Bug-os Kalibutan nga Report

ASIA KAG NATUNG-AN NGA SIDLANGAN

MGA PUNGSOD 47

POPULASYON 3,930,343,401

MGA MANUGBANTALA 591,750

MGA PAGTUON SA BIBLIA 477,609

Japan

Sang manugbata na si Miho, nabudlayan gid sia sa pagpakigbahin sa kinaandan nga pagministeryo. Bangod luyag gid niya nga ipadayon ang iya pagpayunir, nangayo sia sa manugtatap sang pag-alagad sing mga adres sang mga balay nga halos imposible mabantalaan, subong abi sang mga apartment nga ginaguardiahan sing maayo. Ginhatagan sia sang manugtatap sang pag-alagad sing mga isa ka gatos ka adres. Gikan sa ila balay, ginteleponohan niya ang kutob sa masarangan niya. Sang primero, wala sing may nagsapak sa iya, kag natapos niya ang pagpanawag sa sulod sang 30 minutos. Pagkadason, ginpasundan niya sing sulat ang iya pagpanawag sa telepono. Ginbase niya ang iya malip-ot nga sulat sa bisan ano nga mabatian niya sa iya pagpanawag, kaangay abi sang hibi sang bata. Kon sa banta niya nadul-ong na ang sulat, ginateleponohan kag ginasugid niya ang benepisyo sa pag-aplikar sang Makasulatanhon nga panuytoy nga iya ginsambit sa sulat. Sa isa ka kahimtangan, nagdumili sa pagpakigsugilanon sa telepono ang isa ka asawa, apang ginsulatan gihapon sia ni Miho. Sang ginteleponohan sia liwat ni Miho, ang iya bata nga babayi nga nagaeskwela ang nakasabat, kag nabasa niya ang sulat ni Miho. Ginpanaksihan sia ni Miho kag nagsaad nga sulatan sia sing pila ka Makasulatanhon nga laygay para sa iya pag-eskwela. Ginhimos man niya nga matawgan sia liwat. Ang iloy amo ang nakasabat sa telepono kag nagsiling nga may mga problema sa eskwelahan ang iya bata kag nakabulig gid ang ginsiling ni Miho sa iya. Pagkatapos sang  pila pa ka pagtawag kag mga sulat, nagtuon ang bata kag ang iloy.

Nepal

Madugay na nga nagapangita sang kamatuoran ang maestro nga si Prem. Ginabasa niya ang Biblia kag nagasimba sa simbahan nga malapit sa iya ginatudluan nga eskwelahan. Apang, wala masabat ang iya mga pamangkot kag naakig sia bangod pirme nagapangayo sing mga donasyon ang pastor. Nangamuyo si Prem sa Dios, nga nagapangayo sing panuytoy nga masapwan niya ang relihion nga makabulig sa iya agod matun-an ang kamatuoran. Sang nagsaylo kag nagtudlo sa iban nga eskwelahan si Prem, namangkot sia sa iya bag-o nga mga kaingod kon sa diin ang simbahan. Nagapuyo man sa pareho nga apartment ang isa ka estudyante nga lalaki nga ang iloy nakatambong na sing pila ka miting sa Kingdom Hall, kag didto sia gintudlo sang bata. Ang nabatian ni Prem nga pamulongpulong publiko nagapaathag tuhoy sa Ginharian sang Dios, isa ka topiko nga luyag gid ni Prem mahangpan. Ginhimos ang isa ka pagtuon. Malipayon gid nga sa katapusan nasabat ang iya mga pamangkot, regular na nga nagatambong karon sa mga miting si Prem upod sa iya pamilya. Nagsulat sia sa ila simbahan nga nagapahibalo sang ila paghalin bangod luyag nila nga mangin Saksi ni Jehova.

Taiwan

Ang mga estudyante sa isa ka eskwelahan sa primarya ginpangabay nga magsulat sing isa ka salaysay para sa tuigan nga kompetisyon. Ang tema amo “Ang Akon Paborito nga Libro.” Ang dies anyos nga si Weizhen nagsulat nga ang Biblia amo ang iya paborito nga libro. Luwas sa pagkomento tuhoy sa pagkasibu sang tagna sa Biblia kag sa maayong panuytoy sang Pulong sang Dios, ginpaathag niya nga ginsabat sang Biblia ang mga pamangkot nga indi masabat sing maathag sang iya mga manunudlo kag sang iya masigkaestudyante. “Gintudlo sa amon sang amon maestro nga ang katigulangan sang tawo naghalin sa mga amu,” sulat ni Weizhen. “Nagpamensar ako: ‘Kon naghalin sa mga amu ang mga tawo, indi bala nga dapat naton sila tahuron kag pasalamatan sing tinagipusuon? Busa ngaa ginakurong naton sila sa mga zoo? Indi bala nga mangin daku naton ina nga sala?’ Apang ang mga sabat sang Biblia maathag: Sa pagkamatuod wala kita naghalin sa mga amu. Sa kabaliskaran ang aton mga katigulangan  gintuga sa larawan sang Dios gikan sa yab-ok sang duta.” Ginhinakpan niya ang iya salaysay paagi sa pagsulat: “Nagsiling sila sadto, ‘Ang pagbasa sing libro kaangay sang pagbukas sang isa ka baul sang bahandi.’ Sa akon opinyon, mas malahalon pa sangsa bulawan ang Biblia. Amo nga nanamian gid ako sa pagbasa sini nga libro.” Nagdaug ang iya salaysay sing una nga premyo bisan pa nalakip sa sini nga kompetisyon ang mga salaysay sang mga estudyante sa middle school, kag sia sa ikap-at lamang nga grado. Sa pagsaysay sang iya inagihan, ginkutlo niya ang Hebreo 4:12 kag nian nagsiling, “Ginapatungod ko ang tanan nga kadungganan kay Jehova nga Dios.”

Mongolia

Sang nabalitaan sang bag-ong bawtismado nga babayi nga si Bolortsetseg nga taga-Mongolia nga napatay ang iya paryente kag nagapangasubo gid ang iya nabalo, ginpadal-an niya sia sang tanan naton nga publikasyon nga Mongolian. Ginbasa ini tanan sang nabalo nga si Evsanaa sa isa lang ka gab-i. Pagkaaga, ginteleponohan niya si Bolortsetseg kag ginpangabay nga kadtuan sia gilayon agod mag-istoryahanay sila. Gin-upod ni Bolortsetseg ang isa ka utod nga babayi sang nagduaw kay Evsanaa, nga nagpreparar sing madamo nga mga pamangkot. Malangkagon sia nga namati sa mga sabat gikan sa Biblia. Pagligad sang malawig nga paghinun-anon, ginpaathag sang mga utod nga makabenepisyo pa gid si Evsanaa kon binagbinagon nila ang isa ka topiko sa isa lang ka tion. Ginrekomendar nila ang isa ka pagtuon sa Biblia sa puluy-an. Nagpasugot gilayon si Evsanaa nga magtuon sing tatlo ka beses sa isa ka semana. Sa sulod sang isa ka bulan, ginpanghaboy na niya ang iya mga imahen kag nagtambong sa mga miting. Pagligad sang duha ka bulan nga nangin manugbantala sia, naghanda na sia sa pag-aplay subong auxiliary payunir sang ginpaathag sa iya nga dapat sia anay magpabawtismo. Wala sia nalingkang, determinado sia nga naghinguyang sing di-magkubos 50 ka oras sa isa ka bulan sa pag-alagad sa latagon kag nagahulat na lang sang kombension agod magpabawtismo.

Kazakhstan

Sa siudad sang Rudny, nasugilanon sang isa ka payunir ang pamatan-on nga si Nikolay nga luyag sing isa ka pagtuon sing Biblia sa puluy-an. Apang may isa ka problema.  Nagapuyo si Nikolay kag ang iya pamilya sa malayo nga minuro, kag talagsa lang sia nagakadto sa Rudny sa pagduaw sa iya mga paryente. Ginpamangkot sang utod kon puede bala niya maduaw si Nikolay sa ila minuro, apang ginpaathag ni Nikolay nga ang ila minuro 200 kilometros ang kalayuon kag mabudlay kadtuan.

Apang ginsulat gihapon sang utod ang iya adres kag nagsaad nga masugilanon sila liwat. Ginhimos sang utod nga maduaw ang minuro kag gin-agda ang isa ka utod nga lalaki kag duha ka utod nga babayi gikan sa ila kongregasyon nga updan sia. Pagligad sing duha ka semana, nagsakay sila sa tren. Sang nakalab-ot sila sa estasyunan sang tren nga pinakamalapit sa sini nga minuro, natukiban nila nga 18 kilometros pa ang kalayuon sang lugar nanday Nikolay kag wala na sila sing masakyan nga pangpubliko nga transportasyon. Ang lamang nga mahimo nila amo ang paglakat. Indi ini mahapos bangod tigtulugnaw sadto kag matugnaw katama ang dapya sang hangin. Pagligad sang pila ka tion, nag-agi kag nagdulog sa ila atubang ang isa ka traktora nga nagaguyod sang isa ka daku nga tangke sang gatas. Ginpasakay sila sang drayber—sa sulod sang tangke! Abi sang mga manugbantala kon nagalahog lang ang drayber, apang wala sing sulod kag mamala ang tangke, busa nagsulod sila. Bisan pa matugnaw sa sulod sang tangke, may pangamlig naman sila gikan sa mamadlos nga hangin. Ginsilingan sila sang drayber nga papanaugon sila sa duog nga pito ka kilometro gikan sa ila destinasyon. Lakton na lang nila ini gikan didto. Ginlakat pa nila sing duha ka oras ang siete kilometros pakadto sa duog nanday Nikolay.

Nagdayaw kag nalipay gid si Nikolay kag ang iya asawa nga si Valya sang nakita nila ang mga utod sa ila ganhaan. Ginbuligan nila ang ila mga bisita agod makapainit-init kag ginpakaon sila. Ginsundan ini sang paghinun-anon sa Biblia. Pagligad sang duha ka semana, nagbalik liwat ang mga kauturan nga taga-Rudny. Nagsaysay ang payunir nga utod nga lalaki: “Ginasugat kami ni Nikolay sa estasyunan sang tren. Madamo nga tawo ang luyag nga makigsugilanon sa ‘mga nag-abot sakay sa tangke sang gatas,’ busa naghimo sing iskedyul si Nikolay para sa tanan nga interesado agod masugilanon kami.  Ang tanan nga nalista nagkadto suno sa ila iskedyul kag nagpasugot sang pagtuon sa Biblia.” Sang ulihi, halos tanan nga nagtuon sa Biblia sa sina nga minuro nag-uswag sing maayo sa espirituwal. Pagligad sang duha ka tuig, nabawtismuhan sanday Nikolay kag Valya. Di-bawtismado na karon nga manugbantala ang ila duha ka bata nga lalaki, kag sining karon lang gintangdo nga gulang si Nikolay sa sining naligwin nga grupo.

Georgia

Nagbantala ang mga payunir sa nabaw-ing nga mga kabukiran sa pungsod sang Georgia. Naglakat sing otso kilometros ang duha ka payunir nga utod nga babayi pakadto sa isa ka naligwin nga minuro nga nahamtang sa katapusan sang dalan sa bukid kag nagpanaksi sa mga pamalay. Sang ulihi ginpunggan sang isa ka tigulang nga lalaki sa minuro ang isa sa mga utod nga si Ketevan, kag luyag niya nga ipaathag sa iya kon ngaa nagabantala sia kay indi man sia Ortodokso. Gintinguhaan niya nga ipaathag, apang wala namati ang tawo. Gintiklod niya ang utod kag natumba ini kag ginbakol niya sang iya baston. Nakita ini sang pila ka tawo, kag nabantugan ini nga hitabo sa minuro. Sang ulihi, nagbalik si Ketevan sa pagbantala sa amo man nga minuro. Nakita sia sang isa ka babayi nga nagapamatok sang una kag nagtuaw ini: “Nagbalik ka gihapon bisan nga nakastiguhan ka na! Nagadayaw gid ako sa imo kaisog! Dali sulod sa balay kag sugiri ako sing dugang pa.” Pagkatapos sang iya pagpamati, nagsiling sia nga mahimo makabalik si Ketevan sa bisan ano nga tion sa iya balay agod bantalaan sia.

 APRIKA

MGA PUNGSOD 57

POPULASYON 802,232,357

MGA MANUGBANTALA 1,043,396

MGA PAGTUON SA BIBLIA 1,903,665

Rwanda

Sang nagligad nga mga tion, nakita sang mga nagalakat sa dalan ang isa ka kopya sang Mahimu Ka Mabuhi Sing Dayon sa Paraiso sa Duta. Ginhatag nila ini sa isa ka gulang sang ila Protestante nga simbahan. Malangkagon nga ginbasa sang gulang ang libro kag ginpangita niya ang mga Saksi, nga amo ang nagtuon sa Biblia sa iya. Nag-uswag ang iya ihibalo sa kamatuoran sa Biblia, amo nga naghalin sia sa ila simbahan kag nagpabawtismo. Sa amo man nga tion, ginsugiran niya sing makugihon ang iban sa iya anay simbahan tuhoy sa kamatuoran, kag 25 ka miembro ang naghalin sa simbahan agod mangin Saksi ni Jehova. Ang nagbulos sa iya subong gulang sa ila simbahan nagtuon man sing Biblia sa bulig sang mga Saksi, kag naghalin man sa simbahan. Nagatambong na sia karon sa Cristianong mga miting kag nagpabutyag sang iya handum nga mangin manugbantala.  Nabawtismuhan ang iya asawa sang nagligad nga adlaw sang pinasahi nga asambleya. Daw indi gid mapatihan nga nagsugod lang ini sa isa ka libro nga nasapwan sa dalan!

Côte d’Ivoire

Samtang nagapakadto sa pag-alagad sa latagon sa Abidjan, ang kapital nga siudad, nasugata sang pamatan-on nga Saksi nga si Berenger ang isa ka babayi nga nagabaligya sing tinapay. Wala nabatyagan sang babayi nga nawigit ang 5,000-franc ($10, U.S.) nga papelon. Sang ginpulot ini ni Berenger agod iuli sa iya, may isa pa ka babayi nga nag-ulpot, nga nagsinggitan, “Ihatag na sa ako; akon na!” Apang, sang ginpamangkot sia ni Berenger kon pila ang kantidad sini, naakig sia kag naghalin. Nian ginlagas ni Berenger ang babayi nga nawigitan sing kuarta. Nakibot sia kay ginpanghiwala sang babayi nga nawigit niya ini, nga nagasiling pa, “Padihot ninyo ini agod kawatan ako.” Apang, nahantop niya ang pagkasinsero kag pagkapursigido ni Berenger, gani gin-usisa niya kag nasapwan nga nawigitan sia sing 5,000 franc, nga katumbas sang 50 ka pan nga tinapay.

Nagsiling si Berenger: “Gin-uli ko sa iya ang kuarta kag ginsilingan ko sia nga ginhimo ko ini bangod ang akon Dios, nga si Jehova, nagatudlo sa iya mga alagad nga mangin bunayag. Ginpasalamatan niya ako kag nagsiling: ‘Kon pareho lang ang paggawi sang tanan nga tawo sa mga Saksi ni Jehova, mangin mag-abyan gid ang tanan nga tawo. Amo ini ang una nga tion nga nakasalapo ako sang isa ka pamatan-on nga subong sini ang kinaiya.’ Ginhatagan ko sia sing tract, kag nagsaad sia nga pamatian na niya ang mga Saksi ni Jehova. Sa sina nga adlaw, 50 ka franc lamang ang yara sa akon bulsa para sa bug-os nga adlaw. Apang malipayon ako bangod husto ang akon ginhimo.”

Demokratiko nga Republika Sang Congo

Ang isa ka gulang nga si Eugene, nagatrabaho sa isa ka balaligyaan sang diamante subong dyanitor kag manugbantay. Nagsaysay sia: “Isa ka gab-i, nag-abot sa ila balaligyaan ang isa ka tawo agod magbaligya sing mga diamante nga nagabalor sing $22,000 (U.S.). Apang nahulog ang suludlan sang mga diamante gikan sa iya bulsa.  Nagasinalasala sila sa pagpangita bisan diin apang wala nila nakita. Pagkaaga, ang iya amo kag ang kaupod sini nagpakadto pakari sa kalye agod pangitaon ang suludlan, apang wala gid nila ini nakita. Nian nanilhig ako sa gua, sa atubang lang sang puertahan sang balaligyaan, kag abaw! Ang suludlan sang mga diamante! Ginpulot ko ini kag gindala gilayon sa akon amo, nga taga-Belgium. Indi sia makapati nga gin-uli ko ini. Ginsugiran ko sia nga isa ako ka Saksi ni Jehova kag may matinahuron nga kahadlok sa akon Dios. Ang tag-iya sang mga diamante, nga nagdayaw gid sa akon pagkabunayag, nagtuaw, ‘Indi gid ini mapatihan!’

“Ang akon kaupod sa trabaho nagsiling sa akon, ‘Eugene, ginsalbar mo ang aton reputasyon!’

“Nagsabat ako: ‘Salamat! Si Jehova gid ang dapat dayawon, bangod sia amo ang nagtudlo sa akon nga mangin bunayag.’”

Angola

Samtang nagaduaw sa isa ka uma, luyag ipatan-aw sang misyonero kag manugtatap sang sirkito nga si João sa mga utod didto kag sa mga interesado ang DVD nga natig-uluhan Noah Walked With God—David Trusted in God. Nagdala ang utod sing isa ka gamay nga generator, duha ka daku nga speaker, kag gasolina, luwas sa iya laptop nga kompyuter. Sa una nga minuro, nagdayon sia sa isa ka payag nga human sa daga, kag gin-iskedyul niya ang pagpasalida sang pelikula sing halos tungang gab-i na. “Nakibot ako,” siling niya, “kay mga 38 ka tawo ang nag-abot, nga nagadala sang ila mga lingkuranan, mga bangko, mga bato, mga lata sang gatas, kag iban pa nga butang nga mahimo malingkuran. Gutok na sa sulod sang balay bisan katunga pa lang sang mga tawo ang nag-abot, gani sa gua na lang sang balay namon gintan-aw ang pelikula. Sa idalom sang mabituunon nga kagab-ihon, gintungtong ko sa pila ka tisa ang kompyuter, kag madamo sa mga nagtambong ang nagalumpagi sa maduagon nga tela nga ginhimo sa Aprika.” Madasig nga naglapnag ang balita sa sini nga duog, kag madamo ang nagkadto sa mga minuro nga ginaduaw ni João. “Sang natapos na ang pelikula, daw wala sing luyag nga magpauli,” saysay niya. “Madamo ang nagasiling nga amo ini ang  pinakamaayo nga gab-i sa ila kabuhi kag nagpabutyag sing tudok nga pasalamat kay Jehova bangod sang iya espirituwal nga aman.” Sa sulod sang tatlo ka semana nga pagduaw ni João sa mga grupo sa uma, 1,568 ka tawo ang nakatan-aw sang DVD!

Ghana

Ang isa ka manugbaligya sing mga utanon sa Accra nga si Vida, nagapangalag-ag sa pagsuplay sang preska nga mga utanon sa sanga talatapan sa Ghana. Ngaa? Ginhambalan sia sang ila pastor nga di-mainabyanon ang mga Saksi sa mga indi Saksi. Apang, sa una nga pagdul-ong ni Vida sang iya produkto, nakibot sia sang nasugilanon niya ang mga nagatrabaho sa kusina nga may mainabyanon nga mga yuhum kag mabuot nga pangguyahon. Pagligad sang mga semana, nakilala niya ang mga boluntaryo sa sanga, kag natalupangdan niya nga mainayuhon ang tanan sa iya kag narealisar niya nga indi matuod ang ginsiling sang ila pastor.

Nalangkag nga makatuon pa gid, nangabay si Vida nga tun-an sia sa Biblia, bisan pa indi sia makahibalo magbasa. Sa sulod sang anom ka bulan, nakatuon si Vida sa pagbasa sa iya Biblia, kag sang nagligad nga distrito nga kombension, nabawtismuhan sia. Bisan pa ginayaguta sia sang iya pamilya kag sang iya mga kaupod sang una, ginbuligan ni Vida ang iya pakaisa nga mangin kalipikado subong di-bawtismado nga manugbantala.

Sudan

Nasugilanon kag ginpasulod sang duha ka dalagita ang isa ka utod nga babayi samtang nagabantala sa mga balay. Sing makatilingala, indi luyag sang mga dalagita nga buligan sila sang utod sa pagpangita sang mga teksto sa ila Biblia. Ang rason amo nga ginpaandaman sila sang ila pari nga kon mauyatan sang isa ka Saksi ni Jehova ang ila kopya sang Biblia, ang kaundan sini awtomatiko nga mapahisuno sa mga panudlo sang mga Saksi. Wala gid gani nangamusta ang mga dalagita sa utod. Apang, sang personal nila nga nakita kag nabasa ang mga teksto, nahisanto ini sa ginasiling sang utod. Narealisar nila nga nagbinutig ang pari sa ila, gani nagdesisyon sila nga magtuon sing Biblia. Nakibot ang pari, amo nga ginsaaran niya sila nga  hatagan sing kuarta agod ibakal sing pagkaon—kon untaton lamang nila ang ila pagtuon sing Biblia. Ang ila sabat? “Indi namon luyag nga busgon sing pagkaon ang amon tiyan. Luyag namon nga mabusog sa pulong sang Dios.” Nagatambong na karon ang mga dalagita sa mga miting sang kongregasyon.

Etiopia

Bisan pa nga mga napulo na ka tuig nga Saksi ang asawa ni Awoke, wala sia nagpakita sing interes sa kamatuoran. Apang, sang nagbiyahe sia sa iban nga bahin sang pungsod para sa duha ka bulan nga seminar, nagdesisyon sia nga pangitaon ang mga Saksi. Sa iya pagsampot, gindul-ong sia sa isa ka opisina nga ginaobrahan sang isa ka utod nga babayi. Madugay na nga nagapangamuyo ang utod nga may isa ka utod nga lalaki nga mag-abot agod buligan ang ila kongregasyon. Sang ginsugiran ang utod nga may lalaki nga nagapamangkot tuhoy sa mga Saksi ni Jehova, nadumduman niya ang iya pangamuyo. Sang nakita niya si Awoke, nga nakapanapot sing disente, abi niya kon sia amo ang bag-o nga utod nga sabat sa iya pangamuyo. Sing malipayon, nagdalidali sia pakadto kay Awoke kag mainabyanon nga gintamyaw sia. Bangod sang tuman nga kalipay sang utod, nadulaan si Awoke sing kaisog sa pagsugid sing kamatuoran, kag indi niya luyag nga malugaw-an ang utod sang ginpakilala niya sia sa mga kauturan. Sa tion sang iya pagtener, gintambungan niya ang tanan nga miting. Sang natapos ang iya seminar kag tion na agod mapauli sia, gin-agda sia sang grupo sang mga utod nga babayi nga manyaga, kag ginpangabay nila sia sa pagpangamuyo para sa pagkaon. Nadumduman niya kon paano ang iya asawa, nga nagatakdong, nagapasalamat para sa ila pagkaon sa ila balay, nga nagahimo sini sa ngalan ni Jesus. Busa nangamuyo sia kag nangin maayo ang ila panyaga. Natandog gid si Awoke sa kaayo nga ginpakita sa iya sa tion sang iya pagtener, amo nga nagdesisyon sia nga mangin isa ka matuod nga utod. Sang nakapauli na sia, nagtuon sia, kag sang nagligad nga asambleya, nabawtismuhan sia. Nalipay gid ang iya asawa, kag nagahulat na lang si Awoke sang kahigayunan agod isugid ang iya eksperiensia sa kongregasyon nga iya ginkadtuan.

 EUROPA

MGA PUNGSOD 46

POPULASYON 730,776,667

MGA MANUGBANTALA 1,506,019

MGA PAGTUON SA BIBLIA 744,319

Ukraine

Ginkay-o sang isa ka elektrisyan ang kuntador sang koryente sa Kingdom Hall. Bantog nga palahubog ining tawo sa ila baryo. Samtang ginakay-o niya ang kuntador, natalupangdan niya ang tuigan nga teksto: “Magpalapit kamo sa Dios, kag magapalapit sia sa inyo.” (Sant. 4:8) Nag-untat sia sing makadali kag namangkot sa isa ka utod: “Posible gid bala nga makapalapit sa Dios? Mahimo bala ang isa ka makasasala makapalapit sa Dios?” Ginsabat sia sang utod pasad sa Biblia kag gin-agda sia sa pagtambong sa miting. Pagka-Domingo, nagdesisyon ang tawo nga magkadto sa miting apang sa pihak nga minuro, bangod indi niya luyag nga makita sang iya mga kaingod nga masulod sia sa Kingdom Hall. Apang, ang namulongpulong publiko sa sina nga adlaw amo ang gulang nga gikan sa ila minuro. Sang nakita niya ang gulang, nagtinguha sia nga manago. Apang nakilala sia sang gulang kag mainabyanon nga gin-abiabi. Sugod sadto, namat-od sia nga matambong na lang sa mga miting sa ila minuro. Nasugdan ang pagtuon sa Biblia sa iya, kag pagligad sang isa ka tuig, nabawtismuhan sia.

Sa sina nga tion, nagatrabaho sa iban nga pungsod ang iya asawa, kag indi sia makapati nga nag-untat na sa pag-inom ang iya bana kag nangin Saksi ni Jehova. Agod iya mismo makita, nagpauli sia. Malipayon sia nga ang iya bana wala na nagapahubog kag matinatapon na sa ila mga bata, apang wala sia nalipay nga nangin Saksi ni Jehova ang iya bana. Isa ka adlaw ginpangabay niya ang iya asawa, “Puede bala kita magkadto sa Kingdom Hall subong bug-os nga pamilya?” Nagsugot sia. Nasugdan ang pagtuon sa Biblia sa iya, kag sa malip-ot lamang nga tion,  nabawtismuhan sia upod sa iya tatlo ka bata nga babayi. Busa nabuligan sang isa ka teksto sa Biblia ang lima ka tawo nga makapalapit sa Dios.

Gresya

Pirme malabayan sang isa ka utod nga lalaki ang isa ka babayi nga regular nga nagakadto sa isa ka diutay nga kapilya kon magkadto sia sa trabaho kada adlaw. Ini nga mga kapilya makita sa mga higad sang dalan sa Gresya, nga sa masami, nagapatimaan nga may natabo nga grabe nga aksidente sa sini nga duog. Agod mabuligan ang babayi, naghimo sing malip-ot nga sulat ang utod upod ang Makasulatanhon nga lugpay tuhoy sa kahimtangan sang mga patay kag paglaum nga pagkabanhaw. Ginsulat man sang utod ang iya ngalan kag ang numero sang ila telepono kag ginbutang ang sulat sa sulod sang kapelya. Pagkasunod gid nga adlaw, ginteleponohan sia sang babayi kag nangin interesado gid sa maayong balita. Ginaduaw na sia karon sing regular.

Norway

Pagkatapos sang pag-alagad sa latagon, nagsulod sa isa ka palamahawan ang anom ka utod nga babayi. Ginaistoryahan nila ang maayo nga pamulongpulong publiko nga ila nabatian sa Kingdom Hall duha ka adlaw na ang nagligad. Tuhoy ini sa paglaum nga pagkabanhaw. Sang ulihi, ang isa ka babayi nga nagapamati sa ila nagpalapit sa ila lamesa. Namangkot sia kon mahimo bala sia makalingkod upod sa ila sa pagpamati sang ila ginaistoryahan. Ginsugiran niya sila nga bag-o lang napatay ang iya mga ginikanan. Nangin makapalig-on ang ila pag-istoryahanay. Ginpangayo sang mga utod ang numero sang telepono sang babayi, kag isa sa ila sang ulihi ang nagduaw sa iya kag nagtuon sa Biblia.

Lithuania

Ang isa ka pamatan-on nga bug-os tion nga manugbantala nga si Olga, nakasugod sing isa ka pagtuon sa Biblia sa ganhaan sa isa ka Ruso nga babayi. Sa ila una nga mga paghinun-anon, ginpangabay sang babayi si Olga nga ipaathag ang ekspresyon sa Biblia nga “katapusan nga mga adlaw.” (2 Tim. 3:1) Ginsaaran sia ni Olga nga ipaathag niya ini sa iya masunod nga pagduaw. Sa sulod sang halos isa ka bulan, indi na makita ni Olga ang babayi sa ila balay, bisan pa nga pirme sia nagabalikbalik.  Kag samtang wala sing nagabukas sa puertahan, natalupangdan ni Olga nga may nagalili sa iya sa buho. Nagsiling si Olga: “Wala ko gid ginpamensar nga indi na luyag sining babayi nga ipadayon ang mga paghinun-anon sa Biblia. Siguro, iban nga tawo ang yara sa sulod. Busa, nagdesisyon ako nga sulatan sia agod ipaathag ang iya ginpamakot. Pagligad sang tatlo ka adlaw, ginkadtuan ko naman sia sa ila balay. Nalipay gid ako sang ginbuksan niya ang puertahan! Natandog gid sia sa sulat kag sa personal nga interes sa iya.”

Ginpasalamatan sang babayi si Olga kag nagsiling: “Pila ka beses ko nabasa sing bug-os ang imo sulat kag nahangpan ko ini tanan.” Subong resulta, ang ginsugdan nga pagtuon sa ganhaan nangin isa ka regular nga pagtuon sa Biblia sa puluy-an sa Ginatudlo Sang Biblia nga libro. Kag karon, kada kadto ni Olga sa pagtuon, mainabyanon sia nga ginaabiabi sang babayi.

Switzerland

Sa Geneva, nga isa ka siudad nga ang pumuluyo naggikan sa nanuhaytuhay nga pungsod, nasugilanon sang utod nga si Marie ang isa ka babayi nga taga-Natung-an nga Sidlangan. Sanglit nagatuon sing Arabe si Marie, amo ini ang lenguahe nga iya gingamit sa pagpakig-istorya sa babayi. Nagsiling si Marie nga nagapati sia sa isa lamang ka matuod nga Dios. Subong resulta, ginhakos kag ginhalukan sia sang babayi, nga nagasiling nga masinulub-on kag nagapangamuyo sia sang ginsugilanon sia ni Marie. Nagsiling ang babayi nga mapauli sia sa pungsod nga iya ginhalinan sa masunod nga adlaw. Ginbuksan ni Marie ang iya Biblia kag ginbasa ang 1 Pedro 3:7 kag ginpaathag nga ginapalangga gid sang Dios ang mga babayi. Nian, luyag ni Jehova nga padunggan kag tahuron sang tagsa ka bana ang ila asawa. Sing may katingala, namangkot ang babayi: “Anghel ka bala ukon isa ka tawo? Ang makasulubo amo nga ang  akon bana wala nagsunod sa ginasiling sang Dios sa sina nga teksto. Pirme ako nagapangamuyo sa Dios nga buligan niya ako. Kag ginbuksan mo lang ini nga libro kag ginbasa sa akon ini nga teksto.” Nian ginpangabay sang babayi si Marie nga isulat ang teksto sa isa ka panid nga papel. Nagsiling sia nga dalhon niya ini, ipakita sa iya pamilya kag isugid sa ila ining makalilipay nga pagsugilanon. Nasubuan gid si Marie nga mapauli na ang babayi, apang nagsugtanay sila nga ipadayon ang pagpakig-angutanay.

Netherlands

Masapwan sa siudad sang Rotterdam ang isa sa labing daku nga pantalan sa bug-os nga kalibutan. Ang mga kargamento sa mga barko ginasaylo sa mga trak kag ginadul-ong sa mga pungsod nga sakop sang European Union ukon sa gua sini. Busa, madamo katama nga mga trak ang nagaagi sa sini nga pungsod. Ang isa sa mayor nga mga haywey nga padulong sa kaingod nga Alemanya may pulunduhan sang mga trak nga ginaagyan sang mga treyler nga nagadamo sing tubtob 1,500 kada oras. Bangod madamo nga drayber ang nagapahuwayhuway diri, ginkalitan sang aton mga utod ang kahigayunan nga makapanaksi sa mga trak, nga nagasugilanon sa mga drayber nga naggikan pa sa Europa, Natung-an nga Sidlangan, kag sa halos tanan nga sakop anay sang republika sang Sobyet. Naluyagan gid sang mga drayber ang aton mga magasin. Sang nagligad nga tuig, nagbantala sing 82 ka beses ang aton mga utod sa pulunduhan sang trak kag nakapahamtang sing kapin sa 10,000 ka magasin sa 35 ka lenguahe.

AMERIKA

MGA PUNGSOD 56

POPULASYON 883,782,291

MGA MANUGBANTALA 3,256,287

MGA PAGTUON SA BIBLIA 3,111,358

Peru

Regular payunir si Jorge kag ang iya palangabuhian amo ang pagdrowing sang mga retrato. Ginpanaksihan niya ang isa pa ka pintor nga si Hubert, nga nagbaton sang pagtuon sa Biblia. Bisan pa sang mabaskog nga pagpamatok sang iya pamilya, mga abyan kag mga kaingod, natapos ni Hubert ang pagtuon sa libro nga Ang Ihibalo nga Nagadul-ong sa Kabuhi nga Walay Katapusan sa sulod lang sang anom ka bulan. Sa iya mga pangamuyo, ginpangabay niya si Jehova nga buligan ang iya pamilya nga makatuon sing kamatuoran. Nakibot gid sia sang ang iya magulang nga si Jhon nagbuylog sa iya sa pagtuon kag nagtambong sa mga miting. Pagkasunod nga semana, nagbuylog man sa pagtuon ang bayaw ni Jhon nga si Cesar. Bisan pa nagpamatok sang primero, nagtuon man ang asawa ni Cesar. Sang ulihi ang kabutho ni Hubert nga si Reynaldo luyag man magtuon. Bangod sang mabaskog nga pagpamatok, napilitan sia nga magtuon sa balay nanday Hubert. Wala magdugay sang ulihi, ang manghod ni Hubert nga si Milton, nagtuon man. Pagkatapos sang una nga pagtuon, ginpanaksihan ni Milton ang iya duha ka masigkaestudyante, nga sanday Darwin kag Christian, nga nagtuon kag nagtambong  sa mga miting. May duha pa ka magulang si Hubert, sanday Ronald kag Martin. Nagtambong si Ronald sa pagtuon nanday Hubert kag madamo sia sing ginpamangkot tuhoy sa Biblia, busa ginpaathag ni Jorge nga mahimo masabat ang iya tanan nga pamangkot paagi sa pagtuon sa Biblia. Nagpasugot sia. Nian, nagtuon si Martin, kag nagbuylog man ang iya duha ka bata nga babayi. Nabawtismuhan sanday Hubert kag Jhon sang “Malapit Na ang Kaluwasan!” Distrito nga Kombension. Subong resulta sinang una nga pagpanaksi, suno sa ulihi nga rekord, 18 ka tawo ang nakatuon tuhoy kay Jehova.

Brazil

Nagapuyo si Paulo sa isa ka rantsuhan sa naaminhan nga bahin sang pungsod. Nagpasugot sia nga magtuon sa Biblia agod lamang nga mapahamut-an ang babayi nga iya ginapuyopuyo, nga iya ginpakaslan sang ulihi, nga nagatuon sa Biblia. Sa amo man nga tion, gin-ayam kag napatay sang mga cowboy nga nagatrabaho sa rantsuhan ang isa ka jaguar nga nagasalot sa mga baka. Bangod luyag nila makakuarta sa sini nga kahimtangan, ginteleponohan nila ang tag-iya sang rantsuhan kag nangayo sing kuarta agod magkuha kuno sing isa ka propesyonal nga manug-ayam sing jaguar. Nag-ugyon man si Paulo sa sini nga padihot, ginhambal pa gani niya ining binutig nga sugilanon sa iya amo. Apang, nakonsiensia sia bangod sang iya natun-an sa Biblia. Bisan pa nga nahibaluan niya nga madula ang iya trabaho kag maakig sa iya ang iya mga kaupod, ginteleponohan niya gihapon ang ila amo agod sugiran sang kamatuoran. Sang ulihi, ginhimo nga manugdumala sang rantsuhan si Paulo bangod sang iya pagkabunayag. Bawtismado na karon subong manugbantala sang maayong balita  si Paulo kag ang iya asawa. Makalilipay gid makita ining bunayag nga tawo nga nagamaneho sang iya traktora pakadto sa Kingdom Hall, upod sa iya asawa kag duha ka bata!

Mexico

Sang nagtambong sa isa ka miting para sa mga ginikanan sa eskwelahan nga ginabuthuan sang iya duha ka bata nga babayi, si María, nga isa ka makugi nga regular payunir, nakatalupangod nga nabalaka gid ang mga manunudlo tuhoy sa pagrebelde kag imoral nga paggawi sang pila ka estudyante. Nagsiling ang isa ka maestra: “Mga ginikanan, kon indi ninyo luyag madugangan ang delingkwente nga mga kabataan sa mga kalye, palihug buligi ninyo kami. Istoryaha ang inyo mga bata. Bakli sila sing libro. Buligi sila, bangod madamo sila sing pamangkot. Indi sila pagtuguti nga sa mga dalan mangita sing sabat.” Sang ulihi, nagkadto si María sa opisina sang prinsipal agod usisaon ang paggawi sang iya duha ka bata kag ginsugiran sia nga wala sing problema sa ila. Nian ginrekomendar niya sa iya ang Questions Young People Ask—Answers That Work nga libro subong isa ka praktikal nga panuytoy para sa nga pamatan-on. Namati sing maayo ang prinsipal kag nangabay kay María nga dal-an sia sing isa ka kopya. Sang gindul-ong ini ni María pagkadason nga adlaw, mapinasalamaton nga gintan-aw ini sang prinsipal kag nangabay sing isa pa ka kopya para sa sikologo sang eskwelahan. Pagkatapos nga mabasa, ginpanugda sang sikologo nga ilakip ini sa kurikulum sang eskwelahan. Nag-order ang prinsipal sing 12 ka libro para sa 12 ka manunudlo kag 50 para sa librarya sang eskwelahan.

Uruguay

Sang isa ka kaagahon, nagbiyahe ang isa ka tawo gikan sa Argentina pauli sa Uruguay. Manugsaka na sia sa lantsa nga matabok sa Río de la Plata sang ginpalapitan sia sang isa ka dalagita kag nagtanyag sa iya sing Enero 2006 nga Magmata! nga magasin nga ang serye nga panghapin amo, “Ano ang Yara sa Palaabuton?” Mainabyanon ang dalagita, kag malipayon nga ginbaton niya ang magasin. Sang nag-abot sia sa Montevideo, gindul-ong ang mga pasahero sa mayor nga terminal sang bus. Sa iya kakibot, ginpalapitan sia liwat sang isa ka Saksi apang sa sini nga tion, isa ka tigulang nga babayi nga nagapamaston. Gintanyagan sia sing pareho nga gua sang magasin, kag ginbaton niya ini. Wala magdugay sang nag-abot sia sa ila balay sina nga  gab-i, may nanuktok sa ila puertahan. Sa liwat, isa na naman sa mga Saksi ni Jehova. Pagkatapos pamatian ang malip-ot nga presentasyon, ginbaton niya ang magasin—sa ikatlo ka beses sa sina nga adlaw! Sang ginpaathag sang Saksi ang tuhoy sa mga kontribusyon para sa bug-os kalibutan nga hilikuton, nagsiling sia nga nahibaluan na niya ini kag nagsulod sa pagkuha sing kuarta. Sa iya pagbalik, gindala niya ang duha ka magasin nga iya nakuha sa sina nga adlaw. Nagapatuhoy sa pamangkot “Ano ang yara sa palaabuton?” nagyuhum sia: “Napat-od ko gid ang sabat: Yara sa palaabuton ang isa sa mga Saksi ni Jehova!”

Puerto Rico

Ginaduaw sang isa ka utod nga babayi ang iya bata nga babayi sang ginsulod sang duha ka kawatan ang balay, ang isa may rebolber. Nagapangayo sila sing kuarta, apang sang nagsiling ang mga babayi nga wala sila sing kuarta, ginhalughog sang isa ka kawatan ang bug-os nga balay samtang ang isa nagataya sing rebolber sa ila. Sa gilayon nangamuyo sila kay Jehova. Namangkot ang kawatan, “Nagaano kamo?” Nagsabat sila nga mga Saksi ni Jehova sila kag nagapangamuyo sa ila Dios nga si Jehova. Samtang ginabantalaan sang mga utod ang kawatan nga nagataya sing rebolber, ang isa ka kawatan nagbalik kag nagsiling nga nakakita sia sing ATM card. Wala magdugay nagsakay sila tanan sa salakyan sang iloy kag nagpadulong sa bangko. Padayon nga ginabantalaan kag ginasugilanon sing matinahuron sang mga utod ang mga kawatan. Ginpangabay karon sang iloy nga indi na pag-itaya ang iya rebolber, kag sa iya kakibot gintuman niya sia, nga nagasiling nga nagadayaw gid sia sa iya pagkakalmado. Nagsiling ang iloy nga may anak sia nga lalaki nga kaedad nila apang may masanag sia nga palaabuton. Ginpalig-on niya ang mga kawatan nga ipahisuno ang ila kabuhi sa mga dalanon ni Jehova agod nga makatigayon man sila sing maayo nga palaabuton. Bisan pa sa sini, nagdayon sila sa bangko, kag gin-withdraw sang bata ang kuarta. Nian gindala sang mga kawatan ang aton mga utod sa isa ka eskinita, kag ginbuy-an sila. Luyag sang isa ka kawatan nga gapuson sila, apang ang tawo nga may rebolber wala magpasugot. Ginsilingan niya ang mga utod nga may isa nga gamhanan nga nagaamlig sa ila. Antes sini, ginkawatan, gingapos, kag ginkulata sini nga mga tawo ang iban sa ila lugar.

 OCEANIA

MGA PUNGSOD 30

POPULASYON 35,914,649

MGA MANUGBANTALA 94,323

MGA PAGTUON SA BIBLIA 49,667

Papua New Guinea

Nahibaluan sang isa ka soldado anay nga si Tom ang mga kakugmat tungod sa inaway. Sang nasugilanon sia sang mga Saksi sa ila minuro, napahulag sia sa saad sang Biblia tuhoy sa isa ka kalibutan nga wala sing inaway. Nagtuon sa Biblia si Tom kag nag-uswag sa espirituwal, apang natilawan ang iya pagtuo sang nagdesisyon sia nga magtambong sa Memoryal. Isa anay ka pastor sa United nga simbahan ang amay ni Tom, kag sa sini nga tion si Tom amo ang tsirman sa sina nga simbahan, nga yara sa tupad sang Kingdom Hall. Sang nagapasulod si Tom sa Kingdom Hall, nakita niya ang mga katapo sang ila simbahan—ang iya suod nga mga abyan, mga kaupod sa trabaho sang una, subong man ang ministro sang simbahan—nga nagatulok sa iya. Luyag ni Tom manago, apang naghunahuna sia: ‘Ngaa manago ako? Karon na ang tion nga dapat mahibaluan sang mga tawo nga luyag ko mangin isa sa mga Saksi ni Jehova.’ Pagligad sang Easter, ginpalapitan niya ang ministro sang simbahan kag namangkot, “Nakita mo ko sa Kingdom Hall?”

Nagsabat ang ministro, “Huo, nakita ta ka,” kag nagkinadlaw sila nga duha.

Nian nagsiling si Tom: “Abi mo, nagpati gid ako nga ang daan nga restawran amo ang pinakamaayo nga kalan-an, apang natukiban ko nga may hilo ang pagkaon. Nian nakasalapo ako sing isa ka bag-o nga restawran, nga nagaserbe sang manamit kag makapapagros nga pagkaon. Sang natilawan ko ining manamit nga pagkaon, ngaa mabalik pa ko sa daan nga restawran?”

 Nahangpan sang ministro ang punto kag nagsiling, “Tom, indi ka gid manugid kay bisan sin-o ha, abi mo, regular ako nga nagabasa sang Magmata!” Naghalin si Tom sa simbahan kag bisan pa sa madamo nga pagtilaw nangin dedikado sia nga alagad ni Jehova.

Solomon Islands

Sang Pebrero 18, 2006, 58 ka manugbantala ang naggradwar sa una nga Basic Auslan Sign Language Course nga gin-organisar sang sanga talatapan sang mga Saksi ni Jehova. Sugod sadto, napulo ka apa ang nagbaton sang pagtuon sa Biblia kag nagatambong sa mga miting sa kongregasyon. Isa sa ila amo si Moses. Ang iya kaingod naglaragway sa iya subong “kutos nga tawo kag pirme nagapamuyayaw—isa ka tawo nga wala nagapasupil.” Apang, sang ang iya Saksi nga paryente, nga nag-eskwela sa sini nga kurso, nagtanyag kay Moses sing isa ka pagtuon sa Biblia, gilayon niya ini nga ginbaton. Pagligad sang isa ka bulan, sang nagtambong sia sa iya una nga miting sa Kingdom Hall, lamugo ang iya bayo, malaba ang iya buhok, kag buranguson. Napalig-on gid sia sa pag-abiabi sa iya kag sa mga kamatuoran nga iya “nabatian.” Nakibot sia sang natun-an niya gikan sa Biblia nga paagi sa pagtatap sang pamayo kag panagway, mahimaya sang isa ka tawo ang Dios. Sang nagsulod sia sa Kingdom Hall pagkadason nga semana, wala sia makilala sang mga utod. Nagpagunting kag nagpamarbas sia, kag mahipid ang iya pamayo. Nagbag-o man ang iya batasan. Nagsiling ang iya kaingod: “Matinlo, kag palayuhum na sia karon.” Nag-uswag sa espirituwal si Moses kag ginabuligan niya ang iban nga mga apa nga mahangpan ang maayong balita.

Tahiti

May 720 lamang ka pumuluyo ang gamay kag naligwin nga isla sang Makemo, nga kapin sa 600 kilometros gikan sa Tahiti. Nakatuon sing kamatuoran ang babayi nga si Ravahere sa tion sang iya pag-istar sa iya mga paryente sa Tahiti. Sang nakapauli sia sa Makemo, nagtuon sia sa Biblia, sang primero paagi sa sulat, nian paagi sa fax, kag sang ulihi paagi sa telepono. Ginparehistro ni Ravahere ang ila pag-asawahay kag ginpahisuno ang iya pagkabuhi sa mga talaksan ni Jehova, bisan pa sang mga pag-ipit gikan sa pila niya ka paryente nga luyag nga magpabilin sia nga Mormon. Sang ulihi, sang nagkadto sia sa isa ka  kongregasyon sa Tahiti, nangin kalipikado si Ravahere nga mangin di-bawtismado nga manugbantala. Kada duha ka semana makabaton sia sing makapalig-on nga sulat gikan sa sini nga kongregasyon.

Ginduaw sang manugtatap sang sirkito kag sang iya asawa si Ravahere sang Hunyo 2006. Nagreport sia nga kada talipuspusan nga semana nagabantala si Ravahere sa balay kag balay. Gindrowing niya ang iya teritoryo kag nakasugod sing pila ka pagtuon sing Biblia sa puluy-an. Ginadispley niya ang aton mga magasin sa kilid sang iya gamay nga puesto sang palamahawan. Nagadumala man sia sing pagtinuon sa libro, nga ginatambungan sang iya bana.

Fiji

Ginadumalahan sang isa ka misyonero nga nahanas sa Gilead nga si Matthew kag sang isa ka gulang sing pagtuon sa Biblia ang apat ka estudyante sa isa ka kolehiyo nga nagahanas sa mga estudyante agod mangin mga manunudlo. Regular nga nagasermon kada gab-i ang mga ministro sang nanuhaytuhay nga simbahan sa sini nga kolehiyo sa ila mga katapo. Ang katuyuan sini nga kahimusan amo ang pagbulig sa mga manugdumala sang eskwelahan, nga nagatinguha gid sa pagtapna sang nagalain nga batasan sa sulod sang kampus.

 Isa ka gab-i, natalupangdan ni Matthew ang madamong estudyante sa isa ka kalan-an—mga 250—nga nagalingkod sing mahipos, nga nagahulat nga may mga Biblia, notebook, kag may mga bolpen. Ginahulat nila ang isa ka ministro sang isa sa mga dalagku nga denominasyon nga amo ang magadumala sing isa ka serbisyo. Apang, bangod wala nag-abot ang ministro, gin-agda si Matthew nga amo ang mamulongpulong sa grupo. Indi kaangay sang kinaandan nga pag-ambahan kag sermon sa pagtagudili sa kalayuhon nga impierno nga ginahimo sang mga pila ka ministro, naghatag si Matthew sing pinasahi gid nga sahi sang presentasyon, nga nagagamit sang Kasulatan. Subong topiko sang iya insigida nga pamulongpulong, ginpalig-on ni Matthew ang mga estudyante nga dumdumon ang ila Manunuga samtang lamharon pa sila. Pagkatapos sini, naglinya ang tanan nga estudyante sa pagpangamusta kag pagpasalamat kay Matthew. Ginatinguhaan niya karon nga matatap ang interes bangod sining wala ginapaabot nga kahigayunan.

Australia

Samtang nagabantala sa balay kag balay, nasugilanon sang duha ka utod nga babayi ang isa ka nagabalatian nga babayi. Ginsugiran niya sila nga may malala sia nga kanser kag masako sia sa pagpamutos sang iya mga pagkabutang agod indi na mabudlayan ang iban sa pagpanghimos sini kon mapatay na sia. Nagsiling ang babayi nga wala na sia sing mga paryente kag mga abyan kag masubo gid ang iya kabuhi. Nagpaathag pa gid sia nga may masubo gid sia nga mga inagihan sa iban nga relihion kag nagabatyag nga ginpabay-an na sia sang Dios. Sang ulihi, gindalhan sia sang isa sa mga utod nga babayi sang isa ka pungpong nga bulak, kag bangod wala ang babayi sa iya balay, ginbilin na lang ini sang utod sa iya ganhaan upod ang isa ka malip-ot nga sulat. Sa sina nga hapon ginteleponohan sia sang babayi kag nagpasalamat gid sa iya kaayo. Nagsiling sia nga wala pa gid sing may nagpakita sa iya sing subong sini nga kaayo ukon naghatag sa iya sing bulak halin sang una, kag nangayo sia sing pasaylo nga wala sia sa iya balay. Sang nagduaw liwat ang mga utod, ginhulat niya sila. Gintanyagan sia sing Ginatudlo Sang Biblia nga libro, kag naiskedyul ang isa ka pagtuon sa Biblia.

[Retrato sa pahina 43]

Si Miho

[Retrato sa pahina 47]

Nagsakay kami sa tangke sang gatas

[Retrato sa pahina 47]

Si Ketevan

[Retrato sa pahina 48]

Ang pila ka katapo anay sang simbahan

[Retrato sa pahina 55]

Si Olga

[Retrato sa pahina 55]

Si Marie

 [Retrato sa pahina 57]

Sanday Hubert, Jorge, kag Jhon

[Retrato sa pahina 58]

Si Paulo kag ang iya pamilya

[Retrato sa pahina 63]

Si Ravahere sa iya puesto sang palamahawan sa Makemo

[Retrato sa pahina 63]

Si Matthew