Talalupangdon nga mga Hitabo Sang Nagligad nga Tuig

“DAYAWON ko si Jehova sa bug-os ko nga kabuhi. Magaamba ako sa akon Dios samtang buhi ako.” (Sal. 146:2) Malipay gid ang salmista kon buhi lang sia karon nga makita nga ginadayaw gid si Jehova sing labi! Nakaamot sa sini nga kadayawan ang libro nga Ano Gid ang Ginatudlo Sang Biblia? nga nagalab-ot gid sa tagipusuon sang madamo nga nagapangita sang kamatuoran tuhoy sa Dios.—Binu. 17:27.

Agod madayaw pa gid si Jehova, madamong sanga ang nag-organisar sing mga klase sa pagtuon sing lenguahe agod mabantalaan sang mga manugbantala kag sang mga payunir ang mas madamo pa nga mga tawo sang maayong balita. Ayhan makahunahuna ka nga pasangkaron ang imo ministeryo paagi sa pagtuon sing iban nga lenguahe.

 Ang isa pa ka halimbawa sa pagdayaw kay Jehova amo ang tatlo ka semana nga kampanya sa pagpanagtag sang pinasahi nga handbill sa bug-os nga kalibutan nga nagapahibalo sang “Malapit Na ang Kaluwasan!” Distrito nga Kombension, nga pagahiwaton sa mga 155 ka pungsod. Minilyon ka manugbantala sang Ginharian sa kapin sa 99,000 ka kongregasyon ang nakigbahin sa sini nga kampanya, nga karon pa lang natabo. “Nagpahulag ini sa mga bag-uhan nga magsugod sa pagbantala, kag ang pila nga nagbugnaw napalig-on nga mangin aktibo liwat,” sulat sang isa ka Komite sang Kombension. Nakabaton sing handbill sa iya puluy-an ang isa ka utod nga nagbugnaw sing 35 ka tuig kag sugod sadto wala na sia nagpalta sa miting! Ang masunod amo ang pila sa mga eksperiensia nga nabaton gikan sa nanuhaytuhay nga sanga.

Pransia

Samtang nagabisita sa isa ka paryente, nakita sang Katoliko nga babayi kag sang iya bana ang handbill sa sulod sang balay kag naintriga sa ginpautwas sini nga mga pamangkot. Nagtambong sila sa kombension upod sa ila tatlo ka bata. Sang pag-abot nila, gin-abiabi gid sila sang attendant, ginhatagan sing mga Biblia, kag ginpalingkod sa tupad sang isa ka pamilya nga Saksi nga nagapuyo sing mga tatlo ka kilometro lang gikan sa ila balay! Nag-updanay ang duha ka pamilya sa sina nga adlaw kag naghimo sing kahimusan para sa isa ka pagtuon sa Biblia. Pagkadason nga semana, nagtambong ang interesado nga pamilya sa miting sang kongregasyon sa tion sang duaw sang manugtatap sang sirkito.

India

Ang bantog nga manug-amba nga si Sunita nagkadto sa Canada agod magpasundayag. Gin-agda sia sang Saksi nga iya nasugilanon didto nga magtambong sa isa ka Punjabi nga miting. Nagtambong sia kag nalipay sa miting ilabi na kay ginapadaku gid ang Biblia. Sang nakatigayon sia sing handbill para sa kombension, ginkanselar niya gilayon ang iya mga pasundayag sa sina nga talipuspusan sang semana agod makatambong sia sa tatlo ka adlaw. Wala gid naghinulsol si Sunita sa iya desisyon. “Amo ini ang kamatuoran,” siling niya pagkatapos sang unang adlaw. Sang nakapauli sia sa India, nagtambong sia sa Kingdom Hall,  upod sa iya iloy, bata nga lalaki, hinablos nga lalaki, kag amiga. Sang ginkadtuan sia sang ila anay mga pastor, ginpabutyag niya ang iya pamat-od nga mangin isa sa mga Saksi ni Jehova. Sa katunayan, ginsilingan niya sila nga dapat man sila magtambong sa Kingdom Hall!

Serbia

Nagapuyo sa Belgrade ang isa ka Intsik nga babayi nga si Mei Li. Nagabasa na sia sing Inintsik nga Ang Lalantawan sugod pa sang 2006. Sang nakabaton si Mei Li sang isa ka handbill nga nagaagda sa iya nga magtambong sa Inintsik nga kombension sa Leipzig, Alemanya, determinado gid sia nga magtambong bisan pa nga mga 1,000 kilometros ang Leipzig gikan sa Belgrade. Nagkuha sia sing tatlo ka adlaw nga visa, nag-eroplano pa Munich, kag nagsakay sa tren pakadto sa Leipzig, isa ka pagbiyahe nga nagatumbas sing duha ka bulan niya nga sueldo. Napalig-on gid sia sa iya natun-an sa programa kag sa iya pagpakigsugilanon sa mga delegado. Sang nagpauli si Mei Li sa Belgrade, ginbaton nila sang iya iloy ang pagtuon sa Biblia sa puluy-an kag nagtambong sa Inintsik nga pagtinuon sa libro.

Estados Unidos

“Makita ang mga bisita sa tunga sang mga tumalambong sa bug-os nga tatlo ka adlaw,” report sang isa ka Komite sang Kombension. “Isa sa mga bisita amo ang isa ka babayi nga nakabaton sing imbitasyon sang adlaw nga nagpangamuyo sia sa Dios nga tuytuyan ang iya kabuhi. Nagmaneho sia sing duha ka oras pakadto sa kombension sang Sabado kag Domingo kag nagbaton sing pagtuon sa Biblia.” Nagpadayon ang report: “Isa ka tawo ang nagdalagan gid sa paglagas sa utod nga nagbilin sing imbitasyon sa iya bata nga lalaki. Wala nakahibalo ang utod kon ngaa, apang nalipay sia sang ang nagalagas sa iya mainayuhon nga nangabay nga magbalik sa ila balay agod magsugilanon. Samtang ginauyatan sang tawo ang iya Biblia, nagpautwas sia sing madamo nga pamangkot, kag nasugdan ang isa ka pagtuon.”

Gintanyagan sang isa ka utod sang handbill ang isa ka tawo sa isa ka duog sang konstruksion. “Mahimo ko bala sugiran ang iban tuhoy sa sini?” pamangkot sang tawo.

“Aba huo!” siling sang utod, nga lipod sa iya ihibalo, may programa gali ang tawo sa estasyunan sang radyo kada Sabado  sang aga. Gintuman niya ang iya ginsiling, ginsugiran niya ang iban tuhoy sa imbitasyon paagi sa pagbasa sini sa tion sang iya palatuntunan! Bilang resulta, madamo nga tawo ang nangusisa tuhoy sa handbill.

Nag-auxiliary payunir ang dose anyos nga si Morgan. Isa ka semana antes sang pinasahi nga kampanya, nasugilanon niya ang isa ka tawo nga may madamo nga pamangkot sa Biblia kag gin-agda niya sia nga magtambong sa pamulongpulong publiko sa ila Kingdom Hall. Nagtambong ang tawo apang nagbiya gilayon pagkatapos sini agod magkumpanyar sa lubong sang iya paryente. Sang nagsugod ang pinasahi nga kampanya, ginhatagan ni Morgan ining interesado sing isa ka handbill. “Matambong gid ako sa Sabado kag Domingo apang kinahanglan nga matrabaho ako sa Biernes,” siling niya. Namangkot sia gilayon kon ano ang ginahimo sang mga Saksi sa sini nga mga kahimtangan. “Sa masami nagabakasyon sila, apang kon kaisa nagahalin sila sa ila trabaho,” siling ni Morgan.

Sang ginduaw liwat ni Morgan ang tawo, nagsiling sia nga ginpangabay niya ang iya  amo nga tugutan sia nga magbakasyon sa Biernes, nga nagasiling pa sa iya amo nga kon indi sia pagtugutan, mahalin sia sa iya trabaho. Nagsiling ang iya amo nga indi sia maghalin kay maayo gid sia nga empleyado kag mahimo sia makabakasyon sa Biernes kag pati sa Huebes agod makahanda sia.

Nagtambong ang tawo sa tatlo ka adlaw nga kombension apang wala sia nagaisahanon. Nag-upod sa iya ang 8 ka katapo sang iya pamilya, kag ang iya 12 ka abyan kag ang ila mga pamilya—nga may kabug-usan nga 35 ka tawo! Sang primero, sang ginsugiran niya si Morgan nga maupod sa iya ang mga 30 ka tawo ukon kapin pa, nagsabat sia, “Indi ako makareserba sing amo sina kadamo nga pulungkuan.”

“Nahangpan ko,” siling niya. “Sige lang, bisan mabudlay basta may mapungkuan.” Siempre pa, tanan sila nakapungko sing komportable.

“ANG LIBRO . . . NAGATUDLO SUBONG SANG PAGTUDLO NI JESUS”

Ginpakita sang report nga ang bulig sa pagtuon sa Biblia nga Ano Gid ang Ginatudlo Sang Biblia? nga libro napamatud-an nga mapuslanon gid sa pagbantala nga hilikuton. “Nagapaathag ini sang mga butang kag nagapalig-on sang aton tagipusuon kag hunahuna,” siling sang isa ka estudyante sa Biblia. Nagreport ang isa ka manugtatap sang distrito: “Ang libro nagapukaw sang imo igtalupangod bangod ini nagatudlo subong sang pagtudlo ni Jesus. Prangka, direkta, kag maathag ini, apang makatalandog man sa tagipusuon.” Talupangda ang masunod nga mga eksperiensia.

Australia

Samtang nagakay-o sa balay sang isa ka nagamasakit nga babayi, ginsugiran sia sang utod tuhoy sa paglaum sa Ginharian. Pagligad sang pila ka adlaw, sang ginduaw sia sang utod upod sa isa ka payunir nga babayi, namangkot ang babayi tuhoy sa katapusan nga mga adlaw. Ginbuksan sang mga Saksi ang Ginatudlo Sang Biblia nga libro sa kapitulo 9, nga natig-uluhan, “Nagakabuhi Bala Kita sa ‘Katapusan nga mga Adlaw’?” kag ginhinun-anunan ini nga materyal. Nagdayaw gid ang babayi sa ginaunod sang Biblia. “Ginhimo ako nga ignorante sang amon relihion,” siling niya.

 Nagsulat ang utod nga lalaki: “Sa amon pagbalik, gintun-an namon ang kapitulo 1, ‘Ano ang Kamatuoran Tuhoy sa Dios?’ kag ang may kaangtanan sa sini nga topiko sa apendise, nga nagapaathag kon ngaa gindula ang ngalan sang Dios sa iban nga Biblia. Sang nabasahan sang babayi ang introduksion sang iya Biblia nga gin-islan sang mga manugbadbad ang ‘Jehova’ sing ‘Ginuo,’ naakig sia, kay may nagsiling sa iya nga amo ini ang maayo nga badbad. Nagsiling ang babayi nga luyag niya magtambong sa Cristianong mga miting.

Belgium

Nasugilanon sang utod nga si Ingrid ang isa ka Aprikana nga naugot sa mga Saksi ni Jehova. Sang mainayuhon nga ginpakita ni Ingrid sa iya ang Ginatudlo Sang Biblia nga libro, nagbag-o ang iya panimuot, bangod luyag gid niya mahangpan ang Pulong sang Dios. Nagtuon pa gani sia, kag namilit nga basahon ang tanan nga teksto. Nagatambong na sia karon sa mga miting, pirme nagakomento kag luyag na nga mangin manugbantala sang Ginharian.

Brazil

Gintun-an sa Biblia sang mga Saksi si Paulo sang tin-edyer pa sia. Sing makapasubo, nabungkag ang ila pamilya sang 16 anyos sia. Agod mabuligan ang iya iloy, nag-entra si Paulo sa isa ka banda sang samba apang sang ulihi nadalahig sa imoralidad kag lakas nga pag-inom. Apang, nagpabilin gihapon sa iya tagipusuon ang pila ka kamatuoran. Halimbawa, naakig sia sang nahibaluan niya nga nadalahig ang voodoo sa demonismo sang nagpasundayag sia sa isa ka voodoo center. Nakamarasmas man sia nga wala sing pulos ang iya kabuhi. Sang ang isa ka pamatan-on nga utod nga lalaki nagpakita kay Paulo sing Ginatudlo Sang Biblia nga libro sang 2005, napukaw gilayon ang iya interes, kag nagtuon sia liwat. Wala magdugay, naghalin sia sa banda, kag nagatambong na karon sa Cristianong mga miting.

Britanya

Samtang sa pamalaybalay nga ministeryo, nasugilanon ni Marilyn ang isa ka lamharon nga iloy nga si Melanie nga nagpakita sing interes sa Biblia. Ginbilinan sia ni Marilyn sang isa  ka tract kag nagsaad nga mabalik. Pagkatapos sang pila beses nga pagbalik, naabtan gid man ni Marilyn si Melanie sa ila balay. “Gingamit ko gilayon ang libro nga Ginatudlo Sang Biblia,” siling ni Marilyn, “kag nagresulta ini sa isa ka progresibo nga pagtuon sa Biblia. Antes sang Krismas, ginsorpresa ako ni Melanie sa pagsiling nga amo na ini ang katapusan nga tion nga mabutang sia sing isa ka Christmas tree. Abanse niya nga ginbasa ang libro kag natun-an niya ang kamatuoran tuhoy sa Krismas.”

Colombia

Gintugutan si Consuelo sang iya superbisor nga makabakasyon sa iya trabaho agod magtambong sa isa ka distrito nga kombension. Sang nagbalik na si Consuelo sa trabaho, ginpamangkot sia sang iya superbisor kon kamusta ang kombension, kag nagresulta ini sa isa ka maayong paghinun-anon. Sang ginpakita sa iya ni Consuelo ang Ginatudlo Sang Biblia nga libro, ginhulam niya ini. Pagligad sang duha ka adlaw gin-uli niya ini, nga nagasiling nga makawiwili gid ini basahon. “Indi lamang ini para basahon kundi para tun-an man,” siling ni Consuelo, nga nagpasundayag gilayon sa iya kon paano ini tun-an. “Buot mo silingon nga mahimo ko tun-an ini nga libro?” pamangkot sang superbisor. Sa gilayon, nahimos ang pagtuon, kag wala magdugay pagligad sini, ginpanaksihan na sang superbisor ang iya pamilya kag mga abyan. Nagtambong man sia sa Cristianong mga miting, kon kaisa upod sa iya bata nga lalaki kag sa iya lola.

 Guyana

Gintun-an ni Joseph, nga isa ka regular payunir, ang isa ka tawo sa Ginatudlo Sang Biblia nga libro. Ini nga tawo nasugilanon sang mga Saksi sang nagligad nga pila ka tuig sa Georgetown, ang kapital. Sang nag-abot si Joseph para sa una nga pagtuon, naabtan niya nga nagahulat ang tawo upod sa iya hamtong nga duha ka bata nga lalaki kag sa ila mga asawa. Nagkuha man sila sing mga libro. Pagkadason nga semana, nagsiling ang amay nga ginhulam sang isa ka maestro sa ila duog ang Ginatudlo Sang Biblia nga libro kag ginbasa ini. “Nagaunod ini sang kamatuoran,” siling sang maestro. Nagbuylog man sa pagtuon ang maestro. Sa amo man nga tion, nabatian sang kaingod ang tuhoy sa pagtuon kag namangkot kon mahimo bala sia makatambong. Sa sina nga tion gin-agda sila tanan ni Joseph nga magtambong sa Memoryal. Bisan pa wala nakatambong ang tawo nga una nga gintun-an ni Joseph bangod nagmasakit sia, nagtambong ang iya pamilya sa Memoryal, subong man ang maestro kag ang iya pamilya. Sila tanan padayon nga nagauswag sing maayo.

Poland

Samtang nagapanaksi sa dalan, nasugilanon ni Lucjan ang 50-anyos nga si Jan, nga iya anay abyan sa eskwelahan nga wala niya makita sing madugay nga tinuig. Sa ila pagsugilanon, nga nagalakip sang mga punto sa Ginatudlo Sang Biblia nga libro, ginsugid ni Jan nga napatay na ang iya asawa kag nga nagapanigarilyo kag nangin alkoholiko sia. “Pagligad sang pila  ka adlaw, ginbalikan ko sia upod sa akon abyan,” siling ni Lucjan, “kag ginahulat gid kami ni Jan. Sa iya pangabay, ginsugdan gilayon namon ang pagtuon sa Ginatudlo Sang Biblia nga libro.” Nagtudok ang kamatuoran sa iya tagipusuon, kag ginatinguhaan niya nga malandas ang iya pagkagiyan kag makontrol ang iya baba, bangod masami sia nagapamuyayaw.

Espanya

Ngaa ginlaygayan sang isa ka hematologist ang isa ka pasyente nga may depresyon nga magtuon sa Biblia? Ginduaw sang duha ka katapo sang Hospital Liaison Committee ini nga doktor kag naghatag sa iya sing Ginatudlo Sang Biblia nga libro. Sia kag ang pasyente lunsay may depresyon bangod sang malala nga balatian. Nagdayaw sa Ginatudlo Sang Biblia nga libro, ginpakita niya ini sa iya pasyente, nga nagapasalig sa iya nga paagi sa pagtuon upod sa mga Saksi, mangin masanag ang ila palaabuton. Sa sulod sang duha lang ka adlaw, nasugilanon sang isa ka payunir nga utod nga babayi nga nagapanaksi sa dalan ang babayi, kag ginbaton sang babayi ang isa ka pagtuon. Nagtuon man ang hematologist kag nagatambong na sa Cristianong mga miting.

Zambia

Ang pangulo sang isa ka minuro nga si Goliath, may duha ka asawa kag napulo ka bata. Sia kag ang iya pamilya madasig nga nag-uswag sa espirituwal. Nagbag-o si Goliath sa tapos niya mabasa ang Ginatudlo Sang Biblia nga libro. Sang Enero 2006 sia kag ang iya pamilya nagtambong sa Cristianong mga miting, kag sang Pebrero ginpangabay niya ang iya ikaduha nga asawa nga mabulagay sila kag ginpakaslan niya ang iya una nga asawa. (Mat. 19:4-6; 1 Tim. 3:2) Pagka-Marso nagresayn sia bilang pangulo sang minuro, kag pagka-Abril sia kag ang iya asawa nga si Esther, nangin di-bawtismado nga manugbantala. Maathag gid nga naakig ang mga demonyo sa ila desisyon nga alagaron si Jehova, amo nga gintublag sang mga demonyo si Esther. Apang, ginbatuan niya sila, subong sang laygay sang Santiago 4:7. Ano ang resulta? “Hilway na kami karon sang akon bana,” siling niya.

PAGTINGUHA NGA MAPANAKSIHAN ANG MAY TUHAY SING LENGUAHE

Nagadugok ang madamo nga imigrante nga nagapamulong sing dumuluong nga lenguahe sa pila ka pungsod, kag madamo  sa ila ang naghalin sa mga pungsod nga ginadumilian ang pagbantala. Subong resulta, “isa ka daku nga ganhaan nga nagadul-ong sa hilikuton ang nabuksan,” kag madamo nga utod ang nagasulod sa sina nga ganhaan paagi sa pagtuon sing tuhay nga lenguahe. (1 Cor. 16:9) Dugang pa, madamo sing tumandok sa pila ka pungsod, nga ang ila lenguahe wala ginapamulong sang kalabanan nga mga tawo sa sina nga pungsod. Ginatun-an man ini sang mga manugbantala sang Ginharian kag nakatigayon sila sing bugana nga mga pagpakamaayo.

Agod mapauswag ang hilikuton sa sini nga mga teritoryo, nag-organisar ang pila ka sanga sing mga klase sa pagtuon sing mga lenguahe. Gindesinyo agod mapadasig ang pagtuon, ang mga leksion masami nga nagasentro sa matuodtuod nga mga nagakatabo sa ministeryo. “Ginabuligan ka sang kurso agod mahugod mo sing bug-os ang imo kaugalingon sa lenguahe,” siling ni Elisa, nga nagatuon sing Albaniano.

Belgium

Ginreport sang sanga nga kapin sa 300 ka manugbantala ang nagatambong sa 17 ka klase sa napulo ka lenguahe, ang estudyante nagaedad sing 9 tubtob 71 anyos. “Natun-an ko ang Turko nga lenguahe kag nagtubo ang akon gugma sa mga tawo,” siling ni Enora. Nagtuon sing Inintsik si Annelies, kag gin-interbyu sia sang isa ka reporter nga nagatrabaho sa isa ka estasyunan sang telebisyon nga nagapalayag sa bug-os nga pungsod. Luyag sang reporter nga ipagua ang isa ka sugilanon tuhoy sa isa ka tawo nga may ginahimo nga bag-o sa iya kabuhi. Siempre pa, ginpaathag ni Annelies kon ngaa nagatuon sia sing Inintsik. Sang nagbalik ang reporter pagligad sang isa ka tuig, ginpaathag ni Annelies ang maayong mga resulta sa iya ministeryo. Maathag gid nga nagdayaw ang reporter, kay ang programa ginpalayag sa tion nga madamo ang nagatan-aw sa sini nga estasyunan sang telebisyon, kag naglakip ini sing interbyu kay Annelies kag isa ka danyag sang iya pagpanaksi sa Inintsik nga lenguahe sa pulunduhan sang bus.

Netherlands

“Luwas nga makatigayon sing mga manugbantala sa dumuluong sing lenguahe nga latagon, nagabulig man ang kurso sa lenguahe sa mga utod agod makadumala sa mga kongregasyon,” sulat sang sanga. Sa Netherlands, daku gid ang  kinahanglanon sa bag-o pa lang nga Romaniano nga latagon. Nagahiwat sing panalagsa nga mga miting ang sanga sa sini nga lenguahe, apang isa lamang ka utod nga lalaki ang makasarang sa pagdumala, kag mapigaw ang iya panglawas. Karon, sa bulig sang kurso sa lenguahe, nadugangan na ang kalipikado nga mga utod nga lalaki nga makasarang sa pagdumala. Ginadumalahan sang isa ka utod nga lalaki ang semanal nga pagtinuon sa libro, ang isa naman nagadumala sing Pagtinuon sa Ang Lalantawan, kag ang ikatlo amo ang nagabadbad kon ginahatag ang mga pamulongpulong sa Olandes.

Espanya

Sugod sang 2003 ginsakdag sang sanga ang 48 ka klase sa napulo ka lenguahe, kag nagresulta ini sang hinali nga pagdamo sing mga pagtuon sa Biblia sing halos 50,000. Ang mag-asawa nga espesyal payunir nga sanday Juan kag Mari Paz ginpadayon sang isa ka pamilya nga Romaniano sa ila balay. Sang ulihi 16 ka tawo ang nagtipon agod mamati, lakip ang 19-anyos nga si Mario, nga namati gid sing maayo. Bisan pa indi sia makahambal sing Espanyol kag ang mga payunir indi man makahambal sing Romaniano, ginbaton niya ang Ginapatuman nga brosyur sa iya lenguahe. Pagkadason nga semana, nangabay si Mario sing isa ka pagtuon sa Biblia kag nagtambong sa adlaw sang pinasahi nga asambleya, bisan pa diutay lang gid ang iya nahangpan. Pagligad sang pila ka semana, nagtambong na sia sa tanan nga miting sa kongregasyon kag nagkomento pa sing simple sa Espanyol. Nangin maayo ang iya panagway kag ginpaambit niya ang iya bag-ong nasapwan nga paglaum. Nagadumala sia karon sing pagtuon sa Biblia sa mag-asawa nga Romaniano, nga nagauswag sing maayo.

Sa amo man nga tion, nagtuon sanday Juan kag Mari sing Romaniano nga lenguahe, kag wala magdugay nagadumala na sila sing 30 ka pagtuon sa Biblia sa sina nga lenguahe! Ginadumalahan man ni Juan ang pagtinuon sa libro sa Romaniano nga lenguahe. Pagkatapos sang pagtinuon, napulo ka manugbantala ang nagatambong sa pagtuon sing Romaniano nga lenguahe nga ginadumalahan ni Mario, ang orihinal nga estudyante sa Biblia.

Estados Unidos

Kapin sa 50 milyones ka tawo ang nagahambal sing indi Ingles sa ila puluy-an. Sa mga Saksi ni Jehova, mga 254,000 ka manugbantala ang nagapangalagad sa 3,052 ka kongregasyon  nga Espanyol kag 53 ka grupo. Nagapangalagad man sa 690 ka dumuluong sing lenguahe nga kongregasyon kag mga grupo luwas sa Espanyol ang 26,000 ka manugbantala. Agod mapanghikutan ining malapad kag nanuhaytuhay sing lenguahe nga latagon, gin-isponsoran sang sanga ang kapin sa 450 ka klase sa 29 ka lenguahe. “Sang nagligad nga duha ka tuig, apat ka bag-ong kongregasyon ang natukod sa amon sirkito,” report sang isa ka manugtatap sang sirkito. “Tatlo sa sini direkta nga resulta sang klase sa Pranses nga lenguahe.”

“Natuman gid ang amon ginahandum,” siling sang isa ka utod nga nagtuon sing Espanyol. “Sa sulod sang mga tinuig luyag namon nga mag-asawa nga mangin misyonero, apang may duha kami ka kabataan nga ginapadaku. Hamtong na karon ang amon kabataan, kag nagretiro na ako sa akon sekular nga trabaho. Busa sang nagligad nga tatlo ka bulan, nagsaylo kami nga mag-asawa sa isa ka Espanyol nga kongregasyon, kag ginahatagan na kami sing bahin sa Teokratikong Eskwelahan Para sa Ministeryo. Madamo man kami sing mga pagduaw liwat kag ayhan lima ka pagtuon sa Biblia. Sa edad nga 67 kag 64 anyos, natun-an namon nga indi pa tigulang ang isa para sa pagtuon sing dumuluong nga lenguahe.”

Kon medyo indi mapatubason sang bag-ong disipulo ang inyo teritoryo kag kon tugot sa inyo kahimtangan, ngaa indi mapinangamuyuon nga binagbinagon ang pagtuon sing tuhay nga lenguahe nga may tulumuron sa pagsaylo sa dumuluong ukon sa isa ka tumandok sing lenguahe nga teritoryo? Ini nga pagsaylo mahimo nga mangin mabungahon, kag mahimo nga mangin mas makawiwili ang inyo ministeryo.

Alemanya

Ginsugdan ang mga kurso sa lenguahe sa sini nga pungsod sang nagligad nga kapin sa 30 ka tuig, kag kapin sa 1,000 ka estudyante ang nahanas sa siam ka lenguahe, gikan sa Albaniano tubtob Vietnamese. “Mas maayo gid ini sangsa  kurso nga akon ginkuha sa unibersidad,” siling sang isa ka utod nga babayi. Bangod ginatun-an man sang mga estudyante kon ano ang pagpati sang mga tawo gikan sa iban nga pungsod, mas mahapos nila malab-ot ang tagipusuon sang ila ginapanaksihan.

Ang 82 anyos nga si Paula nagtuon sing Vietnamese nga lenguahe kag nagabiyahe sing mga 150 kilometros sa pagtambong sa mga miting. “Wala ako sing abilidad kon tuhoy sa lenguahe,” siling niya, “apang nagapasalamat gid ako kay Jehova sa paghatag sa akon sing daku nga kalipay.” Gintun-an ni Paula ang isa ka Vietnamese nga pamilya. Ang bana amo ang una nga nagpakita sing interes sa kamatuoran, kag nagsunod ang iya asawa. Bawtismado na sila karon nga duha.

Sugod sang ila bawtismo, natuman sang mag-asawa kag sang ila bata nga babayi ang ila handum nga mag-alagad kay Jehova sa ila kaugalingon nga pungsod. Nagpatindog sila sing balay nga may bastante nga espasyo para hiwatan sang mga miting sa kongregasyon, kag ang bana isa ka gulang kag auxiliary payunir. Regular payunir ang iya asawa. Nadugangan pa gid ang kalipay ni Paula sang nakabaton sia sing sulat gikan sa sini nga pamilya nga nagasiling nga ginbawtismuhan sang amay ang iya bata nga babayi. Sa sulat kay Paula, nagsiling ang bata: “Palangga Ko nga ‘Lola.’ Nahidlaw gid ako sa imo. Ginapamensar ko gid ikaw pirme. Ikaw gihapon ang akon Lola Paula. Palangga ko ikaw.” Makalilipay gid ini nga eksperiensia para sa aton pinalangga nga utod, nga nagtuon sang mabudlay nga lenguahe sa iya katigulangon!

Canada

Sugod sang 2002 may kabug-usan nga 554 ka estudyante ang nagtambong sa 31 ka klase sang lenguahe sa napulo ka siudad. Ang isa ka gulang kag lupog nga si Paul nagtuon sing Mandarin. Ang iya part-time nga nars nga si Linda isa ka Intsik. Bangod ginpakamalaut sang iya relihion ang mga Saksi, indi sia luyag mamati sa mensahe sang Ginharian. Isa ka adlaw ginpangabay ni Paul si Linda nga dal-on sia sa Kingdom Hall agod nga makapamati sing pamulongpulong publiko sa Mandarin. Napilitan sia apang wala sia nakig-istorya kag wala nagpakita sing interes. Wala magdugay pagkatapos sini, gindala niya si Paul sa pagtinuon sa libro. Sa sini nga tion, si Linda nga isa ka nagasolo  nga ginikanan namati sing maayo bangod ang pagtuon nagahinun-anon tuhoy sa kabuhi sang pamilya. Pagkatapos sini, gintanyagan sang isa ka payunir nga utod nga babayi sing pagtuon sa Biblia si Linda kag ginbaton niya ini. Madasig sia nga nag-uswag sa espirituwal kag karon isa na sia sa aton mga utod.

Madamo sing tumandok nga mga tawo sa Canada nga nagapamulong sang ila kaugalingon nga lenguahe. Mga pila ka tuig sang una, napanaksihan sang payunir nga utod nga babayi nga si Carma ang isa ka Blackfoot Indian. “Sang ginpanaksihan ko sia sa Ingles nga lenguahe, wala sia namati,” siling ni Carma, nga nagapuyo sa reserve para sa mga Blackfoot upod sa iya mga ginikanan. “Nagsiling sia nga sakop ako sang relihion sang mga puti kag nga ang Biblia libro sang mga puti nga tawo. Nagpamensar ako, ‘Kon nakahibalo lang tani ako sang lenguahe kag kultura sang mga Blackfoot, mahimo nga pamatian gid niya ako.’” Nagdesisyon si Carma nga tun-an ini nga lenguahe kag sang ulihi ginbuligan niya ang 23 ka manugbantala nga nagatambong sa klase sa pagtuon sing lenguahe sang mga Blackfoot.

Ginpanaksihan sang isa sa mga estudyante ang isa ka mag-asawa nga Blackfoot nga nagduaw sa ila nagamasakit nga bata nga lalaki sa ospital. Nagdayaw gid sila nga nangin interesado ang utod nga babayi sa ila lenguahe, amo nga ginhatag sang mag-asawa ang ila adres.  Nahibaluan ni Carma nga ang bana amo ang tawo nga iya ginpanaksihan sang nagligad nga tuig! Gani gin-updan niya ang utod sa pagduaw liwat. “Wala lamang sila namati kundi nagpati man sa ginasiling sang Biblia,” saysay ni Carma. “Gintanyagan sila sang utod sing Biblia kag sing isa ka bulig sa pagtuon. Nagatululagay ang iya luha, ginhakos sang babayi ang publikasyon, kag nagtangotango nga nagaugyon ang iya bana. Nagatuon na karon ang babayi, kag nagapamati ang iya bana.”

Sa pagpatuhoy sa kadalag-an sang klase sa pagtuon sing lenguahe, nagreport ang sanga nga 34 ka Blackfoot ang nagtambong sang 2006 nga Memoryal nga ginhiwat sa ila lenguahe!

Italya

Mga 7,200 ka manugbantala ang nagtambong sa mga klase para sa 18 ka lenguahe. Nasugilanon sang isa sa mga estudyante si Samson, nga naghalin sa isa ka pungsod nga ginadumilian ang hilikuton sa Ginharian. Naglakbay si Samson sa iya ginatawag nga paglakbay para sa paglaum sa edad nga 24 anyos, una nagtabok sia sa desyerto kag nian naglayag pa Italya. Nasugilanon niya didto ang isa ka utod nga lalaki nga nagtuon sang iya lenguahe. Interesado gid sa pagpamati si Samson kag nagtambong pa gani sia sa Cristianong miting. Pagligad sang napulo ka bulan nga wala na makakitaay, nagkitaay sila liwat, kag gintun-an sa Biblia sang utod si Samson. Ginhiwat ang pagtuon sa mga fast-food, sa mga subway station, kag sa mga palarkingan.  Pagkatapos nga nakatambong sa Memoryal, ginbag-o ni Samson ang iya pagkabuhi, kag ginbulagan pa gani niya ang babayi nga iya ginapuyopuyo na sing mga isa ka tuig. Isa na sia karon sa aton mga utod.

Nicaragua

Sang 2006, sa una nga tion, napanaksihan sing maayo sang mga utod ang tumandok nga mga Mayangnan. Ang relihion sang kalabanan nga Mayangnas amo ang Moravian, nga isa ka grupo sang mga Protestante, kag ang liderlider sa tagsa ka banwa kinaandan na nga amo ang pastor. Wala ginsunod sang isa sa sini nga mga pastor ang ila tradisyon kag gintugutan sanday Hamilton kag Abner—mga espesyal payunir—nga magpabilin sa banwa. Ginpangitaan pa gani niya sila sing dalayunan kag ginhatagan sila sing kompleto nga Biblia sa Mayangna nga lenguahe. Gintun-an sang mga utod ang lenguahe kag sang ulihi nakatigayon sing pila ka pagtuon sa Biblia. Sa katunayan, ang mga payunir amo ang mga manugbadbad sang nagtambong ang 13 ka tawo sa miting sa una nga pagduaw sang manugtatap sang sirkito, kag 90 ang nagtambong sang Memoryal. Sa tion sang Memoryal, ginbadbad sang mga utod ang duha ka ambahanon sa Mayangna, kag ang tanan nag-amba nga may kapagsik.

Bangod sining talalupangdon gid nga interes, nagpasugot ang sanga nga magpabilin ang mga payunir sa ila asaynment. Apang tugutan ayhan sila sang lokal nga mga opisyal? Sa tion sang miting sa banwa, gin-akusar sang iban ang mga Saksi ni Jehova nga mga anticristo. Apang, may isa ka tawo nga konsehal sang banwa ang nakatuon sa mga Saksi. “Sugod sang nag-abot sa aton banwa ining duha ka pamatan-on,” siling niya, “wala ako sing nakita nga nagaluto kag nagapanglaba para sa ila. Sila amo ang  nagprekurar sang tanan para sa ila kaugalingon. Nakatuon pa gani sila sang aton lenguahe! Dugang pa, gintudluan nila kita sang mga butang gikan sa Biblia nga wala naton anay nahibaluan. Kon ining mga tawo indi gikan sa Dios, pat-od gid nga nangampo na sila karon.” Gintugutan ang mga utod nga magpabilin.

MGA BADBAD PARA SA MGA APA

Estados Unidos

Sang 2006, ginpagua ang The Good News According to Matthew sa American Sign Language sa porma sang mga DVD. Sa una nga tion, mahimo na mabasa sang apa nga mga manugbantala ang bug-os nga kapitulo sang New World Translation sa ila kaugalingon nga lenguahe. “Amo ini ang pinakamaayo nga sulat nga akon nabaton gikan kay Jehova,” siling sang isa ka apa nga gulang. Nagsiling pa ang isa, “Makita ko na karon kon paano ang tagsa ka bersikulo nagahisanto sa iya konteksto.” Ang isa ka utod nga nagpahamtang sing tulumuron nga kobrehan ang isa ka kapitulo sa isa ka adlaw nagsulat: “Antes ko mamulalungan, halos ulihi na ako sa akon kaladtuan bangod nakobrehan ko ang apat ukon lima ka kapitulo kag wala ko natan-aw ang oras!”

Brazil

Dalayawon gid ang pag-uswag sang hilikuton sa sign-language nga teritoryo.  Sa karon may 232 ka kongregasyon nga sign-language, kag ginahuman ini sang napulo ka sirkito kag isa ka distrito. Kapin sa 1,000 ka gulang kag ministeryal nga alagad kag 146 ka espesyal payunir, nga ang 8 sa sini mga apa, ang nagapanghikot sa sign-language nga mga kongregasyon kag latagon. Sa mga gulang kag mga ministeryal nga alagad, kapin sa 100 ang nag-uswag sa espirituwal bangod sang maayo nga mga publikasyon nga ginaaman sang organisasyon ni Jehova para sa mga apa. Ini nga mga bulig sa pagtuon nagalakip sang Ang Ihibalo nga Nagadul-ong sa Kabuhi nga Walay Katapusan, Ano Gid ang Ginatudlo Sang Biblia?, Magpadayon sa Pagbantay!, Ano ang Ginapatuman Sang Dios sa Aton?, kag Ang Lalantawan. Sugod sang 2006, ginpahisuno ang Teokratikong Eskwelahan Para sa Ministeryo sa sign language, nga nagagamit sing mga publikasyon nga matigayon sa sina nga lenguahe.

“Nakatambong na ako sa mga serbisyo sa nanuhaytuhay nga simbahan,” siling sang 30-anyos nga manunudlo, “nahibaluan ko karon nga ang mga Saksi ni Jehova lamang ang makasarang sa pagtudlo sa Biblia sa mga apa.” Nagsiling sia nga ang pagtudlo sang iya relihion indi makatarunganon kag indi epektibo. Bisan pa ginaipit sia sang iya mga abyan, determinado gid sia nga magpadayon sa pagtambong sa Cristianong mga miting. Kabay pa nga padayunon ni Jehova ang pagbuyok sa mga bunayag sing tagipusuon sa iya Anak!—Juan 6:44; Bug. 14:6.

MGA KASO SA KORTE

Eritrea

Bangod wala nagbotar ang aton mga utod sa pungsudnon nga plebisito, ginkanselar sang dekrito sang presidente sang 1994 ang pagkabanwahanon sang mga Saksi ni Jehova. Namigado gid ang mga utod bangod sini, kag ginatos ang naghalin sa pungsod kag nagdangop sa iban nga duog. Ang iban nagpabilin, lakip sa pila ka estudyante nga kabataan. Sa ikasiam nga grado, ang tanan nga estudyante—lalaki kag babayi—ginarehistro para sa paghanas sa militar. Busa, madamo nga pamatan-on ang nagauntat sa pag-eskwela pagkatapos sang ikawalo nga grado.

Delikado gid ang pagtambong sa mga miting sa kongregasyon kag pagpakigbahin sa pagbantala; ginpang-aresto ang  bug-os nga mga kongregasyon! Apang, ang aton maisog nga mga kauturan nagpadayon sa ‘pagtuman sa Dios subong manuggahom sa baylo sang mga tawo.’ (Binu. 5:29) Sa karon, 31 ka utod ang napriso, lakip ang isa ka 73-anyos nga utod nga lalaki nga banwahanon sang Netherlands. Ang iban ginpriso bangod indi sila magsoldado. Ang tatlo ka utod nga ginpriso sugod pa sang 1994 amo sanday Paulos Eyassu, Isaac Mogos, kag Negede Teklemariam.

Pransia

Sang Pebrero 25, 2005, ginsumiter ang isa ka kaso sa European Court of Human Rights (ECHR) tuhoy sa di-makatarunganon nga pagsukot sing buhis sa Asosasyon Sang mga Saksi ni Jehova. Kapin sa 874,000 ka tawo ang nagpirma sa isa ka pungsudnon nga petisyon batok sa sining inhustisya, kag ang dokumento ginsumiter sa Korte. Bisan pa sini, sang Enero 2006 nagmando ang mga opisyal sa buhis sa mga utod nga bayaran ang balanse nga balayran sa buhis.

Gilayon nga ginkontak sang mga Saksi ni Jehova ang ECHR agod pahibaluon sila sa sini nga mga hitabo. Gilayon nga ginsugdan sang Korte ang pagpangusisa sa sini nga kaso. Sang Mayo 4, 2006, ginpangabay sang Korte ang gobierno sang Pransia nga isulat kag isumiter sa ila ang ila kaso. Ang tulumuron sini amo ang paghibalo kon bala nalapas ang relihioso nga kahilwayan sang mga Saksi ni Jehova kag kon bala may nadalahig nga diskriminasyon.

Alemanya

Sang Pebrero 10, 2006, namatbat ang Federal Administrative Court sa Leipzig nga dapat kilalahon sang Estado sang Berlin ang Relihioso nga Asosasyon Sang mga Saksi ni Jehova sa Alemanya subong isa ka publiko nga korporasyon. Diri natapos ang 15 ka tuig nga pagbista. May kinamatarong na karon nga malibre sa buhis ang Relihioso nga Asosasyon kag sa iban pa nga mga pribilehiyo nga natigayon sang dalagku nga mga relihion. Sang Hulyo 5, 2006, ang Estado sang Berlin nagpagua sang opisyal sini nga pagkilala kag nagpresentar sang sertipikasyon sa duha ka katapo sang Komite sang Sanga.

Gresya

Sa sulod sang mga tinuig, nagakaatrasar ukon wala ginahatag ang mga permiso sa pagtukod kag pag-okupar sang mga  Kingdom Hall bangod ginapatuman sang kasuguan nga aprobahan ini anay sang isa ka obispo sang Griegong Ortodokso. Sang Mayo 30, 2006, nagmando ang parlamento nga ang Ministry of National Education and Religions lamang ang magatatap sang mga permiso nga nagadalahig sa di-Ortodokso nga mga relihion.

Sang Hulyo 15, 2005, ginkanselar sang nagadumala sang isa ka stadyum sang gobierno sa Loutraki, Corinth, ang pag-arkila sang mga utod sa mga pasilidad para sa isa ka distrito nga kombension. Ginduhaduhaan sang nagadumala kon bala isa ka “ginakilala nga relihion” ang mga Saksi ni Jehova. Nagpasilabot ang ombudsman, kag sang Pebrero 2006, ang mga opisyal sang stadyum nagsaad nga aprobahan ang bag-o nga mga aplikasyon bangod ginakilala na nga relihion ang mga Saksi ni Jehova.

Nepal

Nakaparehistro sing madinalag-on ang mga Saksi ni Jehova subong isa ka relihioso nga organisasyon sang Oktubre 2005. Ang isa sa mga katuyuan nga ginsulat sa karta sang organisasyon amo ang “pagpasanyog sang espirituwal nga edukasyon.” Ini nga pagrehistro nagabulig gid sa pagpalapnag sang maayong balita sa sining dominado sang mga Hindu nga pungsod.

Romania

Bisan pa narehistro ang mga Saksi ni Jehova subong isa ka relihion sang 1990, wala sila nalista sa listahan sang Estado tuhoy sa opisyal nga ginakilala nga mga relihion nga ginpagua sang 1997. Subong resulta, wala gintugutan ang mga utod nga makapatindog sing mga Kingdom Hall, kag wala sila ginhatagan sing eksempsion gikan sa pag-alagad sa militar—mga kinamatarong nga ginahatag sa ginakilala nga mga relihion. Nagmando ang Romanian Supreme Court sa gobierno nga kilalahon ang mga Saksi ni Jehova subong relihion, apang padayon nga nagapamatok ang gobierno sa mando. Sang Marso 2006, sa bulig sang ECHR, ginhikutar sang gobierno ang isa ka mainabyanon nga pagpakighusay upod sa mga Saksi ni Jehova, nga amo ang nagtapos sang siam ka tuig nga kasaba sa husgado. Ginbaton sang gobierno nga ang aton organisasyon dapat nga makatigayon sang “tanan nga kinamatarong kag mga hilikuton nga ginahatag sang kasuguan” sa ginakilala nga mga relihion.

 Turkey

Sang nagsumiter ang sanga para sa rehistrasyon subong relihion, nagsabat ang gobierno nga imposible sila nga marehistro, bisan pa nga gin-amiendahan na ang kasuguan agod mapasibu sa mga pagsulundan sang European Union. Yara pa karon ang kaso sa mga korte sang ila pungsod, apang sa ulihi ipalab-ot ini sa ECHR.

Ang isa pa ka problema amo ang pag-alagad sa militar. Ginapatawag ang mga utod sing tatlo ukon apat ka beses kada tuig tubtob maglampas sila sa ginakinahanglan nga edad sa pagsoldado. Kada patawag sa ila, ginasentensiahan sila. Pirme ginapamulta ang pila sa ila, kag ginapriso ang iban. Sang 2004, ginpasaka ni Yunus Erçep ang kaso sa ECHR. Bisan pa ginpamulta sia sing madamong beses, ginpriso si Utod Erçep sang Oktubre 2005 kag ginhilway pagligad sing 5 ka bulan sa iya 12 ka bulan nga sentensia. Sa adlaw sang iya kahilwayan, ginpatawag liwat sia sa korte kag ginpamulta kay nagdumili sia nga magsoldado sang nagligad.

Uzbekistan

Sa nakaligad nga apat ka tuig, may kapin sa 1,100 ka dokumentado nga kaso sang aton mga utod nga gin-aresto, ginpriso, ginpamulta, ukon ginkulata. Kapin sa 800 sa sini nga insidente ang natabo sa tion sang Memoryal sang 2005 kag sang 2006. Sa madamong duog, nag-abot ang mga de-batuta nga mga pulis sakay sa mga bus kag gin-aresto ang tanan nga nagtambong. Madamo ang ginpamulta; ang pila ginkastigo.

Bisan pa sa sini, nakapanaksi sing maayo ang mga utod. Binagbinaga ang kaso sang isa ka utod nga lalaki kag isa ka utod nga babayi nga ginkasuhan sing kriminal bangod nagtambong sang miting sa kongregasyon kag nagpanaksi. Ginpangabay sang ila abogado nga usisaon sa sulod sang korte ang mga literatura nga ila ginkompiskar sa tion sang pag-aresto. Ginbasa sing matunog ang Ihibalo nga libro kag ang Ginapatuman nga brosyur, nagbulig man sa pagbasa ang huwes. Bangod interesado gid sia sa kapitulo 5 sang Ihibalo nga libro, “Kay Sin-o Pagsimba ang Ginabaton Sang Dios?” nagmando ang huwes nga indi pag-untatan ang pagbasa sini sa tion sang pahuway sa udto.

Sang ginkutlo ang Mateo 28:19, 20, nagtuaw ang huwes, “Amo gali nga nagabantala kamo!” Sang namangkot sia kon  ngaa ginhingabot sang rehimen nga Nazi ni Hitler ang mga Saksi ni Jehova, ginhatagan sia sing tatlo ka kopya nga videocassette: Purple Triangles, Jehovah’s Witnesses Stand Firm Against Nazi Assault, kag The Bible—Accurate History, Reliable Prophecy. Bisan pa ginpamulta ang aton mga utod, nakapanaksi sila sa mga opisyal sang korte kag sa mga pulis sa paagi nga wala nila ginhunahuna.—Luc. 21:12, 13.

Sudan

Sang Hunyo 2006, narehistro subong relihion ang mga Saksi ni Jehova sa walo ka estado. Nagpatindog sing mga Kingdom Hall ang mga utod sa sini nga mga duog kag dayag nga nagahiwat sing dalagku nga mga pagtililipon. Hilway na nga ginaimportar ang aton mga literatura, kag may talatapan na ang aton mga utod sa Khartoum.

Rusya

Sang Abril 12, 2006, ang isa ka kongregasyon nga may 200 ka katapo sa Moscow nagahiwat gid sang Memoryal sa ila ginaarkilahan nga pasilidad sang nagsampot ang 50 ka armado nga pulis. Ginpauntat sang hepe sang Lyublino Police Department ang miting, nga nagasiling nga ginlakip sa pagdumili sa mga Saksi ni Jehova sa Moscow ang paghiwat sini nga mga pagtilipon. Gin-usisa sang mga pulis ang ila mga papeles, ginkompiskar ang mga literatura, kag gindala ang 14 ka utod nga lalaki  sa estasyunan sang pulis sa Lyublino kag ginpriso sila sing kapin sa apat ka oras. Sang nagkadto ang isa ka utod sa estasyunan sang pulis sa paghatag sing legal nga bulig, gintiklod kag natumba sia kag gintayaan sia sang kutsilyo. Ginhambalan sia nga indi magpasaka sing reklamo. Apang, sang Abril 17, ang 4 sa 14 ka utod nagpasaka sing reklamo batok sa Lyublino Police Department.

Nagsugod ang kasaba sang Mayo 16 sa Lyublino District Court sa Moscow kag ang nag-uyat sini amo si Hukom Z. V. Zubkova. Wala sing presente sa mga pulis nga nagpakigbahin sa pagpanalakay—ang ila lamang abogado. Wala pulupaathag, ginsikway sang huwes ang 50 ka pagpamatok sang mga abogado sang mga utod kag wala ginpamatian ang kalabanan nila nga mga panugda. Sa pihak nga bahin, ginpamatian sang huwes ang panugda sang abogado sang mga pulis nga magkuha sing kopya sa desisyon sang Golovinsky Intermunicipal District Court nga nagadumili sa mga Saksi ni Jehova sa Moscow kag sang opinyon sang sikologo nga si L. V. Kulikov, nga nagatestigo batok sa mga Saksi ni Jehova sa umpisa sina nga kasaba.

Sang Hunyo 15, 2006, namatbat ang huwes nga indi suno sa kasuguan ang pagpriso sa mga nagpasaka sing kaso apang wala namatbat batok sa pagtublag sang Memoryal. Nalakip man sa pamatbat ang alegasyon nga ang gin-arkilahan nga awditoryum wala nakapasar sa mga kinahanglanon para sa relihiosong serbisyo. Nag-apelar ang mga Saksi ni Jehova sa Moscow City Court sang Hunyo 30, 2006, nga ginsambit ang madamo nga paglapas tuhoy sa mga paagi sa pagkasaba sang Lyublino District Court. Ginhiwat ang Memoryal nga wala sing tublag sa 22 ka lokasyon sa Moscow.

Ginsambit sa nagabukas nga parapo sining Talalupangdon nga mga Hitabo ang handum sang salmista: “Magaamba ako sa akon Dios samtang buhi ako.” (Sal. 146:2) Karon, makita sa minilyon ka mga alagad ni Jehova ang madamong pamatuod nga subong man sini ang ila hanuot nga handum. Huo, samtang nagapadayon pa ang presente nga sistema sang mga butang, kabay nga indi naton pagtugutan ang mga prisuhan, mga dekrito sang gobierno, ukon balagbag bangod sang mga lenguahe sa pagpauntat sa aton sa pag-amba sa aton langitnon nga Amay!

[Kahon/Retrato sa pahina 9]

Indi Lamang Isa ka Imbitasyon

Naimprinta sa handbill ang isa ka kupon agod makapangabay ang mga tawo sing pagtuon sa Biblia, isa ka kopya sang Ginatudlo Sang Biblia nga libro ukon pagtuon sa Biblia kag libro. Ang nasulatan nga mga kupon magaabot sa indi madugay sa mga sanga talatapan sa bug-os nga kalibutan. Ang sanga sa Estados Unidos nagreport nga nakabaton sila sing mga 2,000 ka kupon, lakip ang 300 ka pangabay sang pagtuon sing Biblia. Sing maathag, ang mapisan nga pagpanghikot sang aton mga utod sa pagpanagtag sang handbill padayon nga nangin mabungahon.

[Kahon/Retrato sa pahina 13]

Madamo Gid ang Nagaorder Sang Ginatudlo Sang Biblia nga Libro!

Sang katapusan sang Hulyo 2006, kapin sa 47 milyones ka kopya sang Ginatudlo Sang Biblia nga libro ang naimprinta sa 155 ka lenguahe, luwas sa 10 ka Braille nga edisyon. Sa isa lang ka bulan, 42 000 ka libro ang promedyo nga ginaorder sang mga kongregasyon sa Estados Unidos kada adlaw. Ang un-tersia sa sini ginadalian. Ginakabig sang pamilya Bethel sa bug-os nga kalibutan nga isa ka pribilehiyo ang pagpangabudlay sing lakas sa paghanda sini nga mga literatura para sa aton mga kauturan.

 [Kahon/Retrato sa pahina 29]

Dedikasyon Sang mga Sanga

Albania

Natapos ang 50-ka tuig nga pagdumili sa aton hilikuton sang 1992. Lakip ang apat ka tigulang nga Saksi, nga nag-alagad sa Dios sa mga tuig sang pagdumili, sa 325 ka utod nga nagtambong sa dedikasyon sang bag-o nga sanga, nga nahamtang sa dulunan sang Tiranë. Nagtambong man ang mga delegado gikan sa 32 ka pungsod. Sang nag-abot ang mga misyonero sang 1992, siam lamang ang manugbantala sa pungsod. Karon may 3,617 na. Ang mga katapo sang Nagadumala nga Hubon nga sanday Theodore Jaracz kag Gerrit Lösch amo ang may bahin sa programa, nga ginhiwat sang Hunyo 3, 2006. Pagkaaga, namulongpulong sila sa isa ka wala sing atop nga stadyum nga may tumalambong nga 5,153, kag namati gid bisan pa mabunok ang ulan.

Croatia

Doble ang pagpakamaayo sa Croatia sang nagligad nga tuig: ang pagpagua sang kompleto nga New World Translation of the Holy Scriptures sa Croatiano nga lenguahe sa distrito nga kombension kag ang dedikasyon sang bag-o lang nahuman nga ekstension sang sanga sa Zagreb. Sang Biernes, Agosto 11, namati ang 142 ka tumalambong sa pamulongpulong sa dedikasyon ni Utod Jaracz. Ginhiwat ang una nga dedikasyon sang nagligad nga pito ka tuig, sang 1999.

Slovenia

Sang Sabado, Agosto 12, ginhatag ni Utod Jaracz ang pamulongpulong sa dedikasyon sa bag-o nga sanga sa Kamnik, isa ka banwa nga nahamtang sing mga 20 kilometros gikan sa aminhan sang kapital, ang Ljubljana, kag mga 130 kilometros gikan sa katundan sang Zagreb, Croatia. Sang nagligad, nagapuyo ang pamilya Bethel sa nanuhaytuhay nga mga apartment sa kapital, busa nalipay gid sila nga sa katapusan magapuyo sila sing tingob subong pamilya! Ang 144 nga nagtambong naghalin sa 20 ka pungsod.

 [Mga Retrato]

Sanga talatapan sa Albania

Ang pinasahi nga miting gintambungan sang 5,153

Ginpasangkad nga mga pasilidad sang sanga sa Croatia

Talatapan sa Slovenia

[Retrato sa pahina 6]

Pagpanaksi sa isa ka apa nga babayi, Brazil

[Retrato sa pahina 17]

Una nga klase sa Hindi, Alemanya

[Retrato sa pahina 19]

Sanday Linda kag Paul

[Retrato sa pahina 19]

Si Carma nga nagapanaksi sa lenguahe sang mga Blackfoot

[Retrato sa pahina 20]

Klase sa Espanyol nga lenguahe, Roma, Italya

[Retrato sa pahina 20]

Pagpanaksi kay Samson

[Retrato sa pahina 21]

Sanday Hamilton kag Abner nagatudlo sa Biblia sa Mayangna

[Retrato sa pahina 27]

Kingdom Hall sa nabagatnan nga Sudan