Mga Binuhatan Sang mga Saksi ni Jehova sa Moderno nga Tion

Rusya

Ang kasaysayan sang mga Saksi ni Jehova sa Rusya isa ka kasaysayan sang pagtuo kag kaisog, isa ka istorya sang indi mationg nga katutom sa Dios walay sapayan sang mapintas kag walay untat nga pagpamatok. Ang pagtapok, pagbilanggo, pilit nga pagpangabudlay—wala makapauntat sa mga Saksi ukon makapaluya sa ila.

Ini nga maragtas indi makahalanusbo. Ang mga nagatuo kay Jehova makapaabot sang paghingabot. Wala sila nagahinulsol sa baylo ginatamod nila ang mga kabudlayan subong kahigayunan nga pamatud-an ang ila pagkamainunungon sa Dios. “Sang ginpamatbatan kami,” siling sang isa ka utod, “wala sing nalisang sa akon mga estudyante sa Biblia. Nalipay gid ako! Sila nga apat ginsentensiahan sing 25 tanan ka tuig sa mga kampo. Mas mabug-at ang ginpamatbat sa akon . . . Sang nakagua kami sa hulot, nagpundo kami agod pasalamatan si Jehova sa pagsakdag sa amon. Natingala ang mga guardia kon ngaa nalipay kami.”

Basaha ang tuhoy sa isa ka bata nga babayi nga nakatuon sang kamatuoran sa mga sulat nga ginhigtan sang bato kag ginapalapaw sa kudal sang prisuhan. Hibalua kon paano nakapabilin nga mabakod sa espirituwal ang mga bilanggo. Tan-awa kon ano ang natabo sang sayop nga ginsumbong ang Saksi nga mga ginikanan nga naglihap kuno sang dulunggan sang ila bata nga babayi.

Ang pagdumili sa sulod sang mga dekada bahin lamang sang istorya. Sa nagligad nga 20 ka tuig, gulpi nga nagdamo ang mga Saksi sa sining tuman kalapad nga duog. Basaha kon paano gin-atubang kag ginlandas sang mga kauturan ang bag-o nga mga hangkat bangod sang tumalagsahon gid nga pag-uswag. Nalipay kami nga ang maragtas nga isaysay sa sining Tuigan nga Libro isa lang ka pungsod—ang Rusya.