Sulat Halin sa Nagadumala nga Hubon

“KABAY nga may yara kamo di-bagay nga kaayo kag paghidait gikan sa Dios nga aton Amay kag kay Ginuong Jesucristo.” Amo ini ang panamyaw ni Pablo sa kalabanan nga sulat niya sa mga kongregasyon. Amo man sini ang buot namon ipalab-ot sa inyo tanan.​​—Efe. 1:2.

Mapinasalamaton gid kita sa di-bagay nga kaayo ni Jehova paagi sa halad nga gawad ni Cristo Jesus! Paagi sa gawad, natigayon naton ang kalahamut-an nga tindog sa atubangan sang Dios. Indi gid naton ini matigayon paagi sa aton lamang nga mga paninguha, bisan pa maukod gid kita sa pagtuon sa Biblia, sa pagbantala sang maayong balita, ukon sa paghimo sing maayong mga buhat. Matigayon naton ang kapatawaran sang aton mga sala kag ang kabuhi nga walay katapusan, indi subong kabaylo sa aton mga panikasog, kundi mga dulot nga resulta sang di-bagay nga kaayo ni Jehova paagi kay Jesucristo.​​—Roma 11:6.

Nagsulat si Pablo sa mga masigkatumuluo: “Nagapakiluoy . . . kami nga indi ninyo pagbatunon ang di-bagay nga kaayo sang Dios kag wasihon ang katuyuan sini. Kay nagsiling sia: ‘Sa tion nga nahamut-an ginpamatian ko ikaw, kag sa adlaw sang kaluwasan gintabangan ko ikaw.’ Yari karon! Karon amo ang tion nga labi pa nga nahamut-an. Yari karon! Karon amo ang adlaw sang kaluwasan.” May “tion nga nahamut-an” antes sang kalaglagan sang Jerusalem sang unang siglo. Naluwas sa espirituwal ang mga bunayag nga  nagahigugma kay Jehova. Nagresulta ini sa pisikal nga kaluwasan sa mga matutom nga nagbiya sa Jerusalem antes sang kalaglagan sini sang tuig 70 C.E.​​—2 Cor. 6:​1, 2.

Amo man karon, nagakabuhi kita sa “tion nga nahamut-an” kag sa “adlaw sang kaluwasan.” Ang mga ginabaton ni Jehova subong iya mga alagad kag naluwas sa espirituwal nagapaabot sang pisikal nga kaluwasan sa tion sang “dakung adlaw ni Jehova” nga malapit na gid matabo.​​—Sof. 1:14.

May daku kita nga responsibilidad tuhoy sa nagapakari nga adlaw ni Jehova. Paandaman naton ang mga tawo tuhoy sa sini kag buligan ang mga bunayag nga makabenepisyo sa di-bagay nga kaayo ni Jehova agod nga maluwas man sila. Gin-apresyar gid ni Pablo ini nga responsibilidad. Nagsulat sia: “Sa pagkamatuod, kailo ako kon indi ko pag-iwali ang maayong balita!” Ginpabutyag man niya kon ano ang iya balatyagon sa sini nga pinamulong: “May utang ako . . ., sa mga maalam kag sa mga buangbuang: gani ginahandum ko gid nga iwali ang maayong balita.”​​—1 Cor. 9:​16; Roma 1:​14, 15.

Sukton kita ni Jehova kon pabay-an naton ining importante nga hilikuton sa pagpaandam sa mga tawo. Nahibaluan gid naton ang ginsiling ni Jehova kay manalagna Ezequiel: “Anak sang tawo, ginhimo ko ikaw nga manugbantay sa panimalay sang Israel, kag dapat mo pamatian ang akon isiling kag dapat mo sila paandaman gikan sa akon. Kon magsiling ako sa isa nga malauton, ‘Mapatay ka gid,’ kag wala mo sia ginpaandaman kag magpamulong sa pagpaandam sa isa nga malauton gikan sa iya malaut nga dalanon sa pagtipig sa iya nga buhi, sia subong malauton, mapatay  sa iya kalautan, apang ang iya dugo pagasukton ko sa imo kaugalingon nga kamot.”​​—Ezeq. 3:​17, 18.

Ining tion sang katapusan nga mga adlaw mabudlay gid pakigbagayan. Mabudlay balansehon ang mga hilikuton sa pamilya, sekular, kongregasyon, kag pagbantala. Luwas pa, madamo sa inyo ang nagabalatian, may depresyon, tigulang na, kag ginapamatukan pa gani. Ang kalabanan sa inyo “ginabug-atan.” Luyag namon ipabutyag ang amon patugsiling sa inyo, nahisanto sa ginsiling ni Jesus: “Kari sa akon, kamo tanan nga ginabudlayan kag ginabug-atan, kag paumpawan ko kamo.” (Mat. 11:28) Ginapasalamatan gid namon kamo sa inyo panikasog nga ipadayon ang matutom nga pag-alagad kay Jehova walay sapayan sang dalagku man ukon magagmay nga mga kabudlayan.

Subong resulta sang inyo makugi nga pagbantala kag pagtudlo nga may pagpakamaayo ni Jehova, 4,762 ang promedyo nga nabawtismuhan sa bug-os nga kalibutan kada semana. Sang nagligad nga tuig sang pag-alagad, 1,375 ka kongregasyon ang natukod. Nagalaum kag nagapangamuyo gid kami nga ang bag-o nga libro nga Ano Gid ang Ginatudlo Sang Biblia?, nga matigayon sa kapin sa 120 ka lenguahe, nga makabulig sa minilyon nga makatigayon sang di-bagay nga kaayo kag paghidait gikan kay Jehova sa sining “adlaw sang kaluwasan.”

Palangga gid kamo sang Nagadumala nga Hubon kag ginapangamuyo gid namon kamo. Nagapasalamat man kami sang inyo mga pangamuyo para sa amon.

Ang inyo mga kauturan,

Nagadumala nga Hubon sang mga Saksi ni Jehova