Pagbantala kag Pagpanudlo sa Bug-os nga Duta

APRIKA

PUNGSOD 57

POPULASYON 827,387,930

MANUGBANTALA 1,086,653

PAGTUON SA BIBLIA 2,027,124

Côte d’Ivoire

Ginauhaw sa kamatuoran ang pumuluyo sang Bianouan, isa ka minuro nga nahamtang sa sidlangan sang pungsod. Alas 6:00 pa lang sa aga, ginapukaw na sang pila ang mga manugbantala agod maghinun-anon sa Biblia antes magpauma. Ang iban nagapangabay nga magtuon sa Biblia pagkatapos sang mga miting sa kongregasyon kon gab-i. Isa ka adlaw, nangabay sang libro nga Ano Gid ang Ginatudlo Sang Biblia? ang isa ka babayi nga indi makahibalo magbasa sa isa ka utod nga lalaki. Nagsiling sia nga ang iya bana amo ang mabasa para sa iya. Ginhatagan sia sang utod sang libro kag ginduaw sia sang masunod nga adlaw. Ginahulat gid ang utod sang mag-asawa. Wala nagpauma ang bana kay ginbasa nila sa bug-os nga gab-i ang libro. Sang nag-abot ang utod, luyag sang bana nga hambalan nila ang iya nabasa. Nasugdan ang pagtuon sang Biblia sa mag-asawa.

Benin

Nagtuon sa Biblia ang isa ka daku nga pamilya nga nagapuyo sa nabaw-ing nga duog. Ang amay isa ka pastor. Duha lang ka semana pagligad sang una nga pagtuon, ginbaton sang bug-os nga pamilya ang pangagda nga magtambong sa distrito nga kombension. Sang Sabado sang gab-i, gulpi lang nagmasakit ang subang nga babayi kag napatay. Walay sapayan sini, nagtambong ang amay sa bug-os nga sesyon sang Domingo. Pagka-Lunes, nagsiling sia tuhoy sa kamatayon: “Kahimuan ini ni Satanas agod pauntaton kami, apang indi kami mag-untat sang akon pamilya.” Ginpagua niya ang tanan niya nga kagamitan sa simbahan: sutana, kalo, paha, inughaplas nga lana, kag baston. Amo man sini ang ginhimo sang iya asawa, nga isa man ka  opisyal sa simbahan. “Indi na kami makig-angot sa sini nga simbahan,” siling sang pastor. Nian, subong sang aton mabasa sa Binuhatan 19:19, dayag niya nga ginsunog ini tanan. Maayo gid ang pag-uswag sini nga pamilya.

Madagascar

Sang nagligad nga tuig sa isa ka minuro nga may mga 500 ka pumuluyo, nakakuha ang isa ka ministro sing libro nga Ginatudlo Sang Biblia gikan sa isa ka Saksi sa iban nga minuro. Sang nabasa niya ini sing maayo, kumbinsido gid sia nga nasapwan niya ang kamatuoran, kag ginpaambit niya ang iya nabasa sa mga katapo sang ila simbahan. Sang ulihi, sila sang iya pamilya kag iban pa nga 20 ka tawo nagbiya sa simbahan kag naghiwat sing mga miting, subong sang ginahimo sang mga Saksi ni Jehova. Ginkadtuan sila sang mga espesyal payunir kag ginbuligan. Gindumalahan nila sing pagtuon sa Biblia ang madamo nga interesado kag ginhimos nga mahiwat sing regular ang Pagtinuon sang Kongregasyon sa Libro kag ang Pagtinuon sa Ang Lalantawan. Sang Oktubre, lima ang nangin di-bawtismado nga manugbantala, kag karon naghimo sing kahimusan ang mga payunir nga hiwaton ang Pamulongpulong Publiko kag ang Teokratikong Eskwelahan Para sa Ministeryo. Kuarenta  ang promedyo sang nagatambong, kag kapin sa 20 ka pagtuon sa Biblia ang ginahiwat.

Bagatnan nga Aprika

Si Hennie kag ang iya asawa nagabantala sa mga balay. Samtang nagapangalubaybay sila sa kudal sang balay, isa ka mabaris nga ido ang nagsuok sang iya ulo sa igutlan sang kudal kag ginkagat ang kamot ni Hennie. Nagdinugo ini, gani nagpauli sila dayon, kag gintinluan ini sang iya asawa kag ginbendahian. Ginkontak niya ang doktor nga mapabulong sia dugaydugay. Ginsilingan niya ang iya asawa nga indi niya luyag nga pauntaton sia sang ido sa pagbantala, gani nagbalik sila sa teritoryo pagligad sing isa ka oras. Nagsugod sila sa ingod sang balay nga may mabaris nga ido. Pagkatapos nga naduaw nila ang pila ka balay, ginpasulod sila sang isa ka tawo. Namati sia sing maayo kag luyag gid niya nga duawon sia liwat. Nasugdan ang pagtuon sa Biblia, kag sang ulihi, regular na sia nga nagatambong sa mga miting. Sang nagbiya sia sa Dutch Reformed Church, ginkadtuan sia sang isa ka opisyal sang simbahan kag gintanyagan sia nga mangin deakono. Apang nagpabilin sia sa iya desisyon kag nagbiya sa simbahan. Nag-uswag gid sia kag nagpalista sa Teokratikong Eskwelahan Para sa Ministeryo.

Tanzania

Sa isa ka kampanya nga pagbantala sa nabaw-ing nga mga teritoryo sang Oktubre 2005, siam ka utod nga katapo sang Kongregasyon sang Iringa ang nagkadto sa Pawaga, nga mga 75 kilometros ang kalayuon. Nasugid sa ila nga may manugbantala sa sini nga duog, kag ginpangita nila sia. Pagkatapos sang madamo nga pinamangkutanay, nasapwan nila ang utod, nga nagpaathag sa ila nga nagapuyo na sia didto sing kapin sa 20 ka tuig, kag abi niya ginadumilian gihapon ang hilikuton sang Ginharian sa Tanzania. Nagapanaksi gihapon sia sa sulod sang mga tinuig, kag nagsiling sia nga may pila ka interesado gid sa mensahe sang Biblia. Ang mga kauturan sa Kongregasyon sang Iringa nagboluntaryo nga magtener sa Pawaga sing mga duha ka semana sa tion sang ila pagduaw agod atipanon ang mga interesado. Sang 2006, duha ka regular payunir ang nagsaylo didto agod atipanon ining mabungahon nga teritoryo. Nabuligan ang utod sa espirituwal, kag siam na ang manugbantala  sa sining diutay nga grupo. Ginahiwat nila karon ang ila mga miting sa idalom sang kahoy, apang ginaplano nga magpatindog sing diutay nga tilipunan nga human sa lokal nga mga materyales.

Rwanda

Nangin bantog ang isa ka dalagita nga si Gentille bangod sang iya abilidad nga makapuntos sa hampang nga soccer. Ginatawag sia sang mga tawo nga Manayibitego, nga nagakahulugan didto sa Kinyarwanda nga lenguahe nga “Dios Sang mga Puntos.” Natalupangdan sang pila ka Italyano ang iya abilidad kag ginhanas pa gid sia. Nian gin-agda sia nga mag-entra sa soccer sa Italya. Makagalanyat gid ang pagsaylo sa Europa kag ang kahigayunan nga mangin bantog sa bug-os nga kalibutan subong manughampang sang soccer. Apang nahibaluan ni Gentille nga kon batunon niya ang tanyag biyaan niya ang iya pamilya. Saksi ang iya iloy, kag bisan nakatuon na sang Biblia si Gentille, wala niya ginaaplikar ang iya natun-an. Gin-una niya ang soccer. Ginpakighambal ini ni Gentille sa iya iloy kag narealisar niya nga mabutang sa katalagman ang iya espirituwalidad. Wala niya ginbaton ang tanyag kag gin-una niya ang pag-alagad sa Dios. Ginbawtismuhan sia sa asambleya sining karon lang.

 AMERIKA

PUNGSOD 55

POPULASYON 893,357,181

MANUGBANTALA 3,367,544

PAGTUON SA BIBLIA 3,236,692

Curaçao

Isa ka adlaw, sang nagkadto ang isa ka utod sa iya ginatun-an sa Biblia, gindaho sa iya sang iya ginatun-an ang isa ka bala kag ginpamangkot ang utod kon nahibaluan niya kon para sa ano ini. Ginpaathag dayon sang tawo nga antes sang una nga pagduaw sang utod nagabuko sia nga maghikog sa sulod sang pila ka bulan bangod nadulaan sia sing trabaho kag pamilya. Bangod sang handum nga magtimalos, namat-od sia nga patyon ang apat ka tawo nga amo kuno ang rason sang iya mga problema. Ginbalahan niya sing apat ang iya rebolber kag nagtigana sing isa pa agod itapos sang iya kabuhi. Apang, antes sia maglakat namat-od sia nga mangayo sing bulig sa Dios. Ginpaandar niya ang telebisyon, kag nagpangita sing estasyunan tuhoy sa relihion. Sadto man nga tion, duha ka Saksi ang nanuktok sa iya ganhaan kag sang ulihi gintun-an sia sa Biblia. Ginhaboy niya ang apat ka bala, apang nalimtan niya ang ikalima. Sang nasapwan niya ini sa iya bulsa, ginpakita niya ini sa utod, kag ginsugiran niya ang utod sang natabo, kag nagkomento sia kon paano nagbag-o ang iya kabuhi sang magtuon sia sing Biblia. Nagsiling sia nga utang karon sang lima ka tawo ang ila kabuhi sa mga Saksi ni Jehova. Nagatambong na sia karon sa mga miting sa kongregasyon.

Uruguay

Duha ka Saksi ang ginpadayon sang isa ka babayi, nga samtang nagahibi, nagpaathag nga nangamuyo sia sa Dios sa bug-os nga gab-i nga ipakita Niya sa iya ang Iya kabubut-on. Bag-o lang sia ginduaw sang ila pastor apang nagkuha  lamang ini sing diesmos sa dakudaku nga kuarta nga iya nabaton. Nasubuan gid sia kay wala sia nila ginaduaw sadto, bisan pa nga nagapangayo sia sing bulig sa iya mga kasisit-an. Sa sulod sang isa ka bulan, wala na sia magsimba. Sang ulihi, ginsilingan niya ang isa sa mga pastor nga nagapati sia nga ginlimbungan sia bangod sang mga pagsumpakilay sang ila mga panudlo. Apang sa baylo nga ipaathag ang mga butang, ginsilingan sia sang pastor nga makabaton sia sing pito ka pagpakamalaut kay wala na sia nagasimba. Ginpaathag sa iya sang mga utod nga ginagamit sang matuod nga Dios ang iya mga anghel agod masapwan ang mga nagapangita sang kamatuoran. Madamo sia sing pamangkot, kag ginsugdan gilayon ang pagtuon sa libro nga Ano Gid ang Ginatudlo Sang Biblia? Nagbuylog sang ulihi ang iya bana sa pagtuon, kag nagtambong sila sa Memoryal kag sa pinasahi nga pamulongpulong. Nagdayaw gid sila sa kalidad sang pagpanudlo sa Kingdom Hall kag daw indi sila makapati nga wala sing nagapangayo sing kuarta. Nagauswag sila kag madamo na sila sing abyan sa kongregasyon.

Chile

Mahimo nga ginahiwat sa karon ang pagtuon sa Biblia sa pinakapunta nga bahin sang kalibutan sa bagatnan sa isa ka babayi didto sa naligwin nga duog sang Cape Horn. Asawa sia sang manugbantay sang parola sa sini nga duog. Sang ang babayi yara sa Punta Arenas, gindumalahan sia sang pagtuon sing Biblia sang isa ka auxiliary payunir sa sulod sang apat ka semana antes sia magsaylo sa Cape Horn. Sugod sadto, napadayon ang pagtuon paagi sa telepono. Nagauswag sia karon.

Costa Rica

Sa sini nga pungsod, may 10,000 ka Guaymi Indian, nga ang  kalabanan sa ila nagapuyo sa Sixaola, isa ka diutay nga banwa malapit sa dulunan sang Panama. Madamo sining tumandok ang nagpakita sing matuod nga interes sa pagtuon sa Biblia. Agod maatipan sila sa espirituwal, isa ka lamharon nga mag-asawa nga espesyal payunir ang gin-asayn sa sini nga teritoryo. Ginsugdan nila ang pagtuon sang lenguahe. Upod sa bulig sang 26 ka kauturan nga Guaymi, madamo sila sang nahimo. Sa una nga kahigayunan, ginhiwat ang Memoryal sa Guaymi nga lenguahe, kag may nagtambong nga 264. Sugod sadto, padayon ini nga nagauswag. Halimbawa, sa isa ka Pagtinuon sang Kongregasyon sa Libro nga may 13 ka manugbantala, mga 20 ka tawo ang promedyo nga nagatambong sang primero. Apang naglab-ot na ini karon sa 40. Subong resulta, duha ka Pagtinuon sang Kongregasyon sa Libro ang naorganisar.

Panama

Ang isa ka manunudlo sa pisikal nga edukasyon nga si Ramiro gintun-an sa Biblia sang mga Saksi ni Jehova sang 2004. Sa sina nga tion, ang anom ka klase nga gin-asayn sa iya agod tudluan nagakinahanglan lamang sing 12 ka oras kada semana, amo nga may bakante pa sia nga 12 ka oras. Sa amo, ginsilingan sia sang direktor sang eskwelahan nga dapat ang bakante niya nga oras itudlo niya sang relihion sa sadtong anom mismo ka klase. “Hambali lang sila tuhoy sa Dios, kay Jesus, kag sa Biblia,” siling sang direktor. Gintudlo ni Ramiro ang iya natun-an. Sina nga tuig, gingamit niya sa pagtudlo sa 150 ka estudyante nga yara sa ikan-um tubtob ikawalo nga grado ang libro nga Ang Ihibalo nga Nagadul-ong sa Kabuhi nga Walay Katapusan. Sang masunod nga  tuig, sang ginpagua ang libro nga Ano Gid ang Ginatudlo Sang Biblia?, nangin kalipikado si Ramiro subong di-bawtismado nga manugbantala. Ginpadayon niya ang pagtudlo sa mga estudyante, kag sa sini nga tion, sa Ginatudlo Sang Biblia nga libro. Nangin 160 ang estudyante, nga natunga sa anom ka klase. Ang resulta? Ginadumalahan na karon sing mga pagtuon sing Biblia sa puluy-an ni Ramiro kag sang iban pa nga manugbantala sa kongregasyon ang pila ka estudyante. Nagpasalamat ang pila ka ginikanan sang mga estudyante kay Ramiro bangod sang maayo nga mga pagbag-o nga ila nakita sa ila kabataan. Ang pila ka ginikanan nagtambong sa mga miting sang kongregasyon kag sa pila ka asambleya. Kon tuhoy kay Ramiro, ginbawtismuhan sia sang Nobiembre 2006 kag nalipay sia nga padayunon ang pagkalit sang tanan nga kahigayunan agod matudlo ang kamatuoran sa Biblia.

Guatemala

Sa Guatemala City, nagkadto ang manugbantala nga si Jeremy sa balay sang pamatan-on nga lalaki nga iya ginatun-an sing Biblia. Ang balay yara sa isa ka masipot nga kalye. Nanuktok si Jeremy sa puertahan, kag ginbuksan sia sang babayi nga utod sang pamatan-on kag nagsiling nga wala ang iya manghod. Samtang yara si Jeremy sa puertahan, ginpalapitan sia sang duha ka pamatan-on nga lalaki. Ang isa naggabot sing pistola, kag gintaya ini sa ulo ni Jeremy kag nagsiling, “Ginkontrata ako sa pagpatay sa imo.” (Nahibaluan sang ulihi ni Jeremy nga ginahambal ini sang mga kawatan agod kulbaan ang ila mga biktima.) Nagsaysay si Jeremy: “Ginsira sang  babayi ang puertahan, kag ginpamangkot ko ang mga pamatan-on, ‘Ano ang inyo tuyo?’ Ang isa sa ila namangkot, ‘Ngaa ari ka diri?’ Ginsilingan ko sila nga nagabantala ako sang Pulong ni Jehova. Nagapamurugso sia nga nagsiling, ‘Isugid sa akon ina nga mensahe!’ Ginkulbaan ako kag nagsalasala kon ano ang himuon ko. Ginbuksan ko ang akon bag kag ginkuha ang Biblia. Sa sini nga tion, ang tawo nga may pusil naghibi bangod naghimo sia sing isa ka butang nga nahibaluan niya nga sayop. Nakitluoy sia sa akon nga buligan sia. Ginbuksan niya ang akon bag kag nagkuha sing isa ka Magmata! nga nagabinagbinag tuhoy sa kuarta. Nian ginkapkapan sang iya upod ang akon mga bulsa, nga nagapangita sang akon kahita, apang ang isa nga may pusil nagsiling sa iya: ‘Indi na sia paghilabti. Tama na ina.’ Nian ginpasalamatan niya ako, ginhakos kag naghalin. Pagkatapos sini, nahaw-asan ako, kag nagpasalamat kay Jehova sa pagluwas sa akon sa sini nga kahimtangan.”

Dominican Republic

Nagtambong ang isa ka utod nga babayi nga dentista sa isa ka adlaw nga seminar tuhoy sa pagkay-o sang guba nga mga ngipon. Ginhatagan sing kahigayunan ang kapin sa 250 ka dentista nga nagtambong nga mag-aplay para sa isa ka mahal kag moderno nga paghanas sa Europa. Walo lamang ka dentista ang mahimo nga hanason. Sa sina nga hapon, ginsilingan ang utod nga napilian sia nga hanason kag libre ini para sa iya. Ang nakibot nga utod nagsabat: “Salamat gid kay napilian ninyo ako, apang wala ako nagsulat sing aplikasyon, kag indi ko mabaton ining maalwan nga tanyag. Subong isa ka Saksi ni Jehova, dapat ko gid unahon ang espirituwal nga mga kaayuhan sang akon pamilya. Kon batunon ko ang paghanas, dapat gid nga magtuon ako sing maayo, apang may lima kami ka miting sa Biblia kada semana nga nagakinahanglan sang akon bug-os nga atension. Mangin malipayon ayhan ako sa akon moderno nga paghanas kag tinapusan kon sa pagbalik ko masapwan ko ang akon duha ka tin-edyer nga bata nga nagadroga ukon mga ritubado na bangod wala ako?”

 ASIA KAG NATUNG-AN NGA SIDLANGAN

PUNGSOD 47

POPULASYON 3,993,686,009

MANUGBANTALA 607,112

PAGTUON SA BIBLIA 496,577

Israel

Natalupangdan sang isa ka pamatan-on nga auxiliary payunir nga si Ella ang isa ka tigulang nga babayi nga nagabakintol sang isa ka sako nga basura. Ginbuligan sia ni Ella kag ginpanaksihan sing makadali. Bisan pa ginhatag sang babayi ang iya adres kay Ella, indi niya sia makontak walay sapayan nga madamong beses na sia nga nagabalikbalik sa ila balay. Sang ulihi ginbuksan gid man sang babayi ang puertahan. Bangod bungolbungulon, indi niya mabatian ang pagpanuktok ni Ella sang nagligad sini nga mga pagduaw. Nasugdan ang pagtuon sa Biblia sa iya. Sang primero indi sia magpati nga may Dios, apang sang ulihi nagtubo ang iya apresasyon sa Dios kag sa iya Pulong. Pagligad sing duha ka tuig, gindedikar niya ang iya kabuhi kay Jehova kag nabawtismuhan sining karon lang sa edad nga 92.

Mongolia

Si Terbish, isa ka tigulang nga babayi, nagatrabaho sa isa ka balaligyaan sang mga libro sa halos bug-os niya nga kabuhi. Sang ang 18-anyos nga si Munkhzaya, isa ka payunir nga utod nga babayi, nakigsugilanon sa iya, ginsilingan sia ni Terbish nga bangod nakabasa na sia sing tuman kadamo nga libro, mahapos lang niya ini mahangpan bisan pa kon basahon niya ini sa umpisa, sa tungatunga, ukon sa hingapusan. Apang, tuhay gid kuno ang Biblia. Bisan pa madamo na sia sing nabasa, indi niya ini mahangpan. Wala man nakabulig ang iya pagsimba. Busa, nagtuon sia sing kinaugalingon, nga nagasulat sing mga nota sa tagsa ka teksto. Luyag gid mahangpan ni Terbish ang Hebreo 11:6. Ginpaathag ni Munkhzaya ang teksto, gintanyagan  sia sing pagtuon sa Biblia, kag gin-agda niya si Terbish sa Kingdom Hall. Sang ginsugid sa iya ang nahamtangan sang tilipunan, nagsiling si Terbish: “Amo bala atong bilding nga may matahom nga mga bulak sa gua? Kada agi ko didto, nagadulog ako kay natahuman gid ako sa mga bulak. Mahimo mo bala ako mapakilala sa tawo nga nagaatipan sa mga bulak?” Malipayon nga ginpakilala sia ni Munkhzaya. Malangkagon nga nagatuon karon si Terbish tuhoy sa Manunuga kag nagatambong sa mga miting. Nagsiling si Munkhzaya, “Madugay na nga ginabantalaan sang mga bulak ini nga babayi antes ko sia mabantalaan.”

Japan

Bangod sa pagpalanakit sang iya mga tiil, ang 78-anyos nga si Hiroko indi na makapanaksi kaangay sang iya ginahimo sang una. Sang nangamuyo sia sa Dios sing panuytoy, nasapwan niya ang isa ka masako nga dululugan sang bus sa diin makalingkod sia sing 30 minutos sa kada tion. Ginayuhuman niya ang mga tawo kag nagapakita sia sing interes sa ila. May ospital malapit sa sini, busa kon makita niya ang mga tawo nga may dala nga bulong, ginapamangkot niya sila kon kamusta na sila. Kon ginabasa sang mga tawo ang iskedyul sang bus, ginabuligan niya sila, kag ginapaathag niya sa mga pangayaw ang matahom nga mga duog. Nagapamati gid sia kon nagahambal sila kag nian ginatanyagan sila sing mga magasin. Pirme niya makita ang pila sa ila; busa may pagbalik duaw pa sia.

Myanmar

Isa ka ismagler sang droga si Lazaru. Ang iya kabuhi nadalahig sa droga, pagpatay, kag tanan nga sahi sang bisyo. Apang sang ginpakita sang isa ka payunir nga babayi sa iya gikan sa Biblia nga ang ngalan sang Dios amo si Jehova, nahantop niya gilayon nga amo ini ang kamatuoran kag nagpasugot nga  matuon sa Biblia. Madugay ang ila pagtuon, apang tayuyon ang iya pag-uswag sa espirituwal. Ang nabudlayan gid niya amo ang bug-os nga pagbiya sa iya pagkabuhi sang una. Sang ginsugiran niya ang iya mga kaupdanan nga mahalin sia sa ila grupo, nagsalangisag sila bangod madamo sia sing nahibaluan tuhoy sa ila mga hilikuton. Bisan madamo nga manuglikidar ang ginsugo sa pagpatay sa iya, nakaluwas si Lazaru gikan sa ila. Sang ulihi, nagsaylo sia sa iban nga duog, kag nabawtismuhan sia kag ang iya asawa.

Taiwan

Nagdulog sing makadali ang pila ka manugbantala sa isa ka kapehan nga may di-kinaandan nga ngalan nga sa Iningles, The Book of Ezra Coffee Shop. Bangod sini, namangkot ang isa sang manugbantala sa tag-iya tuhoy sa ngalan nga Esdras. Nagsabat ang tag-iya nga nagadayaw gid sia sa kakugi ni Esdras sa matuod nga pagsimba. Sa sulod sang madamo nga tuig, palasimba gid ining tag-iya, apang nag-untat sia sining karon lang bangod ang iya asawa nga isa ka Vietnamese indi makahangop sang sermon. Ginsilingan sang manugbantala ang tag-iya nga mabalik sia kag madala sing Vietnamese nga Biblia, nga ginkalipay gid nila nga matigayon sina nga hapon. Nasugdan ang pagtuon sa bug-os nga pamilya.

India

Sa isa ka banwa nga may mabaskog gid nga pagpamatok sa pagpanaksi, ginpriso ang lima ka utod nga babayi sing apat ka adlaw bangod sang ila pagbantala. Sang primero, indi maayo ang pagtamod sang guardia sa ila kag ginpaandaman sila nga indi magbantala sing Cristianismo sa prisuhan. Apang, pagligad sang mga adlaw, naobserbahan niya ang ila kabuot kag mahigugmaon nga panimuot kag nagbaylo ang iya pagtamod sa mga utod. Ginahatagan sang mga utod ang mga priso kag ang guardia sing mga prutas kag iban pa nga pagkaon nga ginadul-ong sang mga utod sa ila. Isa ka gab-i, nabatian sang guardia ang mga utod nga nagabinagbinag sang mga punto gikan sa Mangin Suod kay Jehova nga libro. Sang ulihi, nagbuylog sia sa ila mga paghinun-anon, nga nagalingkod sa atubangan sang ila selda. Sa adlaw nga ginhilway ang mga utod, napatay ang isa ka paryente sang guardia. Ginlugpayan sia sang mga utod tuhoy sa paglaum nga pagkabanhaw.

 Antes sini, ginpamangkot man sila sang isa pa ka guardia kon ano ang ila sala. Ginpaathag sang isa ka utod nga ang ila pagbantala nasal-an nga isa ka ilegal nga pagpangumbertir. Nagdayaw sang iya nabatian, nagsabat ang guardia: “Amo na sina ang kahimtangan ninyo, pero kalmado ka lang gihapon sa pagsabat. Kutos ako nga babayi, kag nahuya gid ako sa inyo. Palihug, pahanumduma ako kon medyo nagapanginit na ako, kag tudlui ako nga maghambal pareho sa inyo. Indi ko mahangpan kon ngaa ginapriso ang mabuot nga mga tawo.” Kon may bakante sia nga tion, nagakadto sia sa mga utod, nga nagasiling: “Abi, sugiri pa gid ninyo ako tuhoy sa Biblia. Nagapakalma gid ini sa akon.” Nagdayaw man sa mensahe sang Biblia ang duha ka priso nga lunsay may kaso nga pagpatay. Mahalungon nga ginapanaksihan sila sang mga kauturan kag ang iban pa nga priso. Karon nga hilway na sila, nagapangita sing nagakaigo nga pamaagi ang mga utod agod maatipan ang interes nga ila nasapwan sa prisuhan.

Indonesia

Ang isa ka espesyal payunir nga si Resmawati bag-o lang nakatapos sa pagbantala kag manugpauli na sang gin-agda sia sang isa ka babayi nga magsulod sa ila balay agod maghinun-anon sa Biblia. Pagligad sang tatlo ka adlaw, ginbalikan sia ni Resmawati. Sa sini nga tion naghibi ang babayi kag nanugid nga abusador ang iya bana. Ginbasa ni Resmawati ang Hebreo 4:12  kag ginpaathag nga ang pagtuon sing Biblia mahimo nga makabag-o sang batasan. Ginsaysay niya ang eksperiensia ni Tony nga makita sa 2003 Calendar of Jehovah’s Witnesses. Interesado sa sini ang babayi kag nangabay sing kopya sina nga kalendaryo. Sa masunod niya nga pagduaw, gindal-an sia ni Resmawati sing kalendaryo. Nagtuon sila sa Ginatudlo Sang Biblia nga libro. Sa masunod niya nga pagduaw, namangkot ang bana kon puede sia makabuylog sa pagtuon. Nabasa niya ang eksperiensia ni Tony sa kalendaryo kag natandog gid sia sa sini. Natabuan nga Tony man ang ngalan sang bana, kag ang batasan kag paggawi sang Tony nga yara sa kalendaryo antes makatuon sing kamatuoran pareho gid sa iya. Sang nabasa niya ang eksperiensia sa kalendaryo, ginhambalan niya ang iya asawa kag kabataan: “Ngalan ko ini a, indi bala? Paano nahibaluan sang manugbantala ang akon ngalan kag nagsulat tuhoy sa akon?” Nagsiling ang iya asawa: “Wala makakilala ang mga Saksi sa imo. Kag bisan makilala ka nila, indi ka nila gilayon mabutang sa 2003 nga kalendaryo kag labi na gid sa 2007!” Bangod natalupangdan niya ang interes sang iya bana, mataktikanhon sia nga namangkot, “Luyag mo bala mangin kaangay sang Tony nga yara sa kalendaryo?” Ang makapakibot nga sabat sang bana amo, “Tilawan ko.” Kaangay sang Tony sa kalendaryo, ang Tony sa Indonesia nagbag-o, nagpagunting sang iya malaba nga buhok kag nangin disente sa iya pamustura. Nagapadayon sa pagtuon sa Biblia ang bug-os nga pamilya.

Malaysia

Sa pila ka bahin sang Borneo, ang mga utod nagagamit sing mga laragway sa satelayt sa Internet sa pagpangita sing mga puluy-an. Nagreport sila: “Nakabulig ini sa amon nga masapwan ang mga puluy-an nga yara sa madabong nga mga kagulangan. Ang pila ka ‘mga alibungan’ toril sang mga kanding, busa nagalahog kami nga mabantala kami sa ‘mga kanding.’ Apang ang pila sini, alibungan gid man sang balay sang mga tawo. Wala pa gid namon nabantalaan ining mabukid nga teritoryo. Bangod madabong gid ang kagulangan kag ang mga banas mabudlay sundon, ang mga laragway sa satelayt nagabulig sa amon nga masapwan ang mga banas.”

 EUROPA

PUNGSOD 47

POPULASYON 732,610,687

MANUGBANTALA 1,533,790

PAGTUON SA BIBLIA 749,911

Hungary

Nagreport ang isa ka 12-anyos nga utod nga babayi: “Siam ka bulan na ako nga bawtismado, kag nagaauxiliary payunir karon sa sulod sang tatlo ka bulan. Daku gid ang nabulig sa akon sang akon iloy. Madamo ang nagapamangkot kon paano ako makaauxiliary payunir kay nagaeskwela man ako. Apang sa banta ko, kon wala ako nagaeskwela, mangin mas mabudlay pa sa akon nga mag-auxiliary payunir. Nagapanaksi ako kon wala ako sing klase. Regular ko nga ginasugilanon tuhoy sa Biblia ang lima ko ka kabutho. Duha ang ginadumalahan ko sing pagtuon sa Biblia. Busa, mabatyagan ko ang pagpakamaayo ni Jehova. Indi gid kabug-atan ang pagpayunir kundi tuburan ini sang kalipay para sa akon. Regular payunir si Nanay, kag luyag ko man nga mangin regular payunir. Luyag ko alagaron sing bug-os si Jehova.”

Britanya

Nagsugod sa pagtuon sa Biblia si Susan sang 2001 kag nagpadayon ini sing mga duha ka tuig. Sa sini nga tion, nabudlayan gid sia mag-untat sa pagpanigarilyo. Madamong beses niya ini nga gintinguhaan apang napaslawan sia. Bangod sini, gin-untat niya ang iya pagtuon apang nagapadayon gihapon sa pagtambong sa mga miting sa kongregasyon. Pagligad sang apat ka tuig, nagbatyag si Susan nga dapat niya tinguhaan nga mag-uswag sa espirituwal, busa nangayo sia sing bulig sa kongregasyon. Ginpadayon niya ang pagtuon sa Biblia kag nabuligan gid sia sang impormasyon sa Mangin Suod kay Jehova nga libro. Ang detalyado nga pagbinagbinag sini tuhoy sa gugma ni Jehova sa aton kag kon paano naton mapakita ang aton gugma sa Iya may daku  gid nga epekto sa iya kabuhi. Sa sulod sang walo ka semana, nauntat niya ang iya pagpanigarilyo. Nagapati si Susan nga ang pagtuon sa sini nga publikasyon nagbulig sa iya nga magsalig kay Jehova. Nag-uswag sia sing maayo, nagdedikar sang iya kabuhi kay Jehova kag nagsimbulo sini sa bawtismo sa “Sunda si Cristo!” Distrito nga Kombension.

Estonia

Ang 17-anyos nga estudyante nga si Helgi nagapuyo sing pain gikan sa iya nagdiborsio nga mga ginikanan. Nagpakita sia sing interes sa kamatuoran kag nagtuon sa Biblia. Sang primero, wala sia nagatambong sa mga miting bangod masako sia sa pag-amba sa isa ka banda. Samtang nagauswag ang iya apresasyon sa kamatuoran, naghimo sia sing mga pagbag-o sa iya pagkabuhi. Ginpaathag niya sa iya mga kaupod sa banda kon ngaa indi sia makaamba sa mga gab-i nga may miting sa kongregasyon. Nagpalista sia sa Teokratikong Eskwelahan Para sa Ministeryo kag nag-uswag tubtob nga nangin kalipikado subong di-bawtismado nga manugbantala. Nag-entra sia sa isa ka pungsudnon nga kompetisyon para sa pag-amba nga ang magdaug magapirma  sing kontrata sa isa ka bantog nga kompanya sa pagrekord sing mga ambahanon. Madamo ang wala nakapasar sa mga pagtilaw, apang natigayon gilayon ni Helgi ang suporta sang mga hurado kag nakasulod sa masunod nga hugna sang kompetisyon. Apang, ang masunod nga hugna hiwaton sa gab-i nga magahatag sia sang iya una nga bahin sa Teokratikong Eskwelahan Para sa Ministeryo. Ano ang iya ginhimo? Ang iya iloy, nga indi Saksi ni Jehova, nagpanugda nga ikanselar niya ang iya bahin ukon magpaiskedyul na lang sa sunod. Nagsiling si Helgi nga indi lamang ini tuhoy sa paghatag sing bahin kundi isa ini ka desisyon kon ano gid ang iya unahon sa iya kabuhi, espirituwal nga butang ukon sekular nga kadalag-an. Ginbinagbinag niya ini sing serioso kag nagdesisyon nga ihatag ang iya bahin sa baylo nga magkadto sa kompetisyon sang pag-amba. Ginhatag ni Helgi ang iya bahin, kag gintahod sang iya iloy ang iya desisyon.

Sang ulihi, nagtambong ang isa ka reporter sa “Sunda si Cristo!” Distrito nga Kombension agod videohon ang isa ka balita tuhoy sa kombension kag tuhoy sa pagbawtismo. Sang nakita niya si Helgi nga nagapalapit sa duog nga bawtismuhan, gin-video niya ang iya bawtismo kag nian gin-interbyu sia. Ginbalita ini sina nga gab-i, nga nagalakip sang pila ka video ni Helgi samtang nagapasundayag sa una nga hugna sang kompetisyon kag ang pagbawtismo sa iya kag ang iya ginsiling samtang nagayuhum: “Amo ini ang pinakamaayo nga desisyon sa akon kabuhi.”

Bulgaria

Isa ka priso si Ivelin sa prisuhan sa Belene. Nagsulat sia sa sanga sang mga Saksi ni Jehova sa sina nga pungsod, nga nagasiling: “Natabuan nga nakakita ako sing isa ka Lalantawan nga magasin diri sa prisuhan kag madamo ako sing inugpamangkot sa inyo. Nahinulsulan ko na ang akon mga sala, kag luyag ko gid magbag-o. Luyag ko mangabay sa inyo sing isa ka butang nga mahimo mabudlay para sa inyo kag wala man ako nagapaabot nga mahatag ninyo. Mahimo bala ninyo ako sulatan agod nga makatuon ako sing dugang pa tuhoy kay Jehova nga Dios? Wala ako makahibalo kon sabton ninyo ako, apang ang pagkilala lamang kay Jehova nagahatag na sa akon sing kalipay. Luyag ko nga makahibalo pa gid sing dugang tuhoy sa sini, indi lamang ako kundi ang iban man nga priso. Palihug dumduma  ninyo nga kon indi gid man kamo makasulat sa akon, kon makagua na ako diri, makig-angot gid ako sa inyo!” Gilayon nga gintatap sang mga utod ini nga interesado kag sa karon ginatun-an nila ang napulo ka priso lakip si Ivelin.

Portugal

Ang espesyal payunir nga si Jana nagsaysay: “Isa ka adlaw, sang yara ako sa estasyunan sang tren, nakita ko ang isa ka Intsik kag namat-od nga bantalaan sia. Natingala sia nga makahibalo ako mag-Inintsik kag nagsugid sa akon nga manugpakadto sia sa ospital kay isesaryan ang iya asawa. Sila nga mag-asawa indi makahibalo sing Portuges, kag nangabay ang ospital nga mangita sila sing manugbadbad. Wala na sia sing mahimo amo nga nagpabulig sia sa akon. Sang masunod nga adlaw, ginpangabay ako sang doktor nga magsuksok sing bayo nga para sa operasyon agod nga maupdan ko ang iloy sa tion sang operasyon. Samtang ginaoperahan ang iloy, gin-uyatan ko ang iya kamot, kag madamo sia sing pamangkot tuhoy sa Biblia kag sa aton hilikuton. Nabun-ag ang isa ka matahom nga lapsag nga babayi, kag bilang pasalamat sang babayi sa akon nabulig sa ila, ginpangabay niya ako nga ako ang maghatag sing ngalan sa ila bata. Namensar ako sing makadali kag ginpili ang ngalan nga Sara. Nalipay sia sa akon napilian nga ngalan kag nangin interesado gid nga makatuon sing dugang pa tuhoy kay Sara nga ginsambit sa Biblia kag sa Dios nga ginsimba ni Sara. Sang nagua kami sa ospital, gintanyagan ko sila sing regular nga pagtuon sa Biblia. Sang una, ini nga mag-asawa indi luyag makigsugilanon sa mga Saksi ni Jehova, apang ang akon bulig sa tion sang pagbata sang asawa amo ang nagpabag-o sang ila di-maayo nga pagtamod. Ginbaton nila gilayon ang akon tanyag kag nagatambong na sila karon sa mga miting.”

Slovakia

Ang mag-asawa nga espesyal payunir nakapakigsugilanon sa duha ka pamatan-on nga lalaki nga taga-Afghanistan. Sa ila malip-ot nga pagtener sa Slovakia, nagpakita sila sing interes sa Biblia. Pila ka beses sila nga nasugilanon sang mga payunir kag ginhatagan sila sing Biblia kag sing libro nga Ano Gid ang Ginatudlo Sang Biblia? Ginpasundayag man sang mga payunir kon paano dumalahan ang pagtuon sa Biblia agod nga matun-an nila ini sing kinaugalingon kag matun-an man ang iban.

 OCEANIA

PUNGSOD 30

POPULASYON 36,829,259

MANUGBANTALA 96,691

PAGTUON SA BIBLIA 51,122

New Zealand

Isa ka udto, sang nagapamalaybalay ang utod nga si Paul, nasugilanon niya ang isa ka babayi. Sang gintanyagan sia ni Paul sing brosyur, nagsiling sia nga sining karon lang, ginhambalan sia sang iya paryente nga kinahanglan niya ang kamatuoran. Sina nga aga, gingamit niya ang ngalan ni Jehova sa iya pangamuyo kag nangabay nga kuntani may magduaw sa iya. “Pagligad sang tatlo ka oras,” siling ni Paul, “nag-abot ako sa ila balay. Dugang pa, nagkadto ako sa tion nga kinaandan nga wala sia sa balay.” Ginbaton niya gilayon ang pagtuon sa Biblia kag nagauswag sing maayo.

Australia

Ang lamharon nga magtiayon nga sanday Armando kag Elvira nagapuyo sa East Timor, nga ginatatap sang sanga sa Australia. Sang 2006, pirme ginaatake sang isa ka etniko nga grupo ang ila lugar, amo nga napilitan sila nga magbakwit agod indi sila mahalitan. Nagdangop sila sa isa ka kampo para sa mga refugee, nga duha lamang ka butang ang dala—ang Biblia ni Armando kag ang isa ka kopya sang Ano ang Ginapatuman Sang Dios sa Aton? nga brosyur. Sang napakig-angutan nila liwat ang mga kauturan, ginpadayon nanday Armando kag Elvira ang ila pagtuon sing duha ka beses kada semana kag nagtambong sa mga miting sa kongregasyon. Ginpanaksihan man ni Armando ang ila mga paryente nga nagapuyo sa isa ka diutay nga minuro nga mga apat ka oras kag tunga ang biyahe gikan sa Dili. Sang nagpakita sing interes sa mensahe sang Ginharian ang iya pamilya, ginhimos niya nga makadtuan sila sang mga payunir gikan sa Baucau, nga mga  isa ka oras kag tunga ang biyahe pakadto sa Dili agod mabuligan pa gid ang iya pamilya. Kapin sa 20 ka tawo ang nagtipon agod mamati sa mga payunir. Ang humalambal sang grupo nga amo ang amay ni Armando, nagsiling nga handa sila nga ihaboy ang ila mga santos apang nagpamangkot kon bala mapangapinan pa gihapon sila gikan sa malaut nga mga espiritu. Ginpasalig sila sang mga payunir nga buligan gid sila ni Jehova. Ginpanghaboy sang grupo ang ila mga santos. Sa karon, kapin sa 25 ka tawo sa sina nga minuro ang nagatuon sa Biblia. Handum ni Armando nga mabawtismuhan sa indi madugay, kag maayo man ang pag-uswag ni Elvira.

Guam

Sa Saipan, nga ginadumalahan sang sanga sa Guam, nakibot gid ang isa ka utod sang natukiban niya nga ang iya bana, nga isa anay ka manugpamatok, likom nga nagabasa sang aton mga publikasyon nga ginabilin niya sa ila balay. Luwas sa Lalantawan kag Magmata! nga mga magasin, nabasa man sang bana ang mga Tuigan nga Libro kag Ang Sekreto sa Kalipay sa Pamilya nga libro. Isa ka adlaw ginpatawag niya ang iya asawa kag lima ka bata para kuno sa “importante nga miting sang pamilya.” Indi gid ini kinaandan. Luyag gali niya hatagan sing pila ka panugda tuhoy sa pagminyo ang iya tatlo ka bata nga babayi. Naghimo sia sing isa ka poster nga may listahan sang mga kinaiya sang isa ka maayo nga palamanhon. Nagdayaw gid ining di-tumuluo nga amay sa sugilanon ni Sheila Winfield da Conceição sa Nobiembre 1, 2006 nga Ang Lalantawan kag kaangay ni Sheila, naghimo sia sing listahan sang mga kinaiya sang isa ka maayo nga tiayon. Ginlaygayan niya ang iya mga bata nga babayi nga magminyo lamang sa isa sang mga Saksi ni Jehova kag mangita sing palamanhon nga nagahigugma kay Jehova kag mas madamo sing nahibaluan sa Biblia sangsa ila. Ginsilingan niya ang iya tatlo ka bata nga luyag gid niya nga matigayon man nila ang kalipay nga iya nabasa sa artikulo. Natandog gid sila sini kag nagalaum nga sa pila ka adlaw magabuylog sa ila pagsimba kay Jehova ang ila amay.

Samoa

Isa ka mag-asawa nga naggikan sa iban nga sanga ang gin-asayn sining karon lang sa Samoa. Gintanyag sang utod  nga lalaki sa una gid nga balay nga iya ginbantalaan ang Ano Gid ang Ginatudlo Sang Biblia? nga libro. Sa iya kakibot, ginpadayon sia sang babayi. Apang, ang tagbalay nga isa retirado nga negosyante, nagdulog sing makadali kag nagsiling: “May 45 minutos lamang ako nga bakante sa sini nga aga”—isa ka komento nga wala pa gid niya anay nabatian. Gilayon nga nasugdan ang pagtuon. Sang nagbalik ang utod upod sa iya asawa pagkasunod nga semana, ginpadayon sila sang babayi nga nagauyat na sang Biblia kag sang Ginatudlo Sang Biblia nga libro. Daku gid ang posibilidad nga mapadayon ang pagtuon.

Solomon Islands

Si Emily lamang ang Saksi kag regular payunir sa isla sang San Cristobal. Nagadumala sia sing 20 ka pagtuon sa Biblia kag tatlo sa ila di-bawtismado na nga manugbantala, lakip sa iya mga ginikanan. Ang internasyonal nga mga alagad nga sanday Lance kag Diane nagbakasyon kag nagbiyahe sing 14 ka oras nga nagasakay sa isa ka de-karga nga barko agod buligan si Emily sa tion sang Memoryal. Nagreport si Lance: “Sang nag-abot kami, luyag na gid namon magtulog, apang sa banta namon labing maayo kon kadtuan anay namon ang lider sa sini nga minuro. Sang napaathag namon ang amon tuyo sa sini nga duog, nagsiling ang lider: “Madamo ang wala nakabaton sini nga imbitasyon. Mahimo bala sila makatambong?’ Nagyuhum kami kag nagsiling sa iya nga maayo gid kon magtambong sila.

“Sang manug-umpisa na ang Memoryal, isa lamang ka babayi kag pila ka kabataan ang presente. Apang, natalupangdan namon nga madamo ang nagapaningadtingad nga yara sa kakahuyan, busa ginpalapitan namon sila gilayon kag gin-abiabi. Sang nagtunod na ang adlaw, ginpaandar namon ang gamay nga generator agod magsanag. Nagsugod ang pamulongpulong sa Memoryal kag namati gid sing maayo ang tanan.” Mga  130 ang namati, lakip ang isa ka ministro sang Adbentista nga nangabay sang Bag-ong Kalibutan nga Badbad bangod mas mahapos ini mahangpan sangsa ginagamit niya nga Biblia. Sa sining pinasahi nga okasyon, lima ka bag-ong pagtuon sa Biblia ang nasugdan.

Papua New Guinea

May duha ka minuro sa gua sang diutay nga banwa nga impluwensiado gid sang Katoliko, kag mabudlay bantalaan ini nga duog. Sining karon lang, ginkadtuan sang mga utod ang mga representante sang minuro agod ipaathag ang aton hilikuton kag ang rason kon ngaa luyag naton masugilanon ang tanan nga tawo. Natabuan nga bag-o lang natapos ang miting sang minuro kon paano buligan ang mga pamatan-on agod mangin mabuot sila. Ginsilingan sang mga utod ang mga representante sang minuro nga makabulig ang ihibalo sa Biblia.

Ginpasugtan ang aton mga utod nga magbantala sing dayag kag pila ka pamatan-on nga lalaki ang nagtuon. Natalupangdan sang mga tawo sa minuro nga nangin mabuot ini nga mga pamatan-on bangod sang ila pagpakig-upod sa mga Saksi ni Jehova kag busa wala na sila nagpamatok sa aton hilikuton. Sing amat-amat, nagtuon man ang mga abyan kag mga ginikanan sini nga mga pamatan-on, kag lakip sa ila amo ang bata nga babayi sang isa ka katekista nga nagapamahog sang una sa mga kauturan. Ginsilingan niya ang iya bata: “Nagsala gid ako sadto. Kuntani, patawaron ako sang Dios kag sang mga Saksi ni Jehova.” Sa sining duha ka minuro, 27 na ang regular nga nagatambong sa mga miting. Apat ang bawtismado kag auxiliary payunir. Nagaplano sila nga mag-aplay subong regular payunir.

[Mapa/Retrato sa pahina 48]

(Para sa aktual nga pormat, tan-awa ang publikasyon)

[Retrato]

Ang parola sa Cape Horn

[Mapa sa pahina 63]

(Para sa aktual nga pormat, tan-awa ang publikasyon)

San Cristobal

[Retrato sa pahina 44]

Pagdumala sing Pagtinuon sa “Ang Lalantawan” sa minuro sang Antanandava, Madagascar

[Retrato sa pahina 46]

Grupo nga pagtuon sa “Ginatudlo Sang Biblia” nga libro sa Pawaga, Tanzania

[Retrato sa pahina 49]

Ang Pagtinuon sang Kongregasyon sa Libro sa Sixaola, Costa Rica

[Retrato sa pahina 50]

Si Ramiro nga nagauyat sang “Ginatudlo Sang Biblia” nga libro

[Retrato sa pahina 53]

Si Hiroko nga nagabantala sa dululugan sang bus

[Retrato sa pahina 58]

Si Helgi (sa tuo) samtang nagahatag sang iya bahin sa Teokratikong Eskwelahan Para sa Ministeryo

[Retrato sa pahina 64]

Sanday Lance, Diane kag Emily