Talalupangdon nga mga Hitabo sang Nagligad nga Tuig

MAKALILIPAY gid mahibaluan kon ano ang nahimo ni Jehova paagi sa iya katawhan sa bilog nga duta. Ining Tuigan nga Libro nagareport parte sa pag-uswag sa sign language, kag nagapaathag kon paano nagapanalawsaw ang aton Writing Department. Mahibaluan mo man ang report sa aton internasyonal nga mga kombension, kag ang makawiwili nga mga detalye sa aton bag-o nga libro sang ambahanon. Hibalua man kon ano na ang bag-o nga natabo parte sa aton mga kaso sa korte sa bug-os nga kalibutan, balita sa Haiti, kag mga dedikasyon sang sanga. Nagasalig kami nga malipay kamo kag mapalig-on sa inyo mabasa.

 ‘LUYAG SANG DIOS NGA MAKILALA SIA SANG MGA APA’

Binagbinaga kon ano na ang natabo sa hilikuton sa sign-language. Sa Estados Unidos, ang apa nga si Salvatore bana sang isa ka Saksi ni Jehova. Bisan pa madugay na niya nahibaluan ang kamatuoran, wala gid sia nag-uswag sa espirituwal. Nanugda ang iya asawa nga basahon niya adlaw-adlaw ang Biblia sa sulod sang isa ka tuig. Pero, bangod nabudlayan sia sa paghangop sini, naluyahan sia sing buot. “Indi ko gid matun-an nga higugmaon si Jehova,” saysay niya.

Apang nagbag-o ang kabuhi ni Salvatore sang ginsugiran sia nga matigayon na sa DVD sa American Sign Language ang bahin sang New World Translation of the Holy Scriptures. Sang natun-an niya ang Pulong sang Dios sa sign language, nagsaysay sia, “Napat-od ko gid nga luyag sang Dios nga makilala ko sia!” Nagtuon sa Biblia si Salvatore, kag karon bawtismado na sia kag malipayon nga nagaalagad kay Jehova.

Kaangay ni Salvatore, nabatyagan sang iban pa nga apa sa bilog nga duta ang gugma kag tudok nga kabalaka sa ila ni Jehova paagi sa mga Biblia sa sign-language kag iban pa nga publikasyon nga matigayon paagi sa DVD kag Internet. Matigayon na sa 46 ka sign language ang aton publikasyon, kag madugangan pa ini sing 13. Ang Lalantawan matigayon sa siam sini nga lenguahe, kag ang mga bahin sang New World Translation ginpagua na sa American, Brazilian, Colombian, Italian, Mexican kag Russian sign language.

Makalilipay gid makita kon paano ang mga publikasyon sa sign language nakabulig sa mga apa. “Nagtuon ako sang 1981, nga nagagamit sang nasulat sa Japanese nga mga publikasyon,” saysay ni Natsue, isa ka apa nga babayi sa Japan. “Sang indi ko ini mahangpan kag namatok ang akon pamilya, nag-untat ako.”

 “Pagligad sang 26 ka tuig sugod sang akon pagtuon sa Biblia, sang Abril 2007 ginpakita sa akon sang isa ka manugbantala ang Japanese Sign Language nga edisyon sang Mahimo Ikaw Mangin Abyan sang Dios!—Sa DVD. Ginpadayon ko gilayon ang akon pagtuon kag nabusog ko ang akon espirituwal nga kinahanglanon. Nabawtismuhan ako sang Nobiembre 2008.”

Sa karon, may kapin sa 16,000 ka manugbantala nga apa sa bilog nga duta. Ginadayaw nila si Jehova paagi sa ila mga kamot kag mga ekspresyon sang guya. Ang suporta nga ila natigayon gikan sa 30 ka libro, mga brosyur, video, kag mga drama sa Biblia nga ginbadbad sa nanuhaytuhay nga sign language nagapasalig sa ila nga ginahigugma kag ginapabaloran gid sila ni Jehova sa ila matutom nga pag-alagad.

Nakabaton sing pasalamat gikan sa mga kauturan kag mga interesado ang 54 ka sanga nga nagabadbad sang mga publikasyon sa sign language. Ginpabutyag nila sa ila sulat ang kalipay sang mga apa kay mahibaluan na nila ang madalom nga espirituwal nga kamatuoran paagi sa sign language. Kaanggid man ang ila ginpabutyag sa ginsiling sang taga-Japan nga si Emi nga may apa nga mga ginikanan.

“Nauna sing mga tinuig nga nabawtismuhan ang akon mga ginikanan sangsa akon,” siling ni Emi, “pero nabudlayan sila sa paghangop sang nasulat nga mga publikasyon sa Japanese. Kon indi nila ini mahangpan,  ginapangabay nila ako nga ipaathag ini. Pero karon, maistoryahan na nila ang kamatuoran nga may kompiansa. Nagsaysay ang akon iloy, ‘Nahangpan ko lang ang mga detalye sa Biblia sang natigayon na ini sa sign-language.’ Gani, nangin mas suod sila kay Jehova kag nangin maayo gid ang amon kaangtanan.”

‘NAUSISA SING SIBU ANG TANAN NGA BUTANG’

Nagsiling si Jesus nga ang matutom nga ulipon mangin mainandamon sa paghatag sing “pagkaon sa nagakaigo nga tion.” Gani, ginpahangop ni Cristo nga ang magaaman sing “pagkaon” mangin mahalungon, maalamon, kag mahinantupon sa pag-aman sing espirituwal nga pagkaon sa matuod nga mga sumilimba.—Mat. 24:45-47.

Sa aton tion, ginagamit sang mga hinaplas nga kauturan ni Cristo ang Writing Department sa Brooklyn, New York sa pag-aman sing espirituwal nga impormasyon paagi sa mga magasin, brosyur, libro, kag iban pa nga naimprinta kag elektroniko nga mga materyal. Ining espirituwal nga pagkaon, kaangay sang pisikal nga pagkaon, dapat ihanda sing maayo. Bisan ang mga manunulat sang Biblia, nga gingiyahan sang balaan nga espiritu, nagpat-od nga ang impormasyon nga ila isulat sibu gid kag maid-id nga napanalawsawan. Halimbawa, si Lucas nakigsugilanon sa madamo nga aktual nga nakakita kag ‘nangusisa sing sibu sa tanan nga butang halin sa ginsuguran.’—Luc. 1:1-4.

‘Ginausisa man sing sibu’ sang Writing Department ‘ang tanan nga butang.’ Pero sa diin masapwan ang masaligan nga impormasyon? Bisan pa mahapos makakuha sing madamo nga impormasyon sa Internet, ang aton mga manugpanalawsaw wala nagasalig sa mga impormasyon nga ginbutang sang indi kilala ukon indi masaligan nga mga tawo. Halimbawa, ang Wikipedia, nga isa ka ensiklopedia sa Internet, nagpaandam nga ang pila  ka artikulo sa ila Web site “nagaunod sang madamo nga indi husto kag wala nausisa sing maayo nga mga impormasyon ukon hungod nga ginbag-o,” kag nagsiling pa nga “kinahanglan maghalong ang mga nagagamit sini.” Gani, ang ginausisa sang Writing Department amo ang masaligan nga mga balasahon, mga artikulo nga ginsulat sang kilala nga mga eksperto, kag mga libro nga ginpagua sang talahuron nga mga manugbalhag.

Daku ang librarya sang Writing Department kag may linibo ini ka libro. Isa pa, ginagamit man sang aton mga manugpanalawsaw ang kaingod nga pangpubliko nga mga librarya kag librarya sang mga eskwelahan. Makatigayon man sila sing pinasahi nga mga impormasyon halin sa iban, paagi sa paghulam sing mga balasahon sa iban nga librarya. Ang librarya sang isa ka unibersidad nga ginakadtuan sang aton mga manugpanalawsaw may mga lima ka milyon nga libro, 58,000 ka periodiko, 5.4 ka milyon nga microform, kag linibo ka impormasyon nga natipon sa kompyuter. Nagatipon man ang Writing Department sing madamo nga ginpanggunting nga mga impormasyon, mga eksperiensia, kag impormasyon parte sa kasaysayan nga pirme nila ginausisa gikan sa ila ginkuhaan nga reperensia, sa lokal man ukon sa mga sanga talatapan sa bilog nga duta para mangin sibu.

Siempre pa, ginpahanumduman kita sang Manugwali 12:12: “Wala sing katapusan ang paghimo sing madamu nga tolon-an.” Bisan ang masaligan nga mga ginkuhaan sing impormasyon mahimo nagaunod sing sayop nga impormasyon. Busa, paano naton mapat-od ang kalidad, pagkasibu, kag pagkamasaligan sini?

Halimbawa, binagbinaga ang dinalan sa brosyur nga Gintuga Bala ang Kabuhi? nga nagapatuhoy sa lawa sang damang subong isa sa pinakamahunit nga materyal sa kalibutan: “Kon pareho ini kalapad sa ginahampangan sang football, ang mga lawa nga nagadamol sing isa  ka sentimetro kag may lang-at nga apat ka sentimetro, mahimo magpugong sa paglupad sang daku kaayo nga eroplano!” Bisan pa masaligan nga magasin parte sa siensia ang ginkuhaan sini, indi ini ang orihinal nga ginhalinan sang impormasyon, kag indi maathag kon sa diin ini naghalin. Gani, kinahanglan makontak ang nagpanalawsaw kag usisaon kon ngaa nakahinakop sia sa sini. Kinahanglan man pangitaon sang aton mga manugpanalawsaw ang pormula kag ang impormasyon nga kinahanglan sa ila pag-usisa kon ano ang matabo sa jumbo jet nga makabunggo sa lawa sang damang nga pareho kalapad sang ginahampangan sang football. Ang madamong inoras nga pagpanalawsaw kag maid-id nga pagpangusisa nagpat-od sang ulihi nga sibu ining dalayawon nga impormasyon.

 Apang kon kaisa, bisan ang masaligan nga ginkuhaan sang impormasyon mahimo man mapaslawan sa pagpamatuod sang ila impormasyon. Halimbawa: Ginkutlo nga sa ashram (lugar nga ginapamalandungan) ni Gandhi nagsiling sia kay Lord Irwin: “Kon ang imo kag ang akon pungsod mag-ugyunay sa mga panudlo nga ginpamulong ni Cristo sa sining Sermon sa Bukid, malubad naton ang mga problema indi lamang sang aton mga pungsod kundi sang bug-os nga kalibutan man.” Pero, natukiban paagi sa maid-id nga pagpangusisa sa sini nga pinamulong nga wala gid sing pamatuod nga nakaduaw si Lord Irwin sa ashram ni Gandhi, amo nga ginduhaduhaan kon sa diin, san-o, kag kon bala nasiling man gid ini ni Gandhi. Gani, wala na ini ginkutlo sang aton mga publikasyon.

Mahimo nabasahan man ninyo ang insidente may labot kay Sir Isaac Newton kag ang isa ka model sang solar system. Suno sa report, namangkot ang iya bisita nga ateista: “Sin-o ang naghimo sini?” Sang nagsabat si Newton, “Wala!” nagsiling ang ateista, “Sin-o ininto mo!” Nian nagsiling kuno si Newton nga ang iya tuman ka gamay nga model sang tuman ka daku nga solar system nagapamatuod nga may nagdesinyo ukon naghimo sini. Bisan pa daw makagalanyat ini nga hitabo, wala sing mahatag nga ebidensia ang kasaysayan kag ang mga nagatuon parte kay Newton nga natabo gid ini. Sing makawiwili, ang nauna nga reperensia sa sini nga hitabo nga naggua sang maaga nga bahin sang 1800 nagsambit indi kay Newton, kundi kay Athanasius Kircher, isa ka German nga iskolar. Gani, ini nga kasaysayan wala na gingamit sang aton Writing Department.

Kon kaisa bisan ang simple nga mga pinamulong nagakinahanglan sing dugang nga pagpanalawsaw para mapat-od nga sibu ini. Halimbawa, mahimo magsiling ang utod sa iya kasaysayan nga nabun-ag sia sa Czechoslovakia  sang 1915. Pero, sang 1918 lang nagluntad ang Czechoslovakia. Gani, sa diin sia nabun-ag? Para masabat ini nga pamangkot, kinahanglan usisaon ang daan nga mga mapa ukon mga rekord parte sa kasaysayan.

Nian mahimo magsiling ang isa ka utod sa iya eksperiensia nga nabawtismuhan sia sa San Francisco sa isa ka espesipiko nga petsa. Apang, paagi sa mahalungon nga pag-usisa, mahimo matukiban nga wala sing kombension ukon asembleya sa amo nga petsa sa sina nga siudad. Paano ini mapahituhog? Kon kaisa, nagakalipat man ang tagsa ka tawo. Mahimo nga indi malipatan sang utod ang lugar nga iya ginbawtismuhan, pero posible nga indi niya madumduman sing sibu ang petsa. Kinaandan na nga mahibaluan ang sibu nga detalye paagi sa pag-usisa kag pagkompara sa nanuhaytuhay nga impormasyon.

Bilang sumaryo, ginagamit lamang sang Writing Department ang mga impormasyon nga sibu kag matuod, bisan pa sa mga detalye nga daw indi man gid tuman ka importante. Gani, “ang matutom kag mainandamon nga ulipon” makapadayon sa pag-aman sang espirituwal nga pagkaon nga nagapadungog sa “Dios sang kamatooran,” si Jehova.—Sal. 31:5.

 BULIG PARA ‘MAKAPADAYON SA PAGBANTAY’

Minilyon ka Saksi ni Jehova sa bilog nga duta ang nagpasalamat sa praktikal kag suno sa tion nga programa nga ginpresentar sa “Magpadayon sa Pagbantay!” Distrito nga Kombension sang 2009. Kapin sa 200,000 ka delegado gikan sa 136 ka pungsod ang nagtambong sa 37 ka internasyonal nga kombension. Ginhiwat ang kombension sa Austria, Chile, Côte d’Ivoire, Estados Unidos, Germany, Ghana, Italya, Kenya, Korea, Mexico, Myanmar, Peru, Poland, Pransia, South Africa, kag Trinidad and Tobago. Ang nagtambong sa sining internasyonal nga mga kombension may kabug-usan nga 1,495,045, kag 15,730 ang nabawtismuhan.

 Ano ang katuyuan sang mga internasyonal nga kombension? Ginaiskedyul sang Nagadumala nga Hubon ini nga pagtilipon kada pila ka tuig sa mga siudad—kon kaisa sa mga pungsod nga gindumilian anay ang mga Saksi ni Jehova. Ini nga mga kombension nagapabakod kag nagabulig sa mga kauturan para mangin madasig ang pag-uswag sang pagbantala sa sina nga mga pungsod.

Paagi sa sini nga mga kombension mahatagan man sing kahigayunan ang mga kauturan nga maeksperiensiahan ang pinasahi nga “higot sang paghiusa” sang aton internasyonal nga paghiliutod. (Col. 3:14) Makalilipay gid makita ang gugma, kahim-ong, kag paghiusa sa sini nga mga kombension—ano man ang ila nasyonalidad, kultura, kag lenguahe! Ang matuod nga gugma ginapakita sang lainlain nga etniko nga grupo sa ila pag-inupdanay sa tapos sang mga sesyon—pagkaon sing ulupod, pagbayluhanay sing mga regalo, adres kag numero sang telepono, pagpakodak, kag utudnon nga paghaksanay. Madamo nga delegado kag lokal nga mga Saksi ang nagasuksok sang ila tradisyunal nga mga bayo.

Ang pinasahi nga bahin sang programa sa mga internasyonal nga kombension amo ang “Report Gikan sa Iban nga Pungsod,” nga ginpresentar sa apat ka adlaw. Natalupangdan sang isa ka nagalakbay nga manugtatap gikan sa Italya nga ang mga report nakabulig sa tanan nga tumalambong nga “mabatyagan nga bahin sila sang matuod nga internasyonal nga paghiliutod nga may pareho nga tulumuron—pagbantala sang Ginharian.” Makalilipay gid mabatian ang makapalig-on nga mga eksperiensia sang mga misyonero kag iban pa nga bug-os tion nga alagad  nga nagpauli gikan sa ila mga asaynment! Ang ila maayo nga halimbawa makapabakod gid sa mga pamatan-on kag mga tigulang!

Makalilipay man nga may katapo sang Nagadumala nga Hubon sa mga internasyonal nga kombension para magpaalinton sing suno sa tion nga espirituwal nga instruksion kag mahigugmaon nga pagpalig-on! Ang pamulongpulong sang katapo sang Nagadumala nga Hubon kag ang “Report Gikan sa Iban nga Pungsod” gin-interpret sing dungan sa lenguahe sang tanan nga tumalambong para mabenepisyuhan nila. Halimbawa, sa ikaduha nga internasyonal nga kombension sa Honolulu, Hawaii, ang apat ka pamulongpulong ni Stephen Lett sang Nagadumala nga Hubon ginpresentar sa Ingles, kag dungan nga gin-interpret sa Chuukese, Iloko, Japanese, Mandarin, Marshallese, kag Samoan.

Sa pagplano sang mga internasyonal nga kombension, ginabinagbinag sang Nagadumala nga Hubon ang kadakuon sang hiwatan sang kombension, ang kadamuon sang mga Saksi sa sina nga lugar kag sang mga delegado gikan sa iban nga pungsod, kag ang kadamuon sang ila dalayunan. Dayon, ang responsable nga mga utod sa kada kombension makuha sing permiso sa lokal nga mga opisyal kag kontratahon ang nagadumala sang hiwatan sang kombension.

Bangod masami nga ginahiwat ini nga mga kombension sa dalagku nga mga istadyum, daku nga panahon ang ginahinguyang sa pagplano kag pagtrabaho para masiguro nga mangin talahuron nga duog sang pagsimba kay Jehova ang istadyum. Halimbawa sa Peru, bangod may hampang sang soccer antes sang kombension, indi makasulod sa istadyum ang mga kauturan para tinluan ini kag gab-i na sila nakasulod para ihanda ini antes magsugod ang sesyon pagkaaga. Bisan pa 3,000 lang ka boluntaryo ang ginpangabay nga magbulig, kapin sa  7,000 ka kauturan ang nag-abot sang alas 6:00 sa gab-i kag nagtrabaho nga daw wala ginakapoy sa sina nga gab-i.

Pagkatapos sang internasyonal nga kombension sa Long Beach, California, U.S.A., ang tatlo ka lalaki nga nagamentinar sang arena nagsiling: “Madamo na nga relihion ang naggamit sa sini nga tilipunan, pero wala pa sing may nakahimo sang inyo ginhimo. Dalayawon gid ini.” Nag-aku ang isa sa ila nga sang nanuktok ang mga Saksi ni Jehova sa ila balay, nagsiling sia sa iya kaugalingon, “Sige panuktok ka lang da, abi mo buksan ta ka.” Apang nagsiling sia nga sa masunod nga pagpanuktok sang mga kauturan sa ila balay, buksan niya sila kag pamatian. Nagsiling pa gid gani ang isa sa ila, “Wala ako sang relihion, pero amo ini ang relihion nga luyag ko sudlan.”

Nakahatag gid ini sing daku nga panaksi sa tanan nga siudad nga ginhiwatan sang kombension kag ini tanan sa kahimayaan ni Jehova! Kag nagapasalamat gid kita kay Jehova sa pag-aman niya sang makapabakod sa pagtuo nga mga kombension para makapadayon kita sa “pagbantay”!—Mat. 24:42.

MAG-AMBA SING PAGDAYAW KAY JEHOVA

Ang pag-amba sing pagdayaw kay Jehova bahin na sang aton pagsimba. Gani, sang 2009 nga mga kombension, nalipay gid ang mga alagad sang Dios sang ginpahibalo sila parte sa bag-ong libro sang ambahanon nga Mag-amba kay Jehova. Pero ngaa kinahanglan ang bag-o nga libro sang ambahanon?

Pagligad sang tion, ginabag-o naton ang aton mga libro sang ambahanon agod mapahisuno sa nagauswag nga espirituwal nga kasanag.  (Hulu. 4:18) Ang paghanda sang bag-o nga libro sang ambahanon nagahatag sa aton sing kahigayunan para mabag-o ang liriko sang aton mga ambahanon. Ginpili ang mga tinaga agod mahapos mahangpan ang ambahanon samtang ginaamba ini kag mas madali madumduman. Para mas madali ini masaulo, ginpalip-ot ang madamo nga ambahanon. Kon nagakaigo, gindugangan ini sing mga koro para masulit ang makapalig-on nga mga ideya. Isa pa, gintinguhaan gid nga butangan ang tagsa ka syllable sing tig-isa ka nota, imbes nga kapin sa isa ka syllable sa isa ka nota.

Ang mahalungon nga pag-usisa sa aton daan nga libro sang ambahanon nagapakita nga kinahanglan bag-uhon ang pila ka melodiya sini para mahapos kantahon. Gani, ginpanubuan ang tono sang pila ka kanta para ang mas mataas nga mga nota mahapos na kantahon. Subong man, indi tanan nga kanta husto ang pag-amba suno sa nasulat sa libro sang ambahanon. Gani ginbag-o ang melodiya sang pila ka ambahanon para mangin natural kantahon suno sa pagkanta sang aton mga kauturan sa bug-os nga kalibutan.

Ang mga detalye sa pag-imprinta sang ambahanon ginbinagbinag gid sing maayo. Halimbawa, nagakinahanglan sing duha ka pahina ang mas malawig nga ambahanon, gani ginplastar ini sing maayo para indi na magbukas sa masunod nga pahina samtang nagakanta. Amo kon ngaa asta tatlo lang ka stanza ang pinakamalawig nga ambahanon.

Paano nahimo ining daku katama nga buluhaton? Sang Agosto 2007, gin-agda ang isa ka grupo sang eksperiensiado nga mga manugkomposo sang kanta para buligan ang Nagadumala nga Hubon sa sini nga proyekto. Gin-usisa sing maayo ang mga kanta sa daan nga libro para mahibaluan kon may dapat bala bag-uhon sa mga doktrina, empasis sa tinaga, kag mga melodiya. Nakita  nga maayo man ang pila ka daan nga kanta pero kinahanglan bag-uhon ang mga liriko. Diutay lang ang ginbag-o nga liriko sa pila ka kanta pero kinahanglan islan ang mga melodiya. Nian gin-aprobahan sang Teaching Committee sang Nagadumala nga Hubon ang mga topiko nga kantahon sa mga miting, asembleya, kombension, kag mga dedikasyon.

Isa pa, naghinguyang sing tion ang mga manugkomposo para usisaon liwat ang mga musika nga kantahon sang aton mga kauturan sa tion sang mga miting. Para makahimo sang dungganon pero manami nga mga ambahanon, ginalikawan nila ang mga musika nga daw mga kanta sang Cristiandad. Subong man, indi nila gusto nga ang estilo sang mga ambahanon daw pareho sa pagkanta sang mga karismatik.

Sa bug-os nga proyekto, ginausisa gid sang Nagadumala nga Hubon ang komposisyon kag mga tinaga sa kada kanta. Ang bag-o nga mga ambahanon nga indi pamilyar sa Nagadumala nga Hubon ginrekord sang mga  manugkanta para mapamatian kag marepaso nila. Sang gin-aprobahan ini nga mga kanta, ginpadala ini sa mga sanga nga nagabadbad para badbaron ang mga liriko agod mapagua sing dungan ang bernakular nga libro sang ambahanon sa Ingles.

Dugang pa, sang 2007, ginhimos sang Nagadumala nga Hubon nga irekord ang mga kanta nga gin-amba sang isa ka grupo sang mga manugkanta agod makabulig sa mga kauturan nga matun-an ang bag-o nga mga ambahanon. Sa sulod sang madamo nga tuig, nagatipon sing duha ka beses kada tuig sa Patterson, New York ang mga boluntaryo gikan sa 14 ka sanga. Nagarekord sila sing musika para sa programa sang pagpanudlo sang mga Saksi ni Jehova, lakip sa mga drama, video, kag musika para sa mga kombension kag mga asembleya. Ining dedikado nga mga utod, nga madamo sa ila bug-os tion nga  mga ministro, naggamit sang ila tion kag pagkabutang sa pagbiyahe kag pagrekord sang musika para sa kaayuhan sang mga kauturan sa bilog nga duta. Tanan sila sampaton nga musikero. Nian ang ila ginrekord ginapaambit sa iban nga sanga sa bug-os nga kalibutan para may magamit nga musika sa ila mga kombension kag para sa vocal rendition sa dinosena ka lenguahe. Madamo sa vocal nga mga rekording ang ma-download sa aton Web site nga www.pr418.com.

Ano ang reaksion parte sa aton bag-o nga libro sang ambahanon? Ang sulat sang isa ka utod halos pareho man sa ginatos ka sulat sa pagpasalamat: “Palihug tuguti anay ninyo ako nga magpasalamat sa matahom kag bag-o nga mga ambahanon. Makatalandog, makapabakod sing pagtuo, kag makapalugpay gid ini—isa ini ka matahom nga regalo gikan kay Jehova.”

Handum gid namon nga ini nga libro sang ambahanon mangin tuburan sang lugpay kag pagpalig-on sa mga kauturan sa bilog nga duta. Nagaisahanon man kita ukon kaupod sa mga masigkasumilimba, kabay pa nga gamiton naton ini sa pagpabutyag sang aton gugma sa aton langitnon nga Amay, si Jehova!

“DALHON KAMO SA ATUBANGAN SANG MGA GOBERNADOR KAG MGA HARI . . . SUBONG PANAKSI”

Ginsilingan ni Jesus ang iya mga disipulo nga dalhon sila sa “mga hukmanan” kag “mga gobernador kag mga hari.” Bisan pa sa sini, nagsiling sia nga isa ini ka “panaksi sa ila kag sa mga pungsod.” (Mat. 10:17, 18) Sang nagligad nga tuig, naeksperiensiahan sang mga Saksi ni Jehova ang ginsiling ni Jesus. Kag subong sang ginsiling sang ila Agalon, ang pagmaltrato sa ila nagahatag sing mga kahigayunan nga makapanaksi.

Armenia

Si Vahan Bayatyan, isa sa mga Saksi ni Jehova, ginsentensiahan sing duha ka tuig kag tunga nga  pagkapriso bangod sang iya pagpangindi nga magsoldado. Sang napierde ang iya kaso kag ang iya apelasyon sa mga korte sa Armenia, nag-apelar sia sa European Court of Human Rights (ECHR) sang 2003. Sang Oktubre 27, 2009, nagdesisyon ang ECHR pabor sa Armenia bilang pagsunod sa desisyon sang korte sa Armenia sa sulod sang kapin sa 50 ka tuig. Pero, indi ugyon ang isa ka hukom sa sini nga desisyon kay “indi ini suno sa bag-o nga mga pagsulundan sa Europa parte sa pagpangindi bangod sa relihion.”

Bangod importante gid ini nga isyu, nagsugot ang European Court nga ipasaka ini nga kaso sa ila Grand Chamber. Gin-iskedyul ang kasaba sa Strasbourg, Pransia sang Nobiembre 24, 2010. Wala pa mahibaluan kon ano ang desisyon sang Grand Chamber sa tion nga gin-imprinta ini nga report.

Azerbaijan

Nabudlayan gihapon ang mga Saksi ni Jehova sa pag-importar sang mga literatura. Gin-aprobahan sang mga opisyales ang importasyon sang pila ka literatura, pero wala gintugutan ang iban nga publikasyon bangod suno sa ila, “nagapasanyog lang ini sang mga pagtuo sang mga Saksi ni Jehova kag nagainsulto sa iban nga Cristianong relihion.” Gani, gin-usisa nila ang mga balay sang pila ka kauturan kag ginpanguha ang ila personal nga mga literatura sa Biblia.

Sang Abril 25, 2010, sa siudad sang Qazax, nagapauli na ang mga 250 ka Saksi ni Jehova nga nagasakay sa lima ka dalagku  nga bus kag isa ka gamay nga van gikan sa asembleya sa Georgia. Ginkumpiskar sang mga pulis sa dulunan ang ila personal nga mga literatura, lakip ang 33 ka Biblia. Madamo nga Saksi, bisan ang mga tigulang kag mga balatianon, ang naghulat sa dulunan sing mga walo ka oras antes sila gintugutan nga makapadayon sa pagbiyahe. Para indi na ini matabo liwat kag masiguro nga padayon nga makabaton sing espirituwal nga pagkaon ang mga kauturan sa Azerbaijan, ginpasaka na ini nga kaso sa European Court of Human Rights.

Belarus

Sang Nobiembre 6, 2009, ang Saksi ni Jehova nga si Dmitry Smyk ginpamulta sing 3,500,000 rubles ($1,154 U.S.) bangod nangindi sia sa pagsoldado. “Ginatinguhaan ko gid nga mangin matutom sa Biblia sa tanan nga bahin sang akon kabuhi,” siling ni Utod Smyk, “kag ginasunod ko ang mga panudlo sini. Para sa akon, nalakip sa sini ang pagpati nga indi dapat maghanas ukon makigbahin sa inaway ang isa ka tawo.”—Isa. 2:1-4.

Bisan pa mabasa sa Konstitusyon sang Belarus nga mahimo makapili sing buluhaton ang isa bilang tal-us sa pagsoldado, wala nabutang kon ano ini nga mga buluhaton. “Sa sinulatan, daw may kinamatarong ako nga magserbisyo subong sibilyan,” paathag ni Utod Smyk, “pero sa katunayan indi ko matigayon ina nga kinamatarong.”

Para matadlong ini, sang Pebrero 18, 2010, nagporma ang presidente sang Belarus sing isa ka komisyon para maghimo sing kasuguan parte sa pagserbisyo subong sibilyan. Wala magdugay, napamatud-an sang korte nga wala sing sala si Utod Smyk kag wala na sia ginpamulta. Bangod amo man sini ang ginaatubang sang mga pamatan-on nga Saksi sa Belarus kag indi nila gusto magtuon sang inaway, ginalauman nga sa indi madugay magahatag sing probisyon ang gobierno para sa pagserbisyo subong sibilyan.

 Belgium

Antes sang 1993, wala ginabuhisan ang propedad sang Bethel sa Brussels, Belgium, kag ang iban nga relihioso nga mga tinukod sa Belgium. Pero sugod sang 1993, ginbag-o sang administrador sang buhis ang ila panindugan kag nanukot na sila sing buhis. Nagsiling sila nga indi relihioso ang katuyuan sang Bethel, kundi tuyo sini nga manguarta, kag ang mga Bethelite indi bug-os tion sa ila relihioso nga mga buluhaton. Ginkasaba ini sang 2008 sa manubo nga korte, pero pabor sa administrador sang buhis ang desisyon sang hukom. Gin-apelar ini, kag sang Mayo 4, 2010, ginbag-o sang korte sang apelasyon ang desisyon sang manubo nga korte. Sa ila nasulat nga desisyon, nagsiling ang tatlo ka hukom: “Ang kabuhi sa Bethel, para sa mga Saksi nga nagaistar diri, nagadalahig sa tudok nga relihioso nga pagpati nga nagapatuman sang bug-os nga pag-alagad sa Dios. . . . Ang tanan nga ministro diri katapo sang Bug-os Kalibutan nga Grupo sang Pinasahi nga Bug-os Tion nga mga Alagad, kag tingob sila nga nagapuyo, nagapangamuyo, nagaamba kag nagatuon sing Biblia. Ginasakdag man nila ang ila morning worship.”

Eritrea

Padayon nga nagabatas ang mga Saksi ni Jehova sa Eritrea sa ila panikasog nga alagdon ang Dios sing matutom. Sa karon, may 58 ka Saksi nga napriso, lakip ang mga babayi kag mga kabataan. Bangod sang mapintas nga pagdumili sang gobierno kag pagpang-aresto, mabudlay makabaton sing impormasyon parte sa mga napriso. Sa sulod sang mga tinuig, ginatinguhaan sang mga Saksi ni Jehova nga mapahaganhagan ang pag-antos sang ila masigkasumilimba sa Eritrea paagi sa pagpangabay sini sa mga opisyal. Nag-apelar na ang mga Saksi sa mga opisyal sang U.S. Department of State, European Union, kag lainlain nga embahada. Nakigsugilanon man sila sa nanuhaytuhay nga opisyales sang Horn of Africa, subong sang mga tiglawas sang African Union.  Sining karon lang, nagpadala ang mga Saksi ni Jehova sing sulat kag listahan sang mga napriso nga wala pa sa edad para magsoldado sa 18 ka embahada sang Eritrea sa bilog nga kalibutan. Nagapangabay man ini kay Presidente Afewerki nga buy-an ang tanan nga priso nga wala pa sa edad para magsoldado, lakip na ang mga kabataan kag mga tigulang. Apang tubtob karon, wala pa sing sabat ang gobierno.

Gresya

Sang Enero 15, 2010, nasapwan sang pinakamataas nga korte sa Gresya, ang Council of State, nga ang Saksi ni Jehova nga si Evangelos Delis may kinamatarong sa pagpangindi nga mangin reserba nga soldado. Antes mangin Saksi, isa anay ka soldado si Utod Delis, pero sang ginpatawag sia para maghanas subong soldado, ginpahulag sia sang iya nahanas sa Biblia nga konsiensia nga pangindian ini. Bisan pa ginsikway sang gobierno ang iya pangabay, ang Council of State, nga nagkutlo sang mga artikulo sang European Convention of Human Rights, nagsiling nga may kinamatarong ang isa nga islan ang iya relihion bisan pa soldado sia  anay kag may kinamatarong sia nga mangindi bangod sang iya bag-o nga relihiosong mga pagpati. Ining paborable nga desisyon sang pinakamataas nga korte sang Gresya makabulig gid sa mga nagapangindi bangod sang ila pagpati indi lamang diri sa Gresya kundi sa iban pa nga pungsod, subong sang Armenia, Azerbaijan, South Korea, kag Turkey.

Portugal

Sang Septiembre 25, 2009, nagsiling ang Ministry of Justice nga ang Asosasyon sang mga Saksi ni Jehova madugay na nagluntad nga relihion. Ang mga Saksi ni Jehova sa Portugal karon ginkilala na subong relihion, kag nakabulig gid ini sa ila sa pagtuman sang ila ministeryo. Bangod sini, nakatigayon sing madamo nga benepisyo ang katawhan ni Jehova. Lakip sa sini amo ang paghatag sing awtorisasyon sa mga utod para sa legal nga paghiwat sing kasal sa Kingdom Hall, subong man pahanugot nga magsulod sa mga ospital kag prisuhan agod hatagan ang mga nagapangabay sing espirituwal nga bulig.

Puerto Rico

Sa isa ka talalupangdon nga desisyon sang Enero 27, 2010, ang Korte Suprema sang Puerto Rico nagsakdag sa kinamatarong sang isa ka hamtong nga pasyente parte sa pagpangindi sa isa ka sahi sang pagbulong. Ginkilala man sang Korte ang kinamatarong sang pasyente sa paggamit sang DPA nga kard kag ang iya pagpili sang iya health-care agent para magrepresentar sang iya panindugan kon wala na sia sing animo. Ang Saksi ni Jehova nga si Victor Hernandez, nagpreparar sang iya DPA antes magpaospital. Ginsikway sang korte ang desisyon ni Utod Hernandez nga nasulat sa iya DPA, nga ginsakdag sang iya health-care agent. Ginbag-o sang Korte Suprema ini nga desisyon bangod ginkilala sini “nga may bug-os nga kinamatarong ang isa nga proteksionan ang iya lawas.” Ini nga kadalag-an makabulig indi lamang sa kapin sa 25,000 ka Saksi ni Jehova sa Puerto  Rico kundi sa tanan man nga pasyente sa bug-os nga pungsod.

Rusya

Sang nagligad lang nga mga bulan, ang ginagiyahan sang espiritu nga mga buluhaton sang katawhan ni Jehova nabutang sa grabe nga katalagman sugod sang nabungkag ang Unyon Sobyet. Sang Disiembre 8, 2009, gin-ugyunan sang Korte Suprema sang Rusya ang desisyon sang manubo nga korte sa Rostov nga nagresulta sa pagdumili sang lokal nga relihioso nga organisasyon sa Taganrog, pagkompiskar sang Kingdom Hall sini, kag pagdeklarar nga batok sa gobierno ang 34 naton ka publikasyon, lakip ang lapnag nga ginabasa nga libro nga Ano Gid ang Ginatudlo Sang Biblia?, Ang Akon Libro sang mga Sugilanon sa Biblia, kag “Kari Ka Mangin Sumulunod Ko.”

Pagligad sang pila ka semana, ang Korte Suprema sa Altay Republic, sa bagatnan sang Rusya, nagpagua man sing pareho nga desisyon tuhoy sa relihioso nga organisasyon sa siudad sang Gorno-Altaysk, kag nagresulta sa pagdeklarar sa 18 pa ka publikasyon nga batok sa gobierno. Bangod sini nga mga desisyon, temporaryo nga indi mapasulod sa Rusya ang nasambit nga mga publikasyon. Dugang pa, nangisog ang mga kaaway ni Cristo sa pagpamahog kag pagpanggamo sa iya mahidaiton nga mga sumulunod sa nanuhaytuhay nga siudad. Sugod sang ginpagua ang desisyon sang Disiembre 8, may kapin sa 300 ka insidente sang pagpanggamo, pag-aresto, pagpangusisa sang balay, kag iban pa nga pagtublag sa pagsimba.

Bangod sini nga katalagman, gin-aprobahan sang Nagadumala nga Hubon ang pagpanagtag sang 12 milyones ka kopya sang pinasahi nga tract nga natig-uluhan Matabo Na Naman Bala? Pamangkot Para sa mga Pumuluyo sang Rusya. (Ini nga publikasyon wala sa Hiligaynon.) Ginpaanggid sang tract ang pagpanghalit sa mga Saksi ni Jehova sa idalom sang Komunista sa kabudlayan  nga ila ginaatubang karon. Ginpanagtag sang mga Saksi ni Jehova ini nga tract sa bug-os nga Rusya sang Pebrero 26-28, 2010. Bisan pa tuman ka tugnaw ang temperatura, nga nakalab-ot sing minus 40 degrees Fahrenheit (-40°C), madamo nga kongregasyon ang nakapanagtag sang ila tract sa sulod lang sang duha ka adlaw.

Bilang balos, sang Abril 26, 2010, ginbawi sang Federal Service for the Oversight of Communications, Information Technology and Mass Communications (Roskomnadzor)  ang aton lisensia sa pag-importar sang masunod nga mga gua sang Ang Lalantawan kag Magmata!

Pero, “ang kamut sang GINOO indi malip-ot, nga indi ini makaluwas.” (Isa. 59:1) Sang Hunyo 10, 2010, ang European Court of Human Rights (ECHR) nagdesisyon batok sa Rusya kag pabor ini sa mga intereses sang Ginharian. Ang pamatbat sa sining kaso nga Mga Saksi ni Jehova sa Moscow v. Rusya, nagdeklarar nga ang pagpasira kag pagdumili sa hilikuton sang mga Saksi ni Jehova sa Moscow indi suno sa kasuguan kag paglapas ini sa tawhanon nga kinamatarong sa hilway nga pagpabutyag sang opinyon, konsiensia, kag relihion. Ang pagpasira kag pagdumili nga ginpatuman sa Moscow sugod sang Marso 26, 2004 ginbangdan sa pagdamo sang pagpanggamo kag pagmaltrato. Ginpakita sini nga desisyon nga ang gobierno sang Rusya “may legal nga obligasyon . . . nga untatan ang ila paglapas nga natukiban sang Korte kag tadlungon ang posible nga mga epekto sini.”

Ining paborable nga desisyon nagapatuhoy sa siam ka kadalag-an sang mga Saksi ni Jehova sa mataas nga korte sa Canada, Espanya, Estados Unidos, Japan, Rusya, South Africa, kag United Kingdom, lakip ang walo ka nauna nga desisyon sang ECHR nga pabor sa mga Saksi ni Jehova. Bangod sini, ginbaton sang korte nga nagapati gihapon ang ECHR nga husto ang nauna nga mga desisyon. Base sa European Convention of Human Rights kag sa nauna nga mga desisyon, nagapati ang korte nga wala sing sala ang mga Saksi ni Jehova sa sumbong sa ila sang mga opisyales sang Rusya.

“Ang mga Saksi ni Jehova,” siling sang korte, “nagluntad na kag legal nga nagapanghikot sa Moscow sa sulod sang kapin sa dose ka tuig, sugod sang 1992 asta 2004. Sa sini nga tion, ang mga Saksi ni Jehova, ang ila mga gulang kag mga katapo wala sing nahimo nga krimen ukon sala batok sa gobierno ukon sa mga pumuluyo.” Gani,  namatbat ang korte nga nalapas ang kinamatarong sang mga Saksi ni Jehova kag nagsiling pa gid sila nga “ang Estado may legal nga obligasyon . . . sa paghimo . . . sing mga tikang nga dapat nila ipatuman para mauntat ang paglapas nga nasapwan sang Korte.”

Sang Septiembre 9, 2010, ang gobierno sang Rusya nangabay nga ipasaka sa Grand Chamber ini nga kaso, walay duhaduha nga tuyo nila nga indi gilayon pagtumanon ang desisyon. Tugutan man ni Jehova ang pag-usisa sini sang Grand Chamber ukon indi, makasiguro kita nga makahatag gihapon ini sing daku nga panaksi.

Serbia

Pagligad sang halos apat ka tuig nga pagpakigbato sa korte, ginlakip sang Serbian Ministry of Religious Affairs ang mga Saksi ni Jehova sa narehistro nga mga relihion sa Serbia. Antes sini, tatlo ka aplikasyon ang wala gin-aprobahan, bisan pa nagaluntad na diri ang Internasyonal nga mga Estudyante sang Biblia, ang tawag anay sa mga Saksi ni Jehova, sugod sang maaga nga bahin sang katuigan 1920. Pero, pagkatapos sang duha ka paborable nga desisyon sang Korte Suprema sang Serbia, gintugutan sang Ministry of Religious Affairs ang pangabay nga pagparehistro.

Sadto anay, ang mga kaaway—sa bulig sang media—pirme nagasiling nga makatalagam nga sekta ang mga Saksi ni Jehova. Pat-od nga makabulig gid sa interesado nga mga tawo sa Serbia ang pagparehistro para mahibaluan nga ang mga Saksi ni Jehova maayo nga mga pumuluyo nga nagatahod sa kasuguan kag indi makatalagam sa komunidad ukon sa ila. Ang una nga maayong resulta sa sining pagparehistro amo ang libre sa buhis nga pag-importar sang mga literatura sa Biblia kag iban pa nga mga tulun-an nga ginagamit sa mga miting kag pagbantala.

Slovenia

Sang Nobiembre 27, 2009, ang mga Saksi ni Jehova narehistro subong relihion sa gobierno sang Republika  sang Slovenia. Ang direktor sang Office for Religious Communities nagpahibalo sa aton mga representante nga sa 40 ka relihioso nga organisasyon kag grupo sa Slovenia, ikawalo ang mga Saksi ni Jehova nga narehistro sa idalom sang bag-o nga kasuguan parte sa kahilwayan sa relihion. Bangod sini nga rehistrasyon, nakabaton ang bug-os tion nga mga ministro sing pila ka benepisyo nga ginahatag sang gobierno sa tanan nga nagapanghikot sing bug-os tion sa relihioso nga mga buluhaton.

Turkey

Ginagamit sang mga Saksi ni Jehova sa Mersin ang ila Kingdom Hall sa sulod na sang 20 ka tuig. Nian, sang Agosto 2003, ginpasira ini sang awtoridad kay ginlapas kuno nila ang kasuguan parte sa pagpatindog kag kon sa diin ini dapat ipatindog. Bisan pa nanikasog ang mga kauturan sa pag-apelar sini sa mga korte, sang Disiembre 30, 2009, ginsikway sang pinakamataas nga korte sang Turkey ang apelasyon kag ginpaboran ang mga opisyal sa Mersin. Ginpasaka na ini nga kaso sa ECHR.

PAGPAKITA SING UTUDNON NGA GUGMA SA HAITI

Sang Enero 12, 2010, naigo sang mabaskog nga linog ang Port-au-Prince, ang kapital sang Haiti, kag ang kaingod nga mga lugar sini. Ginatos ka libo ang nagkalamatay, kag madamo ang nadulaan sing puluy-an. Linibo ka Saksi ni Jehova ang nadulaan man sing puluy-an, kag 154 ang napatay. Madamo ang grabe nga nasamaran ukon diutayan lang napatay.

Yara si Acloque sa ila balay sang naglinog. Narumpag ang mga dingding sini, kag natabunan sia sang kisame. Apang indi grabe ang iya samad, kag nangapkap sia tungod madulom. “Nakapkapan ko ang isa ka balde sang tubig,” saysay ni Acloque. “Indi ko ini mabutong, pero masawsaw ko ang akon mga tudlo kag mapatulo ini sa akon bibig. May nakapkapan man ako nga bato para ipatik, nga  nagalaum nga may makabati sini.” Nangamuyo sia sing bulig kag padayon nga nagapatik kag nagahulat.

“Wala ako sing relo, gani indi ko mahibal-an ang oras,” siling ni Acloque. “Sang primero, nagahibi ako kag nagapakiluoy nga luwason ako ni Jehova. Pero pagligad sang mga tion, nagbag-o na ang akon mga pangamuyo. ‘Kabalo ako nga banhawon mo ako,’ pangamuyo ko. ‘Pero bata pa ako! Kon indi pa ako mapatay, makapadayon pa ako sa pag-alagad sa imo.’”

Amat-amat nga nagluya si Acloque, kag sang ulihi wala na sia sing kusog sa pagpatik. Nian nalipong sia.

Sang naumpawan si Acloque, nabatyagan niya nga ginatinguhaan sang mga kauturan nga haw-ason ang mga nagatabon sa iya. “Hinali lang nga natumba ang semento malapit sa akon tiil,” saysay niya. “Posible nga matumbahan ang akon tuhod sang masunod nga bloke, gani ginpalusot ko ang akon kamot para mahibaluan nila nga yara ako didto.” Nasalbar gid man si Acloque. Apat sia ka adlaw sa sini nga kahimtangan.

MADASIG NGA PAGBULIG

Sa sulod lang sang 24 oras, nag-abot ang una nga Saksi nga doktor gikan sa sanga sa Dominican Republic. Nag-alabot man ang mga Saksi nga may ihibalo sa pagbulong kag mga utod nga mabulig sa mga nalinugan, dala ang gindonar nga mga kagamitan. Gilayon nga nagtukod sing ospital sa sanga talatapan, kag kapin sa 1,000 ka Saksi kag indi Saksi ang ginbulong.

Lakip sa mga pasyente ang duha ka pamatan-on nga babayi nga pareho nga nakumpulan sang tuo nga butkon. “Kaangay sang mga di-minyo nga nakumpol,” saysay ni Mylène, isa ka boluntaryo sa sanga, “nabalaka sila nga indi na sila makapamana.” Gani ginkontak ni Mylène ang iya kilala nga utod nga babayi sa Pransia nga nakumpol man sang bata pa bangod sa aksidente sa salakyan kag  nangabay nga palig-unon ang duha ka babayi. Paagi sa e-mail, nagpadala ang utod sa Pransia sang iya mga retrato upod sa iya bana kag duha ka matahom nga bata. Nalugpayan gid ang duha sang nakita nila ini, kag nakapahisuno na sila subong sa ila kahimtangan.

Luwas sa pagkaon, panapton, kag mga bulong, kinahanglan man sang mga nakaluwas ang puluy-an. Ang boluntaryo nga mga Saksi sa Haiti kag taga-iban nga pungsod nagdesinyo kag nagpatindog sing kapin sa 1,700 ka temporaryo nga puluy-an para mapasilungan kag maistaran sang mga Saksi nga nagub-an sing mga balay. Pagka-Hunyo, nagpatindog sing temporaryo nga mga Kingdom Hall ang mga boluntaryo, kag pagka-Hulyo naghatag ang gobierno sing una nga permiso sa pagpatindog sing permanente nga mga Kingdom Hall.

PAGBULONG SA PISIKAL, EMOSYONAL, KAG ESPIRITUWAL

Sang Marso, ang isa ka Saksi nga doktor nga espesyalista sa pagbulong sa mga natrauma nakigsugilanon sa mga gulang sa 115 ka kongregasyon nga nalinugan. Naghatag sia sa ila sing praktikal nga mga panugda kon paano palig-unon sa espirituwal ang mga katapo sang kongregasyon nga natrauma. Pagkatapos sini, nakigsugilanon sia sing personal sa kapin sa 100 ka utod nga nagakinahanglan gid sing bulig.

Wala magdugay sa tapos sang linog, si David Splane sang Nagadumala nga Hubon nagkadto sa Haiti para lugpayan kag palig-unon sila. Si Utod Splane, nga makahambal sing Pranses, namulongpulong sa  mga kauturan sa sirkito nga asembleya kag nakigkita sa pamilya Bethel, mga misyonero, kag mga manugtatap sang sirkito. Nagpasalamat gid ang tanan sa iya mahigugmaon nga kabalaka kag sa pag-ulikid sang Nagadumala nga Hubon.

Bisan pa sa sini nga mga kabudlayan, nakompleto, naimprinta, kag napadala sa sanga ang Bag-ong Kalibutan nga Badbad Sang Cristianong Griegong Kasulatan sa Haitian Creole. Nag-abot ang bag-o nga Biblia sing inoras lang antes ini paguaon sa distrito nga kombension sang Hulyo. Sa mga nagkalatabo sang 2010, sugod sa pagbulig sa mga nalinugan tubtob karon, nakita kag nabatyagan sang tanan ang padayon nga pagtuytoy kag pagsakdag ni Jehova. Masami nga nagaabot sa husto nga tion ang kinahanglanon nga mga suplay, transportasyon, kag mga boluntaryo, kag imposible nga natabuan lang ini. Nagsiling ang madugay na nga misyonero, “Dapat yari kamo diri para maapresyar ninyo ang pamatuod sang pagbulig ni Jehova.”

ANG MGA DEDIKASYON SA SANGA NAGAHIMAYA SA DIOS

Indi gid malipatan sang mga Saksi ni Jehova sa Solomon Islands ang Pebrero 13, 2010. Si Stephen Lett, katapo sang Nagadumala nga Hubon, naghatag sing pamulongpulong para sa dedikasyon sang mga pasilidad sang sanga. Lakip sa 368 nga nagtambong ang una nga Saksi sa sini nga lugar nga si Clement Fa’abasua. Isa ka bulan antes sini, gin-agda nga magbisita ang mga nagapuyo malapit sa bag-o nga pasilidad sang sanga, kag 273 ang nag-tour. Ang isa ka bisita nga arkitekto nagsulat sa isa ka nagapanguna nga pamantalaan sang pungsod: “Sa kabug-usan, ang grado sang pasilidad sang [sanga] tatlo ka A. Maayo gid nga sundon sang mga taga-Solomon Islands kon ano ang nahimo diri bisan sin-o pa ang mga nagagamit sini. Ang desinyador, mga trabahador, kag mga nagadumala diri masiling nga nakahimo sing isa ka hiyas sa amon matahom nga isla.”

 Ang indi malipatan nga dedikasyon sang sanga sa Estonia ginhiwat sang Sabado, Abril 3, 2010. Nalipay gid ang 438 nga nagtambong sa programa, nga nagalakip sang pamulongpulong para sa dedikasyon ni Christian Muntean, nga naggikan sa sanga sa Gresya. Ang duha ka panalgan nga bilding, nga nahamtang sa lote nga kaingod sang sanga, nabakal gikan sa kompanya sang tubig. Nahamtang sa sining ginbag-o nga bilding ang estudyo sang audio kag video subong man ang hulot-klasehan sang Bible School for Single Brothers.

Ang sanga sa Latvia gindedikar sang Abril 10, 2010. Sang 1918, una nga ginbantalaan ang Latvia. Sugod sadto grabe gid ang pagpamatok diri sa aton hilikuton. Pero karon, nagauswag ang pagbantala sa Latvia, kag 248 ka delegado gikan sa siam ka pungsod ang nagtambong upod sa mga kauturan diri agod pamatian ang pamulongpulong ni Christian Muntean para sa dedikasyon.

Sang Sabado, Mayo 8, 2010, kapin sa 2,200 ang nagtambong sa pamulongpulong sang katapo sang Nagadumala nga Hubon nga si Gerrit Lösch para sa dedikasyon  sang sanga sa Paraguay. Gintukod ang residensia nga may 32 ka kuarto kag bag-o nga mga opisina, kag ang daan nga residensia ginkay-o kag ginbag-o. Isa pa, naghimo man sing tangke nga masudlan sing 40,000 ka litro nga tubig. Sa pagsugod sang proyekto, nagdayaw gid ang lokal nga mga opisyales sa kalidad sang trabaho sang internasyonal kag lokal nga mga boluntaryo. Nagsiling ang isa ka opisyal nga madamo sing problema ang iban nga relihiosong tinukod, pero ang mga Saksi ni Jehova nagtukod sang ila bilding sa husto nga pamaagi. Gani, wala sila  nabudlayan sa pagkuha sing permiso sa pagtukod sang sanga.

Sa Papua New Guinea, sang Sabado, Mayo 29, 2010, halos 500 ka kauturan gikan sa 12 ka pungsod ang namati kay Winston Payne, nga naggikan sa sanga sa Australia, sa iya pamulongpulong para sa dedikasyon sang sanga. Ang ginpadakuan nga mga pasilidad sa sanga nagalakip sang apat sing panalgan nga bilding nga may mga kuarto, hulot kalan-an, kusina, kag hulot lalabhan; isa ka bilding nga may Kingdom Hall kag may opisina sang mga nagamentenar sa pasilidad; kag maligwa nga opisina sang mga manugbadbad. Ang tumalambong ginlakipan sang grupo sang mga Saksi nga naglakat sing anom ka adlaw sa kabukiran. Nagsuksok sila sang ila tradisyonal nga bayo nga Orokaiva, kag mainit nga ginbaton ang mga bisita paagi sa saot kag ambahanon. Ginpabutyag sang isa ka utod nga babayi nga madugay na nga Saksi ang balatyagon sang madamo. Nagahibi sia samtang nagasiling, “Pamatyag ko, paraiso na!”

‘PADAYON NGA NAGAPAMUNGA’

Pat-od gid nga padayon nga nagahimaya sa Dios ang nahiusa nga panikasog sang mga Saksi ni Jehova. Si Jesus nagsiling: “Ang akon Amay ginahimaya sa sini, nga padayon kamo nga nagapamunga sing madamo kag ginapamatud-an ninyo nga kamo mga disipulo ko.” (Juan 15:8) Paagi sa pagpakamaayo kag mahigugmaon nga panuytoy ni Jehova, ginatinguhaan gid nila nga “maglakat sing takus kay Jehova sa tuyo nga pahamut-an sia sing bug-os samtang padayon [sila] nga nagapamunga sa tagsa ka maayong buhat kag nagalambo sa sibu nga ihibalo tuhoy sa Dios, nga ginapabakod upod ang bug-os nga gahom suno sa iya mahimayaon nga kagamhanan agod makabatas sing bug-os kag mangin mapinasensiahon nga may kalipay.”—Col. 1:10, 11.

[Retrato sa pahina 8]

Ginpadayon ni Natsue ang iya pagtuon sa Biblia

[Mga Retrato sa pahina 11]

Nagapangusisa sing maayo ang mga manugpanalawsaw para masiguro nga husto ang impormasyon

[Retrato sa pahina 13]

Korea

[Retrato sa pahina 14]

Mexico

[Mga Retrato sa pahina 14]

South Africa

[Retrato sa pahina 15]

Si Stephen Lett sa internasyonal nga kombension sa Hawaii

[Retrato sa pahina 22]

Si Dmitry Smyk

[Retrato sa pahina 25]

Si Evangelos Delis

[Retrato sa pahina 25]

Ang sertipiko nga ginhatag sang Ministry of Justice

 [Retrato sa pahina 33]

Gilayon nga nag-abot ang mga Saksi nga makahibalo magbulong pagkatapos sang linog

[Retrato sa pahina 33]

Ang mga boluntaryo nga Saksi sa Haiti kag taga-iban nga pungsod nagdesinyo kag nagtukod sing kapin sa 1,700 ka temporaryo nga puluy-an

[Retrato sa pahina 34]

Ginpagua ang “Bag-ong Kalibutan nga Badbad Sang Cristianong Griegong Kasulatan” sa Haitian Creole

[Retrato sa pahina 36]

Ang ginpadakuan nga sanga sa Estonia

[Retrato sa pahina 37]

Ang sanga sa Paraguay

[Mga Retrato sa pahina 37]

Nagapamulongpulong si Winston Payne para sa dedikasyon sang sanga sa Papua New Guinea