Pagbantala kag Pagpanudlo sa Bug-os nga Duta

APRIKA

PUNGSOD 57

POPULASYON 878,000,158

MANUGBANTALA 1,171,674

PAGTUON SA BIBLIA 2,382,709

Benin

Si Claude kag ang iya asawa nga si Marie-Claire makugi nga mga misyonero sa sulod sang 27 ka tuig. Sang Pebrero, nakadanlog si Marie-Claire kag nabalian ang iya tiil. Pagligad sang duha ka semana, samtang nagatrabaho si Claude sa puluy-an misyonero, nahulog sia kag nabalian ang iya tiil. Pareho nga ginsemento ang ila tiil, kay Marie-Claire sa tuo kag kay Claude naman sa wala. Nagsiling si Claude, “Ano abi kay nanamian kami mag-updanay pirme sa pagtrabaho!”

Makahulaghulag pa si Claude, pero si Marie-Claire kinahanglan gid magtener sa puluy-an sa sulod sang pila ka semana. Bisan pa nadumalahan ni Marie-Claire sa puluy-an misyonero ang 4 sa iya 12 ka ginatun-an sa Biblia, wala sia nakapakigbahin sa iban nga porma sang pagministeryo. Gani nagdesisyon sia nga magpungko sa tupad sang isa ka lamesa nga puno sang  publikasyon sa atubangan sang puluy-an misyonero kag istoryahon ang mga nagalabay. Sang Marso, nakahinguyang sia sing 83 ka oras. Ginpakamaayo bala ini Jehova? Sa sina nga bulan nakapahamtang sia sing 14 ka libro, 452 ka brosyur, 290 ka magasin, kag kapin sa 500 ka tract.

Etiopia

Si Arega, nga nagapuyo sa isa ka nabaw-ing nga baryo nagdesisyon nga butangan sing wallpaper ang iya balay. Bisan pa ang iban nga tawo sa ila lugar nagagamit sing mga pamantalaan para sa sini, luyag niya magbutang sing matahom nga wallpaper. Nakita niya ang isa ka tawo sa merkado nga nagatanyag sing brosyur nga Aguma ang Kabuhi sa Duta sing Dayon! Nagkuha si Arega sini, apang wala niya ini ginbasa. Ginpaksi niya ang mga panid sini kag ginpatapik sa dingding sang iya balay. Pagligad sang duha ka tuig, natalupangdan niya sa “wallpaper” ang dinalan nga: “Si Jesus Anak sang Dios.” Tuhay gid ini sa Trinidad nga gintudlo sa iya. Bangod napukaw ang iya interes, naglakat si Arega sing siam ka oras pakadto sa pinakamalapit nga banwa agod pangitaon ang mga tawo nga nagasiling nga may Anak ang Dios. Wala sia nagmadinalag-on sa una nga higayon, kag nagpauli sia nga masinulub-on. Sang ulihi, ginpangita niya sila liwat, kag sa sina nga tion gintudlo sia sang mga tawo sa balay sang utod nga ginkuhaan niya sing brosyur. Natilawan pa gid ang determinasyon ni Arega bangod kinahanglan niya maghulat sing pila ka oras tubtob nga makapauli ang utod. Ang ila paghinun-anon nagdul-ong sa isa ka pagtuon sa Biblia. Sa masunod nga mga binulan, naglakbay sing madamo nga beses si Arega pakadto sa banwa agod makakuha sing sibu nga ihibalo parte sa Dios. Sang ginsugid niya ang iya natun-an sa iban nga tawo sa ila baryo, madamo ang nagpamatok kag naglikaw sa iya. Apang wala sia nag-untat, kag ang iban nangin interesado. Sang naglab-ot sa 13 ka tawo ang interesado, duha ka espesyal payunir ang gin-asayn sa sini nga lugar. Sang ulihi, nakadumala sila sing kapin sa 40 ka pagtuon sa Biblia, kag mga 40 man ang nagatambong sa mga miting. Walo ka lokal nga manugbantala ang aktibo karon sa sini nga lugar. Para sa aton bag-o nga  utod nga si Arega, ang mga laragway sa iya wallpaper indi lamang isa ka matahom nga dekorasyon.

Ghana

Ang madasig nga pagdamo sang cellphone sa Aprika nagresulta sing daku nga pagbag-o sa komunikasyon. Gani madamo nga kompanya ang nagatanyag sing promo para sa ila mga subscriber. Mahimo sila makatawag sing libre sa pinili nga mga tion sa gab-i. Ginhimuslan ini sang utod nga si Grace. Nabudlayan sia nga tun-an ang iya estudyante sa Biblia nga si Monica bangod masako ini pirme. Ginhimo na ni Grace ang tanan niya nga masarangan agod mapadayon ang ila pagtuon, lakip na ang pagkadto sa balay ni Monica sa alas singko sang aga. Apang nagbag-o ang iskedyul ni Monica, kag bisan ini nga tion indi man praktikal sa ila. Gani, nahunahunaan ni Grace nga kalitan ang promo. Nagpasugot si Monica, kag ginhimos nila ang pagtuon paagi sa cellphone sa alas kuatro sang aga. Apang nalugaw-an sila bangod madamo ang nagatawganay amo nga masako ang linya. Gani, nagplano sila nga magbugtaw sing mas aga pa agod makatuon sila sa alas tres, bisan pa mabudlay ini para sa ila subong nagatrabaho nga mga iloy. Nagsiling si Grace: “Nangamuyo ako kay Jehova kag nangayo sing kusog kag  determinasyon agod matatap ko ang interes sang akon estudyante sa Biblia. Gindisiplina ko ang akon kaugalingon nga magbugtaw sa tion nga mag-alarm ang akon cellphone. Bisan pa ginakapoy gid ako, wala ko ini gintugutan nga magpaluya sa akon.” Nalipay gid sia sa iya mga panikasog samtang ginasaksihan niya ang bawtismo ni Monica sang 2008 sa “Pagtuytoy sang Espiritu sang Dios” Distrito nga Kombension! Sining karon lang, ginakalitan gihapon ni Grace ini nga promo agod tun-an ang isa ka babayi nga nagatambong na karon sa mga miting.

Mozambique

Sang Agosto 2008, nahulog ang isa ka dyaket gikan sa naglabay nga salakyan kag nagtupa malapit sa payag nga human sa daga sang isa ka imol kag balo nga utod nga babayi. Ginpulot sang utod ang dyaket kag nasapwan nga nagaunod ini sing mga papeles, tatlo ka puyopuyo sang malahalon nga alahas, kag kuarta nga halos isa ka libo ka dolyar. Ginpilit niya ang isa ka tawo sa ila lugar nga tawgan ang numero nga nasulat sa mga papeles agod ipahibalo nga nasapwan niya ang dyaket. Sina nga gab-i, nag-abot ang apat ka lalaki sakay sa isa ka kotse. Sa atubangan sang mga opisyales sang baryo, gin-uli sang utod ang dyaket sa tag-iya nga wala sing buhin. Naghibi ang tag-iya kag nagsiling nga kon indi Saksi ni Jehova ang nakapulot sini, basi indi na ini mauli sa iya. Bisan pa imol ang aton matutom nga utod, nakahatag sia sing panaksi sa ila lugar, nga nagresulta sing daku nga kadayawan sa ngalan ni Jehova nga iya Dios.

 AMERIKA

PUNGSOD 55

POPULASYON 910,761,124

MANUGBANTALA 3,575,123

PAGTUON SA BIBLIA 3,778,321

Barbados

Nasapwan sang madamo nga ginikanan ang kapuslanan sa pagtudlo sa ila kabataan sa pagsaulo sang mga teksto sa Biblia. Nalipay gid ang isa ka pamilya sa Grenada sang nahibaluan nila kon paano ang ila seis anyos nga bata nga lalaki naggamit sang isa ka teksto sa Biblia sa pagpamatuod sang kamatuoran nga si Jehova amo ang Labing Gamhanan. Nagsulat ang amay sang bata: “Isa ka hapon, sang ginsugat sang akon asawa nga si Laura ang amon bata nga si Stefan sa eskwelahan, gintawag sia sang maestra ni Stefan kag ginsilingan: ‘Dayaw gid ako sa inyo bata. Bisan pa wala ako nagapati sa inyo ginatuuhan, nagdayaw gid ako sa iya bangod napaathag niya sing maayo ang iya mga ginatuuhan.’

“Sang nakapauli na sila, malangkagon nga ginpamangkot sang akon asawa si Stefan kon ano ang natabo sa eskwelahan ngaa gindayaw sia sang iya maestra. Ginsaysay niya gilayon nga sa una nga klase sa eskwelahan, nagsiling ang maestra nga ‘si Jesus Dios.’

“Nagbayaw gilayon si Stefan, kag sang gintukso, nagsiling sia: ‘Indi, Mam. Indi Dios si Jesus. Nagsiling ang Biblia nga si Jesus Anak ni Jehova, gani imposible nga sia si Jehova.’

“Nagsabat ang maestra: ‘Para sa akon si Jesus amo man na si Jehova.’

“Nian nagsiling si Stefan: ‘Pero nagsiling ang Biblia nga si Jehova lamang ang Labing Mataas, indi si Jesus. Si  Jehova lamang ang Labing Mataas.’ Ginkutlo niya ini sa Salmo 83:18, ang teksto nga amon bag-o lang gintudlo sa iya nga sauluhon kag hangpon. Bisan pa sinsero ang maestra, wala sia sing padaug sa seis anyos nga bata nga nasangkapan sing sibu nga ihibalo sa Kasulatan.”

Ecuador

Nagsakay sa bus ang pila ka utod halin sa pagbantala sa kaumhan sa mga tawo nga nagahambal sing Quichua. Bangod may video player sa bus, nangayo sila sing permiso nga ipasalida ang video sa Quichua parte kanday Noe kag David para matan-aw sang madamo nga pasahero nga nagahambal sing Quichua. Nakibot gid ang mga pasahero sang mabatian nila nga Quichua ang ginagamit nga lenguahe sa video! Atentibo gid sila katama, amo nga kon may magsakay gani nga pasahero, ginapapungko nila ini gilayon agod wala sila sing may mawasi nga eksena. Pagkatapos sang salida, madamo ang nag-order sang video. May mga pamangkot pa gani parte sa Biblia ang pila ka pasahero  kag luyag nila makatigayon sing mga literatura. Ginhatag man sang iban ang ila ngalan kag adres agod may magduaw sa ila sa siudad, kag nakabaton ang tanan sing imbitasyon para sa Memoryal sa Quichua nga lenguahe. Isa gid ini sa mga rason kon ngaa madamo ang nagtambong sa Memoryal sa sini nga lugar.

Mexico

Samtang nagabantala sa pamalay, ang isa ka payunir nga utod nga lalaki nga si Gabino nanuktok sa isa ka balay. Wala sing may nagsabat. Nanuktok sia liwat, kag nian nanuktok sa ikatlo nga higayon. Pagkatapos, nagdulog sia sing makadali, kag nian nanuktok liwat sa ikap-at nga higayon. Nagbukas ang puertahan, kag nakita niya nga nagatindog ang isa ka masinulub-on nga tawo nga nagahibi. Ginpasulod niya gilayon si Gabino pero indi sia makahambal bangod sang tuman nga kasubo. Ginlugpayan sia ni Gabino paagi sa pagsugid sang maayong balita, kag nauluumpawan ang tawo. “Nakita mo bala ang siya nga ina?” pamangkot sang tawo. “Sang nanuktok ka sa ikatlo nga higayon, nagatindog na ako dira. Nakita mo bala inang nabitay nga lubid? Sang nanuktok ka sa ikap-at nga higayon, nabutang ko na ina sa akon liog. Pero ginhukas ko anay agod buksan ang puertahan. Salamat kay sige ang imo panuktok, kay kon wala, nagabitay na ako dira subong.” Nagpaathag sia nga nabudlayan na gid sia sa iya problema sa iya asawa. Nasugdan ni Gabino ang pagtuon sa Biblia sa iya. Sa masami, ini nga payunir nagapanuktok sing  makaisa ukon makaduha lang. Pero sa sini nga higayon, ang iya padayon nga pagpanuktok, nga ayhan gintuytuyan sang anghel, nagresulta sing maayo.

Chile

Sa tion sang kampanya sa pag-imbitar sang mga interesado sa Memoryal, nagpalapit ang isa ka bata nga babayi sa isa ka Saksi kag namangkot, “Pila na edad mo ’Nang?” Nagsabat ang medyo natingala nga utod, “Kag ikaw, pila edad mo?” Nagsabat ang bata nga seis anyos sia kag may sulat ang iya iloy nga ginapahatag sa isa sang mga Saksi ni Jehova. Ginsilingan ang bata sang iya iloy nga mangita sing isa ka Saksi nga indi bata kag indi man tigulang. Gani ginsugiran sang utod ang bata nga 25 anyos sia. Ginhatag sang bata sa iya ang sulat. Ini nagasiling: “Sang nagbisita kamo sa akon balay, nahadlok ako magbukas sang puertahan. May malala ako nga depresyon kag nagapangabay sa Dios nga buligan ako. Gintilawan ko man nga mamati sa inyo mensahe kag magbasa sing Biblia, pero nabudlayan gid ako. Gusto ko magpabulig sa pagtuon sa Biblia sa isa nga makabulig sa akon sa amon pagbulagay sang akon bana. Kon mabuligan ninyo ako, palihug kadtui ninyo ako sa amon balay karon sa hapon, bangod nagahigda ako sini nga aga. Madamo gid nga salamat.”

Sa sina nga hapon, ginkadtuan sang utod ang babayi kag gin-imbitar sia nga magtambong sa Memoryal kag sa pinasahi nga pamulongpulong, nga nakapaumpaw gid sa iya. Sugod sadto, padayon sia nga nakabenepisyo sa regular  nga pagtambong sa mga miting kag maayo ang iya pag-uswag sa iya pagtuon sa Biblia paagi sa libro nga Ano Gid ang Ginatudlo Sang Biblia? Kag kamusta ang iya seis anyos nga bata? Sia kag ang iya 12-anyos nga magulang nga babayi ginatun-an man sa Biblia.

Puerto Rico

Nagsulat ang isa ka utod nga babayi: “Nagatanyag ako sing mga magasin sa higad sang dalan sang nakita ko ang isa ka lamharon nga babayi nga nagapahangin sang iya salakyan. Nagpalapit ako, pero antes pa ako makahambal, nangayo sia sing Ang Lalantawan kag Magmata! nga nagasiling nga nanamian gid sia sa pagbasa sini. Gintanyagan ko sia sing pagtuon sa Biblia sa ila balay, pero ginbalibaran niya ini bangod nagaistar sia sa ikaduha nga panalgan sang balay sang iya iloy nga grabe gid ang pagpamatok sa aton hilikuton. Sang ginpangayo ko ang iya adres, ngalan lang sang kalye ang iya ginhatag. Isa ka bes, ginkadtuan ko ang kalye kag nagtinguha nga pangitaon sia, pero wala ko matultulan ang ila balay. Nian, isa ka adlaw, nagbalik ako sa sini nga kalye kag namangkot sa mga tawo sa palibot kon may kilala sila nga Nancy, nga may duha ka gamay nga bata nga babayi. Nalipay gid ako, kay nahibaluan ko na ang iya adres. Pero, indi ko sia gihapon maabtan sa ila balay, amo nga ginabilinan ko sia sang mga magasin kag malip-ot nga sulat. Sang nagkitaay kami, naghibi sia kag nagsiling nga luyag niya magtambong sa Kingdom Hall. Nagtambong sia kag nalipay sa gugma sa tunga sang mga kauturan. Ginsugiran niya ako nga indi sia makasabat sa akon sulat bangod gingisi sang iya iloy ang mga magasin kag ang akon sulat nga ginbilin antes pa sia makapauli. Ginsugdan namon ang pagtuon sa Biblia sa balay sang iya magulang nga babayi, kag wala magdugay, regular na nga nagatambong si Nancy sa mga miting. Subong, wala gid sia nagapalya sa pagtambong sa mga miting. Nagpalista na sia sa Teokratikong Eskwelahan Para sa Ministeryo, kag makalilipay gid nga mabatian sila sang iya duha ka gamay nga kabataan nga nagapakigbahin sa mga miting.

 ASIA KAG NATUNG-AN NGA SIDLANGAN

PUNGSOD 47

POPULASYON 4,073,556,172

MANUGBANTALA 635,896

PAGTUON SA BIBLIA 579,554

South Korea

Ang isa ka tawo nga nagaistar malapit sa Kingdom Hall nakakita sing isa ka malip-ot nga sulat sa iya kotse, nga naparking sa atubang sang iya balay. Mabasa ini: “Nagasgasan ko ang imo salakyan sang nagparking ako. Palihug tawgi ako, kay ako na lang ang mapakay-o.” Bangod naobserbahan niya ang maayo nga paggawi sang mga Saksi nga nagatambong sa tilipunan malapit sa ila, nakamuno ang tawo, ‘Sigurado gid ako nga Saksi ni Jehova ini sia.’

Ang utod nga si Su-yeon amo ang nagbilin sang sulat, kag sang gintawgan sia sang tawo, nangayo sia sing pasaylo kag nagtanyag liwat nga ipakay-o niya ang kotse. Nakibot gid si Su-yeon sang namangkot ang tawo, “Labay pa akon, Saksi ka ni Jehova?” Ginsilingan sia sang tawo nga sia na lang ang bahala sa salakyan kag indi na magkabalaka ang utod! Nagsiling pa gid sia nga gusto niya nga magkitaay sila, bangod may mga butang nga luyag niya mahibaluan parte sa mga Saksi. Gin-updan si Su-yeon sang iya tatay kag sang isa ka utod nga lalaki sa pagpakigkita sa tawo. “Nakaobserbar ako sa mga Saksi,” siling sang tawo, “kay malapit lang ang akon ginaistaran sa Kingdom Hall. Maayo kamo nga mga tawo. Indi ko mahangpan kon ngaa ginakaugtan kamo.” Gamit ang Biblia kag ang libro nga Ano Gid ang Ginatudlo Sang Biblia? nasabat sang tatay ni Su-yeon ang madamo nga pamangkot sang tawo. Ginatun-an karon sang tatay ni Su-yeon ang tawo kag nagauswag na sia sa espirituwal.

 Mga pungsod nga ginadumilian ang hilikuton

Nagdayaw gid ang isa ka koronel sang soldado sa maayo nga epekto sang kamatuoran sa iya asawa, nga nagatuon sa mga Saksi ni Jehova. Bangod sini, nagpasugot sia nga magtuon sa Biblia. Nahibaluan ini sang iya opisyal, nga isa ka heneral, kag ginpatawag sia agod istoryahon. Ginsilingan sia sang heneral nga kon indi sia mag-untat sa pagpakigsugilanon sa mga Saksi ni Jehova, ipadala sia sa pinakaligwin nga bahin sang pungsod. Maisugon nga nagsabat ang koronel nga madugay na nga nagatuon sa Biblia ang iya asawa, kag wala sia sing nakita nga katalagman sa sini. Gani, indi sia mag-untat sa pagtuon sa Biblia. Pagligad sang pila ka tion, nagdesisyon sia nga mahalin sa pagkasoldado. Bawtismado na sia nga Saksi karon kag nagaalagad subong regular payunir kag ministeryal nga alagad. Ang maayo kay ang asawa sang heneral nga iya nasugilanon nagtuon man sa Biblia. Wala sia napunggan sang heneral. Sa karon, nagaalagad man subong regular payunir ang asawa sang heneral.

Sa isa pa ka pungsod, nasugdan sang utod nga babayi ang isa ka pagtuon sa Biblia sa isa ka lamharon nga babayi nga ginapamatukan gid sang iya bana. Bangod indi puede hiwaton ang pagtuon sa balay sang babayi, ginhiwat nila ang pagtuon sa isa ka gamay nga parke. Sa tion sang ila pagtuon, ang isa ka tigulang nga lalaki nga nagapamasyar sa parke naglibotlibot sa ila, nga nagapanilag kag nagapamati sa ila pag-istoryahanay. Isa ka adlaw, ginpalapitan sila sang lalaki kag nagpautwas sing pila ka pamangkot parte sa Biblia. Pagkasunod nga adlaw, amo gihapon ang iya ginhimo. Medyo nairitar ang babayi nga nagatuon kag nagsiling, “Isa lang ka oras ang pagtuon ko sa Biblia, kag ginaagaw mo pa paagi sa pagpautwas sing madamo nga pamangkot.” Pagkatapos sini, ginhimos sang utod nga matun-an sang isa ka utod nga lalaki ang tigulang. Madasig nga nag-uswag ang lalaki kag nagatambong na sia sa mga miting. Kada Domingo, natalupangdan sia sang duha ka babayi nga iya kaingod  nga nagalakat nga disente ang pamayo kag may bitbit nga briefcase. Luyag nila mahibaluan kon sa diin sia nagakadto kag natukiban nila nga nagatuo sia sa isa ka “bag-o nga relihion.” Nagdesisyon sila nga usisaon ini, kag ginsundan nila ang lalaki sa Kingdom Hall. Gin-istorya sila sang pila ka utod nga babayi, kag ginpamangkot kon gusto nila magtuon sa Biblia. Nagpasugot ang isa sa ila. Ining tatlo ka tawo—ang lamharon nga babayi nga nagtuon sa parke, ang lalaki nga ila nasugilanon sa parke, kag ang babayi nga nagsunod sa lalaki—nag-uswag gid sa espirituwal kag nabawtismuhan sining karon lang.

Cambodia

Ang isa ka payunir nga si Louy, pirme nga nagabisikleta pakadto sa isa ka baryo nga ang mga pamalay human sa kawayan. Nagadumala sia diri sing mga pagtuon sa Biblia. Tatlo ka adlaw antes sang Memoryal, sang yara sia sa sini nga baryo nga nagapaathag sang katuyuan sang Memoryal sa iya mga estudyante sa Biblia, gintumpukan sia sang mausisaon nga mga kabataan nga nagpinamangkot sa iya. Amat-amat nga nagadamo ang kabataan. Nakapanagtag si Louy sing 57 ka imbitasyon sa Memoryal. Pagkasunod nga adlaw, nagbisikleta liwat si Louy pakadto diri agod tun-an ang isa pa niya ka estudyante sa Biblia, kag nagsiling ang iya estudyante nga luyag man magtambong ang iya mga paryente kag mga abyan. Gani, ginbilinan ni Louy sing 20 ka imbitasyon ang iya estudyante agod ipanagtag. Nabalaka karon si Louy kon paano niya mabuligan ining tanan nga tawo nga makatambong sa Memoryal. Pagkatapos sang iya pangamuyo, ginsugid niya ini sa amay sang isa sang iya estudyante sa Biblia, nga amo ang lider sang baryo. Ginpasalig niya si Louy nga kon makakuha sia sing bisan isa lang ka tuk-tuk (salakyan nga ginaguyod sang motor kag mahimo masakyan sang apat ka tawo) agod sakyan nila, mahimo makatambong ang tanan bangod puede sila magtindog ukon magsabakanay. Nalipay gid si Louy nga makita ang 18 nga nagtambong gikan sa sini nga baryo.

 India

Ang isa ka utod nga nagadrayb sang isa ka de-makina nga rickshaw nakahigayon sa pagpanaksi sa iya pasahero nga isa ka dyurnalista. Nagdayaw ang dyurnalista sa iya kaisog, bangod ang pila sa mga Saksi sa sina nga lugar ginaatake sang mga manugpamatok samtang nagabantala. Nagdesisyon ang dyurnalista nga isulat ang ila pag-istoryahanay sa isa ka pamantalaan nga may sirkulasyon sa bug-os nga pungsod. Nagsulat sia: “Gintilawan ko kon ano ang matabo kon medyo paakigon ko ang drayber sa pagsiling: ‘Wala mo bala nabatian ang balita sini nga adlaw? Ginakastigo ang imo mga kaupod kag ginaatake kamo sang mga relihion sa iban nga bahin sang pungsod?’ Nagsiling sia, ‘Huo, nabasahan ko ina sa pamantalaan subong nga adlaw.’ ‘Ti, ano ang himuon mo kon padayon ka nga tublagon [sang mga manugpamatok]?’ Naglungolungo sia nga  nagasiling: ‘Wala kaso. Mapadayon gihapon kami sa pagpati [sa kamatuoran].’”

Nagalaragway sang tract nga ginhatag sa iya sang Saksi, sia nagsulat: “Pag-abot ko sa balay, ginkuha ko sa bag ang pampleta nga iya ginhatag. May retrato ini sang isa ka imposible apang matahom nga danyag nga may berde nga kahilamnan, isa ka linaw, nagapamulak nga mga kahoy, mga tawo nga nagapangani sing uyas kag mga prutas, kag mga bukid nga nakulapan sang niebe. ‘Kabuhi sa isa ka mahidaiton nga bag-ong kalibutan,’ siling diri. Relihioso ang kaundan sini. Kon hatagan ka sing isa ka pampleta parte sa isa ka balaligyaan sang mga bayo ukon pamaagi sang pagkabuhi, kinaandan na nga ginabaton ini. Pero kon mag-istorya ka gani parte sa mahidaiton nga bag-ong kalibutan, mahimo ka kaugtan sang mga tawo.”

Pilipinas

Sa isa ka lugar sa Zamboanga, may isa ka mataas nga bukid nga ang putukputukan sini makita bisan sa 200 kilometros nga kalayuon. Masami nga nagalahog ang mga kauturan nga nagaistar malapit sa sini nga bukid samtang nagabantala sila, nga nagasiling, “Ano abi kon may interesado nga nagaistar sa putukputukan sina nga bukid?” Isa ka adlaw, samtang nagabantala sila sa tiilan sang bukid, may tawo nga nagpalapit sa ila nga nagasiling nga ginapangita niya ang mga Saksi ni Jehova. Nagsiling sia nga luyag niya magpabulig sa ila sa pagtuon sa Biblia. Namangkot ang mga utod kon diin sia nagaistar. Sang gintudlo niya ang putukputukan sang bukid, wala makatingog ang mga utod. Nagpaathag ang tawo nga ang iya balay indi sa putukputukan kundi sa likod pa sang bukid. Agod makalab-ot sa iya balay, kinahanglan anay nila mag-agi sa putukputukan. Sang naumpawan sila sa ila kakibot, nagpasugot ang mga utod. Nasugdan ang pagtuon sa Biblia, kag karon nagatambong na ini nga tawo sa mga miting sa Kingdom Hall, bisan pa nga puerte ini kalayo sa ila balay. Ini nga tawo nalakip na sa katawhan sang kapungsuran nga nagadugok sa “bukid sang balay sang GINOO.”—Isa. 2:2.

 EUROPA

PUNGSOD 47

POPULASYON 736,988,468

MANUGBANTALA 1,563,910

PAGTUON SA BIBLIA 819,067

Finland

Duha ka utod nga lalaki ang nagatanyag sing pagtuon sa Biblia sa ila pagpamalaybalay nga nagagamit sing tract nga Luyag Mo Bala Mahibaluan ang Kamatuoran? May isa ka tawo nga nagbukas sang puertahan. Wala pa sila nakatapos sa ila inughambal, ginpasulod sila sang tawo. “Madamo ako sing ipamangkot,” siling niya. “Ngaa karon lang kamo?”

Nagsiling ang mga utod: “Diri karon ang teritoryo sang amon kongregasyon.”

Nagsabat ang tawo: “Madugay na ako nga nagapangamuyo nga kuntani may Saksi ni Jehova nga magduaw sa akon. Kinaandan na nga sa sini nga oras nagadyaging ako, pero subong wala ako ka dyaging. Kag karon nakaduaw kamo!” Nagpati ang tawo nga sabat ini sa iya pangamuyo. Sa ila ulubrahan, masami nga negatibo ang ginaistorya sang mga tawo parte sa mga Saksi ni Jehova. Bangod luyag niya mahibaluan kon ano gid bala ang kamatuoran, nagpanalawsaw sia sa librarya. Nasapwan niya ang libro nga Jehovah’s Witnesses—Proclaimers of God’s Kingdom. Ginbasa niya ini, kag narealisar niya nga indi matuod ang ila mga akusasyon. Gani, luyag gid niya masugilanon ang mga Saksi ni Jehova. Nasugdan ang pagtuon, kag nagtambong sia gilayon sa aton mga miting. Ginpanaksihan niya ang iya asawa sang una kag ang ila bata nga babayi, kag nagtuon man sila.

 Britain

Ang regular payunir nga si Kirsty nagtuon sing French kag Lingala agod makapanaksi sa mga Congolese sa ila teritoryo. Isa ka adlaw, nakita niya ang isa ka babayi nga Congolese nga nabudlayan sa pagsakay sa bus bangod madamo sia sing dala. Gintanyagan sia ni Kirsty sing bulig, nga nagahambal sa Lingala. “Ngaa kabalo ka sing Lingala kay puti ka man?” pamangkot sang babayi. Nagsiling si Kirsty nga nagatambong sia sa kongregasyon nga Lingala kag ginatudluan sia sang mga Saksi nga Congolese agod mapaambit niya sa mga tawo ang mensahe sa Biblia. Luyag sia tanyagan ni Kirsty sing pagtuon sa Biblia, gani nagsakay na lang sia sa bus tubtob nga makalab-ot sa destinasyon sang babayi. Ginbitbit ni Kirsty ang mga dala sang babayi tubtob sa ikatlo nga panalgan sang  apartment. Ginpasulod sia sang bana sang babayi kag sang ila apat ka bata, kag ginpakita niya sa pamilya kon paano tun-an ang Biblia paagi sa libro nga Ano Gid ang Ginatudlo Sang Biblia? Ang babayi kag ang iya duha ka bata nga lalaki nga mas magulang, nagatuon na karon sa Biblia. Nagapanikasog sila nga tatlo sa pagpahamuot kay Jehova.

Georgia

Nagdesisyon ang duha ka pamatan-on nga payunir nga masaylo sa mabukid nga bahin sang pungsod nga may diutay lang nga Saksi. Ginsugdan nila ang pagpanaksi sa mga baryo, kag maayo ang resulta sini. Nakapanagtag sila sing ginatos ka literatura kag nakasugod sing madamo nga pagtuon sa Biblia. Sang nagpanaksi ang mga utod sa kabukiran, diutay lang ang ila dala nga mga kinahanglanon, kag wala sila makahibalo kon diin sila matulog. Apang naaman pirme ang ila mga kinahanglanon. Ginapatulog sila sang mga tawo sa ila mga balay kag ginapakaon. Kon kaisa, bisan ang mga tawo nga indi mamati sa ila mensahe nagaagda sa ila nga magtulog sa ila balay kag ginapakaon pa sila. Sang ulihi, gin-asayn ining duha ka utod subong espesyal payunir sa sini nga teritoryo. Bangod madamo sila sing ginatun-an sa Biblia, nagabaton lang sila sing pagtuon kon masarangan nila ini tatapon. Indi man kinaandan nga may magpalapit sa ila sa dalan para mangabay sing pagtuon sa Biblia, kag bisan ginakontrol nila ang kadamuon sang ila ginatun-an, ang tagsa ka utod nagadumala sing kapin sa 20 ka pagtuon sa Biblia kada bulan.

Hungary

Ang utod nga babayi regular nga nagabaton sing pila ka botelya nga gatas. Ginabutang ini sang nagadul-ong sa isa ka plastik bag nga nabitay sa ila kudal. Isa ka adlaw, sang ginbalik niya ang basiyo sang gatas sa bag, ginlakipan niya ini sang tract nga Luyag Mo Bala Mahibaluan ang Kamatuoran? Nakibot sia kay sang masunod nga pagdul-ong sang preska nga gatas, naglakip ang  babayi nga nagadul-ong sing gatas sing isa ka panid nga papel nga nasulatan sing pila ka pamangkot parte sa tract kag nagapangabay sing isa ka Biblia. Ginbisitahan gilayon sang utod ang babayi sa ila uma kag ginsugdan ang pagtuon sa Biblia sa bulig sang libro nga Ano Gid ang Ginatudlo Sang Biblia? Antes sini, ini nga babayi nagapangusisa sa lainlain nga relihion sing sabat sa iya mga pamangkot, pero wala gid sia nabusog sa iya espirituwal nga kagutom. Ang matuod, ang iya pagpangusisa nagresulta sa dugang pa gid nga pamangkot. Sang nagpakita sing tudok nga interes ang isa sa iya bata nga babayi, ginhatagan sia sang utod sing libro nga Magtuon Gikan sa Daku nga Manunudlo. Nagpaathag ang iloy nga pirme makabugtaw ang iya bata sa gab-i bangod sang malain nga damgo. Pero, pagkatapos nga mabasa ang pila ka kapitulo sa libro, medyo wala na nahadlok ang bata kag maayo na ang iya pagtulog sa gab-i. Nagpadayon ang pagtuon, kag regular na nga nagatambong ang iloy sa mga miting kada Domingo upod sa iya duha ka bata nga babayi.

 Italya

Sanday Cristina kag Manel, duha ka bug-os tion nga manugbantala, nagapanagtag sang tract nga Luyag Mo Bala Mahibaluan ang Kamatuoran? sa kaumhan sa sentro sang Italya. Sa isa ka uma, nakabati sila sing kinagahod sa likod sang balay. Sang nakita sang tagbalay ang mga Saksi, nagsinggit sia: “Dalia ninyo! Buligi ninyo ako!” Samtang nagadalidali ang mga Saksi sa pagbulig, nakita nila nga ginapunggan niya ang daku kag nagaalipasa nga baboy sa paggua sa tangkal. Naguba ang trangka sang tangkal, kag nabalaka sia nga basi madalagan ang baboy sa malapit nga kakahuyan. Nagaisahanon lang sia, nga nagatinguha sa pagsira sang tangkal. “Punggi ninyo anay kay mangita ako sing inugtrangka!” singgit sang babayi kay Cristina. Nagsabat gilayon si Cristina nga nahadlok sia sa baboy. Ginhatagan gilayon sang babayi sing kalabasa kag kutsilyo si Manel kag nagsiling sa iya: “Indi magkabalaka. Itsahi lang sing kinihad nga kalabasa agod mawili ang baboy samtang nagapangita ako sing bag-o nga bolt.”

Naghalin ang babayi, kag nagligad ang pila ka minuto. Sa sini nga tion, ginasako ni Cristina si Manel nga dalion ang pag-itsa sing pagkaon sa baboy, pero nabudlayan si Manel sa pagkihad sang kalabasa kay matig-a ang panit sini. Sa katapusan, nagbalik ang babayi kag ginkay-o ang sira sang tangkal. Bangod naumpawan, nagtuaw sia: “Ginpadala gid kamo nga duha sang Makaako!”

“Husto ka gid Mam!” sabat nila samtang ginapagua ang tract kag ginpakita sa iya.

Gilayon nga nagsiling ang babayi: “Importante gid ang inyo tuyo. Maayo guro kon mapungko anay kita para maistoryahan naton ina sing maayo.” Gani nagkuha sia sing pila ka siya, kag samtang nagapungko sila sa wayang, nagpautwas sing madamo nga pamangkot ang babayi kag namati sing maayo kag nagpasalamat. Sang ulihi, nasugdan ang pagtuon sa Biblia. Nagsiling sanday Cristina kag Manel nga nagapasalamat sila sa baboy nga nagtinguha sa pagua sa tangkal sa sina gid mismo nga tion.

 OCEANIA

PUNGSOD 30

POPULASYON 38,338,482

MANUGBANTALA 99,816

PAGTUON SA BIBLIA 59,619

Australia

Ang Saksi nga si Fred nga nagapuyo sa isa ka malinong nga banwa malapit sa dagat, nagbilin sing tatlo ka DVD sa isa ka tawo. Sang ulihi, nakabaton sing sulat si Fred gikan sa tawo, nga sa bahin nagasiling: “Nakabatyag ako sing kalinong sa pagtan-aw kag pagpamati sing maayo sa mga DVD. Nabatyagan ko ang kalinong, kalipay, kag kasadya sang mga tawo sa akon ginatan-aw. Madugay na nga wala ko ini nabatyagan. Karon, nagapati na ako nga may mas maayo ako nga palaabuton. Sang una, indi maayo ang pagtamod ko sa mga Saksi nga nagabisita sa amon. Nagapangayo gid ako sing pasaylo sa sini. Mainabyanon gid kamo nga mga tawo kag handum ninyo nga mapalapnag ang maayong balita. Mal-i mo, pila ka adlaw basi pagbalikid mo sa inyo Kingdom Hall, makita mo ako nga nagapungko sa likod.”

New Zealand

Ginkadtuan sang duha ka utod nga babayi ang isa ka organisasyon nga ginadumalahan sang gobierno nga nagaatipan sa pamilya kag nagpaiskedyul nga istoryahon nila ang direktor. Bilang preparasyon, nagtipon sila sing mga balasahon nga nagabinagbinag parte sa pamilya nga mahimo magamit sang direktor sa iya pagpakig-angot sa mga pamilya. Nagalakip ini sang libro nga Ang Sekreto Sang Kalipay sa Pamilya kag Questions Young People Ask—Answers That Work, upod ang Agosto 2007 nga Magmata! nga nagabinagbinag sang “Pito ka Tikang Agod Mangin Mas Maayo nga mga Ginikanan” kag Oktubre 2007 nga nagabinagbinag  naman sang “Kon Paano Mo Maamligan ang Imo mga Anak!”

Sang nagbisita na sila, ginpaathag sang mga utod ang aton boluntaryo nga buluhaton kag nagsiling nga luyag gid naton buligan ang mga pamilya, ilabi na sa espirituwal. Naghinguyang sila sing pila ka oras agod ipakita ang kaundan sang mga balasahon. Namati ang direktor, ginbaton ang mga balasahon, kag nagsiling nga gusto niya ipaambit ini nga impormasyon sa ila 35 ka empleyado. Nagsiling man sia nga ang mga artikulo sa Magmata! mahimo makabulig sa 503 ka pamilya nga yara sa iya listahan. Nakatipon ang mga utod sing 557 ka kopya sang Magmata! Pagligad sang duha ka semana, nakabaton sila sing tawag nga nagapahibalo nga napanagtag na sa mga pamilya ang tanan nga magasin.

Fiji

Ang pamatan-on nga lalaki nga si Viliame maayo gid maghampang sing rugby kag handum gid niya nga maghampang para sa ila pungsod. Luyag man sang iya manghod nga si Leone nga maghampang sing rugby, pero sang gintun-an sia sa Biblia sang isa ka espesyal payunir, narealisar niya nga indi sia puede mag-alagad sa duha ka agalon. Nagtambong sia sa mga miting kag wala na nagpadayon  sa paghampang sing rugby. Ginbaklan sia sang iya iloy, nga isa ka Saksi, sing bayo nga pangtambong sa mga miting. Pero sang nagbaisay sila sang iya magulang, ginkuha ni Viliame ang bayo ni Leone kag gingisi ini. Naglalain gid si Leone, pero wala sia nagbalos. Sang ulihi, nagbaligya si Leone sang iya gin-ani nga sandiya sa merkado, kag nagbakal sing bayo nga pangtambong sa miting, subong man sing Biblia, mga bolpen, kag mga inugmarka para gamiton sa miting. Ginbaklan man niya sini si Viliame. Bangod nadumduman ni Viliame ang iya ginhimo, natandog gid sia sa kaayo sang iya manghod. Ginsuksok niya ang iya bag-o nga bayo kag ginsorpresa ang iya manghod paagi sa pagtambong sa miting. Nagpasugot man si Viliame nga magtuon sa Biblia. Ining mag-utod nag-uswag sa espirituwal. Sang handa na sila magpabawtismo, nakabaton si Viliame sing tanyag nga maghampang sing rugby sa Europa, isa ka tanyag nga ginahandum gid sang madamo nga pamatan-on, bangod mahimo sila magmanggaranon kag mangin bantog. Pero, nagbag-o na karon ang iya handum, kag nagdesisyon na sia nga idedikar ang iya kaugalingon kay Jehova. Nag-alagad sanday Viliame kag Leone subong auxiliary payunir sa sulod sang anom ka bulan pagkatapos sang ila bawtismo. Bangod sang maayo nga halimbawa sang iya kabataan, ang ila amay nga si Waisea, nagtuon man sa Biblia. Nagbag-o gid si Waisea kag nabawtismuhan upod sa iya duha ka bata nga babayi sa adlaw sang pinasahi nga asembleya.

[Mga Retrato sa pahina 45]

Ang pagdisiplina sa kaugalingon kag ang moderno nga teknolohiya nakabulig sa sini nga utod sa pagdumala sing pagtuon sa Biblia

[Retrato sa pahina 46]

Ang iya katutom naghatag sing panaksi

[Retrato sa pahina 48]

Ang pangpamilya nga pagsimba nagsangkap kay Stefan sa pagpanaksi sa eskwelahan

[Retrato sa pahina 49]

Ang iya pagkamapinadayunon nagluwas sing kabuhi

[Retrato sa pahina 50]

Nakakita sia sang isa ka Saksi nga indi bata kag indi man tigulang

[Retrato sa pahina 55]

Nakakuha sia sing isa lang ka “tuk-tuk”

[Retrato sa pahina 58]

Ang pagtuon sing dumuluong nga lenguahe nagresulta sing isa ka pagtuon sa Biblia

[Retrato sa pahina 60]

Madamo sing porma ang pagpanaksi sing di-pormal

[Retrato sa pahina 63]

Pagpreparar sang mga balasahon parte sa pamilya

[Retrato sa pahina 64]

Gintalikdan nila ang paghampang sing rugby agod alagdon si Jehova