Si Thomson, nga isa ka pamatan-on nga lalaki nga taga-Uganda, nadulaan na sing gana sa relihion. Nag-untat na sia sa pagsimba bangod pirme lang nagapangayo sing kuarta ang mga klero. Pero, ginabasa niya gihapon ang Biblia kada adlaw. Interesado gid sia sa tulun-an sang Bugna kag ginasulat niya sa notebook kon ano ang iya naintiendihan. Nagabasa sadto si Thomson sang  Biblia sa iya ulubrahan sa gamay nga construction site sang naistorya sia sang isa ka brother. Maayo ang ila pag-istoryahanay kag ginbaton ni Thomson ang libro nga Ano Gid ang Ginatudlo sang Biblia? Naubos niya ini basa sa isa lang ka gab-i. Pagkasunod nga adlaw, ang brother nakabaton sing text nga nagasiling: “Salamat sa Ginuo bangod sa impormasyon nga ginhatag mo sa akon. Handa na ako nga bayaan ang Babilonia nga Daku.” Luyag niya matigayon ang tanan nga publikasyon nga makita sa mga footnote kag apendise sang libro. Maayo gid sia nga estudyante sa Biblia kag madasig ang iya pag-uswag amo nga sang 2012 “Bantayi ang Imo Tagipusuon!” Distrito nga Kombension, nagpabawtismo sia. Sang Marso 2013, si Thomson nangin regular payunir kag nagabulig man sa iban nga bayaan ang Babilonia nga Daku.

Si Jimmy nagdaku sa Port Louis, ang kapital sang Mauritius. Nagsugod sia sa pag-inom sa edad nga 16 kag hubog sia kada adlaw. Kon makainom sia, nagakadulaan sia sing pagpugong sa kaugalingon kag pila ka beses nga napriso. Kon kaisa makaubos sia sing tatlo ka botelya sang rum kag 60 ka sigarilyo sa isa ka adlaw. Kon wala na sia kuarta, ginainom niya ang pangtinlo sa bintana. Ginainom pa gani niya ang pahumot sang iya iloy. Sang may nagmuno sa iya nga daw bangkay na sia tan-awon, nagparehab sia sa sulod sang isa ka tuig kag tunga, pero wala ini nakabulig sa iya.

Sang ulihi, nakilala niya ang mga Saksi ni Jehova kag nagtuon sia sa Biblia. Kon kaisa, ginabayaan niya ang nagatuon sa iya para mag-inom. Sa kabilugan walo ka brother ang nagtuon sa iya. Narealisar niya sang ulihi nga dapat sia magbag-o. Sia nagsiling: “Daw ginapilas ang akon tagipusuon sang espirituwal nga espada sa  Hebreo 4:12. Isa ka bes, nabasa ko ang Hulubaton 24:16, nga nagasiling: ‘Ang matarung nga tawo mapukan sing makapito, kag nagabangon liwat.’ Amo yadto ang nagpahulag sa akon nga magbag-o.” Bisan pa si Jimmy ‘napukan’ sa pito ka brother nga nagtuon sa iya, determinado sia nga magbag-o kag ‘magbangon’ sa bulig sang ikawalo nga brother. Nangabay sia kay Jehova sing kusog, nagtambong sa mga miting, kag gin-untatan ang iya mga bisyo. Nabawtismuhan sia sang 2003 kag nangin regular payunir sang 2012. Ministeryal nga alagad sia karon sa isa ka kongregasyon sa isla sang Rodrigues.

Ang 70 anyos nga taga-Kenya nga si Mary miembro sang Presbyterian Church halin sang bata pa sia. Aktibo sia sa pagpangayo sing donasyon kag nakabulig pa gani sa pagpatindog sing isa sa mga simbahan sa ila lugar. Sang nangin Saksi ang isa niya ka bata nga lalaki, nasubuan gid sia. Kon agdahon sia sa mga miting sang kongregasyon, nagapangindi sia kay luyag niya mabatian ang mensahe sang Biblia sa iya lenguahe nga Kikuyu, kag indi sa Swahili. Sang ulihi, ginbaton niya ang pangagda nga magtambong sa distrito nga kombension sa Kikuyu. Sa duog sang kombension nagpungko sia sa pulungkuan para sa mga tigulang. Nagdayaw gid sia sa kaayo kag mahigugmaon nga pagpakig-angot sa iya, nga wala niya mabatyagan sa ila simbahan. Namati gid sia sing maayo kag nanamian sa tanan nga pamulongpulong. Sang gintanyagan sia sang pagtuon sa Biblia sa brosyur nga Listen to God, ginbaton niya ini gilayon.

 Pagkatapos sang pila ka bulan nga pagtuon, nagdesisyon si Mary nga mangin Saksi ni Jehova, gani naghalin sia sa ila simbahan. Naakig gid ang ila mga lider, gani ginpakadto nila ang pastor halin sa kapital nga Nairobi para istoryahon si Mary. Ginkumbinsi sia sang pastor nga magpabilin, pero nangin malig-on gid sia. “Kon maghalin ka sa simbahan, sin-o ang imo mangin abyan?” pamangkot niya. “Madamo ka sing abyan kag kaingod nga kaupod naton.”

“Si Jehova kag ang mga anghel ang akon mangin abyan,” sabat ni Mary. “Kag ang mga Saksi mangin abyan ko man.”

Wala gid makumbinsi si Mary, gani naghalin na lang ang pastor. Nagauswag si Mary sa pagtuon sa Biblia kag padayon nga nagatambong sa tanan nga miting bisan pa malayo ang iya ginaistaran. Isa ka bes, wala sia makasakay sa pangpubliko nga salakyan pakadto sa miting. Pero naglakat gihapon sia sing duha ka oras bisan pa nagaulan. Ginapamatukan si Mary sang iya mga kaingod, apang determinado gid sia nga lab-uton ang iya tulumuron nga magpabawtismo.

Ang 14 anyos nga babayi nga si Ashton nagaistar sa Cameroon. Sang nagtuon sia sa Biblia upod sa mga Saksi ni Jehova, matigdas sia nga ginpamatukan sang ginaistaran niya nga tiyo kag tiya. Ginapilit nila sia nga magtambong sa relihioso nga pagtilipon sang mga Pentecostal. Sa isa sa mga seremonya, ginatungtong sang pastor ang iya mga kamot sa ulo sang tumalambong para ipasa ang “espiritu,” gani nagakatumba sila. Pero si Ashton wala matumba. Padayon nga nangamuyo ang pastor, pero nagatindog gihapon si Ashton. Gani gintiklod sia sang pastor para matumba. Pagpauli nila, ginsugid niya ini sa iya tiyo kag tiya, pero wala sila nagpati. Sa sina mismo nga tion, nagdesisyon sia nga indi na magbalik sa simbahan. Sa karon, bisan pa sang pagpamatok kag pagyaguta sang iya pamilya kag mga kaingod, padayon si Ashton sa pagtambong sa mga miting sa Kingdom Hall.

Wala pa isa ka tuig kag tunga si Anilpa, pero makugi na sia nga nagapakigbahin sa pagpangagda sa iban nga magtambong sa distrito nga kombension sang nagligad nga tuig sa Angola. Si Anilpa amo ang nagapanuktok sang puertahan kag nagadaho sang imbitasyon sa tagbalay, dayon ang iya iloy ang nagapaathag sang ila katuyuan. Kon kaisa indi na makahulat si Anilpa nga makatapos ang iya iloy kag gusto na niya manuktok dayon sa masunod nga balay. Nanamian gid sa iya ang mga tagbalay, amo nga sang katapusan nga adlaw sang kombension,  may babayi nga nagpalapit kay Anilpa kag nagsiling: “Ginapangita ko ikaw. Nalipay gid ako nga makita ka. Ikaw gid abi ang nag-imbitar sa akon sa sini nga kombension.”

Sang Agosto 2012, ang mga manugbantala sang Antaviranambo Congregation sa Madagascar nakasapo sang isa ka grupo sang mga tawo nga luyag mangin mga Saksi ni Jehova. Pamatyag nila ginapigos sila sang mga lider sang simbahan, kay lain ang ila ginatudlo kag lain man ang ila ginahimo. Ini nga mga miembro nagsiling nga ang ila mga simbahan wala sing mga programa para tudluan sila sa Biblia kag wala man sing mga publikasyon nga nagapaathag sang ila mga pagpati. Mahal ang ila ginabayaran sa simbahan, kag wala sila sing matuod nga paghiliutod kag Cristianong gugma. Nagsiling man sila nga indi amo sini ang mga Saksi ni Jehova.

Sang ulihi, ini nga grupo nagsulat sa sanga talatapan, nga nagasiling: “Nagasulat kami para ipahibalo sa inyo nga luyag namon alagdon si Jehova. Pero malayo ang  amon lugar. Ang iban sa amon nagalakat sing 9 asta 15 ka oras pakadto sa ginahiwatan sang mga miting. Gani nagapakiluoy kami nga magpadala kamo sang magbulig sa amon nga tun-an ang Biblia. Indi namon maalagad sing bug-os tagipusuon si Jehova kon indi ninyo kami pagbuligan nga magbakod ang amon gugma sa iya. Nagadamo kami sing 215 sa di-magkubos tatlo ka minuro. Lainlain ang amon relihion, pero subong gusto namon tanan nga alagdon kag tumanon si Jehova sing bug-os tagipusuon. Nagasalig kami sa inyo bulig.”

Gani naglakat ang mga kauturan sing siam ka oras pakadto sa una nga minuro. Naghiwat sila didto sing miting kag 65 ka interesado ang nagtambong. Madasig nga naglapta ang balita, kag luyag man sang mga pumuluyo sa iban nga minuro nga kadtuan sila kag tudluan sa Biblia. Gani, naglakat naman ang mga utod sing apat ka oras pakadto sa ikaduha nga minuro kag naghiwat sing miting nga gintambungan sang 80. Ang iban sa ila nakitluoy nga kadtuan man ang ila minuro, nga duha ka oras pa nga lalakton. Nagpasugot ang mga utod kag naghiwat man sing miting didto, kag kapin sa 50 ang nagtambong.

Sa duha ka magkatuhay nga okasyon, kapin sa 30 sining mga interesado ang nagtambong sa asembleya sa Mahanoro, nga tatlo ka adlaw nga lalakton pakadto-pabalik. Nagtambong man sa duaw sang manugtatap sang sirkito ang 25 sa ila, nga ginahuman sang mga mag-asawa, bilog nga pamilya, kag bisan mga tigulang. Nagdayon sila sa isa lang ka balay kag nagpaambit sang ila mga natun-an kag nagpautwas sing mga pamangkot asta sa kagab-ihon. Nagapati gid sila nga madamo pa ang luyag magsimba upod sa mga Saksi bangod natak-an na sila sa pagpamigos sang ila relihioso nga mga lider.