ISA ka hapon, nagsulod sa amon banwa ang mga rebelde kag nagpinalupok sang pusil sa sulod sang duha ka oras. Ang pila sa ila bata pa nga haluson makadala sang ila armas. Tama sa ila kahigko, nagaulukay ang buhok, kag daw nakadroga.

Pagkadason nga adlaw ginpamatay na nila ang mga tawo. Ang iban wala-kaluoy nga ginkastigo kag ang mga babayi ginpanglugos. Tama kagamo sang palibot. Si Brother Amara Babawo kag ang iya pamilya upod sa apat ka interesado nagdangop sa amon balay. Grabe gid ang amon kahadlok.

Sang ulihi, ang kumander sang mga rebelde nagkadto sa amon kag ginmanduan kami nga magreport pagkaaga kay hanason kami sa pag-inaway. Determinado kami nga magpabilin nga neutral bisan pa patyon nila kami. Halos bug-os nga gab-i nga nangamuyo kami. Pagkaaga, aga pa kami nagbugtaw, nagbinagbinag sang teksto, kag naghulat sa mga rebelde. Pero wala na sila nagbalik.

 Wala madugay, ang opisyal sang mga rebelde upod sa apat niya ka tinawo nag-istar sa balay. Ginsilingan nila kami nga magpabilin, gani padayon kami nga nagahiwat sing mga miting kag nagabinagbinag sing teksto kada adlaw sa balay. Ang iban nga rebelde nagsiling: “Adlaw-adlaw kamo nga nagabasa sang teksto. Siguro mga Saksi ni Jehova kamo.” Indi sila interesado sa Biblia pero ginatahod nila kami.

Isa ka bes, nagkadto ang ila kumander kag gin-inspeksion ang tropa nga nagaistar sa balay. Nagsaludo sia kay Brother Babawo kag ginkamusta ini. Ginsilingan niya ang tropa: “Ini nga tawo boss ko kag boss man ninyo. Makatilaw gid kamo kon mahulog bisan ang isa lang ka buhok sini nga tawo ukon sang iya mga kaupod. OK?” “Huo, sir!” sabat nila. Dayon ginhatagan kami sang kumander sing sulat nga nagamando sa Revolutionary United Front nga indi kami paghalitan kay mahidaiton kami nga mga pumuluyo.

Pila ka bulan sang ulihi, nag-ilinaway ang lainlain nga partido sang mga rebelde, gani nagpalagyo kami sa Liberia. Didto ginpahog kami sang isa pa ka rebelde nga grupo. “Mga Saksi ni Jehova kami,” siling namon sa ila. “Ti ano ang ginasiling sang Juan 3:16?” pamangkot sang isa sa ila. Sang nahambal namon ang kaundan sang teksto, ginpalakat niya kami.

Sang ulihi, nasumalang namon ang isa pa ka kumander sang rebelde kag ginmanduan niya kami ni Brother Babawo nga mag-upod sa iya. Kinulbaan gid kami. Dayon nagsiling sia nga nagatuon sia upod sa mga Saksi antes sang inaway. Ginhatagan niya kami sing kuarta kag ginpangabay namon sia nga ihatag ang sulat sa mga kauturan sa malapit nga kongregasyon. Wala madugay, duha ka brother ang nag-abot dala ang mga suplay kag gindul-ong kami sa lugar nga luwas sa katalagman.