Mga Binuhatan Sang mga Saksi ni Jehova sa Moderno nga Tion

Romania

Ang mga espiya, mga impormante, nagapakunokuno nga mga kauturan, pagpaantos, pagpangpriso, kag pilit nga pagpangabudlay​​—amo ini ang pila ka pamaagi ni Satanas sa iya napaslawan nga mga pagtinguha sa pagpaluya sa tagsa ka Saksi ni Jehova kag sa pagbungkag sang ila organisasyon sa Romania. Basaha ang tuhoy kay Ioan, nga nangamuyo sing mabaskog antes i-firing squad. Amo man ang kasaysayan ni Teodor, nga upod sa iban pa nga mga Saksi nagaamba sang ambahanon sang Ginharian samtang nagainulan sang mga bomba sa ila palibot. Makatuon kita sa mga indibiduwal nga nagatiniil lang sa paglakat sing mga 100 kilometros agod makatambong sa mga miting. Kag hibalua kon ngaa ang isa ka bata nagsiling, “Tay, daw nagapanimaho ka na sang adlaw-adlaw nga teksto a!”

Zambia

Mga pagdumili sang gobierno, pag-deport sa mga misyonero, kag pagpahalin sa eskwelahan​​—pila ini sa mga kabudlayan sang aton mga utod sa Zambia. Sa sini nga kasaysayan matun-an naton ang tuhoy sa isa ka estudyante nga bata nga babayi nga maisugon nga nagdepensa sang maayong balita sa korte, ang isa ka lupog nga refugee nga nagahulag nga “mas madasig pa sangsa agila” kag ang isa ka Estudyante sang Biblia nga ginlatigo. Mabasa naton ang tuhoy sa nasunog nga Land Rover, ang ginpalupok nga bungsod, ang duog tilipunan nga daw itom nga kabayo tan-awon. Ang mga lamok, mga tsetse nga langaw, mga man-ug, kag mga leon bahin tanan sang kasaysayan kon paano ang mga kauturan nagpangabudlay sa pagbantala sang maayong balita sa sining matahom nga pungsod sa Aprika.