Sulat Halin sa Nagadumala nga Hubon

Pinalangga nga mga Masigka-Saksi ni Jehova:

Ginkalitan gid ni apostol Pablo ang tagsa ka kahigayunan nga ipabutyag ang iya gugma kag apresasyon sa iya mga masigkatumuluo. Sa mga Cristiano sa Roma, sia nagsulat: “Nagapasalamat ako sa akon Dios paagi kay Jesucristo nahanungod sa inyo tanan, bangod ang inyo pagtuo ginahambalan sa bug-os nga kalibutan.” (Roma 1:8) Huo, sa bug-os nga Emperyo sang Roma, nakilala yadtong unang siglo nga mga Cristiano bangod sang ila mabakod nga pagtuo kag sang ila kakugi sa pagbantala. (1 Tes. 1:8) Indi katingalahan nga palangga gid sila ni Pablo!

Kaangay ni Pablo, ginapasalamatan namon si Jehova sa tagsa ka tion nga mahunahuna namon kamo. Palangga gid namon kamo tanan! Kag makasalig gid kamo sang pagpalangga man sa inyo ni Jehova. Ang iban sa inyo nagaantos sing mabaskog nga paghingabot, apang nagabantala gihapon kamo. Ginapahalipay gid ninyo si Jehova bangod sang inyo kasidla kag kaisog!—Hulu. 27:11.

Samtang mahalungon nga ginabasa kag ginapamalandungan ninyo ang “Mga Binuhatan Sang mga Saksi ni Jehova sa Moderno nga Tion” nga ginlakip sa sining makahalawathawat kag makapabakod sing pagtuo nga edisyon sang Tuigan nga Libro, makita ninyo ang bugana nga pamatuod nga si Ginuong Jesucristo ‘nagapangdaug kag nagatapos sang iya pagpangdaug’ kag nga wala sing hinganiban nga ginhimo batok sa mga sumulunod ni Cristo ang magamadinalag-on.—Bug. 6:2; Isa. 54:17.

 Sa mga Cristiano sa Filipos, si Pablo nagsulat: ‘Nagapasalamat ako sa akon Dios bangod sa gin-amot ninyo sa pagpalapnag sing maayong balita.’ (Fil. 1:3-5) Amo man sini ang ginabatyag namon nga mga katapo sang Nagadumala nga Hubon tuhoy sa inyo. Sang 2007 nga tuig sang pag-alagad, 6,691,790 ka manugbantala ang naghinguyang sing 1,431,761,554 ka oras sa pagbantala sang maayong balita sa 236 ka kadutaan sa bug-os nga kalibutan. Daku gid ang inyo naamot sa pagpalapnag sing maayong balita! Hunahunaa lang ang ginatos ka libo ka kabuhi nga nabuligan bangod sang aton tingob nga panikasog, kag ini tanan nagadala sing kadayawan kay Jehova!

Sa isa pa ka higayon, ginpakita ni Pablo nga may daku sia nga empatiya sa iya mga kauturan. Sia nagsulat sa mga taga-Tesalonica: “Wala untat nga ginadumdom namon . . . ang inyo pagbatas tungod sa inyo paglaum sa aton Ginuong Jesucristo sa atubangan sang aton Dios kag Amay.” (1 Tes. 1:2, 3) Huo, may mga kabudlayan ang kabuhi. Magautwas ang mga problema, apang importante nga magbatas kita. Ano nga mga kabudlayan ang imo mismo ginaatubang? Ginapung-awan ka bala kay may grabe ka nga balatian amo nga limitado na ang imo pag-alagad kay Jehova? Ang imo bala hinigugma nga tiayon nga madugay mo nga kaupod nangin biktima sang walay kaayawan gid nga kaaway, ang Sheol? (Hulu. 30:15, 16) Wala ka pa bala gihapon makakita sing tiayon nga nagahigugma man kay Jehova kay gintuman mo gid ang laygay sa Kasulatan nga magminyo lamang sa Ginuo? (1 Cor. 7:39) Nagatinguha ka bala nga saguron ang imo kabataan walay sapayan sining tuman kabudlay nga mga kahimtangan sa ekonomiya? Ano man ang imo kahimtangan, makapat-od ka nga kon unahon mo gid ang mga intereses sang Ginharian, si Jehova indi malipat sang “inyo binuhatan kag ang gugma nga ginpakita  ninyo para sa iya ngalan.” Palihug, mga kauturan, indi “magpangampo sa paghimo sing maayo”!—Heb. 6:10; Gal. 6:9.

Ano ang makabulig sa imo agod makabatas? Subong sang mga taga-Tesalonica, ini amo ang “paglaum sa aton Ginuong Jesucristo.” Amo kon ngaa nga ginpaanggid sang ulihi ni Pablo ang “paglaum nga kaluwasan” sa isa ka mabakod nga helmet nga makaamlig sa isa ka Cristiano gikan sa negatibo nga panghunahuna kag padayon nga mga pagpangduhaduha.—1 Tes. 5:8.

Matuod, paagi sa pagbatas sing malipayon, masabat mo ang mga pagyaoyao ni Satanas sa daku nga hulusayon sa pagkasoberano sa bug-os nga uniberso. Ginapangangkon ni Satanas nga ang mga alagad sang Dios duna nga makagod kag samtang mahimo nga handa sila nga mag-alagad sa Dios sa pila ka tion, magaluya kuno sila sa ila pagsimba kon magbaskog ang mga pagtilaw ukon kon maglawig pa gid ining sistema sang mga butang nga baliskad sa ila ginapaabot. May pribilehiyo kamo nga pamatud-an nga butigon gid ang Yawa! Kada adlaw nagapalapit pa gid kamo sa katumanan sang inyo paglaum.

Subong nga ginkalitan ni Pablo ang mga kahigayunan nga madayaw ang iya mga kauturan bangod sang ila mabakod nga pagtuo, sang ila bugana nga amot sa pagbantala, kag sang ila pagbatas, nalipay man kami nga kalitan ining kahigayunan nga ipabutyag ang amon komendasyon kag pagpalangga sa inyo. Padayuna ninyo ang pagbuhat sing maayo!

Kabay nga ining nagapakari nga tuig mapuno sang bugana nga pagpakamaayo sa espirituwal. Nagahandum sang inyo kaayuhan

Ang inyo kauturan,

Nagadumala nga Hubon Sang mga Saksi ni Jehova