Talalupangdon nga mga Hitabo sang Nagligad nga Tuig

SAMTANG nagagamo ang kalibutan, labi nga nagatahom kag nagabugana ang espirituwal nga kahimtangan sang katawhan sang Dios. (Mal. 3:​12, 18) Ining dalayon nga pag-uswag nagapahanumdom sa aton sang ginsaad ni Jesus sa iya mga disipulo antes sia magkayab sa langit: “Yari karon! ako kaupod ninyo sa tanan nga adlaw tubtob sa katapusan sang sistema sang mga butang.”​—Mat. 28:20.

Ginapamatud-an sang mga nahimuan sang nagligad nga tuig nga gintuman ni Jesus ang iya makalulugpay nga saad. Una, binagbinagon naton ang espirituwal nga sinalusalo sang mga alagad ni Jehova sa “Maglakat Upod sa Dios” nga mga Distrito nga Kombension.

 “Maglakat Upod sa Dios” nga mga Kombension

Ginpatuhay ni manalagna Miqueas ang mga matarong sa mga di-matarong sang nagtagna sia: “Ang tanan nga katawhan, sa ila bahin, magalakat ang tagsa sa ngalan sang iya dios; apang kita, sa aton bahin, magalakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.” (Miq. 4:5) Subong sang ginpaathag sang humalambal sa keynote address, ginsumaryo sining pamulongpulong ang panimuot sang matutom nga mga tawo sang una, subong nanday Enoc kag Noe, nga naglakat upod sa Dios sa magarot nga mga tion. (Gen. 5:22-24; 6:​9, 22) Pribilehiyo gid naton nga sundon ang ila halimbawa!

Napalig-on bala sang distrito nga kombension ang imo pamat-od nga padayon nga ‘maglakat sa ngalan ni Jehova’? Ngaa indi pagrepasuha ang imo mga nota sa kombension? Magapahanumdom ini kag magabulig sa imo nga makabenepisyo sing daku sa programa.

Mga Publikasyon nga Ginpagua sa Kombension

Madamo bala sing lenguahe sa inyo teritoryo? Kon amo, mahimo nga nagamit mo na ang bag-o nga pulyeto nga Good News for People of All Nations. Ginhanda ini nga pulyeto sa tatlo ka edisyon, nga may 32, 64, kag 96 ka pahina, kag gindesinyo gid para sa kinahanglanon nga mga lenguahe sang kada pungsod. Gani pat-ura nga dala mo ining bag-o nga galamiton sa imo bag. Kag kon may masugilanon ka nga nagahambal sing lenguahe nga indi pamilyar sa imo, palihug sunda ang tatlo ka tikang nga ginbalay sa pahina 2 sini nga pulyeto. Mahimo ini makaluwas sing kabuhi!

Nahisanto sa tuigan nga teksto sang 2004​—“Magpadayon kamo sa pagbantay . . . Pamatud-i man ninyo ang inyo kaugalingon nga handa”​—ginpagua sang katapusan nga humalambal sang ikaduha nga adlaw sang kombension ang brosyur nga Magpadayon sa Pagbantay! (Mat. 24:​42, 44) Kabay nga ini nga publikasyon makabulig sa madamo pa nga mahantop ang pagkahilingagawon sang aton tion kag mapamalandungan sing serioso ang palaabuton kag ang talalupangdon nga mga hitabo nga mahanabo. Kag, subong  sang ginsiling sang humalambal, kabay nga makabulig man ini sa kada isa sa aton nga malandas ang madamo nga pag-ipit kag kabalaka sa kabuhi kag mahuptan ang aton espirituwal nga pagkabalanse kon nagaatubang sing mga pagtilaw.

Eskwelahan Para sa mga Nagalakbay nga Manugtatap

Sang nagligad nga anom ka tuig, kapin sa 600 ka manugtatap sang sirkito kag distrito halin sa Canada kag Estados Unidos, lakip sa Alaska kag Hawaii, ang nag-eskwela sa 13 ka klase sang Eskwelahan Para sa mga Nagalakbay nga Manugtatap nga ginhiwat sa Watchtower Educational Center sa Patterson, New York, E.U.A. Sang 2004 nga tuig sang pag-alagad, ginpasangkad ini nga eskwelahan sa 87 pa ka sanga. Sa 23 ka sanga, ang pila sini ka estudyante halin pa sa iban nga pungsod. Halimbawa, gin-agda sang Alemanya ang mga kauturan gikan sa Austria, Israel, Macedonia, Switzerland, kag Turkey. Gin-amuma naman sang Portugal ang mga estudyante gikan sa Luxembourg kag gikan sa mga isla sang Azores, Cape Verde, Madeira, kag São Tomé kag Príncipe. Gin-abiabi naman sang Kenya ang mga nagalakbay nga manugtatap gikan sa Ethiopia, Rwanda, Tanzania, Uganda, kag iban pa nga mga pungsod sa Aprika.

Ang kurso nagalakip sang tanan nga aspekto sang hilikuton sang mga manugtatap sang sirkito kag distrito. Tulumuron sini nga buligan ining mapisan nga mga kauturan nga mangin kapin pa ka epektibo sa pagtuman sang ila madamo nga responsabilidad, lakip ang pagtudlo sa mga kongregasyon kag sa mga asambleya kag ang pagpanguna sa pag-ebanghelyo. (2 Tim. 2:2; 4:5; 1 Ped. 5:​2, 3) Ginapalig-on man sila sang kurso nga pabakuron ang ila espirituwalidad kag gamiton ang mga kasulatan nga may paghantop kon nagabulig sa iban.

Bangod ginahiwat ang kalabanan nga mga klase sa mga sanga talatapan, matilawan sang mga nagalakbay nga manugtatap kag sang ila asawa ang kabuhi sa Bethel. Nagsulat ang isa ka klase: “Nakabenepisyo kami sa espirituwal bangod sang rutina sa Bethel. Nalipay gid kami sa programa sa morning worship, nga nagalakip sa pagbasa sang Biblia kag sa Tuigan nga Libro. Walay sapayan sang  madamo namon nga homework, nagtambong man kami sa Pagtinuon sa Ang Lalantawan sang pamilya Bethel kon Lunes sang gab-i kag napalig-on sang maayo nga pagpakig-upod.”

Kada adlaw, sa sulod sang isa ka oras sa tapos sang panyaga, nagabulosbulos ang pila ka kauturan sa pagtrabaho sa Service Department. Natun-an nila diri kon paano magkooperar sing labi pa sa sanga talatapan, kon paano iaplikar sing epektibo ang instruksion nga mabaton, kag kon paano maghimo sing mas sibu kag mas madali mahangpan nga mga report.

Kada Biernes, nagapamati sa isa ka pamulongpulong ang mga estudyante upod sang ila asawa. Nagalakip ini sa espirituwal nga pagpalig-on nga ginhanda ilabi na para sa sining matutom nga mga utod nga babayi. Halimbawa, makabenepisyo ang mga asawa sa mga pahanumdom nga padayon nga magpakita sing maayong halimbawa sa pagpasakop, kag makabaton sila sing instruksion nga sakdagon ang ila bana paagi sa pagpanghikot upod sa mga utod nga babayi sa mga kongregasyon. Ginpaanggid sang isa ka nagalakbay nga manugtatap ining mga pamulongpulong kada semana sa “manamit nga espirituwal nga pangyam-is.”

Siempre pa, ginapadaku gid sang eskwelahan ang Biblia​—ilabi na ang New World Translation of the Holy Scriptures​​—With References. Nagsiling ang isa ka estudyante sa Alemanya: “Plano ko nga gamiton ang Reference Bible sa akon personal nga pagtuon kag sa mga miting sa kongregasyon. Karon ko lang naapresyar sing bug-os ang kapuslanan sini.” Nabatyagan sang isa ka madugay na nga nagalakbay nga manugtatap sa Britanya nga nag-uswag ang iya espirituwalidad kag ang iya ikasarang sa pagtudlo bangod sang pagpatalupangod sa Pulong sang Dios. Nagsulat sia: “Natun-an ko nga bisan pa makabulig ang isa ka maayo nga ilustrasyon sa pamulongpulong, mas importante ang pagbasa kag pagpaathag sa mga kasulatan.”

Madamo nga estudyante ang nagsulat sang ila pag-apresyar sa eskwelahan. Nagsiling ang isa ka utod sa Estados Unidos: “Daku gid ang amon pagpasalamat kay Jehova kag sa iya organisasyon bangod sang pagpalig-on sa amon kag pagsangkap sa amon mga  asaynment. Kabay pa nga makaalagad kami nga may kapin nga kalig-on, kapin nga apresasyon sa mga dalanon ni Jehova, kag kapin nga gugma sa iya hamili nga mga karnero.” Nagsulat ang isa ka estudyante sa Pransia: “Ang kurso nagbulig sa akon nga mangin labi pa ka mahunahunaon kon paano pakig-angutan sing mahigugmaon ang aton mga kauturan kag himuon ang amon bug-os nga masarangan agod malipay sila sa pag-alagad kay Jehova.” Nagasumaryo sa ginabatyag sang madamo, nagsiling ang isa ka nagalakbay nga manugtatap sa Portugal: “Ang eskwelahan amo ang labing makapaladya nga naeksperiensiahan ko sa akon teokratiko nga hilikuton.”

Isa pa ka komento ang naghalin sa isa ka instruktor. “Isa ka pribilehiyo kag mabug-at nga responsabilidad,” siling niya, “ang pagtudlo sa mga utod nga lalaki nga, sa ulihi, magahatag naman sing panuytoy nga magaapektar sa kabuhi sang linibo naton ka kauturan. Nagasalig kami nga upod ang pagpakamaayo ni Jehova, magapadayon ang mga benepisyo sini nga eskwelahan.”​—Sant. 3:1.

Sang matapos ang 2004 nga tuig sang pag-alagad, kapin sa 1,700 ka nagalakbay nga manugtatap ang nakaeskwela sa sini nga eskwelahan, nga ginhiwat sa 14 ka lenguahe. Padayon nga hiwaton ini nga eskwelahan sa dalagku nga mga sanga sa 2005 nga tuig sang pag-alagad.

Mga Kaso sa Korte

Sang May 19, 2004, ginbalhag sang European Court of Human Rights (ECHR) sa Strasbourg, Pransia, ang desisyon sini sa kaso nga Lotter v. Bulgaria. Ginpasaka sang mag-asawa Lotter, nga mga misyonero anay sang mga Saksi ni Jehova, ini nga kaso bangod ginapahalin sila sang gobierno sa Bulgaria bangod sang ila relihion. Nagsugot sa pagbayad sing danyos ang mga awtoridad sang Bulgaria sa mag-asawa kag sa pagbaliskad sa desisyon anay nga indi sila paghatagan sing permiso nga mangin mga pumuluyo. Nagsugot man ang mga awtoridad sa pagbalhag sing maathag nga pagkilala sa legal nga kahimtangan sang mga Saksi ni Jehova sa Bulgaria, diin opisyal sila nga ginrehistro subong relihion sang 1998.

 Nagdesisyon ang ECHR pabor kay Séraphine Palau-​Martínez sang Disiembre 16, 2003. Sa 6-kontra-1 nga boto, nagsiling ang korte nga ginlapas sang Pransia ang mga kinamatarong ni Utod Palau-​Martínez may kahilabtanan sa iya pamilya. Ginpasaka niya ang iya kaso sa ECHR sang wala ginhatag sa iya ang pag-atipan sa iya duha ka bata bangod nagdesisyon ang mga korte sang apelasyon sa Pransia nga pinakamaayo nga “indi padakuon [ang mga bata] sa mapintas kag panatiko nga mga pagsulundan sa kabataan sang . . . mga Saksi ni Jehova.” Ginsiling sang ECHR nga nagdesisyon ang mga korte sa apelasyon nga wala makahibalo sang matuod nga kahimtangan sang pagkabuhi sang mga bata kag sang pinakamaayo nga pag-atipan sa ila, kag ang desisyon may pagpasulabi sa relihion.

Sa tapos mabatas ang tinuig nga pagsalakay sang masingki nga guban sang relihioso nga mga panatiko, nga ang iban sa ila ginbilanggo, mahidaiton nga nagtambong ang mga Saksi ni Jehova sa pungsod sang Georgia sa “Maglakat Upod sa Dios” Distrito nga Kombension. Nasorpresa gid ang mga kauturan sang ginpagua ang New World Translation of the Christian Greek Scriptures sa Georgiano nga lenguahe. Dugang pa, sang Nobiembre 28, 2003, ginrehistro sang Ministry of Justice sa Georgia ang sanga sang Watch Tower Bible and Tract Society of Pennsylvania sa sini nga pungsod. Gani, bisan pa nagdesisyon ang Korte Suprema sang Georgia sang 1998 nga anulahon ang korporasyon nga ginagamit anay sang mga Saksi ni Jehova, opisyal nga ginakilala karon ang bag-o nga korporasyon, nga nagpahalipay sa mga kauturan.

Apang, may pila pa ka kaso sa Georgia nga wala pa madesisyunan sa ECHR. Walay sapayan  sini, makalilipay makita nga nagaayo na ang kahimtangan sang aton mga kauturan didto.

Halin pa sang 1990, napaslawan ang mga kauturan sa Alemanya sa pagparehistro sang aton relihioso nga asosasyon suno sa layi para sa pangpubliko nga mga korporasyon. Sang ginpatuman sang Federal Administrative Court sa mga Saksi ni Jehova ang mas estrikto nga pagtuman kay “Cesar” sangsa ginapatuman sang kasuguan, ginkabig sang Federal Constitutional Court ini nga desisyon subong paglapas sa konstitusyon kag ginbalik ang kaso agod liwat nga bistahon. (Mar. 12:17) Sang Marso 25, 2004, ginsugdan sang una nga korte ang pagrepaso sa kaso. Nagpangabay ang korte sing dugang pa nga impormasyon tuhoy sa aton panindugan sa dugo, pagpadaku sa kabataan, pag-disfellowship, kag neutralidad. Nagsiling ang nagadumala nga huwes nga ang panumbungon sang gobierno dapat napasad sa masaligan nga ebidensia​—mga estadistika kag opisyal nga mga dokumento​—indi sa kwestionable nga mga pinamulong gikan sa Internet kag sa mga sulat sang mga tawo nga luyag magtimalos.

Ang isa ka pormas nga ginagamit sa sensus sang mga nagapalista sa pagsoldado sa Gresya naglakip sa “Chilliast ukon Jehovist” sa listahan sang mga relihion. Bangod ginatamod sang mga Saksi ni Jehova ini nga mga termino nga nagapakanubo, nagreklamo sa Ministry of Defense ang sanga sa Gresya. Sang Marso 24, 2004, nagsulat ang Ministry of Defense sa mga Saksi ni Jehova nga indi nila tuyo nga mag-insulto kag “gintadlong [nila] sa gilayon ang sayop nga termino.” Mabasa sa bag-o nga pormas ang “Cristianong mga Saksi ni Jehova.”

Madugay na nga ginkilala sang Peru ang mga Saksi ni Jehova subong isa ka relihion. Apang, sang Nobiembre 1997 wala na ginbaton sang Ministry of Education ang aton mga pangabay nga indi pagbuhisan ang aton mga literatura kag antes makuha ang mga literatura sa opisina sang adwana, nagpangayo sila sing daku nga kantidad. Ginpasaka sa korte ini nga kaso. Sang Disiembre 11, 2003, nagdesisyon ang huwes pabor sa mga Saksi ni Jehova. Nagsiling sia nga ang ginhimo sang Ministry of Education “kapritso lamang, kaladlawan,  kag di-mapatihan.” Nagsiling sia nga ang ginhimo sang mga opisyales “may pinasulabi [kag] makapaakig.” Madasig nga nalubad ang mga problema sa pagbaton sang mga literatura halin sa gua sang pungsod.

Sa Puerto Rico, isa ka kaalyado nga estado sang Estados Unidos nga may kaugalingon nga gobierno, may isa ka layi nga nagapahanugot sa mga kasilingan nga indi makadtuan bangod sang mga gawang, pader, kag mga guardia. Ginalimitehan sini ang aton hilikuton sa latagon. Gintabog pa gani sang mga pulis sang estado ang mga manugbantala sa pila sini ka lugar. Ang mga paninguha nga husayon ini nga problema sa gua sang husgado napaslawan. Ginpasaka ang kaso sa Federal District Court para sa Distrito sang Puerto Rico, nga nagapangabay nga kabigon ini nga layi subong batok sa konstitusyon, pagtapak sa kinamatarong sa hilway nga pagsunod sa relihion kag sa kahilwayan sa paghambal. Ginahulat pa ang desisyon sang korte.

Sang Oktubre 28, 2003, ginpagua sang Bucharest Court of Appeals ang Judgment Num. 1756, nga nagaobligar sa gobierno sang Romania nga ilakip ang mga Saksi ni Jehova sa listahan sang ginakilala nga mga relihion para sa mga regulasyon sa buhis. Sang Pebrero 6, 2004, ginbalhag sang Official Gazette Num. 112 ang listahan sang “mga relihion nga opisyal nga ginakilala sa Romania.” Nalakip ang mga Saksi ni Jehova.

Sang Marso 21, 2004, gin-abswelto sang Seoul District Court sa Republika sang Korea ang tatlo ka utod nga lalaki sa kriminal nga mga panumbungon may kahilabtanan sa pagdumili nila nga magsoldado bangod sang relihioso nga mga rason. Amo ini ang nahauna nga tion nga ginkilala sang korte sa sini nga pungsod ang pagpangindi pasad sa konsiensia subong isa ka sibil nga kinamatarong. Ginatos naton ka kauturan sa Korea ang nabilanggo karon bangod sang “krimen” nga ‘pagsalsal sang ila mga espada nga mangin mga punta sang arado.’ (Isa. 2:4) Sing makapasubo, wala ginsunod sang korte suprema kag sang constitutional court ang ginagarantiya sang konstitusyon sang Korea nga kahilwayan sa relihion agod amligan ang aton mga kauturan. Apang sining karon lang, ang lehislatura  sang Korea naghimo sing layi tuhoy sa sibilyan nga serbisyo para sa mga kalipikado magsoldado.​—Hulu. 21:1.

Ang desisyon sang Korte Suprema sang Estados Unidos sa kaso nga Watchtower . . . v. Village of Stratton padayon nga nagabulig sa mga Saksi ni Jehova sa ila pamalaybalay nga ministeryo. Halimbawa, sa isa ka komunidad sa estado sang New York, E.U.A., ginapangitaan gihapon sang mga pulis sing permiso ang mga Saksi antes nila himuon ang ila publiko nga ministeryo. Apang, sa tapos mapahibalo sang sitwasyon kag sang desisyon sang korte, ang hepe sang pulisiya nagsulat: “Nahuya gid ako sa ginhimo sang akon mga pulis sa sini nga hitabo kag nagapangayo ako sing pasaylo sa tanan nga problema nga gintuga sini.”

Ang isa ka komunidad sa estado sang Illinois naghatag sing instruksion sa departamento sang pulisiya sini nga pahibaluon ang tanan nga nagapatrolya nga mga pulis kag ang iban pa nga opisyales kag talapuanan nga bangod sang desisyon sang Korte Suprema sang Estados Unidos, “indi na kinahanglan sang mga Saksi ni Jehova ang permiso antes magpamalaybalay.” Siling pa sa instruksion: “Indi na kinahanglan nga pahibaluon pa nila kita kon magbantala sila sa komunidad.”

Sang Oktubre 8, 2003, nagdesisyon ang Korte Suprema sang Iowa pabor kay Lester Campbell sa kaso tuhoy sa iya pagdumili nga tughungan sing dugo. Nagdemanda si Utod Campbell para sa danyos bangod sang pagtughong sa iya sang iya dugo sa tapos maoperahan walay sapayan sang iya ginsulat kag ginsiling nga pagdumili sa sini nga pamaagi. Nagdesisyon ang manubo nga korte pabor sa doktor nga nag-opera kag sa ospital. Apang, ginbaliskad sang Korte Suprema sang Iowa ang desisyon sang manubo nga korte, kag nagsiling nga indi kinahanglan ni Lester Campbell ang isa ka sampaton nga doktor agod pamatud-an nga indi nagakaigo nga pag-atipan ang pagtughong sa iya nga supak sa iya buot. Nagsiling man ini nga mahimo sia bayaran sing danyos.

Ang Pagdumili sa Moscow kag ang Epekto Sini

Nagdesisyon ang Golovinsky Intermunicipal District Court sa Rusya sang Marso 26, 2004, nga dumilian ang tanan nga hilikuton  sang mga Saksi ni Jehova sa Moscow kag dulaon ang ila legal nga korporasyon. Gin-apelar ini nga desisyon. Sang Hunyo 16, 2004, ginsakdag sang Moscow City Court ang desisyon sang mas manubo nga korte, kag ang pagdumili kag pagsirado ginpatuman sang kasuguan. Nag-apelar ang mga kauturan sa ECHR kag nagalaum sila nga bistahon ini sa gilayon bangod sang madamo nga kabudlayan nga tuga sang pagdumili.

Walay sapayan sini, wala magluya ang mga kauturan. Ang matuod, nagpalig-on ini sa madamo nga mag-alagad sing kapin pa kay Jehova. Ang ila kakugi nagapahanumdom sa aton sang ginsiling ni apostol Pablo sang nabilanggo sia sa Roma. “Ang nahanabo sa akon,” sulat niya, “nangin sa kauswagan sang maayong balita.”​—Fil. 1:12.

Halimbawa, sang Marso 2004, may bag-ong kataason nga 136,034 ka manugbantala kag 136,903 ka pagtuon sa Biblia. Amo ini ang una nga tion sa sulod sang pito ka tuig nga ang kadamuon sang pagtuon naglabaw sa kadamuon sang manugbantala! Kag halin sang Marso tubtob Hunyo, nabaton sang sanga ang kapin sa 1,000 ka aplikasyon para sa regular payunir nga pag-alagad, kag sang Abril may bag-ong kataason nga 15,489 ka regular payunir. “Sing kaanggid,” report sang sanga, “ang desisyon sang Hunyo 16 nagpalig-on pa gid sa mga kauturan sa pagpanghikot sing dugang pa.” Ginpahulag man sini ang iban​—lakip ang di-tumuluo nga mga bana​—nga magtambong sa Cristianong mga miting.

Natabuan nga yara sa Rusya ang isa ka estudyante sa unibersidad sa Estados Unidos sang ginpahibalo ang desisyon sang korte sang Hunyo. “Nagkadto gid sia sa Bethel, sa gua sang St. Petersburg, agod mahibaluan ang dugang pa tuhoy sa natabo,” sulat sang sanga. “Nagdayaw sia sa katinlo sang mga pasilidad kag sa pag-abiabi sa iya.” Bangod natingala sia kon ngaa luyag sang iban nga dumilian ang mga Saksi ni Jehova, nagpangabay sia sing mga publikasyon kag mga video agod dalhon pauli sa California kag ipakita sa iya mga propesor sa religious studies.

 Ang mga Kombension sa Moscow Ginhiwat Sing Malinong

Halin sang Hunyo 11 tubtob 13, antes gid lang sang di-paborable nga desisyon sang korte sang apelasyon, duha ka “Maglakat Upod sa Dios” nga Kombension ang ginhiwat sa Moscow, ang isa sa Russian Sign Language. Sang primero, hiwaton kuntani ang mga kombension sa tapos sang bista, apang napaisol sang Komite sang Sanga ang pagbista. Ginsiling sang mga kauturan nga wala sing tublag sa mga kombension kag nagkooperar ang mga awtoridad sang siudad. Ang matuod, ang mga pulis nga nagabantay sa mga ganhaan sang istadyum gin-instruksionan sang ila mga superyor: “Kon ginapasulod ninyo ang mga tawo sa istadyum, indi kamo manigarilyo kag mamuyayaw.”

Sa isa ka subwey sa Moscow, ginpasibangdan sang isa ka tawo ang pila ka utod nga babayi nga nagkawat sang iya kuarta. Namilit sia nga mag-upod sila sa iya sa presinto. Didto gin-akusar niya indi lamang ang mga utod nga babayi kundi ang tanan nga “sektaryan” nga hungod kuno nga nagapagutok sa trapiko agod makapangawat sa mga tawo. Nagtulok ang pulis sa mga utod kag namangkot, “Sin-o kamo?”

Gintudlo nila ang ila mga lapel badge kag nagsabat, “Mga Saksi ni Jehova kami nga matambong sa amon kombension.”

Gin-atubang dayon sang pulis ang nag-akusar kag nagsiling: “Wala nagapangawat ang mga Saksi ni Jehova. Dapat ka mangayo sing pasaylo sa ila, kay gin-insulto mo sila.” Nagliso dayon ang pulis sa mga utod kag nagsiling, “Hingagaw kamo sa inyo kombension.” “Pero ikaw,” siling niya sa tawo, “pabilin ka diri. Padayunon naton ang aton paghambalanay.”

Ang pinakamadamo nga nagtambong sa kombension nga ginhiwat sa istadyum, 21,291, kag 497 ang nabawtismuhan. Sa kombension sang sign language, nga ginhiwat sa Kingdom Hall, 929 ang nagtambong, kag 19 ang nabawtismuhan!

Paglandas sa mga Pagtilaw sa Haiti

Sang 2004 ang isla nga pungsod sang Haiti nakaeksperiensia sing kinagamo sa politika, kasingki, kapurauton, kag gulpi nga pagsaka  sang bili sang mga balaklon. Dugang pa sa sini nga mga problema, 1,500 ka tawo ang napatay kag linibo ang nadulaan sing puluy-an bangod sang pagbaha sang Mayo. Wala sing Saksi nga napatay, apang madamo ang nadulaan sang tanan nila nga pagkabutang, lakip ang ila mga puluy-an.

Sa gihapon, napabakod ang mga kauturan sang maathag nga pamatuod sang bulig kag panuytoy ni Jehova kag sang mahigugmaon nga pagkabalaka sang Nagadumala nga Hubon kag sang mga kauturan sa bug-os kalibutan. Praktikal nga ginpakita ini nga gugma paagi sa paghatag sing materyal nga mga kinahanglanon sa mga biktima sang kalamidad. Siempre pa, nagbinuligay man ang mga kauturan sa amo nga lugar agod makatigayon sing pagkaon kag iban pa nga mga kinahanglanon.

Ginbantayan gid sang sanga sa Haiti ang kahimtangan agod makahatag ini sing panuytoy sa mga kongregasyon. Halimbawa, samtang nagagrabe ang kasingki sa kapital, ang Port-​au-​Prince, ginpanugyan sang Komite sang Sanga sa mga gulang nga sa baylo nga hiwaton ang mga miting sa Domingo, Pebrero 29, ipaabanse ini. Nangin maalamon ini nga panugyan, kay sadto gid nga Domingo, naghalin sa palangakuan kag nagpalagyo ang ginhingabot nga presidente sang Haiti. “Mabatian ang linupok sang mga pusil sa bug-os nga kapital sang nagkinagamo diri,” suno sa isa ka balita. Nagsulat ang sanga: “Wala gid sing naglaum nga matabo ini. Imposible gid kuntani ang pagtambong sa mga miting sadto nga Domingo. Nagapasalamat kami kay Jehova sa pag-amlig sa aton mga kauturan.”

Sa sining makatalagam nga tion, nagbutang sing barikada sa mga dalan ang mga pulis kag ang mga rebelde subong man ang mga kawatan, kag nagpatuman ang gobierno sing curfew sa bug-os nga gab-i. Apang antes pa ginpatuman ang curfew, ginbag-o na sang mga kongregasyon ang oras sang ila mga miting agod makapauli ang tanan antes magsirum. Madamo nga kongregasyon ang nagreport nga nagdamo ang tumalambong sa mga miting!

Nangin masako man ang mga kauturan sa ministeryo sa latagon, kag nagdayaw sa sini ang ila mga kasilingan. “Makapalig-on  gid nga makita kamo nga mga Saksi nga nagabantala gihapon subong sa kinaandan,” siling sang iban. Siempre pa, naghalong gid ang mga manugbantala kag padayon nila nga ginapahibalo ang isa kag isa kon diin indi delikado ang pag-alagad sa latagon.

Ang Pagkakilala sa Aton Subong Cristiano—Isa ka Proteksion

Nagsulat ang sanga sa Haiti: “Bangod kilala sila sa ila kasilingan kag may reputasyon subong neutral sa politika, nalikawan sang madamo naton nga kauturan nga makastiguhan kag makawatan.” Halimbawa, ginpadulog ang mag-asawa nga misyonero sang mga grupo sang mga hurong sa tatlo ka barikada. Duha ka butang ang ginhimo sang mag-asawa: Nagpakilala sila nga mga Saksi ni Jehova, kag nangamuyo sila​—sing mahipos kag sing matunog. Sa tatlo ka barikada, may nagpangapin sa ila, nga nagsiling nga maayo nga mga tawo ang mga Saksi ni Jehova kag wala nagaentra sa politika. Nakapauli nga wala maano ang mag-asawa.

Ginpadulog man sang armado nga mga grupo ang mga miembro sang pamilya Bethel. Kaangay sang mga misyonero, nagpakilala man sila nga mga Saksi, nangamuyo, kag amo man ang resulta. Isa ka bes, ang isa ka kawatan nagsiling: “Lakat kamo, kag ipangamuyo kami!” Ginpadulog sa isa ka barikada sang mga pulis ang isa pa ka Bethelite, kay luyag nila usisaon ang iya salakyan kon bala may mga armas ini. “Ang akon lamang mga armas amo ang Biblia kag ang Lalantawan kag Magmata! nga mga magasin,” siling sang utod. Nagyuhum ang pulis kag ginsenyasan sia nga magpadayon. Pagkatapos sadto, malayo pa lang nakilala na nila ang iya salakyan kag ginapalabay sia nga wala sing pulupamangkot.

Ang sanga nagreport nga sang masunod nga mga bulan, daw nag-ayuayo na ang kahimtangan. Apang, may mga problema kag tension gihapon. Gani, mainandamon gihapon ang mga kauturan.

Ginpauswag ang Imprintahan sa Estados Unidos

Sang 2002, sa panuytoy sang Nagadumala nga Hubon, ang bag-o nga kahimusan sa pag-imprinta ginsugdan sa lima ka dalagku  nga mga rehiyon​—Aminhan nga Amerika, Aprika, Asia, Bagatnan nga Amerika, kag Europa. Ini nga kahimusan nagresulta sa mas maayo nga paggamit sa mga pasilidad sang mga sanga, lakip na ang mga pasilidad sa Estados Unidos, nga sa karon nabuhinan na ang mga trabaho.

Sang 2004, ang tanan nga hilikuton tuhoy sa pag-imprinta, paghimo sing libro, kag pagpanagtag para sa Estados Unidos gintingob sa Wallkill, New York. Ginpresentar ang plano kag tulumuron sa town planning board sang Agosto 6, 2002. Ginhiwat ang public hearing sang Septiembre 3, kag pagkatapos gin-aprobahan ini. Sa tuigan nga miting sang Watch Tower Bible and Tract Society of Pennsylvania sang Oktubre 5, 2002, ginpahibalo nga gin-aprobahan sang Nagadumala nga Hubon ang pagtingob sang mga hilikuton sa Wallkill. Duha ka bag-o nga MAN Roland Lithoman rotary press ang gin-order, kag gin-iskedyul nga mahuman ang dugang pa nga bilding para sa sini sa Pebrero 2004.

 Paano mahuman ining tuman kadaku nga proyekto sa sulod lamang sang 14 ka bulan? Nagsalig ang mga kauturan nga tuytuyan ni Jehova ang proyekto kag pahulagon ang mga indibiduwal nga magboluntaryo. Ginpadyaan ang ila pagsalig. Nagsugod ang trabaho sang Pebrero 2003, kag nahuman ang dugang nga bilding sang Septiembre. Ang isa sa tatlo ka makina sa pag-imprinta gikan sa Wallkill ginsaylo sa bag-o nga ekstension sang Disiembre. Nag-abot ang duha ka bag-o nga makina sa pag-imprinta sang Abril kag Mayo 2004 kag nagsugod ini sa pag-imprinta sang Hunyo kag Hulyo. Ang lima ka makina sa pag-imprinta gingamit na tanan sang Septiembre.

Sadto, ang 11 ka panalgan sa tatlo ka bilding sa Adams Street sa Brooklyn ginagamit para sa bindery. Sa karon, ang bug-os nga bindery nahamtang sa isa na lang ka panalgan sa Wallkill kag nabuhinan sing 58 porsiento ang ginagamit sini nga espasyo. Ginsugdan ang paghimo sing mga libro nga indi matig-a ang panghapin sang Hulyo 2004. Sang ulihi nga bahin sadto nga bulan, ginsugdan ang pag-imprinta sa mga libro nga may matig-a nga panghapin sa bag-o nga bindery, nga nagalaba sing kapin sa 400 metros kag may 33 ka makina nga ginaangot sang 70 ka conveyor. Kis-a lang ginatapik ang mga bahin sang libro, sa pamuno sang bindery. Makahuman sing 120 ka libro kada minuto, ang bahin nga nagahimo sang mga libro nga may matig-a nga panghapin nagakinahanglan lamang sing 25 ka opereytor​—66 porsiento nga pagbuhin sa mga nagatrabaho. Ang bug-os nga bindery nagsugod sa pagpanghikot sang Oktubre 2004.

Sugod sang Nobiembre 2004, ginaatipan na sang bag-o nga Shipping Department sa Wallkill ang mga order nga mga literatura sang mga kongregasyon paagi sa bag-o nga sistema sa kompyuter nga 45 porsiento na lang nga espasyo ang ginaokupahan sangsa ginagamit anay sa Brooklyn. Ginakalkular sang kompyuter ang kadamuon sang inugpadala kag ginapili ang nagakaigo nga karton. Ginaliton sang 800 metros kalaba nga conveyor ang tagsa ka order pakadto sa pinasahi nga tulungtungan diin ginahanda ini para ipadala. Agod mas mahapos sa lokal nga mga kongregasyon, may  lugar na diin sarang mahapit sang nagasakay sa salakyan ang ila mga order.

Nagapasalamat gid kami sa madamong kauturan nga nagbulig sa sini nga proyekto. Nagalakip ini sa mga taga-Bethel kag sa temporaryo nga mga boluntaryo, sa mga grupo sang mga kauturan nga nagapangabudlay sa panuytoy sang mga Regional Building Committee halin sa lima ka estado, kag sa mga kauturan nga maalwan nga nagdonar sing mga kagamitan kag materyales gikan sa ila mga negosyo. Siempre pa, nagapasalamat man kami sa madamong ‘malipayon nga naghatag’ sing pinansial nga bulig.​—2 Cor. 9:​7, 11.

Mga Pagbag-o sa Brooklyn

Nagbag-o ang kahimtangan sa Bethel sa Brooklyn bangod sang pagsaylo sa Wallkill sang mga hilikuton sa pag-imprinta, paghimo sing libro, kag pagpadala. May isa ka maragtason kag makatalandog nga hitabo sang Abril 29, 2004. Sadto nga gab-i, samtang nagasakot ang kalipay kag mga luha, ginpauntat ni Max Larson nga manugtatap sang imprintahan sa sulod sang kapin sa 60 ka tuig, ang katapusan nga makina sa pag-imprinta sa Brooklyn, nga nagatapos sang 84 ka tuig sang dalayon nga pag-imprinta didto. Ginsira man ang bindery pagligad sang pila ka semana.

Nahibaluan sang Nagadumala nga Hubon nga bangod sini nga mga pagbag-o, diutay nga lugar na lamang ang kinahanglan, gani ginpahibalo sini sang Hunyo 2003 ang posible nga pagbaligya sa bilding sa 360 Furman Street. Natapos ang paghimo sing kontrata sang Biernes, Hunyo 18, 2004. Ang lalabhan, mga opisina, kag mga talyer sa sining 93,000 metros kuadrados nga bilding ginsaylo sa bakante nga lugar sa 117 Adams Street.

Dugang pa, ginakay-o karon ang bilding sa 107 Columbia Heights. Gin-iskedyul nga mahuman ang bahin sang bilding para sa ilistaran sa hingapusan nga mga bulan sang 2005, kag ang bug-os nga proyekto sa Septiembre 2006. Istaran sang kapin sa 300 ka katapo sang pamilya Bethel ang ginakay-o nga bilding nga may commissary, Kingdom Hall, librarya, lobby, mga opisina, hulot nga lalabhan, kag bag-o nga hardin sa gua.

 Handa Na Para sa Pag-uswag sa Bug-os nga Kalibutan

Nakabaton man ang Bagatnan nga Aprika, Brazil, Britanya, Japan, kag Mexico sing bag-o nga MAN Roland Lithoman nga mga makina sa pag-imprinta. Ang Britanya amo ang una nga sanga nga nag-instalar sang bag-o nga makina, nga nag-abot sang Hulyo 2003 kag nagsugod sa pag-imprinta sang Oktubre. Makaimprinta ini sing 750,000 ka magasin kada adlaw​—1.5 ka milyon sa duha ka relyebo—halos tatlo ka pilo sa una nga makina.

Makaimprinta man ang bag-o nga makina sing mga signature sang Biblia kag sang iban pa nga mga publikasyon. Halimbawa, naimprinta na sang sanga sa Bagatnan nga Aprika ang mga signature para sa New World Translation sa Sesotho, isa ka lenguahe sa Bagatnan nga Aprika. Ang sanga sa Japan nagreport nga sang una isa ka adlaw ang kinahanglan agod masaylo ang imprintahon halin sa magagmay nga mga libro pakadto sa dalagku nga mga libro. Karon isa na lang ini ka oras. Kag kon sang una, napulo ka adlaw ang kinahanglan sa pag-imprinta sing isa ka milyon ka tract, karon lima ka oras na lang. Sa una nga tatlo ka bulan sini, ang makina sa Japan nakaimprinta sing 12 milyones ka tract; 12 milyones ka magasin kag brosyur; 240,000 ka libro; kag 48,000 ka Biblia.

Ang iban pa nga bag-o kag awtomatiko nga mga makina nagautod, nagaisip, nagatangkas, nagabutang sing ngalan, kag nagaputos sang mga literatura. Ang paghimo sing mga plate sa imprinta nangin mas episyente kag eksakto bangod sang teknik nga ginatawag computer-​to-​plate nga pamaagi. Indi na kinahanglan ang photographic film sa sini nga proseso, gani isa ka proseso ang nabuhin. Ang sanga sa Britanya nagreport nga wala lamang nagdamo ang naimprinta bangod sining tanan nga pagbag-o kundi nabuhinan man ang kadamuon sang kinahanglanon nga magtrabaho.

Pagbiyahe Pa Alemanya Para sa Paghanas

Ang mga grupo halin sa anom ka sanga nagkadto sa kompanya sang MAN Roland sa Alemanya agod hanason sa paggamit sang mga makina. Bangod sang ila naeksperiensiahan sang ginhanas nila ang indi Saksi nga mga manug-imprinta, nagdumdom ang mga  instruktor nga tamdon sang mga kauturan ang tion samtang didto sila nga daw bakasyon. Gani nakibot kag nagdayaw ang mga instruktor sa kaukod sang mga kauturan. Ang matuod, nangabay ang mga Saksi nga magsugod sila sing temprano kag magtrabaho sing sobra pa sa kinaandan nga oras agod makabenepisyo sing labi sa kurso.

Nangin problema sang iban nga mga ginhanas ang lenguahe bangod Ingles ang instruksion kag ang mga manwal sa mga makina. Bilang paghanda, nagpanikasog gid ang grupo halin sa Japan nga pauswagon ang ila ihibalo sa Ingles antes magkadto sa Alemanya. Madamo pa gani ang nagsaylo sing temporaryo sa Ingles nga mga kongregasyon.

Ang mga Bethelite Nakahatag Sing Maayo nga Panaksi

Sang ulihi sang nag-abot sa mga sanga ang mga makina sa pag-imprinta, gintaud ini sang mga enhinyero sang MAN samtang ginbuligan sila sang mga Bethelite. Sa anom ka sanga, may maayo nga epekto sa indi Saksi nga mga trabahador ang malipayon kag maayo nga kahimtangan sa Bethel. Ang isa ka lalaki nga nagtrabaho sa pag-instalar sang makina sa London nagsiling sa mga kauturan: “Nagpauli ako kagab-i kag nakita ko ang akon kaingod sa iya hardin. Wala gid ako anay nanamian sa iya, apang kagab-i nag-istoryahanay kami sing 20 minutos kag natukiban ko nga maayo gali sia nga tawo.” Nagsiling pa ini nga teknisyan nga natalupangdan sang iya asawa nga nagbag-o ang iya panimuot kag batasan. “Mainabyanon ka na, nagayuhum ka na, kag nagatamyaw ka na sa mga tawo,” siling sang iya asawa.

“Anom ka semana nga kaupod ko sa trabaho ang mga Saksi,” sabat niya. “Kag sa katapusan nga duha ka semana, wala ako makapamuyayaw, bisan sing makaisa. Kuntani indi na gid ako mamuyayaw liwat.”

Sang matapos na ang pag-instalar sa makina sa sanga sa London, isa ka ehekutibo sang MAN ang nagtawag sa sanga sa pagpasalamat sa mga kauturan bangod sang ila pag-atipan sa mga tinawo sang kompanya. Nagsiling sia nga isa ini ka maayo gid nga pagtrabaho.

 Nagbutang ang iban nga mga sanga sing hulot-kalan-an didto mismo sa duog para sa mga nagainstalar sang bag-o nga mga makina. Namag-uhan ang madamo, ilabi na ang indi mga Saksi, nga ginaserbehan sila sing panyaga sang nakapanapot sing mahipid nga mga serbidor. Wala pa gid anay makakita ang isa ka teknisyan sa Japan sing subong katinlo kag kaorganisado nga imprintahan kaangay sa sanga. “Amo ini ang pinakamaayo gid nga lugar nga obrahan sa bug-os nga kalibutan,” siling niya. Nagdayaw man sia sa pagkabunayag sang mga kauturan. Amo lang ini ang lugar nga puede niya mabilin ang iya mga gamit nga wala sing bantay, kay nagasalig gid sia nga indi ini pagkawaton. Bangod luyag niya nga makilala pa gid ang mga Saksi ni Jehova, ginbaton niya ang pila ka publikasyon kag nag-tour sa sanga.

Gin-agda sang mga kauturan sa Mexico ang mga teknisyan sang MAN sa Memoryal. Apat ang naghangdo. Apang, wala sila sing nagakaigo nga panapton. Bangod gusto nila magbakal sing amerikana,  gin-updan sila sang isa ka Bethelite sa pagbakal. Ginhatagan sila sang mga kauturan sing mga Biblia kag sa tion sang pamulongpulong sa Memoryal, ginbuligan sila sa pagpangita sang mga teksto. Sa tapos sang okasyon, nagayuhum gid nga nagparetrato ang mga teknisyan amo nga abi sang madamo sa kongregasyon mga Bethelite man sila halin sa Alemanya.

Sa tanan nga sanga, nakabaton man sing maayo nga panaksi ang lokal nga mga kontraktor kag mga manugsuplay sing materyales. Ang isa ka kontraktor sa Estados Unidos nagsulat: “Nagdayaw gid ako sa kalidad sang inyo organisasyon kag ilabi na sa mga tawo. Sa banta ko amo pa lang ini nga proyekto nga nalipay ako kaangay sini. Ang inyo organisasyon naghatag sa akon sing paglaum sa palaabuton sang katawhan. Kon puede lang masulod sa botelya ang kapagsik kag pagpalangga kag ibaligya, ang inyo produkto amo ang luyag baklon sang tanan.”

Ang tawo nga nagsuplay sing mga tubo para sa bag-o nga makina sa Mexico nagdayaw sa malinong nga kahimtangan sa sanga. Madamo sia sing pamangkot, kag karon sia kag ang iya pamilya nagatuon sing Biblia kag maayo ang pag-uswag. Ang kapatas sa lokal nga grupo sang mga kontraktor may tumalagsahon nga pangabay. “Sa kinaandan,” siling niya, “ginahatagan kami sang mga tawo sing bonus agod pasalamatan kami sa amon trabaho. Puede bala ninyo kami mahatagan kada isa sing Biblia sa baylo sini? Sa akon nakita diri, sa banta ko mas bilidhon ang ihibalo sa Biblia sangsa kuarta.”

Dedikasyon Sang Sanga sa India

“Nag-abot gid man ang madugay na ginahulat nga adlaw sang Disiembre 7, 2003,” sulat sang sanga sa India. “Amo ini ang adlaw nga gindedikar ang amon bag-o natukod nga sanga sa Bangalore, sa nabagatnan nga sentro sang India.”

Nahamtang sa 17 ka ektarya, ang 30,000 metros kuadrados nga mga tinukod kaangay sang isa ka gamay nga banwa. Amo ini ang unang daku nga sanga sa bug-os nga kalibutan nga gintukod sang isa ka komersial nga kompanya. May planta ini sa pagtinlo sa tubig nga ginainom, planta sa pagtinlo sa mahigko nga tubig agod magamit liwat, kag kaugalingon nga ginakuhaan sing koryente. May 122 ini ka  opisina, lakip sa 80 ka opisina para sa mga manugbadbad; matahom nga Kingdom Hall; kag daku nga imprintahan. May tatlo ka ilistaran nga bilding nga may komportable nga mga hulot, lalabhan, hulot-kalan-an, kag nasangkapan sing maayo nga kusina. Nahuman sa sulod sang duha ka tuig ang bug-os nga proyekto, nga naggamit sing lokal nga mga materyales.

Nagsugod ang hilikuton sa India sang 1905. Ginahimo karon ang pagbadbad kag pag-imprinta sa 26 ka lenguahe sa India. Sa tion sang dedikasyon, ang mga misyonero nga nag-alagad sa India sa madamong tinuig nagsugid sing makapalig-on nga mga eksperiensia, kag si Stephen Lett, nga miembro sang Nagadumala nga Hubon, ang naghatag sang pamulongpulong sa dedikasyon. Nalakip sa 2,933 nga nagtambong ang 150 ka bisita halin sa 25 ka pungsod.

Dedikasyon Sang Sanga sa Pilipinas

“Luyag namon ang trabaho nga pareho man katahom sa Watch Tower!” Amo ini ang ginsiling sang pila ka indi Saksi nga mga kontraktor sa Manila sang makita nila ang matahom nga pag-obra sa sanga sa Pilipinas. Ang matuod, sang nagkadto sa enhinyero sang siudad ang talapuanan sang isa ka estasyon sa telebisyon nga nagahimo sing dokumentaryo tuhoy sa mga pagsulundan sa pagtukod, ginsilingan niya sila: “Kon luyag ninyo makita kon diin ginasunod sing  detalyado ang mga pagsulundan sa pagtukod, kadto kamo sa Watch Tower.”

Nagpatindog ang mga kauturan sing bag-o nga napulo ka panalgan nga ilistaran kag iban pa nga mga bilding kag ginkay-o ang daan na nga ilistaran nga napulo man ka panalgan nga gintukod sang 1991. Ngaa kinahanglan ang pagpasangkad? Halin sang 1991 tubtob 2003, nagdugang sing 34,000 ang kadamuon sang mga manugbantala, nga nagresulta sa bag-ong kataason nga kapin sa 144,000 ka manugbantala sang Ginharian!

Ginhiwat ang dedikasyon sang Nobiembre 1, 2003. Nagtambong sa sadtong mainit nga Sabado sang aga ang pamilya Bethel, mga misyonero anay kag iban pa nga mga bisita halin sa 13 ka pungsod, kag ang kapin sa 2,000 ka kauturan sa Pilipinas, nga 2,540 sa kabilugan. Ginbinagbinag ni Stephen Lett ang tema nga “Pagpakabahandi sa mga Balay Sang Pagsimba kay Jehova Sang Una kag Karon.” Pagkadason nga adlaw, ang mga payunir diri subong man ang mga gulang kag ang ila mga asawa, nga nagadamo sing 8,151, nagpamati sa pinasahi nga programa sa Metro Manila Assembly Hall.

Sa bug-os nga kalibutan, may yara kabilugan nga 20,092 ka ordenado nga mga ministro nga nagaalagad sa sini nga mga pasilidad sang mga sanga. Tanan sila miembro sang Bug-os Kalibutan nga Orden sang Pinasahi nga Bug-os Tion nga mga Alagad sang mga Saksi ni Jehova.

 [Retrato sa pahina 21, 22]

Ginkidnap sa Kaudtuhon

Sang Biernes sang udto, Marso 19, 2004, nagalakat si Carl, isa ka 20-anyos nga Saksi, sa masako nga dalan sa Pétionville, Haiti. Hinali lang sia nga pilit nga ginpasakay sa “pickup” sang armado nga mga lalaki nga itom sing panapton, ginbutangan sing tabon sa ulo, kag ginpaburhot ang salakyan. Si Carl nagsaysay:

Sang manaug kami sa pickup, ginpasulod ako sa hulot diin yara na ang iban pa nga mga ginkidnap, kag bal-anon gid nga mga estudyante sila sa unibersidad nga ginsumbong nga nagpakigbahin sa mga rally sa politika. Nangin kapin pa kasingki, ginpaarakan kami sang mga nagkidnap sa amon kag isa ang napatay. Nagtupa ang iya ulo sa akon tiil. Pagkatapos sini gin-usisa kag ginpahog nila ako. Bangod wala sila nakontento sa akon sabat, ginsumbag nila ako kag gintikwang sa bangkay.

“Sabta ang amon mga pamangkot!” siling sang ila lider.

“Pero wala gid ako sing nahibaluan sa politika,” sabat ko.

“Kon amo patyon ko ikaw subong!” singgit niya.

“Antes mo ako patyon,” pangabay ko, “palihug tuguti ako nga mangamuyo sa akon Dios, nga si Jehova, sa pagpangabay sa iya nga buligan niya ang akon mga ginikanan kag mga utod, kay indi na nila ako makita.”

“Sige, dasiga lang kay nagadali ako,” siling niya.

Samtang nagapangamuyo ako sing matunog, naggua sa hulot ang tawo. Sang nagbalik sia, naghunahuna ako, ‘Carl, tapos ka na. Maghanda ka na nga mapatay.’ Apang nakibot gid ako.

“Ikaw bala si Carl Kuwan?” pamangkot sang tawo.

“Huo,” sabat ko, nga natingala kon paano niya ako nakilala.

Ginpaathag niya nga pila ka beses nga ginpasakay ko sia sa akon salakyan, kag karon nga nakilala niya ako, indi niya mahimo nga halitan ako. Maathag gid nga nakilala niya ako bangod sang ginsiling ko sa pangamuyo, bisan pa may tabon ang akon ulo. Naggua sia liwat kag ginsugilanon ang iya mga kaupod. Sang ulihi, may nagpasakay liwat sa akon sa pickup, ginpaandar ini, kag ginpapanaug ako sa dalan. Makakulugmat gid yadto nga eksperiensia nga nagpabakod sing daku sang akon pagtuo kay Jehova kag sa gahom sang pangamuyo.

 [Retrato sa pahina 12, 13]

PILA KA HITABO SA 2004 NGA TUIG SANG PAG-ALAGAD

Septiembre 1, 2003

Septiembre: Sa 2004 nga tuig sang pag-alagad, ang Eskwelahan Para sa mga Nagalakbay nga Manugtatap ginhiwat sa 88 ka sanga.

Oktubre: Ang sanga sa Britanya nagsugod sa pag-imprinta sa MAN Roland Lithoman nga makina.

Oktubre 28: Ang hukmanan sa Romania nagdesisyon nga ilakip ang mga Saksi ni Jehova sa listahan sang ginakilala nga mga relihion para sa mga regulasyon sa buhis.

Nobiembre 1: Dedikasyon sang sanga sa Pilipinas.

Nobiembre 28: Ginrehistro sang Ministry of Justice sa Georgia ang sanga talatapan sang mga Saksi ni Jehova sa sini nga lugar.

Disiembre 7: Dedikasyon sang sanga sa India.

Enero 1, 2004

 Marso 26: Nagdesisyon ang Golovinsky court nga dumilian ang mga Saksi ni Jehova sa Moscow. Ginaapelar ang kaso.

Abril: Nalab-ot sang Rusya ang pinakamataas nga 15,489 ka regular payunir.

Abril 29: Pagkatapos sang 84 ka tuig sang dalayon nga pag-imprinta, ginsira ang imprintahan sa Brooklyn. Yara na sa Wallkill ang bag-o nga imprintahan.

Mayo 1, 2004

Mayo: Sa tunga sang kinagamo sa politika, isa ka grabe nga pagbaha ang natabo sa Haiti. Wala sing utod nga napatay.

Hunyo 16: Ginsakdag sang Moscow City Court ang desisyon sang Marso 26. Nangin legal ang pagdumili. Ginaapelar ang kaso sa ECHR.

Agosto 31, 2004

[Retrato sa pahina 11]

Ang “New World Translation of the Christian Greek Scriptures” ginpagua sa Georgiano nga lenguahe

[Mga retrato sa pahina 27]

Ginapaandar sang mga utod ang isa sa duha ka bag-o nga MAN nga makina sa pag-imprinta sa Wallkill, New York, E.U.A.

[Retrato sa pahina 29]

Ang bag-o madedikar nga sanga sa Bangalore, India

[Retrato sa pahina 30]

Ang ginpasangkad nga sanga sa Pilipinas