Sulat Halin sa Nagadumala nga Hubon

SAMTANG nagahilapit kita sa bag-ong sistema sang mga butang, dapat gid kita magpadayon sa paghulat kay Jehova. (Sof. 3:8) Nagsiling si manalagna Daniel nga ang “Dios [amo ang] Manugpahayag sang mga tinago, kag ginapahibalo niya . . . kon ano ang mahanabo sa ulihi nga bahin sang mga adlaw.” (Dan. 2:28) Isa gid ka pribilehiyo nga mabuhi sa hingapusan nga bahin sining gintagna nga tion kag mahangpan ang mga tinago nga ginapahibalo karon ni Jehova!

Paagi sa “matutom kag mainandamon nga ulipon,” amat-amat nga ginpahayag ni Jehova ang iya katuyuan nga tipunon ang “dakung kadam-an” sang mga sumilimba gikan sa lainlain nga kapungsuran sa tion sining magamo nga “katapusan nga mga adlaw.” (Mat. 24:45; Bug. 7:9; 2 Tim. 3:1) Ginlaragway sang Isaias 2:​2, 3 ining bug-os kalibutan nga hitabo “sa ulihi nga bahin sang mga adlaw.” Kada tuig, nagapadayon ini nga pagpanipon walay sapayan sang lapnag nga kagamo kag kasingki sa sini nga kalibutan.

Sang tuig 2004, ginpalig-on pa gid kita nga tumanon ang ginsiling ni Jesus: “Magpadayon kamo sa pagbantay . . . Pamatud-i man ninyo ang inyo kaugalingon nga handa.” (Mat. 24:​42, 44) Daku gid ang kahulugan sang nagakatabo karon sa kalibutan para sa mga Cristiano, nga nakahantop sang “mga tanda sang mga tion” kag nagapanghikot suno sa sini. (Mat. 16:1-3) Bilang katumanan sang iya Pulong, padayon nga magaunong si Jehova sa iya katawhan nga gin-organisar niya sa paghimo sang iya hilikuton walay sapayan sang maatubang nila nga pagpamatok.

 Bisan pa ginatinguhaan sang iban nga punggan ang pagbantala tuhoy sa Ginharian, padayon ang aton mga kauturan sa paghambal sing kamatuoran kag pagtipon sing tingob. (Binu. 5:​19, 20; Heb. 10:​24, 25) Sang Hunyo 2004 sa Rusya, ginsakdag sang korte sang apelasyon sa Moscow ang desisyon sang manubo nga hukmanan nga dumilian ang mga hilikuton sang mga Saksi ni Jehova kag isira ang ila legal nga korporasyon sa sini nga siudad. Apang, wala nahadlok ang mga kauturan; nahibaluan nila ang ginapatuman sang Dios sa ila, kag ginatuman nila sia subong Manuggahom sa baylo sang mga tawo. (Binu. 5:29) Nagasalig kita nga tuytuyan ni Jehova ang iya mga alagad walay sapayan sining nagapamatok nga desisyon sang korte.

Sang nagligad nga pila ka tuig sa Republika sang Georgia, ang mga kauturan nadulaan sing propiedad, ginsalakay sang masingki nga mga guban, kag ginsunog ang ila mga literatura sa ila mismo atubang. Apang wala nagmadinalag-on ang bisan ano nga hinganiban batok sa ila. (Isa. 54:17) Sang 2004 nga tuig sang pag-alagad, legal liwat nga ginkilala ang mga Saksi ni Jehova sa Georgia. Nahiwat ang mga kombension nga wala sing tublag, kag wala na gindumilian ang pagpasulod sing mga literatura sa pungsod. Bag-o nga mga kataason sa kadamuon sang mga manugbantala kag tumalambong sa Memoryal ang ginreport.

Sa Armenia, Eritrea, Republika sang Korea, Rwanda, kag Turkmenistan, ginbilanggo ang mga kauturan bangod sang ila pagtuo. Bisan pa sang pagpamintas, nahibaluan nila ang Makasulatanhon nga rason sang mga pagtilaw sa ila, nga nagbulig sa ila nga mahuptan ang integridad samtang nagasalig kay Jehova nga luwason sila.​—1 Ped. 1:6; 2 Ped. 2:9.

Samtang ginabasa ninyo ang Talalupangdon nga mga Hitabo Sang Nagligad nga Tuig kag ginausisa ang Bug-os Kalibutan nga report sang 2004, malipay kamo sa pagkaayo ni Jehova.  (Sal. 31:19; 65:11) Ginalauman namon nga mapalig-on kamo sining Tuigan nga Libro nga padayon nga magpadayon sa paglakat sa dalanon nga nagapahamuot sa Dios.​—1 Tes. 4:1.

Padayon nga ginapanikasugan nga mapaalinton sa tanan nga sahi sang tawo ang kamatuoran. Halimbawa, ginhanda ang mga video, DVD, kag iban pa nga galamiton sa sign language kag mga publikasyon sa Braille agod buligan sa espirituwal ang mga apa kag mga bulag. Madamong manugbantala sang Ginharian ang nagtuon sing mga lenguahe sang mga tawo nga nagsalaylo sa teritoryo sang ila kongregasyon.

Dugang pa, ginatos ka grupo sa mga naligwin nga mga duog ang gin-organisar sa mabudlay kadtuan nga mga teritoryo. Ang isa ka sanga nga may kapin sa 300 ka mga grupo nga may katapo nga 7,000 ka manugbantala. Daku gid ini nga potensial para mangin bag-o nga mga kongregasyon! Isa pa, sa 16,760,607 nga nagtambong sa Memoryal sini nga tuig sang pag-alagad, kapin sa 10 ka milyon ang indi pa mga Saksi. Ginapakita gid sini nga daku pa nga alanyon ang pagaanihon.

Nagapasalamat kita kay Jehova bangod sang iya bugana nga pagpakamaayo kag sang iya mahigugmaon nga pag-atipan sa aton sa adlaw-adlaw. (Hulu. 10:22; Mal. 3:10; 1 Ped. 5:7) Samtang nahiusa kita nga nagauswag sa sining “ulihi nga bahin sang mga adlaw,” nagasalig kita kay Jehova. Walay sapayan sang maatubang naton nga mga problema, ipatudok naton sa aton tagipusuon ang aton tuigan nga teksto sa 2005: “Ang bulig sa akon nagagikan kay Jehova.” (Sal. 121:2) Saligi ninyo palihug ang amon gugma kag mga pangamuyo para sa inyo.

Ang inyo mga kauturan,

Nagadumala nga Hubon sang mga Saksi ni Jehova