Sulat Halin sa Nagadumala nga Hubon

Pinalangga nga mga Saksi ni Jehova:

Isa gid ka daku nga kalipay nga magsulat sa inyo, pinalangga nga mga kauturan! Nagabatyag kami kaangay ni apostol Juan, nga nagsiling nga ‘ginahigugma gid niya’ ang iya mga masigkatumuluo kag nalipay sia nga “nagalakat [sila] sa kamatuoran.” (2 Juan 1, 4) Isa gid ka daku nga pagpakamaayo para sa aton ang kamatuoran! Ang kamatuoran naghilway sa aton sa Babilonia nga Daku kag sa mga doktrina kag mga tradisyon sini nga nagapakahuya sa Dios. Bangod gintuman naton ang kamatuoran, nangin mahigugmaon, mainayuhon, kag maluluy-on kita nga mga tawo. Ang kamatuoran nagabulig man sa aton nga matigayon ang matinlo nga tindog sa atubangan sang Dios kag nagahatag sa aton sing paglaum nga mabuhi sing walay katapusan.

Nagapasalamat man kita tungod sa espiritu ni Jehova nga nagagiya kag nagapabakod sa aton kada adlaw! Pat-od nga nalipay gid kamo sang natun-an ninyo ang nanuhaytuhay nga aspekto sining mahigugmaon nga aman gikan kay Jehova sa bag-o lang natapos nga “Pagtuytoy sang Espiritu sang Dios” Distrito nga Kombension. Samtang nagalala ang kahimtangan sa kalibutan, importante gid nga magsandig kita sa gamhanan nga espiritu ni Jehova sa pagtuytoy sa aton sa mabudlay nga mga tion sa palaabuton.

Sigurado nga natandog gid ang inyo tagipusuon sa pagbasa sa makakulunyag nga mga kasaysayan sa Tuigan nga Libro tuhoy sa aton mga kauturan nga nagbatas sang tuman  nga pag-antos tungod sa ila pagtuo. Kag makapalig-on gid nga madamo sa sining mga matutom ang bag-o lang nabawtismuhan ukon wala pa mabawtismuhan sang nag-utwas ang mga kabudlayan. Palangga gid naton sila bangod sa ila pagkamainunungon kag pagpanindugan sa pagkamatarong! Ang ila dalayawon nga halimbawa nagapalig-on sa aton nga padayon nga mangin mainunungon sa Ginharian bisan ano pa nga kabudlayan ang aton maatubang.—1 Tes. 1:6-8.

Nahibaluan namon pinalangga nga mga kauturan, nga madamo kamo sing ginaatubang nga mga problema sa pinansial kag sa iban pa nga bahin sang kabuhi samtang ginahuptan ninyo ang inyo pamilya nga nahiusa sa gugma. Ang pila sa inyo nabudlayan sa pagpakigbahin sing regular sa pagbantala sang Ginharian kag sa pagtambong sa mga miting. Amo sina ang rason kon ngaa pagkatapos sang madamo nga paghinun-anon kag pangamuyo, naghimo kami sing pila ka pagbag-o sa mga miting sang kongregasyon sugod sa Enero 1, 2009. Nagasalig kami nga panginpuslan ninyo sing maayo ining mga kahimusan paagi sa paghinguyang sang dugang pa nga tion sa personal kag pangpamilya nga pagtuon.

Isa gid ka matuod nga kalipay nga makita sa nanuhaytuhay nga mga asambleya kag mga kombension ang madamo nga nangin kalipikado sa bawtismo sa sini nga tuig. Madamo sa ila ang lamharon pa. Mga ginikanan, luyag gid namon kamo hatagan sing komendasyon bangod sa pagpadaku ninyo sa inyo kabataan nga may apresasyon sa kamatuoran kag sa pagpalig-on sa ila nga magdedikar agod alagaron si Jehova samtang bata pa. Ining pinalangga nga kabataan nagaatubang sing madamo nga hangkat sa eskwelahan apang nangin kalipikado sa bawtismo. Ginapakita sini nga maayo ang paghanas nga nabaton nila sa ila puluy-an.—Sal. 128:1-6.

 Talalupangdon man ang daku nga pag-uswag sa kadamuon sang mga pagtuon sa Biblia. Daku gid ang naamot sang mapisan nga mga misyonero kag mga espesyal payunir sa sini. Tanan kami nga katapo sang Nagadumala nga Hubon nagapabalor gid sa importante nga papel sang aton mga kauturan sa bug-os nga kalibutan sa pagsiling sing “Kari!” sa mga bunayag sing tagipusuon, agod agdahon ang tanan nga nauhaw nga “magkuha sang tubig sang kabuhi nga wala sing bayad.” (Bug. 22:17) Ginaabiabi naton sa aton bug-os kalibutan nga paghiliutod ang 289,678 nga nagsimbulo sang ila dedikasyon paagi sa pagbawtismo sa tubig sang nagligad nga tuig!

Maayo gid nga pahanumdumon naton pirme ang aton kaugalingon sa ginsiling ni apostol Juan: “Ang kalibutan nagataliwan kag amo man ang kailigbon sini, apang sia nga nagahimo sang kabubut-on sang Dios nagapabilin sing dayon.” (1 Juan 2:17) Kag hunahunaa lamang nga malapit na kita katama sa tion sang ‘pagtaliwan’ sini nga kalibutan! Maalamon gid nga isentro naton ang aton kabuhi sa paghimo sang kabubut-on sang Dios kag sa ‘pagpadayon sa pagbantay.’ (Mat. 24:42) Indi gid naton ini paghinulsulan kag magaani kita sang mga benepisyo sang mahigugmaon nga kaayo ni Jehova.—Isa. 63:7.

Nagalaum kami nga ang makapahulag nga mga kasaysayan sa madamo nga kadutaan nga mabasa sa sining Tuigan nga Libro magapalig-on sa inyo tanan nga unahon ang mga intereses sang Ginharian sa inyo kabuhi. Ginapasalig namon sa inyo nga pirme namon kamo ginadumdom kag ginapangamuyo bangod palangga gid namon kamo. Kabay nga pakamaayuhon kamo ni Jehova sing bugana.

Ang inyo kauturan,

Nagadumala nga Hubon sang mga Saksi ni Jehova