Talalupangdon nga mga Hitabo sang Nagligad nga Tuig

ANG mga report gikan sa bug-os nga duta nagapamatuod nga masako gid ang mga Saksi ni Jehova sa pagbantala sing maayong balita sang Ginharian “sa bug-os napuy-an nga duta subong panaksi sa tanan nga pungsod.” (Mat. 24:14) Subong resulta sang ila pagbatas, paghiusa kag di-makagod nga pagpangabudlay, ‘naglanog ang pulong ni Jehova, kag naglapnag sa tagsa ka duog ang ila pagtuo sa Dios.’—1 Tes. 1:8.

MAKAPABAKOD KAG MAKALILIPAY NGA PANGPAMILYA NGA PAGSIMBA

Sang Enero 1, 2009, may daku nga pagbag-o sa semanal nga mga miting sang mga Saksi ni Jehova. Ang Pagtinuon sang Kongregasyon sa Libro gintawag nga Pagtinuon sang Kongregasyon sa Biblia kag ginhiwat ini upod sa Teokratikong  Eskwelahan Para sa Ministeryo kag Miting sa Serbisyo. Ginapalig-on ang tanan nga gamiton ang ila anay iskedyul sa Pagtinuon sang Kongregasyon sa Libro para sa Pangpamilya nga Pagsimba.

Ano ang reaksion sang mga alagad ni Jehova sa sini nga pagbag-o? Madamo ang nagabatyag kaangay sang isa ka bana nga nagsulat: “Madamo gid nga salamat! Daw indi namon mapabutyag sang akon asawa ang nabulig sang Pangpamilya nga Pagsimba sa amon. Ginpabaskog sini ang amon gugma kay Jehova kag nangin suod pa gid kami nga mag-asawa. Dalayawon kag mapuslanon gid ini nga kahimusan sang aton langitnon nga Amay!”

Ano ang ginhimo sang mga pamilya agod mapanginpuslan ini nga iskedyul? Ang isa ka iloy nagsulat: “Sa iban nga gab-i ginabinagbinag namon ang pahina 31 sang Magmata! kag sa iban naman nga gab-i nagatan-aw kami sang isa sa mga video sang organisasyon. Wala lamang nagapanalawsaw sing silahanon ang mga kabataan kundi nalipay man sila sa pagtuon kag sa Pangpamilya nga Pagsimba. Ginaasayn namon sila nga manalawsaw parte sa isa ka karakter sa Biblia sa sina nga bulan kag ipresentar ini pagkasunod nga bulan. Amo man sini ang ginahimo namon nga mag-asawa. Maayo gid ang una nga pamulongpulong sang amon dies anyos nga bata parte kay Noe! Ginsugid man niya sa amon kon paano karon maaplikar ini nga impormasyon. Nian ginpagua niya ang gamay nga arka ni Noe nga iya ginhimo. Pagkasunod nga semana, ang amon bata nga babayi amo ang may bahin parte sa mga paglakbay ni apostol Pablo subong misyonero. Pagkatapos sang iya bahin, nagpalakpak kami tanan. Nian namangkot sia sa amon sa bahin nga gintawag niya nga, Madumduman Mo Bala? Kanami gid sang iya presentasyon!” Nabatyagan sini nga pamilya nga ini nga kahimusan isa gid ka pagpakamaayo halin kay Jehova. “Madamo gid kami sing problema sang akon bana sang nagligad lang nga mga tuig,” siling sang iloy, “kag amo gid ini ang amon kinahanglan agod makabatas.”

 Ang isa ka utod nga babayi nagsulat: “Nagapasalamat gid ako sa sini nga aman nga nagpukaw sa akon sa espirituwal! Sang dalagku na ang amon kabataan kag nagkinaugalingon, wala na kami sing regular nga pangpamilya nga pagtuon. Pero karon nangin regular na ini. Sa masami, ang amon pagtuon nagalawig sing duha ka oras kag daw kadali lang ini!”

Samtang nagahilapit ang dakung kapipit-an, kabay nga ang Pangpamilya nga Pagsimba makabulig sa inyo nga tun-an pa gid sing maid-id ang Pulong sang Dios kag magpabakod sang inyo pagtuo agod mapamatukan ang Yawa. Gamita sing maayo ining hamili nga tion sa ‘pagpalapit sa Dios, kag magapalapit sia sa inyo.’—Sant. 4:7, 8.

DUGANG NGA PANIKASOG SA PAGTANYAG SING MGA PAGTUON SA BIBLIA

Sugod sang Enero 2009, ginpalig-on ang tanan nga kongregasyon nga mag-iskedyul sing isa ka Sabado ukon Domingo kada bulan sa pagtanyag sing mga pagtuon sa Biblia. Ano ang resulta sini? Madamo nga manugbantala ang nakibot kag nalipay. Nakibot bangod mahapos lang gali ang pagtanyag sing pagtuon sa Biblia sangsa ginahunahuna nila, kag nalipay bangod nanuhaytuhay nga tawo ang nagbaton sing pagtuon sa libro nga Ano Gid ang Ginatudlo Sang Biblia? Nagreport ang mga nagalakbay nga manugtatap nga nangin makugi ang mga kongregasyon sa sining bag-o nga kahimusan, kag dalayawon gid ang mga resulta sini sa malip-ot lang nga tion. Halimbawa, sa unang lima ka bulan, kapin sa 8,000 ka bag-o nga pagtuon sa Biblia ang nasugdan sa Italya.

Ang mga manugbantala nga wala gid sing ginatun-an sadto may mga ginaduaw na karon kag mga ginatun-an sa Biblia. Si Carolina nga taga-Peru nagsiling: “Wala gid anay ako sing ginatun-an sa Biblia antes sini nga kahimusan, apang bangod may naiskedyul nga adlaw para sa pagtanyag sing pagtuon sa Biblia, kinahanglan ko gid manikasog. Napakita ko sa tagbalay nga simple lang ang pagtuon kag  wala ini nagakinahanglan sing daku nga tion. Nagapasalamat ako kay Jehova, kay paagi sa pag-aplikar sa mga panugda, nagadumala ako karon sing duha ka pagtuon sa Biblia.”

Si Satya, nga payunir sa Britanya, nagapangalag-ag sa pagtanyag sing pagtuon sa Biblia sa una nga pagduaw. Apang sa ila iskedyul sang pagtanyag sing mga pagtuon sa Biblia, namat-od sia nga indi magpauli kon indi niya matilawan ini nga pamaagi. Nalipay sia sang ginbaton gilayon sang isa ka babayi ang iya tanyag. Abi ni Satya mabudlay gid ini, pero indi gali!

Si Luca, nga isa ka pamatan-on nga lalaki sa Palermo, Sicily, regular nga nagabilin sing mga magasin sa isa ka balo nga babayi nga nahadlok magpasulod kay bisan sin-o sa ila balay. Isa ka Sabado sang hapon, sa adlaw sang pagtanyag sing pagtuon sa Biblia, ginbuksan na nga daan ni Luca ang libro nga Ginatudlo Sang Biblia kag ginpakita ini sa balo, kag ginbasa ang isa ka dinalan sini. Nanamian gid ang balo sa libro kag medyo nagdugay ang ila pag-istoryahanay. Ginsilingan niya ang balo nga yara sa iya ginauyatan ang mga sabat sa iya mga pamangkot, lakip na kon bala makita pa niya ang iya bana. Ginbuksan ni Luca ang pahina 72, nga nagapaathag kon sin-o ang pagabanhawon. Natandog gid ang balo sa sini nga paglaum kag ginbaton ang pagtuon. Regular na karon ang iya pagtuon, kag wala na sia nagapangalag-ag sa pagpasulod sa mga Saksi sa ila balay.

“Sang ginsugdan ini” report sang isa ka manugtatap sang sirkito sa Peru, “nakabulig ini nga kahimusan agod magdamo ang pagtuon sa Biblia sa kalabanan nga kongregasyon. Ang isa ka kongregasyon sa Chiclayo nagreport sing 25 ka bag-o nga pagtuon sa isa ka bulan, kag sa Chepén may 24 ka bag-o nga pagtuon sa Biblia.”

Nangin madinalag-on man ang mga kabataan nga manugbantala sa pagtanyag sing mga pagtuon sa Biblia. Ang onse anyos nga si Giovanna sa São Paulo, Brazil, nagsaysay: “Isa ka Sabado sang hapon, nag-upod ako kay Nanay sa pagpamalaybalay, nga nagatanyag sing pagtuon sa Biblia  paagi sa libro nga Ginatudlo Sang Biblia. Sa una nga balay, ginpamangkot ko ang tagbalay, nga isa ka kilala nga negosyante, kon nagapati sia nga ang Biblia gintuytuyan sang Dios. Huo, siling niya. Nian ginbasa ko sa iya ang 2 Timoteo 3:16. Nagsiling sia nga nagdayaw gid sia nga makita ang isa ka dalagita nga nagasugid sa iya sining matahom nga mensahe, kag ginbaton niya ang libro.

“Sang ginduaw ko liwat ang tawo, gin-upod ko si Lolo bangod kilala niya ini. Ginpasulod kami sang tawo, kag ginpangabay ko sia nga magpili sing topiko sa mga kaundan sang libro nga nanamian gid niya. Ginpili niya ang kapitulo 11 nga natig-uluhan, ‘Ngaa Gintugutan sang Dios ang Pag-antos?’ Sang nabasa niya ang unang duha ka parapo, madamo gid ang pamangkot niya kag sang iya asawa. Nalipay gid sila nga nasabat paagi sa Biblia ang tanan nila nga pamangkot, kag nagsugot sila nga magtuon sa Biblia sing regular. Nalipay gid ako nga makasugod sing pagtuon sa Biblia sa una nga balay nga amon ginbantalaan!”

Siempre pa, indi tanan magabaton sing pagtuon sa Biblia, kag indi tanan magapadayon. Pero, subong mga masigkamanugpangabudlay sang Dios, padayon kita nga nagatanyag sing mga pagtuon sa Biblia sa aton bug-os nga masarangan, nga nakahibalo nga ginabuyok ni Jehova ang mga tulad-karnero sa iya organisasyon antes ang kalaglagan sining sistema sang mga butang ni Satanas.—Juan 6:44; 1 Cor. 3:9.

ANG TEKNOLOHIYA NAGABULIG SA ‘PAGPADALI’ SANG HILIKUTON

Nalipay ang katawhan ni Jehova sa katumanan sini nga tagna: “Ang diotay mangin-isa ka libo, kag ang diotay manginmabakud nga pungsud; Ako amo ang GINOO; magapadali ako sini sa iya tion.” (Isa. 60:22) Wala sing duhaduha nga padayon nga ginagamit ni Jehova ang pag-uswag sa teknolohiya agod mapadali ang espirituwal nga pag-uswag sa sini nga tion. Gani, ginpasugtan sang Nagadumala nga Hubon ang pag-program sang isa ka software agod gamiton  sang tanan nga sanga sa bilog nga kalibutan para mapadali ang hilikuton.

Ang grupo nga nagahimo sini nga program, nga nakabase anay sa sanga sa South Africa, nagsaylo sa Ulong Talatapan sa Brooklyn, New York, agod pauswagon kag mentinahon ini nga software. Mga 20 ka sanga ang nagabulig sa malapit nga mga sanga agod mabenepisyuhan nila sing maayo ini nga software.

Ano ang bentaha sa sini? Bangod pareho nga software ang ginagamit sang tanan nga sanga, mahimo sila makapaambitay sing mga impormasyon. Halimbawa, mahibaluan sang tanan nga sanga nga nagaimprinta sa bug-os nga kalibutan kon ano nga literatura ang nagpunsok sa iban nga sanga. Kon nagpunsok ang literatura sa isa ka sanga, mahimo ini pangabayon sang iban nga sanga sa baylo nga mag-imprinta sing bag-o. Bangod sini nga pamaagi, lakip na ang iban pa nga feature sang software nga sarang makabanabana sang kadamuon sang literatura nga kinahanglan pa  sa palaabuton, nabuhinan ang pagpunsok sang mga literatura sa tanan nga sanga.

Ini nga program nagbulig sa mga Bethelite agod mangin mahapos ang ila obra, kaangay sang pag-atipan sang mga order sa literatura kag magasin, pagtipon sang tuigan nga mga report sa latagon, pagplano sang mga kombension kag asembleya, kag pag-asayn sang mga nagalakbay nga manugtatap kag espesyal payunir. Nakabulig man ini nga software sa pagpamakal, pagkuenta, kag pag-imbentaryo, amo nga indi na kinahanglan pa magbakal sing malahalon nga software.

PAGPAIWAG SING KAPAWA SA INTERNET

Subong nga ang literal nga kapawa nagaiwag sa madulom nga mga duog, amo man ang katawhan sang Dios nga ‘nagapaiwag sang ila kapawa’ sa bug-os nga duta. (Mat. 5:16) Ang isa ka galamiton sa pagpaiwag sa halos naligwin nga mga lugar amo ang aton opisyal nga Web site nga www.watchtower.org. Makita sa sini nga Web site ang artikulo sang mga magasin, mga tract, kag mga brosyur sa halos 383 ka lenguahe, lakip na ang kompleto nga New World Translation of the Holy Scriptures sa 11 ka lenguahe. Sa kabug-usan, may kapin sa 700 ka artikulo ang makita diri. Sa home page sini, nga ginabag-o kada semana, makita ang bag-o nga mga artikulo parte sa popular nga mga topiko. Ano ang mga resulta sa pag-imprinta sang aton mga literatura sa madamo nga lenguahe gikan sa Internet?

Nasapwan ni Pat, nga nagaistar sa Florida, U.S.A., ini nga Web site nga amo ang pinakamadali nga paagi agod makakuha sing literatura sa iban nga lenguahe. Sia nagsulat: “Sang natapos na ang amon pagpanagtag sang tract nga Luyag Mo Bala Mahibaluan ang Kamatuoran? nag-imprinta ako gilayon sang kopya sini sa lenguahe sang pila nga nagbaton sing Ingles nga tract pero iban ang ila lenguahe.” Ano ang resulta?

Nag-imprinta si Pat sing tract sa Thai nga lenguahe kag ginhatag ini sa babayi nga tag-iya sang isa ka gamay nga  tiendahan. Nalipay ang babayi kag indi sia makapati nga nakakita gilayon si Pat sing literatura sa Thai nga lenguahe. Luyag mahibaluan sining babayi kag sang iban nga kostumer ang aton Web site agod mahimo man nila ini mabuksan. Ginpangabay si Pat sang isa sa mga babayi nga duawon sia sa ila puluy-an agod padayunon ang ila pag-istoryahanay. Kaangay ni Pat, nasapwan man sang madamo ang kapuslanan sang pag-imprinta sang pila ka pahina sang aton mga literatura sa nanuhaytuhay nga lenguahe gikan sa aton Web site agod ipaambit sa mga interesado nga taga-iban nga pungsod.

Sang nagligad nga tuig, sobra sa 24 milyones ka tawo sa bilog nga duta ang nagbukas sang aton Web site. Sugod sang 2007, nagdugang sing 33 porsiento ang kadamuon sang nagbukas sini. Ang mga tawo sa bilog nga duta, lakip ang mga nagapuyo sa nabaw-ing nga mga isla, nagsumiter sang ila pangabay nga duawon sing personal ukon dumalahan sila sing pagtuon sa Biblia sa puluy-an. Nagdamo man sing mga 55 porsiento ang nagsumiter sang mga kupon paagi sa Internet sugod sang 2007. Matuod gid nga nagaiwag ang espirituwal nga kapawa sa pinakaligwin nga bahin  sang duta, tanan ini para sa kadayawan kag kahimayaan sang aton Amay sa langit.—Mat. 5:16.

Dugang pa sa www.watchtower.org nga Web site, naghimo man sing www.pr418.com agod matigayon ang narekord nga mga publikasyon. Ano ang kapuslanan sini nga Web site?

Si Trisha, nga taga-Missouri, U.S.A., nagpabutyag sang balatyagon sang madamo sang nagsiling sia, “Nalangkag gid ako nga maabot ang Huebes.” Ngaa? Bangod kada Huebes sia naga-download sa www.pr418.com sang mga rekording sang bag-o nga isyu sang Ang Lalantawan kag Magmata! Isa si Trisha sa linibo ka kauturan sa bilog nga kalibutan nga pirme nagabukas sining bugana sa espirituwal nga Web site. Naga-download sila sing narekord nga pagbasa sa mga magasin, Biblia, mga drama, mga libro, mga brosyur, kag mga tract sa 27 ka lenguahe. Matigayon man sa sini nga Web site ang mga publikasyon sa American Sign Language sa duha ka kinaandan nga video format.

Sin-o ang mga naga-download sang aton mga publikasyon? Panguna sa sini amo ang aton mga kauturan, pero naga-download man ang mga tawo halin sa sobra sa 200 ka kadutaan, lakip na sa mga pungsod nga ginadumilian ang aton hilikuton. May regular nga nagabukas nga taga-Papua New Guinea, St. Helena, kag bisan taga-Antarctica. Paano nakabenepisyo ang aton mga kauturan sa pag-download sini nga mga rekording? Halimbawa, nagakaatrasar ang pag-abot sang mga magasin sa French Polynesia. Bangod may Internet ang mga manugbantala bisan sa nabaw-ing nga mga isla diri, mapamatian nila ang pinakabag-o nga isyu sang publikasyon nga masapwan sa Web site.

Si Deborah, nga taga-Illinois, U.S.A., may malala nga balatian amo nga indi sia pirme makapakig-upod sa kongregasyon kag nabudlayan man sia sa pagdumdom sang iya mga nabasahan. Naga-download sia karon kag nagapamati sang mga narekord nga publikasyon. Nagsiling sia, “Nag-uswag ang akon memorya, kag masarangan ko na ipaathag nga may pagsalig ang akon napamatian.”

 Ang isa ka mag-asawa sa isa ka gamay nga banwa sa Texas, U.S.A., may ginatun-an sa Biblia nga taga-Siberia, kag nalipay sila sa pag-download kag paghatag sa iya sang narekord nga pagbasa sa mga magasin sa Ruso nga lenguahe. Ang isa ka utod nga lalaki sa California U.S.A., nanamian mamati sa iya digital player sang narekord nga mga publikasyon samtang nagadyaging sa aga.

Kada semana, ang isa ka mag-asawa sa isa ka gamay nga banwa sa aminhan sang New Zealand naga-download sang narekord nga reperensia para sa mga miting—tulun-an nga artikulo sa Ang Lalantawan, mga kapitulo gikan sa libro nga “Magpabilin Kamo sa Gugma Sang Dios” kag Magtuon Gikan sa Daku nga Manunudlo, kag sang naasayn nga pagbasa sa Biblia kada semana. Ginapamatian nila ini sa bilog nga semana. Nagkomento ang bana, “Natalupangdan namon nga pirme kami nagaistorya parte sa espirituwal nga mga butang sa baylo nga sa mga kabudlayan sa obra.” Amo man sini ang ginahimo sang madamo nga pamilya sa bilog nga kalibutan.

Kada semana, linibo ka beses nga gina-download ang naasayn nga mga kapitulo sa pagbasa sa Biblia—ilabi na kada Martes. Madamo sing naga-download sa bag-o nga tulun-an nga artikulo sang Ang Lalantawan kada Sabado kag Domingo. Dugang pa, mahimo makaimprinta sing direkta sa Web site ang mga gulang sa kongregasyon sing mga pormas kag balayan sa pamulongpulong. Sa kabilugan, ini nga mga aman nakabulig sa organisasyon nga makakinot sing kuarta, kag mapahapos ang hilikuton.

‘MAGARESULTA INI SA PAGPANAKSI’

Samtang nagakabuhi ang mga Saksi ni Jehova “sing matawhay kag malinong nga may bug-os nga diosnon nga debosyon,” wala sila nagakakibot kon hingabuton sila. (1 Tim. 2:1, 2) Ginpaandaman ni Jesucristo ang iya mga disipulo nga dumtan sila, sang sia nagsiling: “Dakpon kamo sang mga tawo kag hingabuton kamo, kag itugyan kamo sa mga sinagoga kag mga bilangguan, kag dalhon kamo sa  atubangan sang mga hari kag mga gobernador tungod sa akon ngalan.” Pero, nagsiling si Jesus nga ini nga paghingabot magabalandra sa mga kaaway sang putli nga pagsimba. Sia nagsiling: “Magaresulta ini sa inyo pagpanaksi.”—Luc. 21:12, 13, 17.

Bilang katumanan sang tagna ni Jesus, nagaatubang sing inhustisya ang mga Saksi ni Jehova sa pila ka mga duog. Ang mga kadalag-an sa korte sa madamo nga kadutaan nakabulig agod protektahan ang ila legal nga kahilwayan, lakip ang ila kinamatarong sa pagbantala sa balay kag balay kag sa hilway nga pagtilipon sa pagsimba. Bisan pa wala nasolbar sing bug-os ang mga problema, nakatigayon naman kita sing talalupangdon nga mga kadalag-an sa sini nga tuig, nga nagapamatuod nga relihioso ang aton mga hilikuton.

Austria

Pagkatapos sang 30 ka tuig nga panikasog sang aton mga kauturan, sang Mayo 2009 bug-os nga ginkilala sang Federal Ministry of Education, Art, and Culture sang Austria nga isa ka relihion ang mga Saksi ni Jehova. Ang mga Saksi ni Jehova amo ang ika-14 nga relihion sa Austria nga nakatigayon sini nga pagkilala. Masunod sa paborable nga desisyon sang European Court of Human Rights sang Hulyo 2008, tatlo pa ka pamatbat ang ginpagua sang Korte pabor sa aton mga kauturan sa Austria, nga nagapamatuod nga ginakilala na gid nga isa ka relihion ang mga Saksi ni Jehova.

South Africa

Sang 2005 ginpasakaan sing kaso ang South African Department of Labour sa Labour Court sang South Africa tungod sa Watch Tower Bible and Tract Society sa South Africa kag sa mga miembro sang Bug-os Kalibutan nga Grupo sang Pinasahi nga Bug-os Tion nga mga Alagad sang mga Saksi ni Jehova nga nagaalagad sa Bethel sa South Africa. Ginpasaka ini nga kaso agod indi pagkabigon ang mga Bethelite nga mga empleyado suno sa kasuguan sang South Africa. Sang Marso 2009 nagpagua sing paborable nga pamatbat ang Labour Court tuhoy sa sini kag nagapamatuod  man ini nga relihioso ang mga buluhaton sa Bethel.

Uganda

Sang 2007 nagpagua sing mando ang Uganda Revenue Authority (URA) nga ang mga miembro sang Bug-os Kalibutan nga Grupo sang Pinasahi nga Bug-os Tion nga mga Alagad sang mga Saksi ni Jehova nga nagaalagad sa Bethel sa Uganda mga empleyado suno sa Income Tax Act sa Uganda. Ini nga kaso ginsumiter sa Mataas nga Hukmanan sa Kampala tungod sa International Bible Students Association (IBSA) batok sa URA. Sang Hunyo 2009 nagpamatbat ang Mataas nga Hukmanan pabor sa IBSA, bangod napamatud-an nila nga indi empleyado ang mga Bethelite sa Uganda. Nahibaluan sang korte nga ang mga Bethelite “nagabaton sing pareho nga aman ano man ang ila trabaho.” Nagdeklarar ang korte nga ang mga Bethelite miembro sang relihioso nga grupo kag ginaamanan lang sang ila kinahanglanon nga pagkaon, ilistaran, kag diutay nga kuarta agod mabakal ang ila personal nga mga kinahanglanon samtang ginahimo nila ang ila boluntaryo kag relihioso nga mga buluhaton sa Uganda.

Armenia

Padayon ang pagpang-aresto kag pagpangpriso sa aton mga kauturan nga lalaki kon mag-abot na sila sa edad nga puede magsoldado. Bangod ini sa ila pagpangindi nga magsoldado pasad sa ila konsiensia. Sang Agosto 2009, may 74 ka utod nga lalaki ang napriso. Bangod ang tanan nga hukmanan sa sina nga pungsod nagpamatbat batok sa aton mga kauturan, nagsumiter sila sang apat ka magkatuhay nga kaso sa European Court of Human Rights. Padayon man nga ginapilit sang gobierno nga magbayad sila sing mahal nga Value Added Tax para sa relihioso nga mga literatura nga mabaton sang aton mga kauturan halin sa iban nga pungsod. Wala mahibaluan kon bala magapadayon ukon indi ang pagpanukot sa sining puerte kataas nga buhis, pero nagasalig kita nga padayon nga maamanan ang aton mga kauturan sang ila espirituwal nga kinahanglanon.—Isa. 65:13.

 Azerbaijan

Padayon nga ginadumilian ang aton mga kauturan didto sa ila pagsimba. Nagabudlay nga nagabudlay ang pagtigayon nila sang mga literatura kag ang pagtilipon para magsimba. Bisan pa nga legal na sila nga ginkilala sa Baku, nga amo ang kapital, ilegal nga gina-raid pirme sang mga pulis ang mga miting nga ginahiwat sa pribado nga mga balay bangod wala sila narehistro sa iban nga siudad, kag nian ginapriso sila sing inoras sa presinto. Nagakatabo ini bisan pa wala ginapatuman sang kasuguan sa mga sumilimba nga magparehistro anay antes magtipon sa pribado nga mga balay. Sang Abril 9, 2009, nag-aplay sing rehistrasyon sa gobierno sang Azerbaijan ang aton mga utod. Nagalaum kita nga ini nga rehistrasyon magapahaganhagan sa mga kabudlayan sang aton mga kauturan.

Egipto

Sang nagligad nga tatlo ka tuig, ang mga utod sa Egipto kag ang mga utod halin sa Belgium, Estados Unidos kag Italya nakigsugilanon sa mga opisyales sa Egipto agod mangin legal ang aton buluhaton diri. Subong resulta, ginhatagan sing permiso sang mga opisyales ang aton mga kauturan sa Egipto nga makasimba sing mahim-ong sa pribado nga mga balay sa kadamuon nga 30 ka tawo. Bisan pa sa sini, padayon gihapon nga ginamaltratar sang pila ka opisyales sang gobierno ang aton mga kauturan. Padayon nga ginabantayan sang State Security ang aton mga kauturan kag kon kaisa ginainterogar kag ginapahog ang mga miembro sang kongregasyon. Luwas pa sa direkta nga pagpakigsugilanon sa mga opisyales, nagapanikasog man ang aton mga kauturan agod mangin legal ang aton mga buluhaton.

Eritrea

Bangod wala ginsapak ang tawhanon nga mga kinamatarong, 23 ka miembro sang isa ka kongregasyon ang gin-aresto sang Hunyo 28, 2009, lakip ang mga tigulang nga utod nga babayi kag tatlo ka kabataan nga nagaedad sing duha asta apat ka tuig. Bisan pa nga ginbuy-an ang mga tigulang nga utod nga babayi, napriso gihapon ang mga kabataan upod sa ila nanay. Ang ila tatay madugay na nga napriso, amo nga ang bilog nga pamilya yara na sa prisuhan.  Bangod sini, nangin 64 na ka kauturan ang napriso, nga nagalakip sang tatlo ka utod nga lalaki nga napriso sugod pa sang 1994 bangod sang ila neutral nga panindugan sa pagpangalagad sa militar. Wala man sila nakahibalo kon ano nga kasuguan ang ila nalapas.

India

Sang nagligad nga pila ka tuig, ginaatake sang guban sang mga tawo ang mga Saksi ni Jehova sa tion sang ila pagbantala. Nakaeksperiensia man sila sing berbal kag pisikal nga pag-abuso. Ginapahog man sila nga prisuhon kag ginapanunog ang ila mga literatura. Masami nga sa tapos sang pagkastigo sa ila, ginaaresto ang aton mga kauturan, ginapriso kag ginakasuhan sa korte. Ginasutsot sang akig nga mga guban ang lokal nga mga opisyales nga pamatukan ang aton mga kauturan paagi sa sayop nga panumbungon nga ginalapas nila ang kasuguan.

Halimbawa, sang Disiembre 2008, ginbalikan sang tatlo ka Saksi ni Jehova (iloy, iya bata nga babayi, kag dies anyos nga apo nga babayi) sa Kundapura, Karnataka, ang isa ka babayi sa Koni Village nga nagpakita sing interes sa Biblia. Sang ulihi, lima ukon anom ka lalaki ang pilit nga nagdala sa ila sa presinto sa sina nga lugar. Nagtipon ang isa ka guban kag gin-akusahan ang mga utod sing trespassing, nagapaaway sa mga tawo, kag nagapakalain sa iban nga relihion. Sang ulihi, gintugutan nga makapauli ini nga mga Saksi. Ang aton mga kauturan nga nakaeksperiensia sini ginhatagan sing legal nga bulig.

Moldova

Ang aton mga kauturan sa Transnistria, isa ka lugar nga wala ginakilala nga sakop sang Moldova, nagpadayon sa ila kakugi sa buluhaton sa Ginharian bisan pa pirme sila ginapahog nga dumilian ukon pauntaton sa sulod na sang 12 ka tuig. Bisan pa sa sini nga mga kabudlayan, naeksperiensiahan sang mga kauturan ang pagpakamaayo ni Jehova kag ang diutay nga kadalag-an sa pagpangapin sa mga intereses sang Ginharian sa mga korte. Yari ang tatlo ka halimbawa: Napamatud-an nga nakasala kag  ginpamulta ang isa ka Ortodokso nga pari nga berbal kag pisikal nga nag-abuso sa duha sa aton utod nga mga babayi samtang nagabantala sa Ordăşei. Ang korte sa siudad sang Tiraspol paborable nga nagdesisyon may kaangtanan sa panikasog sang aton mga utod nga irehistro ang aton relihion didto. Ginpamatbatan man nga nagsayop ang Rîbniţa City Tax Inspectorate sa pagpatong sing buhis nga wala ginapatuman sang kasuguan sa pagkaon nga ginhanda para sa mga boluntaryo nga nagtrabaho sa pagpatindog sang Kingdom Hall.

Kazakhstan

Nagprotesta ang General Prosecutor’s Office sang Republic of Kazakhstan amo nga nagpagua ang korte sing paborable nga pamatbat para sa aton mga kauturan. Antes sini, ginpauntat sang mga korte sa Kyzylorda, Shymkent, kag Saryagash ang aton relihioso nga hilikuton sa sulod sang anom ka bulan. Pero, bangod sang desisyon nga ginpagua sang Nobiembre 2008, napasag-uli ang aton kahilwayan sa Kyzylorda Region, Shymkent, kag sa tanan nga lugar sa bagatnan sang Kazakhstan. Dugang pa, sang Disiembre 2008, pagkatapos sang pito ka tuig nga indi pagbaton sang gobierno sa aplikasyon sang mga kauturan, nagpagua sing desisyon ang korte sa Atyraū nga nagapakita nga may legal nga kinamatarong ang mga Saksi ni Jehova sa pagparehistro sa sina nga siudad.

Rusya

Sang nagligad nga tuig sang pag-alagad, ang aton Administrative Center diri sulitsulit nga ginaimbestigar sang abogado sang gobierno kag iban pa nga opisyales sang Estado, sa tuyo nga pauntaton ang aton relihioso nga mga buluhaton. Indibiduwal nga ginamaltrato ang aton mga kauturan kag ginatos ang ginaimbistigar nga wala sing basihan. Isa ka halimbawa sini amo ang isa ka nagabusong nga utod nga nahulugan pagkatapos sang ilegal nga pag-raid sang mga pulis sa ila relihioso nga mga miting. Ang 15 anyos nga solterito, nga nagtambong man sa miting, ilegal nga ginpriso. Ang abogado sang gobierno naggamit sang Law on Counteracting Extremist Activity subong basihan  sa pagpauntat sa pila ka kongregasyon sa sini nga lugar kag pagdumili sa aton mga literatura. Ining mga alegasyon parte sa pagkontra sa gobierno amo ang rason kon ngaa wala ginkilala sang pila ka opisyales ang relihioso nga kahilwayan, lakip na ang supak sa kasuguan nga pagpang-aresto, deportasyon, kag indi pagpasulod sa pungsod sang apat ka abogado sang mga Saksi ni Jehova nga taga-iban nga pungsod nga mabulig tani sa pagpangapin batok sa sining sayop nga mga akusasyon. Ang isa sa sini nga utod ginpriso sa Moscow sa sulod sang 23 oras.

Nagpasilabot ang mga miembro sang Federal Security Service sa kontrata sang pag-arkila sa hiwatan sang mga miting kag kombension, amo nga nakanselar ini. Ginbalabagan man sang mga opisyales ang pagpatindog sing bag-o nga mga Kingdom Hall. Lakip sa ilegal nga buhat nga  nahimo sa mga Saksi amo ang pagpaantos samtang yara sa prisuhan bangod sang sayop nga mga akusasyon.

South Korea

Sang Hunyo 16, 2008, ginbawi sang South Korea ang anunsio sini sang Mayo 7, 2008, nga nagapahanugot sa mga nagapangindi sa pagsoldado, bangod sang ila konsiensia, nga makigbahin na lang sa buluhaton para sa komunidad. Nagsiling ini nga “ang desisyon parte sa mga nagadumili sa pagsoldado bangod sang ila konsiensia kinahanglan pa tun-an sing maayo kag kinahanglan pa hibaluon ang desisyon sang tanan nga mga tawo sa pungsod.” Sa karon, wala pa ginabinagbinag sang Korean National Assembly kon ano ang ibulos sa sini. Ginahulat pa sang mga kauturan ang desisyon sang Human Rights Committee sang United Nations, nga paborable nga nagdesisyon sa duha ka ginsang-at nga kaso. Sang Enero 2009, gin-aku sang Korean Presidential Commission on Suspicious Deaths in the Military nga ang gobierno sang Korea amo ang responsable sa makasiligni nga kamatayon sang lima ka Saksi ni Jehova nga ginpilit nga magsoldado sang katuigan 1970 tubtob 1980. Amo ini ang una nga desisyon nga gin-aku sang Estado nga sila ang responsable sa mga pagpatay bangod sang kapintas sang militar.

Tajikistan

Sang 2007, ang Religious Association of Jehovah’s Witnesses gindumilian sa Tajikistan, kag ang aton mga literatura gikan sa Germany ginkompiskar sang mga opisyales sang custom. Nag-apelar sila sa korte sang militar, kag sang Septiembre 2008, napaslawan ini nga apelasyon. Ginpasundan ini sang isa pa ka apelasyon sa Military Collegium of the Supreme Court, pero napaslawan gihapon ini. Ini nga mga desisyon nagasakdag sa pagdumili kag pagkompiskar sa aton mga literatura. Padayon gihapon ang mga panikasog agod buligan ang aton mga kauturan.

Turkey

Ang mga kauturan diri ginapilit nga magsoldado. Ang isa ka utod nga lalaki ginpriso sing duha ka tuig bangod sang iya malig-on nga panindugan. Madamo nga kauturan  nga yara na sa husto nga edad para magsoldado ang ginapahog nga pahalinon sa trabaho, multahan, kag prisuhon. Sang Marso 2009, ginpahibalo ang mga kauturan nga ginausisa na sang Human Rights Committee sang United Nations ang duha ka kaso nga ginpasaka tungod sa mga Saksi.

Dugang pa, sang Mayo 2009, nagdesisyon ang European Court of Human Rights nga itingob na lang ang tatlo ka kaso nga wala pa nahusgahan agod masugdan ang pag-imbestigar kon bala gin-abuso ang kinamatarong sang anom ka kauturan nga lalaki—apat sa ila ang madugay na nga napriso. Nagapasalamat ang mga alagad ni Jehova sa ginpakita nga interes sang duha ka hukmanan kag nagalaum nga makabulig ini sa ila.

Uzbekistan

Padayon nga ginadumilian ang mga sumilimba ni Jehova sa Uzbekistan, kag nagalapnag ang paghingabot, nga ginasuportahan sang gobierno, sa aton mga kauturan. Ang isa ka amay nga may duha ka kabataan nga lalaki ginbuy-an sang Mayo 14, 2009, pagkatapos sang duha ka tuig nga pagkabilanggo bangod sang pagpanudlo parte sa relihion. Pagkadason nga adlaw, gindeport sia pakadto sa pungsod nga iya natawhan nga amo ang Tajikistan. Tatlo pa ka utod ang yara sa prisuhan bangod sa panumbungon nga nag-organisar sila “sing ilegal nga buluhaton parte sa relihion.” Nagapreparar ang mga abogado sini nga mga utod para mag-apelar sa Korte Suprema sang Uzbekistan. Pila ka beses nga nagpakigsugilanon ang lokal nga mga utod kag dumuluong nga mga utod sa Uzbekistan State Committee of Religious Affairs kag sa mga representante sini agod masolbar ini nga mga hitabo.

EUROPEAN COURT OF HUMAN RIGHTS

Ang mga Saksi ni Jehova sa Armenia, Austria, Azerbaijan, Cyprus, Georgia, Pransia, Rusya, Serbia, kag Turkey may kabug-usan nga 22 ka wala matatap nga kaso sa European Court of Human Rights (ECHR) sa Strasbourg,  Pransia. Ini nga mga kaso nagaunod sang paglapas sa tawhanon nga kinamatarong nga dapat matigayon sang tanan nga pumuluyo sa idalom sang hurisdiksyon sang European Convention on Human Rights. Siam sa sini nga kaso ang parte sa kinamatarong sa pagpangindi nga magsoldado, pito ang parte sa paghingabot kag pag-ihig-ihig bangod sa relihion, apat ang parte sa pagkuha sing rehistro ukon pagdumili sa mga hilikuton sang mga Saksi ni Jehova, kag duha ang parte sa pagpasilabot sang gobierno sa kinamatarong sa pagtilipon sing mahim-ong para sa pagsimba.

Sang Hunyo 17, 2008, gintatap sang ECHR ang kaso sang Association Les Témoins de Jéhovah (ATJ) batok sa gobierno sang Pransia. Ini nga kaso nagapatuhoy sa di-nagakaigo nga pagpanukot sang 60 porsiento nga buhis sa tanan nga relihioso nga kontribusyon nga nabaton sang ATJ sugod sang 1993 tubtob 1996. Ginapatihan sang Korte nga basi nalapas sang gobierno ang Artikulo 9 sang European Convention parte sa kahilwayan sa relihion. Ang mga Saksi ni Jehova sa Pransia kag sa iban pa nga pungsod nga sakop sang Council of Europe nagahulat kon bala batunon sang Korte ini nga kaso.

Samtang ginatinguhaan ni Satanas nga tublagon ang matuod nga pagsimba paagi sa ‘pagpahito sing kalainan paagi sa palatukuran,’ ang mga alagad ni Jehova nagapabilin nga ‘malig-on sa pagtuo, bangod nahibaluan nila nga ang amo man nga mga pagpaantos ginahimo sa ila bug-os nga paghiliutod sa kalibutan.’ Kabay pa nga ang tanan nga matuod nga sumilimba magapadayon sa ila malig-on nga panindugan batok kay Satanas kag nagatugyan sang tanan nila nga kabalaka sa Dios sang tanan nga kaayo nga nakahibalo nga magaulikid sia sa ila kag magapalig-on kag magapabakod sa ila.—Sal. 94:20; 1 Ped. 5:7-11.

‘KALIPIKADO SA PAGPANUDLO SA IBAN’

Ang paghanas bahin na sa Cristianong kongregasyon sugod pa sang nag-umpisa ini. Ginsilingan ni apostol Pablo si Timoteo: “Itugyan ini nga mga butang sa matutom nga  mga lalaki, nga mangin sangkol nga kalipikado man sa pagpanudlo sa iban.” (2 Tim. 2:2) Sa karon, madamo sing programa sa paghanas ang organisasyon ni Jehova. Halimbawa, sang 2008, may 6,528 ka gulang sa Estados Unidos, Alaska, Bermuda, kag sa Turks and Caicos Islands ang nag-eskwela sa 70 ka klase sang Eskwelahan Para sa mga Gulang sang Kongregasyon sa Watchtower Educational Center sa Patterson, New York.

Ang maid-id nga pagtudlo sa sulod sang isa ka semana nagatuptop sa lainlain nga bahin sa kabuhi sang mga gulang, nga nagabulig sa ila sa pagpanguna sa pagbantala kag para mangin mas epektibo nga manunudlo sa kongregasyon. (2 Tim. 4:5; 1 Ped. 5:2, 3) Ginpalig-on man sila sa klase nga huptan ang ila espirituwalidad kag sang ila pamilya kag ginhanas sila sa ‘paggamit sing husto sa pulong sang kamatuoran’ kon nagabulig sa iban. (2 Tim. 2:15) Ang masunod amo ang pila sa madamo nga pagpasalamat sang mga gulang nga nakaeskwela.

“Ang pagkamapainubuson sang mga instruktor isa ka halimbawa kon paano pakig-angutan ang mga kauturan sa kongregasyon. Nagapasalamat gid ako sa Nagadumala nga Hubon. Ini nga programa sang paghanas isa sa mga dalayawon nga pribilehiyo nga karon ko lang naeksperiensiahan sa sulod sang pila ko ka tuig sa kamatuoran.”

“Nahibaluan sang aton Dios nga si Jehova kon ano ang aton kinahanglan kag kon san-o ini iaman. Napalig-on ang akon pagtuo, kag nangin malipayon pa gid ako sa pag-alagad kay Jehova. Ini nga eksperiensia nakabulig sa akon nga apresyahon ang mga aman ni Jehova paagi sa iya makita nga organisasyon. Nakabulig man ini sa akon nga makita kon paano niya ginatatap ang iya katawhan.”

“Makalilipay gid ini nga eksperiensia. Samtang nagadugang ang akon natun-an sa eskwelahan, narealisar ko nga madamo pa ako sing wala mahibaluan. Mas ginapabaloran ko karon ang personal nga pagtuon, kag nahangpan ko man kon ngaa dapat ko gid iaplikar ang akon natun-an.”

 “Ini nga paghanas nakabulig sa akon nga tatapon ang akon pamilya kag ang kongregasyon, nga ginailog ang mga kinaiya ni Cristo. (1 Cor. 2:16) Nakabulig man ini sa akon nga mausisa ang akon kaugalingon.”

“Indi ko gid pag-ibaylo ining isa ka semana upod ang mga manunudlo ni Jehova sangsa pag-eskwela sa isa ka unibersidad.”

“Isa gid ka makapalig-on kag mapuslanon nga eksperiensia! Nagbulig ini sa akon nga mangin aktibo pa gid sa pag-alagad kay Jehova, mangin masinakripisyuhon, kag mangin makapalig-on sa aton mga kauturan. (Isa. 32:2) Madamo gid nga salamat, Jehova!”

“Paagi sa sini nga kurso natun-an namon ang gugma ni Jehova. Daw kaangay lang nga gin-sheperding niya kami.”

“Ginapasalamatan ko gid si Jehova sa pribilehiyo nga matun-an kon paano tungdan sing maayo ang akon asaynment para sa iya kahimayaan kag kadayawan.”

Sa palaabuton, ang Nagadumala nga Hubon magapahibalo sang mga kahimusan para sa mga gulang sa iban nga lugar agod makabenepisyo sa sining suno sa tion nga paghanas.

ANG MGA DEDIKASYON SANG SANGA NAGAHATAG SING KALIPAY

Sang Enero 24, 2009, si Samuel Herd sang Nagadumala nga Hubon amo ang humalambal sa dedikasyon sang bag-o nga sanga sa Tanzania, sa Sidlangan sang Aprika. Sang nagligad nga 25 ka tuig, ang una nga bilding sang sanga human sa adobe nga may tatlo lang ka hulot. Kilala ini sang mga Saksi sa bilog nga Tanzania subong House Number 46, Magomeni Quarters. Madamo sa 779 ka malipayon nga bisita halin sa 22 ka pungsod ang naghibi samtang ginadumdom nila ang pag-uswag sang hilikuton sugod sang ginkuha ang pagdumili sang 1987. “Si Jehova lamang ang  makahimo sini sa sini nga pungsod,” siling sang isa nga madugay na sa kamatuoran. Mainuswagon na karon ang pagbantala nga hilikuton, kag kapin sa 14,000 ka manugbantala ang malipayon kag mapinasalamaton kay Jehova, kag nagahimaya sa Iya ngalan.—Sal. 92:1, 4.

Sang Sabado, Mayo 2, 2009, mga 600 ka kauturan gikan sa 31 ka pungsod ang nagtambong sa pamulongpulong ni Theodore Jaracz sang Nagadumala nga Hubon sa dedikasyon sang sanga talatapan sa Netherlands. Ang orihinal nga bilding nga ginpatindog sang 1983 ginsugpunan sing isa ka ilistaran para sa mga Bethelite. Ang mga hulot nga ginagamit anay sa pag-imprinta sang mga magasin ginhimo nga mga opisina kag video studio para sa Regional Audio Video Center (RAVC). Ang RAVC nagabulig sa paghimo sing mga CD kag DVD sa 24 ka lenguahe, nga ang kalabanan sini ginapamulong sa Europa. Dugang pa, nagabulig man ang RAVC sa paghimo sang mga video sa 20 ka lainlain nga sign language.  Ang ila hilikuton nagalakip sa pagtatap sa paghimo sang mga CD sa Europa, Aprika, kag Oceania, kag sang mga DVD sa bilog nga kalibutan. Ang sanga sa Netherlands nagapamakal man kag nagapadala sang mga butang nga kinahanglan sang iban nga sanga, kag ining ginbag-o nga mga pasilidad nagakaigo gid para sa sini nga mga hilikuton.

“MAGPABILIN KAMO SA GUGMA SANG DIOS”

Matuod, madamo kita sing rason nga magkalipay. Ginapakamaayo gid kita sa sining makalilipay nga mga tion! Huo, subong sang gintagna, ang “katapusan nga mga adlaw” amo ang “makahalanguyos nga mga tion nga mabudlay atubangon.” (2 Tim. 3:1) Apang, samtang malapit na ang kaluwasan, importante gid nga pamatian sang kada isa sa aton ang laygay ni Judas: “Kamo, mga hinigugma, paagi sa pagpalig-on sang inyo kaugalingon sa inyo labing balaan nga pagtuo, kag sa pagpangamuyo nga may balaan nga espiritu, magpabilin kamo sa gugma sang Dios, samtang nagahulat kamo sang kaluoy sang aton Ginuong Jesucristo nga nagadul-ong sa kabuhi nga walay katapusan.”—Jud. 20, 21.

[Graph sa pahina 13]

(Para sa aktual nga pormat, tan-awa ang publikasyon)

MGA NAGABUKAS SANG www.watchtower.org KADA ADLAW

70,000

50,000

30,000

10,000

1999 2001 2003 2005 2007 2009

[Mapa sa pahina 21]

(Para sa aktual nga pormat, tan-awa ang publikasyon)

Mga Pungsod nga May Talalupangdon nga Hitabo Parte sa Aton mga Kaso

AUSTRIA

EGYPT

ERITREA

UGANDA

SOUTH AFRICA

MOLDOVA

ARMENIA

TURKEY

AZERBAIJAN

RUSSIA

KAZAKHSTAN

UZBEKISTAN

TAJIKISTAN

INDIA

SOUTH KOREA

[Retrato sa pahina 11]

Bisan ang mga kabataan nga manugbantala nalipay sa pagtanyag sing mga pagtuon sa Biblia

 [Mga Retrato sa pahina 27]

Ang Eskwelahan Para sa mga Gulang sang Kongregasyon nagbulig sa mga gulang nga matuman ang ila teokratikong mga responsibilidad

[Mga Retrato sa pahina 28]

Si Utod Jaracz nga nagapamulongpulong sa dedikasyon sang sanga sa Netherlands

[Mga Retrato sa pahina 29]

Si Utod Herd nga nagapamulongpulong sa dedikasyon sang sanga sa Tanzania