• PUNGSOD 239

• MANUGBANTALA 7,782,346

• KABILUGAN NGA ORAS SA LATAGON 1,748,697,447

• PAGTUON SA BIBLIA 8,759,988

• PUNGSOD 58

• POPULASYON 968,989,710

• MANUGBANTALA 1,312,429

• PAGTUON SA BIBLIA 2,999,639

Indi Na Sia Magpahulog

Sa Addis Ababa, ang kapital nga siudad sang Ethiopia, may isa ka tag-iya sang balaligyaan nga nagahingalan Saba. Isa ka bes, gintanyagan sia sang duha ka sister sing magasin nga Magmata! nga may artikulo parte sa aborsion. Ginpasulod sila ni Saba kag masinulub-on nga ginsilingan nga nagaplano sia magpahulog. Samtang ginaistoryahan nila ini nga tatlo, indi nila mapunggan ang ila balatyagon  amo nga naghibi sila. Sina nga adlaw, namat-od si Saba nga indi na magpahulog kag malig-on niya nga ginpaathag ini sa iya bana. Sang ulihi, nagbun-ag sia sing isa ka matahom nga bata nga babayi. Nagtuon man sia sa Biblia kag nagpabawtismo. Sa karon malipayon si Saba nga nagapayunir. Ang iya bana nagtuon man kag nangin utod naton. Sang Abril 2012, ang duha nila ka kabataan nagpabawtismo man.

‘Puede Sia Maistorya?’

Ang manugtatap sang sirkito sa Ethiopia nagpamalaybalay upod sa isa ka brother. Sa isa ka balay, naistorya nila ang timbang kag namangkot kon puede nila maistorya ang amo niya. Nagsabat ang timbang nga indi puede. Gani, namangkot sila kon puede magbilin na lang sing literatura. Nagsulod ang timbang kag ginpamangkot ang iya amo. Pagbalik niya, ginsilingan niya sila nga gusto anay ini makita sang iya amo.

Gani ginhatag sang mga utod ang magasin. Pagligad sang pila ka minutos, nagbalik ang timbang kag nagsiling nga gusto ini basahon sang iya amo. Dayon namangkot ang isa sa ila, “Kon indi sia makagua, puede bala kami makasulod para maistorya sia?” Nagsulod liwat ang timbang. Pero kadugay sa iya maggua. Abi nila indi na sia magbalik. Sang ulihi, naggua gid man sia kag ginpasulod sila. Tigulang na gali ang tag-iya nga si Yirgu, kag indi na makabangon ukon makapungko sa sulod sang napulo ka tuig. Nadugayan ang timbang kay ginpailisan pa niya ini kag nanghimos sang kuarto.

 Ginpaambit sang mga utod kay Yirgu ang maayong balita. Nalipay gid sia, kag nagbaton sing pagtuon sa Biblia. Samtang nagauswag sia sa pagtuon, nagaayo man ang iya panglawas. Wala madugay, makabangon na sia kag makalibotlibot sakay sa iya wheelchair. Sang ulihi, nagtambong na sia sa mga miting. Ginbawtismuhan sia sa distrito nga kombension sining karon lang.

Ang Simbahan sang mga Libro sang Iya Amay

Si Calvin nga taga-Zimbabwe, apat pa lang ka tuig sang napatay ang iya amay. Ginbilinan lang sia sing isa ka bag nga may Bag-ong Kalibutan nga Badbad kag libro nga Ang Tagna ni Isaias—Kapawa Para sa Tanan nga Tawo, Tomo 1. “Kontaka ang simbahan nga nagbalhag sini nga mga libro,” siling niya kay Calvin. “Sila ang nagatudlo sang kamatuoran.”

Sang napatay ang iloy ni Calvin, ginkuha sia sang iya lola. Sa sulod sang siam ka tuig, wala si Calvin nag-upod sa simbahan sang iya lola kay nagalaum gid sia nga makita “ang simbahan” nga nagbalhag sang mga publikasyon nga ginhatag sang iya amay.

Isa ka bes, naistorya sang lola ni Calvin ang isa ka babayi, nga lipod sa iya ihibalo Saksi ni Jehova. Nasambit niya nga may apo sia nga lalaki nga indi gid mag-upod sa iya sa simbahan kon Domingo kay nagabasa ini sang libro nga ginhatag sang iya amay. Ginpamangkot sia sang sister kon ano ang ngalan sang libro. Nagsabat sia nga “isa guro ato sang wala-pulos nga libro sang Watchtower.”

Nagsiling ang sister nga luyag niya maistorya ang bata. Sang magkitaay sila, nalipay gid si Calvin. Gintun-an sia dayon sa libro nga Ano Gid ang Ginatudlo Sang Biblia? Nagtambong man sia gilayon sa mga miting  bisan pa ginapamatukan sia sang iya lola. Determinado sia nga indi magbiya sa kamatuoran kag handum gid niya nga makaupod ang iya amay kag iloy sa pagkabanhaw. Nabawtismuhan si Calvin sang Agosto 2012.

“Ang Dios nga Imo Ginasimba Gamhanan”

Si Caro taga-Uganda. Isa ka bulan sugod sang nagtuon sia sa Biblia, ginhingabot sia sang iya espiritista nga bana nga si Martin. “Bangod sa imo mga libro, ang mga katigulangan indi na makasulod sa balay,” siling ni Martin. Ginsakit sia sang iya bana kag ginpahog nga patyon kon indi sia mag-untat sa pagtuon sa Biblia. Gin-untat man sang iya bana ang pagsuportar sa ila pamilya. Pero nagpabilin nga kalmado si Caro. Gin-amanan niya sing pagkaon ang iya pamilya paagi sa pagtanom sa iya hardin, kag padayon sia nga nagkuha sing sibu nga ihibalo. Sang nabutang na sa katalagman ang kabuhi ni Caro, nagpalagyo sia. Binudlayan sia sa pagpangabuhi. Pero sang nabatian niya nga nagamasakit ang iya kabataan, ang iya gamay nga kita ginbakal niya sing bulong para sa ila.

Wala madugay, gintawgan si Caro sang iya bana sa telepono. “Magpauli ka na,” siling niya. “Nakita ko nga ang Dios nga imo ginasimba gamhanan kag wala ka niya ginpabay-an. Pakadtua diri ang mga nagtudlo sa imo para tudluan man nila ako. Gusto ko gid nga magbag-o.” Wala nagalahog si Martin. Subong kompleto na kag malipayon ang ila pamilya. Si Martin kag si Caro nabawtismuhan sa kombension sang Agosto 2012.

Nagaisahanon nga Manugbantala sa Malayo nga Lugar

Samtang nagapuyo sa isa ka banwa nga malayo sa ila balay sa Kenya, nagtuon si David sa mga Saksi ni  Jehova. Pero wala madugay, nagpauli sia sa ila balay sa Lokichar, isa ka malayo nga lugar sa aminhan-katundan sang Kenya. Ang pinakamalapit nga kongregasyon ara sa banwa sang Lodwar nga mga 165 kilometros. Sa sulod sang apat ka tuig, halos wala si David sing kontak sa mga Saksi, pero ginpanaksihan niya ang iya mga kaingod kag paryente. Ginpaambit niya sa ila ang iya diutay nga natun-an sa Biblia. May pila nga nagpakita sing interes kag sang ulihi, may mga ginatun-an na sia sa Biblia. Sang 2007, nakig-angot sia sa mga kauturan sa Lodwar kag ginpadayon ang iya pagtuon. Duha ka beses kada bulan nagabiyahe sia sakay sa motor, taksi, kag bus.

Samtang nagadugang ang ihibalo ni David, nagadugang man ang iya kakugi sa ministeryo. Bisan indi pa sia bawtismado, nagtukod sia sing temporaryo nga “Kingdom Hall” nga daga ang dingding kag kugon ang atop malapit sa iya balay. Diri sia nagahiwat sing mga miting upod sa mga interesado. Pero, may mga tawo nga naakig sa iya pagbantala kag sa sulod sang duha ka tuig nakaeksperiensia sia sing pagpanakit kag pagpasipala. Isa ka bes, ginkastigo sia asta nalipong kag ginbutangbutangan nga nagatudlo sang “pagsimba sa Yawa” sa ila lugar. Nangayo sing bulig si David sa isa ka opisyal sang gobierno, gani nauntat ang paghingabot sa iya kag nakapadayon sa pagbantala. “Importante gid sa akon ang kamatuoran,” siling ni David. “Indi ako mapauntat sang bisan ano nga pagpamatok.”

Sang 2009, ginbawtismuhan si David, kag subong isa na sia ka ministeryal nga alagad kag regular payunir. Sia lang kag ang iya bata nga lalaki nga 15 anyos ang manugbantala sa ila lugar. Pero sang Abril 2012, mga 60 ang nagtambong sa Memoryal nga ginhiwat sa  temporaryo nga Kingdom Hall malapit sa balay ni David.

“Pamatud-i sa Kasulatan nga Sala Sia”

Si Janet, nga isa ka regular payunir sa Ghana, nagabasa sang libro nga Ginatudlo Sang Biblia samtang nagabiyahe sa bus. May nagsakay sa bus para maghatag sing sermon, dayon nangayo sing donasyon sa mga pasahero. Ginpamangkot sia ni Janet: “Siling mo si Jesus kag ang Dios isa lang. Ti, sin-o to ang nakighambal kay Jesus sang ginbawtismuhan sia?”

Ang tawo nagsabat, “Misteryo ina.”

Ginbuksan ni Janet ang kapitulo 4 sang libro nga Ginatudlo Sang Biblia, nagpili sang pila ka teksto, kag ginpabasa sa mga pasahero. Ginpaathag niya ang kinatuhayan ni Jesus kag sang Labing Gamhanan nga Dios nga si Jehova.

“Yawa ka,” siling sang tawo.

Pagkabati sang mga pasahero, gin-apinan nila si Janet nga nagasiling, “Pamatud-i sa Kasulatan nga sala sia, imbes nga tawgon sia nga Yawa.” Naakig gid ang tawo kag nanaug sa sunod nga palanaugan. Ang bataon nga babayi sa tupad ni Janet nagsiling: “Abi ko anay ang Jehova ngalan sang simbahan sang mga Saksi. Subong ko lang nabal-an nga ngalan gali ina sang Dios.”

Nagpadayon ang ila pag-istoryahanay, kag ginkuha ni Janet ang numero sang telepono sang babayi kag nagsaad nga matawag. Pagpauli sang babayi, ginsugid niya ang natabo sa iya lola. Nakibot man ang iya lola sang mahibaluan nga Jehova ang ngalan sang Dios. Ginkontak ni Janet ang mga Saksi para kadtuan ang babayi kag ang iya lola. Nagatambong na sila subong sa mga miting.

• PUNGSOD 57

• POPULASYON 946,087,916

• MANUGBANTALA 3,861,145

• PAGTUON SA BIBLIA 4,196,922

Nakasapo Sia sing Kamatuoran sa Lugar nga Wala Niya Ginalauman

Ginapugos sang mga guardia sa ugsaran sang prisuhan sa Bolivia ang 20 anyos nga si Andrea samtang nagapamuyayaw kag nagapamahog. Bangod mapintas sia kag makusog, nahadlok sa iya ang mga tawo. Si Leidy, nga isa ka Saksi ni Jehova nga ginpriso tungod sa sayop nga panumbungon, wala mahadlok kay Andrea sa baylo  naluoy sa iya. Kada aga ginabasa niya sing matunog ang ambahanon sa aton songbook. Sang mabatian ini ni Andrea, namangkot sia, “Saksi ka ni Jehova?”

Sang nagsiling si Leidy nga huo, si Andrea nagsiling: “Saksi man ang akon iloy, kag sadto nagaupod ako sa iya sa miting. Ginatudluan niya ako sa Biblia.” Dayon naghibi si Andrea. Sugod sadto, pirme na nagaistoryahanay si Leidy kag si Andrea parte sa espirituwal nga mga butang. Sang adlaw nga bistahon na si Andrea, nangamuyo sila kag nangabay sing panuytoy ni Jehova. Nahilway si Andrea sa prisuhan kag padayon nga nagtuon parte kay Jehova. Wala madugay nangin kalipikado sia nga mangin di-bawtismado nga manugbantala, kag karon balawtismuhan na sia.

Ginpanginpuslan ni Leidy ang iya pagkapriso. Nakasugod sia sing 21 ka pagtuon sa Biblia antes sia nahilway. Karon, tatlo ka beses kada semana nga nagabalik sia sa prisuhan para padayunon ang iya nasugdan nga mga pagtuon.

Bangod sa www.pr418.com nga Web Site

Domingo sang tigragas sang 2011 may nagkadto sa Kingdom Hall sa Canada nga mag-asawa nga nakabayo sing pormal upod sa ila duha ka bata. Abi sang mga utod, mga Saksi sila halin sa iban nga lugar nga nagbisita lang. Nakilal-an gilayon ni Dominic, nga isa ka ministeryal nga alagad, ang bana kag nakilal-an man sia sang bana. Mga 17 ka tuig na ang nagligad sang gintun-an sia ni Dominic sa Biblia. Sa sulod na sang duha ka tuig, si Marc-André kag ang iya asawa nga si Josée naga-download kag nagabasa  sang Lalantawan kag Magmata! nga mga magasin sa www.pr418.com nga Web site kag namat-od sila nga magtambong ang bilog nga pamilya sa Kingdom Hall. Ginsugdan gilayon ang pagtuon sa ila sa Biblia. Dayon, nagtambong sila sa tanan nga miting. Pagligad lang sang duha ka bulan nga pagtuon sa Biblia, ginsugdan sang pamilya ang ila Pangpamilya nga Pagsimba kada semana. Padayon ang ila pag-uswag, kag sang Mayo 2012 nahatag ni Josée ang iya una nga bahin sa Teokratikong Eskwelahan Para sa Ministeryo.

‘Ginhatagan Niya Ako sing Pagkaon kag Kalo’

Samtang nagatambong sa 2010 Distrito nga Kombension sa Chile, natalupangdan sang napulo ka tuig nga si Marcelo nga ang tupad niya nga tigulang nga lalaki wala sing dala nga literatura.

“Wala sia sing Biblia,” hutik niya sa iya iloy.

“Tupari sia,” hutik sang iya iloy. Gani nag-idog si Marcelo kag gintuparan ang tigulang nga si Victor. Ginbukad niya ang tanan nga ginsambit nga teksto upod kay Victor. Sang intermisyon na, nagsiling si Marcelo sa iya iloy, “Wala sia sing pagkaon.” Nagsiling ang iya iloy nga hatagan niya si Victor. Ginhatagan sia ni Marcelo sing sandwich kag mainit nga tsa. Samtang nagakaon si Victor, ginpakita ni Marcelo sa iya ang tanan nga teksto sa Biblia nga nadumduman niya.

Sang hapon na, nagatagiti ang init. Nagsiling si Marcelo sa iya iloy, “Wala sia sing kalo.”

Nagsiling ang iya iloy, “Ihatag ang imo kalo.” Ginhatag niya ini. Pagkatapos sang programa nagpaalam na si Victor kay Marcelo.

Sang masunod nga distrito nga kombension, ginpangita ni Marcelo si Victor. Nalipay gid sia sang nakita  niya si Victor nga nakakurbata na! Sang nakita ni Victor si Marcelo, nagsiling sia: “Ari ako subong tungod sini nga bata. Sang nagligad nga tuig, nagtambong ako sa kombension kay nakabaton ako sing imbitasyon. Ginpabasa sini nga bata ang iya Biblia sa akon kag ginhatagan ako sing pagkaon kag kalo. Karon nagatuon na ako sa Biblia!” Si Victor isa na ka di-bawtismado nga manugbantala.

Gindayaw sang Manunulat

Sa iya artikulo sa isa ka pamantalaan, ang kilala nga manunulat sa Venezuela nagsugid sang iya inagihan sa customer service sang kompanya sang telepono sang pungsod. Ang opereytor nga nagsabat sa iya indi matinahuron kag wala masabat ang iya pamangkot. Nagtawag sia liwat kag ang nakasabat isa ka pamatan-on nga lalaki nga nagpakilala nga si “Misael.” Matinahuron nga nasabat ni Misael ang iya pamangkot. Nagsulat sia: “Tumalagsahon gid ang kaayo, pagtahod, kag pagkamabinuligon nga ginpakita sang pamatan-on sa bug-os namon nga pag-istoryahanay. Bangod sa iya bulig, nasolbar ang akon problema kag nahibaluan ko kon paano solbaron ini nga problema sa ulihi.”

Sang gindayaw sia sang manunulat, nagsiling sia nga isa sia ka Saksi ni Jehova, kag ginasunod niya ang gintudlo ni Jesus kon paano pakig-angutan ang iya isigkatawo. Gin-istorya sang manunulat ang superbisor ni Misael kag gindayaw ang maayo nga serbisyo sang empleyado sini. Sa iya artikulo, ginsiling niya nga si Misael dalayawon gid nga taga-Venezuela kag isa ka Saksi ni Jehova. Naghinakop sia: “Amo sini nga klase sang mga tawo ang kinahanglan naton sa serbisyo-publiko.”

 “Indi Kamo Magpadungol!”

Ang 15 anyos nga apa nga si Gabriela, nalipay gid sang nabawtismuhan sia sang Oktubre 2011 sa distrito nga kombension sang sign-language sa Ecuador. Amo nga pagka-Lunes sang nag-eskwela sia, nangabay sia sa iya manunudlo kon puede sia maghatag sing malip-ot nga pahibalo sa ila klase. Nagpasugot ang iya manunudlo, kag nagtindog sia sa atubangan sang iya mga klasmeyt kag nagsenyas: “Gusto ko isugid sa inyo nga sang nagligad nga Biernes, Sabado, kag Domingo, nagtambong ako sa kombension kag nabawtismuhan ako subong Saksi ni Jehova. Luyag ko man isugid sa inyo nga nagakabuhi na kita karon sa katapusan nga sistema sang mga butang. Malip-ot na lang ang tion! Dapat magbag-o na kamo. Gani indi kamo magpadungol. Kahadluki  ninyo ang Dios!” Nagdayaw gid ang iya mga klasmeyt.

Sang tigpalanyaga na, si Katty, nga isa ka di-aktibo nga Saksi nga apa, namangkot kay Gabriela parte sa kombension. Prangka nga nagsabat si Gabriela: “Matahom gid ini! Pero subong nga nabawtismuhan na ako, gusto ko mangin matutom kay Jehova. Gani indi na ako makig-abyan sa imo kay indi matinlo ang imo pagkabuhi kag makaapekto ini sa akon kaangtanan kay Jehova. Kinahanglan magbag-o ka na. Dapat mangamuyo ka kay Jehova kag makighambal sa mga gulang. Bal-an ko nga masarangan mo ina.” Bangod sa prangka pero mahigugmaon nga laygay ni Gabriela nakighambal si Katty sa mga gulang, nakabaton sing espirituwal nga bulig, kag nangin aktibo liwat sa pag-alagad.

Ginhulam Niya ang Laptop sang Iya Manunudlo

Ang 16 anyos nga sister sa Estados Unidos ginpamangkot sang iya mga klasmeyt parte sa relihion, pero wala gid sia sing dala nga Biblia ukon literatura. Bangod gusto niya gamiton ang kasulatan para sabton ang ila mga pamangkot, ginhulam niya ang laptop sang iya manunudlo kag ginbuksan ang www.pr418.com nga Web site. Wala lang niya nasabat ang tanan nila nga pamangkot kundi natudluan man sila kon paano makabulig ang Web site sa ila. Nagsiling sia nga kon may pamangkot sila parte sa Biblia kag wala sing Saksi nga mapamangkutan, magkadto lang sila sa Web site. Pagligad sang pila ka semana, natalupangdan niya nga nagadiutay ang pamangkot sang iya mga klasmeyt. Sang ginpamangkot niya sila, ang pila sa ila nagsabat nga pirme sila nagakadto sa Web site sa ila cell phone. Ginahimo man ini sang iya manunudlo!

• PUNGSOD 48

• POPULASYON 4,222,869,785

• MANUGBANTALA 674,608

• PAGTUON SA BIBLIA 662,736

Nalikawan ang Gamo sa Minuro

Sa Indonesia, samtang nagaagi ang isa ka grupo sang mga Saksi sa gamay nga minuro pakadto sa lubong nga ila tambungan, natalupangdan sang isa ka payunir nga may pila ka pamatan-on sa higad sang dalan. Gin-istorya niya sila kag ginbilinan sang brosyur nga Pamatii ang Dios Agod Magkabuhi Ka sing Walay Katapusan. Wala madugay, may isa ka sister nga  diri man nag-agi pauli sa ila balay. Ginpalapitan sia sang tawo nga nagauyat sang brosyur nga Pamatii ang Dios kag ginpasalamatan sa paghatag sini sa iya kabataan. “Ginluwas sini ang kabuhi sang akon kabataan!” siling sang tawo. Bangod wala sing hinalung-ong ang sister parte sa una nga paghambalanay, namangkot sia kon ano ang natabo. Nagsiling ang tawo nga ang kabataan nagaplano nga salakayon ang isa ka minuro. Plano nila nga balusan ang nagkastigo sa ila amigo bilang pagsunod sa ila kustombre. Pero sang nabasa nila sa brosyur nga ang mga tawo nga nagapanggamo indi makaistar sa Paraiso, nagkalma sila kag wala na gindayon ang ila plano. Bangod sa sini nga brosyur nalikawan ang gamo sa minuro.

Agi nga Naghimo sing mga Pagbag-o

Nagdaku si Rek sa isa ka tradisyunal nga pamilya sa Cambodia, pero halin sang gamay pa sila sang iya kapid nga lalaki, mga butang nga pangbabayi ang hilig nila. Nagahampang sila sing mga monyika kag mas nanamian sila magsuksok sang bayo sang babayi. Nahuya ang ila iloy kag nabudlayan kon ano ang himuon sa ila. Kon mag-eskwela sila nagasuksok sila sang bayo sang lalaki halin sa ila balay pero nagailis sang bayo sang babayi pag-abot sa eskwelahan. Sang 16 anyos na sila, nag-entra sila sa beauty contest sang mga agi kag natalupangdan nga puede sila himuon nga artista. Sugod sadto nagagua na sila sa mga programa sa telebisyon kag mga komedya. Sang ulihi, nangin homoseksuwal si Rek kag nakig-upod sa iban nga agi.

Sang nagasimba na ang iloy ni Rek ginapaupod niya sia sa simbahan. Bisan pa nagpasugot sia nga  magsuksok sang bayo sang lalaki, indi gid sia magsugot nga paguntingan ang iya malaba nga buhok. Pirme ginapakalain sang pastor si Rek kag ginatamay ang iya pagkabuhi. Bisan pa sini, gusto niya gihapon nga magtuon sa Biblia sa simbahan. Sa una nga semana, aga pa sia nagbugtaw kag nagbisikleta sing pila ka kilometro pakadto sa simbahan, pero ang pastor nangindi sa pagtudlo sa iya. Naugot si Rek kay sang ikaduha nga semana wala na gid nagpakita ang pastor sa iya.

Pagpauli ni Rek, ginsugiran sia sang iya kapid nga may babayi nga nagkadto sa ila balay kag nagtanyag sing libre nga pagtuon sa Biblia. Nagbilin sia sang libro nga Ano Gid ang Ginatudlo Sang Biblia? Nagtuon sila sa Biblia upod sa sister kag sa iya bana. Pero pagligad sang anom ka bulan, nagprangka ang kapid ni Rek nga indi sia handa nga bag-uhon ang iya pagkabuhi gani nag-untat sia sa pagtuon. Pero natandog gid si Rek sa ginsiling sang 1 Corinto 6:9, 10, kag narealisar niya kon ano ang dapat himuon. Paagi sa iya maukod nga pagtuon, pagbasa sing Biblia, pagpangamuyo, kag pagtambong sa mga miting, nangin matinlo ang iya pagkabuhi. Ang iloy ni Rek nagatuon man sa Biblia kag padayon nga nagauswag. Sang mabawtismuhan si Rek, naglumawlumaw gid ang mata sang iya iloy kag nagsiling sia, “Nalipay gid ako nga nabawtismuhan ang akon bata subong isa ka lalaki.” Subong regular payunir na si Rek.

Espiritista nga Naghimo sing mga Pagbag-o

Si Or-Ya isa ka espiritista, manugbulong, manuglaygay, kag manugpamakot. Nabantalaan sia sang nagpamalaybalay ang mag-asawa nga espesyal payunir nga nagaalagad sa Haifa, Israel. Ginsilingan niya sila: “Kon parte ina sa Dios, sulod kamo!” Puno ang balay ni Or-Ya sing mga kagamitan parte sa espiritismo kag relihion.  Suno sa iya nakabaton sia sang mga mensahe halin sa Dios, ang iban paagi sa “espiritu” sang napatay nga rabbi.

Interesado sia sang gintanyagan sing pagtuon sa Biblia gamit ang Ginatudlo Sang Biblia nga libro. Duha ka adlaw antes nagkadto ang mag-asawa sa iya balay, nangamuyo sia sa Dios nga padal-an sia sang makatudlo sa iya sang Biblia nga wala ginabase sa interpretasyon sang mga rabbi. Pagligad sang isa ka bulan, namangkot sia, “May iban pa bala nga relihion nga pareho man sa inyo pagpati?” Nagtambong sia sa miting kag nagdayaw gid sa mainit nga pagbaton kag gugma nga ginpakita sa iya. Halin sadto, regular na sia nga nagatambong.

Pagligad sang duha ka bulan nga pagtuon ni Or-Ya namangkot sia parte sa nagahilapit nga asembleya: “Indi bala nga sa asembleya nagapabawtismo? Kon amo, duha na lang ka bulan agod ihanda ninyo ako para sa bawtismo!” Gani ginpanghaboy niya ang iya malahalon nga kagamitan sa espiritismo. Dayon gin-untatan niya ang iya trabaho subong espiritista kag ginpanaksihan ang iya mga pasyente kag kliyente sadto gamit ang Ginatudlo Sang Biblia nga libro kag mga magasin. Kon magmasakit sia, wala niya ginagamit ang pamaagi sang pagbulong nga ginahimo niya sadto. Bangod gin-untatan niya ang iya pagka-espiritista, apat ka bulan nga wala sia sing kita. Pero namat-od sia nga ang pangitaon niya nga obra apat lang ka adlaw kada semana kag anom ka oras kada adlaw, para may tion sia sa teokratiko nga mga hilikuton. Sang ulihi nakakita gid man sia sang nagakaigo nga trabaho. Dayon ginbaligya niya ang iya daku nga balay kag nag-arkila lang sang gamay nga apartment.

 Sang ulihi nangin kalipikado na si Or-Ya para sa bawtismo. Pero isa ka semana antes ang asembleya nabali ang iya tiil. Wala ini nagpugong sa iya nga magpabawtismo bisan pa ginsemento ang iya tiil. Sa karon si Or-Ya aktibo nga manugbantala nga nagapanaksi sa iya mga kliyente sang una kag nagadumala sing mga pagtuon sa Biblia.

Miembro sang Kulto nga Nakasapo sang Kamatuoran

Nasugdan ang pagtuon sa Biblia sa kapid nga apa sa nabaw-ing kag nabukid nga bahin sang Pilipinas. Miembro sila sang kulto nga nagapati nga wala sing armas nga makahalit sa ila kon magsuksok sila sing mga anting-anting ukon bandana. Ginhanas sila sa pag-uyat sing kutsilyo, binangon, kag pusil. Madamo na sila sing naengkuentro nga mga rebelde sa kabukiran. Nagpasugot ang kulto nga magtuon ang kapid sa Biblia basta indi sila pagpiliton sang mga Saksi nga maghalin sa kulto.

Siempre pa, ginpalig-on sang mga utod ang kapid nga sila ang magadesisyon base sa ila natun-an sa Biblia. Ang isa sa kapid nagbatyag nga indi niya masarangan ang mga pagbag-o nga kinahanglan para makaalagad sa Dios. Pero ang isa nagpadayon sa pagtuon. Para palig-unon sia, ginbuksan sang brother nga nagatuon sa iya ang Biblia kag ginpaathag sa sign language: “Ang imo ngalan nga Samuel ara sa Biblia. Si Samuel sa Biblia nag-alagad sa matuod nga Dios nga si Jehova, asta magtigulang sia. Mahimo mo man mailog si Samuel kag mangin matutom kay Jehova.” Natandog gid sini si Samuel. “Kon ang akon ngalan ara sa Biblia,” siling niya, “dapat dampig man ako kay Jehova.” Ginpahibalo niya sa kulto nga mahalin na sia sa bukid, kag ginsunog ang tanan niya nga anting-anting kag pagkabutang nga may labot sa espiritismo. Madasig ang iya pag-uswag, kag subong bawtismado na sia  nga alagad ni Jehova kag makugi sa pagtudlo sang kamatuoran sa Biblia sa iban nga apa.

Bata nga Nag-atubang sing Paghingabot

Si Rajiv nagaistar sa nabaw-ing nga minuro sa naaminhan nga India. Sang siam sia ka tuig kag Grade 4, gintudluan sila sang ila maestro nga isa ka Saksi ni Jehova parte sa moral nga mga talaksan nga ginagamit ang libro nga Magtuon Gikan sa Daku nga Manunudlo. Nanamian sini si Rajiv kag gin-aplikar ang iya natun-an. Ginsilingan niya ang iya maestro nga wala na sia nagabinutig kag nagapangaway,  kag kon tigpalanyaga ginahatagan niya sing pagkaon ang iban nga wala sing balon.

Ang iya natun-an parte sa ginsaad nga Paraiso nga duta ginasugid niya sa mga tawo sa ila lugar kag sa mga makasakay niya sa tren. Naakig kag nahuya sa sini ang iya mga ginikanan. Ginsilingan nila sia nga untatan ang paghambal parte kay Jehova kag kay Jesus. Kon indi sia magtuman, ginasakit nila sia. Pagpauli niya halin sa eskwelahan ginaubahan sia sang iya iloy para indi sia makagua kag makapakighambal parte sa iya natun-an. Wala nila sia ginapatulog sa iya katre, kag ginalimitahan ang iya pagkaon. Bangod wala sila nagmadinalag-on, nagpatawag sila sang pari.

Pila ka adlaw nga nagtener ang pari sa ila balay kag ginpilit si Rajiv nga payaubon sa santos. Sang nagsiling si Rajiv nga ang santos human lang sa bato kag indi dios nga buhi, ginsilingan sia sang pari nga dapat ‘magtuo lang sia.’ Ina lang ang paagi nga “makita” niya ang dios sa imahen. Nagkuha si Rajiv sang papel kag ginsulatan ini sang “100 ka rupee.” Ginhatag niya ini sa pari kag ginlihug nga magbakal sing mga tsokolate kag ibalik sa iya ang sensilyo. Nagsiling ang pari nga indi sia buangbuang; papel lang ini kag wala sing balor. “Kon magtuo ka lang,” siling ni Rajiv, “makita mo sa papel ang matuod nga balor sang kuarta.” Naakig ang pari kag ginsubsob ang ulo ni Rajiv sa atubang sang imahen. “Napilit mo ako nga magyaub sa imahen,” siling ni Rajiv, “pero indi mo gid mapilit nga magyaub ang akon tagipusuon.” Sang ulihi, naghalin ang pari. Nagsiling sia nga indi na niya mapabag-o ang bata kag kon magtener pa sia, basi madula ang iya pagtuo. Ginsaylo  si Rajiv sang iya mga ginikanan sa lain nga eskwelahan. Pero wala sia nag-untat sa pagpakighambal parte kay Jehova kag sa saad nga Paraiso sa tanan nga gusto mamati sa iya. Subong pulo na sia ka tuig, kag padayon nga nagasalig kay Jehova nga buligan sia nga makapabilin nga malig-on sa iya pagtuo.

Nakita Niya ang Biblia nga Iya Ginapangita

Samtang nagapanaksi si Larisa sa empleyada sang isa ka bookstore sa Armenia, may babayi nga nagsulod kag namangkot kon may ara sing “Bag-ong Kalibutan” nga Biblia. Ang empleyada nagsiling nga wala sia sing amo sina nga Biblia pero kon gusto sang babayi may ara sila sing Biblia sa Armenian nga lenguahe. “Mahapos bala ina intiendihon?” pamangkot sang kustomer. Ginbasa sang empleyada ang pila ka bersikulo kag nagsiling, “Daw maintiendihan man.” Indi kumbinsido ang babayi kag nagsiling nga kinahanglan niya ang “Bag-ong Kalibutan” nga Biblia. Nadumduman ni Larisa nga may ara sia sini sa iya bag. Ginpakita niya ini sa babayi kag ginpangabay nga basahon ang tig-ulo. Ginbasa sang babayi, “Bag-ong Kalibutan nga Badbad.” Ini gid nga Biblia ang ginapangita niya!

Ginpaathag sang babayi nga ang iya bata nga babayi kag ang iya umagad bag-o lang nagtuon sa Biblia sa mga Saksi ni Jehova sa Gresya. Bangod indi pa sila makaintiende sang Griego, nangabay sila nga kon magbisita liwat ang ila iloy dal-an sila sang Bag-ong Kalibutan nga Badbad sa Armenian. Ginhatag sang sister ang Biblia sa babayi kag nagsiling: “Palihug ihatag ini sa ila kag silinga sila nga regalo ini halin kay Jehova.” Nalipay gid ang babayi sang gintanyagan man sia ni Larisa nga tun-an sa Biblia. Naghatagay sila sang ila numero sang telepono agod makaumpisa sila dayon sa pagtuon sa Biblia kon makabalik na ang babayi halin sa Gresya.

• PUNGSOD 47

• POPULASYON 738,679,198

• MANUGBANTALA 1,595,888

• PAGTUON SA BIBLIA 841,260

Gin-uli Niya ang Kahita

Si Nina nga isa ka regular payunir sa Bosnia may Bible study nga isa ka pamilya nga Roma. Isa ka bes, samtang nagalakat sa dalan ang napulo ka tuig nga bata nga babayi sini nga pamilya, may nakita sia nga kahita nga may kuarta, mga credit card, kag mga dokumento. Sang wala pa sia makatuon sang kamatuoran, ginatamod niya nga isa ka regalo ang iya nakita. Gin-istorya niya ang iya iloy, kag nagdesisyon  sila nga ihatag ini sa pulis. Dalayawon gid ang ila ginhimo kay imol ang ila pamilya kag bisan gani tinapay daw indi sila makabakal. Pagligad sang mga duha ka oras sa tapos mahatag ang kahita sa pulis nga natingala gid, may nagtawag sa ila kag ginapabalik sila sa estasyon sang pulis. Nagahulat didto ang tag-iya para pasalamatan sila kag padyaan. Ginhatagan niya sila sing mga $30 (U.S.), katumbas sang duha ka adlaw nga sueldo.

Napukaw ang Iya Interes sa Tig-ulo

Si Nihad, nga taga-Bosnia, bag-o lang nakatapos sa pagbantala. Samtang nagapalapit sia, may nakita sia nga tawo nga nagatindog sa kilid sang iya salakyan. Sang gintamyaw sia ni Nihad, nagsiling ang tawo: “Labay man akon, natalupangdan ko ang magasin sa imo salakyan nga may tig-ulo, ‘Kon Paano Mangin Isa ka Maayo nga Amay.’ Gusto ko tani ina basahon. Mga isa ka oras na ang hulat ko diri. Puede akon na lang ’na?” Nalipay gid si Nihad nga ihatag ang magasin kag ginpanginpuslan ang kahigayunan nga makapanaksi.

Nalugpayan ang mga Tripulante sang Barko

Sang nagabantala ang isa ka mag-asawa sa pantalan sang Rotterdam sa Netherlands nakadtuan nila ang isa ka barko kag nakilala ang isa ka nagapangasubo nga tripulante. Nagalumawlumaw ang mata sang chief engineer nga nagasugid sang mabudlay nga inagihan sang barko. Diutayan lang ini makabunggo kag madamo ini sing guba. Gani nangabay sia, “Puede bala kamo makapangamuyo sa amon?” Nagtanyag ang mag-asawa sing makapalig-on nga pamulongpulong sa Biblia.  Sang masunod nga adlaw, alas siete sang gab-i, nagbalik sila sa barko upod sa duha pa ka mag-asawa. Nagtipon didto ang 15 sa 16 ka tripulante sang barko. Pagkatapos sang nagabukas nga pangamuyo, nagpamulongpulong ang isa ka brother sa tema nga “Mga Kalamidad—Halin Bala sa Dios?” Nabasa sang mga tripulante ang ginsambit nga mga teksto sa Biblia kay gindal-an sila sang mga manugbantala sing mga Biblia kag ginbuligan sa pagpangita sang mga teksto. Sa tapos sang nagatakop nga pangamuyo, nagpabilin nga nagapungko ang tanan nga tripulante kag nakig-istorya sa mga utod. Nalugpayan gid ang mga tripulante kag daku ang ila pagpasalamat. Ang isa sa ila nagsiling, “Amo ini ang sabat sa amon mga pangamuyo.” Nagkuha sila sing 20 ka libro, mga Biblia, kag iban pa nga publikasyon. Dayon, gindaho sang kapitan sa mga manugbantala ang sobre nga may unod nga $200 (U.S.) subong donasyon sa mga literatura.

Nangamuyo Sia nga Mabuligan ang Iban

Si Irene nga taga-Sweden, nagsulat: “Otsenta anyos na ako, kag bangod nagapalanakit ang akon kalawasan indi ako makabantala. Nangamuyo ako kay Jehova nga kuntani mabuligan ko ang isa sang nabantalaan ko sadto kag karon handa na nga makig-istorya ukon mabisitahan.

“Isa ka bes, may nagtawag sa telepono, kag ang bana ko ang nakasabat. Ang babayi nagsiling sa iya: ‘Pasensia na, kamo gid lang ang akon nadumduman, gani gintawgan ko kamo. Puede ayhan makakadto diri ang imo asawa para maistoryahan namon ang Pulong sang Dios? Mga 15 ukon 20 na ka tuig ang nagligad sang nagtuon ako, pero nagapamatok ang akon bana sang buhi pa sia, gani nag-untat ako.’

“Nadumduman ko ini nga babayi kay nag-upod ako sa sister nga naga-Bible study sa iya. Nalipay gid ako  nga nadumduman pa niya ako, gani nakigkita ako sa iya. Halin sadto, nagatuon na kami kada semana. Nagtambong sia sa Memoryal kag sa espesyal nga pamulongpulong. Pirme man sia nagatambong sa mga miting. Ginapasalamatan ko gid si Jehova kada adlaw kay ginasabat niya ang akon mga pangamuyo.”

Indi Puede ang Tsokolate sa Donation Box

Gusto pamatud-an ni Sergio, nga walo ka tuig ang edad nga taga-Italya, sa mga gulang nga handa na sia nga mangin di-bawtismado nga manugbantala. Isa ka bes, nag-upod sia sa iya amay sa pagkay-o sang kandado sang mag-asawa nga mga setentahon ang edad. Nagdala si Sergio sing mga magasin. “Samtang nagaobra si Tatay,” siling niya, “ginpakita ko ang magasin sa tigulang nga lalaki kag nalipay gid sia amo nga gintawag niya ang iya asawa kag ginpakita ini. Dayon ginsulat ko ang ila ngalan, adres, kag numero sang telepono agod mabalikan ko sila. Ginhatag sang asawa ining tanan nga impormasyon sa akon, lakip ang isa ka daku nga tsokolate.” Pagligad sang pila ka adlaw, ginduaw liwat ni Sergio kag sang isa ka gulang ang mag-asawa. Si Sergio ang nag-doorbell. Pagbukas sang asawa, nagsiling si Sergio nga gusto niya sila hatagan sang libro nga Ano Gid ang Ginatudlo Sang Biblia? Nalipay gid ang babayi sa pagbaton sini. Gani ginhatagan sia liwat sing tsokolate. “Indi makaigo ang tsokolate sa donation box, gani ginkaon ko ini,” siling ni Sergio. Nagsiling pa sia, “Nakumbinsi na ang mga gulang nga gusto ko na gid mangin di-bawtismado nga manugbantala.”

Luyag Pa Gid Makatuon sang Pastor

Si Simeon isa anay ka pastor sa simbahan sa Gurkovo sa Bulgaria, isa ka lugar nga wala gid sing Saksi. Bangod sa iya natun-an sa Biblia, nahibaluan niya ang kinatuhayan sang ginatudlo sang Biblia kag  sang simbahan. Isa ka bes, samtang nagasakay sa tren nakabaton sia sing pila naton ka magasin. Nalipay gid si Simeon nga mahibaluan nga si Jehova amo ang matuod nga Dios kag indi matuod ang Trinidad. Luyag gid niya makatuon sing dugang, gani nagsulat sia sa sanga talatapan kag sa tanan nga simbahan nga nahibaluan niya. Isa gid lang ang nagsabat. Ginsilingan sia nga indi niya pagkabalak-an ang mga butang nga “wala sing pulos.” Sa kabaliskaran, ang sanga talatapan nagpadala sing duha ka Saksi nga maglakbay sing mga 35 kilometros halin sa Kazanlŭk. Ginsugdan nila ang pagtuon sa Biblia kay Simeon kag sa iya pamilya. Naluyagan gid ni Simeon ang iya natun-an, kag gin-imbitar niya ang iya mga kaingod kag mga abyan  nga magtambong. Wala madugay 25 ka tawo na ang nagatambong sa pagtuon sa Biblia kada semana. Sa tapos matambungan ang isa ka paghinun-anon sa Biblia sa una nga tion, ang 75 anyos nga kaingod niya naglumawlumaw ang mata nga nagsiling, “Madamo ako sing nahangpan sa sulod lang sang isa ka oras sangsa 30 anyos ko nga pagbalikbalik sa simbahan.” Mga 60 ka tawo ang nagatambong sa miting nga ginadumalahan sang mga utod halin sa Kazanlŭk sa Gurkovo kada bulan, kag 79 ang nagtambong sa Memoryal.

“Padayuna Ina nga Sahi sang Pagkabuhi”

Natalupangdan ni Valya, nga 15 anyos nga sister sa Ukraine, nga ang iya maestra nagasuksok sing itom nga bayo sang nagkadto sa eskwelahan kag nagahibi. Sang nahibaluan niya nga napatay ang iloy sang iya maestra, luyag ni Valya nga lugpayan sia paagi sa paggamit sing kasulatan parte sa pagkabanhaw. Nagdala si Valya sing Biblia kag duha ka brosyur nga Ano ang Nagakatabo sa Aton Kon Mapatay Kita? kag Kon ang Isa nga Ginahigugma Mo Mapatay, kag namat-od nga pagkatapos sang klase istoryahon ang iya manunudlo. Nagsiling sia: “Samtang nagahulat ako sa puertahan sang iya opisina ginakulbaan ako, gani nangamuyo ako kay Jehova nga buligan ako.”

Sang nagsulod si Valya sa opisina, namangkot ang iya maestra, “Ano tani?”

“Gusto ko ikaw nga lugpayan kay naintiendihan ko ang imo ginabatyag. Pila pa lang ka tuig nga napatay ang akon lolo.”

Natandog gid sini ang maestra ni Valya. Naghibi sia kag nagsiling nga wala gid sa iya mga himata ukon katrabaho ang nagpakita sing sinsero nga pag-ulikid sa iya. Ginbasa kag ginpaathag ni Valya ang Bugna 21:3, 4. Dayon, ginbaton sang maestra ang mga brosyur kag nagsiling, “Lain ka gid sa iban nga estudyante.”

 Nagsabat si Valya, “Ginatinguhaan ko gid nga basahon ang Biblia kag sundon ang ginasiling sini, kag ginasunod ko ang akon mga ginikanan.”

Bangod sa pangabay sang maestra, gindalhan sia ni Valya sang Biblia kag libro nga Ginatudlo Sang Biblia. Nagpasalamat gid ang maestra kag ginsilingan si Valya: “Matuod gid ang inyo relihion, kag kanami gid sang imo mga ginikanan kay gintudluan ka kon ano ang husto. Padayuna ina nga sahi sang pagkabuhi.”

Nagsala Sia sa Pagdayal sang Numero

Sang una nga adlaw sang distrito nga kombension sang 2011 nga ginhiwat sa Malakasa sa Gresya, tawgan tani ni Natalie sa iya cell phone ang iya amay parte sa bus nga pagasakyan pakadto sa kombension. Pero, nagsala sia sa pagdayal sang numero, kag wala sing nagsabat. Sang ulihi, ang tawo nga natawgan niya nagtawag para hibaluon kon sin-o sia. Pero nagasugod na ang programa sang kombension, kag sa baylo nga patyon ang iya cell phone, di-hungod nga napindot niya ang “sabat.” Gani nabatian sang tawo ang bahin sang pamulongpulong sang tsirman, nga nakapainteres gid sa iya.

Sang ulihi, nag-text sa iya ang tawo: “Sin-o ka? Pari ka?” Pagkatapos sang sesyon sang aga, nabasa ini ni Natalie kag ginbalusan: “Indi ako pari. Isa ako sa mga Saksi ni Jehova, kag nagatambong ako sa kombension.”

Sang Sabado nagtawag liwat ang tawo kag namangkot kon may kombension pa. Ginpanaksihan sia sang amay ni Natalie, dayon nagsiling ang tawo, “Pila pa lang ka minutos, nasabat sang pamulongpulong nga nabatian ko sa cell phone ang madamo nga pamangkot nga nagatublag sa akon.” Ang pamilya gali sang tawo ginatublag sang mga demonyo kag wala sia sing ideya kon sin-o ining mga espiritu kag kon ngaa nagakatabo ini.  Nagpaathag sia: “Indi ko gusto makig-istorya sa mga Saksi ni Jehova asta subong. Pero puede ko bala maistorya ang tawo nga naghatag sing pamulongpulong?”

Puede gid. Ang tawo nagtambong sang Domingo kag nalipay gid sia nga makita ang mga pamilya nga nakailis sing pormal kag malipayon. Wala sing nagapamuyayaw, nagapanigarilyo, kag nagalinapta nga basura. “Wala gid ako maghunahuna nga may mga tawo pa gali sa duta nga kaangay sa inyo!” siling niya. “Pamatyag ko daw ara ako sa iban nga planeta.” Gindala sia sang amay ni Natalie sa opisina sang tsirman, kag didto nag-istoryahanay sila sang tsirman. Nagdayaw gid ang tawo sa kombension kag sa nabaton niya nga mga sabat. Nagbaton sia sing Biblia, mga magasin, kag libro nga Ginatudlo Sang Biblia, kag naghimo sing kahimusan para mabisitahan sia.

• PUNGSOD 29

• POPULASYON 38,495,300

• MANUGBANTALA 94,924

• PAGTUON SA BIBLIA 59,431

“Ang Pinakamatahom nga Ambahanon nga Nabatian Ko”

Sa Savaii, Samoa, kinaandan na nga antes sang klase, ang tanan sa eskwelahan nagatipon agod kantahon ang ila pungsudnon nga ambahanon. Apang matinahuron nga gin-istorya nanday Celina kag Levaai, lima kag anom ka tuig ang edad, ang ila prinsipal nga indi sila magkanta kay mga Saksi ni Jehova sila. Pero mahimo sila silutan kon himuon nila ini. May nahunahuna ang prinsipal para mahuy-an  sila kag mapilitan sa pagkanta, gani nagsiling sia, “Kon indi kamo magkanta sang amon ambahanon, magkanta kamo sang inyo.” Gani, ginkanta nanday Celina kag Levaai ang ambahanon numero 111, “Magapanawag Sia,” nga bag-o lang nila nasaulo sa ila Pangpamilya nga Pagsimba. Pagkatapos nila kanta, naglumawlumaw ang mata sang prinsipal kag nagsiling: “Ina ang pinakamatahom nga ambahanon nga nabatian ko. Palihug kantaha n’yo liwat.” Ginkanta nila ini liwat. Dayon ginsilingan niya sila, “Sugod subong, indi ko na kamo pagpakantahon sang amon kanta, kundi ang inyo na ambahanon.”

Sa Bug-os Niya nga Kabuhi kay Jesus Sia Nagapangamuyo

Sa Fiji ang isa ka ministro sang lokal nga simbahan nagtambong sa pagtuon sa Biblia nga ginhiwat sa isa ka tawo. Nabatian niya sa pagtuon nga si Jesus indi Dios. Natublag gid sia kag indi makatulog. Bangod sini, ginsilingan sia sang iya asawa, “Indi ka na magpamati sa sina nga mga tawo!” Pero indi gid madula sa iya hunahuna ang iya nabatian. Pagkasunod nga semana nagtambong naman sia liwat. Mga pila pa lang ka adlaw pagkatapos sang iya ikaduha nga pagtambong, kag bisan wala pa sia ginatun-an sing personal, nagkadto sia sa simbahan kag nag-untat sa iya trabaho subong ministro. Nakibot gid kag naakig ang iya mga paryente kag mga upod sa simbahan. Indi lang simbahan ang iya ginbayaan kundi pati na ang trabaho nga daku ang sueldo. Sa bulig sang  Biblia, nahangpan niya dayon ang kamatuoran parte kay Jesus, pero nabudlayan gid sia mangamuyo kay Jehova kay sa bug-os niya nga kabuhi kay Jesus sia nagapangamuyo. Pagligad sang pila ka bulan, nakapangamuyo na gid man sia kay Jehova. Subong, nagapakigbahin na sia sa pagpaambit sa iban sang maayong balita kag ginabuligan sila nga makilala kag higugmaon si Jehova.

Ang Gamay nga Komunidad Nagbaton sang Kamatuoran

Sisentay dos lamang ka tawo ang nagaistar sa isla sang Makatea sa South Pacific. May isa ka kongregasyon sang mga Saksi ni Jehova sa Tahiti nga nagaatipan sang espirituwal nga kinahanglanon sang mga tawo diri. Siam ka pumuluyo sini ang regular nga ginatun-an sa Biblia paagi sa telepono. Mga 15 ka tawo ang nagatipon sa balay sang isa sa mga ginatun-an sa Biblia agod mamati sa mga miting nga ginahiwat sa Tahiti. Ang isa sa mga ginatun-an subong amo ang bataon nga babayi nga ginakabig nga haligi sa ila simbahan kag ginapaabot nga mangin deakonesa. Sining karon lang, nagkadto sia sa ila simbahan para ipaathag kon ngaa wala na sia nagasimba. Ginpakita niya halin sa Biblia kon ngaa ang mga babayi indi dapat magpanudlo sa kongregasyon. Ginpaathag man niya ang papel ni Jesucristo kag ang kahulugan sang Panihapon sang Ginuo, nga dapat isa ka bes lang saulugon kada tuig, kag indi kada Domingo. Ginpaathag pa gid niya nga 144,000 lang ang makaupod sang Cristo sa langit kag sila lang ang dapat makigbahin sa mga emblema sa Memoryal. Napalig-on sa iya ang isa ka babayi kag nagbiya man sa simbahan, kag subong regular na nga nagatuon sa Biblia sa mga Saksi.

Ginbaton sang Pamilya ang Imbitasyon

Para maimbitar ang mga di-aktibo sa pagtambong sa Memoryal, ginduaw sang duha ka gulang sa Solomon Islands si Joshua, nga wala na gid makatambong sa mga  miting halin pa sang 1998. Para makatambong sa Memoryal, naglakat si Joshua upod sa 20 ka miembro sang iya pamilya sing duha ka oras. Nakahibi si Joshua kay mainit sila nga gin-abiabi sang mga kauturan. Madamo man sa ila ang nagtambong sa pinasahi nga pamulongpulong kag nagsiling sa mga gulang nga gusto nila magtuon sa Biblia. Naghimo sing kahimusan para matun-an sa Biblia ang 15 sa ila.

Nahibaluan Niya ang Sabat

Sa sobra 1,000 ka isla, nga sakop sang teritoryo sang sanga sang Guam, sobra 100 sini ang may nagaistar. Pero 13 lang sa sini ang malapit sa kongregasyon. Bangod madamo nga isla ang wala pa gid makadtuan sang mga Saksi ni Jehova, padayon nga nagapangita sing pamaagi ang mga kauturan agod mabantalaan ini. Gani sang Abril 2012, isa ka grupo sang mga manugbantala ang nagsakay sa baruto pakadto sa Polowat, ang isa sa pinakamalayo nga isla. Ang mga tawo sa Polowat  masiling nga daw wala sing hinalung-ong sa nagakatabo sa kalibutan. Ang mga lalaki nagabahag lang, nagahimo sing mga baruto, kag nagapanguma para makakaon.

Ginpamangkot sang isa ka manugbantala ang pamatan-on nga lalaki didto, “Ano ang matabo kon mapatay kita?”

“Nahibaluan ko ang sabat sa sina nga pamangkot!” siling niya. Ginkuha niya sa iya bulutangan ang libro nga Mahimu Ka Mabuhi sing Dayon sa Paraiso sa Duta sa Chuukese nga lenguahe kag ginbuksan ini sa listahan sang mga kaundan. Gintudlo niya ang kapitulo 8 nga may tig-ulo, “Ano ang Nagakatabo Kon Mapatay ang Isa?” kag malipayon niya nga ginpaathag kon ano ang iya natun-an sa libro.

Diin niya nakuha ini nga libro? Sang 2009, ang mga manugbantala sa Chuuk nagkadto sa mga pantalan para magpanaksi sa mga tawo nga nagabiyahe pakadto sa malayo nga mga isla kag nakapahamtang sila sing mga libro nga Mabuhi sing Dayon. May isa ka taga-Polowat nga nagpasugot nga magdala sang isa ka kahon nga libro para ipanagtag sa iya mga kaingod, kag isa sa ila ining pamatan-on nga lalaki.

Antes sila maghalin sa Polowat, pila ka beses nga ginduaw sang mga utod ining lalaki agod palig-unon ang iya pagtuo kag ipakita kon paano sia makabenepisyo sa programa sang pagtuon sa Biblia. Gintudluan man nila sia kon paano mangita sang teksto kag magsulat sang importante nga mga punto sa marhin sang iya libro.

Makalilipay gid mahibaluan nga bisan sa malayo nga mga isla nga wala sing telebisyon, radyo, pamantalaan, ukon Internet, ang aton mga literatura nagabulig sa mga tawo nga matun-an ang kamatuoran, sa ila mismo lenguahe!

Tatlo ka Bala, Tatlo ka Rason

Si Anna nga mga beintehon ang edad, di-bawtismado nga manugbantala sang maglala ang inaway sibil sa  Bougainville sa Papua New Guinea. Sang 1991, isa sia sa grupo sang anom ka adulto kag pito ka kabataan nga mga Saksi sa kongregasyon sang Arawa, nga napilitan malagyo sa mga kasiutan nga halos wala sing dala nga gamit. Sa sulod sang duha ka tuig, nagapanglaghap sila sang ila pagkaon kag nag-istar sa mga balay nga ginbayaan na. Nagahiwat sila sang mga miting nga ang ginagamit lang amo ang duha ka libro, ang Biblia ni Anna kag ang Nahiusa sa Pagsimba sa Lamang Matuod nga Dios. Nagapangamuyo sila sing tingob, nagakanta sang ambahanon parte sa Ginharian, kag nagabantala sa mga masumalang nila.

Natultulan sila sang mga rebelde kag gusto nila nga mag-entra ang duha ka utod nga lalaki sa ila grupo. Apang ginrespeto nila ang neutral nga tindog sang mga Saksi. Isa ka bes, ginpakita sang isa ka soldado ang tatlo ka bala kay Anna kag ginsilingan sia, “Magpakasal ka sa akon kay kon indi patyon ko ikaw.” Ginhatagan sia ni Anna sing tatlo ka rason—isa para sa kada bala—kon ngaa indi sia puede magpakasal sa iya. Ang panguna nga rason amo ang ginasiling sang Biblia nga magminyo “lamang sa Ginuo.” (1 Cor. 7:39) Ang lalaki nagtalikod kag naglakat.

Sang 2012, nabatian ni Anna nga isa na ka regular payunir, nga nagakinahanglan sing mga manugbantala sa Arawa. Gani nagbalik sia didto upod sa iya partner nga payunir man para magbulig sa pagtukod sang grupo. Ginpamangkot sia kon bala wala sia nahadlok magbalik sa lugar diin naeksperiensiahan niya ang grabe nga pinatyanay kag kabudlayan sa tion sang inaway. “Nalipay ako nga magbalik diri,” sabat niya. “Wala sing makapauntat sa hilikuton ni Jehova, bisan pa ang mga inaway sibil.”