Sa Las Vegas, Nevada, may isa ka mag-asawa nga indi Saksi nga gusto mangabuhi sing malinong. Gani ginbaligya nila ang ila balay para magsaylo sa Dominican Republic. Pero kinahanglan maghalin na sila sa ila balay napulo ka adlaw antes sang ila flight. Gani, gin-agda sila sang ila kaingod nga mga Saksi ni Jehova nga magdayon lang anay sa ila balay.  Samtang didto ang mag-asawa, nagtambong sila sa miting sa Kingdom Hall. Sang ginsambit ang petsa nga 1914, napukaw ang ila interes. Nahibaluan nila nga importante ini nga petsa sa kasaysayan sang kalibutan. Pag-abot nila sa Dominican Republic, nangabay sila sing pagtuon sa Biblia sa Saksi nga nagbantala sa ila. Pagligad sang 14 ka bulan, dedikado na sila kag bawtismado nga Saksi.

Ang mga utod nagdispley sing mga literatura sang ginhiwat ang 2012 International Book Fair sa Panama City, Panama. May duha ka estudyante nga babayi nga nagpalapit sa displey. Ang isa sa ila nagpabutyag sang iya problema sa sister nga nagabantay. Nagsiling sia nga ang iya amay adik sa droga kag wala sia makahibalo kon ano ang iya himuon. Ginpakita sang sister sa iya ang kapitulo 23 sang libro nga Questions Young People Ask—Answers That Work, Volume 2, nga natig-uluhan, “What if My Parent Is Addicted to Drugs or Alcohol?” Ang estudyante nagsiling: “Amo gid ini ang akon kinahanglan!” Ginhakos sang mga estudyante ang sister kag nagbalik pagligad sang isa ka oras para pasalamatan sia liwat. Sa sulod sang lima ka adlaw nga okasyon, ang mga utod nakapahamtang sing 1,046 ka libro, 1,116 ka magasin, kag 449 ka brosyur. May 56 nga naghatag sang ila adres para maduaw sila sang mga Saksi.

Si Fredy, nga ang namat-an nga lenguahe Cabecar, nagaistar sa mabukid nga komunidad sa Costa Rica. Mga apat ka tuig sadto, samtang nagaobra sia sa kapital sini nga San José, nakatigayon si Fredy sang libro nga Ano Gid ang  Ginatudlo sang Biblia? kag brosyur nga Ano ang Ginapatuman Sang Dios sa Aton? Ginsilingan sia sang manugbantala nga naghatag sini nga magpauli sia sa ila lugar kag magbantala didto, gani nagpauli sia. Gintun-an ni Fredy ang libro kag naghimo sing mga pagbag-o sa iya kabuhi, kaangay sang pagparehistro sang ila kasal. Dayon gintudluan niya sing kamatuoran ang mga nagahambal sing Cabecar tubtob sa iya masarangan.

Naghiwat sing mga klase si Fredy para sa iya mga estudyante sa Biblia. Ginbahin niya sila sa anom ka grado suno sa resulta sang eksam sa Biblia nga ginhatag niya. Nag-organisar man sia sing mga miting kag naghiwat pa gani sing Memoryal. Sia lang ang naghimo sing mga imbitasyon, kag ini nagasiling: “Ang mga Saksi ni Jehova nagaagda sa imo nga magtambong upod sa amon sa Memoryal sang kamatayon ni Cristo.” Ginhimo niya ini sa sulod sang apat ka tuig nga wala sing bulig halin sa mga Saksi! Pero, nangamuyo sia kay Jehova nga magpadala sing mga Saksi para buligan sia.

Sining karon lang, ginsabat ang pangamuyo ni Fredy. Bisan pa mabudlay ang pagbiyahe, nagkadto gid ang pila ka Saksi kag nalipay sila sa tanan nga ginpangabudlayan ni Fredy. Sila nagsiling: “Bisan indi pa bawtismado si Fredy, daw Saksi na gid sia!” Pagligad sang tatlo ka bulan, gin-aprobahan sia bilang di-bawtismado nga manugbantala. Agod mabawtismuhan, nagdulhog si Fredy para magtambong sa iya una nga kombension, upod ang 19 niya ka estudyante sa Biblia. Subong, nag-organisar pa gid sia sing tatlo ka grupo nga nagahambal sing Cabecar sa mas malayo pa gid nga mga lugar.

Si Anna nga estudyante sa hayskul sa Estados Unidos, nag-atubang sing pagtilaw sa iya pagtuo. Isa ka bes, naakig  gid ang pila niya ka klasmeyt bangod wala sia nagapati sa Trinidad. “Ginpulihan nila ako,” siling ni Anna, “pero nagkalma lang ako kay indi ko gusto nga may mahambal nga malain sa mga Saksi ni Jehova ang mga nagatan-aw.” Pagkagab-i nangamuyo sia kay Jehova nga nagapangayo sing kaisog, kag nag-research parte sa doktrina nga Trinidad. Pagkaaga, gindala ni Anna ang iya Biblia sa eskwelahan. Ginpalibutan sia sang iya mga klasmeyt kag madamo ang nagsuya sa iya. Pero nangisog sia nga ipaambit sa ila ang pila ka kasulatan kag nangatarungan sa sini. Sang ulihi, daw nakum-an ang mga nagabais sa iya. Ang ila liderlider nga presidente sang klase nagsiling sang ulihi nga ginarespeto na niya ang mga Saksi ni Jehova. Sa bilog nga tuig sang klase, madamo sia sing pamangkot kay Anna parte sa ginapatihan sang mga Saksi.

Isa ka Domingo sang aga, ang pamatan-on nga babayi sa Barbados nagalakat pakadto sa simbahan sang mabitas  ang strap sang iya sapatos. Nangayo sia sing bulig sa malapit nga balay para kay-uhon ini. Natabuan nga ang nagaistar diri Saksi nga sister upod sa iya bata nga babayi. Samtang ginakay-o niya ang iya sapatos, ginpaathag sang sister kon paano nagakatuman subong ang mga tagna sa Biblia. Gin-agda sia sang bata sang sister nga mag-upod sa ila miting sa Kingdom Hall sina nga aga. Bangod leyt na sia sa ila simbahan, nagpasugot sia nga mag-upod. Sa tion sang miting, ginabasa niya ang tanan nga kasulatan sa iya Biblia nga King James. Nanamian gid sia sa programa. Suno sa iya, natak-an na sia sa gahod sang tambor kag pagsinggitanay sa ila simbahan, kag halin sang una gusto gid niya tun-an ang iya Biblia sing malinong. Ginbaton niya ang pagtuon sa Biblia sa libro nga Ginatudlo sang Biblia. Nagatambong na sia sa tanan nga miting kag nalipay gid sa pagpakigbahin.

Ang isa ka pamatan-on nga brother sa Guyana nagsiling: “Nanamian ako magpanaksi sa akon mga klasmeyt sa eskwelahan, pero may isa ka bata nga lalaki nga naakig kon magbantala ako. Isa ka bes, gintiklod niya ako sa dingding kag ginsilingan, ‘Untati na ang pagwali!’ Ginsilingan ko sia nga ang makapauntat lang sa akon amo si Jehova. Bangod nagabantala gihapon ako ginlaslas niya ang akon backpack kag ginsumbag ako sa guya, amo nga nagisi ang akon bibig. Ginpatawag kami sa opisina sang prinsipal. Ginpamangkot niya ako kon ngaa ginsumbag ako. Nagsabat ako nga nagabantala ako sang maayong balita. Namangkot ang maestra kon ngaa wala ako nagbalos, kag nagsiling pa sia nga amo sina kuntani ang ginhimo ko. Nagsabat ako nga natun-an ko sa Biblia sa Roma 12:17 nga ang mga Cristiano ‘indi dapat magbalos sang malaut sa malaut kay bisan sin-o.’ Sang mabatian ini, ginpalakat niya ako kag nagsiling nga sia na ang bahala sa bata nga nagsumbag sa akon.”