Talalupangdon nga mga Hitabo sang Nagligad nga Tuig

LAPNAG gid ang kinaugali nga kalamidad sang nagligad nga mga tuig, kag nalakip sa sini ang 2005 nga tuig sang pag-alagad. Siempre pa, naapektuhan man sini nga mga trahedya ang aton mga kauturan. Apang subong sang makita naton, ang mga pagtilaw magapahulag sa pagpakita sang Cristianong gugma, nga nagapalig-on sang paghiliutod kag nagaganyat sa mga bunayag sing tagipusuon sa kamatuoran.​—Mal. 3:​18; Juan 13:35.

Ang paglapnag sang kalamidad nagpahulag man sa madamo nga tawo nga pamensaron sing serioso ang palaabuton kag kon ano gid ang importante sa kabuhi. Busa, pribilehiyo gid naton nga buligan ini nga mga tawo sa paghangop sang kahulugan sang nagakahanabo karon paagi sa pinasahi nga kampanya sa pagpanagtag  sang Magpadayon sa Pagbantay! nga brosyur. Sa madamo nga pungsod, ang kampanya nagsugod sang Oktubre 18, 2004, kag may pila ini ka maayong resulta.

Kampanya sa Magpadayon sa Pagbantay!

Argentina: “Kon may kalamidad, sin-o ang maluwas​—ang malauton, ang mabuot, ukon ang nagapamati sa paandam?” Amo sina ang epektibo nga introduksion sang isa ka utod nga babayi sa pagtanyag sang Pagbantay! nga brosyur sa teritoryo nga madamo ang indi interesado.

Ang utod nga si Juan nakapahamtang sing brosyur sa isa ka 16-anyos nga gilayon nagbasa sini kag malipayon nga nagsugid sang iya natun-an sa iya amay. Bangod nalangkag nga makatuon pa gid, ginbasa ini sang amay kag gintan-aw man ang mga teksto. Nagdayaw gid sia, amo nga gintun-an niya ang brosyur upod sa iya pamilya. Sang nagbalik si Juan, gintanyagan niya ang tawo sing walay bayad nga pagtuon sa Biblia. “Amo gid ina ang amon kinahanglan​—isa ka pagtuon sang pamilya sa Biblia,” sabat sang tawo. Busa, nasugdan ang pagtuon.

Pransia: Ginhatagan ni Jocelyne sang brosyur nga Magpadayon sa Pagbantay! si Alicia, isa ka pamatan-on nga babayi nga nagatuon anay. Malipayon nga ginbaton niya ang brosyur kag nagsugot nga tun-an ini upod kay Jocelyne. Namat-od man si Alicia nga basahon niya sing regular ang Biblia. “Pagligad lang sang duha ka semana,” siling ni Jocelyne, “nagsiling si Alicia nga naghibi gid sia sa kasaysayan sang Biblia tuhoy sa kabuhi ni Jesus.”

Ginhambalan ni Alicia ang iya ginapuyopuyo nga luyag niya nga magpakasal na sila agod mapahamut-an ang Dios kag luyag niya nga mangin Saksi ni Jehova. Nakibot gid sia kay nagsiling ang iya ginapuyopuyo: “Sige. Indi ko ikaw pagpunggan sa paghimo kon ano ginapatuman sang Dios.” Pagkatapos sadto nagtambong si Alicia sa iya una nga sirkito nga asambleya.

Madagascar: May duha ka bata nga babayi si Nana. Sang tin-edyer pa sia, nagatambong sia sa Cristianong mga miting upod sa  iya mga ginikanan apang nauntat ini sang nagbugnaw sila sa pag-alagad kay Jehova. Sa tion sang pinasahi nga kampanya, ginbaton ni Nana ang isa ka brosyur gikan sa isa ka utod nga misyonera kag nagsugot nga magtuon sa Biblia. Karon, nagatambong na sia sa tanan nga miting upod sa iya duha ka bata kag nagatinguha nga mangin di-bawtismado nga manugbantala. Dugang pa, ang iya mga ginikanan nagsugot man nga magtuon sa brosyur. Ang 14-anyos nga manghod nga lalaki ni Nana nga si Josia, nagadumala na gani sing pagtuon sa iya amigo nga tin-edyer man, nga regular nga nagatambong na karon sa Cristianong mga miting.

Nigeria: “Ang pagkapatay sang akon iloy, nga natabo sa tion sang kampanya, naghatag sa akon sing kahigayunan sa pagpanaksi sa amon baryo,” siling sang isa ka lalaki nga payunir. “Antes sang lubong, ang mga paryente nagahinibi kag nagahapa sa duta. ‘Ngaa ginahimo ninyo ina?’ pamangkot ko. ‘Ang kamatayon ni Nanay masakit sa aton tanan, apang nagapahuway sia sa kamatayon. Magabangon sia sa pagkabanhaw.’ Bisan pa nagahilibion ako, ginbuksan ko ang Pagbantay! nga brosyur sa pahina 8 kag ginpaathag ang danyag nga pagkabanhaw. Subong resulta, nakapahamtang ako sing 195 ka brosyur, lakip ang 45 ka Pagbantay! Sa tion sang lubong, upod sa pila ka utod nakapahamtang kami sing 100 ka kopya sang Mayo 1, 2005, nga Lalantawan, nga may topiko nga ‘Mabuhi Pa Bala Liwat ang mga Patay?’ ”

Rusya: Ang espesyal payunir nga si Irina sa Zelenogradsk, nagsulat: “Ako kag ang isa ka utod nga babayi nagtanyag sang Pagbantay! nga brosyur sa babayi nga si Alla, nga nagpadayon sa amon. Wala na sing pulos ang kabuhi para kay Alla bangod sang kapintas sang mga tawo. Ginkontrata namon sia nga mabalik kami. Nagligad ang pila adlaw, samtang nagalakat kami sang amo man gihapon nga utod, may nanawag sa amon nga babayi. Si Alla gali. Nagpasalamat gid sia sa amon bangod sa brosyur, ginkuot niya ini sa iya bag, kag ginpakita sa amon ang mga punto nga iya ginkuritan. Regular sia nga ginatun-an karon sa Ginapatuman nga brosyur.”

 Sa iban naman nga duog sa Rusya, si Vera kag ang iya bana nga si Vitaliy, naghapit sa isa ka tiendahan sa higad sang dalan nga ginaobrahan sang kilala ni Vera nga si Lyuda. Nagsiling na si Lyuda nga indi niya luyag makighinun-anon sa Biblia sa mga Saksi, gani nangalag-ag si Vera sa pagtanyag sing brosyur. Apang bangod sa pagpalig-on ni Vitaliy, gintanyag niya ini, kag sa iya kakibot, napahamtang niya ang brosyur. Pagligad sang duha ka adlaw ginteleponohan sia ni Lyuda. “Kon madamo ako sing natun-an sa isa ka brosyur,” siling niya, “ano pa gid ayhan sa isa ka regular nga pagtuon sa Biblia!” Walay sapayan sang pagpamatok sang iya mga paryente, nagsugod gilayon si Lyuda sa pagtuon sa Biblia kag sa pagtambong sa mga miting. Nagtuon man ang iya bata nga lalaki kag babayi. “Daw indi mapatihan,” siling ni Vera, “nga sang nagligad nga pila ka tuig, ginhatagan ko si Lyuda sang Ihibalo nga libro apang indi sia interesado. Apang, ang Pagbantay! nga brosyur nagpukaw sang iya interes.”

Venezuela: Nasugilanon sang asawa sang isa ka manugtatap sang sirkito ang isa ka tawo, ang iya asawa kag ang ila apat ka bata sa ganhaan. Ginapakita ang laragway sang Paraiso sa pahina 16 kag 17 sang Pagbantay! nga brosyur, ginpadaku sang utod ang kinahanglanon nga tun-an sang bug-os nga pamilya ang tuhoy sa Dios. Nian gin-agda niya sila nga anom sa miting sa Huebes sang gab-i kag ginkontrata nga sugaton sila sa malapit nga dululugan sang bus. Nagkadto ang utod kag ang iya bana sa dululugan sang bus sa ginkasugtan nga oras, apang wala nila sila nakita. Lipod sa ila, sa mas temprano nga bus nakasakay ang pamilya kag yara na sa Kingdom Hall! Lima ka katapo sini nga pamilya ang regular na karon nga nagatuon sa Biblia kag nagatambong sang mga miting, bisan pa malayo kag mahal ang plete sa bus.

Isa ka payunir nga babayi ang nanuktok sa isa ka balay, apang wala sing nagbukas. Nagbalik sia sang ulihi kag naistorya niya ang isa ka tigulang nga lalaki, nga bag-o lang naggua. Nagsiling sia nga medyo bungol na sia amo nga indi niya mabatian ang mga nagapanuktok sa ila balay ukon atrasado na sia sa pagbukas amo nga indi niya maabtan ang mga nagapanagbalay. Ginhatagan sia  sang utod sing kopya sang Pagbantay! nga brosyur kag gin-agda sa miting sa kongregasyon.

Sa tion sang miting, ginsaysay sang utod ini nga eksperiensia, nga wala nakatalupangod nga yara gali ang tigulang! Karon, regular ang iya pagtuon sa Biblia upod sa utod nga lalaki, pagtambong sa tanan nga miting, kag luyag na nga magbantala sang maayong balita. Sang ginpamangkot kon ngaa nagtambong sia sa miting, ginbayaw niya ang Magpadayon sa Pagbantay! nga brosyur kag nagsiling, “Bangod sini nga brosyur!”

Pagbadbad Sang Biblia

Sugod sang ulihi nga bahin sang katuigan 1800, nagbakal ang organisasyon ni Jehova sing tigdamo nga Biblia kag ginpanagtag ini sa mga interesado, nga kon kaisa 35 porsiento lang ang bili sa aktual nga presyo. Sugod sang 1926, nag-imprinta kag nag-bind ang mga kauturan sang pila ka Biblia sa ila kaugalingon nga imprintahan, lakip ang The Emphatic Diaglott, King James, kag American Standard nga mga bersion. Nian sang 1961, ginpagua ang isa ka tomo sang New World Translation of the Holy Scriptures sa Ingles.

Kamusta naman sa iban nga lenguahe? Sang temprano nga bahin sang ika-20 nga siglo, ang mga sanga nagpamakal sang mga nabadbad na nga Biblia sa nanuhaytuhay nga manugbalhag kag ginpaulian lang nila ini. Ang pila sini nga Biblia ginbadbad sang sinsero nga mga manugbadbad nga naggamit pa gani sang ngalan sang Dios​—nga Jehova​—sa ila lenguahe. Apang, sang ulihi ginkuha sang kalabanan nga manugbadbad ang ngalan sang Dios sa ila mga badbad. Mas malala pa ang ginhimo sang iban bangod gin-islan nila ang ngalan sang Dios sang lokal nga mga diosdios! Halimbawa, ang Biblia nga Chichewa nga Buku Loyera, nga ginagamit sa Malawi, Mozambique, kag Zambia, nagbadbad sang Tetragrammaton subong “Chauta,” ang dios sang isa ka tribo nga nagakahulugan “Gamhanan nga Manugpana.”

Madamo pa nga pagpatiko ang ginhimo. Halimbawa, ang isa ka Aprikano nga manugbadbad nagpatuhoy kay Lucas nga isa  ka albularyo. Ang Tuvaluan Bible nagpinataka sa pagbadbad sa Judas 23, nga nagasiling: “Ipakita ang mabaskog nga gugma sa mga sodomanhon; maghalong lang nga indi maapektuhan sang ila pagka-sodomanhon.” Apang ang orihinal nga teksto wala nagsambit sang mga sodomanhon ukon pagka-sodomanhon!

Sang nagligad, nagpanguna ang mga Bible society sa pagbalhag kag pagpanagtag sang mga Biblia. Apang, sining karon lang ginsaylo sang pila ka Bible society ang ila kinamatarong sa pag-imprinta kag pagpanagtag sa mga relihion sang Cristiandad. Luwas nga ginpamahalan nila ini, indi luyag sang mga relihion sa pila ka pungsod nga makabakal sang ila mga Biblia ang mga Saksi ni Jehova. Halimbawa, sa Kyrgyzstan, ginapanag-iyahan sang Protestante ang kinamatarong sa moderno nga badbad sang Kirghiz nga Cristianong Griegong Kasulatan. Kon magbakal ang mga kauturan sang Biblia, pirme sila ginapamangkot, “Saksi ni Jehova ka?” ukon “Kabalo ka bala sang ngalan sang Dios?” Kon maghando sila, indi sila pagbaligyaan.

Bangod sini kag sang iban pa nga rason, nangin prioridad sang Nagadumala nga Hubon ang pagbadbad sang Biblia. Sa karon, ang kompleto nga New World Translation matigayon na sa 35 ka lenguahe, kag ang New World Translation of the Christian Greek Scriptures, sa 20 pa ka lenguahe. Sining karon lang, sa 33 ka grupo nga manugbadbad sang Biblia sa bug-os nga kalibutan, 19 ang nagabadbad sang Hebreong Kasulatan, 11 sa Cristianong Griegong Kasulatan, kag 3 sa Reference Bible. Kinaandan nga ang grupo sang manugbadbad sang Biblia may tatlo tubtob anom ka miembro. Bangod sang de-kompyuter nga mga kagamitan sa pagbadbad kag bag-o nga mga pamaagi, indi maabtan sing duha ka tuig kag matapos na sang pila ka grupo ang Cristianong Griegong Kasulatan.

Ano ang ginbatyag sang mga kauturan sang nabaton nila ang New World Translation sa ila lenguahe? Ang isa ka payunir sa Albania nagpabutyag sang nabatyagan sang madamo. “Naghibi ako,” siling niya. “Wala ko pa gid anay nabatyagan ini kon  nagabasa ako sang Pulong sang Dios. Luyag ko gid panginpuslan ang tagsa sini ka bersikulo!”

Mga Kaso sa Korte

Armenia: Narehistro ang mga Saksi ni Jehova sang Oktubre 8, 2004 pagkatapos sang 15 ka aplikasyon. Apang, ang pamatan-on nga mga utod ginapriso gihapon bangod nangindi sila sa pagsoldado pasad sa ila konsiensia. (Isa. 2:4) Nagalaum gihapon kami nga ini nga pagrehistro magatugot sa mga kauturan nga makatigayon sing kahilwayan sa relihion, kag makaimportar na sila sing mga literatura kag makahiwat sing mga kombension. Sa katunayan, sang Hunyo 2005, amo ini ang una nga higayon nga ginpahanugutan sang adwana ang gin-importar nga mga literatura sa Armenia kag ginhatag ini sa mga kauturan.

Austria: Kapin sa 30 ka tuig nga nagapakigbato sa korte ang mga Saksi ni Jehova para kilalahon sila sing bug-os subong relihion. Lima ka aplikasyon ang ginpasaka sa European Court of Human Rights. Sang Pebrero 1, 2005, nagdesisyon ang Korte nga tatapon ang duha ka kaso nga nagadalahig sa duha ka utod nga wala ginhatagan sing eksempsion sa pagsoldado subong mga ministro bangod wala ginkilala nga relihion ang mga Saksi ni Jehova. Sang Hulyo 5, nagsugot ang Korte nga binagbinagon ang kaso, apang wala pa mahibaluan kon ano ang desisyon.

Eritrea: Sang Enero 24, 2004, gin-aresto sang awtoridad ang 38 ka lalaki, babayi, kag kabataan nga katapo sang Kongregasyon sang Saba sa Asmara. Nagapangidaron sila sing 6 tubtob 94 anyos. Ang iban indi bawtismado. Pagligad sang tatlo ka gab-i sa presinto, ang pinakabata ginbuy-an. Ang 28 nga nabilin ginsaylo sa prisuhan sa gua sang Asmara kag ginbukot sa dalagku nga metal nga suludlan sang kargamento nga mainitan kon adlaw kag matugnawan kon gab-i. Sang Septiembre 2, 2004​—kapin sa pito ka bulan ang nagligad​—ang duha ka tigulang nga utod nga mga lalaki ginbuy-an, nagapangidaron sing 94 kag 87. Ang iban ginbuy-an man. Apang, 6 pa ang napriso upod sa 16 ka utod, ang 3 sa ila 11 ka  tuig na nga napriso. Palihug ipangamuyo ninyo ining pinalangga nga mga utod.​—Binu. 12:5.

Pransia: Suno sa report sang 2001 Tuigan nga Libro, ginpatuman sang gobierno ang bag-o nga buhis sa donasyon sang aton mga kauturan, lakip ang buhis sa nagligad nga apat ka tuig (1993-96)​—tanan sa sumada nga 60 porsiento sini, kag mga multa! Nag-apelar ang mga utod apang napierde sa manubo nga korte, sa apelasyon, kag sa korte suprema. Sang Pebrero 25, 2005, ginsang-at nila ini sa European Court of Human Rights, nga nagaapelar nga may maathag nga ebidensia sang relihioso nga pagpasulabi.

Republika sang Georgia: Nauntat na ang masingki nga paghingabot. Mahimo na maimportar ang aton literatura, kag wala na ginatublag ang Cristianong mga pagtilipon. Apang, madamo nga kaso sang mga pag-abuso sang una ang wala pa nahusgahan sa korte. Ang mga utod may apat ka panumbungon batok sa Georgia nga yara pa karon sa European Court of Human Rights. Tuhoy ini sa masingki nga paghingabot sa aton mga kauturan, pag-imbargo sang aton legal nga korporasyon, kag pagpatumbaya sang korte sa kaso. Sang Hulyo 6, 2004, ginkasaba sang Korte ang kaso nga Gldani Congregation of Jehovah’s Witnesses v. Georgia.

Alemanya: Sang nahugpong liwat ang pungsod, gintinguhaan sang mga kauturan nga matigayon ang kompirmasyon nga ang Religious Association of Jehovah’s Witnesses mangin isa ka legal nga korporasyon sa idalom sang kasuguan para sa publiko. Busa nagsugod ang 12-ka tuig nga pagpakigbato sa korte. Ang paborable nga desisyon sang Federal Constitutional Court sang 2000 nagsikway sang ideya nga ang Estado makapilit sa mga Saksi ni Jehova nga magmainunungon sa ila bisan pa nga supak ini sa ila Cristianong konsiensia. Nasolbar sang masunod nga mga kasaba ini nga problema. Sang Marso 24, 2005, ang Higher Administrative Court sang Berlin nagmando sa Estado sang Berlin nga hatagan sing kinamatarong ang mga Saksi ni Jehova subong isa ka korporasyon sa idalom sang kasuguan para sa publiko. Nagtinguha sa pag-apelar ang Estado sa sini nga desisyon.

 Rusya: Suno sa report sang 2005 Tuigan nga Libro, ang Golovinsky Intermunicipal District Court nagdesisyon sang Marso 26, 2004, nga dumilian ang aton tanan nga hilikuton sa Moscow. Sugod sadto, nagtuhaw ang mga problema sa mga kontrata sa pag-arkila sang mga duog nga hiwatan sang mga miting sang kongregasyon kag dalagku nga mga pagtilipon. Apang, may ginapanag-iyahan ang mga kauturan nga isa ka Kingdom Hall nga may lima ka awditoryum, nga ginagamit sang 44 ka kongregasyon kag 2 ka grupo. Bisan pa mahal kag mabudlay, ang 17 ka kongregasyon sa Moscow nagtipon sa gua sang siudad, samtang 31 ang naghiwat sang ila pila ukon tanan nga miting sa tigdiutay nga grupo sa pribado nga mga apartment. Kon kaisa ginapahog sila sang mga pulis, apang wala sing gin-aresto. Nag-apelar na tuhoy sa Marso 26 nga desisyon.

Sang Septiembre 9, 2004, ang isa ka berbal nga kasaba sa kaso ni Kuznetsov and Others v. Russian Federation ginhiwat sa atubangan sang European Court of Human Rights. Pagka-Oktubre 4, ginkaisahan sang Korte nga binagbinagon ang kaso. Tuhoy ini sa opisyal nga nagmando sa pulis nga untaton ang miting sang sign-​language nga kongregasyon sa Chelyabinsk sang Abril 2000. Nangin komplikado ang kaso bangod sang iregularidad nga natabo sa tion sang una nga kasaba. Ginahulat pa namon ang desisyon.

Turkmenistan: Ang tatlo ka utod​—sanday Mansur Masharipov, Atamurat Suvkhanov, kag Vepa Tuvakov​—ginsentensiahan sing tig-18 ka bulan nga pagkapriso bangod nangindi sila pasad sa ila konsiensia nga magsoldado. Ang ikap-at​—amo si Begench Shakhmuradov​—nga ginsentensiahan sing isa ka tuig. Sang Pebrero 16, 2005, nagsulat ang legal nga talatapan sang mga Saksi ni Jehova sa embahada sang Turkmenistan sa Washington, D.C., nga nagapangabay sang bug-os nga paghilway sa apat ka utod. Sang Abril 16, nahilway sila tanan bangod sang pinasahi nga amnestiya nga ginhatag sang presidente sang Turkmenistan. Sina nga tuig, gindakop kag gin-interogar sang mga pulis ang madamo nga kauturan sa pagtinguha nga piliton sila sa pagsikway sang ila pagtuo, apang napaslawan sila.

 Ang Tuig Sang Kinaugali nga mga Kalamidad

Sa pila ka pungsod, ang tuig 2004 amo ang may pinakadamo nga natabo nga kinaugali nga mga kalamidad. Ano ang epekto sini sa aton mga kauturan?

Carriacou, Grenada, kag Petite Martinique: Sang Septiembre 7, 2004, nagwaswas ang Bagyo nga Ivan sa sini nga mga isla, nga naghalit ukon nagguba sang kapin sa 90 porsiento sang kabalayan. Sing makapakibot, halos pareho lang ang kadamuon sang ginkawat nga mga butang sa halit sang bagyo! Nadula sang mga kauturan ang kalabanan sang ila mga pagkabutang bangod sang kalamidad, kag duha sa anom ka Kingdom Hall sa Grenada ang naguba. Wala sing utod ang grabe nga nasamaran.

Ang sanga sa Barbados, nga amo ang nagatatap sa sini nga mga isla, temprano pa nga nagpanugda sa mga kongregasyon nga binagbinagon sa Miting sa Serbisyo ang tuhoy sa paghanda kon may bagyo, bisan pa nga ang pinakaulihi nga bagyo sa sini nga rehiyon natabo sang 1955. “Ngaa mag-uyang kita sang tion sa paghinun-anon sa bagyo samtang mas madamo pa ang importante nga mga butang?” pamangkot sang utod nga babayi sa Grenada. Pagkatapos sang pagwaswas ni Ivan, nangako sia nga indi na gid niya pagduhaduhaan ang panuytoy sang organisasyon! Nagporma gilayon ang sanga sang relief committee, kag nagbulig man ang sanga sa Guyana kag Trinidad. Ginatos ka utod sa Caribbean kag Estados Unidos ang nagbulig sa pagpanukod liwat.

Jamaica kag Cayman Islands: Wala sing napatay sa mga utod sa Bagyo nga Ivan, apang madamo ang nadulaan sang materyal nga pagkabutang. Sang nag-ayoayo ang tiempo, ang mga gulang sa 199 ka kongregasyon sa sini nga isla nagpangita sa mga manugbantala. “Nagatinabangay gid kamo,” siling sang mga nakaobserbar.

Haiti: Sang tungatunga sang Septiembre, nagbaha sa naaminhan nga Haiti bangod sang Bagyo nga Jeanne, nga nagresulta sang mahaliton nga baha nga naglapaw sa baybayon nga banwa sang Gonaïves kag sa palibot nga mga duog. Bisan ang mga tawo yara  na sa atop sang balay, tagatuhod gihapon ang tubig! “Sa bug-os nga gab-i mabatian namon ang nagakarumpag nga mga balay kag ang singgitan sang mga tawo,” siling sang isa ka utod. Mga 2,900 ang napatay sa baha, lakip ang 83-anyos nga utod nga babayi.

Nagsiling ang isa ka utod, “Nagapasalamat gid ako kay Jehova nga ginbiyaan sang amon pamilya ang amon mga pagkabutang kag naluwas.” Pagligad sang pila ka adlaw, ang mga Saksi sa kaingod nga mga banwa nagdala sing mga pagkaon kag tubig nga ilimnon, kag nagpanagtag ang sanga sang isa ka trak nga suplay. Bisan pa sa hilikuton nga pagpaninlo, pagka-talipuspusan sang semana ang tanan nagtambong na sa Cristianong mga miting kag nagbantala. “Kuarenta ka boluntaryo ang nagkay-o sang amon balay sa sulod sang apat ka adlaw,” siling sang isa ka utod nga babayi. “Ginpinturahan pa gani nila ini! Nagdayaw gid sa sini ang akon pamilya nga indi Saksi. Nagtuon pa gani ang isa sa ila.”

Estados Unidos: Sang Agosto kag Septiembre 2004, ang estado sang Florida ginwaswasan sang apat ka bagyo: Charley, Frances, Ivan, kag Jeanne. a Kapin sa 4,300 ka balay sang mga kauturan kag kapin sa napulo ka Kingdom Hall ang naguba. Pagkatapos sang kalamidad, ang tsirman sang Florida’s Emergency Operations Committee (EOC) nangusisa agod mapat-od nga napanagtag sing nagakaigo ang suplay sang EOC. Nagsiling sia nga wala sing grupo nga mas organisado pa sangsa mga Saksi ni Jehova. Ginsilingan niya ang relief committee nga mahimo sila makakuha sing suplay nga kinahanglanon nila.

Temporaryo nga nagmiting ang isa ka kongregasyon sa isa ka bilding nga ila ginaarkilahan sing $50. Apang ini nga bilding naguba man sang nagwaswas ang una nga bagyo. Ginpakay-o ini, apang wala ini natapos sang mga nagkay-o. Gintanyagan sang mga utod ang tag-iya nga sila na lang ang makay-o, gintugutan sila kag gilayon nga natapos ini. Bilang balos, wala ginpabayad sing tatlo ka bulan nga arkila ang mga kauturan.

 Japan: “Ang [2004] amo ang may pinakamadamo nga bagyo nga nagwaswas sa Japan sugod sang 1551 nga rekord,” siling sang isa ka balita. Sa mga distrito sang Niigata kag Fukui, kapin sa 34,000 ka balay kag iban pa nga bilding, lakip ang isa ka Kingdom Hall, kag 60 ka balay sang mga utod ang naguba bangod sang lapnag nga mga bagyo sang Hulyo. Gilayon nga nagbulig ang ginatos ka Saksi gikan sa kaingod nga mga kongregasyon. Nakay-o ang Kingdom Hall sa sulod sang duha ka semana.

Ginbuligan man sang mga kauturan ang mga indi Saksi nga nagapuyo malapit sa Kingdom Hall sa pagtinlo sang ila mga balay. Nagahibi sa pagpasalamat ang isa ka tawo nga nagpamatok anay sa mensahe sang Ginharian. Naghatag pa gani ang gobierno sing sulat-pasalamat sa relief committee bilang pag-apresyar sa panikasog sang mga kauturan.

Sang ginwaswasan sang duha ka bagyo ang bug-os nga Japan sang Septiembre kag Oktubre, napatay sa baha kag pagtiphag sang duta ang isa ka utod nga lalaki kag isa ka utod nga babayi kag amo man ang rason nga namigado ang mga 100 ka Saksi. Nagbaha sa Toyooka City sa Distrito sang Hyogo. Bisan pa nga ginbahaan ang dalayunan sang manugtatap sang sirkito, nagbulig gihapon sia sa pag-organisar sang hilikuton sa pagbulig.

Sang ang kapin sa isa ka metro nga kadalumon sang lunangon nga tubig sa apartment sang isa ka babayi nga payunir nahubas na, gintinluan gilayon ini sang lokal nga mga manugbantala. Ang tag-iya, nga di-Saksi, natandog gid sa sini. Nagsiling ang utod nga babayi: “Nabatian ko lang ang mga hilikuton sa pagbulig sang organisasyon ni Jehova, apang karon ako mismo ang nakaeksperiensia sini. Ginapabugal ko gid ang aton Dios, nga si Jehova, kag ang iya organisasyon.”

Subong man sang Oktubre, ang mabaskog nga linog nagtay-og sa naaminhan nga bahin sang Japan, nga nagpatay sa 40 ka tawo kag napilitan nga magbakwit ang kapin sa 100,000 ka tawo. Wala sing utod ang nasamad ukon napatay, bisan pa nga kapin sa 200 ka pamilya ang naapektuhan kag naguba gid ang isa ka  Kingdom Hall. Natabo ini sang nagatipon ang mga gulang sa paghanda para sa sirkito nga asambleya. Ano ang ila ginhimo? Nahisuno sa panuytoy sang sanga talatapan kag sang lokal nga Regional Building Committee, gilayon nga gin-organisar nila ang pagbulig. “Ginpahanumdom sa amon nga tamdon ining hitabo subong sa pagtamod sang espirituwal nga mga tawo,” siling sang isa ka gulang. Nahiwat ang sirkito nga asambleya, kag bisan ang mga naapektuhan sang linog nagtambong man.

“Natandog gid ang tagipusuon sang akon bana bangod sang linog,” saysay sang isa ka utod nga indi Saksi ang bana kag nagub-an sang balay. Bangod nga nakita niya ang pagpanghikot sang Cristianong gugma sa tion sang hilikuton nga pagbulig, nagtambong ang bana sa miting sa kongregasyon sa una nga higayon. “Masaligan ko gid ang inyo organisasyon,” siling niya. “Indi gid kami sini pagpabay-an.”

Pilipinas: Sang nagwaswas ang bagyo sa bug-os nga probinsia sang Quezon kag Aurora sang hingapusan nga bahin sang 2004, napatay ang isa ka pamilya nga Saksi, lakip ang apat ka kabataan, sang ang ila balay nalapawan sang tubig kag lunang. Yara sa Quezon  ang manugtatap sang sirkito nga si Felimon Maristela sang natabo ini. “Nalapawan man sang tubig ang Kingdom Hall,” sulat niya, “kag naanod ang akon dyip. Nagtener kami nga mag-asawa upod sa duha ka utod nga lalaki sa atop sang tilipunan, samtang nagadapya ang tubig asta sa balisbisan sang tilipunan. Pagkadason nga adlaw, alas tres sang hapon, nanaug ako. Tagadughan gihapon ang tubig.”

Bisan pa delikado, ginkadtuan ni Utod Maristela ang mga manugbantala agod makita kon maayo ang ila kahimtangan. Sa Dingalan, Aurora, may tsansa na tani ang isa ka gulang sa pagbakwit sakay sa helikopter, apang nagpabilin sia agod mabuligan ang iya Cristianong mga kauturan.

Ang Labing Malaglagon nga Tsunami sa Kasaysayan

Sang Disiembre 26, 2004, ang linog nga may kabaskugon nga 9.0 malapit sa katundan nga baybayon sang naaminhan nga Sumatra, Indonesia, amo ang gintunaan sang labing malaglagon nga tsunami nga narekord sa kasaysayan. Suno sa pagbanabana, ang napatay kag ang wala makit-i kapin pa sa 280,000! Nakalab-ot pa ini sa Somalia, Aprika, nga yara sa tabok sang dagat sa katundan kag mga 290 ang napatay sa dalagku katama nga balod.

Indonesia: Bisan pa nga ini nga pungsod ang may pinakamadamo nga napatay, wala sing utod ukon interesado ang napatay. Bangod sang kasingki nga natabo antes sini, madamo nga Saksi ang nagbiya sa rehiyon sang Aceh​—ang duog nga labi nga nahalitan​—kag nagkadto sa sentro. Ang isla sang Nias nahalitan gid, apang nakaluwas ang mga kauturan.

India: Wala sing utod nga napatay, bisan pa madamo ang nadulaan sing balay kag mga pagkabutang. Sa siudad sang Pondicherry, nagaalagad sa latagon si Lakshmi sang nabatian niya ang tuhoy sa tsunami. Sang nagpauli sia, gubaon na ang iya balay nga human sa daga nga mga tres kilometros gikan sa dagat. Ginbuligan sia sang mga utod sa pagtinlo kag pagkay-o sini.

Sa Madras, ang 13-anyos nga si Naveen nagahampang sing cricket sang nakita niya ang dalagku nga mga balod. Gintundaan  niya gilayon ang iya iloy kag magulang nga babayi kag nalagyo sila. Apang, ginbudlayan sila sa pag-agi sa nagahagunos nga tubig nga nag-anod sang tanan nga sahi sang kagamitan sa balay kag mga bangkay.

Yara sa baybay malapit sa Kanniyākumāri ang siete anyos nga si Lini upod sa iya tiyo kag pakaisa sang gin-anod sia palayo sa dagat tubtob nga nasangit sia sa kahoy nga kudal. Padayon nga nagahampak sa iya ang tubig. Naluwas ang iya tiyo kag pakaisa, apang nadula ang antipara sang iya tiyo amo nga indi na ini makamurot. Apang, padayon niya nga ginpangita si Lini. Wala magdugay, nabatian niya si Lini nga nagapanawag kay Jehova sa nagahuganas nga tubig kag nasalbar niya sia. Ginasugiran karon ni Lini ang bisan sin-o nga ginpamatian ni Jehova ang iya mga pangamuyo.

Andaman kag Nicobar Islands: Si Mary kag ang iya otso anyos nga bata nga lalaki nga si Alwyn, nagaduaw sa balay sang ila mga paryente sang naglinog. Ang tanan nagdalagan pagua. Nakita ni Mary ang dalagku katama nga balod nga nagahuganas pa dalay-ahan. Amo man ang pag-abot sang bus. Gilayon nga nagsakay sila sang iya bata kag nakapalagyo. Apang, ang iban nagpauli pa agod kuhaon ang ila mga pagkabutang amo nga naanod sila. Wala magdugay, nabatyagan liwat sang tanan nga pasahero sang bus ang pagtay-og. Nanaug sila sa bus kag nagdalagan sa isa ka mataas nga duog sa diin mga 500 ka tawo ang nagatipon. Nakita nila mismo nga naalsa sang tubig ang bus kag naanod ini pakadto sa kalayuon nga tunga sa metro gikan sa nahamtangan sang mga tawo.

Sang magkulpa ang tubig, nagdalikyat si Mary sa ila balay. Nakuha pa niya ang iya Biblia kag ang bukleta nga Pag-usisa sa Kasulatan sa Adlaw-adlaw, nga isa gid ka tuburan sang pagpalig-on sa masunod nga mga adlaw. Sang ginbalita nga may mga barko nga sakyan ang mga tawo palayo sa isla, ginatos ang nagdalagan sa baybay kag naglusong sa dagat nga nagalaum nga makasakay sa barko. Inoras kada adlaw, si Mary kag ang iya bata nagahulat sa tagahawak nga tubig, nga napalibutan sang naglinutaw  nga mga bangkay. Anom ka adlaw pagligad sang tsunami, ginkuha gid man sila sang isa ka barko. Bangod madamo ang nagabasol sa Dios sa trahedya, nakapanaksi sing maayo si Mary. Sa katunayan ang iya bayaw nga babayi nagatuon na karon sa Biblia kag nagatambong sa Cristianong mga miting.

Si Prasanthi kag ang iya singko anyos nga bata nga lalaki nga si Jehoash, nagkadto sa Hut Bay sa iya tigulang nga amay nga si Utod Prasad Rao. Sang didto na sila, nabatyagan nila ang linog, nakita ang mga balod, kag naghingagaw sa mataas nga duog. Nagtaas ang tubig sing lima ka metro gikan sa dalan kag nalapawan ang balay ni Prasad. Ang iya mga katre, repredyeritor, kag telebisyon kag ang mga suplay sang kongregasyon nga Pinakabantog nga Tawo nga libro naanod tanan. Sang ulihi, ang iban sini nakita sang mga nakaluwas kag ila ginbasa. Sa sulod sang lima ka adlaw, sanday Prasad, Prasanthi, kag Jehoash nagakaon sang mga pagkaon nga ila mapulot kag nag-antos sang nagabakya nga mga lamok kag langaw. Sang nagsampot ang mga sakayan, sanday Prasanthi kag Jehoash, upod ang iban pa, naglusong sa tagadughan nga tubig pakadto sa ila manugsalbar, bisan pa nga nagalangoylangoy ang mga buaya sa palibot! Sa sina nga tion anom ka bulan ang ginabusong ni Prasanthi. Nagtabuay sila sang ulihi sang iya amay.

Naanod ang tanan nga balay sa Teressa Island. Ang 13 ka kauturan nagtener sa lasang sing anom ka adlaw, nga ginagutom kag ginakutot sang mga insekto, antes sila nasaylo sa Camorta Island. Nagdayon sila didto sa balay ni Mark Paul, isa ka utod nga nagapuyo sa taason nga duog kag nga ang balay ginagamit nga Kingdom Hall. Antes sang tsunami, ang kinaandan nga nagatambong sa miting sang kongregasyon 10 tubtob 12 lang, apang karon 300 na! Sugod sadto, 18 ka bag-o nga estudyante sa Biblia ang regular nga nagatambong sa miting, bangod ila nakita ang mahigugmaon nga pagsakdaganay sang katawhan ni Jehova.

Sri Lanka: Ginhampak sang mga balod ang dos-tersia sang baybayon sini nga isla, nga nagtuga sang grabe nga kahalitan. Domingo sang aga natabo ang tsunami kag ang kalabanan nga utod  yara sa miting sa kongregasyon malayo sa makatalagam nga duog. Naapektuhan ang napulo ka kongregasyon, kag napatay ang isa ka utod nga babayi sang gin-anod ang iya balay sa dagat. Nagkasubo gid ang mga kauturan sa pagkapatay sining mabuot nga utod. Napatay man ang pila ka interesado, kag madamo nga utod ang namatyan sang mga paryente. Ang isa ka gulang namatyan sing 27 ka paryente! Walay sapayan, “nalampuwasan sang mga utod ining trahedya nga wala nagpaluya sa ila sa espirituwal,” sulat sang sanga.

Madamo ang mga suplay nga inugbulig gikan sa Bethel, kag ang kalabanan sa panimalay Bethel masako sa hilikuton nga pagbulig. Gindala sang lokal nga mga utod nga may mga salakyan ang mga suplay sa duog nga nahalitan. Sa sulod sang apat ka adlaw, nasapwan ang tanan nga utod kag nahatagan sing pagkaon kag panapton. Sang ginpamangkot kon ano pa ang ila ginakinahanglan, nagsabat sila: “Mga Biblia kag mga libro! Naanod ang amon mga kopya.” Ginhatag ini gilayon sa ila.

Yara sa Colombo ang manugtatap sang sirkito nga si Gerrad Cooke sa sina nga tion. Nagbiyahe sia sing pito ka oras sa dalan nga delikado kon gab-i bangod sang layaw nga mga elepante. Nag-abot sia sing alas 10:30 sa gab-i, sia kag ang isa ka lokal nga utod​—nga ang balay nabahaan man​—gilayon nga nagkadto sa mga utod kag nagpanagtag sang ila mga kinahanglanon tubtob sa kaagahon.

 Thailand: Wala sing lokal nga mga utod ang nasamaran ukon napatay, kag wala sing may nadulaan sing palangabuhian. Apang wala makit-i ang pila ka dumuluong nga bakasyunista, nga ginsigahom na lang nga patay na. Lakip sa sini ang isa ka taga-Finland nga utod, isa ka mag-asawa nga taga-Sweden, isa ka taga-Austria nga utod, kag di-tumuluo nga bana sang utod. Ang duha ka mag-asawa nga taga-Sweden nagbuylog sa lokal nga grupo sang mga utod sa pag-alagad sa latagon malayo sa baybay. Sang nagpauli sila sa ila hotel, ang ila lamang nakit-an amo ang mga bangkay kag kagulub-an.

Pagka-Lunes sang aga pagkatapos sang linog, ang nagadumala nga manugtatap sa Kongregasyon sang Phuket nakabaton sang tawag sa telepono gikan sa sanga sa Thailand nga nagapahibalo sa iya nga ang isa ka utod nga babayi nga taga-Finland nga si Kristina yara sa ospital nga 90 minutos kon biyahion. Nagkadto sia gilayon upod sa isa ka utod nga lalaki sa ospital. Nagsulat ang nagadumala nga manugtatap: “Wala pa gid ako sing nakita nga grabe nga pag-antos​—mga namatyan sing tiayon, namatyan sing mga kabataan, namatyan sing mga ginikanan. Ang pila nagasinggit sing tabang; ang iban nagakaurungan nga nagatulok sa kisame ukon sa salog. Makasulubo gid ang kahimtangan amo nga kon kaisa nagagua kami sa hulot agod maghaganhagan ang amon ginabatyag kag makapangamuyo sing kabakod.”

Nakita sang mga utod si Kristina nga ginahanda na agod operahan ang iya nabali nga tiil. Nadula ang tanan niya nga papeles. Pagkatapos sang operasyon, nangamuyo ang duha ka utod upod sa iya kag ginbantayan sia tubtob tungang-gab-i. Pagligad sang pila adlaw, nagpauli sia sa Finland. Bisan pa sang natabo sa iya, “maisog kag mabakod si Kristina,” report sang mga utod. Sing makapasubo, napatay ang iya bana sa tsunami.

Dedikasyon Sang mga Sanga

Angola, Enero 8, 2005: Importante gid ining pinasahi nga adlaw sa hilikuton nga pagbantala sa Angola, nga isa ka pungsod nga may inaway sibil sa sulod sang halos 40 ka tuig. Doble  ang nangin pribilehiyo ni Stephen Lett, sia ang nagdiskurso sa dedikasyon sa una nga pasilidad sang sanga sa Angola kag ang una nga miembro sang Nagadumala nga Hubon nga nagduaw sa pungsod. Mga 730 ka delegado gikan sa 11 ka pungsod ang nagtambong sa programa. Ngaa kinahanglan ang bag-o nga tinukod para sa sanga? Sang 1975 nagreport ang sanga sang kataason nga 3,055 ka manugbantala. Sang talipuspusan sang 2004, nag-uswag ini sing 18 ka pilo nga may kapin sa 54,000 ka manugbantala!

Bulgaria, Oktubre 9, 2004: Sa sulod sang kapin sa tatlo ka tuig, ang 150 ka internasyonal nga boluntaryo kag mga 300 ka lokal nga utod ang nagbulig sa pagpatindog sang bag-o nga pasilidad sa Sofia. Ang namulongpulong sa dedikasyon amo si Gerrit Lösch sang Nagadumala nga Hubon nga gintambungan sang 364 nga nagatiglawas sa 24 ka pungsod.

Etiopia, Nobiembre 20, 2004: Sang maaga nga bahin sang 2004, siam ka magkatuhay nga duog ang ginapuy-an sang 60 ka miembro sang pamilya Bethel​—isa ka mabudlay nga kahimtangan! Ang ila matahom kag bag-o nga Bethel nahamtang sa banglid sa nasidlangan nga dulunan sang kapital, sa Addis Ababa, kag kapin sa 2,400 metros sa katupungan sang dagat. May mga gab-i nga ang kalinong ginatublag lamang sang hirihiri sang mga hyena. Namulongpulong si Gerrit Lösch sa tumalambong nga 2,230, lakip sa 200 ka dumuluong nga delegado gikan sa 29 ka pungsod. Lakip sa mga gin-interbyu amo ang pila nga ginpriso kag ginpaantos pa gani tungod sa ila pagtuo. Ang anak nga babayi sang isa ka utod nga ginpatay nagsiling, “Sa pagkabanhaw, malipay gid si Tatay nga gin-ilog ko ang iya halimbawa sang diosnon nga debosyon kag nag-alagad sa Bethel.”

Ghana, Marso 5, 2005: Namulongpulong sa dedikasyon si Malcolm J. Vigo sang sanga sa Nigeria sa tumalambong nga 3,243. Ang bag-o lang nadedikar nga dugang nga tinukod sa sanga nagalakip sang tatlo ka ilistaran nga bilding, 50 ka opisina, isa ka opisina sang nagamentenar sa mga tinukod, isa ka  Kingdom Hall, kag isa ka hulot kalan-an, kusina, kag hulot lalabhan.

Guam, Hunyo 25, 2005: Ikatlo na ini nga dedikasyon sugod sang 1980, sang isa pa lang ang kongregasyon sa Guam. Karon may napulo na. Luwas sa pagkay-o, ang ulihi nga proyekto naglakip sa bag-o nga Kingdom Hall kag duha ka panalgan nga ilistaran nga bilding. Nag-abot ang 100 ka internasyonal nga boluntaryo halin sa Australia kag Estados Unidos​—tanan sa ila kaugalingon nga gasto. Sang nabatian ini sang lokal nga inspektor sang bilding kag nakita ang kalidad sang trabaho, “naglungolungo sia nga daw indi makapati,” sulat sang sanga. Si Lorence Shepp gikan sa sanga sa Peru ang namulongpulong sa dedikasyon.

Mauritius, Nobiembre 6, 2004: Nakapribilehiyo si Gerrit Lösch sa pagdiskurso para sa dedikasyon sa ginpasangkad nga sanga. Ang pagpasangkad nagalakip sang 12 ka bag-o nga mga opisina sang Translation Department kag bag-o nga opisina sang mga nagamentinar sang bilding. Ang mga bisita naghalin sa Bagatnan nga Aprika, Europa, Madagascar, Mayotte, Réunion, kag Seychelles.

Nicaragua, Disiembre 4, 2004: Kapin sa 330 ka internasyonal nga boluntaryo subong man ginatos ka lokal nga kauturan ang nagtukod sang bag-o nga talatapan kag ilistaran nga bilding sa sanga kag sang isa ka wala sing dingding nga Assembly Hall nga makapalingkod sing 2,400 ka tawo. Ang miembro sang Nagadumala nga Hubon nga si Samuel Herd amo ang namulongpulong sa dedikasyon. Ang mga delegado naglakip sa mga misyonero nga nag-alagad sang una sa Nicaragua. Hunahunaa kon daw ano ang ila kalipay nga makita liwat indi lamang ang ila mga estudyante sa Biblia anay kundi pati na ang mga kabataan sang ila mga estudyante kag, mga kaapuhan pa gani!

Panama, Marso 19, 2005: Namulongpulong sa 2,967 ka tumalambong si Samuel Herd, nga ang kalabanan sa ila nag-alagad kay Jehova sing kapin sa 20 ka tuig. Sang ginsuguran ang proyekto, nag-arkila ang mga utod sing crane lakip na ang opereytor sini  sa pagsaylo sang pila ka storage trailer. Sang nagsampot ang opereytor sa lokasyon, nangindi sia sa pagtrabaho, nagsiling sia nga wala pa nahanda sing maayo ang duog. Gin-uloulohan sia sang mga utod apang wala ini sing epekto. Nian sang manuglakat na sia, namangkot sia, “Labay pa akon, ano gani ang relihion ninyo?”

“Saksi ni Jehova,” sabat sang mga utod.

Namensar sia sing makadali kag nagsiling, “Sige, trabahuon ko na lang ini.” Ngaa hinali nga nagbag-o ang iya pensar? Duha ka utod nga babayi ang nagatudlo sang Biblia sa iya kabataan, kag nagapasalamat gid sia sa ginahimo sining mga utod.

Slovakia, Abril 16, 2005: Ang miembro sang Nagadumala nga Hubon nga si Theodore Jaracz namulongpulong sa dedikasyon sa 448 ka bisita gikan sa 21 ka pungsod. Ginhiwat ang espesyal nga miting sa isa ka sports stadium pagkadason nga adlaw, kag madamo nga delegado ang nag-abot sakay sa bus. “Maayo kag malipayon gid kamo nga mga tawo,” siling sang isa ka drayber, “kag ginatamyaw ako sang tanan! Nahibaluan ko kon ngaa. Bangod ini sang inyo pagtuo. Pirme ako nagadul-ong sang mga kabataan kag manunudlo sa eskwelahan. Ako ang nagauna sa pagtamyaw sa mga kabataan; kag ang mga manunudlo​—wala sila nagapanamyaw!”

Wallkill, New York, E.U.A., Mayo 16, 2005: “Determinado gid kita tanan nga idedikar ining matahom nga bag-ong imprintahan kag ang A, C, kag D nga ilistaran nga bilding sa lamang matuod nga Dios nga si Jehova,” siling sang miembro sang Nagdumala nga Hubon nga si John Barr sa iya pamulongpulong. Nagsugod ang pagtukod sa pundasyon sang bag-o nga imprintahan sang Mayo 1, 2003, kag pagligad lang sang walo ka bulan, ang isa sa mga daan nga imprintahan ginsaylo sa bag-o nga hulot.

Ang mga Regional Building Committee gikan sa bug-os nga Estados Unidos, ilabi na sa kaingod nga mga estado nagpadala sing lantip nga mga trabahador. Ang pila ka hilikuton ginpakontrata sa tagagua nga mga kontraktor. “Indi ko masarangan  suhulan ang akon mga tinawo agod magtrabaho kaangay ninyo,” siling sang isa. “Tinagipusuon kamo nga nagatrabaho.” Ang manedyer sang proyekto nagsiling, “Mas madamo ang akon nahangpan kag natun-an tuhoy sa akon propesyon sa sulod sang pila ka bulan sa Watchtower sangsa eskwelahan sa sulod sang lima ka tuig!” Ang tiglawas sang kompanya nga nagasuplay sang conveyor system nagsiling: “Salamat gid sa inyo, amo ini ang pinakamadasig nga pag-instalar nga nahimo namon. Nalipay gid ako bangod malipayon kamo tanan! Matahom gid ini nga duog.”

Pila ka tuig antes sini, ang sanga sa Estados Unidos may 15 ka web-offset press​—11 sa Brooklyn kag 4 sa Wallkill. Karon lima na lang, resulta ini sang mas moderno nga teknolohiya kag sa pagpahatpahat sang hilikuton sa iban nga sanga sa idalom sang kahimusan sang rehiyonal nga pag-imprinta. Ang bag-o nga imprintahan nagalakip sang isa ka sistema sa pagtipon sang papel nga natabas halin sa pressroom kag bindery nga ginasuyop paibabaw pakadto sa makina nga nagabugkos. Ang binugkos nga papel gina-recycle sang mga manugbakal, kag nakakinot ang sanga sing mga $200,000 sa isa ka tuig!

Zambia, Disiembre 25, 2004: Sa halos 700 nga nagtambong sa dedikasyon sa ginpasangkad nga pasilidad, 374 ang nag-alagad kay Jehova sing kapin sa 40 ka tuig! Sa pamulongpulong sang dedikasyon, nagsiling si Stephen Lett sa mga nakigbahin sa pagtukod nga kaangay sa mga ulipon sa isa ka parabola ni Jesus, takus gid sila nga dayawon!​—Mat. 25:23.

Nakapanaksi man sing maayo ang mga kauturan sa tion sang pagtukod. “Nagapuyo gid kamo sa isa ka paraiso,” siling sang isa ka kontraktor.

“Pisikal bala ukon espirituwal?” pamangkot sang mga utod.

“Pareho!” sabat niya.

[Nota]

 [Kahon/​Mga Retrato sa pahina 29]

“Diosnon nga Pagkamatinumanon” nga mga Kombension

Subong sang ginpaathag sa “Diosnon nga Pagkamatinumanon” Distrito nga Kombension, ang “nagakilala sa Dios” kag ang mga “nagatuman sang maayong balita” amo lamang ang maluwas sa adlaw sang pagtimalos ni Jehova. (2 Tes. 1:​6-9) Amo nga himuon gid naton ang aton bug-os nga masarangan sa pagbulig sa mga naligban tuhoy sa Dios ukon sa mga nagahinakit sa Iya bangod sang mga pag-antos sa kalibutan. Makabulig gid sa aton ang bag-ong aman nga tract nga Malapit Na Madula ang Tanan nga Pag-antos! kag ang libro nga Ano Gid ang Ginatudlo Sang Biblia?

Walay duhaduha nga makalugpay gid ang bag-ong tract sa madamong biktima sang mga inaway, kaimulon, kalamidad, inhustisya, kag balatian agod mahangpan nila nga indi ang Dios ang nagapahanabo sini nga mga butang. Ang bag-o nga libro magabulig man sa mga nagahingamo sang espirituwal nga kamatuoran. Makagalanyat gid ang estilo sa pagsulat sini, simple, kag klaro, kag nailustrar sing maayo ang pangunang mga punto, paagi sa laragway kag sa nasulat nga kaundan. Antes mo ini gamiton sa mga pagtuon sa iban, pat-ura nga mabasa mo ang 14 ka topiko sa apendise.

 [Tsart/​Mga Retrato sa pahina 12, 13]

PILA KA HITABO SA 2005 NGA TUIG SANG PAG-ALAGAD

Septiembre 1, 2004

Oktubre 8: Narehistro sing legal ang mga Saksi ni Jehova sa Armenia.

Oktubre 9: Gindedikar ang sanga sa Bulgaria.

Oktubre 18: Nagsugod ang kampanya sa Pagbantay! nga brosyur.

Nobiembre 6: Gindedikar ang sanga sa Mauritius.

Nobiembre 20: Gindedikar ang sanga sa Etiopia.

Disiembre 4: Gindedikar ang sanga sa Nicaragua.

Disiembre 25: Gindedikar ang sanga sa Zambia.

Disiembre 26: Ang linog nga nagbaskog sing 9.0 malapit sa Sumatra, Indonesia, amo ang gintunaan sang labing malaglagon nga tsunami nga narekord sa kasaysayan.

Enero 1, 2005

Enero 8: Gindedikar ang sanga sa Angola.

 Marso 5: Gindedikar ang sanga sa Ghana.

Marso 19: Gindedikar ang sanga sa Panama.

Marso 24: Ang Higher Administrative Court sang Berlin nagmando nga aprobahan ang mga Saksi ni Jehova sa Berlin subong legal nga korporasyon.

Abril 16: Gindedikar ang sanga sa Slovakia.

Mayo 1, 2005

Mayo 16: Gindedikar ang imprintahan kag ang residensia sa Wallkill, New York.

Hunyo 25: Gindedikar ang sanga sa Guam.

Agosto 31, 2005

[Retrato sa pahina 20]

Pagpaninlo sa nahalitan sang baha nga Kingdom Hall, sa Distrito sang Niigata, Japan

[Retrato sa pahina 24]

Pag-asikaso sang suplay nga bulig sa Sri Lanka