Pagbantala kag Pagpanudlo sa Bug-os nga Duta

PARA sa iya mga disipulo sang unang siglo, daw makalilibog ang ginsiling ni Jesus sa ila. Gintagna niya nga mangin sentro sila sang kaugot sang tanan nga pungsod—patyon sila kag itugyan sa kapipit-an. Isa pa, madamo ang masandad kag magaluibay. Pero, nagsiling si Jesus nga ang maayong balita ibantala sa bug-os nga duta. (Mat. 24:9-14) Paano nagmadinalag-on ang pagbantala sa bug-os nga duta walay sapayan sang mga pagpamatok? Masabat ini nga pamangkot sa masunod nga mga pahina.

 2010 Kabilugan nga Kadamuon

Mga Sanga sang mga Saksi ni Jehova: 116

Kadamuon sang Kadutaan nga Nagreport: 236

Kadamuon sang Kongregasyon: 107,210

Nagtambong sa Memoryal sa Bug-os nga Kalibutan: 18,706,895

Nakig-ambit sa Emblema sang Memoryal sa Bug-os nga Kalibutan: 11,202

Pinakamadamo nga Manugbantala sa Pag-alagad sa Ginharian: 7,508,050

Aberids nga mga Manugbantala nga Nagabantala Kada Bulan: 7,224,930

Porsiento sang Kalabawon sa 2009: 2.5

Kabilugan nga Nabawtismuhan: 294,368

Aberids nga Auxiliary Payunir Kada Bulan: 287,960

Aberids nga Payunir Kada Bulan: 844,901

Kabilugan nga Oras sa Latagon: 1,604,764,248

Aberids nga mga Pagtuon sa Biblia Kada Bulan: 8,058,359

Sang 2010 nga tuig sang pag-alagad, ang mga Saksi ni Jehova naggasto sing kapin sa $155 milyones para sa mga espesyal payunir, misyonero, kag mga nagalakbay nga manugtatap sa ila mga asaynment.

◼ Sa bug-os nga kalibutan, 20,062 ka ordenado nga ministro ang nagaboluntaryo sa pasilidad sang mga sanga. Ang tanan katapo sang Bug-os Kalibutan nga Grupo sang Pinasahi nga Bug-os Tion nga mga Alagad sang mga Saksi ni Jehova.

 APRIKA

PUNGSOD 57

POPULASYON 888,219,101

MANUGBANTALA 1,222,352

PAGTUON SA BIBLIA 2,596,614

GRUPO NGA NAGAPANGITA SING KAMATUORAN. Sa gamay nga minuro sa Madagascar, nagdesisyon ang 80 ka tawo nga maghalin sa pinakadaku nga simbahan sang Protestante. Nagtukod sila sang isa ka simbahan kag nangita sang matuod nga relihion, amo nga isaisa nila nga gin-usisa ang mga relihion sa ila lugar. Naghinakop sila nga wala ginatun-an sang mga Katoliko ang Biblia kag wala nagahangpanay ang mga Lutherano. Nagapati man sila nga wala nagatudlo sang kamatuoran ang mga Pentecostal, kag madamo sang ginadili ang mga Adbentista. Nian ginpangabay  nila ang isa ka utod nga tudluan sila sa Biblia. Nagsugot gilayon ang utod.

Ginduaw sang pila ka manugbantala ini nga mga interesado. Nagkadto ang mga utod sa simbahan nga ila ginhimo. Nagatipon diri ang 26 sa ila, kag handa sa pagpamati sing mensahe parte sa Biblia. Gingamit sang mga utod ang kapitulo 15 sang libro nga Ginatudlo Sang Biblia para ipaathag kon paano masapwan ang relihion nga ginakahamut-an sang Dios. Kumbinsido gid ang mga tawo sa ginpaathag sa ila. Sang nagbalik ang mga utod, 73 na ang ila naabtan. Kag sa ikatlo nila nga pagduaw, 142 ang nagtambong!

NAGTALANG NGA TEXT. Ginteksan sang Saksi nga babayi nga si Menen, nga nagaistar sa Etiopia, ang iya estudyante sa Biblia sing 2009 tuigan nga teksto para palig-unon. Pero, lain nga numero ang iya nateksan. Sulitsulit nga ginbasa ini sang babayi nga iya nateksan: “‘Magpanaksi sing maid-id sa maayong balita.’—Binu. 20:24, NW.” Mahinadlukon sia sa Dios, gani ugyon gid sia sa mensahe pero indi niya mahibaluan kon paano ini himuon. Naglibog man ang iya ulo sa “NW” [New World Translation] nga yara sa punta. Pagligad sang pila ka semana, indi gihapon sia maributay. Sang ulihi, gintawgan niya ang nag-text sa iya. Nakibot ang utod sang nabatian niya ang natabo, pero ginkalitan niya ang kahigayunan nga sabton ang sinsero nga pamangkot sang babayi. Bangod sini, nasugdan ang pagtuon sa Biblia, nga ginahiwat sing duha ka beses kada semana.

BATA NGA PAYUNIR. Si Persis, nga nagaistar sa Cameroon, nangin di-bawtismado nga manugbantala sa edad nga seis anyos. Sa iya una nga report, napulo ang iya ginlista nga pagtuon sa Biblia. Abi sang sekretaryo kon nagsala lang sia. Sang ginpamangkot sia, ginpaathag ni Persis sa iya nga napulo gid man ang iya ginatun-an. Namangkot  pa gid ang sekretaryo: “Paano mo nahibaluan ang imo oras, kay wala ka man sing relo?” Nagsabat sia nga nahibaluan niya nga isa ka oras ang ila recess. Nagasugod sia sa pagbantala kag nagauntat sa pagtunog sang bell. Ang iya kasidla sa pagpanaksi nakaimpluwensia man sa iya iloy kag pakaisa, nga sang ulihi nangin di-bawtismado nga manugbantala. Karon dies anyos na si Persis, bawtismado na kag auxiliary payunir samtang nagaeskwela. Ang iya otso anyos nga abyan nga si Aasy nangin di-bawtismado man nga manugbantala. Nagsiling ang isa ka estudyante sa Biblia parte sa ila: “Sa tion sang mga miting nalipay gid ako nga makita ang mga kabataan nga nagatamyaw sa tanan, ilabi na sa mga tigulang, antes magpungko upod sa ila mga ginikanan. Wala ko gid ini nakita sa amon simbahan. Nahibaluan ko nga mangin maayo nga mga tawo ini nga mga kabataan sa ila pagdaku.”

 AMERIKA

PUNGSOD 55

POPULASYON 918,834,998

MANUGBANTALA 3,673,750

PAGTUON SA BIBLIA 3,967,184

WALA SIA NANUKTOK. Si Miriam, nga nagaistar sa Bolivia, isa ka semana na nga nagapangamuyo sa Dios. Amo ini ang iya pangamuyo: “Palihug buligi ako nga makilala ka, pero indi ko gusto ang bulig sang mga Saksi ni Jehova. Indi ko luyag nga manuktok sila sa akon puertahan.”

Sang ulihi sa sina nga semana nagtunog ang telepono. Si Candy ang nanawag, isa ka espesyal payunir, nga nagtanyag nga sa sulod sang isa ka oras dal-an niya si Miriam sang aton mga magasin. Nagpasugot sia. Pagligad sang mga isa ka oras, ara na si Candy sa ila balay. Ginbuksan niya gilayon ang puertahan kag ginpasulod si Candy kag ginpapungko. Nian nagpakadto-pakari si Miriam nga nagalungolungo, kag maathag nga wala nahamuot. Ginpamangkot sia ni Candy kon ngaa. “Nakibot gid ako!” siling ni Miriam. “Kay sa kapin sa isa ka semana, nagapangamuyo ako sa Dios nga tuytuyan kag giyahan niya ako, pero maathag ang akon pangamuyo nga indi ko luyag ang bulig sang mga Saksi ni Jehova nga pirme nagapanuktok sa amon balay! Kag nian gintawgan mo ako imbes nga manuktok! Sugod sang nagtawag ka sang nagligad nga isa ka oras, nangamuyo ako sa Dios nga kabay pa nga indi ka magkadto diri. Pero ari ka! Indi gid ako makapati! Maathag gid nga luyag niya nga kamo nga mga Saksi ni Jehova ang magbulig sa akon.” Nasugdan gilayon ang pagtuon.

GINBAYAAN NILA SIA NGA DAW PATAY NA. Si Pasensi isa anay ka bantog nga lider ukon kapiten sang isa ka minuro sa  Suriname kag kaalyado sang granman, ang chieftain, ukon hari sa mga lugar sa tanan nga suba nga yara sa interyor. Si Pasensi mapagsik gid sa pagpangapin sang lokal nga mga tradisyon. Ginpamatukan niya ang mga Saksi ni Jehova bangod nagapati sia nga indi sila ugyon sa ila mga tradisyon.

Sang ulihi, isa ka pamatan-on ang nangangkon nga may ikasarang sia sa pagkilala sa mga manughiwit. Gin-updan sia sang iya madamo nga sumulunod sakay sa baruto para kadtuan kag bakulon ang mga ginasumbong nga manughiwit kag ginpanguha ang ila mga kagamitan. Daku nga kuarta ang ginbayad sa sini nga pamatan-on para “dulaon” kuno ang malain nga espiritu sa mga ginsumbong. Lakip sa inosente nga mga biktima amo si Pasensi, nga ginbakol kag ginbiyaan nga daw wala na sing kabuhi. Bisan ang iya abyan, ang granman wala nakabulig sa iya, kay nahadlok nga mabutang sa katalagman ang iya kabuhi kag ang iya reputasyon kon buligan niya ang isa nga ginsumbong nga manughiwit. Wala gintugutan nga magbulig ang mga abyan kag mga paryente. Pero nangisog ang umagad nga lalaki ni Pasensi kag gindala sia sa isa ka minuro nga halos Saksi ni Jehova ang nagaistar. Ginhinun-anunan sang mga utod ini  nga butang kag bisan nahibaluan nila nga mabutang sila katalagman, ginbuligan nila sia. Ginhikutar nila nga pasakyon si Pasensi sa isa ka baruto pakadto sa kaingod nga minuro sa diin may isa ka utod nga nagatrabaho subong manedyer sang isa ka hulugpaan sang eroplano. Gikan diri, ginkarga sa eroplano ining manugpamatok para ipabulong sa siudad.

Nag-ayo sia, kag natandog gid sa gugma nga ginpakita sang katawhan nga iya ginpamatukan. Nagtuon sia sa Biblia kag nabawtismuhan sang Disiembre 2009. Si Pasensi makugi na subong nga manugbantala sang maayong balita, kag nag-auxiliary payunir sang Abril 2010, bisan 80 anyos na sia.

ABI NIYA KON EKSPERTO NA SIA SA BIBLIA. Ang buranguson nga si Eric nagtambong sa miting sang kongregasyon sa Estados Unidos nga may dala nga Biblia. Sang gintamyaw sia sang isa ka utod, namangkot dayon sia parte sa aton mga pagtuo. Indi niya luyag gamiton ang Ginatudlo Sang Biblia nga libro, bangod mas gusto niya nga Biblia lang ang gamiton. Nagabasa sia sing 20 ka pahina sang Biblia kada adlaw, kag indi na niya madumduman kon pila na ka beses niya nga nabasa ang bug-os nga Biblia. Pagkatapos sang miting, nagpadayon sing kapin pa sa tatlo ka oras ang ila paghinun-anon sang utod. Sang manugpauli na sia, nagsiling si Eric, “Naugot gid ako.” Namangkot ang utod kon ngaa. Nagsabat si Eric: “Abi ko eksperto na gid ako sa Kasulatan. Pero, pagkatapos sang aton pag-istoryahanay, narealisar ko nga wala ko gid gali ini nahangpan.” Nian ginbaton niya ang Ginatudlo Sang Biblia nga libro.

Pagkadason nga adlaw, nagsugod sila sa pagtuon. Antes sini, ginbasa ni Eric sina nga gab-i ang unang napulo ka kapitulo sang libro. Ano ang iya komento? “Nasapwan ko gid man ang kamatuoran!” Nagatuon sila sing tatlo tubtob apat ka oras kada adlaw kag lima ka adlaw kada semana. Ginahandaan man niya kag ginatambungan ang tanan nga miting upod sa iya bilog nga pamilya. Sa una nga semana,  naghimo sia sing sulat para magresayn sa tatlo ka relihion, namarbas kag namat-od nga indi na magselebrar sing mga kapiestahan. Pagligad sang duha ka semana nagpalista sia sa Teokratikong Eskwelahan Para sa Ministeryo, kag pagligad sang apat ka semana nangin di-bawtismado sia nga manugbantala. Nabawtismuhan sia sang Abril 2010, mga anom lamang ka bulan sugod sang naistorya niya ang mga Saksi ni Jehova!

SIETE ANYOS PA LANG, BAWTISMADO NA. Si Paola, nga nagaistar sa katundan sang Mexico, ginpadaku sang iya lolo kag lola. Sang singko anyos pa lang si Paola, nagtuon na sa Biblia ang iya lola upod sa mga Saksi ni Jehova. Nagapamati man si Paola sa ila pagtinuon, kag nagtudok sa tagipusuon niya ang kamatuoran. Bisan pa wala nag-uswag ang iya lola, isahanon nga nagatambong si Paola sa mga miting. Ginabuligan sia sang iya lolo kag lola sa pagsuksok sang iya bayo kag pagtabok sa dalan pakadto sa Kingdom Hall.

Sang nakahibalo na sia sa pagbasa kag pagsulat, nagpalista si Paola sa Teokratikong Eskwelahan Para sa Ministeryo  kag nangin manugbantala. Bangod sang iya gugma kay Jehova, nabawtismuhan sia sa edad nga pito. Ginpamangkot sia kon ngaa nagatambong sia sa mga miting kag nagabantala sing makugi bisan pa wala sia ginaupdan sang iya pamilya. Si Paola, nga dies anyos na sa sini nga tion, nagsabat: “Nanamian gid ako sa mga pamulongpulong bangod nagapalig-on ini sa akon nga magtuon sa Biblia kag mangin mabuot. Kag nagabantala ako bangod luyag ko tudluan ang mga tawo kon ano ang himuon ni Jehova sa ila sa palaabuton kag para mangin malipayon sila karon sa bulig sang Biblia.”

PAGPANAKSI SA MGA NAGTALANG NGA TAWAG. Sa Dominican Republic, isa ka utod nga babayi ang pirme makabaton sing nagtalang nga mga tawag sa telepono, nga nagatublag sa iya trabaho. Pagligad sang pila ka adlaw, naghunahuna sia, ‘Mahimo ko ini kalitan nga kahigayunan para makapanaksi.’ Paano niya ini ginhimo? Kon nagasabat sa nagtalang nga mga tawag, nagapangayo sia sing pasensia kay nagtalang ang ila tawag, nian nagasiling sia, “Luyag ko kalitan ini nga kahigayunan para pamangkuton ka, Nakabasa ka na bala sing Biblia sa sini nga adlaw?” Bisan pa ginabutang sang iban ang telepono, may pila nga nagasabat nga wala pa sila nakabasa. Nian mamangkot sia, “Kabalo ka bala kon ngaa importante nga basahon ini?” Nian ginabasa niya ang sabat sa Kasulatan nga masapwan sa Salmo 1:1-3. Isa ka bes, madugay nga nag-istoryahanay ang utod kag ang isa ka opisyal sang gobierno nga nagsiling nga wala sia sing Biblia. Naghimo sing kahimusan para madul-ungan sia sing Biblia kag pila ka literatura. Pagligad sang duha ka semana, gintawgan sia sang opisyal para pasalamatan sa mga literatura kag sa pagpakita sing interes sa iya.

Sa isa pa ka nagtalang nga tawag, namangkot ang pamatan-on nga babayi, “Saksi ka ni Jehova?” Sang nagsabat sia nga huo, naghibi ang babayi, nga nagapaathag nga isa sia ka di-aktibo nga manugbantala. Ginpalig-on sia sang utod kag naghimo sing kahimusan para mabuligan sia sa espirituwal. Aktibo na sia karon nga manugbantala.

 ASIA KAG MIDDLE EAST

PUNGSOD 47

POPULASYON 4,587,021,833

MANUGBANTALA 652,251

PAGTUON SA BIBLIA 601,306

“SAMARITANA.” Sang tig-ilinit sa Kazakhstan, nagbantala ang duha ka payunir, lalaki kag babayi, kag nakita nila ang isa ka babayi nga nagasag-ub sa bubon. Nangayo sing tubig ang utod nga lalaki, kag samtang nagainom sia, ang iya upod nga utod nga babayi nagpanaksi sa babayi. Interesado ang babayi kag gin-agda pa sila nga magdayon sa iya balay para mahibaluan pa gid niya kon ano ang ila luyag isugid. Madugay ang ila pag-istoryahanay, kag ginbilinan sia sang mga payunir sang mga literatura. Nagsaad ang utod nga babayi nga balikan sia pagligad sang duha ka adlaw.

Pagligad sang duha ka adlaw, nagbalik ang utod nga babayi upod sa iya iloy, nga isa man ka Saksi. Naabtan nila ang babayi sa gua sang iya balay nga nagahulat sa ila, kag nagauyat sang mga literatura nga ginbilin sa iya. Ginbalik niya ini sa utod kag nagsiling: “Iya ini sang mga Saksi ni Jehova! Ang inyo relihion iya sang mga Ruso!”

Nian nangabay ang iloy kon puede sia makabasa sing isa ka teksto antes sila maghalin. Luyag niya ipakita sa babayi ang ngalan sang Dios sa Kasulatan, ginbuksan niya ang Exodo 3:15 kag ginbasa: “Ginpadala ako sa inyo ni Jehova nga Dios sang inyo mga katigulangan, ang Dios ni Abraham, ang Dios ni Isaac kag ang Dios ni Jacob.” (NW) Nakibot ang mga utod kay ginpadayon sila  sang babayi. Ngaa hinali lang nagbag-o ang iya hunahuna? Ang babayi may katigulangan nga ang ngalan Abraham, Isaac, kag Jacob. Nangatarungan sia nga kon ang Dios sang iya mga katigulangan amo si Jehova, indi niya dapat pagtabugon ang Iya mga Saksi. Nasugdan ang pagtuon sa Biblia sa masunod nga pagduaw. Nalangkag gid sia nga matun-an ang kamatuoran amo nga duha ka beses sila nagatuon kada semana. Bisan pa sa pagpamatok sang iya mga bata nga lalaki, nag-uswag ang iya pagtuo, kag di-bawtismado na sia nga manugbantala subong. Isa pa, ang iya umagad nga babayi kag ang iya iloy nagatuon sa Biblia kag regular nga nagatambong sa mga miting. Bangod sang una nga pag-istoryahanay nga daw pareho sa kasaysayan sa Juan 4:3-15, nakilal-an sia sa kongregasyon subong “Samaritana.”

“MAY MGA PAMANGKOT AKO.” Nagsulat ang isa ka tigulang nga payunir sa Cyprus: “Sang isa ka Mierkoles sang aga, malain gid ang akon pamatyag, pero imbes nga magtener sa balay, gusto ko gid manaksi sa parke. Gani nangamuyo ako kay Jehova nga nagapangabay nga may matupad sa akon ginapungkuan kag may tion sa pagpakigsugilanon, para masugdan ko sia sing pagtuon sa Biblia. Wala magdugay nagpalapit ang isa ka pamatan-on nga lalaki nga taga-Nepal. Nagauyat ako sang mga magasin, kag antes pa ako makahambal sa iya, ginpamangkot na niya ako kon parte sa ano ang mga magasin nga akon ginauyatan. Sang ginsugiran ko sia nga pasad ini sa Biblia, nagsiling sia: ‘Mam, wala pa man ako sing himuon, puede ’ko katupad sa imo? May mga pamangkot ako sa imo parte sa Biblia.’

“Siempre pa nagsugot ako kay amo ini ang akon ginpangabay kay Jehova! Nagpadayon ang tawo: ‘Ang una ko nga pamangkot, Ano gid ang ginatudlo sang Biblia?’ Nakibot gid ako, amo nga daw indi ako makasabat!  Ginkuha ko ang libro nga Ano Gid ang Ginatudlo Sang Biblia? kag ginpakita ko ini sa iya. Gintulok niya ang libro, gintulok ako, kag namangkot, ‘Indi bala nga ang tig-ulo sini nga libro amo ang akon pamangkot sa imo?’ Gani ginsugdan ko gilayon ang pagtuon sa Biblia didto mismo sa pulungkuan sa parke! Regular na sia karon nga nagatuon sa Biblia kag nagatambong sa mga miting, kag luyag na niya magpalista sa Teokratikong Eskwelahan Para sa Ministeryo. Naapresyar ko gid ang bug-os nga pagsalig sa kusog kag panuytoy ni Jehova sa pagtuman sang Cristianong ministeryo, bisan pa ginakapoy ako kon kaisa.”

GINTUDLUAN SANG LOLO ANG NAGPATAY SA IYA APO. Ginpatay ang apo ni Miguel sang nagligad nga pila ka tuig. Ang nagpatay amo si Esmeraldo. Nadakpan sia pero wala nag-aku sang ginbista sa korte. Pero, bangod sang ebidensia, napriso sia.

Sang ulihi, ginhagad sang isa ka gulang si Miguel nga mag-upod sa iya sa pagpanaksi sa prisuhan sa Pilipinas  nga ginprisuhan kay Esmeraldo. Nangalag-ag si Miguel, kay nahibaluan niya nga didto ginpriso ang nagpatay sa iya apo. Apang, nag-upod sia kag nakigbahin sa pagtudlo sa pila ka priso nga nagatuon sa Biblia. Sa tion sang pagtuon, nakita niya si Esmeraldo nga nagapalapit sa iya. Para malikawan ang malain nga matabo, kalmado nga ginsugilanon sia ni Miguel, nga nagasiling: “Esmer, wala ako nagkadto diri para mangita sing gamo, kundi magpakita sing gugma sa mga tawo nga pareho sa imo. Tan-awa bala, nagahinun-anon kami sini nga tawo sa Biblia. Wala ka kuntani diri kon nakatuon ka sa Pulong sang Dios. Palihug magtuon ka sing Biblia.” Nakibot si Miguel, kay nagpabilin si Esmeraldo sa bug-os nga pagtuon. Natandog gid sa iya nabatian, gin-aku niya kay Miguel nga sia ang nagpatay sa iya apo. Nian nangayo sia sing pasaylo.

Bangod wala nabatian sang gulang ang ila ginaistoryahan, kag nakita niya nga daw maayo man sila, ginpangabay niya si Miguel nga tun-an si Esmeraldo. Sang primero, ginkulbaan si Miguel kay nahibaluan niya nga indi lang iya apo ang ginpatay sini nga tawo, pero nagpasugot sia. Medyo nabudlayan si Esmeraldo sa pagsunod sa mga talaksan sang Dios, pero nagmadinalag-on sia sang ulihi, kag nabawtismuhan sia sang Pebrero 1, 2010. Bilang pagpakita sang Cristianong pagkamapinatawaron, ginatinguhaan karon ni Miguel nga mapalip-ot ang sentensia kay Esmeraldo agod makaupod niya sia sa pagpaambit sang mga kamatuoran sa Biblia.

 EUROPA

PUNGSOD 47

POPULASYON 739,193,855

MANUGBANTALA 1,575,094

PAGTUON SA BIBLIA 830,888

NATUMAN ANG IYA DUHA KA HANDUM. Ang 19 anyos nga si Nelena nga nagaistar sa Bulgaria, may duha ka handum—magpabawtismo kag mag-auxiliary payunir. Pero, may napanubli sia nga balatian nga ginatawag motor and sensory neuropathy, nga sa karon indi pa mabulong. Bangod nagaginhawa sia sa bulig sang isa ka aparato, indi sia makahulag sing maayo. May problema para matuman ang iya una nga handum nga magpabawtismo, bangod indi sia makahalin sa iya apartment para magtambong sa asembleya. Gani sang 18 anyos sia, naghatag sing pamulongpulong pasad sa Kasulatan sa iya puluy-an kag pagkatapos ginbawtismuhan sia sa tub.

Kamusta ang iya handum nga mag-auxiliary payunir? Sa tion nga maayo ang panahon, mahimo sia makaginhawa sing isa ka oras nga wala sing aparato. Gani nag-aplay sia subong auxiliary payunir, kag ginatulod sang manugbantala ang iya wheelchair sa pagpamalaybalay. Nagadumala man si Nelena sing pagtuon sa Biblia  paagi sa Internet. Kon kaisa, ginadumalahan sang mga utod nga babayi sa ila kongregasyon ang ila mga pagtuon sa Biblia sa puluy-an ni Nelena, amo nga makapakigbahin sia. Gani, nakaauxiliary payunir si Nelena sing tatlo ka beses sang nagligad nga tuig. Nagsiling sia: “Nalipay gid ako kay natuman ang akon duha ka handum. Bangod sini nangin mas suod ako kay Jehova, ang akon mahigugmaon nga Manunuga.”

NAGAKURBATA NA SIA SUBONG. Ang isa ka utod nga babayi sa Armenia ginayaguta sa iya ulubrahan bangod Saksi sia ni Jehova. Pirme sia ginayaoyao sang iya katrabaho, nga nagasiling “nga ang mga tawo nga nakakurbata” nagkumbertir sa iya sa ila relihion. Pagkatapos sang iya madamong beses nga pagpangatarungan, wala sia ginpamatian. Gani, nagdesisyon na lang sia nga indi na niya pagsapakon ang iya pagyaguta, bilang pag-ilog kay Jesucristo, nga ‘wala magsabat.’ (Mat. 27:12) Sang ulihi, napahalin ini nga tawo bangod sang iya malain nga batasan kag paggamo sa aton utod. Pagligad sang binulan, may tawo nga nagkadto sa ginaubrahan sang utod kag ginapangita sia. Amo ini ang iya katrabaho anay nga nagayaguta sa iya. Nakibot gid ang utod sa iya pamustura. Bisan pa ginayaguta niya ang mga Saksi sa pagsuksok sing kurbata, nagapangurbata na sia subong kag may dala pa nga bag nga nagaunod sang mga libro. Nagsiling sia sa aton utod: “Pasensia ka na sa masakit nga ginhambal ko sadto. Nahibaluan ko na karon ang kamatuoran.” Nagtuon sia sa Biblia upod sa mga Saksi ni Jehova, kag bisan pa sa pagpamatok sang iya pamilya, nagpabawtismo sia kag nangin regular payunir.

“KILALA MO SI MRS. NADIA?” Isa ka payunir sa aminhan sang Italya si Nadia. Sang Septiembre 2009, naistorya niya ang isa ka lalaki paagi sa intercom nga nagsiling gilayon sa iya nga bag-o lang napatay ang iya asawa kag indi niya luyag nga makig-istorya. Pagkasunod nga  Domingo, nagbalik si Nadia para ipalab-ot ang iya kasubo kag ipaambit ang paglaum sa Biblia nga pagkabanhaw, pero amo lang gihapon ang reaksion sang tawo. Ang Pagtinuon sa Ang Lalantawan sa sina nga hapon nagalakip sa eksperiensia sang isa ka utod nga nagpadala sing sulat sa isa ka tawo nga napatyan. Nadumduman ni Nadia ang tawo nga iya naistorya sa intercom, gani naghimo sia sing sulat para ipalab-ot ang iya pangasubo kag ipaambit ang paglaum nga pagkabanhaw. Pagligad sang duha ka adlaw, ginbilin niya ang sulat sa mailbox sang tawo.

Pagligad sang pila ka adlaw, nagapanaksi sa kalye si Nadia kag ginsugilanon ang isa ka tawo nga mga 70 anyos kag ginbasahan niya sing isa ka teksto. Namangkot ang tawo kon Saksi sia ni Jehova, kag nagsabat si Nadia nga huo. Ginpaathag sang tawo nga nakadtuan sia sang isa sa mga Saksi ni Jehova, nga nagpadala sa iya sang isa ka matahom nga sulat nga naglugpay gid sa iya. Namangkot sia, “Kilala mo si Mrs. Nadia?” Nakibot sila nga duha, kag ginpakilala ni Nadia ang iya kaugalingon kag naghimo sing kahimusan nga maduaw sia upod sa iya bana. Wala lamang nagtuon sa Biblia ang tawo kundi regular man sia nga nagatambong sa mga miting.

INDI NILA MAARAPALAN TUN-AN. Apat ka bawtismado nga Saksi ang nagaistar sa banwa sang Bujanovac sa bagatnan sang Serbia. Ining mga manugbantala nalipay gid bangod  460 ang nagtambong sa Memoryal sang 2010! Ang gulang sa kaingod nga kongregasyon nag-organisar sing regular nga mga miting sa Bujanovac sa isa ka ginaarkilahan nga pasilidad. Kapin sa 50 ang aberids nga nagatambong—kalabanan sa ila mga Roma. Bangod madamo ang interesado sa mensahe sang Ginharian, ang mga espesyal payunir sa sini nga lugar indi makaarapal sa pagtuon sa tanan nga interesado. Gani, ginatun-an na lang nila ang mga nakahanda sing maayo sa tanan nga miting.

KAPIN SIEN ANYOS! Si Elin, ang pinakatigulang nga manugbantala sa Sweden, nagaedad sing 110 anyos, pareho sang nalab-ot nga edad ni Josue. (Jos. 24:29) Nagaistar sia sa balay alaypan kag ginakalitan niya ang tanan nga kahigayunan sa pagpanaksi sa mga bisita kag sa tanan nga iya masugilanon. Madamo nga libro ang iya napahamtang. Sang nagabantala sa mga pamalay sa palibot ang isa ka gulang upod sa iya bata nga babayi, nasugilanon nila ang isa ka pamatan-on nga babayi nga nagsiling nga nabantalaan sia ni Elin kag ginhatagan sia sing libro. Nagresulta ini sa maayo nga pag-istoryahanay. a

NAKITA NIYA ANG MGA LIBRO SA SIMBAHAN. Si Tatyana, nga nagaistar sa Belarus, nakibot sang gintawgan sia sang isa ka pamatan-on nga babayi nga indi niya kilala. Luyag sang babayi nga masabat ang iya mga  pamangkot parte sa Biblia. Nangin maayo ang ila pag-istoryahanay. Pero, paano niya nakuha ang numero sang telepono ni Tatyana? Ginpaathag sang babayi nga sang nagsimba sia, nakita niya ang Ginatudlo Sang Biblia nga libro kag New World Translation sa idalom sang pulungkuan, kag nasulat diri ang numero sang telepono ni Tatyana. Ngaa yara sa simbahan ang mga libro? Gindala ini sang iloy sang isa ka lin-ay nga ginatun-an sa Biblia ni Tatyana. Maathag nga gusto sang iloy nga ipausisa sa pari kon bala dapat ini basahon sang iya bata. Ambot lang kon ngaa nabilin ini nga mga libro sa idalom sang pulungkuan. Nakita ini sang babayi diri kag gindala niya ini pauli. Ang iya pagtawag nagresulta sa dugang pa nga paghinun-anon sa Biblia.

NADULA NGA AMERIKANA. Natalupangdan ni Elena, nga isa ka espesyal payunir nga babayi, ang isa ka amerikana sa dalan sa Minsk, Belarus. Matinlo pa ini kag imposible nga ginhaboy na. Ginpulot niya ini, kag nakita niya sa bulsa ang $1,200 (U.S.). Ginpanilagan niya ang mga nagalalabay kag nakilala niya gilayon ang tag-iya. Nagadalagan ang tawo nga daw may ginapangita. Ginlagas sia ni Elena. Negosyante sia nga taga-Bangladesh, kag nagaistar sa Moscow. Nalipay gid sia kay nabalik ang iya amerikana kag ang iya kuarta. Namangkot sia kon ngaa gin-uli sang utod ang amerikana kag naglagas pa gani sa iya. Ginpaathag sang utod nga isa sia ka Saksi ni Jehova. Nagsiling ang tawo nga sang nagligad nga pila ka adlaw ginsugilanon sia sang duha ka Saksi. Sa sulod sang 30 minutos, ginbais niya sila kag ginpangapinan ang iya pagpati. Nian namangkot ang tawo kay Elena kon paano sia makabalos. Nagsiling si Elena nga wala sia nagahingamo sing padya pero ang pinakamaayo nga paagi nga mapakita niya ang iya pagpasalamat amo ang pagtuon sa Biblia upod sa mga Saksi ni Jehova sa iya pagpauli sa Moscow. Nagpasugot ang tawo.

 OCEANIA

PUNGSOD 30

POPULASYON 39,384,408

MANUGBANTALA 101,483

PAGTUON SA BIBLIA 62,367

WALA NAGPAPUGONG SA IYA SABLAG SA PAGHAMBAL. Ang 23 anyos nga utod nga lalaki nga si Hamish nga nagapuyo sa Australia, may grabe nga kasablagan sa paghambal amo nga nagapurutikol lang sia ukon indi mahangpan ang iya ginahambal kag kon kaisa indi na gid sia makamitlang. Pero wala ini nagpaugdaw sang iya kakugi sa paghatag sing bahin ukon sa ministeryo. Halimbawa, para mahatag niya ang iya bahin sa Kingdom Hall, gina-type niya ang iya manuskrito sa isa elektroniko nga kagamitan nga madaladala kag amo ini ang magahambal sang iya ginasulat. Kon maghatag sia sing pamulongpulong, ginabutang niya ini sa podyum kag ginamaniobra ang keyboard sini para mapili kag mapatokar ang iya gin-type nga inughambal. Ginatuon niya ini sa mikropono para mangin mabaskog ang tunog. Kon may pagpakigbahin sang tumalambong ang iya bahin, ginatukso niya ang magkomento paagi sa pag-type sang ngalan sang masabat. Amo man sini ang iya pamaagi sa pagministeryo, nagagamit sia sang iya  nahanda nga mga dinalan, mga teksto, kag nagasabat paagi sa iya madasig nga pag-type! Subong resulta, madamo sia sing maayong pagduaw liwat. Sugod sang 2007, sang gintangdo si Hamish nga ministeryal, nagaauxiliary payunir sia sing pila ka beses kada tuig.

GUBA ANG IYA PRINTER. Sa New Caledonia, si David nga manugkay-o sang kompyuter, nakabaton sing tawag gikan sa isa ka babayi nga nagub-an sing printer—indi na ini makaimprinta. Gilayon ini nga nakay-o ni David, pero nakibot sia sang nakita niya ang naimprinta nga nagasiling: “INDI manuktok. Nagatuo na kami kay Jesus. Indi na kami magsaylo sing relihion.”

Ginmuno ni David ang babayi: “Sang ginakay-o ko ang imo printer, may nabasahan ako sa isa ka papel. Puede bala mahibaluan kon ngaa ginsulat mo ato?”

Nagsabat sia: “A, kabalo ka nga kada semana ’gakadto ang mga Saksi ni Jehova diri. Natak-an na kami sa ila. Abi mo, indi na gid sila makasulod sa amon balay.”

Namangkot si David: “Kabalo ka bala nga napasulod mo na ang isa sa ila?”

Nagsabat sia: “Imposible. Indi gid ina matabo!”

Nagsiling si David: “Isa ako sa mga Saksi ni Jehova. Kag ginpasulod mo ako!” Nakibot ang babayi kag medyo nahuya. Mainayuhon nga ginpaathag ni David kon ngaa nagapamalaybalay ang mga Saksi ni Jehova. Duha ka oras sila nga nagsugilanon. Pagligad sang pila adlaw, ginduaw ni David ini nga babayi kag ang iya bana. Ginpaathag nila nga sang ginhunahuna nila sing maayo ang natabo, narealisar nila nga gintuytuyan sang Dios si David sa ila. Gani indi sila makabalibad sa iya pagduaw! Regular na sila karon nga nagabaton sang aton mga magasin.

NASANGKAPAN SING TRACT. Ang 12 anyos nga si Nathan nagapuyo sa Australia. Nagadala sia sing mga tract kag regular nga nagapanaksi sa iya mga abyan sa eskwelahan. Isa ka  adlaw, sang nagalakat pauli halin sa eskwelahan, nakita niya ang isa ka tigulang nga babayi nga nagatindog sa ugsaran sang iya balay. Nagyuhum ang babayi, gani nagyuhum man si Nathan kag ginhatagan sia sing isa ka tract. Nagsiling ang babayi nga napatay ang iya bana sang nagligad nga tatlo ka tuig. Gani ginhatagan sia ni Nathan sing tract nga Ano ang Paglaum sang Napatay nga mga Hinigugma? Naglumawlumaw ang mata sang babayi samtang ginasugiran sia ni Nathan parte sa palaabuton nga pagkabanhaw para makita niya liwat ang iya bana sa Paraiso. “Pero san-o pa ayhan matapos ang tanan nga pag-antos?” pamangkot sang babayi. Ginhatagan sia ni Nathan sing isa naman ka tract, Malapit Na Madula ang Tanan nga Pag-antos! Nian ginpamangkot niya si Nathan kon ano pa ang iya ginapatihan. Gani ginhatagan niya sia sing tract nga Ano ang Ginapatihan Sang mga Saksi ni Jehova? Pagkatapos sini, naglakat si Nathan. Pagligad sang pila ka semana, nakita niya liwat ang babayi sa ugsaran sang iya balay. Gintawag niya si Nathan kag ginhakos. “Abi mo, Nathan?” siling niya. “Pagkatapos mo hatag sa akon sang mga tract, duha ka Saksi nga babayi ang nagduaw sa akon, kag ginatun-an na nila ako sa Biblia!”

ISA LANG ANG ILA IMBITASYON PARA SA MEMORYAL. Nagbulig si Michael sa pagpatindog sang bag-o nga pasilidad sang sanga sa Solomon Islands. Pagkatapos sini, nagdesisyon sia  nga magbantala sa Mbanika Island, isa ka naligwin nga isla nga ila ginpuy-an sang gamay pa sia kag ginapuy-an sang iya mga magulang. Wala sing Saksi sa sini nga isla. Wala man sing regular nga biyahe sang barko pakadto sa sini nga isla, wala sing koreo, kag isa lang ang telepono.

Nagkadto sia sa Mbanika Island upod ang pamatan-on nga payunir nga si Hansly. Sang nag-abot sila, naghimo sila sing isa ka gamay nga Kingdom Hall nga human sa dahon sang palma kag gin-agda ang mga tawo nga matambong sa Memoryal. Sanglit isa lang ang ila kopya sang imbitasyon, ginapakita lang nila ini sa mga tawo kag ginapaathag kon ngaa importante ang Memoryal.

Isa ka adlaw antes sang Memoryal, nagbugsay ang duha ka utod sing duha ka oras pakadto sa pihak nga bahin sang isla para agdahon ang isa ka pamilya nga nagaistar didto. Pero mga kabataan lang ang ila naabtan. Nagdesisyon si Michael nga ibilin na lang ang imbitasyon. Ginhatag niya ini sa subang nga babayi kag nangabay nga ihatag ini sa ila tatay.

Pagkadason nga adlaw, sang nagahanda sina nga hapon sanday Michael kag Hansly para sa Memoryal, nakita nila ang pamilya nga nagasakay sa baruto. Nabasa sang amay ang imbitasyon kag naghinakop nga importante gid ang Memoryal, gani gindala niya ang iya bug-os nga pamilya. Sa sina nga gab-i, 52 ang nagtambong. Padayon nga ginbantalaan kag gintun-an nanday Michael kag Hansly ang mga nagtambong.

[Nota]

 [Tsart sa pahina 40-47]

REPORT SA 2010 TUIG SANG PAG-ALAGAD SANG MGA SAKSI NI JEHOVA SA BUG-OS KALIBUTAN

 (Tan-awa ang publikasyon)

 [Mga Mapa sa pahina 48-50]

 (Tan-awa ang publikasyon)