Pagbantala kag Pagpanudlo sa Bug-os nga Duta
Pagbantala kag Pagpanudlo sa Bug-os nga Duta
APRIKA
PUNGSOD 57
POPULASYON 848,582,269
MANUGBANTALA 1,122,493
PAGTUON SA BIBLIA 2,202,217
Rwanda
Samtang nagapauli halin sa eskwelahan ang isa ka nuebe anyos nga bata nga babayi, nakakita sia sang gamay nga bag sa karsada nga may kuarta nga daku sing kantidad. Bangod ang iya pamilya nagatuon sang Biblia upod sa mga Saksi, nagdesisyon sila nga iaplikar ang ila natun-an sa Biblia. Gani ginpangita nila ang tag-iya kag gin-uli ang kuarta. Ginpamangkot sang tag-iya ang bata, “Kon hatagan ko ikaw sang kuarta bangod sa imo pagkabunayag, ano ang himuon mo sa kuarta?”
“Ibakal ko sang Biblia,” sabat sang bata.
Nakibot ang tawo, kag nagsiling, “Abi ko ibakal mo sang bayo ukon sapatos kay nakita ko nga daan na gid ang ginasuksok mo.” Nagsiling ang bata nga mas gusto niya ang Biblia. Luyag mahibaluan sang tawo kon ngaa ginbalik pa sang pamilya ang kuarta. Sang nahibaluan niya nga nagatuon sila sang Biblia upod sa mga Saksi ni Jehova, nagbakal sia sang duha ka Biblia, ang isa para sa bata kag ang isa para mismo sa iya pamilya. Ginpangabay man niya ang mga Saksi nga bisitahan ang iya pamilya kag tun-an sa Biblia. Ang duha ka pamilya pareho nga nagauswag sa ila pagtuon sa Biblia.
Central African Republic
Sa bulig ni Jehova, nalandas ni Theodora ang sobra nga pagkamahuluy-on. Bisan pa nagdaku sia sa Cristianong pamilya, talagsa lang sia nagatambong sa mga miting sa Kingdom Hall bangod sa iya pagkamahuluy-on. Sa una niya nga pagtambong, nagaisahanon lang sia sa pulungkuan kag wala gid nagaistorya sa iban kag nagapauli dayon pagkatapos sang nagatakop nga ambahanon kag pangamuyo. Wala madugay, pirme na sia nagatambong sa Kingdom Hall pero malaka lang nagapangamusta sa mga nagatamyaw sa iya. Sang ulihi, nagsugod na sia sa pagkomento sa mga miting kag nagpalapit sa iban agod mangamusta. Ang iya pagpakigbahin sa pagbantala nga hilikuton nakabulig man sa iya sing daku. Sang ginsunlog sia sang mga bata nga babayi nga ila kaingod, luyag na niya mag-untat sa pagbantala, apang nangamuyo sia kay Jehova kag nangayo sing kusog. Sa karon bawtismado na sia, nagaauxiliary payunir kag nagahatag sing maayo nga mga komento sa mga miting. Nagadumala sia sing apat ka pagtuon sa Biblia, ang isa sa sini kaingod niya nga lalaki nga nagasunlog anay sa iya.
Madagascar
Ang manugtatap sang sirkito kag ang iya asawa nagalakbay pakadto sa isa ka kongregasyon sa kaumhan. Sa dalan, nasugata nila ang isa ka grupo sang mga kawatan sang baka nga may dala nga mga wasay kag bangkaw. Ang asawa sang manugtatap sang sirkito nangamuyo sing mahipos agod makatigayon sing kusog. Dayon gintanyagan niya ang mga kawatan sing tract nga Kabuhi sa Mahidaiton nga Bag-ong Kalibutan. Nagsiling sia: “Sa karon, nagakabuhi kita sa kahadlok. Pero sa indi madugay laglagon na sang Dios ang mga malauton kag bag-uhon niya ang kalibutan sa diin magaluntad na ang paghidait.” Ang isa sa mga lalaki namati sing maayo kag nagbaton sang tract.
Sa isa ka asambleya sang masunod nga tuig, nagpalapit sa iya ang isa ka lalaki kag namangkot kon natandaan pa niya sia. Nagsiling ang lalaki nga upod sia anay sa mga kawatan nga nasugata nila sa lutakon nga karsada kag sia amo ang nagbaton sang tract. Nian nagpaathag ang lalaki: “Halin kami sadto sa pagpangawat sang nasugata ninyo kami. Ang ginsiling mo nagpahunahuna gid sa akon. Nagsiling ako sa akon kaugalingon: ‘Wala kami nahadlok sa mga pulis kag sa mga soldado kay makapalagyo man kami sa ila. Apang paano ako makapalagyo sa Dios kon laglagon niya ang mga malauton?’ Gani nagdesisyon ako nga mangusisa sing dugang pa. Pagpauli ko, ginkadtuan ko ang akon kaingod nga nagatuon sang Biblia upod sa isa ka espesyal payunir. Nagpasugot ako nga magtuon man sang Biblia upod sa iya, kag karon pagabawtismuhan na ako sa sini nga asambleya.”
Mozambique
Sang 1992, si Madalena nga treintahon na, naaksidente sa salakyan kag nangin paralisado. Bangod sini, talagsa na lang sia nagahalin sa ila balay. Tatlo ka tuig sang ulihi, naistorya sang mga Saksi ang iya amay sa gua sang ila balay. Ang iya amay lider sang isa ka relihion nga nagatipon sa ila ugsaran. Nabatian ni Madalena ang ila pag-istoryahanay kag ang pamangkot sang mga utod tuhoy sa iya, gani ginpasulod sila ni Madalena. Natandog sia kay interesado gid ang mga utod sa iya! Nagbaton sia sing pagtuon sa Biblia kag nagpakita sing hanuot nga interes sa iya natun-an. Nakita sang mga Saksi ang iya kakugi amo nga ginbuligan nila sia sa praktikal nga mga paagi lakip na sa pagtambong sa mga miting. Bangod sini, gindedikar ni Madalena ang iya kabuhi kay Jehova kag nagpabawtismo sang 2002.
Nagdayaw gid ang mga ginikanan ni Madalena sa pag-atipan sang mga Saksi sa ila bata. Nagsugod na sa pagtambong sa mga miting ang iya iloy kag wala na nagpakig-upod sa relihion sang iya bana. Sang primero, nagsiling ang amay ni Madalena nga indi gid niya pagbiyaan ang iya relihion, pero sang ulihi nagtambong man sia sa mga miting. Ginaipit sia sang iya mga parokyano nga untatan ang pag-upod sa mga Saksi kay basi madulaan sila sing lider! Apang, nanindugan sia kag ginsunog ang tanan niya nga kagamitan sa relihion. Sang 2007 ginbawtismuhan sia kag ang iya asawa. Ang bug-os nga pamilya nagauswag sa espirituwal.
Zimbabwe
Ginapanaksihan pirme sang nuebe anyos nga si Decibel ang iya mga klasmeyt kag mga manunudlo. Isa ka adlaw natalupangdan niya nga masinulub-on ang iya maestra, gani ginpalapitan niya ini kag ginpamangkot kon ngaa. Nagsabat ang maestra nga napatay ang bata sang iya magulang nga babayi. Nangako si Decibel nga dalhan ang maestra sing isa ka butang nga makapaumpaw sa iya. Nakakuha sia gikan sa iya ginikanan sang brosyur nga Kon ang Isa nga Ginahigugma Mo Mapatay kag gindala ini pagkadason nga adlaw. Ginbasa sang maestra ang pila ka parapo sa brosyur kag naghibi sia sa kalipay. Sang ulihi, ginsulatan niya ang mga ginikanan ni Decibel nga nagapasalamat sa ila maayo nga paghanas sa ila anak kag sa paumpaw nga ginhatag sa iya ni Decibel sa tion sang iya kasubo.
Ghana
Si Abigail, nga nagaistar upod sa iya Presbiteryano nga lolo kag lola sa bagatnan nga Ghana, gintudluan nga ang mga Saksi ni Jehova butig nga mga propeta. Sang nahibaluan niya nga ang iya mga ginikanan nga nagaistar sa iban nga bahin sang pungsod nagatuon upod sa mga Saksi, nabalaka gid sia kag ginsulatan niya sila nga mag-untat sa pagtuon. Wala ginsunod sang iya mga ginikanan ang iya ginsiling sa sulat, amo nga naglakbay sia sing kapin sa 1,000 ka kilometro agod makig-istorya sa ila. Nakibot gid si Abigail sang natun-an niya sa iya mismo Biblia nga ang impierno indi gali lugar sa diin ginapaantos ang mga malauton. Nagsugod sia sa pagtuon sa Biblia kag sa pagtambong sa mga miting sa Kingdom Hall upod sa iya mga ginikanan kag nangin di-bawtismado nga manugbantala. Ginbawtismuhan si Abigail sa isa ka sirkito nga asambleya sining karon lang.
AMERIKA
PUNGSOD 55
POPULASYON 898,130,531
MANUGBANTALA 3,449,038
PAGTUON SA BIBLIA 3,548,101
Dominica
Madamo nga kababayin-an sa sini nga isla ang nagapanglaba sa higad sang suba kag ginapamala ini sa dalagku nga mga bato. Samtang nagapanglaba, nakita sang isa ka babayi ang isa ka pamilyar nga butang nga nagalutawlutaw sa manabaw nga tubig. Pareho ini sa libro nga ginatun-an niya kada semana upod sa isa ka Saksi ni Jehova. Ginkuha niya ini kag ginbulad sa kabatuhan kag ginpadayon ang pagpanglaba.
Pagkahapon, pagpamunpon niya sang iya linabhan, nalipatan niya ang libro. Apang, ining dalag nga libro nakita sang naglabay nga mga mangingisda nga naghalin sa dagat kag ginkuha ini sang isa sa ila. Nanamian sia sa tig-ulo sini nga Ano Gid ang Ginatudlo Sang Biblia? amo nga ginbasa niya ini. Sang ulihi, nabantalaan sia sang duha ka payunir nga nagpamalaybalay sa ila lugar. Ginpaathag sang mangingisda sa ila nga 144,000 lamang ang mapalangit kag ang Ginharian sang Dios natukod na sang 1914. Nagsiling man sia nga sa indi madugay ang duta himuon nga Paraiso. Sang ginpamangkot nila sia kon paano niya ini nahibaluan, ginpaathag niya nga paagi ini sa libro nga nakita niya sa suba nga ginabasa niya adlaw-adlaw. Ginpakita niya sa ila ang libro—mala na ini kag naghabok.
Nahibaluan sang isa ka payunir nga amo gali ini ang libro nga nakit-an sa suba sang iya ginahiwatan sang pagtuon. Nagtuon sa Biblia ang mangingisda kag ginakalangkagan gid niya ang ila pagtuon kada semana. Padayon sia karon nga nagauswag.
Bolivia
Ang pagbantala sa rehiyon sang Amazon sa Bolivia mabudlay apang makalilipay. Ang isa ka grupo sang napulo ka payunir nagsakay sa gamay nga pumpboat nga may dala nga mga trapal, lulutuan, kag madamo nga kahon sang mga literatura sa Biblia. Naglakbay sila sing mga 800 kilometros sa Beni River halin sa Rurrenabaque pakadto sa Riberalta. Nagbisita sila sa kapin sa 70 ka naligwin nga komunidad kag kapin sa 800 ka libro kag subong man mga brosyur kag tract ang ila napahamtang. Mga 700 ka pagtuon sa Biblia ang ila nasugdan sa interesado nga mga tawo kag kapin sa 200 sining mga tawo ang ila ginbalikan agod padayunon ang pagtuon. Sang manughalin na ang mga Saksi, madamo ang nagsiling: “Puede kamo makatener bisan dali lang para madugangan pa ang amon matun-an?” Sa isa ka gamay nga banwa, namilit gid ang isa ka tawo kag nagreklamo sang manughalin na ang mga Saksi bangod luyag niya nga padayunon nila ang pagtuon sa iya. Nagsiling sia: “Ti, nasugdan n’yo na, ngaa indi n’yo na lang tapuson?”
Canada
Malawig na nga tuig nga nagtrabaho si Normand sa pabrika sang metal sa Montreal. Sa iya bakante nga tion sa trabaho, regular sia nga nagabasa sang pulyeto nga Pag-usisa sa Kasulatan sa Adlaw-adlaw sa kapiterya. Nakita sia sang iya mga katrabaho nga nagabasa sini, kag ginbaton sang pila ang iya imbitasyon nga hinun-anunan ini kada adlaw. Sa sining malip-ot nga mga paghinun-anon, gintinguhaan ni Normand nga iaplikar ang ila ginabinagbinag sa pagkabuhi sang pamilya kag pagpakig-angot sa mga tawo. Nagtambong man sa ila paghinun-anon ang isa ka manedyer kag sang ulihi ginpatawag niya si Normand sa iya opisina kag ginhatagan sing komendasyon. Nagsiling ang manedyer nga ang ila paghinun-anon makabulig gid sa mga empleyado kag makapaayo sang ila pagtinamdanay.
Sang sobra na sa 30 ang nagatambong sa sining paghinun-anon, ginpangabay si Normand sang tagdumalahan nga mag-organisar sang gagmay nga mga grupo sa lainlain nga lugar sa pabrika. Nagsiling si Normand: “Sa karon, tatlo ka grupo ang ginadumalahan ko kada adlaw. Ginatawag ini sang akon mga katrabaho nga adlaw-adlaw nga pahanumdom. Nanamian gid sila sa sini amo nga kon wala ako, ang isa sa ila amo ang nagabulos. Kag kon magbalik na ako, ginapamangkot nila ako sang indi nila maintiendihan.” Nabuligan ni Normand ang iya mga katrabaho nga hunahunaon ang isa ka teksto sa Biblia kada adlaw sa sulod sang lima ka tuig. Subong resulta, kapin sa 40 ka katrabaho niya kag katapo sang ila pamilya ang nagbaton sang kamatuoran.
Barbados
Si Sister Barker, nga 89 anyos, luyag makasugod sing pagtuon sa Biblia. Bangod sang iya kahimtangan sa pisikal, indi sia makapamalaybalay amo nga gintilawan niya ang pagpanaksi paagi sa telepono pero wala ini nagmadinalag-on. Napalig-on sia sang isa ka bahin sa miting tuhoy sa pangamuyo. Gani, nangamuyo sia sing bulig ni Jehova agod makasugod sing pagtuon sa Biblia. Pagligad sang pila ka adlaw, nagtindog sia sa atubangan sang iya balay nga may ginauyatan nga Biblia kag mga magasin kag determinado nga panaksihan ang bisan sin-o nga nagalabay, bisan pa diutay lang nga tawo ang nagaagi sa dalan. Gintanyagan niya sang mga magasin ang isa ka tawo nga manugpauli sa ila puluy-an gikan sa trabaho. Pagligad sang isa ka semana, samtang yara sia liwat sa atubangan sang iya balay, nakita niya ini gihapon nga tawo. Bangod nagpakita sang interes sa mga magasin ini nga tawo, gintanyagan niya sia sang libro nga Ginatudlo Sang Biblia kag gin-agda nga magtuon sa Biblia. Daku gid ang iya kalipay sang nagpasugot ang tawo nga magtuon. Ginsugdan nila ang pagtuon sa hingapusan sang Marso 2008. Nahibaluan niya sang ulihi nga malapit lang gali sa iya puluy-an ang ginaistaran sang tawo. Pila lang ka semana, nagtambong na ining tawo sa mga miting. Si Sister Barker nagsiling: “Nahibaluan ko nga ginasabat ni Jehova ang mga pangamuyo, apang wala ako maghunahuna nga amo sini kadasig!”
Chile
Sang nanaug sa taxi ang isa ka payunir nga utod nga babayi sa Santiago, nalipatan niya ang iya folder sang magasin sa likod nga pulungkuan. Ang iya folder nagaunod sang pila ka magasin kag sang iya kopya sang Ang Aton Ministeryo sa Ginharian nga may ngalan niya. Maayo lang kay may ngalan niya kay pagligad sang duha ka adlaw, nakita sang drayber sang taxi ang payunir sa bulig sang iban nga Saksi nga nakita niya nga nagabantala. Sang ginbalik niya ang folder sa payunir, Ministeryo na lang ang nabilin. Wala na ang mga magasin. Nangayo sia sing pasaylo kag ginpaathag nga ginbukad sang iya mga pasahero ang mga magasin kag namangkot kon puede sila makakuha sing isa ka kopya. Sa isa lang ka adlaw, naubos ang tanan nga magasin bisan wala sing nagtanyag!
Nicaragua
Si Ernesto, nga kapitan anay sang pinasahi nga tropa sang mga soldado, nagapuyo sa gamay nga banwa malapit sa Caribbean Coast. Si Jairo, isa ka espesyal payunir nga naggikan sa isa pa ka bahin sang pungsod nagkadto sa sini nga lugar agod magbantala, kag samtang nagapamalaybalay nasumalang niya si Ernesto kag gintanyagan sing pagtuon sa Biblia. Bisan pa namalibad ining soldado anay, namilit si Jairo, kag sang ulihi ginbaton ni Ernesto ang iya tanyag nga pagtuon. Sa ila pag-istoryahanay, ginsugid ni Jairo nga ang iya amay kumander sang mga rebelde sadto apang napatay ini sa inaway. Nagpadayon si Ernesto sa iya pagtuon kag nag-uswag, apang may ginatago sia nga sekreto kay Jairo nga ginsugid niya sang ulihi. Masinulub-on niya nga ginpaathag kay Jairo nga sia ang kumander sang mga soldado nga nagdakop kag nagpatay sa amay ni Jairo. Siempre, nakibot gid si Jairo, apang nahibaluan niya nga matuod gid ini bangod ang makangilidlis nga detalye nga ginsugid sa iya ni Ernesto nagsigo man sa ginsugid sang mga kaupod sang iya amay. Naghunahuna si Ernesto nga indi na sila mag-amigohay. Apang sa baylo nga magdumot si Jairo, ginpadayon niya ang pagtuon kay Ernesto. Nag-uswag si Ernesto kag nabawtismuhan upod sa iya asawa. Amigohay sila gihapon ni Jairo tubtob karon.
Venezuela
Sa katundan sang pungsod, ang mga kauturan sa banwa sang Machiques nagabantala sa talagsa lang ginakadtuan nga teritoryo nga ginapuy-an sang mga tumandok nga malapit sa dulunan sang Colombia. Namati gid ang tanan! Ang pangulo sang komunidad sang Yukpa nagpasugot nga hiwaton ang Memoryal sa una nga tion sa sini nga lugar. Ang mga kaingod kag ang mga eskwelahan nagpahulam sang mga pulungkuan, kag kapin sa 200 ang nagtambong. Pagkatapos sang Memoryal, matinahuron nga naghambal ang pangulo subong tiglawas sang komunidad: “Luyag namon pasalamatan ang mga Saksi ni Jehova. Kabay pa nga indi ini ang katapusan nga pagkadto ninyo. Gintudluan ninyo kami sang kamatuoran, kag ginaabiabi gid kamo!” Kapin sa 50 ka tawo karon ang nagatuon sa Biblia kada semana.
ASIA KAG NATUNG-AN NGA SIDLANGAN
PUNGSOD 47
POPULASYON 4,026,656,360
MANUGBANTALA 618,088
PAGTUON SA BIBLIA 538,957
Taiwan
Ang isa ka utod nga babayi nagsulat: “Nalipay gid ako nga makita ang akon magulang nga lalaki sa amay, nga wala ko pa gid anay makita bangod nagaistar sila sang iya pamilya sa malayo nga lugar kag mabudlay gid ini kadtuan. Gani, sang nagbisita sila sa amon, daku gid ang kalipay sang akon amay kag sang tanan nga miembro sang amon pamilya bangod gintinguhaan gid ni Manong kag sang iya pamilya nga magbisita sa amon. Nagaistar sila sa isa ka lugar nga wala sing mga Saksi, gani nagalaum ako nga tani batunon nila ang maayong balita. Amo nga sang nagpakita sing interes sa Biblia ang asawa ni Manong kag ang iya bata nga babayi, daku gid ang akon kalipay! Apang, paano ko sila mabuligan nga makatuon sing dugang pa sa mga katuyuan ni Jehova kon magpauli na sila? Natukiban ko nga may kompyuter sila nga nakonektar sa Internet. Nagbakal kami sang akon bana sing Webcam, amo nga sang nakapauli na sila, napadayon namon ang pagtuon sa Biblia paagi sa Internet. Ini nga paagi sang pagdumala sing pagtuon may maayo gid nga resulta. Nakita namon ang ila reaksion samtang nagabasa sila sa ila kaugalingon nga Biblia kag sa libro nga amon ginatun-an. Nakabulig ini sa akon nga mahibaluan kon ano ang himuon agod mabuligan sila. Nagapasalamat kami kay nagamit namon ini nga teknolohiya, kay kon wala ini, indi namon kuntani mapakig-angutan ang amon pamilya agod buligan nga makatuon sing kamatuoran.”
Nepal
Si Purnamaya, nga 16 anyos, nagaistar sa gamay nga banwa sa Nepal. Ginpanaksihan sia sang iya tiyo, kag nagtuon sia sa Bib-lia. Sa karon, bisan pa kinahanglan sia magbiyahe sa bus sing duha ka oras kag tunga, matutom sia nga nagatambong sa mga miting kada semana. Mabudlay ini para sa iya. Ang iya amay kag iloy pareho nga may aro amo nga pigado sila katama. Sa kaagahon, magluwas sa pagdigamo kag pagpanglaba, ginadugmok ni Purnamaya ang mga bato para himuon nga graba agod makabulig sa pinansial nga kinahanglanon sang iya pamilya. Subong man, nagaeskwela pa sia. Ang plete sa bus pakadto sa mga miting katumbas sang isa ka adlaw nga sueldo. Kon kaisa, ginasilingan sia sang iya mga ginikanan nga magsimba na lang sa simbahan sa ila lugar. Apang nahibaluan ni Purnamaya nga sa Kingdom Hall lamang sia makatuon tuhoy kay Jehova, gani ginahimo niya ang iya masarangan agod makatambong. Sining karon lang, ginbaligya niya ang relo nga ginregalo sa iya sang iya lola agod makatambong. Maayo sia magkomento sa mga miting kag ginasugid man niya ang iya natun-an sa mga tawo sa ila lugar. Napalig-on gid ni Purnamaya ang tanan nga nakakilala sa iya.
Malaysia
Sang ang Malaysia ginagamhan anay sang Britanya, linibo ka trabahador ang gindala sa Malaysia agod magtrabaho sa plantasyon sang rubber tree. Ginpaistar sila sa mga minuro diin nahamtang ini nga mga plantasyon, kag madamo sa sining mga minuro ang yara pa gihapon tubtob subong. Apang ang kalabanan sini mabudlay kadtuan kag indi na makita sa mapa. Samtang nagabantala ang isa ka kongregasyon sa wala pa makadtuan nga teritoryo, nasapwan nila ang isa sa sini nga mga minuro sa mga plantasyon sang rubber tree. Ang duha ka pamatan-on nga lalaki, nga nakakuha na sing pila ka magasin, nagpakita sing daku nga interes sa pagbantala nga hilikuton sang mga kauturan. Nagpalapit sila sa mga kauturan kag nagtanyag nga buligan sila sa pagkadto sa iban pa nga mga minuro. Sunado nila katama ang teritoryo sangsa mga kauturan. Nagsakay sila sa ila mga motor kag ginpangunahan ang mga salakyan sang mga utod pakadto sa plantasyon. Naglakbay sila sa lutakon kag indi sementado nga mga dalan, kag mga 45 minutos ang kalawigon sang ila paglakbay pakadto sa kada minuro. Gingiyahan nila ang mga kauturan pakadto sa mga plantasyon nga wala pa gid anay mabantalaan sang mga Saksi. Samtang nagabantala ang mga kauturan, ginakumbinsi sining duha ka pamatan-on ang mga tawo nga batunon ang mga magasin kag basahon gid ini. Tatlo tanan ka nabaw-ing nga minuro ang nakadtuan nila sa bulig sining duha ka pamatan-on. Bangod sini, daku katama nga panaksi ang nahatag sa mga tawo nga wala pa gid anay makabati sang maayong balita. Ini nga pagbantala ginhimo sa talipuspusan sang semana, kag kapin sa 5,000 ka magasin ang napahamtang sang 50 ka manugbantala sa sini nga kongregasyon.
EUROPA
PUNGSOD 47
POPULASYON 733,775,190
MANUGBANTALA 1,542,507
PAGTUON SA BIBLIA 789,219
Rusya
Si Tatyana nagamasakit sing kanser sa utok. Pagkatapos sang iya operasyon pila ka tuig na ang nagligad, ginbutang sia sa isa ka ward para sa mga pasyente nga daw wala na sing paglaum nga mag-ayo. Ang isa ka Ortodokso nga pari nagduaw sa ward agod makakumpisar ang mga pasyente antes sila mapatay. Natalupangdan ni Tatyana nga ang isa ka babayi sa ward nagatinguha gid nga dahuan sing kuarta ang pari. Sang nakahalin na ang pari, ginpamangkot ni Tatyana ang babayi kon bala nag-ayoayo ang iya pamatyag. “Wala,” masubo nga sabat sang babayi, “wala gid ako sing naintiendihan sa iya ginpanghambal.” Dayon ginsugiran sia ni Tatyana sang maayong balita tuhoy sa paglaum nga pagkabanhaw. Ginpasalamatan sang babayi si Tatyana kag nagsiling, “Nag-ayoayo na ang akon pamatyag!” Nabalitaan sang manedyer sang klinika ang natabo kag ginhambalan niya ang pari nga indi na magbalik. Sa baylo, ginbutang si Tatyana sa lain naman nga ward agod maistorya man niya ang iban. Ginpamangkot man sang manedyer sang klinika kon diin ginahiwat sang mga Saksi ni Jehova ang ila mga pagtilipon. Antes sia maospital, nagpangabay si Tatyana kay Jehova nga hatagan sia sing kusog nga makapadayon sa pagbantala. Kumbinsido sia nga ginsabat ni Jehova ang iya pangamuyo. Sina nga bulan, kapin sa 100 ka oras ang iya ginreport! Sugod sadto, naglala na gid ang iya sakit amo nga indi na sia makahalin sa ila balay. Apang ginaduaw sia pirme sang mga napanaksihan niya sadto sa ospital.
Georgia
Ang duha ka utod nga babayi nga temporaryo nga mga espesyal payunir gin-asayn sa isa ka lugar nga wala sing mga Saksi ni Jehova. Samtang ginalibot nila ang ila bag-o nga teritoryo, nagtalang sila. Kapoy gid sila kag ginatugnawan samtang nagaagi sa tagatuhod nga niebe kag nagatinguha nga pangitaon ang dalan pauli. Sang ulihi, may nakita sila nga agi sang tiil pakadto sa isa ka balay, kag nanawag sila. Nabatian sang bataon nga babayi nga si Khatuna ang ila pagpanawag kag naggua kag gin-agda dayon ang duha ka payunir sa ila balay, amo nga ginpasalamatan gid sia sang duha ka payunir. Sang nahibaluan ni Khatuna nga mga Saksi ni Jehova sila, ginpaathag niya nga sia kag ang iya pamilya nagpangamuyo sa Dios nga matun-an nila ang kamatuoran, kag amo man ini ang tion nga nagtalang ang duha ka utod samtang nagalakat sa niebe. Pagligad sang pila ka minuto, ang duha ka payunir nagpalapit sa ila balay. Nagsiling si Khatuna nga amo na ini ang sabat sa ila pangamuyo! Sa karon, ang apat ka miembro sini nga pamilya nagatuon sa Biblia, kag ang duha sa ila—si Khatuna kag ang iya ugangan nga babayi—nangin di-bawtismado nga mga manugbantala.
Britanya
Si Reston nagdesisyon nga tilawan ang direkta nga pamaagi sa pagsugod sing mga pagtuon sa Biblia. Antes sia manuktok sa una nga balay, nangamuyo sia anay sing malip-ot, nga nagapangabay kay Jehova nga buligan sia nga mangin positibo. Dayon direkta niya nga gintanyagan sing pagtuon sa Biblia ang tagbalay nga si Andy, nga nagbaton gilayon. Wala si Reston sing dala nga libro nga Ano Gid ang Ginatudlo Sang Biblia? apang determinado sia nga dalhan si Andy sing isa ka kopya sina man mismo nga adlaw. Sang nakakuha na si Reston sing libro kag nagasakay sa bus pakadto sa balay ni Andy, natalupangdan niya nga ang drayber gali amo ang tawo nga ginadul-ungan niya pirme sang Ang Lalantawan kag Magmata! Bangod napalig-on sia sa pagbaton ni Andy sing pagtuon sina nga aga, nagdesisyon sia nga tanyagan man sing pagtuon ang drayber kon makalab-ot na sila sa terminal sang bus.
Sina man nga tion, ang isa ka tigulang nga babayi nga pasahero sa bus nakakilala kay Reston subong isa ka Saksi kag ginpangabay sia nga duawon ang iya nagamasakit nga abyan agod pangamuyuan ini. Nagsiling si Reston nga malipay sia nga makig-istorya sa abyan sini nga babayi kag sugiran sing lugpay halin sa Biblia. Paagi sa dala niya nga isa ka kopya sang Ginatudlo Sang Biblia nga libro, ginpaathag niya sa babayi kon paano makabulig ang pagtuon sing Biblia. Ini nga babayi nagsiling nga luyag man niya nga mag-tuon. Ang pamatan-on nga lalaki nga nagapungko sa pihak nga pulungkuan nagapamati sa ila paghambalanay. Interesado sia sa mga laragway sa libro. Amo nga ginhatag ni Reston sa pamatan-on ang libro. Pag-abot sa terminal, gintanyagan ni Reston ang drayber sing wala bayad nga pagtuon sa Biblia sa puluy-an. Nakibot sia kay nagbaton gilayon ang drayber kag nagsiling nga madamo sia sing pamangkot parte sa Biblia. Ginkadtuan gilayon ni Reston ang balay sang isa ka utod nga malapit sa terminal agod magkuha sing isa pa ka kopya sang Ginatudlo Sang Biblia nga libro kag gab-i na sang nakaabot sia sa balay ni Andy. Malipayon nga ginbaton ni Andy ang libro. Nasugdan nila ang isa ka pagtuon sa Biblia, kag gin-aplikar sang ulihi ni Andy ang iya natun-an. Si Andy kag ang drayber sang bus nagatambong na sa mga miting, kag 15 ka tawo ang ginahiwatan ni Reston sing pagtuon sa Biblia, tanan ini nasugdan sa direkta nga pamaagi. Apang karon, ginasiguro na niya nga may madamo sia nga dala nga Ginatudlo Sang Biblia nga libro kon nagapanaksi.
Sanday François kag Monica, upod sa ila duha ka bata, nagbalik na sa ila salakyan pagkatapos sang ila pagbantala sang aga. Apang, ang ila bata nga babayi nga si Shaé, nga nagaedad sing duha ka tuig kag tunga, indi gusto nga magsulod sa salakyan kay luyag pa niya ihatag ang iya nabilin nga tract. Amo nga nagpundo anay ang ila salakyan sa tabok sang dalan, kag may duha ka babayi nga naggua. Malipayon nga ginhatag ni Shaé sa isa ka babayi ang tract nga Kabuhi sa Mahidaiton nga Bag-ong Kalibutan, kag ginpaathag ni Monica ang unod sang tract. Ang babayi nga si Sierra, nagsiling nga luyag niya makahibalo sing dugang pa kag gin-agda niya si Monica sa ila balay agod tun-an ang Biblia upod sa iya duha ka pamatan-on nga utod nga babayi. Sa una nga pagtuon, nagpamangkot si Sierra kon puede man mahiwatan sing pagtuon ang iya duha ka bata nga lalaki. Sang ulihi, nag-upod man sa pagtuon ang hinablos nga lalaki ni Sierra. Nag-upod si Sierra sa sini tanan nga pagtuon kag madamo sia sing pamangkot. Sang ulihi, nagpasugot sia nga hiwatan sia mismo sing pagtuon. Dayon ang iya bana nagtuon man. Pagkatapos sini, ang iya iloy, subong man ang iban pa nga miembro sang ila pamilya kag mga abyan, nagpangabay man sing pagtuon sa Biblia. Ang determinasyon ni Shaé nga ihatag ang iya nabilin nga tract nagresulta sa 11 ka pagtuon sa Biblia. Ang apat sining mga ginahiwatan sing pagtuon nagatambong na sing regular sa mga miting sang kongregasyon.
Italya
Si Jennifer katapo sang Milan Russian Congregation. Madamo nga beses sia nga nakapanaksi sa telepono sa isa ka Ukrainiano nga babayi nga si Valentina, apang wala pa sila makakitaay. Isa ka adlaw, nagsugtanay sila nga magkitaay sa isa ka estasyon sang tren. Agod magkilalahay sila, ginsilingan ni Valentina si Jennifer nga magasuksok sia sing pula nga dyaket. Nag-abot si Jennifer sa estasyon sang tren kag nasiplatan niya ang isa ka babayi nga nagasuksok sing pula nga dyaket, daw Ukrainiano, kag daw may gina-pangita. Ginpalapitan sia ni Jennifer kag nagsiling, “Hello, ikaw si Valentina?” Naghuo ang babayi, dayon nagsiling si Jennifer, “Ako gali si Jennifer.” Pero wala nagsabat ang babayi. Daw naligban si Jennifer, amo nga namangkot sia, “Ginahulat mo ako, indi bala?”
“Wala ah,” siling sang babayi. Natabuan nga Ukrainiano man ini nga babayi, kag Valentina man ang iya nga ngalan, kag nagasuksok man sia sing pula nga dyaket; apang iban nga tawo ang iya ginahulat! Nagkadlaw si Jennifer kag ginpaathag ang sitwasyon. Ginpamangkot niya ang babayi kon puede niya mapaambit ang isa ka punto halin sa Biblia nga iya ginhanda para kuntani sa isa ka Valentina. Nagpasugot si Valentina kag nagpamati sing maayo. Pagkatapos sini, ginpakita niya kay Jennifer ang isa ka papel nga ginsulatan niya sang bug-os nga Salmo 91, kag ginpaathag nga nanamian gid sia sa Biblia. Ginsugdan ni Jennifer ang isa ka pagtuon sa Biblia sa sini nga Valentina. Kamusta naman ang isa pa ka Valentina? Nagkit-anay sila sang ulihi ni Jennifer kag nagtuon man sia sa Biblia.
Romania
Ang isa ka utod nga lalaki nagbisita sa iya kakilala kag gin-istoryahan nila ang Biblia upod sa asawa sini. Interesado gid sila sa ginatudlo sang Biblia tuhoy sa kaangtanan sang bana kag asawa, apang nabudlayan sila sa paghatag sing tion sa pagtuon sing Biblia. Ginapabaloran sini nga mag-asawa ang ikaayong lawas, kag ang bana naga-jogging adlaw-adlaw sing mga walo ka kilometro. Pagkatapos sang pila ka pagpalig-on nga padayunon ang paghambalanay sa Biblia, ang utod nagdesisyon nga pamangkuton ang bana kon puede sia makaupod sa pag-jogging. Malipayon nga nagpasugot ang bana. Apang, ang utod wala pa maanad mag-jogging kag narealisar niya sang ulihi nga makakalapoy gali dunganon ang pag-jogging kag pagpanaksi! “Nakabantala ako,” siling sang utod, “samtang nagasuksok sing pang-jogging nga bayo kag wala sing dala nga Biblia, kag nagasugid lang sang akon nasaulo nga mga teksto.” Pagkatapos sang pila ka tion nga pag-upod sang utod sa pag-jogging, ang interes sang mag-asawa nagdugang, kag nasugdan ang regular nga pagtuon sa Biblia. Karon ang bana nangin di-bawtismado na nga manugbantala. Mapisan sia sa ministeryo sa latagon kag nagpalista sa Teokratikong Eskwelahan Para sa Ministeryo upod sa iya bata nga lalaki kag babayi.
OCEANIA
PUNGSOD 30
POPULASYON 37,545,115
MANUGBANTALA 97,329
PAGTUON SA BIBLIA 55,266
Australia
Ang isa ka payunir nga lalaki nagsulat: “Ang isa ka doktor nga si Pam nagpangabay nga magkadto ako sa ila kada may bag-o nga gua sang mga magasin. Masako sia katama, amo nga maabtan ko lang sia sa ila balay sing makaisa kada anom ka bulan, kag regular ko nga ginabilin ang mga magasin upod ang gamay nga sulat sa idalom sang ila puertahan. Pito ka bulan nga gintinguhaan ko nga maistorya sia, apang indi ko gid sia maabtan amo nga ginsuok ko na lang ang mga magasin sa idalom sang ila puertahan upod ang imbitasyon sa nagahilapit nga distrito nga kombension. Ginsulat ko man ang numero sang akon telepono apang wala gid sia nagtawag. Sang Nobiembre, pagkatapos sang kombension, nagkadto ako liwat sa ila balay kag nakita ko ang gamay nga sulat halin kay Pam sa idalom sang puertahan.
“Sa iya sulat, nagsiling si Pam nga nanamian gid sia sa mga magasin amo nga ginapabasa niya ini sa iya mga kaupod sa trabaho. Dayon, ginapabasa man nila ini sa ila mga pasyente sa ospital. Nagsiling man sia nga naluyagan gid niya ang ‘get-together.’ Nabasa niya ang imbitasyon sa kombension kag nagkuha sing tatlo ka adlaw nga bakasyon agod magtambong. Ginsiling niya nga ginpaseroks niya ang imbitasyon kag ginhatagan sing kopya ang iya mga kaupod sa trabaho upod ang gamay nga sulat nga tawgan nila sia kon interesado sila nga magtambong. Subong resulta, 16 ka kaupod niya sa trabaho—mga doktor tanan—ang nagkuha man sing tatlo ka adlaw nga bakasyon agod makatambong. Ining 17 tanan ka interesado nagtambong sa tatlo ka adlaw nga kombension bangod lamang sa isa ka imbitasyon nga ginsuok sa idalom sang puertahan! Si Pam regular na karon nga naga-tuon sa Ginatudlo Sang Biblia nga libro kag nag-organisar sia sing grupo nga pagbinagbinag sang Biblia sa tanan niya nga katrabaho nga nagtambong sa kombension.”
Ang isa pa ka utod nga lalaki nagsiling: “Samtang nagalabay ako sa isa ka balay diin gindumilian ang mga Saksi nga magduaw, nakita ko ang isa ka lalaki kag isa ka babayi sa may beranda nga nagapangasubo kag nagahibi. Indi ko mabatas nga maglabay lang nga indi sila mabuligan, amo nga ginpalapitan ko sila kag ginpamangkot kon may mabulig ako. Gin-agda ako sang mag-asawa nga magsulod sa ila balay kag ginsugid nila sa akon ang ila problema. Wala nila makita ang ila bata nga babayi sa sulod sang tatlo ka tuig. Ang asawa uloperahan sa iya kanser, kag indi niya masigurado kon magaayo pa sia. Nasubuan sia kay basi indi na niya makita liwat ang iya bata nga babayi. Pila ka adlaw antes sini, nangayo sila sing bulig sa pastor sang ila simbahan, apang ginbalewala lang sang pastor ang ila kahimtangan kag wala man sia sing ginhimo. Ginsugid ko sa ila ang ginsiling sang Biblia tuhoy kay Jehova, nga malapit sia sa mga tawo nga nagabatyag sing daku nga kasubo.
“Pagligad sang mga isa ka oras, may nagpanuktok sa puertahan. Abi ko anay ang pastor amo ang nagapanuktok. Apang, ang nagatindog sa puertahan amo ang isa ka babayi nga disente ang bayo. Sia amo ang anak nila nga babayi nga madugay na nila nga wala makita! Emosyonal katama ang ila pagkit-anay, amo nga nagsiling ako nga mahalin na lang anay ako. Apang, nagsiling ang ila anak nga babayi nga indi ako maghalin kay may isugid sia sa iya mga ginikanan. Ginpaathag niya nga naimpluwensiahan sia sa pag-inom sing alkoholiko nga ilimnon kag paggamit sing droga kag ginguba niya ang iya kabuhi. Apang ang isa ka pagtuon sa Biblia nagpahunahuna sa iya nga magpauli sa ila balay kag makig-upod liwat sa iya mga ginikanan. Sining karon lang, nabawtismuhan sia subong isa sang mga Saksi ni Jehova.”
Pagligad sang pila ka adlaw, nagkadto ang pastor sa ila kag ginsilingan sia sang mag-asawa nga nagpauli na ang ila anak nga babayi bangod isa na ini ka Saksi ni Jehova. Ang pastor naggua sa balay nga wala sing ginhambal. Sang manughalin na ang pastor, ginsilingan sia sang bana nga palihug dalhon ang sulat nga yara sa lamesa—isa ka sulat nga nagapahibalo nga indi na sila katapo sang simbahan.
Papua New Guinea
Ang isa ka grupo sang 23 ka utod nga lalaki kag babayi nag-organisar nga magpanaksi sa talagsa lang ginakadtuan nga teritoryo. Nagalakat lang sila pakadto sa teritoryo, kag mabudlay gid ini bangod kinahanglan pa sila magtaklad sa bukid kag magtabok sa mga suba. Sa isa ka minuro, naistorya sang isa ka utod nga babayi ang Anglikano nga ministro nga nalipay nga mabatian ang paathag sang Daniel 2:44. Nagsiling ang ministro sa utod, “Kaangay kami diri sang nadula nga mga karnero.” Ginbaton niya ang mga magasin kag mga brosyur kag nangabay sing isa ka Biblia.
Tatlo ka adlaw sang ulihi, sa isa pa ka minuro, gin-istorya sang duha ka utod nga babayi ang duha ka lamharon nga babayi, kag nalipay sila nga mabatian ang mensahe sang Ginharian. Sina nga hapon, sang nagpauli ang ila amay halin sa iya talamnan, ginsugid nila sa ila amay ang ila natun-an gikan sa Biblia. Ang ila amay nagsiling nga luyag man niya mabatian inang matahom nga mensahe. Nagpasugot sia nga makigkita sa tanan nga kauturan sa payag nga ginaistaran sang mga kauturan. Bangod ini nga tawo amo ang lider sang minuro, nagpaluto sia sing pagkaon kag ginpadala ini sa mga kauturan. Pagkagab-i, nag-abot sia nga may dala nga suga, kag upod niya ang iban pa nga mga pumuluyo sang minuro. Nagsiling sila, “Ginsorpresa n’yo gid kami, kay amo ini ang una nga tion nga nagkadto ang mga Saksi ni Jehova sa amon minuro.” Ginpakita sa ila ang Mateo 24:14 nga amo ang rason sang pagbisita sang mga kauturan. Ang mga pagpakamaayo sang Ginharian ginpaathag, kag ginbilinan sila sing mga literatura.
Sa ikalima nga adlaw sang ila pagbantala, mga ala-una sang hapon nag-abot ang mga kauturan sa isa ka minuro. Abi sang mga pumuluyo mapaligad pa sing gab-i ang mga kauturan, amo nga naghimo sila sing balay nga wala sing dingding agod matulugan sang mga kauturan. Apang, ginpaathag sang mga kauturan nga luyag nila maistorya ang tanan kag maghalin man dayon sina mismo nga adlaw. Napanaksihan sing maayo ang mga pumuluyo, lakip na ang lider, nga nagbaton sing mga literatura kag bi-lang kabaylo ginhatagan niya ang mga kauturan sing mga lubi, saging, kag kapayas.
Fiji
Sa isa ka nabaw-ing nga lugar, nagalakat lang ang mga payunir agod makabantala, nga nagalakbay sa mga dalan nga yab-ukon kag lutakon. Si Nagamma kag ang iya bata nga babayi nga si Reshma mga regular payunir. Gin-agda nila si Ushla, nga isa ka bulag nga utod nga babayi, nga mag-upod sa ila kag magpayunir sa sulod sang isa ka bulan. Agod mahimo ini, kinahanglan nila uyatan ang mga kamot ni Ushla samtang nagalakat sila sing madamo nga kilometro kada adlaw. Sa isa ka mapaang nga adlaw, ang isa ka pamilya nagapungko sa balkon sang ila balay sang nakita nila ang tatlo ka utod nga babayi nga nagapangita sing maagyan sa lutakon nga dalan. Dayon nakita nila nga naagsikan sing lutak ang tiil sang bulag nga utod bangod nakatapak ini sa danaw. Nagdulog ang duha ka utod agod trapuhan ang iya tiil. Gintawag sang amay sang pamilya ang mga utod kay may luyag sia hibaluon. Namangkot sia: “Kada adlaw makita namon nga nagalakat kamo nga tatlo. Diin kamo nagakadto?” Ginpaathag nila nga nagalakat sila agod magdumala sing pagtuon sa Biblia. Ang amay nagsabat nga luyag man niya mabatian ang mensahe nga ginadala nila sa iban, kay nahunahuna niya nga importante gid ini amo nga nagalakat pa ang mga utod sing malayo katama agod itudlo ini sa mga tawo! Nasugdan ang isa ka pagtuon sa sini nga pamilya.
Guam
Si Liza, isa ka lamharon nga babayi nga taga-Pilipinas, nag-obra subong kabulig sa isla sang Tinian. Pirme sia nagapangabay sing Lalantawan kag Magmata! nga mga magasin kon magkadto sa ila balay ang mga Saksi ni Jehova. Nagsiling sia nga nanamian sia sa mga magasin, apang ang matuod, ginapaamak lang niya ini.
Sang tigpamulak sang 2007, nadulaan sing trabaho si Liza, kag bangod wala sia sing maistaran, nagtulog sia sa baybay. Isa ka adlaw, naglabay sia sa isa ka Kingdom Hall, diin ang duha ka utod nga babayi nagapungko sa gua sa mahandong nga bahin. Gin-agda nila si Liza nga magkaon sing paho. Nagpasugot sia kag nag-istoryahanay sila sing mainabyanon. Pagkadason nga adlaw, sang naglabay liwat si Liza sa Kingdom Hall, ang duha ka utod nag-istorya liwat sa iya, kag samtang nagaistoryahanay sila, nagsiling sia, “Tani pila ka adlaw makasulod man ako sa inyo simbahan.” Bisan pa daw nagbatyag sing kahuya ang mga utod kay wala pa nila maagda si Liza, ginpalig-on nila sia nga magtambong sa miting sina mismo nga gab-i. Nagpasugot si Liza, kay nagalaum sia nga makabulig sa iya ang mga Saksi sa pagpangita sing trabaho.
Sa tion sang miting, nagdayaw si Liza sa pagkasinsero sang mga utod kag sa ila kabalaka sa mga tawo. Naghibi sia bangod sini, kay narealisar niya nga nagkadto sia sa miting bangod sa iya personal nga interes. Nadumduman man niya ang tanan nga magasin nga iya anay ginpaamak. Natandog sia sa gugma sang mga kauturan, amo nga sugod sadto, nagtambong sia sa tagsa ka miting kag nagtuon sa Biblia sing regular. Nakakita sia sing trabaho, nangin kalipikado subong isa ka manugbantala, kag nabawtismuhan sang Pebrero 2008.
[Retrato sa pahina 45]
Madalena
[Retrato sa pahina 48]
Makalilipay nga Pagtinuon sa “Ang Lalantawan” sa pumpboat
[Retrato sa pahina 50]
Si Sister Barker mapailubon nga nagahulat sa mga nagalabay agod iya bantalaan
[Retrato sa pahina 53]
Si Purnamaya samtang nagadugmok sang mga bato para himuon nga graba agod masuportahan ang iya pamilya
[Retrato sa pahina 54]
Pagpanaksi sa Indian nga babayi sa isa ka plantasyon sang rubber tree
[Retrato sa pahina 57]
Si Reston samtang nagahiwat sing pagtuon kay Andy
[Retrato sa pahina 58]
Si Shaé
[Retrato sa pahina 63]
Sanday Nagamma kag Reshma samtang ginabuligan si Ushla