Iceland

Kon mabatian sang isa ang ngalan nga Iceland, mahimo nga ginapanan-aw niya ang yelo, niebe, kag mga “igloo” (balay sang mga Eskimo). Hunahunaon gid naton nga ang Iceland matugnaw kon tan-awon naton ang mapa. Pila lamang ka tawo ang nagapuyo sa malayo nga aminhan subong sang Iceland. Ti, ang naaminhan gid nga bahin sining isla nga pungsod halos nagalab-ot na sa Arctic Circle!

Apang, ang Iceland indi gid man matugnaw subong sang ginapahangop sang ngalan kag lokasyon sini. Ang mainit nga sulog sang tubig sang dagat, nga nagahalin sa aminhan nayon sang ekuador, nagabulig agod mag-iguigo lang ang klima. Wala man sing mga igloo. Ang mga taga-Iceland moderno gid, kag nagapuyo sila sa mabakod nga mga balay nga may sistema sang pangpainit nga nagagamit sang init halin sa idalom-duta.

Ang Iceland isa ka pungsod nga may daku nga pagkatuhay sang mga butang. Sa tungatunga sang tigtulugnaw, ang adlaw daw nagasid-ing lang sa gintaipan sing pila lamang ka oras kada adlaw. Bisan pa ang malawig kag madulom nga mga gab-i sa tigtulugnaw masami nga ginapanayanaya sang matahom nga pagsanaaw sang naaminhan nga hemisperio, ukon aurora borealis, daw halos wala nagapakita ang adlaw. Apang, ginabawi ini sang pila ka bulan nga sigesige nga adlawon sa tingadlaw. Sa pinakaaminhan sang pungsod, ang adlaw wala nagatunod sa sulod sang pila ka semana. Makita mo didto ang adlaw sa tungang gab-i.

Ang Iceland ginatawag nga duta sang yelo kag kalayo, nga isa gid ka nagakaigo nga paglaragway. Ang ikanapulo nga bahin sang pungsod ginatabunan sang dalagku nga mga yelo. May yara man kalayo​—ang Iceland may madamo nga bulkan kag mga paghulag  sang init sa idalom sang duta. Madamo nga bulkan ang naglupok didto kag sang nagligad lang nga pila ka siglo, nagakatabo ini sa promedyo nga kada lima ukon anom ka tuig. Madamo man sing mainit nga tuburan.

Ining diutay sing pumuluyo nga pungsod may kinaugali nga katahom kag madamo nga ilahas nga kasapatan. Ang matinlo nga hangin, mataas nga mga busay, batuhon nga kabukiran, kag malapad nga kahanayakan nagaganyat sa madamo nga bisita. Sa una nga bahin sang tigpamulak, ang nagasulusaylo sing lugar nga mga pispis nagabalik sa ila puluy-an kon tingadlaw sa mga pil-as sa baybay kag sa mga katunggan. Isa sa sini nga mga pispis amo ang arctic tern, nga nagasaylo kada tuig sa Antarctica, sa pihak nga ukbong sang duta. Ang mga puffin, eider, kag sea gull makita sa mga pil-as kag sa baybay. Ang mga karnero nagahalab sa kaumhan, kag ang gamay kag mabukod nga Icelandico nga mga kabayo nagalagawlagaw sa bulubukid nga lugar. Sa una nga bahin sang tingadlaw, linibo ka salmon ang nagabalik, nga nagalangoy kag nagaluksolukso sa mga suba kag mga busay sa pagpangitlog.

Ang 290,570 ka pumuluyo sang Iceland mga kaliwat sang mga Viking, nga nagpuyo didto kapin sa 1,100 ka tuig na ang nagligad. Kalabanan sa ila naghalin sa Norway, kag nagahambal sila sing Old Norse, nga amo ang ginhalinan sang Icelandico nga lenguahe. Ang pinanubli nga literaryo kag ang pagkanaligwin sang pungsod nakabulig agod matipigan ang lenguahe. Gani, mabasa sang mga tawo karon ang dumaan na nga mga kasaysayan, nga ang kalabanan ginsulat sang ika-13 nga siglo. Ginapabugal sang mga taga-Iceland ang ila lenguahe, kag nagapamatok gid sila sa paggamit sing mga tinaga halin sa iban nga pungsod.

Ang kalabanan nga nagpuyo didto sang una mga “pagano,” kag sang talipuspusan sang ikanapulo nga siglo lamang nga gintinguhaan nga kumbertihon sa “Cristianismo” ang mga taga-Iceland. Wala magdugay antes matapos yadto nga siglo, nakumbertir ang pila ka prominente nga mga lider sa Iceland, kag sang tuig  1000, ginpangabay sang parlamento sang Iceland nga Althing ang isa sa nagapanguna nga paganong relihioso nga mga lider nga husgahan ang duha ka relihion. Makapakibot nga namat-od sia nga isa lang ka relihion ang dapat sundon, ang “Cristianismo.” Daw ginbaton ini nga wala sing daku nga pagpamatok. Apang, ang iya direktiba nagtugot sa mga tawo nga simbahon sing tago ang pagano nga mga dios kag padayunon ang paghimo sing pagano nga mga kustombre. Bisan pa ang desisyon napasad sa politika sangsa relihion, mahimo nga isa ini ka rason kon ngaa ang independiente sing panghunahuna nga mga taga-Iceland mahinangpanon sa relihioso nga mga hulusayon.

Sa karon, mga 90 porsiento sang populasyon ang katapo sang Evangelical Lutheran Church, nga amo ang pungsudnon nga relihion. Bisan pa ang halos tanan nga puluy-an may Biblia, pila lamang ang nagapati nga ini Pulong sang Dios.

 Ang Maayong Balita Nakalab-ot sa Iceland

Sa pamuno sang ika-20 nga siglo, madamo nga taga-Iceland ang nagsaylo sa Canada, ayhan agod likawan ang kabudlayan nga resulta sang mga paglupok sang mga bulkan kag sang tuman nga katugnaw. Didto una nga nabatian sang iban ang maayong balita tuhoy sa Ginharian sang Dios. Isa sa ila amo si Georg Fjölnir Lindal. Wala magdugay nga madedikar niya ang iya kabuhi kay Jehova nga Dios, nangin payunir sia. Nagahambal sing Icelandico nga lenguahe si Utod Lindal, gani sang 1929, sang 40 anyos sia, nagbalik sia sa Iceland. Nag-abot sia sa Reykjavík sang Hunyo 1 sadto nga tuig kag sia ang una nga nagbantala sing maayong balita sa Iceland.

Tatlo ka bulan nga naghulat si Utod Lindal sa una nga pag-abot sang literatura, apang pag-abot gid sini, ginsugdan niya ang pagpanaksi sa tanan sa pungsod. Sang katapusan sang Oktubre 1929, napanagtag niya ang 800 ka kopya sang The Harp of God sa Icelandico nga lenguahe. Nagsulat sia sadto: “Sugod sang pag-abot ko diri, nakabantala ako sa pila ka banwa nga may kabug-usan nga populasyon nga mga 11,000 ka tawo. Ang kabug-usan nga populasyon sang Iceland mga 100,000 ukon kapin pa, gani may mga 90,000 pa nga dapat mabantalaan. Nagakinahanglan sing malawig nga tion para mabantalaan sang isa ka tawo ang bug-os nga teritoryo, kay mabudlay katama ang paglakbay. Ang Iceland bulubukid nga pungsod nga may utod-utod nga baybay, wala sing riles, kag diutay lang ang karsada, gani sa masami nagasakay ako sa sakayan.”

Wala gid ikaw sing manutaran nga reklamo sa pila ka sulat sa sulod sang daan na nga folder nga may ngalan “Iceland.” Sa amo man nga sulat sang 1929, si Lindal nagsiling: “Nalipay gid ako sa pagsugid sang akon isa ka makapalig-on nga eksperiensia sining karon lang. Nakahigayon ako nga makaduaw liwat sa pila ka duog nga nabantalaan ko anay. Nasugilanon ko ang madamo nga tawo nga nakabakal sing mga libro sang una ko nga pagkadto didto. Ang isa ka tawo nagsiling: ‘Duha ka beses na nga nabasa ko ang  Harp kag ginabasa ko ini sa ikatlo nga higayon. Maayo ini nga libro. Salamat gid sa pagduaw mo.’ Ang isa pa nagsiling: ‘Nagbalik ka. Maayo gid yadto nga libro. Ngaa indi ninyo ibalhag ang tanan nga libro ni Judge Rutherford sa Icelandico nga lenguahe?’ Ginsilingan ko sia nga matigayon niya ang madamo sini sa Danes nga lenguahe. Nagsiling sia: ‘Padalhi ako sang tanan sini, pati na sang mga tomo nga ginsulat ni Pastor Russell agod madamo ako sing matun-an sini nga tigtulugnaw.’ Ang iban nagapasalamat gid sa nakuha nila nga mga libro. Nagapasalamat ako sa Dios nga gintugutan niya ako sa pagdala sing mensahe sang kamatuoran sa mga tawo nga nagapamati.”

Daku gid nga hilikuton para sa isa ka tawo nga mabantalaan ang tanan sa sini nga isla, nga ang  kadakuon kapin pa sa katunga sang kadakuon sang Inglaterra. Ang Iceland mga 300 kilometros halin sa aminhan pa bagatnan kag mga 500 kilometros halin sa sidlangan pa katundan. Ang baybay, pati na ang mga inutlan sang mga pil-as kag mga gibwangan, halos 6,400 kilometros kalaba. Apang, natuptupan ni Utod Lindal ang bug-os nga isla sa sulod sang napulo ka tuig, nga nagabantala sing maayong balita kag nagapanagtag sing mga literatura. Nagpanakayon sia sa baybayon paagi sa sakayan, kag kon ginaduaw niya ang mga uma nga suludlon, nagagamit sia sing duha ka kabayo, ang isa ginasakyan niya kag ang isa pa ginakargahan niya sang iya mga literatura kag pagkabutang. Suno sa mga kauturan nga nakapakig-upod sa iya mga pila ka tuig antes sia magbiya sa Iceland, si Utod Lindal isa ka debotado kag serioso nga utod, mahuluy-on kag hipuson. Mabukod sia nga tawo​—mataas​—halos indi bagay sa iya ang gamay nga Icelandico nga mga kabayo nga  ginagamit niya sa paglakbay. Kon kaisa nga wala sing kabayo, ginabakintol niya ang iya mga libro kag pagkabutang.

Sang ginsugdan ni Utod Lindal ang iya hilikuton sa Iceland sang 1929, wala gid sia maglaum kon daw ano ini kabudlay kag kon daw ano kadaku nga pagpailob kag determinasyon ang kinahanglan agod malandas ang una nga pagpangalag-ag sang mga tawo. Sa halos 18 ka tuig, si Utod Lindal amo lamang ang Saksi sa Iceland. Walay sapayan sang iya maukod nga pagbantala, wala gid sing isa nga nanindugan sa Ginharian sa sini nga tion. Sang 1936 nagsulat sia: “Sugod sang diri ako, nakapahamtang ako sing mga 26,000 tubtob 27,000 ka libro. Madamo nga tawo ang nakabasa sini. Ang iban daw nagapamatok sa kamatuoran, apang ang kalabanan indi gid interesado.”

Apang, gin-apresyar sang pila ang mensahe nga ginbantala niya sa ila. Halimbawa, ginbaton sang isa ka tigulang nga lalaki ang isa ka kopya sang The Harp of God. Sang nagduaw liwat si Utod Lindal pagligad sang pila ka bulan, nasugilanon niya ang anak nga babayi sang tigulang nga lalaki. Ginsugiran niya si Utod Lindal nga naluyagan sang iya amay ang libro kag maid-id niya ini nga gintun-an antes sia mapatay. Bilang pagsunod sa paganong kinabatasan, ginpangabay pa gani sang iya amay nga kon mapatay sia, isulod sa iya lungon ang libro kag amo ini ang ginhimo.

Ang malawig nga pagtener ni Utod Lindal sa Iceland nga nagaisahanon lamang natapos sang Marso 25, 1947, sang nag-abot ang mga naggradwar sa Watchtower Bible School of Gilead. Nagpadayon sia sa pag-alagad didto tubtob nagbalik sia sa Canada sang 1953. Pagligad sang 16 ka tuig, namat-od si Páll Heine Pedersen, isa ka espesyal payunir sadto sa Iceland, nga magkadto sa Winnipeg, Canada, agod makigkita kay Utod Lindal kag masugilanon sia sing personal tuhoy sa iya pagpanghikot sa Iceland bangod, sadto nga tion, ang kaupod nga mga misyonero ni Utod Lindal sa Iceland nagbiya na sa pungsod. Sang nagbakasyon si Utod Pedersen sa Estados Unidos, nagsakay sia sa bus pakadto sa Winnipeg. Pag-abot niya, nabalitaan niya nga natapos na ni Utod Lindal ang  iya dutan-on nga kabuhi sadto nga aga. Matutom sia nga nag-alagad kay Jehova tubtob sa iya kamatayon.

Dugang Pa nga mga Mamumugon Para sa Alanyon

Sang 1947 nagsugod ang bag-o nga dag-on sang pagbantala sing maayong balita sang mag-abot ang una nga mga misyonero sang Gilead, nga lunsay taga-Denmark. Isa sa ila amo si Leo Larsen. Duha pa ka misyonero ang nag-abot sang Disiembre 1948: si Ingvard Jensen nga taga-Denmark kag si Oliver Macdonald nga taga-Inglaterra. Ginpadayon sining bag-o nga mga mamumugon sa alanyon ang hilikuton ni Utod Lindal kag nagpanagtag sing madamo nga literatura. Kon tigtulugnaw, nagabantala sila sa Reykjavík kag sa palibot sini, kag sa tion sang malip-ot nga tingadlaw, nagabantala sila sa kaumhan malapit sa baybayon. Madumduman pa ni Ingvard Jensen ang isa ka paglakbay agod magbantala. Sia nagsulat: “Sa akon nahauna nga tingadlaw sa Iceland, gin-updan ko ang isa sa mga misyonero sa kaumhan. Kinaandan  na nga nagasakay kami sa bus ukon sa sakayan pakadto sa pinili nga teritoryo, nga dala ang mga bisikleta, tolda, tululugan, literatura, kag balon nga pagkaon. Gani isa ka gab-i nagpanakayon kami pakadto sa banwa sang Stykkishólmur sa katundan nga baybayon kag nag-abot kami pagkahapon sang masunod nga adlaw. Plano namon nga duawon ang tanan nga puluy-an sa banwa kag dayon magbisikleta pakadto sa banwa sang Borgarnes, nga mga 100 kilometros ang kalayuon. Adlaw-adlaw may nagabiyahe nga sakayan halin didto patabok sa Reykjavík. Maayo ang biyahe sa umpisa. Tungatunga sadto sang Hunyo kag nagasilak ang adlaw. Sang una nga gab-i, nagkamang kami pasulod sa amon tululugan (sleeping bag) sa tapos magbantala sa isa ka bahin sang banwa. Apang sang gab-i, gintugnawan kami sa amon tululugan, kag pagkaaga nahisayran namon ang rason kon ngaa: Nagtupa ang 10 sentimetros  nga niebe sang gab-i! Imposible nga mapadali ang pagbiyahe, kay wala sing sakayan sa sulod sang isa ka semana. Gani dapat namon sundon ang amon iskedyul, magbantala sa banwa, kag magbisikleta sa dalan sa bukid pakadto sa masunod nga banwa, nga ginabantalaan ang maagyan nga kaumhan.”

Nakalab-ot sila sa Borgarnes pagligad sang apat ka adlaw, nagabisikleta sa yelo, sa ulanan, kag sa dalimuos sang hangin nga may kabaskugon nga 110 kilometros por ora. Apang, ining malain nga tiempo medyo ginbawi sang tumalagsahon nga pagkamaabiabihon sang mga mangunguma nga maagyan nila, nga pirme nagaagda sa ila nga mangape kag magkaon. Nadumduman pa ni Utod Jensen nga walo tubtob napulo ka beses sila nga nagkaon sa isa ka adlaw! Nagsiling sia: “Pamatyag ko magalain gid ang buot sang mga tawo kon balibaran namon ang ila maalwan nga tanyag, kag naghatag ini sa amon sing kahigayunan nga mapanaksihan sila tuhoy sa natukod nga Ginharian ni Jehova.”

Sa sulod sang tatlo ka tuig nga pagmisyonero sa Iceland, nakapahamtang ang mga kauturan sing kapin sa 16,000 ka literatura. Apang, ang mga pagduaw liwat kag mga pagtuon wala magdugang​—ang mga tawo maabtik sa pagbaton sing mga literatura apang indi sila interesado sa mensahe. Halimbawa, si Utod Larsen kag ang iya asawa, si Missie​—nga nag-abot halin sa Denmark sang 1950 agod magpakasal kay Leo​—nagkadto sa sidlangan nga baybayon, diin nagbantala sila sa mga banwa sang Höfn, Fjord, Eskifjördhur, Neskaupstadhur, kag Seydhisfjördhur. Sa sining mabudlay nga paglakbay, nakapahamtang sila sing 300 ka libro kag mga 300 man ka pulyeto. Ang mga tanda nga ginasal-ot sa libro, nga may malip-ot nga mensahe gikan sa Kasulatan kag direksion sang mga misyonero sa Reykjavík gin-imprinta kag ginsal-ot sa tanan nga libro. Ang tanan nga nagkuha sing literatura gin-agda nga magsulat agod makakuha sing dugang pa nga impormasyon tuhoy sa kamatuoran​—apang, wala gid sing nagsulat.

Sang 1952 napamat-uran nga ang teritoryo sa naaminhan nga baybayon nagakinahanglan sing kapin nga atension. Gani sang  Hunyo sadto nga tuig, si Oliver Macdonald kag ang iya asawa nga si Sally, nga nag-abot halin sa Inglaterra sang 1949 agod magpakasal sa iya, gin-asayn sa Akureyri subong mga espesyal payunir. Mabaskog nga ginpamatukan sila didto sang isa ka grupo sang Plymouth Brethren nga ginapangunahan sang Britaniko nga konsul sa banwa. Madamo sia sing sumulunod, kag ang iban namati sa iya sang ginpakalain niya ang mga Saksi sa mga pamulongpulong kag sa mga artikulo. Bisan pa wala maanad ang mga payunir sa sini nga sahi sang pagpamatok sa Reykjavík, wala kahadlok nga gin-atubang nila ang pagpakalain, kag nagpadayon sa ila pagbantala subong sang kinaandan kag naggamit sang tanan nga kahigayunan agod masabat ang sayop nga mga panumbungon. Gin-imprinta sang iban nga mga pamantalaan ang ila mga sabat.

Wala labot sang pagbantala sa banwa, ginkadtuan man sang mga payunir ang naligwin nga mga duog, nga nagapahamtang  sing mga literatura kag ginaabiabi sang mga tawo apang wala sila sing makita nga interesado sa mensahe sang Ginharian. Nagbalik sa Reykjavík ang mag-asawa Macdonald sang Hulyo 1953, apang antes sila magbiya sa Akureyri, nakatanom sila sing mga binhi sang kamatuoran, nga nagtubo sang ulihi.

Ginpahamtang ang Pundasyon

Pagkatapos sang 27 ka tuig nga pagtanom kag pagbunyag, nakita gid man sang mga kauturan sa Iceland ang mga bunga sang ila pagpangabudlay. Sang temprano nga bahin sang 1956, pito ka bag-uhan ang nagpanindugan sa Ginharian kag nagdedikar sang ila kabuhi kay Jehova. Sadto nga tion, ang kalabanan nga nagpakita sing interes sa kamatuoran wala magpadayon. Si Iris Åberg lang, nga isa ka Ingles nga utod nga babayi nga nagbiya sang ulihi sa pungsod, ang nagpadayon. Pito ka bag-uhan ang nabawtismuhan na karon, kag napahamtang ang malig-on nga pundasyon. Apang, sang tuig 1957, ang mga misyonero kag mga payunir nga nagpangabudlay sing maukod agod matukod sing malig-on ang kamatuoran nagbiya sa Iceland, ang kalabanan bangod sang panglawas.

Gani sang 1957, isa ka espesyal payunir nga utod nga babayi​—si Edith Marx, nga nag-abot halin sa Denmark sang tuig antes sini​—ang nabilin sa pagtatap sa gamay nga kongregasyon. Kinahanglan ang mga mamumugon sa alanyon agod magbulig sa grupo, nga hinali lang ginbayaan sang mga nagbulig sa mga bag-uhan nga matun-an ang kamatuoran kag mangin malig-on sa sini. Apang, wala madugayi nag-abot ang mga espesyal payunir gikan sa Denmark, Sweden, kag Alemanya. Dugang pa, madamo nga manugbantala kag payunir ang nagsaylo sa Iceland agod makigbahin sa pagbantala sing Ginharian. Sugod sadto, nagpadayon ang pag-uswag sing mahinay apang sing tayuyon.

Ang pag-uswag naghatag man sing makakulunyag nga mga hitabo, lakip na ang regular nga mga pagduaw sang manugtatap sang sirkito kag ang mga distrito nga kombension kada tuig.  Madamo pa nga literatura ang kinahanglan sa Icelandico nga lenguahe. Ang una nga Lalantawan nga magasin sa Icelandico amo ang Enero 1, 1960, nga gua. Nagpapagsik gid ini sa hilikuton. Makalilipay gid sa mga kauturan nga matanyag na nila ini nga publikasyon sa mga taga-Iceland sa ila tumandok nga lenguahe! Kag makapalig-on gid sing pagtuo para sa mga kauturan nga makabenepisyo gikan sa maayo nga espirituwal nga pagkaon kada bulan! Sang ginpahibalo sa isa ka sirkito nga asambleya sa Reykjavík nga Ang Lalantawan ibalhag sa Icelandico nga lenguahe, gindispley ang isa ka daku nga kopya sang magasin sa likuran sang humalambal. Nagpinalakpak ang mga kauturan tungod sining bag-o nga regalo gikan kay Jehova!

Nadumduman pa ni Utod Pedersen nga sang nag-abot sia sa Iceland sang Oktubre 1959, ang pulyeto nga “Ining Maayong Balita Sang Ginharian” amo lamang ang Icelandico nga publikasyon nga magamit sa pag-alagad sa latagon, kag madamo na nga tagbalay ang may kopya sini. Ginatanyag sang mga manugbantala Ang Lalantawan kag Magmata! sa Aleman, Danes, Ingles, ukon Sweko nga mga lenguahe sa mga tawo nga makabasa sing isa sa sining mga lenguahe. Bisan pa madamo ang makahangop sing isa sa sining mga lenguahe, mas mapuslanon sa ila kon mabasa nila Ang Lalantawan sa ila tumandok nga hambal. Ining publikasyon sa Icelandico may daku nga epekto sa pagbantala nga hilikuton. Ang 41 ka manugbantala kag payunir nakatigayon sing 809 ka suskripsion kag nakapahamtang sing 26,479 ka magasin sa sadtong tuig sang pag-alagad. May pag-uswag man sa kadamuon sang mga pagtuon sa Biblia.

 Ang isa pa ka talalupangdon nga hitabo amo ang pagtukod sing sanga talatapan sang Enero 1, 1962. Ang Iceland ginatatap anay sang sanga sa Estados Unidos kag antes sini sang sanga sa Denmark. Nian, sang 1969, legal nga ginkilala ang mga Saksi ni Jehova kag ginrehistro sa Ministry of Justice and Ecclesiastical Affairs. Ang mga Saksi sa Iceland karon may kinamatarong man subong sang tanan nga iban pa nga relihion kag awtorisado sa pagkasal kag sa pagdumala sang mga seremonya sa lubong.

Pagpamatok sang Klero

Sang bulan nga natukod ang sanga, naeksperiensiahan sang mga kauturan ang pagpamatok sang klero. Isa ka aga, ang ulong-dinalan sa isa ka panguna nga pamantalaan nagpahibalo nga ang obispo sang pungsudnon nga simbahan nagpagua sing isa ka pulyeto nga nagapaandam batok sa mga Saksi ni Jehova, nga nagalaygay sa mga tawo nga indi magpamati sa ila. Ang tig-ulo sang pulyeto amo ang Vottar Jehóva​​—advörun (Mga Saksi ni Jehova​—Isa ka Paandam). Ang iban nga pamantalaan nagbalhag man sing impormasyon tuhoy sa mga Saksi ni Jehova. Ginbalhag sang Vísir, ang nagapanguna nga panghapon nga pamantalaan, ang interbyu sa isa ka utod nga lalaki nga nagaalagad sa sanga talatapan. Ginpaathag sang artikulo ang aton mga pagtamod, kag wala magdugay ang iban nga mga pamantalaan nagbalhag man sing mga artikulo tuhoy sa mga Saksi ni Jehova. Sa sining paagi, isa ka daku nga panaksi ang nahatag, kag nahibal-an sang madamo nga tawo ang aton hilikuton. Ang iban nga mga bumalasa nagsulat bilang pagsuportar sa mga Saksi, kag ginbalhag ini sa mga pamantalaan. Nagbalos ang obispo, kag nagbalhag sing “sabat” sa amon. Apang, sa isa ka bug-os pahina nga artikulo sa nagapanguna nga pamantalaan, ang Morgunbladid, detalyado nga ginpaathag sang mga Saksi ni Jehova ang ila hilikuton kag mga pagpati.

Ang pulyeto nga may paandam ginpanagtag sa bug-os nga pungsod. Nagresulta ini sa daku nga publisidad para sa mga Saksi ni Jehova, kag ang epekto sini sa aton hilikuton naglawig sing madamo nga tinuig sa teritoryo. Bangod sining publisidad, ang isa ka  pamantalaan nagreport: “Ang obispo nangin manugdumala sang publisidad sang mga Saksi ni Jehova.” Nakilala ang katawhan ni Jehova, bisan sa nabaw-ing nga mga duog sang pungsod nga wala pa nabantalaan sang mga Saksi. Bisan pa ginsunod sang pila ka tawo ang laygay sang obispo, ang kinaandan nga reaksion sang kalabanan amo ang mahibaluan kon ngaa. Apang, sa aminhan nayon, sa Akureyri, may daku nga pagpamatok. Kon kaisa, ginabato sang mga pamatan-on sanday Heinrich kag Katherine Karcher, nga mga payunir didto. Tinuig sang ulihi, ginpanagtag liwat sang pila pa ka relihioso nga mga manugpamatok sa Akureyri ang pulyeto gikan sa obispo, nga gin-imprinta liwat sa sini nga duog. Ginhimo man ini sang mga Pentecostal sa Reykjavík, nga nagahunahuna nga mapauntat nila ukon mabalabagan ang amon pagbantala.

Ang Hangkat sa Pag-organisar Sing mga Kombension

Ang mga asambleya kag mga kombension makalilipay gid nga mga hitabo para sa katawhan sang Dios sa Iceland. Bisan diutay lang ang mga manugbantala, wala mangalag-ag ang mga kauturan sa pag-organisar sing mga asambleya. Ang una nga asambleya ginhiwat sang Hulyo 1951, sang ang duha ka utod nga lalaki​—si Percy Chapman halin sa Canada kag si Klaus Jensen halin sa Brooklyn​—nagduaw sa Iceland agod magtambong sa serye sang mga asambleya nga ginhiwat sa Europa sadto nga tingadlaw. Bisan pa diutay gid lang sadto ang mga manugbantala sa Iceland, 55 ang pinakadamo nga nagtambong sa asambleya. Ang masunod nga asambleya ginhiwat pagligad sang pito ka tuig, sang Hunyo 1958, sang nagduaw ang manugtatap sang sona, nga si Filip Hoffmann, kag 38 ang namati sa pamulongpulong publiko. Sugod sadto, tuigtuig na nga ginhiwat ang mga asambleya kag mga kombension.

Si Fridrik Gíslason isa sa pila ka kauturan nga may bahin sa mga programa sang kombension sang katuigan 1950. Sia nagsiling: “Nadumduman ko nga ako ang nagadumala sa Food Service Department sa una nga mga asambleya. Wala labot nga halos ako lang ang nagapangamot, kinaandan na nga may yara ako tatlo  ukon apat ka bahin sa programa kada adlaw. Samtang nagatrabaho sa kusina, nagasuksok ako sing epron. Kon nagadalidali sa pagkadto sa duog-tilipunan agod maghatag sing pamulongpulong, ginasuksok ko ang akon dyaket, bisan pa nga kon kaisa ginapahanumdom ako sang mga kauturan nga ubahon ko anay ang epron. Sa karon, mga 400 tubtob 500 na ang nagatambong sa mga asambleya, kag madamo nga gulang ang kalipikado sa paghatag sing mga bahin sa programa.”

Ang mga drama sa Biblia isa gid ka makakulunyag kag makatudlo nga bahin sang mga distrito nga kombension. Apang, bangod diutay lang ang mga manugbantala sa Iceland, ang drama ginpresentar sa narekord nga tingog lamang. Ginhimo sang sanga sa Denmark nga daw buhi ang drama paagi sa paggamit sing de-kolor nga mga slide nga nagasigo sa tingog. Apang, nagakinahanglan gihapon sing daku nga paghanda ang mga drama. Una, dapat ini badbaron sa Icelandico. Dayon dapat ini irekord nga nagagamit  sang mga tingog sang mga kauturan nga nagahambal sing tumandok nga lenguahe. Subong man, gindugang ang musika kag mga sound effect gikan sa mga narekord sa Ingles. Ang iban nagatungod sing madamo nga papel, nga nagabag-o sang ila tingog suno sa karakter nga ginapresentar. Sang ulihi, ang pila ka drama gin-akto nga may kostyum.

Ang nahauna nga ginpasundayag sa distrito nga kombension sang 1970 amo ang drama tuhoy kay Reyna Ester. Maukod nga ginhandaan sang mga kauturan ini nga proyekto kag makugi nga gin-ensayo ang drama. Isa ka bag-o nga eksperiensia nga magsuksok sing mga panapton kaangay sadtong ginasuksok sang panahon sang Biblia kag ang mga kauturan nga lalaki magbutang sing burangos. Wala ginpahibalo nga may ipasundayag nga drama sa kombension. Isa yadto ka makalilipay nga sorpresa. Sa gamay nga mga kombension, diin ang tanan halos nagakilalahay kag nagapungko malapit sa entablado, ginatinguhaan sang iban nga kilalahon kon sin-o ang nagatungod sang mga papel sang karakter. Pagkatapos sang drama, ang isa ka utod nga babayi nagsiling, “Hamak mo, isa lang ka utod ang nakilala ko sa drama, kag ang iya papel amo si Hari Nabocodonosor!” Ginsambit niya ang ngalan sang utod kag nakibot sia nga nagsayop gali sia. Ginpasalamatan gid sang mga kauturan ang paghimakas sang madamo agod mapresentar ang programa sa gamay nga mga kombension kag mga asambleya. Ang tanan nakabenepisyo sa maayo gid nga mga leksion sa drama nga ginpresentar sa ila lenguahe.

Ang Internasyonal nga mga Kombension Naghatag Sing Kalipay

Sa sulod sang mga tinuig, ang mga kauturan sa Iceland nalipay man sa pagtambong sa mga kombension sa iban nga mga pungsod. Lima ka delegado gikan sa Iceland ang may pribilehiyo nga magtambong sa Kabubut-on Sang Dios nga Internasyonal nga Asambleya sa New York sang 1958. Madamo ang nagtambong sa Nahiusa nga mga Sumilimba nga mga Asambleya sa Europa sang 1961 kag sa “Walay Katapusan nga Maayong Balita” nga  mga Asambleya sang 1963. Ang iban nalipay sa pagpakig-upod sa mga kauturan gikan sa madamo nga pungsod sa “Kadalag-an Sang Dios” nga Internasyonal nga mga Asambleya sang 1973. Kapin sa isa ka gatos ka manugbantala gikan sa Iceland ang nagtambong sa “Paghidait sa Duta” nga Internasyonal nga Asambleya sa Copenhagen, Denmark, sang Agosto 5-10, 1969. Amo ini ang pinakadaku nga grupo gikan sa Iceland nga nagtambong sa internasyonal nga kombension sa iban nga pungsod. Sadto nga tingadlaw, 80 porsiento sang mga manugbantala sa Iceland ang nagkadto sa iban nga pungsod agod magtambong sa kombension.

Bangod tuman kadamo gikan sa Iceland ang nagplano sa pagtambong sa kombension sang 1969, ginpatigayon sang sanga sa Denmark nga magtinuparay sing pulungkuan ang taga-Iceland nga mga kauturan didto. Kada aga, antes magsugod ang sesyon, nagatipon sila sa ila seksion diin mapamatian nila ang mga sumaryo sang programa sa ila kaugalingon nga lenguahe.

Lakip sa mga nagtambong sa sini nga kombension amo ang pamatan-on nga si Bjarni Jónsson. Anak sia sang isa ka abogado nga tag-iya sang bilding sa Reykjavík nga ginaarkilahan sang mga kauturan subong puluy-an sang mga misyonero kag sanga talatapan. Halos wala sing nahibaluan si Bjarni tuhoy sa kamatuoran, kag wala sia sing tuyo nga magtambong sa kombension sang magbiyahe sia upod sa mga kauturan pakadto sa Copenhagen. Paano ini natabo?

May pila ka butang nga dapat ihambal si Kjell Geelnard, nga amo sadto ang alagad sa sanga, sa amay ni Bjarni. Ginsugiran sia ni Kjell tuhoy sa internasyonal nga asambleya sa Copenhagen kag tuhoy sa grupo sang mga kauturan nga nagaplano sa pagtambong. Sang mabatian ini sang abogado, namangkot sia kon puede nga makaupod ang iya anak sa grupo. Ginsugiran niya si Utod Geelnard nga ang iya anak bag-o lang naggradwar sa hayskul, kag gusto niya regaluhan ang iya anak sing bakasyon sa iban nga pungsod, gani daw maayo kon sa Copenhagen ini. Nahunahuna ni Kjell nga maayo ini kag ginsilingan niya ang abogado nga kon luyag ni  Bjarni magtambong sa asambleya agod makita kon ano ini, mahimo sia patigayunan sing dalayunan sa Copenhagen. Naluyagan ini sang abogado kag ginpamangkot niya ang iya anak kon luyag niya mag-upod sa grupo sang mga Saksi ni Jehova nga magatambong sa asambleya. Nagpasugot gilayon ang iya anak.

Ginkontak ang Rooming Department agod pangitaan sing dalayunan si Bjarni sa Copenhagen. Nakakita ang mga kauturan sing dalayunan niya sa isa ka pamilya nga mga Saksi. Ginkanselar sang isa ka Amerikano nga delegado ang iya pagdayon sa isa ka hulot nga upod kuntani sang taga-Iceland nga utod nga si Jakob, gani si Bjarni ang nagbulos sa iya. Apang, bangod sa pila ka rason, wala makaabot si Jakob. Gani si Bjarni lang isa ang nagkadto sa dalayunan. Sanglit wala mapahibalo sang Rooming Department ang dayunan nga pamilya nga si Bjarni ang magabulos sa Amerikano nga utod, abi nila ang ila bisita amo si Jakob.

Masami na nga kon magkitaay ang mga kauturan gikan sa nagkalainlain nga duog, nagasugiray sila sing mga eksperiensia. Natingala ang Danes nga mga kauturan nga wala sing masugid si “Jakob.” Si Bjarni naman daw naligban sang ang mga tagbalay nagatawag sa iya nga Jakob. Abi niya sanglit ang Jakob isa ka ngalan  sa Biblia, mahimo nga kinabatasan sang mga Saksi ni Jehova nga maggamit sing mga ngalan sa Biblia kon nagaistoryahanay. Naathagan lamang ini sang masugilanon sang isa sa mga utod sa balay nga ginadayunan ni Bjarni ang isa ka Danes nga utod nga nagapayunir sa Iceland. Ginpamangkot niya ang utod kon bala bag-uhan si “Jakob” sa kamatuoran bangod wala sia sing mahambal tuhoy sa hilikuton sa Iceland. Ginpaathag sang Danes nga utod nga si “Jakob” amo si Bjarni, isa ka taga-Iceland nga estudyante nga nag-upod sa mga kauturan sa Copenhagen. Mainit nga gin-amuma sang mga tagbalay si Bjarni kag gin-agda sia nga magtener sing isa pa ka semana samtang nagapamasyar sia sa Denmark. Natandog si Bjarni sa sini nga kaayo.

Sa katunayan, nagtambong si Bjarni sa asambleya. Kag bisan pa wala sia sing nahibal-an sa kamatuoran agod makabenepisyo sing bug-os sa programa, nagdayaw gid sia sa iya nakita kag nabatian. Pagpauli niya sa Iceland, nagtuon sila sang iya pamilya sa Biblia. Nag-uswag si Bjarni sa kamatuoran kag nabawtismuhan sang 1971. Nagaalagad sia subong miembro sang Komite sang Sanga sa Iceland sugod sang 1979.

 Si Svanberg Jakobsson isa ka manugbadbad sa sanga sa Iceland sa sulod sang madamo nga tinuig kag sia karon ang manugtatap sa Translation Department. Sang lamharon pa sia nga manugbantala, nagtambong sia sa “Kadalag-an Sang Dios” nga Internasyonal nga Asambleya sa London, Inglaterra, sang 1973. Sia nagsiling: “Madumduman ko pa kon daw ano ka makalilipay nga makita ang linibo ka kauturan nga nagadugok pasulod sa istadyum sang kombension. Makawiwili tan-awon ang madamo nga kauturan gikan sa Aprika, ang tanan nagasuksok sing maduagon nga tradisyonal nga panapton. Indi ko gid malipatan ang eksperiensia nga makaupod ang linibolibo ka kauturan, nga nagapamati sa programa upod sa ila, nagaamba upod sa ila, nagabuylog sa ila sa pangamuyo, nagakaon upod sa ila, kag bisan mangin yara lamang sa tunga nila.”

Si Sólborg Sveinsdóttir, nga nabawtismuhan sang 1958, nagbarko sing anom ka adlaw pakadto sa Denmark upod sa apat niya ka kabataan agod magtambong sa kombension sa Copenhagen sang 1961. Si Sólborg miembro sang gamay nga naligwin nga grupo sa Keflavík. Ano ang epekto sa iya sang pagtambong niya sa isa ka daku nga internasyonal nga kombension? Nagsiling sia: “Makahalawhaw nga mabatian ang kapin sa 30,000 ka kauturan nga nahiusa sa pag-amba sing mga ambahanon sang Ginharian sa lima ka lenguahe​—natandog gid ako sa sini. Organisado gid ang tanan.”

Mahal ang pagbiyahe pakadto sa internasyonal nga mga kombension, apang para sa mga kauturan, takus gid ini sa kagastuhanan. Ang pagtambong sa sining makalilipay nga espirituwal nga kapiestahan nga ginhanda ni Jehova kag makaupod ang linibo ka masigkatumuluo isa ka pagpakamaayo.

Nagduaw ang Isa ka Espirituwal nga “Serbidor”

Madamo ang nagsaylo sa Iceland agod mag-alagad kon diin may daku pa nga kinahanglanon. Para sa ila tanan, ang pagsaylo nagakahulugan sing malawig kag mabudlay nga paghimakas nga matun-an ang masibod nga Icelandico nga lenguahe. Walay  sapayan sini, kon kaisa ang di-paghangpanay sa lenguahe mangin isa ka pagpakamaayo. Halimbawa, isa ka adlaw nagapamalaybalay si Heinrich Karcher, nga nagapakilala sang iya kaugalingon subong isa ka ministro, ukon alagad. Sa isa ka balay, isa ka lamharon nga babayi ang nagbukas sang ganhaan, kag sang nagpakilala si Heinrich, ginpadayon sia sang babayi. Nasal-an sia sang babayi bangod sa Icelandico nga lenguahe, pareho lang nga tinaga ang ginagamit para sa “alagad” kag “serbidor.” Abi sang babayi si Heinrich kaupod sang iya bana sa trabaho, nga isa ka serbidor sa lokal nga hotel. Nahibal-an sang babayi nga dugaydugay maabot na ang iya bana, gani ginpadayon na lang anay niya ining abi niya kaupod sa trabaho sang iya bana nga nagkari agod makigkita sa iya bana. Siempre, naham-ot gid sila sang maathagan ini nga butang.

Nag-abot ang bana, kag ginserbehan sang espirituwal nga “serbidor” ang lamharon nga mag-asawa sing isa ka manamit nga espirituwal nga pagkaon, nga naluyagan gid nila. Ginpangabay pa gani nila si Heinrich nga magbalik kag paupdon ang iya asawa. Wala magdugay nahiwat ang regular nga pagtuon sa Biblia, kag ang interesado nga mag-asawa nagsugod sa pagpanaksi sa iban. Bisan sa tion sang pagtrabaho sa hotel, ang lamharon nga serbidor nagapakighambal sa tanan nga luyag mamati. Sang ulihi, ginbawtismuhan ang mag-asawa. Nalipay sila nga ining espirituwal nga “serbidor” nagduaw sa ila kag wala magpangalag-ag sa pagpanaksi sa indi niya lenguahe.

Sa sulod sang mga tinuig, may makahalam-ot nga mga hitabo bangod sang indi pag-intiendihanay kon ang dumuluong nga mga kauturan nagatuon sing lenguahe. Halimbawa, wala magdugay sang nag-abot sia sa Iceland, naghanda si Sally Macdonald sang ihambal niya nga introduksion: “Ginaduaw ko ang mga tawo sa sini nga lugar agod isugid sa ila ang pila ka makawiwili nga mga butang gikan sa Biblia.” Apang nabaylo niya ang tinaga para sa duaw (heimsækja) sa tinaga para sa hingabot (ofsækja) kag nagayuhumyuhum nga nagsiling: “Ginahingabot ko ang mga tawo sa sini nga lugar.”

 Pagpamalaybalay Upod sa Luterano nga Ministro

Sa madamo nga tinuig, sanday Holger kag Tove Frederiksen gikan sa Denmark nag-alagad sing matutom subong mga espesyal payunir sa Iceland, kag sa pila ka tion nag-alagad sila sa sirkito. Bisan pa nabudlayan si Tove nga matun-an kag masunado ang Icelandico nga lenguahe, madamo sia sing nabuligan nga makasulod sa kamatuoran bangod sang iya kakugi kag kapagsik.

Isa ka bes samtang nagaalagad sa sirkito, si Holger kag ang isa ka pamatan-on nagpamalaybalay sa gamay nga minuro. Nakibot sila sang nag-upod sa ila ang isa ka Luterano nga ministro sa sini nga duog. Ngaa?

Antes sini, ginduaw nila ining ministro sa iya puluy-an. Mainabyanon sia kag ginpadayon sila sa iya opisina. Sang nakita sang ministro ang mga libro nga ila ginatanyag, nagsiling sia, “Ini nga mga libro nagaunod sing butig nga mga panudlo!” Dayon hinali sia nga nagtindog, ginbayaw ang duha niya ka kamot, kag ginpahayag ang pagpakamalaut sang Dios sa ila. “Ginadumilian ko kamo sa pagbantala diri sa akon parokya!” singgit niya. Ginsilingan ni Holger ang ministro nga wala sia sing kinamatarong nga punggan sila sa pagbantala kag padayunon nila ang ila pagbantala. Dayon nagsiling ang ministro, “Kon magpadayon kamo sa pagbantala sa mga tawo sa akon parokya, maupod ako sa inyo.” Ginsilingan sia ni Holger nga mahimo sia mag-upod kon luyag niya.

Sang gin-updan sila sang ministro sa duha ka pagduaw sa mga balay nga malapit sa iya puluy-an, nasugata nila si Tove kag ang isa pa ka utod nga babayi, nga nakibot sang makita ang ila kaupod sa pamalaybalay nga hilikuton. Gin-imbitar sang ministro ang tanan sa iya balay agod mangape. Maayo ang ila paghambalanay. Pamatyag ni Holger ang hinali kag wala ginapaabot nga pagkamaabiabihon sang ministro gintuyo agod upangan sila sa pagbantala sa tanan sa teritoryo. Gani pagkadason nga adlaw, nagbalik sila kag nagbantala sa bug-os nga minuro, nga nagpahamtang sing madamo nga literatura kag nasugilanon ang madamo nga tawo nga luyag magpamati.

 Ginbalabagan Sang Nagdalhay nga Niebe

Ang pagbantala sa mga tawo nga nagapuyo sa kaumhan masami nga nagalakip sang pagmaneho sa yelohon kag natabunan sing niebe nga mga dalan sa inutlan sang mga bukid sa panahon sang madulomdulom nga mga binulan sang tigtulugnaw. Sang Disiembre 1974, samtang nagaalagad sa sirkito, ginduaw nanday Kjell kag Iiris Geelnard ang Akureyri, sa naaminhan nga baybayon. Sang semana nga didto sila sa kongregasyon, naglakbay sila sing kapin sa 80 ka kilometro padulong sa banwa sang Húsavík. Ginpaupod nila sanday Holger kag Tove Frederiksen. Nagbantala sila nga apat sa Húsavík kag sa mga duog malapit sa sini sing pila ka adlaw kag sa hingapusan sang pagduaw, naghiwat sila sing pamulongpulong publiko nga may ginpasalida nga slide sa isa ka eskwelahan. Pagsugod sang miting, nag-abot ang isa ka bagyo nga may matugnaw katama nga hangin, kag may dala nga niebe kag yelo. Pagkatapos sang miting, samtang nagapanghimos ang mga nagtambong sa pagpauli, nadula ang koryente sa bug-os nga banwa tungod sa bagyo. Madulom nga nagbiya ang mga kauturan sa eskwelahan, apang nalipay ang tanan nga napasalida ang slide antes ini matabo.

Dapat magbiyahe pauli sa Akureyri ang mag-asawa Geelnard kag mag-asawa Frederiksen. Namangkot sila sa mga pulis sa sini nga lugar kag sa pila ka drayber sang bus kag trak tuhoy sa kahimtangan sang dalan kag ginpasalig sila nga sang temprano pa wala man gid sing daku nga problema. Gani namat-od sila nga maglakat gilayon, apang nadugayan sila sa pagpamutos sang ila mga gamit bangod kandila lang ang ila suga. Kag sang nagpagasolina sila sang salakyan, de-mano nga ginbomba sang manugbantay ang gasolina. Sang ulihi, handa na sila sa pagbiyahe sang mga alas nuebe sang gab-i.

Nagalaragway sang biyahe, si Kjell nagsiling: “Sang primero wala man gid sing problema, apang labi nga nagdamol ang niebe. Kon kaisa mabudlay makita ang dalan amo nga nagapanaug si Holger sa salakyan agod giyahan kami paagi sa flashlight. Dayon,  nagguot ang salakyan sa niebe. Pila ka beses nga nalampuwasan namon ang pagguot paagi sa pagtulod kag pagkaykay, apang sang ulihi ginbalabagan kami sang isa ka daku nga bungyod sang niebe. Nahisayran namon sang ulihi nga nagdalhay ini nga niebe gikan sa ibabaw sang bukid. Kinaandan na nga duha ka oras lamang ang biyahe halin sa Húsavík pakadto sa Akureyri, apang sa sining tion anom ka oras na kami nga nagabiyahe kag yara pa lang kami sa tungatunga.

“Amo sini ang amon kahimtangan sang alas tres sang kaagahon​—basa, lapyo, kag ginatugnawan. Handurawa lamang ang amon kalipay sang nakita namon nga may mga suga sa malapit nga uma. Nangisog kami nga magkadto didto kag managbalay. Nanuktok si Holger, isa ka matinahuron kag mapatugsilingon nga tawo, sa mayor nga puertahan. Sang wala sing nagsabat, ginbuksan niya ini, nagsaka sa ibabaw, kag nanuktok sing mahinay sa puertahan sang kuarto. Bisan pa nakibot, kalmado nga  gin-atubang kami sang mangunguma kag sang iya asawa. Ginpaathag nila nga nagtulog na lang sila sang madula ang koryente kag nalipatan nila nga patyon ang mga suga!

“Naeksperiensiahan namon karon ang makalilipay nga halimbawa sang pagkamaabiabihon sang mga taga-Iceland. Ginsaylo sang mag-asawa ang nagakatulog nila nga mga anak sa isa ka kuarto agod makatulog kami nga apat sa duha ka kuarto, kag dugaydugay, may mainit na nga kape kag manamit nga tinapay sa lamesa sa kusina. Pagkatapos sang pamahaw, namilit ang mangunguma nga manyaga kami anay antes maglakat. Pagkatapos makapanyaga upod sa pamilya, nagpadayon kami sa pagbiyahe pakadto sa Akureyri bangod sa sini nga tion nahawanan na sang duha ka daku nga snowplow ang karsada. Ang pagkamaabiabihon sang mag-asawa naghatag sa amon sing kahigayunan nga masugid sa ila ang kamatuoran sang Biblia.”

Pagbantala sa Sakayan sa Pagpangisda

Sang nagligad nga pila ka tuig, may nasugilanon si Kjell Geelnard nga isa ka pamatan-on nga lalaki sa ministeryo sa latagon. Sia amo si Fridrik. Sia ang subang nga anak sa pamilya kag mahunahunaon sia sa espirituwal kag mahuyugon maghinun-anon sa Biblia. Madamo sia sing pamangkot kag interesado gid sia nga magtuon sa Biblia. Apang, mabudlay nga masugilanon sia liwat bangod sia ang nagadumala sa makina sang isa ka sakayan sa pagpangisda. Pirme sia sa lawod kag pila lamang ka adlaw nga yara sia sa iya puluy-an sa ulot sang mga biyahe. Apang, paagi sa pag-usisa sa iskedyul sang sakayan sa pagpangisda kag sa pagpamangkot sa iloy ni Fridrik kon san-o sia mapauli, nasugilanon sia ni Kjell, kon kaisa sa pantalan kag kon kaisa sa iya puluy-an. Sa amo, nabuligan sia sang mga kauturan nga mag-uswag sa espirituwal.

Sang talipuspusan sang 1982, gin-agda si Fridrik sa isa ka asambleya sa Reykjavík. Sa sini nga tion ang iya pagtuo kay Jehova naglambo na, kag nangamuyo sia nga kuntani makahigayon sia sa pagtambong. Natabuan nga ang isa ka tripulante sa sakayan sa pagpangisda nga magbakasyon kuntani ang hinali namat-od  nga mag-obra. Naghatag ini sing kahigayunan kay Fridrik nga magbakasyon sa trabaho kag magtambong sa asambleya. Nagdayaw gid si Fridrik sa programa, nga kumbinsido na karon nga luyag niya mag-alagad kay Jehova.

Sang nagpauli si Fridrik sa iya banwa, ginsugiran niya ang iya nobya tuhoy sa iya desisyon kag sang epekto sini sa iya kabuhi. Ginsilingan niya ang iya nobya nga luyag niya nga pakaslan sia apang kon indi niya luyag magpakasal sa isa ka Saksi ni Jehova, dapat sila magbulagay. Pagkaaga, may nanuktok sa puluy-an sang mga misyonero. Si Fridrik kag ang iya nobya gali ini. Malip-ot apang malig-on ang ginsiling ni Fridrik: “Luyag ni Helga magtuon sa Biblia!” Gani naghimo sing kahimusan ang mga misyonero nga magtuon sing Biblia upod kay Helga. Sang kahapunanon sadto man nga adlaw, ang isa sa mga manghod nga lalaki ni Fridrik nangabay man nga magtuon sa Biblia. Sa amo man nga semana, ginpaupod ni Fridrik ang ila agot nga babayi sa miting kag nagsiling: “Luyag ni Unnur magtuon sa Biblia!”

Luyag ni Fridrik simbuluhan ang iya dedikasyon kay Jehova paagi sa pagpabawtismo sa tubig. Apang, dapat niya anay pauswagon ang iya ihibalo kag dayon repasuhon ang mga pamangkot para sa bawtismo. Ang problema amo nga yara sia pirme sa lawod. Kon indi maduaw ni Kjell si Fridrik sa iya balay, mahimo sia duawon sa iya ginaobrahan. Ang solusyon? Ginpatrabaho ni Fridrik si Kjell upod sa iya sa hulot sang makina sa sakayan sa pagpangisda. Sang temprano sang 1983, dala ang Biblia kag tulun-an nga libro, nagsakay si Kjell sa sakayan sa pagpangisda nga Svalbakur.

“Ang trabaho kag pagbantala sakay sa Svalbakur indi gid malipatan nga eksperiensia,” hinumdom ni Kjell. “Ang trabaho nagasugod sa alas 6:30 sa aga kag matapos sa alas 6:30 sa hapon. Sa udto, nagapanyaga kami, kag may tion sa pagpangape sa aga kag sa hapon. Pagkatapos sang mga oras sang trabaho nagatuon kami ni Fridrik, kag madamo sing kahigayunan nga makapanaksi sa iban pa nga mga tripulante. Ang mga gab-i ginahinguyang sa  pagtuon kag paghinun-anon sa espirituwal nga mga topiko. Kon kaisa pasado na sa tungang-gab-i kami nagatulog. Kon tigpalanyaga, wala kami nagapadugay sa hulot-kalan-an agod mabinagbinag namon ang adlaw-adlaw nga teksto sa kamarote ni Fridrik.”

Siempre, nakuha ang atension sang mga tinawo sa sakayan bangod ang isa ka misyonero isa na karon sa mga tripulante. Sa una nga mga inadlaw, ang mga tinawo natahap kay Kjell, bangod indi nila mahibaluan kon ano ang himuon ni Kjell. Apang, ang pila ka tripulante namati sing maayo sa ginasiling ni Kjell. Ang isa sa ila  nagpakita sing daku nga interes, kag sang mahibal-an niya ang tuhoy sa pagbinagbinag sa adlaw-adlaw nga teksto kon udto, luyag niya magbuylog. Isa ka adlaw sang naglawig ang pag-inistoryahanay sa hulot kalan-an, tinak-an sia kag nagsiling kanday Kjell kag Fridrik sa atubang sang tanan: “Indi bala nga dapat magsaka na kita kag magbasa sang adlaw-adlaw nga teksto?”

Isa ka gab-i, gin-agda nanday Kjell kag Fridrik ang mga tripulante sa kamarote ni Fridrik agod hinun-anunan ang artikulo sa Magmata! nga magasin tuhoy sa alkoholismo. Pito sa mga tripulante ang nagkadto sa sining indi malimtan nga paghinun-anon, kag nabalitaan man sang mga tripulante sa iban nga mga sakayan sa pagpangisda ini nga paghinun-anon.

“Pagkatapos sang halos duha ka semana nga pagbantala kag pagtrabaho sa Svalbakur, nagdungka kami liwat,” siling ni Kjell. “Sa sining tion natapos ko na nga marepaso kay Fridrik ang mga pamangkot para sa bawtismo, wala labot sang pag-usisa namon sa madamo pa nga iban nga topiko sa Biblia, pagpanaksi sa iban nga mga tripulante, kag pagpahamtang sing mga magasin kag literatura sa ila.” Nabawtismuhan si Fridrik sang tigpamulak sang 1983. Ang nobya ni Fridrik nga si Helga, ang iloy ni Fridrik, kag ang iya manghod nga babayi nanindugan man sa kamatuoran.

Mga Pagtuon Paagi sa Telepono

Isa gid ka hangkat ang pagbantala sing maayong balita sa mga tawo nga nagapuyo sa naligwin nga mga duog sa sining daku nga isla. Ang telepono madugay na nga epektibo sa paglab-ot kag pagkontak sa interesado nga mga tawo.

Madamo ang nakabenepisyo sa sining paagi sang pagbantala sing maayong balita. Sang nagligad nga pila ka tuig, ginduaw ni Oddný Helgadóttir ang iya anak nga lalaki kag umagad, nga nagatuon upod sa mga Saksi ni Jehova. Sang ginsugid nila sa iya ang ila natun-an, luyag man niya magtuon sa Biblia. Apang, si Oddný nagapuyo sa naligwin nga duog sa naaminhan-katundan nga baybayon sang Iceland, kapin sa 300 ka kilometro gikan sa pinakamalapit nga kongregasyon. Sang ang utod nga si Gudrún  Ólafsdóttir nagtanyag nga magtuon upod sa iya paagi sa telepono, malipayon sia nga nagpasugot. Pagkatapos sang nagabukas nga pangamuyo, ginasabat gilayon ni Oddný ang mga pamangkot nga yara sa libro. Sa iya maid-id nga paghanda sa pagtuon, ginasulat ni Oddný ang mga ginasambit nga teksto agod mabasa niya ini gilayon kon ini ginapatuhuyan. Sa amo, indi na niya kinahanglan nga pangitaon ang mga teksto sa tion sang pagtuon. Isa ka bes, nagtuon sila sa balay ni Gudrún sang nagduaw si Oddný sa ila duog. Daw nasaw-ahan sila nga duha bangod amo ini ang una nga tion nga nagtuon sila nga nagaatubangay, gani naglahog si Gudrún nga makadto sia sa pihak nga kuarto diin may isa pa ka telepono!

Sang nahangpan na ni Oddný ang kamatuoran, ginpanaksihan niya ang iya bana nga si Jón. Sang nagpakita sing interes ang iya bana, indi sia sigurado kon bala nagakaigo nga dumalahan niya sing pagtuon ang iya bana. Natun-an niya nga mahimo niya dumalahan ang pagtuon apang dapat sia magtakdong sa ulo. Magluwas sa pagtuon upod sa iya bana, nagpanaksi man sia sa iya mga kaingod. Pagkatapos, ginpabutyag niya ang iya handum nga magpabawtismo. Ginpatigayon ni Gudrún nga marepaso sa iya sang isa ka gulang ang mga pamangkot sa libro nga Organisado sa Pagtuman Sang Aton Ministeryo paagi sa telepono, agod mahibaluan kon bala kalipikado sia. Maathag nga kalipikado sia magluwas sa isa ka butang: Wala pa sia makahalin sing pormal sa ila simbahan.

Pagligad sang mga isa ka semana, gintawgan ni Oddný si Gudrún agod sugiran sia nga naghalin na sia sa ila simbahan. Ang iya bana naghalin man. Isa ini ka mabudlay nga desisyon para sa iya bana, bangod sia ang tsirman sang konsilyo sang parokya sa ila lugar. Sang ulihi, nabawtismuhan si Oddný sa sirkito nga asambleya. Ang asambleya isa ka makalilipay nga eksperiensia para sa iya bangod kis-a pa lang sia makapakig-upod sa gamay nga grupo sang mga Saksi antes sini. Sa isa ka interbyu sa programa sang asambleya, ginpamangkot sia kon bala mabudlay nga  mangin malayo katama sa mga kauturan. Nagsabat sia nga wala sia magbatyag nga nagaisahanon, sanglit nahibaluan niya nga si Jehova yara man sa naaminhan-katundan nga baybayon sang Iceland. Dayon nagsiling sia nga ginakasubo niya nga indi makatambong ang iya bana sa asambleya, apang ginpasalig sia sang iya bana nga magatambong sia kon handa na sia magpabawtismo. Gintuman sang iya bana ang iya pangako! Wala magdugay nagsaylo sila sa mas madamo sing pumuluyo nga lugar agod makatambong sila sing regular sa mga miting.

Kinahanglan ang mga Puluy-an Sang mga Misyonero kag mga Kingdom Hall

Sang ginduaw ni Nathan H. Knorr gikan sa ulong-talatapan sang mga Saksi ni Jehova ang Iceland sang 1968, luyag niya nga mangita sing mas nagakaigo nga bilding para sa sanga talatapan  kag sa dalayunan sang mga misyonero. Antes sini, nanuhaytuhay nga mga balay ang ginaarkilahan. Nagsugod sa pagpangita ang mga kauturan sing lote nga mapatindugan sing isa ka bilding nga may Kingdom Hall, puluy-an sang mga misyonero, kag sanga talatapan. Samtang wala pa ini, gin-arkilahan ang isa ka balay sa Hrefnugata 5 sa Reykjavík, kag sang Oktubre 1, 1968, nagsaylo sa sini ang anom ka misyonero. Ini nga bilding nangin sentro sang hilikuton sa Iceland sang masunod nga lima ka tuig. Sang ulihi, nakabakal ang mga kauturan sing lote sa Sogavegur 71, Reykjavík. Sang tigpamulak sang 1972, ginsugdan ang pagpatindog sing bag-o nga bilding sang sanga. Nangin isa ini ka daku nga hangkat sa pila lamang ka kauturan didto, nga halos wala sing namang-an sa enhinyeriya kag konstruksion. Wala sing mga kontratista sa pagtukod ukon mga kantero sa ila, gani kinahanglan nga magkuha sing indi Saksi nga mga kontratista. Ini nga mga kontratista handa sa pagkooperar kag gintugutan nila ang mga kauturan nga mangabudlay upod sa ila sa proyekto. Gin-arkilahan sang mga kauturan ang bahin sang isa ka daan nga balay sa tupad sang ginapatindugan nga duog agod makan-an nila. Nagabuslanay ang mga kauturan nga babayi sa pagluto sing pagkaon sa ila mga puluy-an kag ginadul-ong ini sa ginapatindugan nga duog agod pakaunon ang mga kauturan nga nagaobra.

Ang pagpatindog nangin isa ka maayo nga panaksi sa amo nga duog. Ang mga kontratista kag mga awtoridad sang siudad may maayo nga kahigayunan nga makilala ang mga Saksi ni Jehova. Ang iban nagahapit sa ginapatindugan nga duog agod tan-awon ini. Sang palitadahan na ang nasulod nga bahin, nag-abot agod magbulig ang isa ka utod nga lalaki halin sa Denmark nga isa ka propesyonal nga kantero. Daku man ang nabulig sang mga kauturan nga babayi. Sang ang pila ka superbisor sang siudad nagduaw sa ginapatindugan nga duog, natalupangdan nila nga ang mga kauturan nga babayi nagagamit sang de-makina nga pangmasa sang semento. Ang isa sa mga superbisor nagsiling: “Sa banta ko ang mga kababayin-an sa amon simbahan  makatuon gikan sa sini. Pat-od gid nga mangin mas madinalag-on ang pagpatindog sing mga simbahan paagi sa pag-obra sangsa paglibot nga may dala nga kahon, nga nagapangolekta sing kuarta.” Ang bilding gindedikar sang Mayo 1975, sang ginduaw ni Milton G. Henschel ang Iceland kag ginhatag ang pamulongpulong sa dedikasyon. Ang bilding nangin mayor nga puluy-an anay  sang mga misyonero sa pungsod kag Kingdom Hall man sang mga kongregasyon sa Reykjavík sa madamo nga tinuig. Sanga talatapan na ini karon.

Sang 1987 ginpatindog ang bag-o nga Kingdom Hall kag puluy-an sang mga misyonero sa banwa sang Akureyri. Makita gid ang paghiusa kag internasyonal nga paghiliutod sa katawhan ni Jehova sang ang kapin sa 60 ka kauturan nga lalaki kag babayi gikan sa Finland kag Sweden nag-abot agod magbulig sa mga kauturan sa Iceland sa sini nga proyekto.

“Ang Pinakamanamit nga Kahoy”

Sa sulod sang mga tinuig, ang mga tiglawas sang Nagadumala nga Hubon sang mga Saksi ni Jehova nagduaw sa Iceland, kag ini nga mga pagduaw makapalig-on gid sa mga kauturan. Ang talalupangdon nga hitabo sang 1968 amo ang pagduaw ni Utod Knorr, nga ginsambit kaina. Naghatag sia sing makapulukaw nga pamulongpulong sa mga kauturan, nagsugid sing mga eksperiensia, kag ginbinagbinag ang pag-uswag sa hilikuton nga pagbantala sing Ginharian sa Iceland.

Una nga nagduaw si Utod Henschel sa Iceland sang Mayo 1970. Gin-abiabi sia sang ginatuyo nga mga misyonero. Ang rason amo nga wala labot nga kaagahon pa nag-abot si Utod Henschel, ang mga misyonero nagpulaw sa pagbantay sa bulkan nga Hekla bangod nagsugod ini sa paglupok sang nagligad nga adlaw!

Ginhatagan sing pinasahi nga igtalupangod ni Utod Henschel ang mga misyonero kag ang mga espesyal payunir. Gin-agda niya sila tanan sa isa ka pinasahi nga miting kag ginsugiran sila sang iya mismo mga eksperiensia sang nagapayunir pa sia sang panahon sang Great Depression. Ginsugid niya kon paano ginpabayluhan sang mga payunir ang mga literatura sing mga manok, itlog, mantikilya, utanon, antipara, kag totoy pa gani! Sa sining paagi, ang hilikuton nagpadayon sa mabudlay nga mga tion, kag wala ginkulang ang mga payunir sang ila panguna nga mga kinahanglanon.

 Mamutikan gilayon sang mga bisita sa Iceland nga tuhay ang pagkaon sa naandan nila. Isa sa espesyal nga pagkaon sang taga-Iceland amo ang svid, isa ka ulo sang karnero nga ginpihak kag ginlaga. Handurawa nga nagatulok ka sa imo pinggan kag makita mo ang katunga nga ulo sang karnero nga may mga unto kag isa ka mata! Madamo nga dumuluong ang halos indi makatulok sa mata sang karnero sa ila pinggan. Siempre, may yara man pirme lab-as nga isda. Ang isa ka espesyal nga pagkaon sang mga taga-Iceland amo ang hardfiskur: isda nga ginhiwahiwa sing manipis kag ginbulad. Ginakaon ini nga hilaw, kag mas manamit kon may mantikilya. Sa kinaandan ining isda matig-a kag dapat papaon agod maghumok. Gani, gin-angan-angan sang mga misyonero ang mangin reaksion ni Utod Henschel kon iserbe sa iya ining isda. Sang matilawan niya ini, ginpamangkot sia sang mga misyonero kon bala nagustuhan niya ini. Nagpamensar sia anay kag dayon nagsabat sing mataktikanhon: “Bueno, sa banta ko amo ini ang pinakamanamit nga kahoy nga nakaon ko.”

Madamo pa nga pagduaw sang mga tiglawas sang Nagadumala nga Hubon ang nangin makapalig-on kag indi gid malimtan. Ini nga mga pagduaw nagpatudok sa mga kauturan sa Iceland nga walay sapayan nga diutay lang sila kag yara sa naligwin nga duog, bahin sila sang internasyonal nga paghiliutod, nga nahiusa sa higot sang Cristianong gugma.

Pagpangabudlay Upod sa mga Doktor kag sa Media

Ang Hospital Liaison Committee (HLC) nga ginatapuan sang apat ka kauturan nga lalaki nagsugod sa pag-alagad sa Iceland sang 1992. Bilang paghanas, duha sa mga kauturan ang nagtambong sa seminar sang HLC sa Inglaterra, kag ang duha pa, sa isa ka seminar nga ginhiwat sa Denmark. Sang naorganisar na ang bag-o natukod nga HLC, ginhiwat ang isa ka sinapol upod sa talapuanan sang ospital sa isa ka daku nga unibersidad. Isa ka gatos kag katluan ka tawo ang nagtambong sa sinapol, nga naglakip sang mga doktor, mga nars, mga abogado, kag mga administrador sang ospital. Sanglit amo ini ang una nga sinapol nga  ginhiwat sang HLC upod sa mga propesyonal sa medisina, halangpunon nga ang mga kauturan medyo ginakulbaan. Apang, nagmadinalag-on ang sinapol, kag pagkatapos sini, naghimo sila sing kahimusan nga makigsapol sa diutay nga grupo sang mga doktor kag sang iban pa nga mga propesyonal sa nanuhaytuhay nga ospital. Nangin maayo man ang kaangtanan sang mga kauturan sa pila ka nagapanguna nga manugbusbos kag mga manug-anestisya. Ini nga mga pagpakigsapol nakabulig agod malikawan kag malubad ang mga problema may kaangtanan sa pagbulong nga wala nagagamit sing dugo.

Isa ka bag-o nga kasuguan sa mga kinamatarong sang pasyente ang ginpasar sang 1997. Ginapatuman sang kasuguan nga indi pagbulngon ang pasyente kon wala sing pahanugot niya kag kon mahibaluan ang luyag sang pasyente, dapat ini tahuron bisan wala sia sing pangalibutan. Nagasiling man ang kasuguan nga ang mga kabataan nga 12 anyos pataas dapat konsultahon pirme tuhoy sa pagbulong sa ila. Si Gudmundur H. Gudmundsson, tsirman sang HLC, nagreport: “Sa masami ang mga doktor nagakooperar gid, kag talagsa lang gid may problema. Bisan ang delikado nga pag-opera ginahimo nga wala sing dugo.”

Sang ginbalhag ang Enero 8, 2000, nga Magmata! tuhoy sa wala sing dugo nga pagbulong kag pag-opera, ginpalig-on sang sanga talatapan ang mga kauturan nga panikasugan sing pinasahi ang pagpanagtag sini nga gua sang magasin sa madamo tubtob posible. Naghatag sing mga panugda ang sanga kon paano itanyag ang magasin kag kon paano sabton ang mga pamangkot may kaangtanan sa problema sa dugo. Sang primero daw nagapangalag-ag ang iban sa pagtanyag sini nga magasin, apang nakita nila sang ulihi nga luyag sang mga tawo makahibalo tuhoy sini. Kapin sa 12,000 ka kopya ang napanagtag sa mga tawo. Katumbas ini sa 1 ka magasin sa kada 22 ka pumuluyo sang pungsod. Ang isa ka utod nga lalaki nagsiling, “Ang akon problema amo ang pagtuptop sa bug-os nga teritoryo bangod nagakadugayan ako sa akon mga nasugilanon.” Ang isa ka utod nga babayi nagsiling, “Duha  lamang ka tawo ang wala magbaton sing mga magasin halin sa akon!”

Isa ka babayi nga may semanal nga programa sa radyo sa bug-os nga pungsod ang nakabaton sing magasin tuhoy sa wala sing dugo nga pagbulong. Ginsaysay niya sa iya programa kon paano sia nakatigayon sing magasin, kag dayon ginrepaso niya ang maragtas sang mga pagtayon sing dugo subong ginpaathag sa Magmata! Ginhinakpan niya ang iya pagbinagbinag paagi sa pagsiling nga kon sin-o ang luyag makatigayon sing dugang nga impormasyon tuhoy sa wala sing dugo nga pagbulong makapangabay sia sing publikasyon tuhoy sa sini nga topiko sa mga Saksi.

Ang pinasahi nga kampanya sa sining gua sang Magmata! nakabulig sa madamo nga mahangpan ang pagkamakatarunganon sang aton panindugan sa dugo. Dugang pa, nahibal-an nila nga indi luyag sang mga Saksi ni Jehova nga mapatay. Sa baylo, nagatinguha sila nga mabulong sa pinakamaayo nga paagi nga posible. Subong resulta, ang iban nga may sayop nga ideya anay tuhoy sa aton panindugan sa dugo nangin mabinatunon na sa mensahe sang Ginharian.

Duha ka Kingdom Hall sa Sulod Sang Apat ka Adlaw

Para sa mga kauturan sa Iceland, ang isa ka talalupangdon nga hitabo sang 1995 nga tuig sang pag-alagad amo ang pagpatindog sing duha ka Kingdom Hall sa bulan sang Hunyo, ang isa sa Keflavík kag ang isa pa sa Selfoss. Ini ang una nga mga Kingdom Hall sa Iceland nga gintukod nga nagagamit sing madasig nga pagpatindog nga metodo sa konstruksion. Ginpatindog ining duha sa sulod sang apat lamang ka adlaw. Nahuman ini bangod sang mahigugmaon nga bulig sang mga kauturan halin sa Norway. Ginpadala sang sanga sa Norway ang kalabanan nga mga materyales sa pagpatindog, kag kapin sa 120 ka kauturan nga lalaki kag babayi ang nag-abot halin sa Norway agod magbulig sa proyekto. Ang labing kinaandan nga komento nga mabatian mo sa ginapatindugan nga duog amo: “Makahalawhaw gid ini.” Nabasahan kag nabalitaan sang mga kauturan sa Iceland ang tuhoy sa  madasig nga pagpatindog sa mga Kingdom Hall, apang karon nakita na nila ini mismo. Siempre, makahalawhaw gid ini, kay ang kadamuon sang Kingdom Hall sa Iceland nagdoble sa sulod sang pila lamang ka adlaw!

Magluwas nga nakapatindog sing duha ka bag-o nga Kingdom Hall, ang mga kauturan sa Iceland napalig-on man sa maayo nga pagpakig-upod sa mga kauturan halin sa Norway nga nagkari sa kaugalingon nila nga gasto kag nagbakasyon agod magpangabudlay sa mga Kingdom Hall. Isa gid ini ka pamatuod sang aton internasyonal nga paghiliutod! Ang mga kauturan sa Iceland nagbulig man sa sining mga proyekto sang pagpatindog. Kapin sa 150 ka manugbantala sa Iceland ang nakigbahin sa hilikuton, nga mga katunga sang kadamuon sang manugbantala sa bug-os nga pungsod.

Ining Kingdom Hall nga mga proyekto nangin isa man ka maayo nga panaksi sa publiko. Duha ka estasyon sa telebisyon sa bug-os nga pungsod ang nagbalita sini sa ila mga programa kag ginpakita ang mga retrato gikan sa duha ka duog nga ginapatindugan. Ginbalita man ang proyekto sa pila ka estasyon sang radyo kag sa mga pamantalaan. Wala maluyagi sang ministro sang simbahan sa Selfoss ang atension nga ginahatag sa mga Saksi. Sa isa ka lokal nga pamantalaan, nagbalhag sia sing isa ka artikulo nga nagapaandam batok sa ginakabig niya nga makatalagam kag butig nga mga panudlo sang mga Saksi ni Jehova. Ginsambit niya nga dapat mag-andam ilabi na ang mango kag ilintuon nga mga tawo. Sa isa ka interbyu sa radyo, ginsulit niya ini nga mga paandam. Apang, tuhay sa ginalauman niya, ang mga pinamulong sang ministro wala sing epekto. Sa baylo, nagdayaw gid ang kalabanan nga tawo kon paano napatindog ang mga Kingdom Hall, kag madamo sa mga nasugilanon sang mga kauturan ang nagsiling nga nakibot sila sa reaksion sang ministro.

Pagligad sang mga isa ka semana nga nabalhag ang paandam sang ministro, ang pamantalaan nag-imprinta sing isa ka karikatura. Sa atubang sang karikatura makita mo ang simbahan, kag sa  likod, ang Kingdom Hall. May suba sa ulot sang duha ka bilding, kag ang pila ka nagayuhum kag nakapanapot sing disente nga mga kauturan nagatabok sa taytay halin sa Kingdom Hall pakadto sa simbahan, nga may dala nga mga bag. Sa gua sang simbahan, ang isa ka babayi nagsalasala kag nakalukso gikan sa iya wheelchair. Ang isa ka lalaki nga ang isa ka tiil sementado, kag ang isa pa nga bulag, nagadalagan nga nagasinggitan: “Palagyo kamo, nagapadulong ang mga Saksi!” Sa hagdan sang simbahan nagatindog ang ministro nga natingala. Naluyagan sang madamo ini nga karikatura. Ginpili ini sang talapuanan sang editoryal sang pamantalaan subong ang pinakamatahom nga karikatura sang tuig, ginpadakuan ini, kag gindispley sa dingding sang ila opisina. Makita ini didto sa sulod sang pila ka tuig.

Nakapanaksi Sing Maayo ang Eksibit

Sang 2001 nga tuig sang pag-alagad, ginpresentar ang isa ka eksibit nga nagpatalupangod sa neutral nga panindugan sang mga  Saksi ni Jehova antes kag sa tion sang Bug-os Kalibutan nga Inaway II samtang ginbatas nila ang paghingabot sang mga Nazi. Ang eksibit ginhiwat sa tatlo ka lokasyon kag 3,896 ang kabug-usan nga nagtambong. Sa katapusan nga talipuspusan sang semana, ang lugar nga ginhiwatan sang eksibit sa Reykjavík napuno sing kapin sa 700 nga bisita. Ginpasalida ang video nga Jehovah’s Witnesses Stand Firm Against Nazi Assault sa Icelandico nga lenguahe sa eksibit sa tatlo ka lokasyon. Madamo nga bisita ang naglingkod kag nagtan-aw sang video.

Ang malig-on nga panindugan sang mga Saksi sa mga kampo konsentrasyon nagpadayaw sa mga bisita nga wala pa gid anay makahibalo sini nga bahin sang aton maragtas. Ang isa ka propesora nga nagbisita sing pila ka beses sa duog sang eksibit nagsiling nga nagdayaw gid sia sa eksibit kag nagbag-o ang iya panimuot sa mga Saksi ni Jehova. Natandog gid sia sa malig-on nga pagtuo sang mga Saksi sa mga kampo konsentrasyon. Tuhay ang kahimtangan sang mga Saksi sa iban nga mga bilanggo, kay nahilway sila kuntani paagi sa pagpanghiwala sang ila mga pagtuluuhan.

Ang eksibit ginbalita man sang isa ka estasyon sang telebisyon sa bug-os nga pungsod kag sang lokal nga mga estasyon sang telebisyon kag radyo. Pagbukas sang eksibit, nagtan-aw ang isa ka Luterano nga ministro upod sa iya asawa kag anak nga babayi. Sang ulihi, gin-agda sang utod nga lalaki ang ministro nga magduaw sa Bethel, kag ginbaton niya ini. Pila ka adlaw pagkatapos sang pagduaw, ginpalapitan sang isa ka babayi ang ministro agod mamangkot tuhoy sa isa ka teksto sa Biblia. Ginpalig-on sia sang ministro nga kontakon ang sanga talatapan sang mga Saksi ni Jehova, kay napat-od niya nga masabat nila ini. Sang ulihi, nagtuon sa Biblia ang ministro upod sa isa ka utod nga lalaki.

Pagbadbad sa Sulod Sang mga Tinuig

Masami nga isa gid ka hangkat sa pila lamang ka manugbantala sa Iceland ang pagbadbad sa Icelandico nga lenguahe sang tanan nga espirituwal nga pagkaon gikan sa “matutom kag mainandamon  nga ulipon.” (Mat. 24:45) Sa una nga mga tinuig, ang Icelandico nga mga Saksi nga nagapuyo sa Canada amo ang kalabanan nga nagabadbad. Sang ulihi ang pagbadbad ginhimo sa Iceland. Sang mag-abot ang una nga mga misyonero sang 1947, nakilala nila ang isa ka tigulang nga mamalaybay nga nagaistar sa balay nga ila man ginaistaran. Makahibalo sia mag-Ingles kag ginbuligan niya ang mga misyonero sa pagtuon sa lenguahe. Nagtanyag man sia nga magbadbad para sa mga kauturan, gani ginkuha sia sang mga kauturan nga magbadbad sing libro nga “Pakamatuura ang Dios” kag sing pulyeto nga The Joy of All the People. Apang, gingamit niya ang kinaraan nga estilo sang binalaybay nga may madamo nga kinaraan nga tinaga kag ekspresyon, kag bisan pa gin-usisa ini kag ginmakinilya liwat sang isa sa bag-o nga mga misyonero kag ni Utod Lindal, ang libro indi gid nagakaigo nga gamiton subong bulig sa pagtuon. Walay sapayan sini, madamo nga libro ang napanagtag sa una sini nga pag-imprinta, kag sa kabug-usan 14,568 ka kopya ang naimprinta. Kapin sa 20,000 ka kopya sang pulyeto ang naimprinta sang 1949. Sang ulihi nagkuha ang mga kauturan sing lain nga manugbadbad agod badbaron ang libro nga What Has Religion Done for Mankind?

Sadto nga mga tuig, isa ka gamay nga grupo sang mga kauturan ang nagbadbad sang pila ka pulyeto. Isa sini amo ang “Ining Maayong Balita Sang Ginharian,” nga ginpagua sang 1959. Ini nga pulyeto nakabulig sa mga kauturan sa pagsugod sing madamo nga bag-ong mga pagtuon sa Biblia. Pagkatapos sini gin-aprobahan ang pagbalhag sing Ang Lalantawan sa Icelandico nga lenguahe.

Madamo nga maayong mga libro ang ginbadbad kag ginpagua mga tinuig sang ulihi: “Ini Nagakahulugan Sang Kabuhi nga Walay Katapusan” nga ginpagua sang 1962; Gikan sa Paraiso nga Nadula Tubtub sa Paraiso nga Naangkon-uli, sang 1966; Ang Kamatuoran nga Nagadul-ong sa Kabuhi nga Dayon, sang 1970; Mahimu Ka Mabuhi Sing Dayon sa Paraiso sa Duta, sang 1984; kag Ang Ihibalo nga Nagadul-ong sa Kabuhi nga Walay  Katapusan, sang 1996. Sang 1982, gindugang sa listahan sang Icelandico nga mga publikasyon ang kada tatlo ka bulan nga edisyon sang Magmata!

Sa sulod sang madamo nga tinuig, ang mga kauturan wala sing libro sang mga ambahanon sa Icelandico nga lenguahe. Sang 1960, apat ka ambahanon ang ginbadbad kag gin-mimeograph agod gamiton sa asambleya. Dayon sa distrito nga kombension sang Nobiembre 1963, isa ka gamay nga libro sang mga ambahanon nga may 30 ka pinili nga ambahanon sa Icelandico ang ginpagua, kag nalipay gid ang mga kauturan.

Sadto, ang mga kauturan sa kongregasyon nagaamba sa salakot nga lenguahe. Sanday Günther kag Rut Haubitz nag-abot sa Iceland gikan sa Alemanya sang 1958 subong mga espesyal payunir. Madumduman pa ni Rut kon paano ang dumuluong nga mga kauturan nagagamit sang ila tumandok nga lenguahe nga libro sang mga ambahanon sa Aleman, Danes, Ingles, Norwego, Pilandes, ukon Sweko. Ang mga taga-Iceland nagabuylog sa lenguahe nga nahibaluan nila. Sia nagsiling, “Isa ini ka salakot nga koro!” Sa sulod sang mga tinuig, amat-amat nga ginbadbad ang dugang pa nga mga ambahanon sang Ginharian, kag sang 1999 natigayon gid man ang kompleto nga libro sang mga ambahanon nga may 225 ka ambahanon sa Icelandico nga lenguahe. Nagapasalamat gid ang mga kauturan sa sini nga aman sa pagdayaw kay Jehova!

Ang distrito nga kombension nga ginhiwat sang Agosto 1999 may bag-o nga ginpahibalo para sa Iceland. Ang libro nga Binagbinaga ang Tagna ni Daniel! sa Icelandico nga lenguahe ginpagua sing dungan sa Ingles nga edisyon. Sa kombension, sang ginpahibalo sang humalambal ang pagpagua sing libro sa Ingles, nagpinalakpak ang tanan nga tumalambong. Apang sa baylo nga isiling sa mga kauturan nga ini nga libro ipagua sa ulihi sa Icelandico nga lenguahe, nagpadayon sia paagi sa pagpakita sing Icelandico nga kopya sang libro, nga nagasiling​—nga nagpakunyag gid sing daku sa tanan​—nga ini nga libro nabadbad na sa Icelandico  nga lenguahe! Sugod sadto, ang libro nga Ang Tagna ni Isaias​—Kapawa Para sa Tanan nga Tawo I kag II ginpagua man nga dungan sa Ingles nga mga edisyon.

Pagpasangkad sa Bethel kag Dugang Pa nga Pag-uswag

Ang mga pasilidad sang sanga ginkay-o sang 1998. Duha ka apartment sa tabok-dalan ang ginbakal para sa mga Bethelite kag para sa mas maligwa nga opisina sang Translation Department. Sang nagligad lang nga tinuig, nakabenepisyo man ang mga manugbadbad gikan sa mga pagduaw sang mga kauturan halin sa ulong-talatapan sa New York. Gintudluan sila sining mga kauturan kon paano gamiton ang mga programa sa kompyuter nga ginhimo sang mga Saksi ni Jehova kag pinasahi nga gindesinyo para sa pagbadbad nga hilikuton.

Sining karon lang, ang mga tiglawas gikan sa ulong-talatapan nagtudlo sing Course in Improved English Comprehension  sa sanga. Ang kurso nagbulig sa mga manugbadbad nga mahangpan sing maayo ang Ingles nga artikulo antes nila badbaron.

Ang sanga talatapan nagsulat: “Sa paghinumdom sang nagligad nga mga tuig, nalipay kami nga nangisog ang iban nga magbadbad sa Icelandico nga lenguahe, bisan pa sa kinaraan nga mga kahimtangan kag limitado ang ihibalo sa lenguahe. Bisan pa ang kalidad sang ginbadbad sang una indi pareho sa karon, wala namon ‘ginatamay ang adlaw sang magagmay nga mga butang.’ (Zac. 4:10) Nalipay kami nga makita nga ang ngalan kag Ginharian ni Jehova napakilala man sa Iceland kag madamo nga tawo ang nakatuon sang kamatuoran.”

Sa karon, may walo ka bug-os tion nga boluntaryo sa sanga talatapan. Ang iban naman regular nga nagakadto sa Bethel agod magtrabaho sing temporaryo. May bag-o nga Kingdom  Hall nga ginpatindog para sa mga kongregasyon sa Reykjavík kabaylo sang Kingdom Hall sa sanga. Bangod sini, ginaplano na karon nga kay-uhon ang bilding sa sanga para makaigo ang mas madamo pa nga mga manugpangabudlay sa Bethel.

Ang pagbantala sing maayong balita sa Iceland nagakinahanglan sing determinasyon, sakripisyo, kag gugma. Sa pagkamatuod, masiling gid nga ang lakas nga pagpangabudlay sang makugi nga mga manugbantala sang Ginharian sa Iceland sa sulod sang nagligad nga 76 ka tuig indi sa walay pulos. Madamo nga matutom nga kauturan ang nakigbahin sa pag-ani nga hilikuton. Madamo man ang naggikan sa iban nga mga pungsod agod mag-alagad sing pila ka tuig sa Iceland, kag ang ila hinimuan indi gid malipatan. Ang iban nagpabilin kag nagpuyo na sing permanente sa Iceland. Dalayawon man ang determinasyon sang madamong makugi nga tumandok nga mga manugbantala sa Iceland.

Ang promedyo nga kadamuon sang mga manugbantala sang Ginharian diutay lamang, apang nakilal-an ang mga Saksi ni Jehova sa bug-os nga pungsod. Pito ka misyonero karon ang nagaalagad sa mga kaumhan kag sa gamay nga mga kongregasyon sa isla. Sang nagligad nga tuig sang pag-alagad, 543 ang nagtambong sa Memoryal sang kamatayon ni Cristo, kag halos 180 ang mga pagtuon sa Biblia.

Ayhan sa pila ka adlaw ang mga kauturan sa Iceland magadamo kaangay sang ginalaragway sa Isaias 60:22: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.” Samtang wala pa ini, ang mga Saksi ni Jehova sa Iceland determinado nga himuon ang hilikuton nga gintugyan sa ila sang Hari, si Jesucristo​—ang pagbantala sing maayong balita sang Ginharian. Nagasalig sila nga patubuon sang Dios ang mga binhi sang kamatuoran sa mabinatunon kag mapinasalamaton nga mga tagipusuon!​—Mat. 24:14; 1 Cor. 3:​6, 7; 2 Tim. 4:5.

[Kahon sa pahina 205]

Kon Diin ang Ngalan Nangin Apelyido

Suno sa lokal nga tradisyon, ang mga taga-Iceland wala sing apelyido: Ang mga tawo nagatawganay sa ila ngalan. Ang apelyido sang isa ka bata ginasunod sa ngalan sang amay kag ginasugpunan sing -son kon lalaki kag sing -dóttir kon babayi. Halimbawa, ang anak nga lalaki kag anak nga babayi ni Haraldur may apelyido nga Haraldsson kag Haraldsdóttir. Ang ngalan sang babayi wala nagabag-o kon mamana sia. Bangod madamo nga tawo ang palareho sing ngalan, ang mga libro sang telepono nagalista indi lamang sang ngalan, direksion, kag numero sang telepono sang isa ka tawo kundi sang iya man palangitan-an. Paagi sa mga rekord sang kaliwatan, masumay sang mga taga-Iceland ang ila katigulangan sa nagligad nga kapin sa isa ka libo ka tuig.

 [Kahon sa pahina 208]

Laragway Sang Iceland

Ang pungsod: Ining isla nga pungsod nahamtang sa ubos lang sang Arctic Circle sa ulot sang North Atlantic Ocean, Greenland Sea, kag sang Norwegian Sea. Madamo ini sing bulkan, mainit nga tuburan, kag nagaalisngaw kag nagapiswit paibabaw nga tuburan. Ang ikanapulo nga bahin sang pungsod ginatabunan sang dalagku nga mga yelo.

Ang mga tawo: Mga kaliwat sang mga Viking nga kalabanan naghalin sa Norway, ang mga taga-Iceland mapisan, mapahituon kag matinuguton. Ang kalabanan nga tawo nagapuyo malapit sa baybayon.

Ang lenguahe: Bisan pa Icelandico ang opisyal nga lenguahe, madamo nga taga-Iceland ang nagahambal man sing duha ukon kapin pa nga dumuluong nga lenguahe, nga sa masami Ingles, Aleman, ukon Scandinavian nga hambal.

Ang palangabuhian: Ang pagpangisda importante gid sa ekonomiya sang Iceland. Ang mga sakayan sa pagpangisda nagadakop sing capelin, bakulaw, haddock, kag herring, nga ang kalabanan sini ginaproseso kag ginaeksport.

Ang pagkaon: Kinaandan ang isda kag karne sang karnero. Ang espesyal nga pagkaon sang mga taga-Iceland amo ang linaga nga ulo sang karnero.

Ang klima: Bangod ginapainit sang sulog sang Dagat Atlantiko, ang klima iguigo lang. Ang mga tigtulugnaw kasarangan apang mabaskog ang hangin. Ang tingadlaw mabugnaw.

[Kahon/Retrato sa pahina 210]

Septiembre 6, 1942: “Isa lang gihapon ka payunir ang nagabantala sa sining pungsod, gani wala man gid sing madamo nga mareport. Ang populasyon sang Iceland mga 120,000, kag may mga 6,000 ka komunidad sa kaumhan. Makadtuan lamang ini nga kaumhan paagi sa pagsakay kag pagkarga sing mga gamit sa gamay nga mga kabayo. Agod maduaw ining tanan nga puluy-an, kinahanglan maglakbay sing mga 16,000 ka kilometro, kag madamo nga kabukiran kag mga sapa sa bukid ang dapat tabukon. Halos wala sing interesado sa mensahe.”

Ining pinamulong ni Georg F. Lindal ginsulat sa tapos sia magpayunir sa Iceland sing 13 ka tuig. Lima pa ka tuig nga sia lamang ang manugbantala sa Iceland.

 [Kahon/Retrato sa pahina 213, 214]

Isa ka Rekord Sang Matutom nga Pag-alagad

Si Oliver Macdonald isa sa una nga mga misyonero nga ginpadala sa Iceland, nga naggradwar sa ika-11 nga klase sang Gilead. Nag-abot sia sang Disiembre 1948 kaupod si Ingvard Jensen. Nagsakay sila sa de-karga nga barko halin sa New York. Nagpanakayon sila sing 14 ka adlaw, kag mabalod ang North Atlantic Ocean. Gindagat sila nga duha sa pagpanakayon.

Sang Marso 1950, napangasawa ni Utod Macdonald si Sally Wild nga taga-Inglaterra, nga nagaalagad sa Bethel sa Britanya. Si Mac, nga amo ang iya hayo, kag si Sally mabungahon gid sadto nga mga tinuig, kag ang mga tawo nga gintun-an nila matutom gihapon nga nagaalagad kay Jehova.

Sang 1957, nagpauli sanday Mac kag Sally sa Inglaterra, diin napatay si Sally sa kanser nga nasayasat sa Iceland. Nagregular payunir liwat si Mac sang napatay si Sally kag nangin nagalakbay nga manugtatap sa sulod sang 13 ka tuig. Sang 1960, napangasawa niya ang espesyal payunir nga si Valerie Hargreaves. Nag-alagad sila sa nanuhaytuhay nga sirkito sa Britanya, halin sa naaminhan nga Scotland pakadto sa Channel Islands, tubtob sa nabagatnan nga baybayon sang Inglaterra. Sang nag-alagad sila sa ila sirkito paaminhan kag pakadto sa Shetlands tubtob sa naaminhan nga baybayon sang Scotland, si Mac nagsiling, “Ang masunod amo ang Iceland!” nga wala gid maglaum nga makakadto sila didto.

Apang, sang 1972, sanday Mac kag Valerie gintangdo subong mga misyonero kag ginpadala liwat sa Iceland. Nangin alagad sang sanga si Mac kag sang ulihi nangin manugpahituhog sang Komite sang Sanga. Nagtener sila ni Valerie sing pito ka tuig sa Iceland kag dayon ginpadala sila sa Ireland subong mga misyonero, primero sa Dublin kag sang ulihi sa Naaminhan nga Ireland. Sang nakaalagad sa Ireland sing 20 ka tuig, napatay si Mac sa kanser sang Disiembre 1999, nga nakahinguyang sing 60 ka tuig sa bug-os tion nga pag-alagad. Nagaregular payunir gihapon si Valerie sa Belfast, sa Naaminhan nga Ireland.

[Retrato]

Sanday Valerie kag Oliver Macdonald sa Reykjavík, katuigan 1970

[Kahon/Retrato sa pahina 218]

Reykjavík

Ang Reykjavík, nga nagakahulugan “Maaso nga Baybayon,” amo ang kapital sang Iceland kag ginhingadlan sang nahauna nga permanente nga pumuluyo, si Ingólfur Arnarson, bangod sang nagaalisngaw nga mainit nga mga tuburan sini. Ang Reykjavík isa na karon ka masako nga moderno nga siudad nga may populasyon nga mga 180,000.

 [Kahon/Retrato sa pahina 223, 224]

Nagpuyo Na Sila sa Iceland

Si Páll Heine Pedersen taga-Denmark. Ginpadala sia sa Iceland subong espesyal payunir sang 1959. Sang 1961 nagtambong sia sa duha ka “Nahiusa nga mga Sumilimba” nga Internasyonal nga Kombension sa Europa, diin nakilala niya si Violet. Taga-California, E.U.A., si Violet, kag nagtambong man sia sa pila sini nga kombension.

Pagkatapos sang kombension, nagbalik si Páll sa Iceland, kag nagpauli naman si Violet sa California. Nagsulatay sila sa sulod sang lima ka bulan, kag sang Enero 1962, nagkadto si Violet sa Iceland agod magpakasal kay Páll. Nagapayunir gihapon si Páll sadto, nga amo lamang ang Saksi sa diutay sing populasyon nga duog sa aminhan-nakatundan nga Iceland. Nagpuyo sila sa gamay nga banwa diin ang adlaw duha ka bulan nga wala nagasilak sa tungatunga sang tigtulugnaw. Agod masugilanon ang mga tawo sa teritoryo, dapat sila maglakbay sa kantilado kag masami yelohon nga mga dalan sa bukid, kag ang ginasakyan lamang nila amo ang isa ka motorsiklo nga dala ni Páll gikan sa Denmark. Sanglit natawo kag nagdaku si Violet sa mainit nga California, nagdumdom ang madamo nga kauturan nga indi sia makapadugay sa Iceland. Apang nagdugay sia didto, kag naluyagan na niya ang pungsod kag ang mga tawo.

Nagpayunir sanday Páll kag Violet tubtob natawo ang ila anak, si Elísabet, sang 1965. Padayon nga nagpayunir si Páll tubtob sang 1975, kag nagpayunir man si Violet sa tion kag tion sadto nga mga tinuig. Sang 1977 namat-od sila nga magsaylo sa California bangod sang panglawas ni Páll. Sang ulihi, handum gid nila mag-alagad diin mas daku ang kinahanglanon nga mga manugbantala sang Ginharian. Nagpayunir sila liwat, kag sang nakatapos na sa pag-eskwela ang ila anak kag hamtong na, ginpabalik sila sa Iceland subong mga misyonero. Nagmisyonero sila kag nag-alagad sa sirkito sing pila ka tuig. Sang 1989, gin-agda si Páll nga mag-alagad subong miembro sang Komite sang Sanga. Dayon, sang 1991, opisyal nga nabuksan ang Puluy-an Bethel sa Iceland, kag sanday Páll kag Violet amo ang una nga mga miembro sang pamilya Bethel. Padayon sila nga nagaalagad didto.

 [Kahon/Retrato sa pahina 228, 229]

Nakilala Tungod sa Ila Pagkamaabiabihon

Si Fridrik Gíslason kag ang iya asawa nga si Ada, amo ang duha sa pito nga nabawtismuhan sang 1956. Natun-an nanday Fridrik kag Ada ang kamatuoran gikan kanday Oliver kag Sally Macdonald. Sang primero, si Fridrik lamang ang nagatuon sa Biblia, samtang si Ada naman masako sa aktibidades sang iya grupo sang mga sastre sa bug-os nga tigtulugnaw. Sang nakatapos ang grupo sang mga sastre sang tigpamulak, nagalingkod sia sa kusina sa oras sang pagtuon. Sang ulihi, bangod sang interes niya sa paghinun-anon sa Biblia nangabay sia kon puede sia makabuylog nga indi lang magkomento. Apang, wala madugayi nakigbahin na sia.

Sang ulihi, ang Ingles nga Pagtinuon sa Ang Lalantawan regular nga ginhiwat sa ila puluy-an. Nagsugod sila sa pagtambong sa mga miting sa puluy-an sang mga misyonero. “Madumduman ko pa nga ginahiwat namon ang mga miting sa gamay nga hulot sa alibungan diin nagaistar ang mga misyonero,” siling ni Fridrik. “May lugar para sa 12 ka siya, apang kon kaisa, kon mas madamo sangsa kinaandan ang nagatambong, ginabuksan namon ang puertahan pakadto sa masunod nga gamay nga hulot. Tuhay gid ini karon​—tatlo ka kongregasyon karon ang nagapuno sa Kingdom Hall sa Reykjavík!”

Nakilal-an gid sanday Fridrik kag Ada tungod sang ila pagkamaabiabihon. Bisan pa may anom sila ka kabataan, pirme bukas ang ila puluy-an sa mga kauturan. Sa una nga tinuig nga natukod ang kongregasyon, madamo sang mga nagaabot sa Iceland gikan sa iban nga mga pungsod ang nalipay sa pagdayon kanday Fridrik kag Ada tubtob makakita sila sang ila kaugalingon nga ilistaran.

 [Kahon/Retrato sa pahina 232 ]

Ang Biblia sa Icelandico nga Lenguahe

Ang pinakadaan nga badbad sang Biblia sa Icelandico nga lenguahe nasapwan sa isa ka libro sang ika-14 nga siglo nga ginatawag Stjórn, nga may mga badbad kag mga binalikwat nga mga bahin sang Hebreong Kasulatan. Ang una nga kompleto nga “Bag-ong Testamento” sa Icelandico nga lenguahe gin-imprinta sang 1540. Ang nagbadbad amo si Oddur Gottskálksson, anak nga lalaki sang obispo sang Hólar. Ginbaton niya ang reporma nga pagtuo (Luterano nga Simbahan) sa Norway kag nakapakig-angot sia kay Martin Luther sa Alemanya. Suno sa maragtas, sang nagbalik si Oddur sa Iceland, nagbadbad sia sa toril sang baka, nga may daku nga kabudlayan, bangod indi niya luyag nga masaklaw ang iya Katoliko nga amo, ang obispo sang Skálholt. Ginbadbad ni Oddur ang libro halin sa Latin nga Vulgate, kag personal niya nga gindala ang iya manuskrito sa Denmark agod ipaimprinta. Sang 1584, ginpahanugutan ni Obispo Gudbrandur Thorláksson ang pag-imprinta sa una nga kompleto nga Biblia sa Icelandico nga lenguahe. Ang una nga kompleto nga badbad sang Biblia gikan sa orihinal nga Hebreo kag Griego gin-imprinta sang 1908, kag ang rebisado nga bersion gin-imprinta sang 1912.

[Retrato]

Ang “Gudbrandsbiblía,” ang una nga kompleto nga Biblia sa Icelandico nga lenguahe

 [Tsart/Graph sa pahina 216, 217]

ICELAND—IMPORTANTE NGA MGA HITABO

1929: Nag-abot si Georg F. Lindal, ang una nga manugbantala sa pungsod.

1940

1947: Nag-abot ang una nga mga misyonero sang Gilead.

1950: Natukod ang isa ka gamay nga kongregasyon.

1960

1960: Ginbalhag Ang Lalantawan sa Icelandico nga lenguahe.

1962: Natukod ang sanga talatapan sa Reykjavík.

 1975: Nahuman kag gindedikar ang bag-o kag ginpadakuan nga sanga talatapan.

1992: Natukod ang Hospital Liaison Committee.

1995: Duha ka Kingdom Hall ang ginpatindog sa sulod sang apat ka adlaw sang Hunyo.

2000

2004: 284 ka manugbantala ang aktibo sa Iceland.

[Graph]

(Tan-awa ang publikasyon)

Kadamuon Sang mga Manugbantala

Kadamuon Sang mga Payunir

300

200

100

1940 1960 1980 2000

 [Mapa sa pahina 209]

(For fully formatted text, tan-awa ang publikasyon)

ICELAND

Húsavik

Hólar

Akureyri

Seydhisfjördhur

Neskaupstadhur

Eskifjördhur

Stykkishólmur

Borgarnes

Höfn

REYKJAVÍK

Skálholt

Keflavík

Selfoss

 [Bug-os pahina nga retrato sa pahina 202]

[Retrato sa pahina 207]

Sa tuo: Georg F. Lindal, 1947

[Retrato sa pahina 207]

Sa ubos: Si Utod Lindal upod sa Icelandico nga kabayo, sang temprano nga bahin sang katuigan 1930

[Retrato sa pahina 212]

Ang pila sa una nga mga misyonero sa Iceland, halin sa wala pa tuo: Ingvard Jensen, Oliver Macdonald, kag Leo Larsen

[Retrato sa pahina 220]

Diri sini nga bilding ang sanga talatapan halin sang 1962 tubtob 1968

[Retrato sa pahina 227]

Kapin sa isa ka gatos nga manugbantala gikan sa Iceland ang nagtambong sa “Paghidait sa Duta” nga Internasyonal nga Asambleya sa Copenhagen, Denmark, 1969

[Retrato sa pahina 235]

Sanday Iiris kag Kjell Geelnard sa Akureyri, Enero 1993

[Retrato sa pahina 238]

Sa tuo: Ang sakayan sa pagpangisda nga “Svalbakur”

[Retrato sa pahina 238]

Sa ubos: Sanday Fridrik kag Kjell

[Retrato sa pahina 241]

Sa tuo: Si Oddný Helgadóttir

[Retrato sa pahina 241]

Sa ubos: Si Gudrún Ólafsdóttir

[Retrato sa pahina 243]

Sa tuo: Ang Kingdom Hall kag puluy-an sang mga misyonero sa Akureyri

[Retrato sa pahina 243]

Sa ubos: Si Bjarni Jónsson sa atubangan sang sanga

[Retrato sa pahina 249]

Sa ibabaw: Pagpatindog sing Kingdom Hall sa Selfoss, 1995

[Retrato sa pahina 249]

Sa tuo: Ang nahuman nga bilding

[Retrato sa pahina 253]

Ang pamilya Bethel sa Iceland

[Retrato sa pahina 254]

Komite sang Sanga, halin sa wala pa tuo: Bjarni Jónsson, Gudmundur H. Gudmundsson, Páll H. Pedersen, and Bergthór N. Bergthórsson