Pagbantala kag Pagpanudlo sa Bug-os nga Duta

SA ISA ka matagnaon nga palanan-awon sadto, nakita ni apostol Juan ang indi maisip nga kadam-an “gikan sa tanan nga pungsod kag tribo kag katawhan kag hambal.” Ini sila amo ang nakalampuwas sa “dakung kapipit-an” padulong sa bag-ong kalibutan sang Dios. (Bug. 7:9, 14) Ang mga report kag eksperiensia sa masunod nga mga pahina nagapakita nga wala lamang ginatipon ang dakung kadam-an kundi labi pa gid ini nga nagadamo. Wala bala ini nagapabakod sang imo pagtuo nga matuod gid ang mga saad ni Jehova?

 APRIKA

PUNGSOD 57

POPULASYON 949,533,064

MANUGBANTALA 1,267,314

PAGTUON SA BIBLIA 2,819,310

NALUGPAYAN PAAGI SA SULAT. Si Iris, nga taga-South Africa, nagahimo sing sulat para sa mga napatyan sing hinigugma. Ginalakipan niya ini sing tract nga Malapit na Madula ang Tanan nga Pag-antos! kag Ano ang Paglaum Sang Napatay nga mga Hinigugma? Sining karon lang, ginbalusan sia ni Sidney, nga napatyan sing asawa. Treintay otso ka tuig sila nga nag-asawahay. “Bisan pa ginhambalan na ako sang mga doktor nga indi na magdugay ang akon pinalangga nga asawa,” sulat niya, “nasakitan gid ako, naligban, nawad-an sing paglaum, kag nasubuan sa iya pagtaliwan. Ginapasalamatan ko gid ang Ginuo bangod sa imo. Dalayawon gid ang imo pagtinguha nga isugid ang mga saad sang Dios bisan sa mga indi mo kilala, kag ang pagpabutyag mo sang pagtuo magapabilin gid sa akon tagipusuon sa mabudlay nga tion sa ulihi. Ang imo sulat kag mga tract nakahatag sa akon sing paumpaw kag paghangop.”

WALA MADAYON ANG PAGPAHULOG. Ang isa ka pamatan-on nga utod sa Benin nga si Gloria nagapanaksi kay Arnaud, isa ka estudyante sa unibersidad, sang hinali lang nga nag-ring ang cell phone sini. Naglisensia si Arnaud nga malakat na sia kay ang iya abyan nagapangayo sing bulig. Dalidali nga nagkuha si Gloria sang magasin sa iya bag kag ginhatag ini sa iya. Ginbaton naman ini dayon ni Arnaud kag naghalin.

 Gintawgan si Arnaud sang iya abyan kay ang iya nobya nagabusong kag nagaplano sia nga piliton ini nga magpahulog. Samtang nagapakadto si Arnaud, gintan-aw niya sing makadali ang magasin. “Indi ako makapati sang nakita ko ang tinaga nga ‘aborsion’ sa panghapin,” siling niya. Ang ginhatag gali sa iya ni Gloria amo ang Hunyo 2009 nga Magmata! nga may tig-ulo, “Aborsion Ngaa Kontrobersial Gid?” Sang mabasa ini sang abyan ni Arnaud, wala na niya ginhunahuna ang pagpahulog. Ang iya nobya nagbun-ag sing matahom nga bata nga babayi.

INDI NA DAPAT KAHADLUKAN ANG SIRUHANA. Si King, nga isa ka regular payunir, nagsaylo sa isa ka lugar sa Zimbabwe diin mas daku ang panginahanglan. Samtang nagapanaksi upod sa pila ka utod nga babayi, ginkadtuan niya ang balay sang kilala nga siruhana. Bisan pa nagapangalag-ag ang mga utod nga babayi, naghunahuna si King nga tanyagan sia sing pagtuon sa Biblia. Sang makita sang siruhana nga nagapakadto sila, abi niya mapabulong sila. Sang namangkot sia sa ila, ginpakita sa iya ni King ang libro nga Ano Gid ang Ginatudlo Sang Biblia? kag gintanyagan sia sing pagtuon sa Biblia. Ginbaton niya ini. “Nakibot gid kami kay madamo gali sia sing pamangkot,” siling ni King. “Gani naghimo kami sing kahimusan nga magbalik agod tun-an sia.” Pagligad sang tatlo ka semana, gin-agda nila sia nga magtambong sa miting kag nag-upod sia. Ginsunog niya ang tanan niya nga gamit nga may labot sa espiritismo. Madasig sia nga nag-uswag sa espirituwal kag nabawtismuhan pagligad lang sang pila ka bulan.

 “TANI IPANGAMUYO N’YO NGA DUAWON NILA AKO.” Sang nagligad nga napulo ka tuig, nagsaylo si Patrick sa Estados Unidos halin sa Angola. Pero ginakontak niya gihapon ang iya iloy nga si Felicidade paagi sa telepono. Apang sining karon lang, makakitaay na sila paagi sa video call sa Internet. Samtang nagaistoryahanay sila, natalupangdan niya nga may upod ang iya iloy, gani namangkot sia kon sin-o ini. Si Felicidade, nga isa ka Saksi ni Jehova, nagsiling: “Ginduaw ako sang isa ka utod nga babayi sa amon kongregasyon.”

Nagsiling si Patrick: “Ti, ngaa wala ko ya nila ginaduaw haw? Napulo na ko di ka tuig pero wala pa sing Saksi nga nagkadto sa akon. Tani ipangamuyo n’yo nga duawon nila ako.”

Daw nakibot gid si Felicidade kag ang utod nga babayi. Nagsiling sila: “Sige, ipangamuyo namon.”

Pagligad sang tatlo lang ka adlaw, may Saksi ni Jehova nga nagkadto sa balay ni Patrick. Nakibot gid sia amo nga ginpamangkot niya ang iya iloy kon bala may ginpangabay ini sa Estados Unidos nga magduaw sa iya. Apang wala man kuno. Gani, nakasiling sia nga sabat ini halin sa Dios kag ginbaton niya ang pagtuon sa Biblia. Nagtambong sia dayon sa tanan nga miting. Sang mag-istoryahanay sila liwat sang iya iloy, malangkagon niya nga ginpakita kon diin na sia nayon nga kapitulo sa Ginatudlo Sang Biblia nga libro. Ginsilingan man niya ang iya iloy nga nagbakal sia sing bayo para gamiton niya sa mga miting.

 INDI KINAANDAN NGA PANGABAY NGA MAGPABAWTISMO. Sang nagaumpisa ang 2010 distrito nga kombension sa Brazzaville, Republic of the Congo, nagsiling ang isa ka pamatan-on nga si Edvard nga luyag niya magpabawtismo. Sang ginpamangkot sia kon ano ang iya kongregasyon, nagsabat sia: “Mossaka.” Bangod wala sing Saksi sa sinang malayo nga lugar, natingala ang mga gulang kon paano sia nakadesisyon nga magpabawtismo.

 Ginpaathag ni Edvard nga sang 2007, gintun-an sia sang iya lolo sa Ginapatuman nga brosyur pati na sa 14 ka kapitulo sang Ginatudlo Sang Biblia nga libro sa Brazzaville. Dayon nagsaylo sia sa iya mga ginikanan sa Mossaka. Wala sing Saksi didto, gani ginpangabay ni Edvard ang iya amay nga buligan sia sa pagtuon sa nabilin nga kapitulo sang libro. Ang iya amay ang nagapamangkot, dayon si Edvard ang nagasabat. Gani natapos niya ang libro. Nian nagbatyag sia nga dapat niya isugid sa iban ang iya natun-an. Gani sugod sang Oktubre 2009, nagbantala sia sing isahanon sa Mossaka nga nagagamit sing Ginapatuman nga brosyur. Ginareport niya ang iya oras kag regular ini nga ginapadala sa iya lolo sa Brazzaville. Pero wala ini ginahatag sang iya lolo sa kongregasyon.

Sang ulihi, nagpadala ang sanga sing temporaryo nga mga espesyal payunir sa Mossaka sa sulod sang tatlo ka bulan bisan pa wala nila nahibaluan ang parte kay Edvard. Duha ka adlaw antes sila magbiya, nakita ni Daniel, isa sa mga payunir, si Edvard nga nagadumala sing pagtuon sa Biblia paagi sa brosyur nga Ano ang Ginapatuman Sang Dios sa Aton? Gani ginpalapitan sia ni Daniel kag gin-istorya. Si Edvard nagsiling: “Nagabantala ako. Isa ako ka manugbantala. Bisan pamangkuton mo pa si Tatay.” Nakigkita si Daniel sa amay ni Edvard, kag ginpamatud-an niya nga husto ang ginsiling sang iya bata. Ginhinguyang sang mga espesyal payunir ang ila nabilin nga tion para hanason si Edvard sa ministeryo. Sang naghalin na sila, nangin mapisan pa gid si Edvard, nga nagadumala sing kapin sa napulo ka pagtuon sa Biblia. Gindedikar man niya ang iya kabuhi kay Jehova.

Bangod sa sini nga impormasyon, sang Biernes sa ginsambit nga kombension kaina, ginrepaso kay Edvard sang duha ka gulang ang mga pamangkot para sa mga luyag mangin di-bawtismado nga manugbantala. Nagdayaw  gid sila sa iya mga sabat. Nahibaluan man sang mga gulang gikan sa mga espesyal payunir ang huwaran nga paggawi ni Edvard kag nga nagabantala na sia sing siam ka bulan bisan wala pa sia naaprobahan. Gani, gin-aprobahan sia subong di-bawtismado nga manugbantala. Bangod may distrito nga kombension sa Lingala nga lenguahe pagkadason nga semana, ginrepaso sang mga gulang si Edvard para sa bawtismo sa nabilin nga mga inadlaw. Nakita nila nga nahangpan gid sing maayo ni Edvard ang kamatuoran, gani nabawtismuhan sia sa kombension sang Lingala sang Hulyo 2010. Isa ka semana pagkatapos nga naaprobahan sia subong di-bawtismado nga manugbantala, ginpahibalo sang mga gulang nga si Edvard isa na ka bawtismado nga utod.

Pagkatapos sang iya bawtismo, nag-auxiliary payunir sia sing duha ka bulan sa Brazzaville. Gintun-an sia sang mga gulang sa libro nga “Magpabilin Kamo sa Gugma Sang Dios,” kag nian nagbalik sia sa Mossaka. Sining karon lang, isa ka espesyal payunir ang gin-asayn sa sina nga teritoryo. Sang Abril, gin-abiabi ni Edvard, nga auxiliary payunir sadto, upod sa espesyal payunir, ang 182 ka interesado sa Memoryal. Si Edvard may 16 ka ginatun-an, 7 sa sini ang nagatambong sa mga miting nga ginadumalahan sang duha ka utod. Sang 2011, 15 anyos na si Edvard.

 AMERIKA

PUNGSOD 55

POPULASYON 941,265,091

MANUGBANTALA 3,780,288

PAGTUON SA BIBLIA 4,139,793

“WALA LANG NATABUAN ANG PAGDAYAL KO SANG IMO NUMERO.” Si Sundie, isa ka utod nga babayi sa Estados Unidos, yara sa ila balay sang nag-ring ang telepono. May ginapangita ang babayi sa pihak nga linya pero indi ini kilala ni Sundie. Ginsilingan niya ang nagtawag nga basi sala nga numero ang iya nadayal. Nagsabat ang babayi nga may diperensia sia sa mata gani kon kaisa nagasala sia sa pagdayal. Nag-istoryahanay sila, kag nagsiling ang babayi nga ginatinguhaan niya nga tawgan ang iya bata kay may masubo kuntani sia nga ibalita. Natukiban sang mga doktor nga may kanser sia. Daw indi niya ini mabaton kag naakig sia sa Dios bangod gintugutan niya ini nga matabo sa iya. Narealisar ni Sundie nga dapat niya isugid ang mensahe sang Biblia. Pagkatapos makapangamuyo para sa kaisog, ginpaambit ni Sundie ang pila ka teksto nga nakahatag sing paumpaw kag paglaum sa babayi. Ginpaathag niya nga may ngalan ang Dios kag ginpalig-on sia nga mangin espesipiko sa iya pangamuyo kag gamiton ini nga ngalan. Nagpasalamat ang babayi bangod ginpamatian sia ni Sundie kag ginpalig-on. “Sa banta ko wala lang natabuan ang pagdayal ko sang imo numero,” siling niya.

Ginpangayo ni Sundie ang adres sang babayi kag ginpadal-an sia sing audio recording sang Ginatudlo Sang Biblia nga libro. Naghimo man sing kahimusan nga maduaw  sia sang isa ka payunir nga babayi malapit sa iya ginaistaran. Nagsiling si Sundie, “Nagapasalamat gid ako kay Jehova bangod ginahanas niya kita kon paano lugpayan ang mga tawo bisan ano man ang ila problema.”

GINSABAT SANG TRACT ANG ILA PAMANGKOT. Ang pila ka utod nga babayi regular nga nagapanaksi sa kalye sa isa ka daku nga medical center sa Puerto Rico. Ginpalapitan sang isa sa ila ang duha ka lalaki nga nagadalidali pasulod sa isa sa mga ospital. Bangod nagadali sila, gintanyag niya ang tract nga May Yara Ka Bala Di-mamalatyon nga Espiritu? Ini nga tract talagsa lang nga ginatanyag sang utod, pero amo na lang ini ang nabilin sa iya. Sang ulihi, ginpalapitan sining duha ka lalaki ang isa pa ka utod kag ginpaathag nga nabaton nila ang tract sang nagapakadto sila para duawon ang miembro sang ila pamilya nga may malala nga balatian. Nagaistoryahanay sila kon bala ang espiritu nagakabuhi pa pagkatapos sang kamatayon, kag ang tract naghatag sa ila sing sabat. Nagsiling sila nga nakabulig gid ini sa ila.

SULAT PARA KAY JEHOVA. Nagaeskwela ang siete anyos nga si Joshua sa Estados Unidos. Sang Disiembre, gin-asayn sila sang ila manunudlo nga maghimo sing sulat para kay Santa Claus. Matinahuron nga nangindi si Joshua, gani nagsiling ang iya manunudlo, “Sulati na lang ang iban.” Gani naghimo sia sing sulat para kay Jehova. “Salamat sa paraiso nga imo ginsaad. Salamat sa imo Anak, nga si Jesus, kay ang iya kabuhi ginhalad. Salamat sa  imo mga tinuga nga nagapasadya. Palangga ko gid ikaw, Dios nga Jehova.” Ini nga sulat ginbalhag sa lokal nga pamantalaan, lakip ang sulat sang iban pa nga estudyante.

NAGBATON ANG PAMILYA. Luyag ni Alejandro, isa ka utod nga lalaki sa Colombia, nga panaksihan ang iya pamilya. Bangod malayo ang ila ginaistaran, ginasulatan niya sila kag ginapadalhan sing mga Lalantawan kag Magmata! Sang nabasa ini sang iya paryente nga si Pablo kag natan-aw ang mga teksto sa Biblia, narealisar niya nga sayop ang mga panudlo sang Iglesia Katolika. Sa iya kakunyag, ginpaambit niya ini sa iban nga miembro sang ila pamilya, nga nagbaton man sang kamatuoran kag nagbiya sa ila relihion.

 Sang ulihi, 15 ka miembro sang pamilya ang nagatipon kada gab-i agod tun-an ang Biblia paagi sa mga magasin. Bangod luyag nila makatuon pa gid, ginpangita nila ang mga Saksi sa kaingod nga mga banwa, apang wala gid sila sing nakit-an. Pero ginapaambit na nila ang ila natun-an sa ila mga kaingod. Sang ulihi, nahibaluan nila nga may Kingdom Hall sa isa ka banwa nga mga isa ka oras ang biyahe. Naglakbay sila dayon kag nangabay sing bulig.

Sa karon, may isa ka regular payunir nga nagakadto sa ila kada semana kag nagadumala sing pagtuon sa Biblia sa 26 ka tawo—ang pamilya ni Alejandro kag 11 pa ka interesado. Nagaarkila sila sing salakyan agod ang kalabanan sa ila makatambong sa pamulongpulong publiko kag Pagtinuon sa Lalantawan.

SALA GID MAN BALA ANG ILA NAKADTUAN? Isa ka adlaw, ang isa ka utod nga babayi nagmasakit, gani ginpangabay niya ang iban nga Saksi nga tun-an anay ang iya estudyante sa Biblia sa isa ka lugar nga nagahambal sing Quichua sa Ecuador. Indi sigurado ang mga utod kon diin nagaistar ang pamilya amo nga nagdulog sila sa isa ka balay kag namangkot kon bala nagatuon sila sa Biblia. Gin-abiabi sang pamilya ang mga utod nga daw ginapaabot gid sila. Sa tapos lang sang ila pagtuon kag narealisar sang mga utod nga ining pamilya wala pa gid anay nakatuon sa Biblia! Gusto lang gali nila nga magtuon, amo nga nagpakunokuno sila nga nagatuon na sila anay. Bangod sini, may bag-o nga pagtuon sa Biblia nga nasugdan, kag ang mga estudyante sa Biblia sang utod nga babayi nga wala nila nakita sina nga adlaw padayon man nga nagatuon.

NAKAPANAKSI BANGOD SA CUPCAKE. Si Caleb isa ka seis anyos nga bata nga taga-Canada. Sa una nga adlaw sang klase, birthday sang isa niya ka klasmeyt. Gani nagdala ang iloy sini nga si Natalie sang cupcake. Matinahuron nga nangindi si Caleb. Ginpalapitan ni Natalie si Caleb kag ginpamangkot kon bala may allergy sia sa pagkaon.  “Wala,” sabat ni Caleb, “nagaalagad ako kay Jehova.”

Pagkatapos sang klase, ginpalapitan ni Natalie ang iloy ni Caleb kag ginpamangkot, “Saksi ni Jehova ka?” Sang nagsabat ini nga huo, nalipay gid si Natalie. Nagatuon sia anay sa mga Saksi sang tin-edyer pa sia, pero bangod sa paghingabot sang pamilya, nag-untat sia sa pagtuon. Sang ginpamangkot sia kon luyag niya padayunon ang pagtuon sa Biblia, nagpasugot sia.

INDI INA KABUBUT-ON SANG DIOS. Si Laly, nga nagaistar sa Peru, natawo nga apa. Sang ginpamangkot niya ang iya iloy parte sini, ginhambalan sia nga pagbuot ina sang Dios. Nalugaw-an gid si Laly kag naakig sa Dios. ‘Ngaa ginhimo niya ini sa akon?’ hunahuna niya.

Pagligad sang mga tinuig, nakapamana si Laly sang pamatan-on nga apa. Ang ila una nga bata natawo nga may Down syndrome. Bangod nabalaka sia kag nalugaw-an, ginpalapitan niya liwat ang iya iloy kag ginpamangkot, “Ngaa nangin amo sini ang akon bata?” Ginpakadto sia sang iya iloy sa isa ka pari. Ang sabat sang pari pareho man sa sabat sang iya iloy, “Kabubut-on ina sang Dios.”

Bangod nalugaw-an, nagsabat si Laly: “Ngaa kapintas gid sang Dios? Ginabaton ko nga apa ako kag silot ini sang Dios, pero ngaa gindalahig niya pati ang akon bata? Bag-o lang sia nabun-ag. Ano ang iya sala?” Sugod sadto, indi na niya luyag makabati pa parte sa Dios kag nagbiya sia sa simbahan.

 Pila ka tuig sang ulihi, isa ka Saksi ni Jehova nga nakahibalo magsenyas ang nagduaw kay Laly kag gintanyagan sia sang pagtuon sa Biblia. Nangindi sia kag nagsiling nga wala sia nagapati sa Dios. Ginpaathag sang mapailubon sang utod nga babayi nga ang Dios nga indi niya luyag makilala, amo si Jehova kag handa Sia nga ipasag-uli ang iya palamatin-an kag paghambal. Indi magpati si Laly, gani luyag niya nga pamatud-an ini sang utod. Ginbuksan sang utod ang Biblia kag ginbasa ang Isaias 35:5: “Ang mga mata sang mga bulag pamuklaton, kag ang mga idulungug sang mga bungul mabuksan.” Nalangkag gid si Laly, amo nga nagpasugot sia nga magtuon sa Biblia kag nagpabawtismo. Ginaupdan sia sang iya bata sa mga miting, kag nakatuon man ini sang sign language. Padayon nga nag-uswag ang iya apresasyon sa mga saad sang Biblia, kag nagaalagad na sia subong regular payunir.

 ASIA KAG MIDDLE EAST

PUNGSOD 47

POPULASYON 4,194,127,075

MANUGBANTALA 664,650

PAGTUON SA BIBLIA 629,729

DUHA KA PAMANGKOT NGA INDI NILA MASABAT. Sa isa ka pungsod sa Asia diin ginadumilian ang aton hilikuton, isa ka 24 anyos nga lalaki ang nagbaton sing pagtuon sa Biblia upod sa mga Saksi para pamatud-an nga sayop ang ila mga panudlo kag husto ang iya sang mga Katoliko. Pero, narealisar niya sang ulihi nga nagatudlo sing kamatuoran ang mga Saksi ni Jehova.

Sang mahibaluan sang iya pamilya nga nagatuon sia, ginpatawag nila sia kag ginpilit nga magbalik sa Iglesia Katolika. Bangod nangindi ang pamatan-on, gintipon sang iya pamilya ang tanan nila nga paryente agod puersahon sia nga bayaan ang iya bag-o nga mga pagpati. Bisan pa ginkastigo nila sia, wala gid sia nagkompromiso. Nian ginreport nila sia sa pari, nga amo ang nagdala sa iya sa konseho sang parokya. Nagsiling ang pamatan-on nga mabalik sia sa ila kon masabat sang pari ang duha ka pamangkot: Ano ang ngalan sang Dios? Ngaa ginatugutan sang simbahan ang mga miembro sini nga magkaon sing dugo bisan pa ginadumilian ini sang Biblia? Bangod indi ini masabat sang pari, gintampa niya ang pamatan-on,  nga daw subong bala nga “ginatabog ang demonyo sa sulod niya.” Nian natapos ang miting.

Masunod, gintipon sang pamilya ang tanan nila nga abyan para puersahon sia nga magluhod sa imahen ni Maria. Bisan pa ginkastigo nila sia liwat, wala gid sia nagkompromiso. Pagkatapos, nagsugo ang pamilya sing matahom nga babayi nga handa nga pakaslan sia kon magbalik sia sa simbahan. Ginsilingan sia sang pamatan-on nga mabalik lang sia kon masabat sini ang duha ka ginpamangkot niya sa pari. Naghalin ang babayi kag wala na magbalik pa. Sang ulihi, pagkatapos sang pito ka bulan nga paghunong sa iya sa minuro, nakapalagyo sia kag nagbalik sa siudad, diin nakig-angot sia sa mga kauturan. Pagligad sang isa ka bulan, nangin di-bawtismado sia nga manugbantala. Nabawtismuhan sia sa sirkito nga asembleya sang Marso 2011.

GINPANGAPINAN SANG OPISYAL SANG PRISUHAN. Ginaduaw sang isa ka regular payunir nga babayi ang iya bata nga napriso sa South Korea bangod sa Cristianong neutralidad. Samtang nagahulat sia, ginhatagan niya sing tract ang lalaki sa iya tupad. Ginsinggitan sia sang lalaki, “Ngaa kamo nga miembro sang butig nga relihion nagawali bisan sa sini nga duog?” Bangod sini, nakibot ang 30 ukon 40 ka bisita sa amo nga hulot. Pero gin-akigan sang isa ka opisyal sang prisuhan ang lalaki, nga nagasiling: “Matuod ang ila relihion. Ang iban nga relihion amo ang butig. Madugay ko na sila nga ginapanilagan diri sa prisuhan, kag napamatud-an ko nga sila lang ang nagasunod sa ila ginatudlo.” Naghipos na lang ang lalaki.

SINULATAN SA DINGDING. Sang nagtuon sa Biblia si Harindra, napulo ka tuig na sia nga nagaistar sing isahanon bangod kinahanglan niya mag-obra sa daku nga siudad sa Nepal para sakdagon ang iya pamilya sa ila minuro. Bangod indi sia kabalo magbasa kag magsulat, gintun-an  sia sang Saksi sa brosyur nga Agoma ang Kabuhi sa Duta Sing Dayon! Bangod ini nga brosyur indi pa matigayon sa Nepali nga lenguahe sadto, Ingles ang ila gingamit. Isa ka adlaw, ginduaw sia sang iya asawa. Nakibot ini kay nagatuon sia sing Ingles nga brosyur. Wala naman sia nagainom kag nagapanakit. Sang mahibaluan niya nga resulta ini sang pagtuon ni Harindra sa Biblia, nagtuon man sia kag nagtambong sa mga miting sa ila minuro. Luyag ni Harindra nga madugangan ang iya nahibaluan parte kay Jehova, gani nagtuon sia sa pagbasa kag pagsulat. Ginpangabay niya ang utod nga isulat ang mga letra sang Nepali sa papel, kag ginapatapik ini sa dingding sang iya kuarto tubtob nga napuno ini. Nian gintun-an niya nga basahon ang mga tinaga kag letra tubtob amat-amat sia nga nakahibalo sa pagbasa. Sang ulihi, ginkuha niya ang iya pamilya sa ila minuro para maalagad nila sing tingob si Jehova. Sa sulod sang duha ka tuig, nabawtismuhan sia. Sa karon, si Harindra nagatambong na sa mga miting upod sa iya pamilya, kag nagadeliber sing pagbasa sa Biblia sa Teokratikong Eskwelahan Para sa Ministeryo. Nagsiling sia, “Daku ang pagbag-o sang amon kabuhi bangod sa pagtudlo ni Jehova.”

WALA GINBAYLO SA $200,000. Si Zarkhanum, nga nagaistar sa Azerbaijan, nadalahig gid sa espiritismo. Sa sulod sang 15 ka tuig, ginakabig nga may extrasensory perception sia kag ikasarang sa paghibalo sang palaabuton. Ginapatihan man nga makasarang sia sa pagkuha sang mga hiwit kag pagbulong. Kilala gid si Zarkhanum. Madamo sa iya mga kliyente, nga mga opisyal nga mataas sing posisyon kag ila mga asawa, ang nagabayad sing $2,000 tubtob $4,000 (U.S.) para maistorya lamang ang mga espiritu. Gani nagmanggaranon sia. Bisan pa may espiritistiko sia nga gahom, nabatyagan niya nga wala sia sing maayo nga kaangtanan sa Dios, kag madamo nga pamangkot ang nagatublag sa iya. Naguba ang iya pag-asawahay kag  wala sing katuyuan ang iya kabuhi. Isa ka adlaw, samtang nagapautwas sang iya balatyagon sa Dios, nabatian niya nga may nanuktok. Ginbuksan niya ang puertahan, kag ginpanaksihan sia sang duha ka utod nga babayi. Natandog sia sa ila ginsiling parte sa pagpahamuot sa Dios indi lamang sa pulong kundi pati na sa buhat. Madamo sia sing kilala nga relihioso pero malain ang ila paggawi. Nahibaluan man niya nga sala ang espiritismo. Ginbaton niya ang pagtuon sa Biblia. Sang ulihi, ginagamit na niya ang ngalan ni Jehova sa iya pangamuyo kag nabatyagan niya nga ginasabat ini. Pero, indi mahapos para sa iya nga biyaan ang iya mga buhat kay padayon sia nga ginatublag sang mga demonyo kag ginasakit pa gani. Apang sa bulig ni Jehova, nahilway sia sa impluwensia sang mga demonyo. Ginpanghaboy man niya ang mga butang nga may labot sa espiritismo kag butig nga relihion.

Wala madugay, si Zarkhanum nangin makugi nga manugbantala kag nabawtismuhan sang Mayo 2011. Pagkatapos sang iya bawtismo, nag-auxiliary payunir sia gilayon. Wala sia nabudlayan sa paglab-ot sang iya oras kay bisan sang wala pa sia nabawtismuhan, kapin na sa 70 ka oras ang iya ginareport kada bulan bisan pa sa mapigaw nga panglawas. Duha ka bulan antes sang iya bawtismo, gintanyagan sia sing $200,000 (U.S.) sang asawa sang isa ka opisyal sang gobierno para kuhaon ang hiwit. Nagapati ang babayi nga nagmasakit sia bangod sa hiwit amo nga gin-utod ang iya tiil. Nangindi si Zarkhanum kag sa baylo, ginpakadtuan niya sing duha ka Saksi ang babayi sa ospital para panaksihan. Regular nga ginapanaksihan ni Zarkhanum ang iya anay mga kliyente, nga ginasugiran sila nga sala sa mata sang Dios ang iya ginahimo sadto. Subong resulta, ang isa sa ila, nga amo ang nagpakilala sa iya sa asawa sang opisyal sa gobierno, nagbaton sang pagtuon sa Biblia kag nagatambong na sa mga miting.

 PAGPANAKSI SA PRISUHAN. Sa India, duha sa aton utod nga babayi ang gin-aresto bangod sa pagbantala kag ginsentensiahan sing lima ka adlaw nga pagkapriso. Ang isa sa ila nagsiling: “Sa prisuhan, namangkot ang mga pulis kon ngaa napriso kami, kag naghatag ini sa amon sing higayon nga mapanaksihan sila. Bangod gindala kami sa estasyon halin mismo sa latagon, madamo kami sing dala nga magasin kag tract. Ginpanaksihan namon ang tanan kag nakapahamtang sing madamo nga literatura. Ginpalig-on namon ang isa kag isa, nangamuyo, kag nagbasa sing mga publikasyon.

“Sang ulihi, ginsaylo kami sa isa pa ka prisuhan sa siudad. Namangkot ang mga priso kon ngaa napriso kami. Ginpanaksihan namon sila kag nagpakilala nga mga Saksi ni Jehova. Nabatian kami sang babayi nga warden kag nagsiling, ‘Napriso kamo kay nagawali kamo sa gua, kag karon nagawali gihapon kamo diri sa sulod!’” Nagaplano na sa karon ang aton mga utod nga duawon ang mga priso nga nagpakita sing interes.

 NATALUPANGDAN SANG PULIS ANG GUGMA. Duha ka utod nga babayi ang nagabantala sa pila ka magagmay nga balaligyaan sa Bethlehem. Hinali lang nga may duha ka babayi nga nagpalapit kag namangkot sa Spanish nga lenguahe kon bala mga Saksi ni Jehova sila. Ini nga mga babayi mga Saksi halin sa Mexico nga nagabisita sa Israel upod sa isa ka grupo sang mga naga-tour. Natalupangdan nila ang literatura nga ginakaptan sang mga utod. Naghaksanay sila nga apat, naghalukanay, nagpapiktyur, kag nagbayluhanay sing adres. Dayon, nagbalik ining Mexicana nga mga utod sa ila grupo samtang ang duha naman ka utod nagpadayon sa pagbantala.

Pila ka oras sang ulihi, ginpalapitan sang isa ka pulis ang duha ka utod kag ginpamangkot kon mga Spanish man sila. Nagsiling sila nga indi. Nakita gali sila nga apat sini nga pulis kag abi niya madugay na sila nga mag-abyanay ukon magparyentehanay. Ginpaathag sang mga utod nga mga Saksi ni Jehova sila kag bisan halin sa iban nga pungsod ang isa ka Saksi ukon indi pa anay magkilalahay, daw isa na sila ka pamilya bangod sa gugma nila sa isa kag isa. Nagdayaw gid ang pulis amo nga nagkuha sia sing literatura kag namangkot kon diin sia makakuha sing dugang nga impormasyon parte sa mga Saksi. May kahimusan na para maduaw sia liwat.

“BASI PA LANG MAY MAMATI.” Si Yusuke isa ka pamatan-on nga nagapayunir sa Ingles nga grupo sa Japan. Isa ka adlaw, nahibaluan niya nga may barko nga magadungka sa masunod nga aga nga may mga pasahero halin sa madamo nga pungsod. Gani aga pa sia nagbangon kag nagbiyahe sing duha ka oras pakadto sa pantalan sang Nagasaki bisan mabaskog ang ulan. Samtang nagatindog sia sa nagabunok nga ulan, abi sang nagapalanaug nga mga pasahero isa sia ka guide, gani ginpalapitan sia nila. Bangod sini, nakapahamtang si Yusuke sing 70 ka magasin  kag 50 ka brosyur sa pila ka lenguahe sa sulod sang tunga ka oras.

Nagbalik sia sa iya salakyan para magkuha sing dugang nga literatura, kag pagbalik niya nakita niya ang pamatan-on nga lalaki nga nagatindog sing isahanon. Sang ginpalapitan sia ni Yusuke, namangkot ang pamatan-on sa Ingles, “Saksi ni Jehova ka?” Sang nagsabat si Yusuke sing huo, naghibi ang pamatan-on. Gindala sia ni Yusuke sa isa ka restawran para makaistoryahanay sila.

Jason ang ngalan sang pamatan-on kag 21 anyos sia. Nagsiling sia nga aktibo sa pag-alagad ang iya mga ginikanan kag nangin di-bawtismado nga manugbantala sia sang manugbeinte na sia. Mga anom ka bulan antes sini, nag-untat sia sa pagpakig-upod sa mga Saksi ni Jehova kag nagsakay sa barko pakadto sa pila ka pungsod sa Asia. Abi niya wala sia sing makita nga Saksi didto. Pero bangod naglain ang iya tiyan, wala sia nakapanaug sa barko sa Thailand, Vietnam, ukon sa Taiwan. Sa Japan sia una nga nakapanaug, kag ang una nga tawo nga iya nasugilanon isa sa mga Saksi ni Jehova! Nahunahuna dayon ni Jason, ‘Indi gid ako makapalagyo kay Jehova,’ amo kon ngaa naghibi sia.

 Sa restawran, ginbinagbinag ni Yusuke kay Jason ang pila ka parapo sang libro nga “Gugma sang Dios” para pasaligon sia nga ginahigugma gihapon sia ni Jehova. Ginpalig-on sia ni Yusuke nga indi pagbiyaan ang organisasyon. Pero diutay lang ang ila tion nga makaupdanay. Naglayag ang barko sa sina man nga gab-i pakadto sa Inchon, South Korea, sa diin nagaplano si Jason nga maglagawlagaw sing pila ka adlaw.

Naghunahuna si Yusuke kon ano pa ang mabulig niya kay Jason kag nadumduman niya nga may nakilala sia nga utod sa internasyonal nga kombension sa South Korea. Makahambal sing Ingles ang amo nga utod kag nagaistar sa Inchon. Gani gintawgan sia ni Yusuke sina mismo nga gab-i. Wala sing hinalung-ong si Jason parte sa sini. Sang nanaug si Jason pagkadason nga aga, nakita niya ang daku nga karatula, “Malipayon nga pag-abot sa Korea, Jason!” nga ginauyatan sang lima ka nagayuhum nga Saksi. Ginkanselar ni Jason ang tanan niya nga plano nga paglagawlagaw kag nag-upod sa mga utod. Napahulag gid sia sa nabatian niya nga mga eksperiensia sang mga kaedad niya nga utod nga lalaki nga ginpriso bangod sa ila pagtuo. Nagtambong man sia sa Memoryal didto.

Nagbalik si Jason sa Estados Unidos, nangin aktibo liwat nga manugbantala, kag nangabay sa mga gulang nga tun-an sia sing apat ka beses sa isa ka semana. Natapos niya ang Ginatudlo Sang Biblia kag “Gugma sang Dios” nga mga libro kag nakalipikar para sa bawtismo. Nabawtismuhan sia pagligad sang 107 ka adlaw sugod sang nag-istoryahanay sila ni Yusuke. Nag-auxiliary payunir sia pagkadason nga bulan.

Naghinumdom si Yusuke nga sadtong matugnaw kag maulan nga aga, daw ginatiklod sia nga magkadto sa Nagasaki bisan pa wala sia sing upod. Nahunahuna niya, “Basi pa lang may mamati didto.”

 EUROPA

PUNGSOD 47

POPULASYON 736,505,919

MANUGBANTALA 1,589,052

PAGTUON SA BIBLIA 843,405

NAKASAPO SILA SING PINASAHI GID NGA BUTANG. Halin sa Holland, nagkadto si Ani sa Bulgaria agod magtrabaho sing pila ka bulan. Isa ka adlaw, bangod naluyahan sia sing buot, nagpundo sia sa higad sang dalan kag nangamuyo nga kuntani magpadala ang Dios sing mga opisyal gikan sa iya simbahan. Samtang nagapangamuyo sia, duha sang aton utod nga babayi ang nagdulog sa iya kag ginpanaksihan sia. Ginkabig ini ni Ani nga sabat sa iya pangamuyo, gani ginpamatian niya sila kag nagtambong sa mga miting. Bisan pa wala sing nahangpan si Ani sa mga miting, nabatyagan niya ang gugma sang mga Saksi. Tuhay gid ini sa iya simbahan sa Bulgaria nga wala nagahiusa, gani nakumbinsi sia nga nakasapo sia sing pinasahi gid nga butang. Sang nagbalik sia sa Bulgaria, ang utod nga nagtuon sa iya sa Holland nag-upod sa iya para mabuligan sia nga makontak ang mga Saksi sa Sofia. Nagdayaw pa gid si Ani, amo nga nabatyagan niya nga nasapwan niya ang matuod nga relihion.

Sang ulihi, magkaupod na nga nagatuon kag nagatambong sa mga miting si Ani kag ang iya bana nga si Ivo. Samtang nagauswag ang ila pagtuon, nagabuylog man ang iban sa ila. Isa sa ila amo ang pastor sang isa ka relihioso nga grupo nga si Assen. Nagbuylog sia kanday Ani kag Ivo para pamatud-an nga sayop ang mga Saksi ni Jehova, pero sang ulihi natukiban niya nga sia gali ang sayop. Madalom ang  iya mga pamangkot sa Biblia. Sang ulihi, ginbaton niya ang pagtuon sa Biblia upod sa iya pamilya. Nagapadayon gihapon si Assen sa pagdumala sang relihioso nga mga miting sa iya grupo, pero ang kamatuoran nga iya natun-an sa libro nga Ginatudlo Sang Biblia amo na ang iya ginatudlo. Wala madugay si Dencho, ang deakono sang grupo, luyag man magtuon sa Biblia. Sang ulihi, nagbuylog man ang tatlo pa ka pamilya. Sanglit madamo sa sining grupo ang nagatuon na sa mga Saksi ni Jehova, gin-untat nila ang ila pagtilipon kag nagtambong sa mga miting sa kongregasyon. Nangin manugbantala si Dencho kag nagadumala sing pagtuon sa Biblia sa pila niya ka abyan. Gani, subong resulta sa pagpanaksi kay Ani sa Holland, mga 30 ka tawo ang natun-an sa Biblia kag nagatambong sa mga miting.

NAGBASA NA LANG SIA SANG MGA TEKSTO PARTE SA PAG-ASAWAHAY. Isa ka utod upod sa iya asawa sa Czech Republic ang nagadumala sing pagtuon sa Biblia sa Kingdom Hall sa isa ka mag-asawa nga bataon pa gikan sa Mongolia. Bisan pa nagapanikasog gid ang Saksi nga mag-asawa nga tun-an ang Mongolian nga lenguahe, nangin hangkat gid ini sa ila. Pero, mapainubuson kag mapinasensiahon nga ginbaton sang taga-Mongolia nga mag-asawa ang kamatuoran sa Biblia. Isa ka gab-i nagtambong ang asawa sa miting pero indi niya upod ang iya bana. Nagsiling sia nga luyag niya ini bulagan bangod indi sila maghangpanay. Pagligad sang pila ka minuto, nag-abot ang bana pero wala niya ginasapak ang iya asawa. Nagapakita lamang nga daku ang ila problema. Gindala sang utod nga lalaki ang bana sa librarya sang Kingdom Hall para istoryahan ini. Pero bangod indi sia makahambal sing maayo sang Mongolian, indi niya mahangpan kon ano ang nagakatabo sa mag-asawa kag indi man sia makahatag sing praktikal nga laygay. Gani nagbasa na lang sia sang mga teksto sa Biblia parte sa pag-asawahay kag komunikasyon. Natandog gid ang bana sa tagsa ka teksto. Naggua sia gilayon sa librarya kag nagdalagan pakadto sa iya asawa, kag  ginhalukan sia. Sang manughalin na sila sa tilipunan, namilit ang bana nga sia na lang ang mabitbit sang bag sang iya asawa kay natun-an niya nga dapat niya sia buligan.

Sang masunod nga adlaw, daw bag-ong kasal lang sila kon tulukon. Malipayon sila nga nagaistoryahanay parte sa ila pagpasalamat kay Jehova kag sa maalamon nga laygay sang Biblia sa pag-asawahay. Sang ulihi, nagbalik sila sa Mongolia agod atipanon ang ila duha ka bata. Nagaistar sila sa banwa nga wala sing kongregasyon. Nabawtismuhan ang asawa sang Oktubre, kag ang bana padayon nga nagauswag padulong sa bawtismo.

“NGAA AMO PA SINI ANG IYA GINHIMO?” Isa ka payunir nga babayi nga si Olha ang nagapanaksi sa drayber sang trak nga nagadeliber sang pagkaon sa ila lugar sa Ukraine. Namangkot sia, “May masaligan pa bala kita?”

“Wala na,” sabat sang drayber. “Ginbiyaan ako sang akon asawa kag gindala niya ang amon duha ka tuig nga bata. Ano pa abi ang pangitaon niya? Nagabakabaka ako adlaw-adlaw para lamang sa iya. Singsing, sapatos, kulintas, ano man pangayuon niya ginhatag ko tanan! Ginhimo ko ang tanan para sa iya, pero ngaa amo pa sini ang iya ginhimo?”

Mainayuhon sia nga ginpamangkot sang utod kon ano kadamo nga tion ang iya ginahinguyang sa iya asawa kag bata. Nagsabat sia: “Paano ako makahatag sing tion sa ila kay nagaobra ako asta sa tungang gab-i? Alas kuatro pa lang sang aga nagakadto na ako sa ulubrahan. Bisan Sabado kag Domingo pa gani.”

Ginpakita sa iya ni Olha ang Oktubre 2009 nga pinasahi nga gua sang Magmata! nga may tig-ulo nga “Mga Sekreto sang Madinalag-on nga Pamilya.” Ginpadaku niya ang una nga sekreto, “Husto nga Prioridad.” Pagkatapos nga mahambalan nila ini, napahulag ang tawo kag nagsiling: “Abi ko kuarta lang ang kinahanglan para mangin malipayon ang pamilya kag ang iban nga butang indi na importante.  Indi gali amo sini. Karon nahibaluan ko na kon ano ang kulang kag kinahanglan sang akon asawa.”

Pagligad sang isa ka semana, nasugilanon liwat ni Olha ang drayber, nga nagsiling nga nabasa na niya ang magasin, ginpamensaran ini sing maayo, kag ginbinagbinag liwat ang madamo nga butang. Gintawgan niya ang iya asawa, kag nag-uliay sila. Nian ginhatagan sia ni Olha sing libro nga Kalipay sa Pamilya. Sang masunod nga semana, nakita ni Olha nga lain na ang drayber sang trak. Nagsiling ini nga nagsaylo na sa iban nga lugar upod sa iya pamilya ang drayber nga iya ginbuslan. Pero nagbilin sia sing mensahe para kay Olha: “Madamo gid nga salamat Olha kag sa imo Dios nga si Jehova, kay ginbuligan mo ako nga masalbar ang akon pamilya. Kon may makilala ako liwat nga mga Saksi ni Jehova, makigsugilanon gid ako sa ila.”

LUYAG NIYA SING TANDA HALIN SA DIOS. Isa ka pamatan-on nga lalaki sa Latvia ang nangin interesado sa mensahe sang Biblia sang ginpanaksihan sia sang mga Saksi mga 15 ka tuig na ang nagligad. Gintun-an niya sing panalagsa ang Biblia, pero indi sia makapati nga ang Biblia nga isa “lamang” ka libro, makabulig sa iya nga makilala ang Dios. Ginapaabot niya nga magpakita ang Dios sa iya sing personal, ayhan sa labaw sa kinaugali ukon sa makatalanhaga nga paagi. Nag-untat sia sa pagtuon sa Biblia kag sang ulihi wala na nagpakig-angot sa mga Saksi. Pila ka tuig sang ulihi, nakaatubang sia sing madamo nga problema, gani nangamuyo sia nga buligan sia sang Dios. Wala gihapon sing milagro nga natabo, pero sang naglaaw sia sa  bintana, natalupangdan niya ang duha ka utod nga babayi nga nagabantala. Pagkatapos makapangamuyo liwat pagligad sang pila ka semana, nakita niya nga naglabay ang amo gihapon nga mga utod. Sang nangamuyo sia liwat pagligad sang isa ka semana, nakita niya sa ikatlo nga tion ang mga utod nga nagabantala. Nakahinakop sia nga tanda ini halin sa Dios! Nagdalagan sia pagua kag ginsilingan ang mga utod nga luyag niya padayunon ang iya pagtuon sa Biblia nga tinuig na nga nauntat. Sang ulihi, nakasapo sia sing kusog nga malandas ang iya mga problema kag nangin suod sa Dios. Paano? Paagi sa bulig sang Biblia! Nabawtismuhan sia sa distrito nga kombension sang 2010.

BISAN ANG MAGAGMAY NGA KULON MAY DULUNGGAN. Sa Denmark, ini nga halambalanon nagakahulugan nga ang mga kabataan madamo gali sang matun-an sa mga pag-istoryahanay sang mga hamtong. Mga 16 ka tuig na ang nagligad, ang isa ka Danish nga utod nga babayi may gintun-an sa Biblia nga isa ka babayi nga may tatlo ka bata nga lalaki. Ang tatlo ka bata masami nga nagaupod sa ila  iloy sa pagtuon nga ginahiwat sa puluy-an sang utod kag sang iya bana. Nag-untat sa pagtuon ang babayi sang ang iya kamanghuran nga bata nga si Ronnie otso anyos na. Samtang nagahamtong si Ronnie, madamo nga problema ang iya naatubang. Pero isa ka adlaw sang 2008, sang 22 anyos na sia, nakita niya ang aton mga magasin sa balay sang iya iloy. Ginkadtuan niya gilayon ang mga Saksi nga nagtuon anay sa iya sang bata pa sia. Pagligad sang kinse minutos, gintum-ok niya ang doorbell sa balay sang mag-asawa nga Saksi. Sang ginbuksan ini sang bana, nagsulod dayon si Ronnie. Nadugayan pa antes sia makilal-an sang bana, apang isa yadto ka malipayon nga reunion. Ginbaton ni Ronnie ang libro nga Ginatudlo Sang Biblia kag nagpasugot nga magtuon. Maayo man ang dalagan sang ila pagtuon. Pero nawili gid si Ronnie sa mga hampang sa kompyuter, nga ang pila parte sa okultismo ukon kasingki, gani masami nga ginaangot niya ang iya natun-an sa sini. Apang gintudluan sia sang mga Saksi nga ang aton paghangop sa espirituwal nga mga butang indi dapat ibase sa di-realistiko nga mga hampang sa kompyuter. Nahangpan ini  ni Ronnie, kag nagsiling: “Palihug sawaya ako kon maghambal ako sang wala pulos nga mga butang!” Sugod sadto, maayo na ang iya pag-uswag. Ini nga pamatan-on, nga una nga nakabati sang kamatuoran sang ang iya iloy nagatuon sa Biblia sadtong ‘gamay pa lang sia nga kulon nga may dulunggan,’ isa na karon ka di-bawtismado nga manugbantala.

LUGPAY GIKAN SA KASULATAN. Sa isa ka sementeryo sa Britanya, natalupangdan sang isa ka utod nga lalaki ang isa ka tawo nga si Alf nga nagaluhod sa pantyon kag nagahibi. Ginsilingan sia sang utod kon puede sia makapungko sa tupad niya. Nagpasugot si Alf kag nagsiling: “Bag-o lang nagtaliwan ang akon bata nga babayi. Kuarentay dos anyos lamang sia. Subong duha na sila sang iya iloy ang nalubong diri.” Nangayo sia sing laygay sa isa ka ahensia pero ginsilingan sia nga maghulat sia anay sing tatlo ka bulan. “Manggaranon ako nga negosyante, kag madamo ako sing negosyo,” siling ni Alf, “pero wala pulos ini tanan kon wala ang akon pamilya. Ibaylo ko ini tanan basta mabuhi lang sila.” Nagsiling si Alf nga nagatuo man sia sa Dios, nagatahod sa Biblia, kag nagasimba, pero wala sia nakasapo sing makaalayaw nga sabat. Kon mangayo sia sing paumpaw sa simbahan, ginasilingan sia nga magsindi sing kandila ukon maghimo sing sulat kag isab-it ini sa kahoy. “Indi makaigo sa papel ang tanan nga gusto ko nga ipabutyag,” siling niya. Ginlugpayan si Alf sang utod paagi sa Kasulatan. Sa karon nagatuon na si Alf sa Biblia.

 OCEANIA

PUNGSOD 29

POPULASYON 38,162,658

MANUGBANTALA 94,309

PAGTUON SA BIBLIA 58,465

GIN-AGDA NILA ANG BANA. Isa ka utod nga lalaki sa New Zealand ang nagreport nga sang gindul-ong niya ang iya asawa sa ginatun-an sini nga bataon nga iloy, natalupangdan nila nga ara sa balay ang bana, gani gin-agda nila sia sa pagtuon. Nagpasugot ang bana, kag nakasugtan nila nga magtuon kon ara sia sa balay. Nagpasugot man sila nga mag-asawa nga magtambong sa miting sa Domingo, kag mahigugmaon sila nga gin-abiabi kag nakakaon sa espirituwal. Sang masunod nga miting, nagkomento ang bana sa Pagtinuon sa Lalantawan. Ginpadaku sang artikulo ang pangpamilya nga pagsimba, kag namangkot sia kon paano niya dumalahan sing pagtuon ang iya asawa kag apat ka tuig nga bata. Ginpabutyag man niya nga luyag niya iaplikar ang iban pa niya nga natun-an sa miting. Padayon ang pagtuon sang mag-asawa, pagtambong sa mga miting, kag pag-uswag sa espirituwal. “Nagapasalamat gid kami,” siling sang utod, “nga gin-agda namon ang bana sa pagtuon!”

MEMORYAL SA MALAYO NGA ISLA. Ang isla sang Reao, nga may 362 ka pumuluyo, naasayn sa Vaiete Congregation, isa sa 18 ka kongregasyon sa Tahiti. Ang Reao mga 1,350 kilometros sa sidlangan sang Tahiti. Wala pa gid makahiwat sing Memoryal sa sini nga isla, kag wala man makakadto diri ang mga Saksi sa sulod sang 30 ka tuig. Luyag ni Manoah, ang manugtatap sang pag-alagad sang  Vaiete Congregation, nga mag-organisar sing diutay nga grupo para magbantala sa isla sa semana sang Memoryal kag magsaulog sini didto mismo. Pero, indi nila masarangan sang iya asawa ang plete sa eroplano pakadto sa Reao nga mga 65,000 ka franc ($740 U.S.). Apang sang ulihi, nakabaton sia sing bonus sa trabaho nga nagkantidad sing 65,000 ka franc! Naghinakop sila nga ginapakamaayo ni Jehova ini nga plano. Gani, pito ka manugbantala ang nagkadto sa Reao, kag 47 ang nagtambong sa Memoryal. Ang mga manugbantala sa Tahiti karon nagadumala sing pagtuon sa Biblia sa telepono sa mga interesado didto.

INDI NA MAKAPAMAHAW. Kaanggid ang eksperiensia sa Vanuatu, diin ginasakdag sang kongregasyon ang grupo sang 11 ka manugbantala sa malayo nga isla sang Ambrym. Ang mga gulang sang kongregasyon nagaagda sing eksperiensiado nga mga manugbantala para magkadto sa isla sa sulod sang pila ka adlaw agod magpanghikot upod sa grupo antes sang Memoryal. Ginkalitan ini ni Marinette, nga madugay na nga regular payunir kag retirado nga manunudlo. Nagdesisyon sia, upod sa iban pa, nga magkadto agod makasugod sing mga pagtuon sa Biblia. Pagkatapos sang malip-ot nga tion sa latagon, indi sia makapati kay daw indi na sia makahalin sa iya ginadayunan. Nagsiling si Marinette: “Daw indi na ako makapanghugas ukon makapamahaw pa kay ang mga tawo nagahulat na sa gua para sa pagtuon sa Biblia. Bilog nga adlaw ako nga nagabantala nga wala na nagabiya sa balay! Nakadumala ako sing 31 ka pagtuon sina nga semana.” Nagtener ang grupo sa Ambrym sa sulod sang isa ka semana  nga masako nga nagabantala, kag 158 ang nagtambong sa Memoryal. Nasubuan gid ang grupo sa ila pagbiya. “Paano mo mabiyaan ini nga lugar nga may tuman kadamo nga uhaw sa kamatuoran sa Biblia?” siling ni Marinette. Nagpadala ang sanga talatapan sing temporaryo nga mga espesyal payunir agod tatapon ang mga interesado sa sini nga isla.

NAGBATON ANG PRINSIPAL. Sa isa ka eskwelahan sa hayskul sa Solomon Islands, ginapatindog ang mga estudyante kag ginapakanta sang relihioso nga ambahanon sang South Seas Evangelical Church. Nangabay ang duha ka pamatan-on nga utod nga babayi sa prinsipal nga kon puede indi na sila mag-entra kay malapas sini ang ila konsiensia. Ginpasalamatan sila sang prinsipal sa ila matinahuron nga pagkadto sa iya kag nagsiling nga indi na sila magkanta kundi magpungko na lang upod sa iban nga bata nga Saksi.

Nian nangabay sia kon bala mahimo sila mag-agda sing isa gikan sa kongregasyon agod makig-istorya sa iya parte sa mga Saksi ni Jehova kag sa edukasyon. Nagkadto ang isa ka misyonera, kag sa sulod sang mga isa ka oras kag tunga, ginbinagbinag nila ang aton mga pagpati subong man ang mga problema nga ginaatubang sang mga pamatan-on. Nagsiling ang prinsipal nga nanamian gid sia sang Magmata! kag nagabilin sia sing mga kopya sini sa hulot sang mga manunudlo. Sang gintanyagan sia sang misyonera sang libro nga  Questions Young People Ask—Answers That Work, Volume 2, nangabay sia sing 16 ka kopya para sa mga manunudlo kag 367 naman para sa mga estudyante. Kuatro sientos ka libro ang ginpadala kag ginpanagtag.

Bangod sa kaisog sining duha ka pamatan-on sa pagpakig-istorya sa prinsipal, nakahatag sila sing maayo nga panaksi, kag madamo man sang nagkomento parte sa kapuslanan sang libro. Ang isa ka pamatan-on nga babayi, nga ang ginikanan bag-o lang nagbulagay, nagsiling nga ining libro amo gid ang iya ginakinahanglan para maatubang ang iya mga problema. Padayon nga nagaauxiliary payunir ining duha ka pamatan-on, kag regular man nga nagabaton ang prinsipal sing mga magasin sa ila.

PAGHUPOT SING INTEGRIDAD BISAN PA SA MGA PAGPAMATOK. Sa isa ka lugar sa Solomon Islands, gintun-an sa Biblia sang isa ka misyonera ang isa ka babayi nga tawgon naton sa ngalan nga Lisa. Maayo ang iya pag-uswag bisan pa kapin sa duha ka oras ang iya ginalakat pakadto sa Kingdom Hall dala ang iya kapid nga bata nga lalaki kag duha pa ka magagmay nga bata nga babayi. Ginaantos man niya ang pagpamatok sang iya bana. Ginasakit sia sini kag ginasunog ang iya mga bayo para sa mga miting, pati na ang iya Biblia kag mga libro. Nagapangerida man ang iya bana. Walay sapayan sini, nabawtismuhan si Lisa kag padayon nga nag-alagad kay Jehova sing matutom.

Sang nagligad nga tuig, ginbiyaan sang bana ang iya kerida kag nangabay nga magtuon sa Biblia bangod sa maayo nga pagpakig-angot sa iya ni Lisa bisan pa sang tanan niya nga ginhimo. Indi mahanduraw ang kalipay ni Lisa bangod sini nga pagbag-o. Nalipay pa gid sia kay may isa ka grupo nga natukod malapit sa ila puluy-an, gani indi na maglabaw sa isa ka oras ang iya lalakton para makatambong sa mga miting. Paagi sa suporta sang iya bana, nakaauxiliary payunir man sia.

[Blurb sa pahina 66]

“Ngaa kapintas gid sang Dios? . . . Ngaa gindalahig niya pati ang akon bata? Bag-o lang sia nabun-ag. Ano ang iya sala?”

[Blurb sa pahina 68]

Nagsiling ang pamatan-on nga mabalik sia sa ila kon masabat sang pari ang duha ka pamangkot

[Blurb sa pahina 72]

“Napriso kamo kay nagawali kamo sa gua, kag karon nagawali gihapon kamo diri sa sulod!”

[Diagram/Mapa sa pahina 84]

(Para sa aktual nga pormat, tan-awa ang publikasyon)

Tahiti → → → 1,350 kilometros → → → Reao

[Retrato sa pahina 56]

Sa ibabaw: Pagdumala sing pagtuon sa Biblia sa Republic of the Congo (tan-awa ang  pahina 59)

[Retrato sa pahina 61]

Si Edvard (sa tuo) upod kay Daniel sa merkado

[Retrato sa pahina 64]

Samaniego, Nariño, Colombia

[Retrato sa pahina 67]

Ang mga publikasyon sa sign-language matigayon na sa 59 ka lenguahe

São Paulo, Brazil