Bug-os Kalibutan nga Report

◼ASIA KAG NATUNG-AN NGA SIDLANGAN

Kadamuon sang pungsod: 47

Populasyon: 3,896,182,946

Kadamuon sang manugbantala: 582,360

Kadamuon sang pagtuon sa Biblia: 453,069

Kyrgyzstan: Wala pirme sing tawo sa isa ka balay sa teritoryo sang auxiliary payunir nga si Svetlana. Sang naglabay sia diri isa ka adlaw, naghunahuna sia nga indi na lang maghapit sa balay, sanglit posible nga wala na naman ini sing tawo. Apang, nagdesisyon sia nga hapitan ini kag nalipay gid sia sang nasugilanon niya ang isa ka pamatan-on nga babayi. Nalipay gid ang babayi nga masugilanon ang isa sa mga Saksi ni Jehova kag nagsiling nga nagatuon sia anay sa Biblia apang napahilayo sa mga kauturan. Ginpamangkot ni Svetlana ang babayi kon luyag niya nga regular nga makatigayon sing mga magasin, kag nagsabat sia nga indi  lang magasin ang iya kinahanglan kundi isa ka regular nga pagtuon sa Biblia sa puluy-an! Nasugdan gilayon ang pagtuon, kag ining interesado nagatambong na sa Cristianong mga miting.

Japan: Nagsulod ang duha ka utod nga babayi nga nagapanaksi sa duog sang negosyo sa opisina sang abogado nga kilala nga mabinuligon sa mga kubos. Namalibad gilayon ang isa ka babayi nga nagsiling nga masako gid sia apang nagkuha sang mga magasin. Nagaisahanon na lang ini nga babayi sang nagbalik ang mga utod nga babayi. Wala pa nila sia matamyaw, maakigon sia nagpamangkot: “Ngaa ginapatay ang mga bata nga wala sing sala? Ngaa amo na sini ang kalibutan? Luyag ko ang makapakumbinsi nga paathag! Kon may sabat kamo, sugiri ako!” Sa masunod nga inoras nga paghinun-anon tuhoy sa isyu sa pagkasoberano, amat-amat nga nagbag-o ang panimuot sang babayi. Ginpasalamatan niya ang mga utod sa paggamit sang Biblia sa pagsabat sang iya mga pamangkot nga abi niya wala sing makasabat. Sang manughalin na ang mga utod, ginhatag niya sa ila ang adres kag numero sang telepono sa ila balay kag nagsiling: “Ginahatag ko lang ini sa mga tawo nga suod gid sa akon, apang tuhay gid kamo. Luyag ko kamo maistorya liwat. Importante gid ang aton naistoryahan.” Nasugdan ang pagtuon sa Biblia sa iya.

Nepal: Isa ka babayi ang tinuig na nga nagasimba apang nadismaya sa pagbinaisay kag kakagod nga iya nasaksihan sa tunga sang mga katapo sini. Bisan pa isa ka pastor anay ang iya bana, natabo ang pagbinaisay bahin sa donasyon, kag ginpahalin ang iya bana. Nangin palahubog sia kag wala na niya ginasakdag ang iya pamilya. Nangin desperado ang babayi sa pagpangita sang kamatuoran kag nagapangamuyo adlaw-adlaw. Agod masuportahan ang iya pamilya, nagtrabaho sia sa isa ka sentro nga ginatipunan sang basura nga mga papel. Isa ka adlaw sang ginapainpain niya ang mga libro, mga magasin, kag mga pamantalaan, nasapwan niya ang libro nga Nahiusa sa Pagsimba sa Lamang Matuod nga Dios. Gintago niya ini sa iya bayo kag gindala pauli.  Ginbasa niya ang libro kada adlaw kag padayon nga nagapangamuyo. Isa ka adlaw ang isa ka espesyal payunir nga babayi nga si Bishnu, nanuktok sa ila puertahan. Naluyagan gid sang babayi ang ginsugid ni Bishnu kag ginpasulod niya sia. Amat-amat nga natalupangdan sang babayi ang pagkaanggid sang ginasugid ni Bishnu kag ang ginasiling sang libro. Ginpakita niya ang libro kag nalipay si Bishnu kay isa gali ini sa aton mga libro. Regular sia nga nagatuon karon sa Biblia kag nagatambong sa tanan nga miting upod sa iya kabataan.

Sri Lanka: Bisan pa di-bawtismado nga manugbantala, luyag na ni Punchibanda nga ipaambit ang mensahe sang Ginharian sing di-pormal sa iban. Ginsugilanon niya ang isa ka manugpakilimos sa kalye nga nagsugid sa iya nga ang iya subang nga babayi nag-antos kag napatay sa balatian. Nagkadto sila sa simbahan sang Assembly of God nga nagalaum nga milagruso nga mag-ayo ang iya bata, apang wala sing natabo. Ginpaathag ni Punchibanda nga wala na nagapang-ayo ang Dios karon apang matabo ini sa Ginharian sang Dios. Ginhatagan niya sing mga magasin tuhoy sa sini nga topiko ang manugpakilimos. Sang ulihi, gin-agda niya ang tawo sa Kingdom Hall. Nagpauli ang manugpakilimos kag nagsugid sa iya pamilya tuhoy sa pangagda kag ginpakita niya sa ila ang mga magasin. Nagsiling man ang iya asawa nga nakatigayon man sia sing magasin kag gin-agda man sa pagkadto sa Kingdom Hall. Nagdesisyon ining tawo nga sia lang anay ang makadto sa Kingdom Hall. Gin-abiabi gid sia sang mga kauturan didto. Karon sia, ang iya asawa, ang ila bata nga lalaki, kag duha ka bata nga babayi nagatambong sa tanan nga miting kag malipayon sa pagpakig-upod sa katawhan ni Jehova.

Lebanon: Nagsaysay ang isa ka espesyal payunir nga babayi nga taga-Pilipinas anay: “Nasugilanon ko ang isa ka Pilipina sang nagapanaksi ako sa kalye. Nagduaw ako sa iya ginatrabahuan kag nadumalahan ko sia sing pagtuon sa Biblia. Madamo sia sing mga pamangkot; sang umpisa, wala pa ko katapos sabat sa iya pamangkot, mamangkot naman sia. Apang sang ulihi,  ginpamatukan sia sang iya suod nga mga abyan nga aktibo sa ila relihion. Sing makapasubo, nadala sia sa pagpamatok kag nag-untat sa pagtuon sa Biblia, bisan pa nga ginpalig-on ko sia nga indi mag-untat. Apang, siling ko, ‘Kon karnerohon gid sia, pila ka adlaw ipadayon niya ang iya pagtuon.’ Ginapamensar ko gihapon sia pagligad sang isa ka tuig, gani ginsulatan ko sia kag ginpahibalo nga nabalaka gid ako sa iya kag nalipay ako nga makita sia liwat. Ginteleponohan niya ako, kag ginduaw ko sia. Sa sini nga tion nakita ko nga nagbaskog pa gid ang iya interes. Wala gid niya nalimtan ang amon mga natun-an, kag ginaapresyar gid niya ini. Nagsugid sia sa akon nga nagsimba sia sa iban nga relihion apang wala nila ginatudlo ang kamatuoran. Gani ginpadayon niya ang iya pagtuon, nag-uswag, kag bawtismado na karon. Ang iya 12-anyos nga bata nga lalaki di-bawtismado na nga manugbantala.”

India: Nagsulat ang isa ka utod nga babayi: “Samtang nagapamalaybalay kami, natalupangdan namon ang isa ka bata nga babayi nga nagpauli pagkakita sa amon. Sang ulihi ginmanduan kami sang isa ka tawo nga magbiya. Sang manugbiya na kami, natalupangdan namon nga ginsugilanon sang bata ang tawo. Sang ulihi, samtang nagahulat kami sang bus, nagpalapit ang bata nga nagabisikleta kag nagsiling: ‘Bal-an ko nga si Jehova ang matuod nga Dios. Palihug tudlui ninyo ako sa Biblia. Nagpauli ako kay padayunon ko kuntani kamo, apang wala nagsugot ang tag-iya sang balay.’ Ginpamangkot namon sia kon paano niya nahibaluan nga si Jehova ang matuod nga Dios. Nagsiling sia nga duha ka tuig ang nagligad nagabiyahe sia sakay sa bus sang nakita niya ang daw isa ka dakung Cristianong pagtilipon. Isa ini sa aton distrito nga kombension. Nanaug sia sa bus kag nagtambong sa programa sa sulod sang tatlo ka adlaw. Nagahulat sia nga may mga Saksi ni Jehova nga makaduaw sa ila. Bangod interesado gid sia, gindala namon sia sa balay sang utod nga babayi kag nagtuon sa Biblia. Regular sia nga nagatambong sang mga miting karon kag nagauswag sing maayo sa espirituwal.”

 ◼ APRIKA

Kadamuon sang pungsod: 56

Populasyon: 781,767,134

Kadamuon sang manugbantala: 1,015,718

Kadamuon sang pagtuon sa Biblia: 1,820,540

Uganda: Nagatrabaho sa isa ka daku nga botika ang Saksi nga si Lucy. Ginpatawag sila sang iya kaupod sa trabaho agod magtu-ad sing matuod bangod ginpakita sang pag-awdit nga daku nga kantidad ang nadula. Sang pauyatan na kay Lucy ang Biblia, sa baylo nga manumpa nga inosente sia, ginbasa niya ang Hulubaton 15:3 sing mabaskog: “Ang mga mata ni Jehova yara sa tagsa ka duog, nga nagabantay sang mga malaut kag mga maayo.” Makadali nga naglinong ang bug-os nga hulot, nian ang nakasala nagsungka sa superbisor. Nagsiling ang superbisor nga sa sunod dumdumon nila tanan ang “teksto ni Lucy.”  Gin-umentohan sang ulihi ang sueldo ni Lucy, kag sa iya gintulin ang yabi sang botika.

Benin: Grabe ang pagyaguta kay Josué sa eskwelahan. Kon sayop ang iya sabat sa klase, ginauligyat sia sang pila niya ka klasmeyt, “Pari ni Jehova, ngaa nagasayop ka?” Ang iban nagaentra sa pagyaguta subong sang, “Ginauyangan lang niya ang iya tion sa paglagawlagaw nga dala ang iya porpolyo.”

Nagbaton si Josué, “Nahadlok gid ako basi masumalang ko ang akon mga klasmeyt kon nagabantala sa talipuspusan sang semana.” Ginpangamuyo ni Josué ini nga butang kag ginsugid ini sa isa ka gulang, nga nagpalig-on sa iya nga atubangon ini paagi sa pagdugang sang iya tion sa pagministeryo kag maisugon nga pagtanyag sang mga literatura sa iya mga klasmeyt. Suno kay Josué tatlo ka pilo ang iya kadalag-an. Nagsiling sia: “Pirme ako nga nagaauxiliary payunir karon. Duha sang akon mga klasmeyt nga nagayaguta anay sa akon ang akon ginatun-an sa Biblia karon. Nagtaas man ang akon mga grado.”

Etiopia: Mga duha ka tuig ang nagligad, nakakita si Asnakech sang isa ka lisensia sa pagmaneho kag nakigkontrata nga iuli ini sa tag-iya nga si Elsa. Nagdayaw gid sia sa pagkabunayag ni Asnakech kag luyag niya sia padyaan sing kuarta. Wala ini ginbaton ni Asnakech kundi sa baylo nagtanyag kay Elsa sing brosyur nga Ano ang Ginapatuman Sang Dios sa Aton? Pagkadason nga adlaw nagtuon na si Elsa sa Biblia. Nagsiling sia nga pamilyar na sia sa ngalan nga Jehova bangod ginsugid ini sang iya amay nga isa ka pari. Sang nakatambong ang iya bug-os nga pamilya sa distrito nga kombension, nagtuon man sa Biblia ang iya bana. Apang, sang nahibaluan ini sang iya amay, naakig gid sia, nga nagasiling nga wala sing pulos ang mga Saksi ni Jehova. Determinado si Elsa nga padayunon ang iya pagtuon, amo nga mainayuhon nga ginsilingan niya ang iya amay nga ang mga Saksi indi kaangay sang iya ginasiling. Bangod nga nadismaya, likom nga ginkuha sang iya amay ang Ginapatuman nga brosyur.  Sulitsulit nga ginbasa ini sang iya amay kag natandog gid sa sini. Pagkatapos sini, kon bendisyunan niya gani ang mga nagaagi, wala na niya ini ginahimo sa ngalan sang Trinidad. Sang ulihi gintawag sia nga “apostata,” kag luyag sia kulatahon sang iban. Amo nga nagsaylo sia sa Addis Ababa, kag nagtuon sa Biblia. Bawtismado na nga Saksi si Elsa, upod sa pito ka miembro sang iya panimalay. Ang iya bana kag isa ka bata nga lalaki nagauswag man sa pagtuon.

Côte d’Ivoire: Ginbilin ni Anderson ang brosyur nga Ano ang Ginapatuman Sang Dios sa Aton? sa tag-iya sang tiendahan nga regular nga nagabasa sang Biblia. Sang ulihi nagtuon sia sa Biblia. Ilabi na nga nabuyok ang tawo sa leksion nga “Pagkabuhi Sang Pamilya nga Nagapahamuot sa Dios.” Nagpaathag sia: “Wala ako nakahibalo nga may papel gali ang tagsa ka tiayon sa pag-asawahay. Kon magab-ihan gani ako sa pagpauli, wala ako nagapamati sa sukmat sang akon asawa sa akon. Ginahambalan ko sia, ‘Ako ang lalaki kag magua ako kon luyag ko; ikaw ang asawa, kag ikaw ang matatap sang balay.’ Karon nagapauli gilayon ako pagkatapos sang trabaho kag nagabulig sa akon asawa sa mga hilikuton sa balay.”

Kenya: Nabatian sang isa ka siete anyos nga yara sa ikaduha nga grado ang palaabuton nga pagduaw sang manugtatap sang sirkito. Isa ka semana antes sini, naglisensia sia sa prinsipal nga tugutan sia nga magtambong sa miting sa Martes sang hapon. Gintugtan sia. Apang, sang masunod nga adlaw ginpapauli ang bata nga lalaki agod dalhon ang iya mga ginikanan kag ang ginasiling nga bisita sa eskwelahan. Sa tion sang duaw, nagkadto ang manugtatap sang sirkito kag ang amay sang bata sa eskwelahan. Nakibot ang prinsipal sang makita nga nag-abot ang manugtatap sang sirkito kag nagtaklad sing kapin sa isa ka oras sa bakulod agod makig-istorya sa iya. Nagkuha sia sing mga literatura kag nangin mainabyanon sia sugod sadto kag handa sa pagkooperar.

 Malawi: Samtang nagaalagad sa latagon, ang isa ka utod pirme ginatublag sang isa ka tawo nga nagabisikleta. Kon makita gani niya ang utod nga nagapanaksi, nagadulog sia kag makigbais sa iya. Ginatinguhaan pa gani niya nga agawon ang Biblia sang utod. Isa ka adlaw samtang nagadumala sang pagtuon sa Biblia ang utod, naglabay ang tawo. Bangod may luyag sia kay-uhon sa iya bisikleta, nasal-ut niya ang iya kamot sa rayus sa atubangan nga ruweda, nasamaran gid ang iya mga tudlo. Bisan pa nga nagakuriit gid ang tawo sa kasakit, ang lamang nga nagbulig sa iya amo ang utod, nga nagbugkos sang iya mga tudlo kag nagpatigayon agod madala sia sa ospital. Sang ulihi, ginduaw sang utod ang balay sang tawo. Nahuya sa iya batasan sang una, nagsugid ang tawo nga ang iya panimuot naimpluwensiahan sang butig nga mga sugidsugid. Nagsiling sia: “Ginasimba gid ninyo ang lamang matuod nga Dios. Wala gid ako nagdahom nga tratahon mo ako kaangay sini bisan pa sang di-maayo nga pagtratar ko sa imo.”

Cameroon: Ang isa ka dalagita nga utod nagalingkod sa isa ka buta sing tawo nga duog hululatan sang isa ka ospital sang nagsulod ang isa ka tigulang kag masakiton nga tawo. Sanglit wala na sing bakante nga pulungkuan, nagtindog na lang ang tigulang. Nagsaysay ang utod: “Naluoy gid ako sa tigulang amo nga ginhatag ko sa iya ang akon lingkuranan. Bangod sini may pila nga nagakulumuron sa sulod sang hulot kay ang paghatag ko sa iya sang akon lingkuranan nagakahulugan nga iya na ang toka ko para sa konsultasyon. Sang ulihi isa ka babayi ang namangkot sa akon kon ano ang akon relihion. Nagsabat ako nga Saksi ni Jehova. Gindayaw gid niya ako bangod suno sa iya diutay lang gid sa mga pamatan-on ang nagahimo sini. Ginkalitan ko nga makapanaksi sa iya kag sa iban pa paagi sa mga tract nga akon dala. Nasabat ko pa ang pila nila ka pamangkot. Ang pila nga akon nasugilanon nagbag-o sang ila pagtamod tuhoy sa mga Saksi ni Jehova kag luyag na nila nga duawon sila sang mga Saksi sa ila balay.”

 Togo: Samtang nagapanghikot sa isa ka naligwin nga teritoryo, nasapwan sang pila ka utod ang isa ka pamatan-on nga lalaki nga nalipay gid sang makilala sila. Ginpakita sang pamatan-on ang duha ka kuwaderno sa ila nga nasulatan sang bug-os nga libro nga Mahimu Ka Mabuhi sing Dayon sa Paraiso sa Duta kag bahin sang libro nga “Make Sure of All Things.” Nakita niya ini nga mga libro sa balay sang isa ka pastor sang ebanghelikal nga iya ginapuy-an sa pila ka tion. May duha ka bulutangan sang libro ang pastor, ang una para sa iya paborito nga libro kag ang ikaduha para sa mga libro nga “wala data.” Sa ikaduha nga bulutangan ini nakuha sang pamatan-on. Pagkatapos niya nabasa ang pila ka pahina sini, naganyat sia sa mensahe. Sanglit indi niya madala ang libro kag wala nakahibalo kon sa diin makakuha sang isa ka kopya sini, ginkopya niya ini. Sang ginsugid niya sa iban ang iya nabasahan, namatok ang iya iloy kag ang pastor. Ginbilinan sia sang mga utod sing mga literatura kag ginbuligan sia nga mag-uswag sa espirituwal.

Bagatnan nga Aprika: Si Thandi nga isa ka Saksi ginpangabay sang iya ama nga istoryahon ang isa niya ka empleyada nga si Bella, nga nagaproblema sa ila pag-asawahay. Ginasakit si Bella sa pisikal kag sa emosyonal sang iya bana nga isa ka pulis, amo nga luyag niya sia diborsiohan. Ginhatagan ni Thandi si Bella sing duha ka kopya sang libro nga Ang Sekreto Sang Kalipay sa Pamilya kag ginpalig-on sia nga ihatag ang isa sa iya bana. Pagligad sang isa ka semana, ginsugilanon sia ni Thandi kag nagsiling nga ginbasa ini sang iya bana kag nangin mahim-ong na ang ila balay. Tatlo ka bulan sang ulihi, ginsugiran ni Bella si Thandi nga ginsalbar sang Dios ang ila pag-asawahay paagi sa pangamuyo kag sang libro nga Kalipay sa Pamilya. Sang nabatian ini sang ama ni Bella, ginrekomendar niya sa iya 2,000 ka empleyado nga magkuha sang libro. Sa karon, nakapahamtang si Thandi sing 96 ka Kalipay sa Pamilya nga libro sa mga kaupod niya sa trabaho. Nagdonar ang kompanya sa bug-os kalibutan nga hilikuton sang mga Saksi ni Jehova.

 ◼ AMERIKA

Kadamuon sang pungsod: 56

Populasyon: 879,073,403

Kadamuon sang manugbantala: 3,199,835

Kadamuon sang pagtuon sa Biblia: 3,022,276

Venezuela: Nagpatakod sa ila balay sang bag-o nga linya sang telepono ang isa ka pamilya nga Saksi. Apang, bangod sang problema sa linya, may mga nagatawag sa ila nga luyag makigkontak sa lokal nga estasyunan sang telebisyon sa pagpakig-istorya sa isa ka astrologo nga babayi nga yara didto. Ginkalitan sang pamilya ini nga kahimtangan. Sa bulig sang Reasoning From the Scriptures nga libro, naghanda sila sang pila ka impormasyon kag pila ka teksto sa Biblia agod ipaambit sa mga nagapanawag. Nangin eksperto ang iloy nga si Graciela sa sini. Isa ka adlaw nagsiling ang nagpanawag: “Hello. Ikaw bala ang diosa sang mga bituon?”

 “Hello. Ako si Graciela, ano ang imo ngalan?”

“Carmen.”

“Carmen, ngaa luyag mo makigsugilanon sa diosa sang mga bituon? Luyag mo bala sang bulig ukon laygay?”

Ginsugiran gilayon ni Carmen ang aton utod sang iya problema. Sa mainayuhon nga paagi, ginpaathag ni Graciela kon sa diin masapwan ang pinakamaayo nga laygay, kag ginbasa niya kay Carmen ang mga dinalan sa Biblia. Nian namangkot sia kay Carmen, “Sa banta mo dapat bala kita mamangkot sa aton Manunuga tuhoy sa masaligan nga panuytoy karon kag sa palaabuton?” Nian nanugid si Carmen nga nagatuon sia sa Biblia sang una sa mga Saksi ni Jehova, gani ginhimos nga mapadayon ang iya pagtuon. Sang ulihi, madamo nga nagapabulig ang nasugilanon sang pamilya ni Graciela, nga sa masami napanaksihan nila sing maayo, nga nagapalig-on sa ila nga mamati sa mga Saksi kon magduaw sa ila, kag nagatudlo sa ila sang Kingdom Hall sa ila duog.

Colombia: Ginkawat ang salakyan sang utod nga babayi nga taga-Cali sang Marso 2005. Nakit-an ini pila ka adlaw sang ulihi. Sia kag ang iya di-tumuluo nga bana nagahulat sa salakyan sa pag-abot sang mga pulis, apang sang naatrasar ang mga pulis, gindala na lang sang mag-asawa ang salakyan. Apang, bangod ang salakyan gingamit sa paghimo sang isa ka krimen, ginpadulog sila sang mga pulis, gin-aresto, kag ginpriso. Sang yara na sa prisuhan ang utod, nagpanaksi gilayon sia, kag sa malip-ot lang nga tion, nakasugod na sia sing pila ka pagtuon sa Biblia. Ginhilway ang isa sa mga estudyante apang nangabay sia sa utod nga ipadayon nila ang pagtuon kon makagua na sia. Ginsugiran man sining estudyante ang iya ginapuyopuyo nga luyag na niya nga magpakasal sila agod mapahamut-an ang Dios.

Antes lang sini nga hitabo nangamuyo ang utod nga luyag niya kuntani nga maghinguyang sing mas madamo nga tion sa pagpanaksi, apang wala gid sia magdahom nga sa prisuhan ini matabo! May tanyag nga lip-uton ang iya pagkapriso, apang  bangod nagbatyag sia nga ginaamligan sia ni Jehova kag malipayon gid sa iya pagbantala, wala niya ini ginbaton. Pagkatapos sang 45 dias sa prisuhan, ginhilway sila nga mag-asawa. Nagsiling sia nga napabakod ang iya pagtuo. Pagkatapos sini, ginabaton na sang iya bana ang mga pagduaw kag bulig sang mga kauturan. Pagkatapos sang 20 ka tuig sang mahinay nga pag-uswag sa espirituwal, nagtambong na sia sa mga miting kag nagpabutyag nga luyag na niya magtuon sa Biblia. Regular karon nga ginaduaw sang utod nga babayi ang prisuhan sa pagdumala sing mga pagtuon sa Biblia sa mga priso nga babayi. Nagpasalamat gid sia kay Jehova sa pagsabat sang iya mga pangamuyo kag sa pagpakamaayo sa iya sa madamong paagi.

Brazil: Mga duha ka tuig ang nagligad, kinaandan na nga makita ang isa ka bulag nga si Renildo, nga nagapakilimos sa merkado sa ila banwa kag sa kaingod nga mga siudad. Bisan pa ginahimo niya ini agod madugangan ang iya pension subong isa ka baldado, daku ang kita sa pagpakilimos, amo nga nakatigayon sia sing salakyan kag balay nga may matahom nga muwebles kag makabakal sing abunansia nga pagkaon nga haluson mabakal sang kinaandan nga mga tawo sa sinang nagapamigado nga duog. Amat-amat sia nga nakatigayon sing espirituwal nga tulumuron sang nagtuon sia sa Biblia sa mga Saksi ni Jehova, nga nagpahulag sa iya sa pagdesisyon sing maisugon. Sang nahinun-anunan na nila nga pamilya kon ano ang himuon agod makapasibu sa diutay nga kita, nag-untat si Renildo sa pagpakilimos. Wala magdugay, sia kag ang iya pamilya nag-uswag sa espirituwal kag nabawtismuhan sa isa ka distrito nga kombension. Kilala karon si Renildo, indi subong isa ka manugpakilimos, kundi subong makugi nga manugbantala sang maayong balita, nga nagahinguyang sing promedyo nga 40 ka oras kada bulan sa pagministeryo.

Ecuador: Regular nga ginabilinan sang isa ka payunir sang magasin nga Inintsik ang tag-iya sang isa ka restawran. Ginduaw ini nga tawo sang isa niya ka abyan nga tag-iya man sang isa ka restawran. Nakita sang iya abyan ang magasin kag ginbasa ini. Interesado  gid sia amo nga nagsulat sia sa sanga sa Hong Kong, nga nagapangabay sang dugang pa nga magasin, isa ka Biblia, kag libro nga Mangin Suod kay Jehova. Nangabay man sia sing pagtuon sa Biblia. Ginkontak sang sanga sa Hong Kong ang sanga sa Ecuador, kag wala magdugay may mga payunir nga nagkadto sa interesado nga dala ang mga literatura nga iya ginpangabay. Nagbalik sila pagligad sang apat ka adlaw. Ginbasa bala niya ang mga literatura? Nagsiling sia: “Nagsugod ako sa pagbasa sa Genesis kag sa tulun-an na ako sang Ezequiel, apang may mga pamangkot ako. Ngaa mainayuhon gid si Jehova sa aton nga mga tawo? Iya ang tanan nga butang, gani ngaa nanikasog gid sia nga buligan ang mga tawo? Ano ang iya mapulos sa sini?” Nasugdan ang pagtuon sa Biblia, kag gilayon nga nagtambong ang tawo sa mga miting. Nag-untat sia sa pagpanigarilyo kag pagsugal. Ginasira pa gani niya ang iya restawran kon magtambong sia sa mga miting. Kalipikado na ini nga tawo subong di-bawtismado nga manugbantala kag ginatudluan niya sing Inintsik ang lokal nga mga utod nga luyag magbulig sa mga nagapamulong sing Inintsik sa sina nga pungsod.

 Honduras: Sang Enero 2005 sa Guatemala, ang utod nga si Flor nanaksi sing di-pormal sa isa ka 15-anyos nga si Sebastián nga isa ka tarso sa circus. Interesado sia apang wala sia sing tion para sa malawig nga pagsugilanon. Isa ka adlaw nahulog sia gikan sa ibabaw sang daku nga tolda, amo nga nagahigda na lang sia nga nabendahan. Madamo na sia sing tion karon sa paghunahuna sang espirituwal nga mga butang. Ginduaw sia kada adlaw ni Flor agod sabton ang iya madamo nga pamangkot. Sang ulihi ang iya iloy nga si Doris, nga isa ka manuglatay sa lubid, nangin interesado man, kag gintun-an sia ni Flor sa Biblia. Si Dalila, nga isa ka sirkera, kag si Sofía, nga isa ka manugsaot nga nagtuon sa mga Saksi sang una, nagbuylog sa pagtuon upod sa ila mga kabataan nga babayi. Amo nga ang grupo nakalab-ot sa pito ka tawo. Ginadumalahan sila tanan ni Flor sing pagtuon sing lima tubtob anom ka beses sa isa ka semana sa sulod sang duha ka bulan.

Sang nagsaylo ang circus sa Honduras, ginpalig-on ni Flor ang grupo nga pangitaon ang mga Saksi sa mga banwa nga ila makadtuan agod nga makapadayon sila sa pagtuon kag pagtambong sa mga miting. Sang nakalab-ot sila sa banwa sang Copán, napadayon ang pagtuon sa Biblia upod sa mga espesyal payunir sa sina nga duog. Sang nagsaylo ang grupo sa banwa sang Gracias, isa naman ka espesyal payunir ang nagdumala sang pagtuon. Sang manugsaylo na sila sa banwa sang Santa Rosa de Copán, nakabaton ang mag-asawa nga misyonero sing tawag sa telepono nga nagapangabay sa ila nga dumalahan ang pagtuon sa masunod nga tatlo ka semana.

Pinasahi gid ini nga pagtuon bangod pito tubtob sa napulo ka tawo ang nagatipon sa daku nga tolda sang circus. Nagatuon sila sing duha ka beses kada semana kag nagahanda gid sing maayo, lakip na ang pinakabata, ang nuebe anyos nga babayi nga si Julietta, nga isa ka sirkera. Kon magtambong ang grupo sa mga miting, nagadalidali sila sa pagbiya pagkatapos sini kag nagahingagaw sa pag-ilis sang ila kostyum agod indi maulihi sa ila palaguaon. Apang malipayon sila sa ila paninguha.

 ◼ OCEANIA

Kadamuon sang pungsod: 30

Populasyon: 35,237,787

Kadamuon sang manugbantala: 93,961

Kadamuon sang pagtuon sa Biblia: 47,864

New Zealand: Samtang nagabasa sang pasad sa Biblia nga brosyur sa tion sang panyaga, ang pamatan-on nga utod nga si Cecilia ginpamangkot sang iya kaupod sa trabaho kon ano ang kaundan sini. Sang ginpaathag ini ni Cecilia, 15 ka tawo ang nagtipon sa pagpamati, lakip sa iya boss, nga nag-agda sa iya sang ulihi sa iya opisina. Ginsilingan sia sang iya boss nga nagdayaw gid sia sa iya nabatian. Ginpahibalo man niya sa iya mga empleyado nga ang hulot palanyagahan mangin hulot na para sa paghinun-anon sa Biblia kag gindugangan ang pahuway sa udto ni Cecilia nga 30 minutos sing 60 minutos agod nga  may tion sia sa pagpanyaga kag pagpaathag sa Biblia. Sa sulod sang apat ka semana, 9 tubtob 15 ang nagtambong sa sini nga paghinun-anon. Duha ka babayi ang regular nga nagatuon karon sa Biblia, maayo ang ila pag-uswag, kag nagapanaksi na sa miembro sang ila pamilya kag mga abyan.

Tuvalu: Si Peteli, nga ang kahulugan sang iya ngalan “Bethel,” isa ka 14 anyos nga babayi nga bungol. May mga paryente sia nga mga Saksi ni Jehova, amo nga nakatambong na sia sa pila ka miting apang wala sia nakapanginpulos sa sini bangod bungol sia kag indi makahibalo magbasa. Sa iya kaugalingon nga pagtinguha, mahangpan ni Peteli ang tikab sang bibig (lip-read). Sining karon gid lang, ang misyonera nga si Dale, nagtuon sa iya sa brosyur nga Agoma ang Kabuhi sa Duta Sing Dayon! Gingamit ni Dale ang mga laragway sa pagtudlo kay Peteli tuhoy sa Biblia kag sa mga teksto agod makatuon sia sa pagbasa. Mabudlay gid ini kay Dale bangod bag-uhan lang sia nga misyonera kag nagatuon pa sini nga lenguahe, kag kinahanglan ni Peteli ang bulig agod mamitlang sing eksakto ang mga tinaga. Malangkagon kag mapisan gid si Peteli. Pagligad sang tatlo ka bulan, makahibalo na sia magbasa. Updanay sila sang iya maestra nga misyonera nga nagahanda sang mga komento sa mga miting. Ginaensayo gid sing maayo ni Peteli ang iya komento kag mapagsik nga nagakomento sa mga miting. Sa atubangan pa gid sia sang Kingdom Hall nagapungko agod nga makakonsentrar sia sa pagbasa sang bibig sang humalambal. Nagsulat si Dale: “Nangin tunay gid nga abyan ni Peteli si Jehova, kag nagahibi gid sia kon nagasugilanon kami tuhoy sa tion nga ‘ang mga igdulungog sang mga bungol mabuksan.’ ”​—Isa. 35:5.

 Samoa: Ang payunir nga si Elena, nagdumala sing pagtuon sa Biblia sa isa ka Metodista nga babayi nga ang balay nahamtang sa atubangan sang balay sang ila pastor. Sa wala sing dingding nga bahin sang balay nila ginahiwat ang pagtuon, nga bansada gid sa pastor. Isa ka adlaw sang nagatuon sila, nagpalapit ang pastor. Ginpamangkot sia sang estudyante sa Biblia kon ano ang iya tuyo. Nagsabat ang pastor: “Ginapangita ko ang akon idik. Wala ko na ini nakita sing halos isa ka bulan.” Namangkot sia kay Elena, “Nahibaluan mo bala kon ngaa naglayas ang akon idik?” Abi ni Elena literal nga idik ang iya ginatumod, amo nga nagsabat sia nga basi naglayas ang iya idik bangod wala nagabag-o ang iya ginabahog. Nagpanugda sia nga bag-o naman ang iya ibahog. Nakibot si Elena sang gintudlo sang pastor ang estudyante sa Biblia kag nagsiling, “Sia amo ang akon idik!” Nagdugang pa sia: “Ginkawat mo sia sa akon. Untatan na ninyo ini nga pagtuon sa gilayon kag indi na gid kamo magtuon.” (Impluwensiado gid ang mga pastor sa simbahan sa mga baryo sang Samoa.) Naghibi ang babayi. Gin-uluuluhan sia ni Elena kag ginpaathag nga gintagna sang Biblia nga matabo ini sa mga nagatuon sa Biblia.

Ginbag-o ni Elena ang iskedyul kag ang hulot diin sila nagatuon. Nagpaathag sia: “Sa baylo nga magtuon sa gua sa atubangan sang balay, nagsaylo kami sa diutay nga hulot sa likod sang balay sang babayi. Magin-ot gid diri, apang mapadayon namon ang pagtuon. Ginhimo namon ini sa sulod sang duha ka bulan. Nian isa ka adlaw, pagkatapos sang nagabukas nga pangamuyo, nakibot kami sang gulpi lang nag-ulhot ang pastor. Abi ko nagkari sia agod untaton ang pagtuon, apang nagbag-o sia.”

Nag-entra sia sa pagtuon kag namangkot pa gani. Pagkatapos sang pagtuon, nagsiling sia sa babayi: “May isugid ako sa imo. Kagab-i, nagpabanwa kami, kag sang nagapauli na kami, naaberya ang amon salakyan malapit sa isa ka baryo. Ang pamatan-on nga mag-asawa kag ang isa ka pamatan-on nga lalaki nagbulig sa pagkay-o sang amon salakyan. Indi mag-andar ang  salakyan, gani nagtanyag sila nga idul-ong kami sang naparada ko na ang akon salakyan sa ila balay. Sang nagsakay na ako sa ila salakyan, nakita ko ang mga Lalantawan kag iban pa nga publikasyon. Nagpamensar ako nga basi ini nga mga tawo pareho sing relihion sa babayi nga nagaduaw sa imo.”

Nagsabat ang babayi sa iya: “Siempre, husto ka. Mga kabataan sila ni Elena.” Nangayo sia sing pasaylo kag nagsiling: “Ipadayon ang inyo ginahimo. Karon nahibaluan ko na nga mabuot kag mahigugmaon ang mga Saksi ni Jehova. Patawara ako sa akon ginsiling. Ini nga sahi sang programa magabulig sa mga katapo sang akon relihion nga magbag-o.” Sugod sadto, sa baylo nga magtuon sa diutay, magin-ot nga hulot sa likod sang balay, ginahiwat na nila ini sa mas mabugnaw kag bukas nga bahin sa atubangan sang balay, nga bansada sa pastor, nga wala na nagatublag sa ila.

Saipan: Sa sini nga isla, nagtudok gid sa tagipusuon sang babayi nga si Helen ang kamatuoran sang Ginharian sang Dios. Ginatun-an sia sa Biblia sang isa ka misyonera kag luyag niya ipakita ang iya apresasyon sa mga butang nga iya natun-an. Sang nagahingapos ang isa ka pagtuon, ginhatagan ni Helen ang misyonera sang isa ka gamay nga bag nga panapton kag nagsiling, “Pigado lang ako, apang luyag ko nga iamot ini sa hilikuton nga pagbantala.” Nasulod sa bag ang isa ka matahom nga perlas nga halin pa sa Pohnpei, ang isla nga iya natawhan. Nagpanugda si Helen nga ibaligya ang perlas kag iamot ang bili. De-kalidad ini nga perlas, kag ginbakal ini sang tag-iya sang tiendahan sang alahas sing $100. Ginhatag ang bili sini kay Helen agod sia ang magdesisyon kon pila ang iya iamot, apang wala niya ginbaton ang kuarta, nga nagasiling, “Ihulog ina tanan sa kahon-alamutan.” Ano ang nagpahulag sa iya kaalwan? Subong sa parabola nga ginsaysay ni Jesus, nasapwan ni Helen ang perlas nga mas mataas sing balor, ang paglaum sa Ginharian.​—Mat. 13:45, 46.

 ◼ EUROPA

Kadamuon sang pungsod: 46

Populasyon: 731,536,437

Kadamuon sang manugbantala: 1,498,142

Kadamuon sang pagtuon sa Biblia: 717,797

Belarus: Nagaeskwela ang mag-asawa nga espesyal payunir nga sanday Pavel kag Mayya sa eskwelahan para sa mga payunir. Isa ka gab-i naglakatlakat sila, nga wala sing plano nga manaksi. Apang, dala nila ang bukleta nga Good News for People of All Nations. Sang nakita nila ang duha ka dumuluong, ginpanaksihan nila sila. Nahibaluan nila sang ulihi nga taga-Pakistan sila kag nagpamulong sing Urdu. Nadumduman nila nga dala nila ang bukleta, ginpabasa nila ini sa mga dumuluong. Ang isa interesado kag nagsugot nga magtuon sa Biblia. Sa sina man nga semana nagtambong sia sa miting sa kongregasyon.  Nangin makapalig-on gid para sa iya ang pagpakig-upod sa katawhan ni Jehova, amo nga napahulag sia sa pagsiling, “Sa tatlo ko ka tuig sa Minsk, amo ini ang una nga tion nga nakig-upod ako sa tunay nga mga Cristiano.” Nagpadayon ang tawo sa pagtuon sa Biblia.

Britanya: Isa ka gulang nga bulag si Richard kag may nahanas nga ido nga nagagiya sa iya nga ginhingalanan nga Irvin. Problema gid para kay Irvin ang pamalaybalay nga hilikuton bangod pinasahi sia nga ginhanas sa pagdumdom sang tanan nga ginakadtuan ni Richard. Sang ginsugid ni Richard ang kahimtangan sa mga nagahanas sang ido, ginpaathag nila nga ini nga sahi sang ministeryo mabudlay gid para kay Irvin. Ginrekomendar nila nga updon ni Richard si Irvin sa duog sang negosyo, agod mangin pamilyar ang ido sa nanuhaytuhay nga duog nga iya pirme ginakadtuan. Nakulbaan gid si Richard sa pagpanaksi sa duog sang negosyo, apang sa bulig ni Irvin nangin hanas sia sa sini nga sahi sang pagpanaksi.

Hungary: Nagsulat ang isa ka manugtatap sang sirkito: “Sang Mayo 2004, nasugilanon namon si Csaba nga nagapanghardin. Nagsiling sia nga miembro sia sang konsilyo sang isa ka simbahan. Nagbiya kami pagkatapos sang malip-ot nga pag-istoryahanay. Nagbalik kami pagligad sang duha ka adlaw nga dala ang Ihibalo nga libro kag nagsugod sa pagtuon sa Biblia sa iya. Sang manugbiya na kami, nagsiling sia nga may guba ang iya dabukan. Nagsiling ako nga may kilala ako nga utod nga maayo magkay-o sini kag nga ihatag ko ang numero sang telepono ni Csaba sa iya. Sang nagbalik ang mga utod agod tatapon ang interes, gin-uli ni Csaba ang libro kag nag-untat sa pagtuon. Sang ulihi ang utod nga ginrekomendar ko nga manugkay-o sang dabukan nagkadto sa ila agod kay-uhon ini. Tatlo ka adlaw ang ginhinguyang sang utod sa pagkay-o sang dabukan ni Csaba, kag sa sina nga tion nasugilanon niya si Csaba sing inoras tuhoy sa kamatuoran. Ginpadayon  sang tawo ang iya pagtuon kag nagbuylog ang iya asawa. Sang Mayo 2005, nangin di-bawtismado sia nga manugbantala. Sa tion sang akon pagduaw sa kongregasyon, gin-updan ko sia sa iya una nga pagpakigbahin sa ministeryo. Madasig gid ang iya pag-uswag sa espirituwal bangod sang pagkamainabyanon, mabuligon nga panimuot sang mga utod kag sang kinatuhayan nga iya nakita sa paggawi sang mga Saksi kag sang iya kaupod sa relihion anay.”

Belgium: Nagduaw liwat ang isa ka utod sa isa ka babayi nga ang balay yara sa pamusod sang kalye, kag sa ganhaan lang sila pirme nagasugilanon. Isa ka adlaw sang manugbiya na ang utod sa sini nga balay, isa ka lalaki ang nagpalapit sa iya kag nagsiling: “Nagsiling ang akon abyan nga indi kamo dapat pakig-updan nga mga Saksi ni Jehova. Apang ginpangapinan ko kamo kag nagsiling nga indi ina matuod. Sugiran ko ikaw sang matuod. Madamong beses nga kon ginalagaw ko ang akon ido, nagadulog ako diri sa pamusod kag nagapamati sang inyo sugilanon sang babayi sa sina nga balay. Pirme mo ginahambal ang tuhoy sa pagkabanhaw kag Paraiso. Luyag ako makahibalo sang dugang pa tuhoy sa sini. Nagapaayo sa ospital ang akon asawa bangod ginlambatan sia kag ginbuno sing 17 ka beses. Desperado gid ako, kag indi ko na gid mahibaluan ang akon himuon.” Nasugdan ang pagtuon sa Biblia sa sini nga tawo.

Italya: Isa ka hapon, temprano pa nga nagpauli ang isa ka utod gikan sa iya trabaho. Sang malapit na lang sia sa ila balay, nag-overtake sa iya ang duha ka lalaki nga nagasakay sa motorsiklo. Ang nagaangkas nagtaya sang armas sa iya kag nagsenyas sa utod nga padulugon ang iya salakyan, amo nga nagdulog sia. Nian, ginbuksan sang tawo ang salakyan kag nagsiling sa utod nga manaug kag ihatag ang tanan niya nga kuarta sa iya mga bulsa. Nagtuman ang utod. Nian nagsulod ang tawo agod padalaganon ang salakyan. Apang, sang nakita niya ang isa ka  Tuigan nga Libro Sang mga Saksi ni Jehova sa atubangan, namangkot sia, “Saksi ni Jehova ka?”

Nagsabat ang utod, “Huo, ngaa?” Wala na nagsabat ang tawo, nanaug ini sa salakyan, kag nangayo sing despensa sa natabo, kag nagsiling sa utod nga magsakay na sa iya salakyan. Samtang, ang isa sa mga kawatan nagsiling sa iya kaupod nga ibalik ang kuarta nga ila ginkuha.

“Sa liwat, pasayluha kami,” siling sang tawo nga nagauyat sang armas samtang ginasira niya ang puertahan sang salakyan para sa utod. Wala nagsiling ang mga tawo kon ngaa nagbag-o ang ila pensar, apang maathag nga ginatahod gid nila ang mga Saksi.

Sweden: Sang Abril 2003 nasalapuan sang isa ka manugbantala ang isa ka tawo nga may Ihibalo nga libro. Mga 90 anyos na ang tawo. Sang bataon pa sia naglakbay sia sa bug-os nga pungsod kag nangretrato sang madamo nga simbahan. Bangod sini ginhimo sia nga isa ka dungganon nga katapo sang isa ka grupo sang Swedish Church. Namangkot ang manugbantala kon natalupangdan niya ang ngalan sang Dios sa bisan diin nga simbahan kag nagpakita sa iya sang retrato sang ngalan sang Dios sa isa sa mga simbahan sa Sweden. Bangod sini nangin interesado ang tawo. Ginbaton niya ang isa ka pagtuon sa Biblia, kag nalipay gid sia sa sini. Nagsiling sia: “Ginabasa ko na ang Biblia sugod pa sang bata ako, kag nagapati ako nga madamo ang nahangpan ko sa sini. Apang nahangpan ko nga indi gid ini makatupong sa akon nahibaluan karon.” Nagtambong dayon sia sa mga miting sa Kingdom Hall. Sang Hunyo 2005, sa edad nga 91, ginhatag niya ang iya una nga bahin sa Teokratikong Eskwelahan Para sa Ministeryo​—isa ka pagbasa sa Biblia. Isa na sia karon ka di-bawtismado nga manugbantala kag nagatinguha agod mabawtismuhan. Namati sia sa mga Saksi ni Jehova sang 2003 bangod sang isa ka programa sa TV nga nagapakalain sa aton. Luyag niya nga makahibalo sang kamatuoran tuhoy sa aton, kag nahibaluan na niya ang kamatuoran.

[Retrato sa pahina 43]

Svetlana, Kyrgyzstan

[Retrato sa pahina 47]

Lucy, Uganda

[Retrato sa pahina 52]

Graciela, Venezuela

[Retrato sa pahina 55]

Si Renildo upod sa iya pamilya, Brazil

[Retrato sa pahina 57]

Sanday Dale kag Peteli, Tuvalu

[Retrato sa pahina 57]

Si Cecilia, New Zealand

[Retrato sa pahina 58]

Si Elena, Samoa

[Retrato sa pahina 61]

Sanday Pavel kag Mayya, Belarus

[Retrato sa pahina 61]

Si Richard kag ang iya ido, nga si Irvin, Britanya