Sulat Halin sa Nagadumala nga Hubon

Pinalangga nga Masigka-Saksi ni Jehova:

Pribilehiyo gid naton nga dalhon ang ngalan ni Jehova, ang Soberano sa bug-os nga uniberso! Ina nga ngalan nagapadayon, indi madula, kag wala sing katupong. Si Jehova amo ang naghatag sa aton sang iya ngalan, kag nakilala kita sa sinang pinasahi nga ngalan sugod pa sang 1931. (Isa. 43:10) Ginapabugal gid naton nga ipakilala ang aton kaugalingon subong mga Saksi ni Jehova.

Ginatinguhaan gid sang Yawa nga dulaon ang ngalan sang Dios. Ang mga pungsod nga kontrolado niya nagsikway sa ngalan ni Jehova. Naakig gid ang Babilonia nga Daku, ang bug-os kalibutan nga emperyo sang butig nga relihion, sa ngalan sang Dios kag gindula ini sa madamo nga badbad sang Biblia. Sa kabaliskaran, ginpadunggan ni Jesus ang ngalan sang iya Amay. Ginsambit niya ini sing una sa modelo nga pangamuyo nga gintudlo niya sa iya mga sumulunod. Sia nagsiling: “Gani, mangamuyo kamo sa sining paagi: ‘Amay namon nga yara sa langit, pakabalaanon ang imo ngalan.’” (Mat. 6:9) Sang ulihi, sa iya tinagipusuon nga pangamuyo sa iya Amay, sia nagsiling: “Ginpakilala ko ang imo ngalan sa mga tawo nga ginhatag mo sa akon gikan sa  kalibutan.” (Juan 17:6) Bangod ginasunod naton ang halimbawa ni Jesus, mas determinado pa gid kita nga pakabalaanon ang ngalan ni Jehova sa bug-os nga duta.

Ang tuigan nga teksto sang 2009 nga, “Magpanaksi sing maid-id sa maayong balita,” nagpahulag sa aton nga tumanon sing bug-os ang aton ministeryo. (Binu. 20:24) Pat-od gid nga ginpakamaayo sing bugana ni Jehova ang aton mga panikasog sang nagligad nga tuig sang pag-alagad. Lapnag nga pagpanaksi ang nahimo sa bug-os nga kalibutan para sa kahimayaan kag kadungganan sa ngalan ni Jehova. Nagbuylog ang bag-o nga kataason nga 7,313,173 ka manugbantala sa pagbantala sa tanan kag sa pagtudlo sa mga tawo nga nagapangita sing solusyon sa madamo nga problema nga ginaatubang nila kada adlaw. Ang 18,168,323 nga nagtambong sa Memoryal nagapakita nga minilyon pa ang mahimo magtawag sa ngalan ni Jehova antes mag-abot ang katapusan sining malaut nga kalibutan.

Tubtob ginatugot ni Jehova, ipadayon naton ang makugi nga pagbantala sing maayong balita sang Ginharian, nga nagagamit sang tanan nga paagi agod malab-ot ang mga tawo sa aton mga teritoryo. (Mat. 24:14; Mar. 13:10) Kabay pa nga ibantala naton ang ngalan kag katuyuan ni Jehova sa mga tawo sa ila mga balay, sa mga dalan, paagi sa sulat kag telepono, ukon sing di-pormal, tubtob sa aton masarangan.

Madamo kita sing rason sa pagpati nga sa indi madugay, magahulag si Jehova agod pakabalaanon ang  iya ngalan. (Eze. 36:23) Nagahilapit na ang tion nga ang tanan nga nagasikway sa ngalan sang Dios pagalaglagon. Isa gid ina ka mahimayaon nga adlaw para sa tanan nga matutom nga alagad ni Jehova, nga nagpakilala sang iya ngalan kag nagsakdag sang iya pagkasoberano sa bug-os nga uniberso!

Maathag gid ang mahigugmaon nga pagtatap ni Jehova sa iya katawhan sa “Magpadayon sa Pagbantay” Distrito kag Internasyonal nga mga Kombension nga ginhiwat sang 2009 sa halos bug-os nga kalibutan. Ini nga mga kombension isa gid ka importante nga hitabo sa kasaysayan sang mga alagad sang Dios, nga nagpalig-on sa aton nga mangin mas mabinantayon pa gid sa pag-abot sang adlaw ni Jehova.—Mar. 13:37; 1 Tes. 5:1, 2, 4.

Huo, maayo gid si Jehova sa aton. Ginapahalipay niya ang aton tagipusuon. Ginapapahuway niya kita sa hilaw nga mga halalbon kag ginatuytuyan pakadto sa luyo sang mga tubig nga malinaw.—Sal. 23:1, 2; 100:2, 5.

Saligi ninyo nga padayon kamo nga pakamaayuhon ni Jehova samtang masako kamo sa pag-alagad sa Ginharian sa masunod nga mga binulan!

Upod ang mainit nga Cristianong gugma sa aton bug-os kalibutan nga paghiliutod,

Ang inyo kauturan,

Nagadumala nga Hubon sang mga Saksi ni Jehova