Sulat Halin sa Nagadumala nga Hubon

Pinalangga nga Masigka-Saksi ni Jehova:

Nalipay gid kami nga sulatan kamo pinalangga nga matutom nga mga alagad ni Jehova, nga nagadamo na karon sing sobra sa pito ka milyon. Kon may makilala ka nga masigkatumuluo halin sa iban nga pungsod, mabatyagan mo dayon ang gugma sa sina nga utod. (Juan 13:34, 35) Samtang ginabasa mo sa sining Tuigan nga Libro ang kasaysayan parte sa pagtuo kag katutom sang imo mga kauturan sa lainlain nga lugar, mabatyagan mo man inang pinasahi nga kaangtanan.

Makita sa mga report sa bug-os nga kalibutan nga madamo sa inyo ang regular nga nagahiwat sang Pangpamilya nga Pagsimba. Ang pila sa inyo nga may magagmay nga kabataan nagagamit sing lainlain nga paagi para makuha ang ila atension. (Efe. 6:4) Ang mga mag-asawa nangin suod pa gid bangod sa ila pagtuon sing magkaupod. (Efe. 5:28-33) Matuod gid nga nakabulig sa mga indibiduwal kag mga pamilya ini nga kahimusan para sa maid-id nga pagtuon sang Pulong sang Dios.—Jos. 1:8, 9.

Nagakasubo man kami para sa mga nahalitan sang kalamidad sining karon lang. Ginapasalamatan gid namon ang tanan nga nagbulig sing kinabubut-on sa sina nga mga tion. (Binu. 11:28-30; Gal. 6:9, 10) Sa mga kongregasyon, may pila man sa inyo nga nakahangop sa materyal nga  kinawad-on sang aton mga kauturan kag kinabubut-on nga nagabulig sa ila. Kaangay ni Dorcas, madamo kamo sing ginahimo nga ‘maayong mga buhat kag ginahatag nga mga dulot tungod sa kaluoy.’ (Binu. 9:36) Pat-od gid nga nakita ini tanan ni Jehova kag padyaan niya kamo.—Mat. 6:3, 4.

Sa pila ka kadutaan, ang inyo mga kinamatarong ginatapakan sang mga nagakontrol sang kasuguan agod ‘makapahito sila sing kalainan paagi sa palatukuran.’ (Sal. 94:20-22) Bangod nahibaluan ninyo nga gintagna ni Jesus ini nga paghingabot, padayon kamo nga nagabatas kag nagadangop kay Jehova. (Juan 15:19, 20) Makasalig kamo nga ginalakip namon kamo pirme sa amon mga pangamuyo samtang padayon kamo nga ‘nagapangapin sa atubangan sang tanan nga nagapangayo sa inyo sang pangatarungan tuhoy sa paglaum nga yara sa inyo.’—1 Ped. 3:13-15.

Ginahatagan namon sing komendasyon ang minilyon sa inyo nga nagapabilin nga matinlo sa moral bisan pa ginahimo ni Satanas ang tanan nga paagi para ipalapnag ang imoralidad. Sa tion nga ang moral nga talaksan sang kalibutan labi nga naganubo, ‘nagabakod kamo may kaangtanan sa Ginuo kag sa gahom sang iya kusog.’ (Efe. 6:10) ‘Ginasuklob ninyo ang kompleto nga hinganib gikan sa Dios,’ amo nga nagatindog kamo sing malig-on batok “sa mga pahito sang Yawa.” (Efe. 6:11, 12) Dumduma nga ginagamit ni Jehova ang inyo halimbawa agod masabat sing matunog ang manugyaguta nga si Satanas!—Hulu. 27:11.

Nalipay kita nga mahibaluan nga sang 2011, may 19,374,737 nga nagtambong sa Memoryal sang kamatayon sang aton Ginuo. Ining talalupangdon nga kadamuon resulta  sang inyo sabat sa panawagan nga mag-auxiliary payunir sang Abril. Minilyon sa bug-os nga kalibutan ang nakabati sa nahiusa nga pagdayaw kay Jehova sang iya matutom nga mga Saksi! (Roma 10:18) Isa ka man sa 2,657,377 nga nag-auxiliary payunir sina nga bulan ukon nagpauswag sang imo pagbantala sa iban nga paagi, tanan kamo nagpahalipay sa amon bangod sang inyo kakugi kag kinabubut-on nga pagpakigbahin sa hilikuton.—Sal. 110:3; Col. 3:23.

Sang nagligad nga tuig, 263,131 ang nagpabawtismo. Ginapasalamatan naton si Jehova sa sini kag kamo tanan nga nagbuylog sa amon sa pagpangagda sa iban pa nga nagasiling: “‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.” (Bug. 22:17) Sa tapos mabinagbinag ang mga aspekto sang natukod nga Ginharian sang Dios sa aton 2011 distrito nga kombension, labi pa gid kita nga makasiling, “Magkari ang Ginharian sang Dios!” Napalig-on gid kita sa ginpasalig ni Jesus nga “magaabot ako sing madali,” gani tinagipusuon kita nga nagabuylog kay apostol Juan nga nagasiling: “Kabay pa! Kari ka, Ginuong Jesus.”—Bug. 22:20.

Samtang padayon kamo nga nagahulat sinang makakulunyag nga hitabo, saligi palihug nga palangga gid namon ang kada isa sa inyo, kamo nga nagapakita sang inyo gugma para kay Jehova “sa buhat kag kamatuoran”!—1 Juan 3:18.

Ang inyo mga utod,

Nagadumala nga Hubon sang mga Saksi ni Jehova