Talalupangdon nga mga Hitabo Sang Nagligad nga Tuig

ANG mga hitabo sang nagligad nga tuig nagapakita nga madugay na kita sa “katapusan nga mga adlaw,” nga ginalaragway sang Pulong sang Dios subong “makahalanguyos nga mga tion nga mabudlay atubangon.” (2 Tim. 3:1) Apang, samtang nagabudlay pa gid ang katapusan nga mga adlaw, labi nga nagaathag ang mga pagpakamaayo ni Jehova sa iya matutom nga mga alagad sa bug-os nga duta. Nagaatubang man ang mga Saksi ni Jehova sing kinaugali nga mga kalamidad, krimen kag kasingki, balatian, kapung-aw, pagtigulang, pagpamatok, ukon di-pagsapak, nagapadayon sila sa ‘pagdalagan nga may pagbatas sang dalaganon nga ginabutang sa ila atubangan’ bangod sang pagsakdag ni Jehova.—Heb. 12:1.

“MALAPIT NA ANG KALAGLAGAN SANG BUTIG NGA RELIHION!”

Nagbaskog pa gid ang pagbantala sang mga Saksi ni Jehova sang Oktubre kag Nobiembre 2006 sa bug-os nga duta  bangod sang pagpanagtag sang Kingdom News Num. 37, nga “Malapit Na ang Kalaglagan Sang Butig nga Relihion!” Ano ang reaksion sa sining matigdas nga mensahe?

“Sibu gid ang mensahe!” siling sang isa ka lalaki sa Sweden nga nalugaw-an bangod sa pagkasalimpapaw sang butig nga relihion. Kaangay sining tawo, madamo ang nagtuon sa Biblia bangod sining Kingdom News.

Nepal

Sa Kathmandu, ginhatagan ni Dil ang isa ka palasimba nga lalaki sing Kingdom News apang bangod palahubog ining lalaki, duha ka bulan na nga ginlayasan sia sang iya asawa. Sang nagbalik si Dil kag ang iya bana nga si Buddha, agod hinun-anunan ang Kingdom News, nagsiling ang lalaki nga wala niya maluyagan ang paggawi sang pila ka katapo sang ila simbahan kag tuhay gid ang ginasiling sang mga Saksi ni Jehova sa ginasiling sang simbahan. Ginpakita sa iya ni Buddha ang Bugna 18:2-4 kag ginpadaku kon ngaa dapat maggua sa “Babilonia nga Daku.” Sa ikatlo nga pagduaw, gintun-an nila ang Leksion 13 sa Ginapatuman nga brosyur. Sa ikalima nga pagduaw, nasugilanon nila ang iya asawa nga nagpauli na. Nakabati na sia tuhoy sa mga Saksi ni Jehova kag naluyagan niya ang aton mensahe. Sa ikapito nga pagduaw, sila nga mag-asawa magkaupod nga nagtuon sa brosyur. Ang asawa nagsiling: “Wala na nagainom ang akon bana.”

Brazil

Ang isa ka drayber sang traysikol nga nakabaton sing Kingdom News nagpatapik sini sa likod sang iya dyaket agod mapahibalo pa gid ini sa iban. Makita gid ini sang mga pasahero samtang nagabiyahe sila pakadto sa ila kaladtuan.

Nakibot ang duha ka utod nga babayi sa Brazil sang magpalapit sila sa isa ka balay kag nabasa nila ang karatula nga, “Makasulod kamo diri apang indi na kamo makagua nga buhi.” Bangod hinadlukan, ginpamangkot nila ang duha ka utod nga lalaki kon ano ang dapat himuon. Namat-od ang mga utod nga lalaki nga kadtuan ang balay. Pagkatapos makapangamuyo kay Jehova para sa panuytoy, namalakpak ang mga kauturan agod ipahibalo ang ila pag-abot. Malipayon nga ginbaton  sang tagbalay nga pulis ang Kingdom News. Ginpaathag niya nga ginapakay-o niya ang iya balay kag madamo sia sing gamit nga ginbutang sa ugsaran. Gani ginbutang niya ang karatula agod mahadlok ang mga makawat. Sang ginbalikan sia sang mga manugbantala, ginbaton niya ang pagtuon sa Biblia.

Mongolia

Pila ka beses nga gintinguhaan ni Tsetsegmaa nga panaksihan ang iya magulang nga babayi. Bisan pa nga nakatambong na sa pila ka miting kag sa Memoryal ang iya magulang sa nagligad nga duha ka tuig, indi gid sia interesado kag indi niya luyag nga magtuon sa Biblia. Apang sang makita niya sa balay ni Tsetsegmaa ang Kingdom News Num. 37, napukaw ang iya interes. Sa paghinun-anon nila sing duha ka oras, madamo sia sing pamangkot, nga ginsabat ni Tsetsegmaa paagi sa Biblia. Bangod nakibot ang magulang sa iya nabatian, luyag niya makatuon pa kag regular na sia karon nga nagatuon sa Biblia.

Georgia

Gintanyagan sang mga Saksi sing Kingdom News ang isa ka babayi nga namangkot kon may kaangtanan ini sa relihion. Sang nagsabat sing huo ang mga kauturan, ginbaton niya ang Kingdom News kag nagpasalig nga basahon ini. Sang nagbalik ang mga Saksi, namangkot ang babayi kon bala ginlimbungan sia sang Ortodokso nga Simbahan. Nabalaka sia sa kahimtangan sang kalibutan kag sa pagnubo sang moral sang mga pamatan-on. Nagsiling sia nga nabudlayan sia makig-angot sa iya kabataan. Ginpatalupangod sa iya sang mga Saksi ang 2 Timoteo 3:1-5, kag ginbaton niya ang pagtuon sa Ginatudlo Sang Biblia nga libro. Sang manuglakat na ang mga Saksi, sia nagsiling: “Kumbinsido ako nga ang inyo lamang relihion ang matuod. Ginadayaw ko gid ang pagpanapot sang inyo mga pamatan-on kag ang ila pagkabunayag kag mataas nga mga talaksan sa moral.” Nalipay karon ang babayi nga basahon sing regular ang aton mga magasin.

Bangladesh

Nagpanagtag ang 19 anyos nga si Richel sang Kingdom News Num. 37 sa isa ka teritoryo nga wala pa mabantalaan. Bisan pa malayolayo ini sa ila puluy-an, namat-od sia nga  kadtuan ini bangod sang pinasahi nga kampanya. Sa ikaduha nga balay nga iya nabantalaan, nasugilanon niya ang duha ka dalagita nga nagapangangkon nga mga Cristiano nga namatyan sang ila amay duha pa lang ka bulan ang nagligad. “Ngaa gintugutan sang Dios nga matabo ini sa amon?” pamangkot nila. Ginsabat sila ni Richel paagi sa Biblia. Nalipay gid ang mga dalagita nga batunon ang Kingdom News, nga nagasiling, “Ginpadala ka sang Dios sa amon puluy-an.” Bangod nahantop niya ang kagutom sa espirituwal sang mga dalagita, gintanyagan sila ni Richel sing pagtuon sa Biblia, kag ginbaton nila ini dayon. Maukod sila nga mga estudyante kag madamo sing pamangkot. Dapat manalawsaw gid si Richel, apang nalipay sia nga tudluan sing kamatuoran ang mga nagutom sa espirituwal.

Armenia

Gintawgan ni Lilit nga nagatuon anay sa Biblia, si Eliza nga isa ka regular payunir. Sia nagsiling, “Dapat kanselahon  mo gid ang tanan mo nga himuon buas kag magkadto diri sa akon agod mapadayon naton ang aton pagtuon.” Ano ayhan ang natabo? Sang nagtuon anay sa Biblia si Lilit upod sa mga Saksi ni Jehova, ginsilingan sia sang iya bana, “Magpili ka, ako ukon si Jehova.” Gani nag-untat sia sa pagtuon. Duha ka tuig sang ulihi, nakabaton sia sang Kingdom News Num. 37 samtang nagapamasyar upod sa iya kabataan sa isa ka parke. Napukaw liwat ang iya interes amo nga maisugon niya nga ginsilingan ang iya bana: “Mahimo nga kontento ka na magkabuhi sing mga 50 ka tuig kag pagkatapos mapatay, apang indi lang ina ang luyag ko!” Nian ginpasalig niya ang iya bana nga ang pagtuon sa Biblia makabulig sa iya nga madula ang iya di-maayo nga mga kinaiya, amo nga nag-untat sa pagpamatok ang iya bana. Ginatugutan na sia karon sang iya bana nga magtuon, kag ginaatipan sini ang ila kabataan samtang nagatuon sia.

Cambodia

Sang pinasahi nga kampanya, ang misyonero nga si Hugues nagbantala sa isa ka Muslim. Pagkabasa sang tawo sang Kingdom News, nag-ugyon ini nga indi dapat makigbahin ang mga relihion sa mga inaway. Nalugaw-an sia mismo sa iya relihion, kay nangin malain ang reputasyon sini bangod sang mga panatiko. Ginbasa ni Hugues sa tawo ang Salmo 46:9, tuhoy sa ginsaad sang Dios nga kalibutan nga wala na sing inaway. Sang masunod nga semana ginpakita sa iya ni Hugues ang libro nga Ginatudlo Sang Biblia. Ginapabaloran na karon sang tawo ang Biblia kag regular na sia nga nagatuon sa Biblia.

Rusya

“Nahibaluan ko nga yara sa inyo ang kamatuoran,” siling sang isa ka Ortodokso nga pari nga nagbaton sang Kingdom News gikan sa duha ka utod nga babayi, “kag laglagon sang inyo Dios, nga si Jehova, ang tanan nga butig nga relihion kag kamo lang ang luwason.” Ginsugiran dayon niya ang mga utod sang iya nahibaluan tuhoy sa langitnon nga paglaum kag paraiso nga duta. Ginpamangkot sia sang kauturan kon ngaa wala sia maghalin sa iya relihion kay nahibaluan man niya nga laglagon ini. “Ti,” sabat niya, “trabaho ko ini. May tatlo ako ka apartment kag apat ka salakyan. Indi ko ini mabiyaan.”

 PINASAHI NGA KAMPANYA AGOD IPAHIBALO ANG MEMORYAL

Sang Lunes, Abril 2, 2007, ginpadaku sang mga Saksi ni Jehova ang wala tupong nga kaayo kag gugma sang Dios paagi sa pagsaulog sang Panihapon sang Ginuo. Bilang paghanda sa sining importante nga okasyon, ginpanagtag ang isa ka pinasahi nga imbitasyon sa bug-os nga duta sugod sang Marso 17 tubtob Abril 2. Madamo nga mga estudyante sang Biblia kag kabataan ang nagkalit sini nga tinion agod pasangkaron ang ila pagbantala sing maayong balita.

Estados Unidos

Sa sulod sang mga duha ka oras sa gab-i sang Memoryal, ang utod nga nagatrabaho sa ulong talatapan sang mga Saksi ni Jehova sa Brooklyn, New York, nagsabat sang madamo nga tawag sa telepono gikan sa mga tawo nga nagapamangkot kon diin sila mahimo makatambong sang Memoryal. Ang pila ka tawag resulta sang imbitasyon nga magtambong sa Memoryal. Ang isa ka babayi nagsiling: “Bag-o lang ako nakaabot sa balay kag nasapwan ko ang imbitasyon para sa isa ka okasyon subong nga gab-i. Luyag ko magkadto, apang wala ako makahibalo sang oras.”

Ginhatagan sang 16 anyos nga si Jacquelin ang iya maestra sing imbitasyon sa Memoryal kag ginpaathag sa iya kon daw ano ini ka importante nga okasyon. Nakibot sia sang nagtambong ang iya maestra. Bangod ang programa ginhiwat sa isa ka Assembly Hall sang mga Saksi ni Jehova, gin-tour niya ang iya maestra sa tinukod pagkatapos sang programa. Nagdayaw gid ang maestra sa katinlo kag pagkaorganisado sang tanan  kag ilabi na kay mga boluntaryo ang nagtukod kag nagamentinar sang bug-os nga pasilidad. Pagkatapos magsiling nga nanamian gid sia sa pamulongpulong, namangkot ang maestra, “Paano ako makatuon sa Biblia nga ginsambit sang humalambal? Malipayon nga nagsabat si Jacquelin, “Ako na ang bahala sina!” Ginatun-an ni Jacquelin sa Biblia ang iya maestra kada Lunes pagkatapos sang klase.

Bagatnan nga Aprika

Ang isa ka kongregasyon nga may siam ka manugbantala sa isa ka nabaw-ing nga duog natingala kon ngaa isa lang ka imbitasyon sang Memoryal ang ila nabaton kay 500 ang ila gin-order sa sanga. Nahibaluan nila sang ulihi nga nahukas gali ang gintapik nga adres sa ginpadala nga imbitasyon sang sanga, amo nga indi na mahibal-an sang post office sa ila lugar kon kay sin-o ini ihatag. Ginbuksan sang nagaobra sa post office ang pinutos agod hibaluon kon sin-o ang ginpadal-an ukon ang nagpadala. Sang nakita nila ang mga imbitasyon sa Memoryal, naghinakop sila nga dapat ipanagtag  ining mga imbitasyon, gani ginpamutangan sang kartero sing imbitasyon ang mga kahon sang mga sulat sa post office, amo nga napanagtag ang tanan nga ginpadala. Nabal-an lamang sang mga kauturan ang natabo sang pati sila nakabaton man, indi sang bug-os nga pinutos, kundi sang isa ka imbitasyon nga nasulod sa kahon sang mga sulat sang kongregasyon sa post office. Apang nalipay gid ang siam ka manugbantala sang 42 ang nagtambong sa Memoryal, kag kalabanan sa ila dala ang imbitasyon nga ginbutang sa ila kahon para sa sulat sa post office.

Italya

Ginhatagan ni Patrizia ang iya estudyante sa Biblia nga si Gabriella sing imbitasyon sa Memoryal kag ginpaathag kon daw ano ka importante ang pagtambong. Si Mattia, ang singko anyos nga anak ni Gabriella, nga nagapamati sing maayo sa paghambalanay namangkot kon puede niya hatagan sing imbitasyon ang iya maestra. Sang masunod nga adlaw, ginhatagan ni Mattia ang iya maestra sing imbitasyon nga nagapaathag kon daw ano ka importante ang Memoryal kag nga nagalaum gid sia nga matambong ang iya maestra. Pila ka adlaw sang ulihi sa miting upod sa mga ginikanan, ginsugid sang maestra ni Mattia kay Gabriella nga nagdayaw gid sia sa kombiksion ni Mattia amo nga namat-od sia nga matambong sa Memoryal. Nag-upod sia kanday Gabriella kag Mattia sa Memoryal. Namati sing maayo sa pamulongpulong ang maestra kag nagdayaw gid sa kabuot sang mga kabataan. Pagkatapos sini, nagsiling sia nga nahangpan na niya karon nga importante ang Memoryal, subong sang ginhambal ni Mattia. Nian, ginhatagan ni Mattia ang iya maestra sing libro nga Ang Akon Libro Sang mga Sugilanon sa Biblia para sa iya anak, kag ginkontrata sia nanday Gabriella kag Patrizia para sa dugang nga paghinun-anon.

Mexico

Ginbantalaan sang gulang ang Presbiteryano nga ministro kag ginhatagan sing imbitasyon sa Memoryal. Ginbaton ini sang ministro, kag sa kakibot sang gulang, nangayo pa sia sing mga imbitasyon agod ihatag sa iya mga miembro. Nalipay ang mga kauturan sang makita nila sa Memoryal ang  ministro nga may upod nga 40 ka miembro sang iya simbahan, ang kada isa may imbitasyon, nga ila ginpakita sa ganhaan. Ang ministro nagsiling nga madamo pa ang luyag magkadto, apang abi nila indi sila makatambong kon wala sing imbitasyon. Ang 11 ka manugbantala sini nga kongregasyon nalipay gid sang 191 ang nagtambong sa Memoryal.

Australia

Ginsugiran sang isa ka lamharon nga lalaki nga nagatuon sa Biblia upod sa mga Saksi ni Jehova ang iban sa gym nga iya ginaobrahan tuhoy sa iya pagtuon sa Biblia. Ang isa sini amo ang babayi nga nagbaton sang iya pangagda nga matambong sa Memoryal. Sang tin-edyer pa sia, nabatian sining babayi ang inamba sa kaingod nga Kingdom Hall kag naglisensia sa iya mga ginikanan nga magtambong, pero gindilian sia nga makig-angot sa mga Saksi ni Jehova. Apang nagtambong gid sia sa pila ka miting ugaling nauntat ini kay nagsaylo sa malayo ang iya pamilya. Sang nagtambong sia sa Memoryal, ginpakilala sia sa isa ka utod nga babayi kag nasugdan ang pagtuon sa Biblia. Nagtambong sia sa mga miting sa kongregasyon, kag nangin interesado man ang iya bana. Sa pihak nga bahin, nangin di-bawtismado nga manugbantala ang lamharon nga lalaki kag nagahulat nga mabawtismuhan.

Kazakhstan

Nagsiling ang isa ka interesado nga babayi nga bangod may magagmay sia nga kabataan, indi sia makatambong sa Memoryal. Apang sang adlaw sang Memoryal, nag-ilis ang iya lima ka tuig nga bata kag nagkadto sa Kingdom Hall nga nagaisahanon. Sang natalupangdan sang babayi nga nadula ang iya bata, ginpangita niya ini dayon. Ginpakotpakot niya nga basi nagkadto ang iya bata sa Memoryal, kag subong sang iya ginahunahuna, nakita niya ini sa Kingdom Hall. Bangod ato na gid man sia sa Memoryal, namat-od na lang ang iloy nga magtupad sa iya bata kag namati sing maayo sa humalambal.

LEGAL NGA PAGPALIG-ON SANG MAAYONG BALITA

Pransia

Sugod pa sang 1996 nga gindeklarar sang mga awtoridad sang Pransia nga dapat magbayad sing buhis ang sanga  kay may reimbursement ang mga katapo sang pamilya Bethel sa Louviers. Apang sang Marso 28, 2007, nagmando ang Administrative Court of Paris nga indi dapat magbayad sing buhis kay ang mga katapo sang pamilya Bethel wala ginasuelduhan. Ang hukmanan nagsiling nga “ang rason kon ngaa nagatrabaho didto ang permanente nga mga katapo sang Bethel sa Louviers amo ang ila relihioso nga mga pagpati.” Ini nga desisyon nagpabakod sang relihioso nga mga hilikuton sang pamilya Bethel kag pareho man sa desisyon nga ginpapanaug sang mataas kag administratibo nga hukmanan sa Brazil.

Sa tuhay nga kaso, wala magpasugot ang siudad sang Lyon nga paarkilahan sa mga Saksi ni Jehova ang munisipyo agod hiwatan sang Memoryal. Apang sang Marso 15, 2007, nagmando ang isa ka hukom sang administratibo nga hukmanan sang siudad nga paarkilahan ang tilipunan sa mga Saksi ni Jehova. Ang siudad nag-apelar sa State Council, apang ginsakdag sang State Council ang desisyon sang administratibo nga hukmanan, nga nagasiling nga ang ginhimo sang siudad isa ka “serioso kag maathag gid nga paglapas sa kinamatarong nga magtipon, nga amo ang sadsaran nga kahilwayan.” Nagmando man ang State Council nga bayaran sang siudad ang danyos sang lokal nga asosasyon sang mga Saksi ni Jehova.

Walay sapayan sang paborable nga desisyon sa Lyon, ang mga Saksi ni Jehova sa Pransia sentro gihapon sang paghingabot sang mga manugpamatok, media, kag bisan sang mga opisyal sang gobierno. Halimbawa, sang 2005 ginsumbong sang tiglawas sang French National Assembly sa isa ka publiko nga interbyu, nga ang mga Saksi ni Jehova “naorganisar kuno kaangay sang mga sindikato.” Gin-akusar sang mga Saksi ni Jehova ining mapasipalahon nga pahayag, kag sang Hulyo 2007 nagdesisyon ang Korte sang Apelasyon sa Rouen pabor sa mga Saksi, nga nagasiling nga ang “sobra nga mga pinanghambal sang tiglawas indi gid mabaton kag naglapas na sa nagakaigo nga kahilwayan sang paghambal.”  Ginapadayon gihapon sang gobierno sang Pransia ang di-makatarunganon kag ilegal nga pagkuha sing buhis sa Asosasyon sang mga Saksi ni Jehova. Ini nga butang ginabinagbinag karon sang Korte Para sa Kinamatarong sang Tawo sa Europa (European Court of Human Rights ukon ECHR), kag nagasalig ang mga kauturan nga ginasakdag sila ni Jehova.

Uzbekistan

Kapin sa isa ka libo ka insidente sang pagdakop, pagbilanggo, ukon pagsakit sa aton mga kauturan ang narekord. Ang kalabanan nga pagdakop natabo sang 2005 kag 2006 nga pagsaulog sang Memoryal. Apang nalipay kami sa pagreport nga sang 2007 wala sing ginreport nga mga problema may kaangtanan sa Memoryal. Pero wala ini magdugay kay gindakop naman ang duha ka utod nga lalaki kag babayi kag ginpamatbatan bangod sang krimen nga pagpanudlo sing relihion. Ang utod nga lalaki, nga minyo kag may duha ka kabataan, ginpamatbatan sing duha tuig nga pagkabilanggo kag ginbilanggo dayon. Ang utod nga babayi ginpamatbatan sing duha ka tuig nga pagpangabudlay, kag kuhaon sang gobierno ang 20 porsiento sang iya sueldo subong silot.

Georgia

Sang Mayo 3, 2007, nagdesisyon ang ECHR batok sa gobierno sang Georgia bangod sang pagtugot sang kasingki batok sa mga Saksi ni Jehova kag nagmando nga dapat bayaran sing danyos ang mga biktima. Sugod sang Oktubre 1999 tubtob Nobiembre 2002, may 138 ka masingki nga pagsalakay sa mga Saksi ni Jehova. Sa pila ka hitabo, may pulis apang wala ini maghimo sing aksion agod amligan ang mga biktima. Naghinakop ang hukmanan nga bangod wala gin-amligan ang aton mga kauturan gikan sa relihioso nga mga panatiko, wala lamang ginlapas sang gobierno sadto sang Georgia ang mga obligasyon sini sa European Convention on Human Rights kundi ginlapas man sini ang relihioso nga kahilwayan sang aton mga kauturan. Ginapakita sining maathag nga desisyon nga sa pagtamod sang ECHR ang relihioso nga kahilwayan indi mapatumbayaan kag dapat amligan ang mga Saksi ni Jehova kon ginahingabot sang kalabanan.

 Eritrea

Pagligad sang lima ka tuig sugod sang ginkontrol sang gobierno ang tanan nga independiente nga grupo sang relihion nga wala nagapanghikot sa idalom sang awtoridad sang apat ka relihion nga ginakilala sang gobierno, padayon gihapon ang grabe nga paghingabot sa mga Saksi ni Jehova. Bisan sa ila pribado nga mga puluy-an sila maghiwat sing mga miting, ginadakop ang aton mga kauturan, ginapaantos, kag ginapilit gid nga isikway ang ila pagtuo. Sang Abril 2007, may 24 ka Saksi ni Jehova nga ginabilanggo gihapon bangod sa pagtambong sa mga miting, pagbantala, ukon pagdumili nga magsoldado. Ang tatlo sining bilanggo nga Saksi 60 anyos ukon kapin pa, ang napulo ginhunong sa tuman kabudlay nga kahimtangan, kag may tatlo nga ginbilanggo sugod pa sang 1994. Samtang wala pa nagmadinalag-on ang mga panikasog agod buligan ang mga kauturan, nagalaum gihapon kita nga mahilway sila sa dili madugay, kag nagasalig kita kay Jehova nga nagahilway sang iya mga alagad “gikan sa pagpigus kag paglugus.”—Sal. 72:14.

Andorra

Ang legal nga pagkilala, nga gintinguhaan sugod pa sang 1973, natigayon gid man sang aton mga kauturan sang Disiembre 14, 2006. Kapin na sa 150 ang manugbantala sa Andorra.

Korea

Sing kapin sa 50 ka tuig, ginabilanggo ang mga kauturan sa South Korea bangod sa pagdumili nga magsoldado. Bangod sini lima sa ila ang napatay. Pagkatapos mapierde sa korte sa sulod sang South Korea, gin-apelar sang mga utod nga sanday Yoon kag Choi ang desisyon sang korte sa Human Rights Committee of the United Nations. Sang Nobiembre 3, 2006, nagdesisyon ang komite nga nakasala ang South Korea sing paglapas sang tawhanon nga mga kinamatarong sang mga kauturan kag ginmanduan ini nga bayaran sing danyos ang mga kauturan. Ginmanduan man sang komite ang South Korea nga ipatuman ang mga tikang agod mapat-od nga ang iban nga mamatok pasad sa konsiensia indi pagpiliton nga mamat-od kon bala lapason nila ang ila mga prinsipio ukon  mag-antos sa bilangguan. Kinaandan na nga mga 70 ka utod ang ginabilanggo kada bulan.

Sang nagligad, madamo nga kauturan nga nagaatubang sini nga isyu ang nagpasugot sa desisyon sang korte nga dapat sila mabilanggo sing isa ka tuig kag tunga. Apang sining karon lang, namat-od ang kalabanan sang aton lamharon nga mga kauturan nga iapelar ang desisyon sang korte, amo nga ginatos ka apelasyon karon ang ginabista pa. Busa ginpahibalo sang gobierno sang Korea ang tuyo sini nga ipatuman ang pila ka alternatibo nga serbisyo sa idalom sang pagtatap sang sibilyan. Mahibaluan lang naton sa ulihi kon ipatuman ini kag kon bala magtugot ang konsiensia sang mga ginsumbong sa himuon nga alternatibo nga serbisyo.

Argentina

Sang Hulyo 2007, ang ministro sang hustisya kag tawhanon nga mga kinamatarong nagpirma sing resolusyon nga nagbaton nga si Daniel Victor Guagliardo ginbilanggo sing di-makatarunganon bangod indi magsoldado pasad sa iya nahanas sa Biblia nga konsiensia. Ini nga mando mahimo makabulig man sa mga ginbilanggo sing di-makatarunganon kaangay niya.

Armenia

Disinuebe ka utod ang ginbista bangod nagdumili sila sa alternatibo nga serbisyo kay ang matuod, makompromiso nila ang ila Cristianong neutralidad. Nian, ang isa ka sulat sang Septiembre 2006 gikan sa talatapan sang pangulo nga abogado sang gobierno nagpahibalo sa mga kauturan nga gin-untat ang pagbista. Apang ang gobierno magapangita pa sang iban nga alternatibo nga serbisyo nga indi supak sa konsiensia sang isa ka Cristiano. Busa, sang tungatunga sang 2007, 71 ka lamharon nga kauturan ang nabilanggo gihapon sing tubtob tatlo ka tuig.

Si Vahan Bayatyan isa sa madamo nga pamatan-on nga Saksi nga ginpamatbatan kag ginbilanggo sa Armenia. Pagkatapos nga ginpamatbatan sing isa ka tuig kag tunga nga pagkabilanggo, nangabay ang abogado sang gobierno nga pabug-atan ang pamatbat, kay suno sa iya ang pagpangindi sandig sa  konsiensia ni Utod Bayatyan “wala sing basihan kag makatalagam.” Nagpasugot ang korte sang apelasyon, amo nga gindugangan ini sing isa pa ka tuig, kag ang desisyon ginpalig-on sang korte suprema. Nagpasaka dayon si Utod Bayatyan sing petisyon sa ECHR. Ginbaton sang ECHR ang petisyon, sa amo nagapakita sang kahanda sini nga usisaon sing detalyado ang kaso. Ginalauman naton nga ang kadalag-an sini nga kaso makabulig kay Utod Bayatyan kag sa iban nga may amo man nga kaso.

Azerbaijan

Bisan legal nga narehistro ang mga Saksi ni Jehova sa Azerbaijan, padayon gihapon nga nagaatubang sing mga kabudlayan ang aton mga kauturan. Halimbawa, sang Disiembre 24, 2006, kapin sa 200 ka kauturan kag mga interesado ang nagtipon sa Baku para maghinun-anon sing matawhay sa mga topiko sa Biblia, sang nag-abot ang armado nga kapulisan upod ang media kag lokal nga mga opisyal agod pauntaton ang miting. Ang mga pulis, nga wala sing papeles sa pagpangusisa, nagguba sang ganhaan sang gin-arkilahan nga pasilidad kag ginhunong ang nagtalambong. Duha sa nagtambong ang ginbakol. Ginkumpiskar sang mga pulis ang madamo nga literatura sa Biblia, ang may unod nga kahon alamutan, legal nga mga dokumento, kag pila ka kompyuter nga ginagamit sa pagbadbad sing Biblia kag mga literatura sa Biblia. Ginhilway ang kalabanan nga ginhunong sadto mismo nga adlaw. Dugang pa, lakip sa mga ginhunong amo ang anom ka boluntaryo nga dumuluong nga ginpagua sa pungsod sang ulihi kay kuno “nakigbahin sa relihioso nga propaganda.” Ginabilanggo diri ang aton mga kauturan kay indi sila magsoldado. Nabudlayan man sila magpasulod sing mga literatura sa pungsod.

Israel

Sang Pebrero 5, 2007, nagdesisyon ang Haifa District Court nga gin-ihig-ihig sang Haifa Congress Center (ICC) ang mga Saksi ni Jehova bangod wala nila ginpagamit ang ila tilipunan para sa isa ka kombension. Ginmando sang korte nga magbayad sing danyos ang ICC. Ang opinyon sang attorney general nagasiling nga ang ICC may “panguna nga  obligasyon . . . nga makig-angot sa mga kliyente sini sing palareho, isa ka obligasyon nga nalapas sa sini nga mga kahimtangan.” Ining paborable nga desisyon magapahapos sa mga kauturan sa Israel nga magtipon sa dalagku nga mga grupo agod magsimba.

Tajikistan

Ginkompiskar sang mga opisyales sang adwana ang duha naton ka shipment sang literatura, kag ginsugyot ang ministro sang kultura nga dumilian ang aton mga literatura kag ang aton organisasyon. Bangod sining kahimtangan, duha ka ginhanas sa Gilead nga misyonero ang pilit nga ginpagua sa pungsod. Nian sang Oktubre 11, 2007, gindumilian sang mga awtoridad ang hilikuton sang mga Saksi ni Jehova. Gin-apelar ini nga mga inhustisya, kag ipangamuyo naton nga buksan ni Jehova ang kahigayunan nga magpadayon ang pagbantala sa sining mabungahon nga latagon, nga nag-uswag sing 14 porsiento sang 2007 nga tuig sang pag-alagad.

Ukraine

Isa ka adlaw antes hiwaton ang pinasahi nga pamulongpulong sa L’viv Stadium sang Mayo 12, 2007, ginkanselar sang tagdumalahan sang istadyum ang paggamit sini bangod sang pag-ipit sang mga manugpamatok. Ginpahibalo dayon ang mga opisyales sang Ukraine kag sang Estados Unidos agod kumbinsihon ang tagdumalahan sang istadyum nga indi magpanggamo sa siudad ang mga Saksi ni Jehova. Padayon gihapon ang negosasyon sang adlaw mismo sang pamulongpulong samtang linibo ka Saksi ni Jehova ang nag-alabutan sa L’viv gikan sa nagkalainlain nga bahin sang Ukraine paagi sa awto, bus, kag tren. Matawhay nga nagtipon ang aton mga kauturan sa gua sang sirado nga ganhaan sang istadyum, mapailubon nga nagahulat samtang nagakalipay sa mainit nga pagpakig-upod kag nagaamba pa gani sang mga ambahanon sang Ginharian. Mga 20 minutos na lang antes magsugod ang programa, nahaylo gid man ang tagdumalahan sang istadyum nga buksan ang mga ganhaan kag pasudlon ang mga kauturan. Kapin sa 27,000 ka kauturan ang nagsulod sa istadyum kag nagpamati sang makapalig-on nga pamulongpulong sang manugtatap sang sona.

 Turkmenistan

Wala marehistro ang mga Saksi ni Jehova sa Turkmenistan. Pagkatapos sang pila ka matawhay nga tinion, ginhingabot liwat sang mga awtoridad didto ang aton mga kauturan. Apang maisugon sila nga nagatipon kag nagapaambit sang maayong balita sa ila mga kaingod sa maalamon nga paagi. (Mat. 10:16) Tatlo ka lamharon nga utod nga lalaki ang gindakop bangod sang pagpangindi nga magsoldado pasad sa ila konsiensia. Ginpriso sila tanan; ang duha wala pa napamatbatan, apang ang isa ginpamatbatan sing isa ka tuig kag tunga nga pagkabilanggo. Bangod mabudlay gid ang kahimtangan sa bilangguan, nangin isyu sa bug-os nga kalibutan ang iya kahimtangan. Ang mga kauturan nga abogado gikan sa iban nga pungsod nga mabulig kuntani sa pagtiglawas sa hukmanan para sa aton utod wala ginpahanugutan nga magsulod sa pungsod. Apang wala sing tawhanon nga awtoridad ang makabalabag sang aton mga pangamuyo sa Labing Mataas.—1 Tim. 2:1, 2.

Kazakhstan

Anom ka opisyal sang gobierno ang nagpauntat sang isa ka relihioso nga miting nga ginhiwat sa balay sang utod nga babayi sa rehiyon nga wala pa marehistro ang mga Saksi ni Jehova. Ang isa ka utod nga lalaki nga wala gani sa miting kag ang lima pa ka utod nga babayi ginmultahan sing daku. Ginpasaka ang apelasyon para sa ila tanan.

Turkey

Sang Hulyo 31, 2007, nalipay ang sanga sa Turkey nga mabaton ang kompirmasyon nga opisyal na nga narehistro ang Association for the Support of Jehovah’s Witnesses. Naglawig ang pagparehistro sing kapin sa duha ka tuig kay ginkaso pa sa korte sang gobierno kon bala ang kontrata sang sanga suno sa konstitusyon. Pagkatapos madesisyunan sang manubo nga korte sa Turkey nga legal ang kontrata, nag-apelar ang gobierno sa Korte Suprema. Apang ginsakdag sang Korte Suprema ang desisyon sang manubo nga korte, amo nga narehistro kita. Ang bag-o nga asosasyon amo ang legal kag relihioso nga tiglawas nga makabakal kag makapanag-iya sing mga propiedad, makaarkila sang mga tilipunan para sa kombension, makabaton sing mga donasyon, kag makapangapin  sa legal nga mga intereses sang mga Saksi ni Jehova sa hukmanan.

Duha ka Saksi ni Jehova ang ginsumbong nga “nagadisturbo sa mga tawo” samtang nagapanagtag sing Kingdom News Num. 37 kag ginmultahan. Apang ginkanselar sang Istanbul Sisli Peace Court ang multa, nga nagasiling nga “ang pagtanyag sang mga publikasyon sang mga Saksi ni Jehova . . . lakip sa kahilwayan sang panghunahuna kag pagpati” kag nga ang pumuluyo sang Turkey “may kahilwayan sa pagpalapnag sang ila mga pagpati.” Ang aton mga kauturan sa Turkey may iban pa gihapon nga mga kabudlayan, subong sang isyu sa neutralidad, kay ang mga kauturan nga yara na sa pangidaron nga mangin soldado mahimo mabilanggo kag mamultahan.

Subong sang nauna na nga mga report, pirme nagaapelar ang mga Saksi ni Jehova sa ECHR kon ginalapak sang mga pungsod sa Europa ang aton kinamatarong sa pagsimba sa Dios. Sang tungatunga sang 2007, may nagahulat nga 22 ka apelasyon sa sini nga korte, nga may kaangtanan sa mga isyu subong sang neutralidad, legal nga pagparehistro, kag paghingabot. Pat-od gid nga kinahanglan sining mga kauturan nga nagaatubang sining mga kabudlayan, sa Europa man sila ukon bisan diin, sang aton pagsakdag paagi sa aton mga pangamuyo.—2 Cor. 1:10, 11.

KATUTOM KAG INTEGRIDAD

Mabasa mo sa sining Tuigan nga Libro kon paano ang aton mga kauturan sa Rusya naghupot sang ila integridad sang ginadumilian ang mga Saksi ni Jehova sa panahon sang Sobyet. Ang paghingabot mapintas kag sobra gid. Apang bisan sa mga kadutaan nga hilway ang aton hilikuton, wala untat ang pagtinguha ni Satanas kag sang iya mga sumulunod nga bungkagon ang aton integridad sa mas malalangon nga paagi. Apang mapahalipay gid si Jehova kon magpabilin nga matutom ang iya mga alagad! (Hulu. 27:11) Yari ang pila ka halimbawa kon paano ang katawhan sang Dios nagpakita sing pagtuo kag katutom sa matag-adlaw nga mga kahimtangan sa bug-os nga kalibutan.

 Sweden

Ang ginaatubang nga pagtilaw sang isa ka payunir nga utod nga babayi karon amo ang paglandas sang seksuwal nga pamentaha sang mga kaupdanan niya sa pribado nga ospital. Apang naghimo sia sing epektibo nga estratehiya agod mapunggan ini. Una, ginasugiran niya ang bag-o nga mga empleyado nga Saksi ni Jehova sia, kag ginasambit man niya nga may bana na sia. Ginahingalitan niya ang mga kahigayunan nga sugiran ang iya mga kaupod kon ano ang ila nanamian sang iya bana, nga nagapadaku sang ila mabakod nga pag-asawahay. Kon kinahanglan niya ihambal sa doktor ang kahimtangan sang isa ka pasyente, ginahimo niya ini sa kalan-an diin may tawo. Kon may magsulod gani sa iya kuarto nga ginaubrahan kag sirhan ang puertahan, nagapangamuyo dayon sia kay Jehova kag nagapabilin sia nga mainabyanon kag matinahuron.

Alemanya

Nagatrabaho si Marian sing 13 na ka tuig sa isa lang ka kompanya sa naaminhan nga Alemanya. Bangod nagarelyebo sia, mabudlay pirme ang magtambong sa mga miting sa tungatunga sang semana. “Nasubuan ako sa sini, kay ginapabaloran ko gid ang mga miting,” paathag niya. “Sulitsulit ko nga ginpangabay si Jehova nga buligan ako nga makapangita sing paagi nga makatambong sa mga miting.” Nangamuyo sia nga hatagan sing kaisog agod masugilanon niya ang iya superyor, nga nagpasugot nga magbiya sing temprano si Marian kon may miting, basta tapuson lang niya ang iya trabaho. Ini nga kahimusan nangin maayo tubtob ginbuslan ang iya superyor sang isa nga indi magpasugot nga magbiya sing temprano si Marian. Ano ang himuon ni Marian? “Ginsilingan ko sing matinahuron ang akon bag-o nga superyor,” hinumdom niya, “nga luyag ko makigsugilanon sa manedyer sang kompanya.” Sa pagpakigsugilanon sa iya manedyer, nanaksi sing maayo si Marian kag ginpaathag ang iya mga rason kon ngaa luyag niya magtambong sa mga miting. Nagpasugot ang iya manedyer kag gintugutan si Marian nga magbiya sing temprano kon may miting, basta magpasugot ang iya mga karelyebo. Gani ginsugilanon ni Marian ang iya mga kaupod kag  ginpaathag ang iya problema, kag nakapanaksi man sia sing maayo. Makatambong na karon si Marian sa mga miting sa tungatunga sang semana. “Mabudlay gid yadto nga hangkat agod makatambong sa mga miting,” siling ni Marian, “apang ang hanuot nga pangamuyo kay Jehova amo ang naghatag sa akon sing kusog nga labaw sa kinaandan.”

Britanya

Ang pagtilaw kay Sophie, nga 16 anyos, amo ang mga pag-ipit nga magtambong sa mga kasadyahan sa eskwelahan. “Bisan daw kanami pa sang mga kasadyahan,” siling niya, “nahibaluan ko nga hinulsulan ko ini bangod magadul-ong ini sa mga kahimtangan nga makahalalit sa ulihi. Gin-agda ako sining karon lang sang isa ka babayi sa sinalusalo, nga nagsiling nga ‘pagtinipon’ lang ini. Nasapwan ko sang ulihi nga naangot gali ini sa iya kaadlawan sa talipuspusan sang semana. Maayo gid nga wala ako nagkadto kay nabatian ko sang ulihi nga madamo sang iya abyan sa eskwelahan ang nahubog samtang wala sa balay ang iya mga ginikanan. Gani, mas luyag ko pa nga makig-upod sa mga kauturan kon maglingawlingaw bisan lainlain ang ila pangidaron agod makabenepisyo ako sa espirituwal. Ginaagda namon sang akon manghod ang mga lamharon kag mga tigulang sa amon puluy-an agod magpatokar sing musika, magsugbasugba, ukon maglagaw sa uma. Kon may mag-agda karon sa akon sa mga sinalusalo, ginapamangkot ko ang akon kaugalingon kon ano ang epekto sini sa akon kaangtanan kay Jehova. Narealisar ko nga makabenepisyo ka gid kon himuon mo ang matarong.”

Italya

Pila ka beses nga ginapalahidlahiran sang pila ka estudyante nga babayi sa eskwelahan ang 17 anyos nga si Giovanni, apang may isa gid nga masupog. Sang wala sia ginsapak ni Giovanni, ginsulatan niya si Giovanni: “Pamatyag ko bagay gid kita. Naluyag ako sa imo. Nanamian ako sa imo personalidad, kag indi lang ina. Tani maghimo ka sing husto nga desisyon. Ang nagahigugma.” Ginpirmahan ang sulat kag ginselyuhan sang halok nga may lipstik. “Ginaako ko nga mabudlay gid ang masunod nga pila ka adlaw,” siling ni Giovanni. “Ginpamangkot ko ang akon kaugalingon kon may  makita pa ako ayhan nga subong kaguapa sa iya. Sang nahibaluan ini sang akon mga kabutho, ginpalig-on nila ako nga batunon sia. Siling nila, ‘Dapat kalitan mo ang kahigayunan, kag kabuang gid sa imo kon balibaran mo sia.’ Apang nabatyagan ko nga nagakadula ang akon Cristianong identidad. Nangamuyo ako kay Jehova kag nakigsugilanon sa akon mga ginikanan—nga sang primero nakibot bangod wala sila makahibalo nga amo sini nga kahimtangan ang akon ginaatubang. Maid-id kami nga nagtuon sang akon mga ginikanan, ilabi na sa libro nga Questions Young People Ask—Answers That Work. Nakighambal man ako sa hamtong nga mga kauturan sa kongregasyon. Sang ulihi, naghimo ako sing husto nga desisyon kag ginbalibaran ko ang babayi. Masiling ko nga nagadayaw sa akon ang akon mga kabutho bangod sang akon kabakod.”

Mexico

“Sang 19 anyos pa lang ako,” panugiron sang 59 anyos nga si Antonio, nga nabawtismuhan na sing 37 ka tuig, “nasayasat nga may juvenile rheumatoid arthritis ako. Makahalanusbo gid ini kay bangod sa akon balatian, naga-wheelchair ako sa sulod na sang 35 ka tuig. Kon kaisa, nagaluya ang akon buot. Apang ang pagpabilin nga masako sa Cristianong mga hilikuton suno sa akon masarangan nagpalig-on sa akon.” Sang nagligad nga pito ka tuig, nagbudlay pa gid ang kahimtangan ni Antonio sang mapatay ang iya iloy, nga amo ang nagaatipan sa iya. Paano ini nalandas ni Antonio? “Sugod sadto,” sugid niya, “nakita ko nga wala gid ginabiyaan ni Jehova ang iya mga alagad kundi nagahatag  sia sing nagakaigo nga bulig. Ginpatigayon sang kongregasyon nga may mag-atipan sa akon nga utod, kag nagbulig ang pila ka utod sa pagbayad sa akon mga kinahanglanon.” Ginapaabot gid ni Antonio ang tion nga matuman ang tanan nga mga saad sa Ginharian.

“PALAPARA ANG DUUG SANG IMO LAYANGLAYANG”

“Palapara ang duug sang imo layanglayang, kag ipahitad sa ila ang mga kumbung sang imo mga puluy-an.” (Isa. 54:2) Ang tumalagsahon nga katumanan sining matagnaon nga mga pulong maathag sa nagadamo nga kinahanglanon nga mga duog sang pagsimba kag mas dalagku nga mga sanga-talatapan. Dugang pa sa nahimo nga pagpanukod sa bug-os nga kalibutan sang nagligad nga tuig, labi pa gid nga makalilipay para sa aton ang masunod nga anom ka dedikasyon sang sanga.

Puerto Rico

Mga 13 anyos pa lang ang nagligad sang mahuman ang sanga sadto, kinahanglan na nga palaparon ini bangod sang nagdugang nga mga departamento. Si David Splane, katapo sang Nagadumala nga Hubon, amo ang naghatag sang pamulongpulong sa dedikasyon sang Sabado, Septiembre 16, 2006.

Colombia

Ang mga kauturan halin sa 30 ka pungsod nagtipon sa sanga sa Colombia sang Nobiembre 11, 2006, agod tambungan ang dedikasyon sang ginpasangkad nga mga pasilidad sa Facatativá, 42 kilometros sa naaminhan-nakatundan sang Bogotá. Ang nagtambong 3,605. Madamo ang naghaksanay kay wala sila magkit-anay sing 30 ukon 40 ka tuig, kag tanan nalipay sa pagpamati sang pamulongpulong sa dedikasyon nga ginhatag ni Gerrit Lösch, katapo sang Nagadumala nga Hubon.

Fiji

Mga lima lang ka minuto kon lakton halin sa sentro sang Suva, ang kapital sang Fiji, makita ang matahom nga talatapan sang sanga nga nagatamwa sa pantalan. Sang Sabado, Nobiembre 11, 2006, si Geoffrey Jackson, katapo sang Nagadumala nga Hubon, ang nagpamulongpulong sa dedikasyon nga gintambungan sang 410.

 Burundi

Ang Nobiembre 25, 2006, isa sang indi malipatan nga adlaw sang mga Saksi ni Jehova sa sining matahom nga pungsod sa sentro sang Aprika. Nalipay ang 1,141 nga nagtambong halin sa 11 ka pungsod nga mamati kay Guy Pierce, katapo sang Nagadumala nga Hubon, sa dedikasyon sang matahom kag bag-o nga mga pasilidad sang sanga. Maathag gid ang pagpakamaayo ni Jehova, kag daku ang posibilidad nga madamo pa ang magaupod sa aton sa pagsimba kay Jehova.

Rwanda

Pagkatapos sang 30 ka tuig sang magamo nga maragtas, lakip ang mga pagdumili kag inaway sibil, nalipay ang aton mga kauturan sa Rwanda nga abiabihon si Guy Pierce para sa dedikasyon sang ila matahom kag bag-o nga sanga talatapan nga nahamtang sa tunga sang matahom nga mga hardin.

Walay sapayan sang makahalanusbo nga mga hitabo sang pagpapas sa rasa, diin madamo nga kauturan ang napatay, padayon nga naglambo ang hilikuton ni Jehova sa sini nga pungsod nga nakilal-an subong nga Ang Duog sang Isa ka Libo ka Bakulod. Ang 553 nga nagtambong sa programa sang dedikasyon sang Sabado, Disiembre 2, 2006, naglakip sa 112 ka delegado halin sa 15 ka pungsod.

Uganda

Gindedikar ang bag-o nga sanga sa nabagatnan nga bahin sang kapital, ang Kampala, sang Sabado, Enero 20, 2007. Ang 665 nga nagtambong naglakip sang 170 ka delegado gikan sa 20 ka sanga kag si Anthony Morris, katapo sang Nagadumala nga Hubon, ang namulongpulong sa dedikasyon.

“ANG GINOO NAKAHIMO SING DALAGKU NGA MGA BUTANG”

May rason gid kita nga magkalipay kon binagbinagon naton ang makatilingala nga mga binuhatan ni Jehova sang nagligad nga tuig. Sing nahiusa, tanan kita nagaugyon sa mapinasalamaton nga mga pinamulong sang salmista: “Ang GINOO nakahimo sang dalagku nga mga butang tungud sa aton; nga sa sini masadya kita.”—Sal. 126:3.

[Kahon/Retrato sa pahina 9]

Bug-os Kalibutan Gid nga Kampanya

Pila ka tawo sa nagkalainlain nga duog ang daw indi magpati nga napanagtag gid sa bug-os nga kalibutan ang Kingdom News. Halimbawa, ang isa ka nagapangduhaduha nga tagbalay sa Brazil nagsiling sa manugbantala nga maghulat kay tawgan niya anay ang iya abyan sa Estados Unidos agod hibaluon kon nakabaton sia sini. “Huo,” sabat sang abyan, “napulo pa lang ka minutos ang nagligad.” Nagdayaw gid ang tagbalay busa ginbaton niya ang Kingdom News kag nagsaad nga basahon ini sing maayo.

[Retrato sa pahina 12]

Isa lang ka imbitasyon ang yara sa kahon sang mga sulat sang kongregasyon sa post office

[Retrato sa pahina 25]

Handa na si Antonio sa paggua sa ministeryo

 [Retrato sa pahina 28, 29]

Mga Dedikasyon Sang Sanga

Puerto Rico

Rwanda

Colombia

 Burundi

Fiji

Uganda