Mga Binuhatan sang mga Saksi ni Jehova sa Moderno nga Tion

Samoa

Ang kasaysayan sang mga Saksi ni Jehova sa sining lugar nga ginhalinan sang mga Polynesian nagaunod sing mga istorya tuhoy sa diosnon nga debosyon kag mabakod nga pagkamainunungon. Basaha kon paano nagabantala ang mga Saksi sa sini nga lugar diin ang mga tawo sampaton sa Biblia kag relihioso katama, kag may tuhay nga lenguahe nga ginagamit kon nagapakigsugilanon tuhoy sa Dios. Mabasa mo ang eksperiensia sang mga Saksi nga nagpadayon gihapon sa pag-alagad kay Jehova bisan pa may mabudlay sila nga mga problema sa panglawas. Basaha man ang tuhoy sa isa ka pamilya nga nagalakat sing 22 kilometros sa kabukiran agod makatambong sa mga miting, kag kon ngaa ang mga kabataan sa isa ka minuro nagsinggit sing, “Nagapadulong na si Armagedon!”

Kadutaan sang Anay Yugoslavia

Sa sining rehiyon nga madamo sing natabo nga pagpaagay sing dugo kag pagdumot bangod sa rasa kag relihion, mabasa naton ang dalayawon nga mga istorya sang pagtuo kag kaisog. Sa paglaragway sa grupo sang mga Saksi nga nakibon sa siudad nga nakaagi sing pinakamalawig kag pinakamadugo nga pagpanalakay sa kasaysayan, ang isa ka utod nagsiling: “Ang mga Croasiano, mga Serbiano, kag mga Bosniano nagapinatyanay sa gua. Apang kami nga naggikan man sa sining tatlo ka rasa, nahiusa sa putli nga pagsimba.” Kon mabasa mo ining report, ang imo pagtuo magabakod bangod makita mo kon paano ginhuptan sang mga kauturan ang ila integridad sa tion sang kalinong kag sa tion sang inaway.