Sulat Halin sa Nagadumala nga Hubon

SUBONG pagsunod sa halimbawa ni Jesus, hanuot kita nga nagapangamuyo sa Dios: “Pakabalaanon ang imo ngalan.” Ang aton hanuot nga handum nga magkabuhi nahisuno sa sina nga pangamuyo ginapakita sang aton pagkabuhi subong mga Saksi ni Jehova. Siempre pa, mas labaw pa sa paghibalo lamang sa ngalan sang Dios ang ginapatuman sa aton. Dapat naton himuslan ang tanan nga kahigayunan sa paghimaya sina nga ngalan. Sa pagkamatuod, ang labing daku nga kadungganan nga mahimo naton matigayon amo ang pagtawag sa aton nga isa sa mga Saksi ni Jehova.—Mat. 6:9; Isa. 43:10.

Nahisanto sa Salmo 110:3, handa ang katawhan ni Jehova sa pagpakigbahin sa hilikuton nga ginsiling ni Jehova nga dapat himuon. Ngaa nagabantala ang mga tawo bisan ano man ang ila pangidaron? Una sa tanan, bangod ini sang ila gugma sa Dios kag sang ila debosyon sa iya. Ginsugo kita sang Deuteronomio 6:5, 6 nga higugmaon si Jehova sa ‘bug-os naton nga tagipusuon, kalag, kag kusog.’ Ginapahulag kita sining tinagipusuon nga gugma nga gamiton ang aton tion, enerhiya, kag mga ginapanag-iyahan sa pagpasangkad sang mga intereses sang Ginharian sang Dios, nga nagalakip sa pagpakigbahin sa ministeryo sa bug-os naton nga masarangan suno sa ginatugot sang aton kahimtangan.

Ang gugma ni Jehova sa mga tawo amo ang nagpahulag sa iya agod magsugo nga ibantala ang maayong balita sang iya Ginharian sa bug-os nga duta. Indi niya luyag nga malaglag ang bisan sin-o kundi handum gid niya nga ang tanan maghinulsol gikan sa ila balingag nga dalanon kag magliso sa ila Manunuga agod nga mabuhi. (2 Ped. 3:9) “Nahamuot ako,” siling ni Jehova, “indi sa kamatayon sang mga malauton, kundi sa pagbiya sang malaut gikan sa iya dalanon agod padayon sia nga mabuhi.” (Ezeq. 33:11) Kon nagapakigbahin kita sa ministeryo, kita amo ang makita nga pamatuod sang gugma ni Jehova sa  aton mga isigkatawo. Ini nga katunayan, pat-od gid nga magaamot sa aton kalipay kag pagkanaayawan kon nagapakigbahin kita sa sining importante nga hilikuton.

Mapakita man ang aton tudok nga gugma kay Jehova suno sa aton pagtamod sa iya inspirado nga Pulong, ang Balaan nga Kasulatan. Kon wala sing Biblia, indi gid naton makilala ang Dios kag makapakigsuod sa iya, subong sang pangagda sa aton sang Santiago 4:8. Indi man naton mahibaluan kon ngaa yari kita diri kag kon ano ang matabo sa palaabuton. Indi naton mahibaluan nga ang aton ginikanan nga si Adan amo ang ginbangdan sang aton mga problema. (Roma 5:12) Indi man naton mahibaluan ang daku nga gugma sang Dios sa paghatag sang iya bugtong nga Anak subong gawad para sa aton. Sa madamo nga paagi, ginapaambit ni Jehova ang iya pila ka ihibalo, kaalam, kag paghangop sa aton. Dapat gid naton pabaloran ang iya ginhatag nga dulot para sa aton, ang iya inspirado sang espiritu nga Pulong! Ang aton apresasyon sa sining labing maayo nga dulot amo ang magapahulag sa aton agod ‘baklon ang nagakaigo nga tion’ sa pagbasa, pagtuon, kag pagpamalandong sa iya mga ginapamulong. (Efe. 5:15, 16; Sal. 1:1-3) Indi gid kita dapat magpabuyanbuyan sa pagbasa sang Pulong sang Dios matag-adlaw. Sa baylo, dapat kita mabuyok sang aton gugma sa Dios sa iya Pulong, agod nga mag-uswag ang aton paghangop sa iya kag mapatudok ang aton gugma sa iya.

 Natun-an naton sa Biblia nga sang nakasala si Adan kay Jehova, nadalahig ang tanan niya nga kaliwat, lakip kita, sang iya makasulubo kag wala sing paglaum nga kahimtangan. Apang, masarangan sang Dios nga mag-aman kag gin-amanan gid niya sing palalagyuhan ang katawhan kag naghimo sing tikang agod mapat-od nga matuman ang iya katuyuan sa sining duta.—Gen. 3:15.

Pat-od gid nga tanan kita nagahandum nga pakabalaanon ang dungganon nga ngalan sang aton Dios. Samtang nagauswag ang aton ihibalo kon daw ano ka dalayawon nga Dios si Jehova, mapahulag kita sa pagkooperar sa iya kag sa iya organisasyon sa pagpahibalo sang iya dungganon nga ngalan kag sang iya katuyuan. Makasiguro kita sang iya kahamuot kag pagpakamaayo karon kag sing wala katapusan nga kabuhi sa bag-ong kalibutan.

Kami nga katapo sang Nagadumala nga Hubon nagapalangga gid sa inyo mga kauturan. Ginapasalamatan gid namon kamo sa inyo maukod nga mga panikasog nga gamiton ang nabilin nga tion antes sang “dakung kapipit-an” agod bantalaan ang madamong tawo sang maayong balita. (Bug. 7:14) Sa paghimo sini, ginahatag ninyo sa ila ang kahigayunan nga nabaton man ninyo, nga amo ang pagkuha sing ihibalo sa Dios kag kay Cristo nga nagadul-ong sa kabuhi nga wala sing katapusan.—Juan 17:3.

Ang inyo mga utod,

Nagadumala nga Hubon

sang mga Saksi ni Jehova

[Retrato sa pahina 4]

Carey W. Barber

[Retrato sa pahina 4]

John E. Barr

[Retrato sa pahina 4]

Samuel Herd

[Retrato sa pahina 4]

Geoffrey Jackson

[Retrato sa pahina 5]

Theodore Jaracz

[Retrato sa pahina 4]

Stephen Lett

[Retrato sa pahina 5]

Gerrit Lösch

[Retrato sa pahina 5]

Anthony Morris III

[Retrato sa pahina 5]

Guy Pierce

[Retrato sa pahina 5]

David Splane