan didto sang 1997, kon san-o ginpatuman ang pagdumili. Ang duha ka Kingdom Hall nga ginkompiskar gin-uli sa mga utod.

Sa Uzbekistan, si Marat Mudarisov napamatud-an nga nakasala sa ginakunokuno nga “pagsulsol sing relihioso nga pagdumot kag pagbuyok sa mga menor-de-edad” sa iya pagtuo. Ginhatagan sia sing suspendido anay nga pamatbat. Ang matuod, ang iya lamang “sala” amo ang pagbantala sing maayong balita sa iya mga kaingod kag ang pagdumala sing mga pagbinagbinag sa Biblia kada semana sa mga miting sa kongregasyon. Sining karon lang, gin-apelar ini sa Korte Suprema sang Uzbekistan, kag ang di-makatarunganon nga pamatbat kay Utod Mudarisov ginbaliskad.

Paglandas sa mga Pagtilaw

Samtang ang karon nga sistema sang mga butang malapit na matapos, ang kasingki kag pagkawalay kalig-unan sa politika padayon nga nagalala, nga masami ginatunaan sang dakung kabudlayan. Sang nagligad nga tuig, ang Liberia kag ang kapital sini, ang Monrovia, padayon nga nakaeksperiensia sing inaway sibil. “Isa ka semana nga may inaway sa dalan kag ang bug-os nga siudad magamo,” siling sang balita sang Reuters. “Nagbalik lamang ang kalinong sang naghalin ang mga kaaway sang gobierno, apang sang ika-24 sang Hunyo isa pa ka grabe nga pagsalakay ang natabo nga nagresulta sa pagkaguba sang mga imprastraktura kag pagkapatay sang madamo nga mga tawo.” Sa isa ka bahin sang siudad, ang mga utod naghapa sa basa nga salog sang ila Kingdom Hall bangod sang mga bala kag mga pagpamomba, paathag sang sanga talatapan. “Tuman ka grabe ang paglaglag sa siudad,” sulat sang mga utod. “Mapanimahuan namon ang mga bangkay.” Madamo pa ang napatay sa pagduging sang kolera.

 Gin-ati sang armado nga mga lalaki ang mga puluy-an kag mga Kingdom Hall. Bangod nahibaluan sang madamo nga mga utod nga mahimo kawaton ang bisan ano nga butang nga may balor, namat-od sila sa pagtigayon sang sadsaran nga mga kinahanglanon lamang, paathag sang isa ka misyonero nga mag-asawa halin sa Monrovia. Wala na gani gin-islan sang mga pamilya ang ginkawat nga mga katre kundi nagtulog na lamang sa banig sa salog. Ang indi na makapauli nangin mga refugee ukon nagpalagyo na lamang sa kaingod nga pungsod.

“Ang mga tawo nagakabuhi para sa karon lang nga adlaw,” sulat sang sanga. “Apang, makapalig-on gid makita nga ang mga utod nalangkag sa pagtambong sa mga miting kag sa paggua sa latagon kon ginatugot sang mga kahimtangan.” Sang nag-abot ang bulig, siling sang nasambit nga mga misyonero, “ang isa sa una nga mga butang nga ginpangabay sang mga utod amo ang pasad-sa-Biblia nga mga literatura kag, sa iban nga mga okasyon, ang isa ka bag nga magamit sa pagpanaksi bilang ilis sa ila bag nga nadula.”

Rehiyonal nga Pag-imprinta

Sang Septiembre 1, 2001, pito ka utod nga lalaki gikan sa nagkalainlain nga bahin sang kalibutan ang ginpili agod mag-alagad subong Printing Study Group. Ginpangabay sila sang Nagadumala nga Hubon nga tun-an ang tanan nga nagaimprinta nga mga sanga sa bug-os nga kalibutan kag magrekomendar sing mga paagi agod magamit sing labi pa ining mga pasilidad. Pasad sa rekomendasyon sang grupo, sang Oktubre 17, 2001, gin-aprobahan sang Nagadumala nga Hubon ang rehiyonal nga pag-imprinta, diin ginaatipan sang tagsa ka rehiyon ang kaugalingon nga mga kinahanglanon sa imprinta. Ang mga rehiyon amo ang Aminhan nga Amerika, Aprika, Asia, Bagatnan nga Amerika, kag Europa.

Ang bag-ong kahimusan nagsugod sang pamuno sang 2002. Makapalig-on gid ang mga resulta. Binagbinaga ang pag-imprinta sing mga libro. Sang tuig 2000, halos 50 porsiento sang mga libro para sa bug-os nga kalibutan ang gin-imprinta sang sanga sa Estados Unidos. Apang karon, sa idalom sang kahimusan sang rehiyonal  nga pag-imprinta, 26 porsiento na lamang ang ginaimprinta sini. Nagresulta ini sa pagnubo sang kagastuhanan sa pagpadala, talapuanan, makina, kag kinahanglanon nga espasyo sa imprintahan sang Estados Unidos kag sa mas episyente nga paggamit sa mga pasilidad sang iban nga mga pungsod.

Dungan sa rehiyonal nga pag-imprinta, gin-aprobahan sang Nagadumala nga Hubon ang pagbakal sing pito ka bag-ong MAN Roland Lithoman nga mga makina sa imprinta. Buslan sini ang daan kag indi na tanto ka episyente nga mga makina, sa amo nagabulig sa pag-atipan sa palaabuton nga mga kinahanglanon sa imprinta. Lima sa bag-ong mga makina sa imprinta, ang iban sini nainstalar na, ang para sa mga sanga sa Bagatnan nga Aprika, Brazil, Britanya, Japan, kag Mexico. Ang duha pa para sa imprintahan sa Wallkill, New York, diin naiskedyul ini para sa instalasyon sa Abril kag Mayo 2004. Ang tagsa ka makina 40 metros kalaba, makaimprinta sing 90,000 ka magasin ukon pareho kadaku sang magasin nga mga pahina para sa mga libro kada oras (25 kada segundo), kag makaimprinta sing de-kolor sa tanan nga pahina.

Dugang Pa nga mga Pagbag-o sa Brooklyn kag sa Wallkill

Upod sa bag-ong mga makina sa imprinta, ang Wallkill magabaton man sing bag-o nga makina nga makaimprinta sang matig-a sing panghapin nga mga libro kag deluxe nga mga Biblia sa kadasigon nga 120 kada minuto. Ang Shipping Department, nga sayluhon sa Wallkill halin sa Brooklyn, magabenepisyo gikan sa bag-o nga sistema sang madamo-sing-andana nga bodega nga nagapaposible  nga matago ang mga literatura sa kubos sa katunga nga espasyo nga ginagamit sa Brooklyn.

Ang nabakante nga mga tinukod sa Brooklyn gamiton para sa iban pa nga mga katuyuan. Isa pa, sang Hunyo 2003 gin-anunsio sang Nagadumala nga Hubon nga ang 95,000 metros kuadrados nga tinukod sa 360 Furman Street mahimo ibaligya, nga nahamtangan anay sang Shipping kag sang iban pa nga mga departamento. Ang iban nga mga departamento sa tinukod ginsaylo na ukon sayluhon sa ulihi sa nagkalainlain nga mga bahin sang pasilidad sa Brooklyn.

Pagpatindog Sing mga Kingdom Hall

Sang 2003 nga tuig sang pag-alagad, 2,340 ka Kingdom Hall ang napatindog sa bug-os nga kalibutan. Nagarepresentar ini sa promedyo nga 195 ka tilipunan kada bulan, ukon sulusobra sa 6 kada adlaw! Sugod sang ginsugdan ang programa sang pagpatindog sa pigado nga mga pungsod sang Nobiembre 1999, 7,730 ka Kingdom Hall ang napatindog. Sa madamo nga mga lugar, sa tion nga mahuman ang isa ka Kingdom Hall, ang nagatambong sa mga miting nagadugang kag ang mga tilipunan madasig nga napuno sang tumalambong.

Sang ang programa ginsugdan sa Aprika, may yara 550 ka nagakaigo nga mga duog para sa pagsimba sa 38 ka pungsod sa sini nga kontinente. Paglipas sang kubos sa apat ka tuig, ini gihapon nga 38 ka pungsod may kapin sa 5,060 ka Kingdom Hall​​—may promedyo nga 1 sa kada 3 tubtob 4 ka kongregasyon. Sa isa ka report tuhoy sa epekto sang mga proyekto sang Kingdom Hall sa publiko, ginsambit sang sanga sa Malawi ang isa ka bag-ong diksionaryo nga  ginbalhag sang Christian Literature Association of Malawi. “Ang diksionaryo,” siling sang sanga, “nagalakip sang tinaga nga mga Saksi ni Jehova kag ang aton ngalan ginbadbad sing husto sa Chichewa. Nian agod ipakita kon paano gamiton ang ngalan sa isa ka dinalan, ang diksionaryo nagadugang: ‘Ang mga Saksi ni Jehova nagpatindog sing madamong simbahan.’ ”

Ang sanga talatapan sang isa pa ka pungsod sa Aprika nagsulat: “Sang nagkadto ang mga utod sa opisina sang isa ka opisyal agod iparehistro ang amon aplikasyon sa pagpatindog sing isa ka Kingdom Hall, gilayon nga gingisi niya ang amon mga papeles kag ginhaboy ini. Sang natabo ini sa ikatlo nga tion, gintugyan na lang sang mga utod kay Jehova ini nga problema. Wala madugay pagkatapos sini, ang trabaho sa paghatag sing pautang sa mga opisyales sang gobierno gintulin sang mga awtoridad sa isa sa sini nga mga utod, nga nakilal-an tungod sa iya pagkabunayag.

“Isa sa mga nag-aplay sa pag-utang amo mismo ining opisyal nga naggisi sang amon mga papeles. Gani sang nakita ang aton utod, gilayon sia nga naggua sa opisina, kag nagbalik pagligad sang isa ka semana sa paglaum nga basi lain na nga opisyal ang nagadumala sang mga pautang. Apang sini nga tion ginpalapitan sia sang aton utod, ginkuha ang iya aplikasyon, kag gin-aprobahan ang utang. Sa kahuya, ang opisyal nagpangabay sa mga utod nga isumiter liwat ang ila mga papeles sang aplikasyon. Personal niya ini nga ginpresentar sa iya superyor agod aprobahan kag hatagan sing lote para sa Kingdom Hall. Bangod sang bag-o nga pagtahod sa mga Saksi, nagsiling sia: ‘Wala sila nagabalos sing malain sa malain.’ ”

Ang sanga sa Ukraine nagsaysay: “Samtang nagapangita sing lote, ginkontak sang mga utod sa siudad sang Artsyz ang isa ka rehiyonal nga arkitekto. Ginpakita nila sa iya ang mga retrato sang nahuman na nga mga Kingdom Hall. Nagadayaw nga nagsiling sia: ‘Ang subong sini nga Kingdom Hall dapat nga malapit sa administrasyon sang amon distrito, kay patahumon sini ang sentro sang siudad.’ Nian nagtanyag sia sing isa ka lote. Pagkatapos sini, ang mataas nga arkitekto sang rehiyon nagdugang: ‘Karon pa lang ako nakakita sing isa ka relihioso nga komunidad nga nagahilisugot sa mga plano  antes sugdan ang pagpatindog. Masami nga baliskad ang nagakatabo.’ ”

Sa isa ka lugar nga ginapatindugan sing Kingdom Hall sa siudad sang Lysychans’k, ang isa ka negosyante nga babayi gikan sa kaingod nga siudad nagkomento: “Madugay ko na kamo nga ginapanilagan. Sa banta ko dapat kamo magpatindog sing isa ka Kingdom Hall kaangay sini sa amon siudad. Buligan ko pa kamo sa pagpangita sing isa ka nagakaigo nga lugar.” Nian ginsilingan sia sang mga utod nga lima lamang ka Saksi ang nagapuyo sa amo nga lugar​​—diutay katama agod mag-organisar sing isa ka kongregasyon kag magpatindog sing isa ka tilipunan. “Ti, pila ang kinahanglan ninyo?” pamangkot niya kag dayon nagdugang: “Ilista ninyo ako subong ikan-om.” Ayhan nagalahog sia. Walay sapayan sini, nagpasugot sia nga magtuon sa Biblia.

Bag-ong mga Assembly Hall

Sang nagligad nga tuig sang pag-alagad, ang mga Assembly Hall nahuman kag gindedikar sa Nhandeara kag Goiânia, Brazil; El Trébol, Santiago, Chile; Morne Daniel, Dominica; Machala, Ecuador; Syracuse, Sicily, Italya; Gerehu, Papua New Guinea; Lomé, Togo; Newburgh, New York, kag West Palm Beach, Florida, E.U.A. Tuhoy sa proyekto sa Newburgh, ang isa ka lokal nga negosyante nagsiling: “Tumalagsahon gid ang inyo organisasyon! Nagagamit kamo sang mga boluntaryo nga may nagkalainlain nga ginhalinan, kinaadman, kag ikasarang, kag sila tanan nagapangabudlay sing nahiusa. Wala pa gid ako nakakita sing kaangay sini!” Dayaw gid ang isa ka lokal nga inspektor sang mga tinukod indi lamang sa trabaho kundi sa mga utod man. “Nanamian ako sa pagkadto diri,” siling niya. “Nalipay gid ako kon kaupod ko kamo.”

Sang malapit na matapos ang proyekto sa Newburgh, nasunog ang mga 20 porsiento sang tinukod. Sa baylo nga maluyahan sing buot, ang mga utod mapisan nga nagbuligay agod mapasag-uli ang tinukod. Subong resulta, ang proyekto sa pagpasag-uli natapos sing kubos sa isa ka bulan, amo nga ang programa sang dedikasyon ginhiwat suno sa iskedyul, sang Oktubre 19, 2002. Nagakomento tuhoy sa mga boluntaryo, ang isa ka lokal nga pamantalaan  nagsiling: “Ang ila pagtuo mas mainit sangsa kalayo nga nagsunog sang mga ikalima nga bahin sang 5,600 metros kuadrados nga tinukod.” Bilang pagkilala sa hamili nga paghiusa sang katawhan sang Dios, ang mga utod nagkuha sing permiso agod tawgon ang pangpubliko nga dalan padulong sa Assembly Hall nga Unity Place.

Dedikasyon Sang mga Sanga

Walay sapayan sang sibil kag politikal nga pinuyas, ang mga utod sa Côte d’Ivoire malinong nga nagtipon sang Marso 29, 2003, sa pagdedikar sang pila ka bag-ong mga tinukod sa sanga sa Abidjan. Naglakip ini sa isa ka bag-ong Kingdom Hall, duha ka residence building, kag sa tinukod nga may yara daku nga hulot-kalan-an, kusina, lalabhan, bodega, kag mga maintenance shop. Ang bag-ong mga pasilidad yara sa pihak-dalan sang orihinal nga sanga, nga ginpatindog sang 1982. Ang mga boluntaryo gikan sa 15 ka pungsod, nga ang madamo sa ila nagkari sa ila kaugalingon nga gasto, nagbulig sa 110 ka katapo sang lokal nga grupo sa konstruksion. Si Sébastien Johnson, ang manugtatap sang sona nga nagduaw sa sanga, naghatag sang pamulongpulong sa dedikasyon, “Ipahamtang ang Imo Tagipusuon sa Putli nga Pagsimba.”

Sang Sabado, Pebrero 15, 2003, ang dedikasyon sang bag-ong sanga sa Guyana gintambungan sang 332. Si Richard Kelsey, halin sa sanga sa Alemanya, ang naghatag sang pamulongpulong sa dedikasyon. Ginpatuhoy niya ang igtalupangod kay Jehova subong ang Batid nga Manunukod sang uniberso. Apang, ginpatalupangod ni Utod Kelsey nga ang pinakadaku nga gintuga ni Jehova, nga amo man ang iya una, amo ang isa ka mahimayaon nga espiritu nga tinuga​​—ang iya bugtong nga Anak. Madamong mga misyonero anay ang nagbalik sa pagtambong sa programa sa dedikasyon, ang pila sa ila karon pa lang liwat nakabalik pagligad sang madamo nga tinuig! Kon hunahunaon nga ang Guyana may sulusobra lamang sa 2,000 ka manugbantala sing maayong balita, nalipay gid ang tanan nga makita ang 4,752 ka tawo gikan sa 12 ka pungsod nga nagtambong sa isa ka pinasahi nga programa sang Domingo.

Sa inagurasyon sang ekstension sang Bethel sa Haiti, ang tingog sang beterano nga si George Corwin makapangligbos samtang ginasugid  niya ang iya pagduaw kasan-o lang sa St. Marc, isa ka banwa nga may pantalan 60 kilometros aminhan sang Port-au-Prince. Subong misyonero anay sa St. Marc kapin na sa 40 ka tuig ang nagligad, nagbulig sia sa pagtukod sang ila nahauna nga kongregasyon. Sa karon ang banwa may apat na ka daku nga mga kongregasyon. Ang iya mga estudyante sa Biblia, nga sa karon malig-on kag matutom na nga mga Saksi, nalipay sa pag-abiabi sa iya. Sang nag-abot anay si Brother Corwin sa Haiti, ang mga manugbantala sa pungsod kubos lang sa 900, kag ang sanga talatapan​​—isa ka magamay kag gin-arkilahan nga balay—​may duha ka katapo.

Gintukod ang isa ka bag-ong sanga sa Haiti sang 1986, apang nangin kulang man ini. Ang bag-o gindedikar kag ginpadakuan nga sanga makapaigo sa isa ka pamilya Bethel nga may 40 ka katapo, nga nagaalagad sa kapin sa 12,000 ka manugbantala. Ang mga boluntaryo halin sa Alemanya, Australia, Britanya, Canada, Denmark, kag Estados Unidos nagbulig sa pagpatindog. Ginhanas man nila ang taga-Haiti nga mga boluntaryo sa mapuslanon nga mga ikasarang sa pagpatindog.

Bangod sang mga kakulangan sa pungsod, ang mabug-at nga mga kagamitan kag halos tanan nga materyales sa pagpatindog naghalin sa iban nga mga pungsod. Nagpahinay ini kon kaisa sa trabaho apang wala ini mag-untat. Nag-abot ang adlaw sang dedikasyon sang Sabado, Nobiembre 23, 2002. Lakip sa 3,122 nga nagtambong amo ang 240 ka delegado gikan sa 13 ka pungsod. Si David Splane sang Nagadumala nga Hubon ang naghatag sang pamulongpulong sa dedikasyon. Pagkadason nga adlaw, kapin sa 20,000 ang nagtambong sa isa ka pinasahi nga programa sa Sylvio Cator Stadium sa Port-​au-​Prince.

“Magtindog kita kag magpatindog.” (Neh. 2:18) Ining makapalig-on nga mga pulong, nga ginbungat sang matutom nga mga Judiyo sang panahon ni Nehemias, makita sa suplemento sang Hunyo 2000 nga gua sang Ang Aton Ministeryo sa Ginharian sa Hungary. Ang katawhan ni Jehova gikan sa bug-os nga pungsod gin-agda sa pagpakigbahin sa pagpatindog sing isa ka bag-ong sanga sa Budapest. Nagarepresentar sa kabug-usan nga 251 ka kongregasyon sa pungsod, 13,741 ka boluntaryo ang nakigbahin sa  proyekto, nga naglawig sing duha ka tuig kag naglakip sa pagliwat sa anay pasilidad militar. Ang programa sa dedikasyon, nga gintambungan sang 554 ka bisita gikan sa 22 ka pungsod, ginhiwat sang Mayo 10, 2003. Ang katapo sang Nagadumala nga Hubon nga si Guy Pierce ang naghatag sang pamulongpulong sa dedikasyon, “Si Jehova Padayon nga Nagapatubo Sini.”

Ang pagpasangkad sa sanga masami na nga ginahimo sa Mexico. Ang 14 ka bag-ong tinukod, nga gindedikar sang Marso 15, 2003, gindugang sa mga tinukod nga gindedikar na anay sang 1974, 1985, kag 1989. Ang paghimo sing 80,000 metros kuadrados nga pundasyon para sa bag-ong mga tinukod mabudlay gid bangod sa duha ka rason. Una, bangod ang lugar isa anay ka linaw, ang ikasarang sang duta agod patindugan mahuyang. Ikaduha, ang rehiyon pirme ginalinog. Gani, agod makapatindog sing isa ka  mapag-on kag luwas-sa-peligro nga pundasyon, ang mga manugpangabudlay naglubong sa duta sing 3,261 ka kongkreto kag salsalon nga mga haligi, ang kada isa nagadalom sing mga 24 metros! Ang pagplano kag pagpatindog naglawig sing 12 ka tuig kag nagkinahanglan sing 28,600 ka boluntaryo nga mga manugpangabudlay gikan sa Mexico kag 734 gikan sa luwas.

Tatlo ka katapo sang Nagadumala nga Hubon ang may bahin sa programa sa dedikasyon. Si Guy Pierce nagpamulongpulong tuhoy sa daku pa nga kalipay bangod sang pagtigayon sing suod nga kaangtanan kay Jehova. Si Theodore Jaracz nagpaathag kon paano ang mga pagpakamaayo sang matutom nga pag-alagad sa Dios nagalabaw sa mga pagtilaw nga ginaatubang sang mga Cristiano sa sining tion sang katapusan. Kag si Gerrit Lösch ang naghatag sang pamulongpulong sa dedikasyon sa Espanyol nga hambal, “Simbaha ang Dios Sang Kamatuoran!”

Sang Nobiembre 23, 2002, ang sanga sa Peru nagdedikar sang pila ka pasilidad, lakip na ang matahom kag bag-ong lima-ka-panalgan nga opisina kag residence building. Si Gerrit Lösch ang naghatag sang pamulongpulong sa dedikasyon, “Ang Pagpasangkad Nagaresulta sa Kadayawan ni Jehova.” Pagkadason nga adlaw, Domingo, 59,940 ang nagtipon sa San Marcos Stadium sa Lima, diin ginpatalupangod sa pinasahi nga programa ang bugana nga pagpakamaayo ni Jehova sa hilikuton sang Ginharian sa Peru. Kag makita gid ini nga pagpakamaayo! Sang 1946 sang nag-abot ang nahaunang mga misyonero agod pangunahan ang hilikuton, pila lamang ang mga manugbantala kag mga interesado sa pungsod. Karon ang Peru may 87,318 ka manugbantala kag 916 ka kongregasyon.

 Sa sanga sa Rusya, ang 600 ka bisita kag 350 ka katapo sang pamilya Bethel​​—sing tingob nagarepresentar sa 30 ka pungsod—​nagtipon sang Mayo 17, 2003, agod saksihan ang pagdedikar sa bag-ong mga residence building, opisina, kag bodega. Ang nauna nga dedikasyon ginhiwat mga anom ka tuig pa lang ang nagligad, gani ngaa kinahanglan dayon ini nga pasangkaron?

Ang sanga sa Rusya, nga nahamtang sa Solnechnoye sa gua sang St. Petersburg, nagaatipan sa pagbantala sang Ginharian nga hilikuton sa napulo ka pungsod. Kapin sa 100 ka hambal ang ginapamulong sa sining malapad nga rehiyon, nga nagasakop sa 11 ka time zone. Gani, ang pagbadbad nagarepresentar sa daku kag nagasangkad nga bahin sang hilikuton sa sanga. Sa karon ang mga utod nagabadbad sing pasad-sa-Biblia nga mga literatura sa 34 ka hambal. Dugang pa, sugod sang ulihi nga dedikasyon, ang kadamuon sang mga manugbantala sa rehiyon nagdamo sing kapin sa 40,000​​—halos 7,000 kada tuig! “Kag padayon gihapon ang pagdamo,” sulat sang sanga. Gani bilang sabat sa bugana nga pagpakamaayo ni Jehova, ang mga kauturan sa Rusya nalipay sa ‘pagpalaba sang ila banting.’​​—Isa. 54:2.

Madamong matutom nga mga tigulang nga nag-antos sing daku nga paghingabot sang panahon sang Sobyet ang nagtambong sa dedikasyon sang Sabado. Ang tanan namati sing maayo samtang ginhatag ni David Splane ang diskurso sa dedikasyon, “Pun-on Ko Ining Balay Sing Himaya,” pasad sa Hageo 2:7. Ginpaathag niya nga bisan pa ang bag-ong mga tinukod matahom kag nagahatag sing kadayawan, ang diosnon nga paggawi kag espirituwal nga mga kinaiya sang tagsa ka indibiduwal nga Cristiano amo gid ang nagahimaya kay Jehova kag nagapuni sang matuod nga pagsimba. Sang Domingo, 9,800 ang naglatas sa mabugnaw nga ulan agod pamatian ang isa ka pinasahi nga programa sa Kirov Stadium sa St. Petersburg.

Sa bug-os nga kalibutan, may yara kabilugan nga 19,848 ka ordenado nga mga ministro nga nagaalagad sa mga pasilidad sang mga sanga. Ang tanan katapo sang Bug-os Kalibutan nga Orden Sang Pinasahi nga Bug-os Tion nga mga Alagad Sang mga Saksi ni Jehova.

 [Chart/Pictures on page 12, 13]

PILA KA HITABO SA 2003 TUIG SANG PAG-ALAGAD

Septiembre 1, 2002

Septiembre 1: Ang tulun-an nga mga artikulo sa Ang Lalantawan matigayon na sa video sa American Sign Language.

Nobiembre 23: Dedikasyon sang mga sanga sa Haiti kag Peru.

Enero 1, 2003

Enero 1: Ang mga kongregasyon nagsugod sa paggamit sang bag-ong libro nga Magbenepisyo sa Pagpanudlo Sang Teokratikong Eskwelahan Para sa Ministeryo.

Pebrero 15: Dedikasyon sang sanga sa Guyana.

 Marso 15 kag 29: Dedikasyon sang mga sanga sa Mexico kag Côte d’Ivoire.

Abril 16: Gindakop sang mga pulis sa Asmara, Eritrea, ang 164 nga nagtambong sa Memoryal.

Mayo 1, 2003

Mayo 10 kag 17: Dedikasyon sang mga sanga sa Hungary kag Rusya.

Mayo 20: Ang mga Saksi ni Jehova legal nga ginrehistro sa Kosovo.

Mayo 22: Opisyal nga ginkilala sang Romania ang tindog sang mga Saksi ni Jehova subong isa ka relihion. Ang bista nga nagatinguha sa pagdumili sa mga Saksi ni Jehova sa Moscow ginsuspende sing walay latid.

Agosto: Ang bag-ong MAN Roland Lithoman nga makina sa imprinta gin-instalar sa sanga sa Britanya.

Agosto 31, 2003

Agosto 31: Sa imol nga mga pungsod, 7,730 ka Kingdom Hall ang nahuman sugod sang Nobiembre 1999. 6,429,351 ka manugbantala ang aktibo sa 235 ka pungsod.

[Pictures]

Haiti

Peru

[Graph on page 11]

(See publication)

Pagdamo sang mga hambal:

Tanan nga publikasyon

“Ang Lalantawan”

“Magmata!”

400

300

200

100

1880 1920 1960 2000

[Retrato sa pahina 14]

Mga instruktor sa Course in Improved English Comprehension, kag ang ila mga asawa

[Retrato sa pahina 22]

Ang makina sa imprinta ginpaanggid sa isa ka bus sa siudad

Estadistika sang makina sa imprinta:

Kalabaon: 41 metros

Kataason: 5.5 metros

Kabug-aton: 201 ka tonelada

[Retrato sa pahina 28]

Mga pasilidad sang mga sanga nga gindedikar sining karon lang sa (1) Guyana, (2) Hungary, kag (3) Côte d’Ivoire